တိုင်းနှင့် ပြည်နယ်အများစု၌ မိုးရွာသွန်းနေသော်လည်း မြင်းမူမြို့တွင် အပူရှိန်မြင့်တက်၍ အပူရှောင်စခန်းဖွင့်လှစ်ထားရ

တိုင်းနှင့် ပြည်နယ်အများစု၌ မိုးရွာသွန်းနေသော်လည်း စစ်ကိုင်းတိုင်းအတွင်း အပူရှိန်မြင့်တက်နေသဖြင့် မြင်းမူမြို့၊ အနောက်ပိုင်းရပ်ကွက်၊ အောင်ဇေယျရပ်ရှိ ပြည်သူ့ဆေးရုံးဝန်းအတွင်းရှိ "ဣဒ္ဓိဇေယျာ"နှစ်ထပ်သံဃာဆေးရုံတွင်အပူရှောင်စခန်းဖွင့်လှစ်ထားရကြောင်း သိရသည်။
အဆိုပါ အပူရှောင်စခန်းသို့ မေ ၂၆ ရက်တွင်လာရောက်နေထိုင်သည့် သက်ကြီးဘိုးဘွား(၅)ဦးအား ခရိုင်/မြို့နယ်တာဝန်ရှိသူများက အားပေးစကားပြောပြီး အာဟာရမုန့်၊ Royal D ၊ ဓာတ်ဆား၊ အားဖြည့်အချိုရည်၊ သောက်ရေသန့်နှင့် မုန့်များထောက်ပံ့ပေးခဲ့ကြကြောင်း သိရသည်။
ထို့ပြင် ယင်းအပူရှောင်စခန်းသို့ မေ ၂၁ ရက်တွင် (၃) ဦး၊ မေ ၂၂ ရက်တွင် (၂)ဦး၊ မေ ၂၃ ရက်တွင် (၄)ဦးတို့သည် နံနက် ၈ နာရီမှ ညနေ ၅ နာရီခွဲအထိ လာရောက်တည်းခိုခဲ့ကြကာ ၎င်းတို့အား မြို့နယ်ကျန်းမာရေးအဖွဲ့မှ ကျန်းမာရေးစောင့်ရှောက်မှုပေးခြင်း၊ မြို့နယ်စီမံခန့်ခွဲရေးနှင့် အုပ်ချုပ်ရေးကော်မတီမှ အာဟာရမုန့်၊ Royal D ၊ ဓာတ်ဆား၊ အချိုရည်၊ သောက်ရေသန့်များနှင့် မုန့်များထောက်ပံ့ပေးခဲ့ကြကြောင်း သိရသည်။

ကုန်တင်ကုန်ချလုပ်သား ၁,၃၂၀ ဦးအား တူညီဝတ်စုံနှင့် ကျောင်းသား ၅၄၇ ဦးအတွက် ဗလာစာအုပ်များ ထောက်ပံ့

ရန်ကုန်တိုင်းဒေသကြီး ကုန်တင်ကုန်ချကော်မတီရုံး လက်အောက်ရှိ မြို့နယ်(၆)မြို့နယ်မှ မှတ်ပုံတင်ထားသော ကုန်တင်ကုန်ချလုပ်သားကြီး ၁,၃၂၀ ဦးအား တူညီဝတ်စုံများ ထောက်ပံ့ပေးခဲ့ကြောင်း သိရသည်။
အဆိုပါ ထောက်ပံ့ပေးအပ်မှုကို မေ ၂၆ ရက်က ဆောင်ရွက်ခဲ့ခြင်းဖြစ်ပြီး ၂၀၂၆-၂၀၂၇ ဘဏ္ဍာရေးနှစ်အတွင်း လုပ်သားများ၏ လူမှုဘဝအဆင်ပြေချောမွေ့စေရေးအတွက် ရည်ရွယ်ဆောင်ရွက်ခဲ့ခြင်းဖြစ်ကြောင်း သိရသည်။
ထို့ပြင် ကုန်တင်ကုန်ချလုပ်သားများ၏ သားသမီးများ ကျောင်းဖွင့်ရာသီအမီ အသုံးပြုနိုင်စေရန် ကျောင်းသား/ကျောင်းသူ တစ်ဦးလျှင် ကျောင်းသုံးဗလာစာအုပ် (၁)ဒါဇင်နှုန်းဖြင့် ကျောင်းသား/ကျောင်းသူ ၅၄၇ ဦးအတွက် ဗလာစာအုပ် စုစုပေါင်း ၅၄၇ ဒါဇင်ကိုလည်း ထောက်ပံ့ပေးခဲ့ကြောင်း သိရသည်။
အဆိုပါ အထောက်အပံ့များသည် ကုန်တင်ကုန်ချလုပ်သားများနှင့် ၎င်းတို့၏ မိသားစုဝင်များ၏ လူမှုရေးနှင့် ပညာရေးလိုအပ်ချက်များကို တစ်စိတ်တစ်ပိုင်း အထောက်အကူပြုနိုင်ရန် ရည်ရွယ်ဆောင်ရွက်ခဲ့ခြင်းဖြစ်ကြောင်း သိရသည်။

