ထိုင်းနိုင်ငံတွင် မြန်မာအလုပ်သမား ရှစ်ဦး ဖမ်းဆီးခံရ

ထိုင်းနိုင်ငံ ရယောင်းခရိုင်ရယောင်းမြို့ Huay Pong အိမ်ရာဝင်းအတွင်းရှိ မြန်မာအလုပ်သမား
၅၀ နှင့် ကမ္ဘောဒီးယားအလုပ်သမား၁၅ ဦးကို စစ်ဆေးခဲ့ပြီး ဥပဒေနှင့်မညီသည့် အလုပ်သမား ရှစ်ဦးကိုဖမ်းဆီးခဲ့ကြောင်း ရယောင်းမြို့ လူဝင်မှုကြီးကြပ်ရေးဌာန၏ ထုတ်ပြန်ချက်အရ သိရသည်။
ဇန်နဝါရီ ၁၆ ရက်က ရယောင်းခရိုင် လူဝင်မှုကြီးကြပ်ရေးနှင့် ရယောင်းခရိုင်ရဲတပ်ဖွဲ့များသည် တရားမဝင် နိုင်ငံခြားသားများအားဝိုင်းဝန်းပိတ်ဆို့ရှာဖွေခြင်းစစ်ဆင်ရေးအဖြစ်၎င်းအိမ်ရာဝင်းအတွင်းဝင်ရောက် စစ်ဆေးခဲ့ခြင်းဖြစ်ကြောင်း သိရသည်။
စစ်ဆေးချက်အရ နေထိုင်ရာလိပ်စာအကြောင်းမကြားခြင်း (ပုဒ်မ ၃၈)ဖြင့် တစ်ဦး၊ နေထိုင်ခွင့် စည်းကမ်း ချက်များဖောက်ဖျက်ခြင်း/ရက် ၉၀ အစီရင်ခံရန် ပျက်ကွက်ခြင်း (ပုဒ်မ ၃၇)ဖြင့် ငါးဦး၊ တရားမဝင် ခိုးဝင်မှုဖြင့် နှစ်ဦးတို့ကို ဖမ်းဆီးခဲ့ကြောင်း သိရသည်။
၎င်းရှစ်ဦးကို ထိုင်းနိုင်ငံ လူဝင်မှုကြီးကြပ်ရေးဥပဒေအရ အမှုဖွင့်အရေးယူနိုင်ရန် သက်ဆိုင်ရာ စစ်ဆေးရေးအရာရှိများထံ လွှဲပြောင်းထားကြောင်း သိရသည်။