မြဝတီ၌ ဖမ်းဆီးရမိသည့် အွန်လိုင်းလိမ်လည်မှုဆိုင်ရာ ပြည်ပနိုင်ငံသား ၄ ဦးကို ပြည်နှင်လွှဲပြောင်းနိုင်ရေး စစ်ဆေး

ကရင်ပြည်နယ်၊ မြဝတီ မြို့ဝန်းကျင်ရှိ အွန်လိုင်းလိမ်လည်မှုလုပ်ငန်းများ ဆောင်ရွက်နေသည့် ဆိုဒ်များအတွင်း တရားမဝင်ဝင်ရောက်လာပြီး အွန်လိုင်းလိမ်လည်မှု ကျူးလွန်ခဲ့သဖြင့် ထိန်းသိမ်းခံထားရသည့် ပြည်ပနိုင်ငံသား ၄ ဦးကို သက်ဆိုင်ရာနိုင်ငံများသို့ ပြန်လည်လွှဲပြောင်းပေးနိုင်ရေးအတွက် စိစစ်စစ်ဆေးမှုများ ဆောင်ရွက်ခဲ့ကြောင်း သိရသည်။
ထိန်းသိမ်းခံထားရသူများတွင် ဖိလစ်ပိုင်နိုင်ငံသား ၂ ဦး၊ နီပေါနိုင်ငံသား ၁ ဦးနှင့် အင်ဒိုနီးရှားနိုင်ငံသား ၁ ဦး ပါဝင်ကြောင်း သိရသည်။ ၎င်းတို့အား သက်ဆိုင်ရာနိုင်ငံများသို့ အမြန်ဆုံးပြန်လည်လွှဲပြောင်းပေးနိုင်ရေးအတွက် တာဝန်ရှိသူများက လိုအပ်သည့် ကိုယ်ရေးအချက်အလက်များနှင့် အထောက်အထားမှတ်တမ်းများကို စာရင်းကောက်ယူစိစစ်ခဲ့ကြောင်း သိရသည်။
ထို့ပြင် ၂၀၂၅ ခုနှစ် ဇန်နဝါရီ ၃၀ ရက်မှ ၂၀၂၆ ခုနှစ် မေ ၂၆ ရက်အထိ မြဝတီမြို့နယ်အတွင်းသို့ တရားမဝင်ဝင်ရောက်လာသည့် ပြည်ပနိုင်ငံသား စုစုပေါင်း ၁၄,၆၈၉ ဦးကို ဖော်ထုတ်ထိန်းသိမ်းနိုင်ခဲ့ကြောင်း သိရသည်။ ယင်းအနက် ၁၃,၅၂၁ ဦးကို ထိုင်းနိုင်ငံမှတစ်ဆင့် သက်ဆိုင်ရာနိုင်ငံများသို့ ဥပဒေလုပ်ထုံးလုပ်နည်းများနှင့်အညီ စနစ်တကျ ပြည်နှင်လွှဲပြောင်းပေးခဲ့ပြီးဖြစ်ကြောင်း သိရသည်။

ငလျင်ကြီး ကာလနောက်ပိုင်း မဟာမုနိဘုရားကြီးထံ ခရီးသွားဖူးမြှော်သူ ပိုမိုများပြားလာ

မန္တလေး ငလျင်ကြီးပြီးနောက်ပိုင်းတွင် မန္တလေးမြို့ရှိ မဟာမုနိရုပ်ရှင်တော်မြတ်ထံသို့ လာရောက်ဖူးမြှော်သည့် ခရီးသွားများ ပိုမိုများပြားလာသည်ဟု သိရသည်။
မန္တလေးငလျင်ကြီး မလှုပ်ခတ်ခင် ပုံမှန်ရက်များတွင် ခရီးသွားထောင်ဂဏန်းမျှသာရှိခဲ့သော်လည်း လက်ရှိတွင် နေ့စဉ် ခရီးသွားဦးရေ၊ ပျမ်းမျှ တစ်သောင်း၀န်းကျင်ဝင်ရောက်လျက်ရှိကြောင်းလည်း ဘုရားကြီးဂေါပကအဖွဲ့နှင့် နီးစပ်သူတစ်ဦးက ပြောသည်။
မတ္တရာ-စဉ့်ကူး-မိုးကုတ်လမ်းပိုင်း၊ မန္တလေး - ပြင်ဦးလွင် - လားရှိုးလမ်းပိုင်း၊ မန္တလေး-စစ်ကိုင်းလမ်းပိုင်းတို့ ပြန်လည်သွားလာရန် အဆင်ပြေပြီးနောက်ပိုင်း ထိုကဲ့သို့ ဖူးမျှော်သူ ပြန်လည်များပြားလာခြင်းဖြစ်သည်ဟုလည်း ၎င်းကပြော သည်။
“မန္တလေးကို လာလည်ကြရင်း၊ ကုန်ပစ္စည်းတွေ လာယူကြရင်း ဘုရားကြီးကို ဦးတိုက်ကြတာပေါ့၊ ကျောင်းပိတ်ရက်တွေလည်းရှိနေခဲ့တော့ ငလျင်နောက်ပိုင်း ဖူးမြှော်သူ များ ပြားလာပါတယ်” ဟု ဆိုသည်။
ပြီးခဲ့သည့်နှစ် မတ် (၂၈) ရက်က လှုပ်ခတ်ခဲ့သော မန္တလေးငလျင်ကြီးတွင် မဟာမြတ်မုနိဘုရားကြီး၏ ကိုယ်လုံးတော်မှာ ကြီးကြီးမားမားထိခိုက်မှုမရှိခဲ့သော်လည်း ဦးခေါင်းမကိုဋ်တော်မှာမူ ကွေးညွှတ်ကျိုးပဲ့ခဲ့ပြီး ဂန္ဓာကုဋီ ကျောင်းဆောင်လည်း ထိခိုက်မှုများရှိခဲ့သည်။
ထို့ပြင် ကျောင်းဆောင်တော်၏ စိန်ဖူးတော်မှာ မြေခခဲ့ရပြီးပြတိုက် အပါအဝင် စောင်းတန်းအချို့လည်း ပျက်စီးမှုရှိခဲ့သည်။
ရက်အနည်းငယ်ကြာ ပြန်လည် မွမ်းမံမှုများ ပြုလုပ်ခဲ့ပြီးနောက် မဟာမုနိ ရုပ်ရှင်တော်မြတ်ကြီးကို ဧပြီလ လဆန်းပိုင်းတွင် ပြင်လည်ပြင်ဆင်ခဲ့ပြီး ဖွင့်လှစ်နိုင်ခဲ့သည်။

ကိုမိုအား ကလပ်သမိုင်းတွင် ပထမဆုံးအကြိမ်အဖြစ် ချန်ပီယံလိဂ်ဝင်ခွင့် ရရှိအောင် ဦးဆောင်လာတဲ့ ဖာဘရီဂက်စ်
=====================

ဆက်စ်ဖာဘရီဂက်စ်ဟာ စီးရီးအေရာသီသိမ်းပွဲတွင် ကိုမိုအား ကလပ်သမိုင်းတွင် ပထမဆုံးအကြိမ်အဖြစ် ချန်ပီယံလိဂ်ဝင်ခွင့် ရရှိအောင် ဦးဆောင်ပေးလာနိုင်ခဲ့ပါတယ်။
အာဆင်နယ်နှင့် ချဲလ်ဆီးကွင်းလယ်ကစားသမားဟောင်းဦးဆောင်တဲ့ ကိုမိုဟာ ရာသီသိမ်းပွဲတွင် ခရီမိုနက်စ်အား ၄-၁ ဖြင့် အနိုင်ယူကာ စီးရီးအေအမှတ်ပေးဇယားအဆင့် ၄ နေရာတွင် ရပ်တည်ကာ ချန်ပီယံလိဂ်ဝင်ခွင့် ရရှိအောင် ကူညီလာတာလည်း ဖြစ်ပါတယ်။
တဖက်တွင် အင်္ဂလန်တိုက်စစ်မှူးဟောင်းဂျေမီဗာဒီကစားနေတဲ့ ခရီမိုနက်စ်ကတော့ စီးရီးအေတွင် တစ်ရာသီသာ ကျင်လည်ခဲ့ရကာ စီးရီးဘီသို့ တန်းပြန်ဆင်းလာရပြီ ဖြစ်ပါတယ်။
ခရီမိုနက်စ်ဟာ စီးရီးအေ ၃၈ ပွဲတွင် နိုင်ပွဲ ၈ ပွဲတည်းသာ ရရှိကာ တန်းဆင်းခဲ့ရတာပါ။ ဂျေမီဗာဒီမှာလည်း ပြီးခဲ့တဲ့ရာသီတုန်းက လက်စတာ တန်းဆင်းသွားရပြီးနောက် ထွက်ခွာကာ ခရီမိုနက်စ်သို့ ပြောင်းလာပြီးတဲ့နောက် နှစ်ရာသီဆက် တန်းဆင်းရတဲ့ အတွေ့အကြုံပိုင်ဆိုင်သွားခဲ့ပါတယ်။
ဖာဘရီဂက်စ်ဦးဆောင်တဲ့ ကိုမိုကတော့ စီးရီးအေထိပ်သီး ဂျူဗင်တပ်နှင့် အေစီမီလန်တို့အား ကျော်ဖြတ်ကာ အဆင့် ၄ နေရာမှာ ရပ်တည်ပြီး ချန်ပီယံ အင်တာမီလန်၊ နာပိုလီ၊ ရိုးမားတို့နှင့်အတူ ချန်ပီယံလိဂ်ဝင်ခွင့် ရရှိလာပါတယ်။
အေစီမီလန်နှင့် ဂျူဗင်တပ်တို့က ယူရိုပါလိဂ်ဝင်ခွင့်သာ ရရှိလာကြပြီး အတ္တလန္တာက ကွန်ဖရင့်လိဂ်ဝင်ခွင့် ရရှိလာပါတယ်။