အမေရိကန်တပ်များ ရုပ်သိမ်းသွားသော လေတပ်စခန်းကို အီရတ် ပြန်ထိန်းချုပ်

အီရတ်နိုင်ငံ အနောက်ပိုင်းတွင် အမေရိကန်ဦးဆောင်‌သော တပ်ဖွဲ့များကို လက်ခံထားခဲ့သော အင်အယ်လ် အာဆက် လေတပ်စခန်းမှ အမေရိကန်တပ်ဖွဲ့များ ရုပ်သိမ်းသွားပြီဖြစ်ကာ အီရတ်စစ်ဘက်က အပြည့်အဝ ထိန်းချုပ်မှု ယူလိုက်ပြီဖြစ်ကြောင်း အီရတ် ကာကွယ်ရေးဝန်ကြီးဌာနက ယမန်နေ့တွင် ပြောသည်။
အင်အယ်လ်အာဆက် လေတပ်စခန်းသည် အမေရိကန်နှင့် မဟာမိတ်တပ်များအား နှစ်ပေါင်းများစွာ လက်ခံထားခဲ့ပြီး ဒေသတွင်း၌ တင်းမာမှုများ မြင့်တက်လာသည့် အချိန်တိုင်း အီရန်က အထောက်အပံ့ ပေးထားသည့် လက်နက်ကိုင်အုပ်စုများက အကြိမ်ကြိမ် ပစ်မှတ်ထားခဲ့သည့် နေရာလည်းဖြစ်သည်။
၂၀၂၀ ပြည့်နှစ်တွင် အီရန် ထိပ်တန်းဗိုလ်ချုပ်ကြီး ကက်ဆင်ဆိုလိုင်မာနီကို အမေရိကန်က သုတ်သင်ခဲ့ချိန်က လည်း ယင်းစခန်း တိုက်ခိုက်ခံခဲ့ရသည်။
ယင်းစခန်းမှ အမေရိကန်တပ်ဖွဲ့များ ရုပ်သိမ်းမှုကို အီရတ်ကြည်းတပ် ဗိုလ်မှူး ကြီးတစ်ဦးက အတည်ပြုခဲ့ပြီး ထောက် ပံ့ပို့ဆောင်ရေး ကိစ္စများကြောင့် စစ်သားအနည်းငယ်ကျန်ရှိနေသည်ဟု ၎င်းက ဆိုသည်။
အသေးစိတ် အချက်များကိုမူ လုံခြုံရေးကြောင့် ဗိုလ်မှူး ကြီးက မပြောပေ။
အမေရိကန်တပ်ဖွဲ့များ ရုပ်သိမ်းမှု မည်သည့်အချိန်က စ တင်ခဲ့သည်ဆိုခြင်းမှာ လတ်တလော ရှင်းရှင်းလင်းလင်း မရှိ‌ပေ။
သို့သော် ကနဦးအစီအစဉ်အရ ၂၀၂၅ စက်တင်ဘာလအရောက်တွင် ရာနှင့်ချီသောတပ်ဖွဲ့များ စတင် ထွက်ခွာ ရမည် ဖြစ်ကာ ၂၀၂၆ နှစ်ကုန်တွင် အားလုံးရုပ်သိမ်းပြီးဖြစ်ရမည်ဟု ရေးဆွဲထားကြောင်း သိရသည်။
ယင်းသို့ အီရတ်မှ အမေရိကန်တပ်ဖွဲ့များ ရုပ်သိမ်းပြီး နှစ်နိုင်ငံလုံခြုံရေး ဆက် ဆံမှု တည်ဆောက်သွာ‌ရေး အစီအစဉ်များကို ၂၀၂၄ ခုနှစ်တွင် ဝါရှင်တန်နှင့် ဘဂ္ဂဒက်တို့ကြား နားလည်မှု ယူခဲ့ကြခြင်းဖြစ်သည်။

ကိုးကန့်တိုင်းရင်းသားလုပ်ငန်းရှင်များအသင်း (၆)နှစ်ပြည့်အထိမ်းအမှတ်နှင့်နှစ်သစ်ကူးအကြိုပွဲတော်ကျင်းပ
-----------------------

ကိုးကန့်တိုင်းရင်းသားလုပ်ငန်းရှင်များအသင်း တည်ထောင်ခြင်း (၆)နှစ်ပြည့်အထိမ်းအမှတ်နဲ့ ရိုးရာနှစ်သစ်ကူးအကြိုပွဲ တော်ကို ဇန်နဝါရီ (၁၈)ရက်က ရန်ကုန်မြို့ရှိ The ERAVATI Sule Grand Yangon မှာ ကျင်းပခဲ့ပါတယ်။
အဲဒီအခမ်းအနားကို ရန်ကုန်တိုင်းဒေသကြီးအစိုးရအဖွဲ့ဝင် စီးပွားရေးရာဝန်ကြီး ဦးမျိုးမြင့်အောင်နဲ့ သက်ဆိုင်ရာဌာနဆိုင်ရာ‌ တွေ၊ကိုးကန့်တိုင်းရင်းသားလုပ်ငန်းရှင်‌ တွေနဲ့ ဖိတ်ကြားထားတဲ့ဧည့်သည်တော် တွေတက်ရောက်ခဲ့ပါတယ်။
အခမ်းအနားမှာရန်ကုန်တိုင်းဒေသကြီးအစိုးရအဖွဲ့ဝင်စီးပွားရေးရာဝန်ကြီး ဦးမျိုးမြင့်အောင်နဲ့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန
မြန်မာကုန်သွယ်မှုမြှင့်တင်ရေးအဖွဲ့ ညွှန်ကြားရေးမှူးချုပ် ဒေါက်တာထိန်လင်းတို့က အဖွင့်အမှာစကားပြောခဲ့ပြီး ကိုးကန့်တိုင်းရင်းသားလုပ်ငန်းရှင်များအသင်း ဥက္ကဋ္ဌဦးကျော်ဝင်းနဲ့ တာဝန်ရှိသူတွေက ကျေးဇူးတင်နှုတ်ခွန်းစကားတွေပြောကြားခဲ့ကြပါတယ်။
အဲဒီနောက် ကိုးကန့်တိုင်းရင်းသားအမျိုးသမီးရေးရာအဖွဲ့နဲ့ 2025 worldculture dance festival winner ဆုရှင်အဖွဲ့တွေက ကပြဖျော်ဖြေခဲ့ကြပြီး တယောထိုးဖျော်​ဖြေမှုတွေလည်း
ပါဝင်ခဲ့ပါတယ်။
ဒါ့အပြင် ကိုးကန့်တိုင်းရင်းသားလုပ်ငန်းရှင်များအသင်း တည်ထောင်ခြင်း (၆)နှစ်ပြည့်အထိမ်းအမှတ်နဲ့ ကိုးကန့်နှစ်သစ်ကူးအကြိုပွဲ
အဖြစ် အသင်းရန်ပုံငွေအတွက် ပစ္စည်း တွေလေလံတင်ရောင်းချတာ၊ လုပ်ငန်းသဘောတူ MOUရေးထိုးတာတွေ့နဲ့ Lucky Draw အစီစဥ်တွေလည်းပြုလုပ်ခဲ့ပါတယ်။

သဗ္ဗညုဘုရားကြီးနံရံရှိ ထုံးသားလွှာများအောက်တွင် နံရံဆေးရေးပန်းချီများ ဖော်ထုတ်တွေ့ရှိ

မန္တလေးတိုင်းဒေသကြီး၊ ညောင်ဦးမြို့နယ် ပုဂံရှေးဟောင်းယဉ်ကျေးမှုနယ်မြေရှိ သဗ္ဗညုဘုရားကြီးအား တရုတ်ပညာရှင်အဖွဲ့က ပြုပြင်ထိန်းသိမ်းရေးလုပ်ငန်းဆောင်ရွက်လျက်ရှိရာ သဗ္ဗညုဘုရားကြီး၏နံရံရှိ ထုံးသားလွှာများ သန့်စင်ရာမှ နံရံဆေးရေးပန်းချီများ ဖော်ထုတ်တွေ့ရှိခဲ့ကြောင်း သိရသည်။
ယခင်က သဗ္ဗညုဘုရားကြီး၏ အနောက်ဘက် အဝင်မုခ်မျက်နှာကြက်တွင်သာ နံရံပန်းချီရှိကြောင်း သိရသည်။
ယခုအခါ တရုတ်ပညာရှင်အဖွဲ့က ပြုပြင်ထိန်းသိမ်းရေးလုပ်ငန်းဆောင်ရွက်ရာတွင် သဗ္ဗညုဘုရားကြီး၏နံရံရှိ ထုံးသားလွှာများအောက်တွင် နံရံဆေးရေးပန်းချီ ရှိ/မရှိကို စမ်းသပ်ရာအစိတ်အပိုင်းငယ်နေရာ (၄၀) အား သန့်စင်ရာမှ တတိယထပ် အာရုံခံတောင်ဘက်နံရံနှင့် တတိယထပ်တိုက်မအဝင် မုခ်ပေါက်ဘေးနံရံ (၂) နေရာ၌ နံရံဆေးရေးပန်းချီများရှိကြောင်း ဖော်ထုတ်တွေ့ရှိခဲ့ခြင်း ဖြစ်သည်ဟုဆိုသည်။
၂၀၁၆ ခုနှစ် ဩဂုတ်လ ၂၄ ရက်နေ့က လှုပ်ခတ်ခဲ့သော ငလျင်ဒ-ဏ်ကြောင့် ထိခိုက်ပျ-က်စီးခဲ့သည့် ပုဂံရှေးဟောင်း ယဉ်ကျေးမှုနယ်မြေရှိ သဗ္ဗညုဘုရားကြီးအား တရုတ်ပညာရှင်အဖွဲ့နှင့် ရှေးဟောင်း သုတေသနနှင့် အမျိုးသားပြတိုက်ဦးစီးဌာန၊ ပုဂံဌာနခွဲ၊ ထိန်းသိမ်းရေးဌာနစု အင်ဂျင်နီယာများနှင့်ပူးပေါင်း၍ အဆောက်အအုံပိုင်း ပြုပြင်ထိန်းသိမ်းခြင်း (Structural Conservation)၊ နံရံပန်းချီထိန်းသိမ်းခြင်း (Mural Conservation) နှင့် တူးဖော်သုတေသနပြုခြင်း (Excavation) လုပ်ငန်းများကို အပိုင်းလိုက် ခွဲခြားဆောင်ရွက်နေခြင်းဖြစ်သည်။
ဆက်လက်၍ တရုတ်ပညာရှင်အဖွဲ့က တတိယထပ်အပြင်ပတ်လမ်း တိုက်မပစ္စယံခုံ တောင်ဘက်နံရံတွင် အပိုင်း (၂) ပိုင်းခွဲ၍ Dry Cleaning နှင့် Wet Cleaning နည်းလမ်း (၂) မျိုးဖြင့် ချေးချွတ်သန့်စင်ခဲ့ခြင်းကို နှိုင်းယှဉ်ပြသ ဆွေးနွေးပြီး ဆက်လက်ဆောင်ရွက်မည့် လုပ်ငန်းများအား ပေါင်းစပ်ညှိနှိုင်းဆောင်ရွက်လျက်ရှိကြောင်း သိရသည်။

မိုးကြက်သွန်နီအသစ်များ ဈေးကောင်းရနေ

မန္တလေးတိုင်းအတွင်းမြို့နယ်များရှိကြက်သွန်နီဈေးကွက်အခြေအနေမှာမိုးကြက်သွန်နီအသစ်များ စတင်ဝင်ရောက်နေခြင်းကြောင့် ဈေးကောင်းရနေကြောင်း ဈေးကွက်အတွင်းမှ စုံစမ်းသိရှိရသည်။
မန္တလေးကြက်သွန်နီဈေးကွက်တွင် လက်ကားဈေးနှုန်း ကျပ် ၂၈၀၀ မှ ၃၂၀၀၊ လက်လီဈေးနှုန်း ကျပ် ၂၅၀၀ မှ ၃၅၀၀ ခန့်ဖြင့် အရောင်းအဝယ်ဖြစ်နေကြောင်း၊ ကျောက်ဆည် ကြက်သွန်နီ ဈေးကွက်တွင် တောဝယ်ဈေးနှုန်း ကျပ် ၂၈၀၀ မှ ၄၀၀၀ ခန့်ရှိကြောင်းသိရသည်။
ထို့ပြင် မြင်းခြံကြက်သွန်နီဈေးကွက်တွင် တောဝယ်ဈေးနှုန်း ကျပ် ၂၀၀၀ မှ ၂၅၀၀ ခန့်ရှိပြီး၊ တစ်ပတ်အတွင်း ကြက်သွန်နီအဝင် ပိဿာ ၈၀,၀၀၀ နှင့် ၁၀၀,၀၀၀ ခန့်ဝင်ရောက် အရောင်းအဝယ်ဖြစ်နေကြောင်း သိရသည်။
မြန်မာနိုင်ငံတွင် ကြက်သွန်နီကို မန္တလေး၊ မကွေး၊ စစ်ကိုင်းတိုင်းရှိ စိုက်ဧကတစ်သန်းကျော်တွင် စိုက်ပျိုးထုတ်လုပ်ပြီး ထွက်ရှိလာသည့်ကြက်သွန်နီကို ပြည်တွင်းစားသုံးမှုသာမက ပြည်ပနိုင်ငံအချို့ကိုလည်းတင်ပို့ ရောင်းချလျက်ရှိကြောင်း သိရသည်။

အင်ဂျင်နီယာအရည်အချင်းများ ပြည့်ဝစေအောင် စံနှုန်းများနှင့်အညီ စဉ်ဆက်မပြတ် မွေးထုတ်နိုင်ရေး သင်ကြား လေ့ကျင့်ပေးရန် တိုက်တွန်း

Agro-based Industries နှင့် MSME များ၊ AI နှင့် EV ဆိုင်ရာ နည်းပညာများဖွံဖြိုးရေးအထောက်အကူပြု သုတေသနစီမံကိန်းများကို အလေးထားဆောင်ရွက်ရန်ပြော
နိုင်ငံတော်စဉ်ဆက်မပြတ်ဖွံဖြိုးရေး အမှန်တကယ်အားထားရသည့် အင်ဂျင်နီယာ လူငယ်ကောင်းများ ပေါ်ထွန်းလာစေရေးအတွက် ကျောင်းသားများကို အင်ဂျင်နီယာပညာဒဿနအမြင်၊ အသိပညာဆန်းစစ်လေ့လာတွေးခေါ်မှု၊ စည်းကမ်းလိုက်နာမှုနှင့် အင်ဂျင်နီယာအရည်အချင်းများပြည့်ဝစေအောင် စံနှုန်းများနှင့်အညီ စဉ်ဆက်မပြတ် မွေးထုတ်နိုင်ရေး သင်ကြားလေ့ကျင့်ပေးရန်လိုအပ်ကြောင်း သိပ္ပံနှင့်နည်းပညာဝန်ကြီးဌာန ဒုတိယဝန်ကြီး ဒေါက်တာအောင်ဇေယျက ပြောသည်။
ယမန်နေ့က သိပ္ပံနှင့်နည်းပညာဝန်ကြီးဌာန ဒုတိယဝန်ကြီး ဒေါက်တာအောင်ဇေယျသည် ရန်ကုန်မြို့ လှိုင်သာယာမြိုနယ်ရှိ ရန်ကုန်အနောက်ပိုင်းနည်းပညာတက္ကသိုလ်သို့ ရောက်ရှိချိန် အထက်ပါအတိုင်း ပြောကြားခဲ့ခြင်းဖြစ်သည်။
ထို့ပြင် Agro-based Industries နှင့် MSME များ၊ AI နှင့် EV ဆိုင်ရာ နည်းပညာများဖွံဖြိုးရေးအထောက်အကူပြု သုတေသနစီမံကိန်းများကို အလေးထားဆောင်ရွက်ရန် တိုက်တွန်းပြောကြားခဲ့ကြောင်း သိရသည်။
နိုင်ငံတော်ဖွံဖြိုးရေးအတွက် သုတေသနရလဒ်များကို အသုံးချနိုင်ရေး ကြိုးပမ်းဆောင်ရွက်ရန်၊ ပြောင်းလဲတိုးတက်မှုနှုန်း မြန်ဆန်နေသော နည်းပညာအရွေ့တို့နှင့်အတူလိုက်ပါနိုင်ရေး သုတေသနကွန်ရက်များ ဖွဲ့စည်းပြီး နိုင်ငံတကာနည်းပညာပြိုင်ပွဲများတွင် ဝင်ရောက်ယှဉ်ပြိုင်ကာ နိုင်ငံ့ဂုဏ်ဆောင်ဆုများရရှိရေး ကြိုးပမ်းဆောင်ရွက်ကြရန်လည်း ပြောကြားခဲ့ကြောင်း သိရသည်။

ရွေဈေးမြင့်တက်လာခြင်းကြောင့် ရွှေဆိုင်အချို့ အရောင်းအဝယ်ရပ်နားထား

အခေါက်ရွှေတစ်ကျပ်သား သိန်း ၁၀၀ နီးပါးအထိ မြင့်တက်လာခြင်းကြောင့် ရွှေဆိုင်အချို့ အရောင်းအဝယ်ရပ်ထားကြောင်း ရွှေဆိုင်များမှ စုံစမ်းသိရှိရသည်။
ယနေ့ ဈေးကွက်ထဲတွင် နိုင်ငံခြားငွေလဲလှယ်နှုန်း တစ်ဒေါ်လာ ၄၀၇၀ ပေါက်ဈေးရှိနေသကဲ့သို့ ကမ္ဘာ့ရွှေဈေးသည်လည်း တစ်အောင်စလျှင် ၄၅၉၆ ဒေါ်လာဝန်းကျင် ရှိနေကာ ပြည်တွင်းအခေါက်ရွှေဈေးသည် တစ်ကျပ်သားလျှင် ငွေကျပ် (၉,၈၇၀,၀၀၀) သိန်းစျေးဝန်းကျင်အထိ ဖြစ်ပေါ်နေခြင်းဖြစ်သည်။
အဆိုပါ ရွှေဈေးနှုန်းသည် သမိုင်းတလျှောက်စံချိန်တင်မြင့်တက်ခဲ့ခြင်းဖြစ်ပြီး ဆိုင်အချို့ အရောင်းအဝယ်ရပ်နားထားရခြင်းဖြစ်သည်။
"ရွှေဈေးက‌ မတရားတတ်နေတော့ ပြန်ရောင်းတဲ့သူကများလာတယ်။ အဝယ်မရှိဘူးပေါ့။ အခုဆို ဆိုင်တောင်ပိတ်ထားရတယ်။ အရောင်းအဝယ်ခဏနားထားရတယ်။ ဆိုင်အတော်များများက ပိတ်ထားကြတယ်။ ဒီတစ်ခေါက်က စံချိန်အတင်ဆုံးပဲ ရွှေဈေးက" ဟု ရွှေဆိုင်ပိုင်ရှင်တစ်ဦးကပြောသည်။
ရန်ကုန်တိုင်းရွှေလုပ်ငန်းရှင်များအသင်းက သတ်မှတ်ရည်ညွှန်းဈေးအတိုင်း ရောင်းချရန် ညွှန်ကြားထားကြောင်း၊ထို့ပြင် ရွှေတစ်ကျပ်သား သိန်း ၁၀၀ နားရောက်ချိန်ဓာတ်သတ္တု (ရွှေ) ရည်ညွှန်းဈေး သတ်မှတ်ရေးကော်မတီက သိပ်သည်းဆ ၁၉.၂၅ ဂရမ်/ကုဗစင်တီမီတာနှင့်အထက်ရှိ စံချိန်မီရွှေ ၁ ကျပ်သား (၁၆.၃၂၉၃၂၅ ဂရမ်) ကို (၆,၀၀၀,၀၀၀) ကျပ် သတ်မှတ်ထားသည်။

တရုတ်နိုင်ငံသည် ကမ္ဘာ့အကျိုးစီးပွားကို မိမိ၏အကျိုးစီးပွားအဖြစ် နိုင်ငံများနှင့်အတူ အေးအတူပူအမျှအသိုက်အဝန်းတည်ဆောက်ရေးကိုတွန်းအားပေးဆောင်ရွက်သွားမည်ဟု တရုတ်သမ္မတ ရှီကျင့်ဖျင်ပြော

တရုတ်နိုင်ငံသည် ကမ္ဘာ့အကျိုးစီးပွားကို မိမိ၏အကျိုးစီးပွားအဖြစ် နိုင်ငံများနှင့်အတူ အေးအတူပူအမျှအသိုက်အဝန်းတည်ဆောက်ရေးကိုတွန်းအားပေးဆောင်ရွက်သွားမည်ဟု တရုတ်သမ္မတ ရှီကျင့်ဖျင်က ပြောကြားခဲ့ကြောင်း မြန်မာနိုင်ငံဆိုင်ရာ တရုတ်သံရုံးထံမှ သိရသည်။
တရုတ်သမ္မတမှ ဇန်နဝါရီ ၁၆ ရက်က ပေကျင်းမြို့ရှိ တရုတ်ပြည်သူ့ခန်းမဆောင်၌ တရုတ်နိုင်ငံဆိုင်ရာ နိုင်ငံခြားသံရုံးများ၏ သံအမတ်ကြီး (၁၈) ဦးတို့မှပေးအပ်သော သံအမတ်ခန့်အပ်လွှာများကိုလက်ခံရယူစဥ်ပြောကြားခဲ့ခြင်းဖြစ်သည်။
သမ္မတရှီကျင့်ဖျင်မှ သံအမတ်များအနေဖြင့် သက်ဆိုင် ရာနိုင်ငံများ၏ ခေါင်းဆောင်များနှင့် ကောင်းမွန်ပြည်သူများထံသော ဆုမွန်ကောင်းတောင်းစကားများပို့သပေးရန်တို-က်တွန်းခဲ့ပြီး တရုတ်နိုင်ငံအတွင်း နေရာဒေသအသီးသီးသို့ သွားရောက်လည်ပတ်ကြည့်ရှုပြီး တရုတ်နိုင်ငံ၏ စစ်မှန်သောအခြေအနေကို နက်နက်ရှိုင်းရှိုင်းနားလည်သဘောပေါက်ကာ တရုတ်နိုင်ငံနှင့် နိုင်ငံအသီးသီးကြား ချစ်ကြည်ရေးနှင့် ပူးပေါင်းဆောင်ရွက်မှုများပိုမိုနက်ရှိုင်းစေရေးအတွက် တက်ကြွစွာပံ့ပိုးကူညီရန်မျှော်လင့်သည်ဟု ပြောကြားခဲ့သည်။
ထို့ပြင် တရုတ်နိုင်ငံ၏ တံခါးဖွင့်လှစ်မှုသည် ပိုမိုကျယ် ပြန့်လာမည်ဖြစ်ပြီး အရည်အသွေးမြင့်ဖွံ့ဖြိုးတိုးတက်မှုဖြင့် ကမ္ဘာ့အတွက် ပိုမိုသေချာမှုနှင့် စွမ်းအင်သစ်များကိုထည့်သွင်းပေးမည်ဖြစ်ကာ အတူတကွဖွံ့ဖြိုးတိုးတက်မှုနှင့် လှပမှုများအတူယှဉ်တွဲရှိနေစေရန်ဆောင်ရွက်မည်ဟု ပြောသည်။
ထို့အတူ တရုတ်နိုင်ငံသည် သမိုင်း၏ အမှန်တရားဘက်နှင့် တရားမျှတသောဘက်တွင်ရပ်တည်မည်ဖြစ်ပြီး ပြည်သူ၏စိတ်နှလုံးကို မိမိ၏စိတ်နှလုံးအဖြစ်ခံယူကာ ကမ္ဘာ့အကျိုးစီးပွားကို မိမိ၏အကျိုးစီးပွားအဖြစ် နိုင်ငံများနှင့်အတူ အေးအတူပူအမျှအသိုက်အဝန်းတည် ဆောက်ရေးကို တွန်းအားပေးဆောင်ရွက်သွားမည်ဟုလည်း ပြောကြားခဲ့သည်။
တရုတ်နိုင်ငံဆိုင်ရာ နိုင်ငံခြားသံအမတ်များအဖြစ် တူရကီ၊ ဩစတြီးယား၊ ဗြိတိန်၊ အီရတ်သံ၊ ဆိုက်ပရပ်စ်၊ မောရီရှား၊ စလိုဗက်ကီးယား၊ ဂါနာ၊ နမ်မီးဘီးယား၊ ကိုရီးယား၊ ဥရုဂွေး၊ ဆွစ်ဇာလန်၊ ပါလက်စတိုင်း၊ ပီရူး၊ လက်ဘနွန်၊ ကွန်ဂို၊ လီဆိုသိုနှင့် မြန်မာနိုင်ငံတို့မှ သံအမတ်များအဖြစ်ခန့်အပ်ခံခဲ့ရသည်။

ထိုင်းနိုင်ငံတွင် ကျောက်ပြားပိ၍ ‌ေ-သဆုံးခဲ့သည့် မြန်မာလုပ်သားအတွက် နစ်နာကြေးရရှိရန် အလုပ်သမားသံရုံး ညှိ နှိုင်းဆောင်ရွက်နေ

ထိုင်းနိုင်ငံ၊ လတ်ကရဘန်းမြို့နယ်ရှိ PREGGO STONE & DESIGN ကျောက်ပြားဆိုင်တွင် ကျောက်ပြားများပြိုကျကာ မြန်မာအလုပ်သမားတစ်ဦး ကျောက်ပြားပိကာ ‌ေ-သဆုံးခဲ့သည့်ဖြစ်စဉ်အတွက် အလုပ်သမားသံရုံးက ညှိနှိုင်းဆောင်ရွက်နေကြောင်း သိရသည်။
အဆိုပါ ဖြစ်စဉ်အတွက် ယမန်နေ့ ဇန်နဝါရီ (၁၇) ရက်က အလုပ်သမားသံမှူးနှင့် သံအရာရှိတို့က သွားရောက်၍ စက်ရုံမှ တာဝန်ရှိသူများနှင့် မြန်မာအလုပ်သမားများအားတွေ့ဆုံခဲ့ပြီး ရသင့်ရထိုက်သော နစ်နာကြေး၊ အကျိုးခံစားခွင့်များရရှိနိုင်ရေးဆွေးနွေးခဲ့ကြကြောင်း သိရသည်။
မြန်မာလုပ်သားများ နစ်နာကြေး၊ အကျိုးခံစားခွင့်များရရှိနိုင်ရေး ထိုင်းအလုပ်သမားဌာနများ၊ အလုပ်သမားအဖွဲ့အ စည်းများနှင့်ချိတ်ဆက်၍ ဆောင်ရွက်လျက်ရှိသည်ဟု ထိုင်းနိုင်ငံ အလုပ်သမားသံအရာရှိရုံးက အသိပေးထားသည်။
၂၀၂၆ ခုနှစ် ပထမလအတွင်း ထိုင်းနိုင်ငံ အလုပ်သမားသံအရာရှိရုံးက လုပ်ငန်းခွင်အတွင်း အသက်ဆုံးရှုံးခဲ့သဖြင့် နစ်နာကြေးပေးအပ်နိုင်ရန် ဆောင်ရွက်ခဲ့ရာ (၅) ဦးခန့်အထိ ပေးအပ်ပြီးကြောင်း သိရသည်။

ကရင်ပြည်နယ်လွှတ်တော်အား ပြည်နယ်ဝန်ကြီးချုပ်ကြည့်ရှုစစ်ဆေး

ကရင်ပြည်နယ်လွှတ်တော်၌ ရွေးကောက်ပွဲပြီးချိန်တွင် တတိယအကြိမ် ပြည်နယ်လွှတ်တော်အစည်းအဝေးများကျင်းပနိုင်ရန် ကြိုတင်ပြင်ဆင်ထားမှုများကို ပြည်နယ်ဝန်ကြီးချုပ် ဦးစောမြင့်ဦးမှ ယနေ့ ဇန်နဝါရီ ၁၈ ရက်နံနက်ပိုင်းကကြည့်ရှုစစ်ဆေးခဲ့သည်။
ပြည်နယ်လွှတ်တော်အစည်းအဝေးခန်းမအား ကြိုတင်ပြင်ဆင်ထားမှု၊ လွှတ်တော်ကိုယ်စားလှယ်များထံဖြန့်ဝေမည့် ဥပဒေ၊ နည်းဥပဒေများ၊ သတင်းမီဒီယာခန်းမ၊ လွှတ်တော်ကိုယ်စားလှယ်များ၏ နားနေခန်း၊ စားသောက်ခန်း၊ အစည်းအဝေးခန်း၊ ဧည့်ခန်း၊ လွှတ်တော်ဥက္ကဋ္ဌ၊ ဒု-ဥက္ကဋ္ဌရုံးခန်း၊ ရေးရာကော်မတီရုံးခန်းများ၊ လွှတ်တော်စာကြည့်တိုက်၊ သင်တန်းခန်းမနှင့် ပြည်နယ်လွှတ်တော်ရုံးရှိ ဌာနခွဲ (၂) ခု၊ ဌာနစု (၁၀) စု၏ ရုံးခန်းများနှင့် လုပ်ငန်းဆောင်ရွက်ပုံများကိုကြည့်ရှုစစ်ဆေးခဲ့သည်။
ထို့ပြင် ပြည်နယ်လွှတ်တော်ကိုယ်စားလှယ်များတည်းခိုနိုင်ရေးအတွက် ကရင်ပြည်နယ်လွှတ်တော်ရိပ်သာ၏ master bedroom ၁၀ ခန်း၊ စားသောက်ခန်း၊ ဧည့်ခန်းများ ပြင်ဆင်ထားမှုတို့ကိုလည်း ကြည့်ရှုစစ်ဆေးခဲ့သည်။
ဥပဒေပြုရေးနှင့်လွှတ်တော်အစည်းအဝေးများ စနစ်တကျကျင်းပနိုင်ရေး၊ ဝန်ထမ်းများလုပ်ငန်းကျွမ်းကျင်မှုနှင့် အရည်အသွေးမြင့်မားရေးအတွက် စီမံဆောင်ရွက်ထားရှိမှုတို့ကို ပြည်နယ်လွှတ်တော်ရုံး ညွှန်ကြားရေးမှူးကရှင်းလင်းတင်ပြခဲ့သည်။