ပရီးမီးယားလိဂ်ရွှေဖိနပ်ဆုအား ထပ်မံ ဆွတ်ခူးကာ အလန်ရှီးယား၊ ဟယ်ရီကိန်းတို့ရဲ့စံချိန်ကို လိုက်မီလာတဲ့ အာလင်းဟာလန်း
====================

အာလင်းဟာလန်းဟာ ပရီးမီးယားလိဂ် ၄ ရာသီအတွင်း ၃ ကြိမ်မြောက် ပရီးမီးယားလိဂ်ရွှေဖိနပ်ဆုအား ဆွတ်ခူးလာပါတယ်။
နော်ဝေတိုက်စစ်မှူးဟာ အီတီဟတ်တွင် ဗီလာကို ၂-၁ ဖြင့် အရေးနိမ့်တဲ့ ဂွါဒီယိုလာရဲ့ မန်စီးတီးနောက်ဆုံးပွဲအား လွဲချော်လာခဲ့ပေမဲ့လည်း ပရီးမီးယားလိဂ်ဂိုး ၂၇ ဂိုးဖြင့် ပရီးမီးယားလိဂ်ရွှေဖိနပ်ဆုအား ဆွတ်ခူးလာပါတယ်။
သူဟာ ပရီးမီးယားလိဂ် ၃၅ ပွဲတွင် ၂၇ ဂိုးသွင်းယူကာ တတိယအကြိမ်မြောက် ရွှေဖိနပ်ဆုအား ဆွတ်ခူးလာတာ ဖြစ်ပြီး အလန်ရှီးယား၊ ဟယ်ရီကိန်းတို့ရဲ့ စံချိန်ကို လိုက်မီလာပြီလည်း ဖြစ်ပါတယ်။
အာလင်းဟာလန်းဟာ ဘရန့်ဖို့ဒ်ရဲ့ ဘရာဇီးတိုက်စစ်မှူးအိုင်ဂေါ်တီယာဂိုးအား ၅ ဂိုးဖြတ်ကာ ပရီးမီးယားလိဂ်ရွှေဖိနပ်ဆုကို ဆွတ်ခူးလာတာပါ။
အာလင်းဟာလန်းဟာ ၃ ကြိမ်မြောက် ရွှေဖိနပ်ဆုအား ဆွတ်ခူးလာမှုနှင့်အတူ သီယာရီဟင်နရီ၊ မိုဟာမက်ဆာလက်တို့ရဲ့ စံချိန်တင် ရွှေဖိနပ်ဆု ဆွတ်ခူးထားမှုစံချိန်အား လိုက်မီရန် ၁ ကြိမ်တည်းသာ လိုပါတော့တယ်။
သူဟာ ယခုရာသီတွင် မန်စီးတီးအတွက် ပြိုင်ပွဲအရပ်ရပ် ၅၂ ပွဲတွင် ၃၈ ဂိုးသွင်းယူကာ ပြည်တွင်းရှုံးထွက်ဖလား ၂ လုံး ဆွတ်ခူးနိုင်အောင် ကူညီပေးထားနိုင်ပါတယ်။
သူဟာ ယခင် ၂၀၂၂-၂၃ ရာသီတုန်းက စံချိန်တင် ၃၅ ဂိုးဖြင့် ပရီးမီးယားလိဂ်ရွှေဖိနပ်ဆုအား ပထမဆုံးအကြိမ် ဆွတ်ခူးပြီးနောက် ၂၀၂၃-၂၄ ရာသီတွင် ၂၇ ဂိုးဖြင့် ဒုတိယအကြိမ် ဆွတ်ခူးခဲ့ပါတယ်။

စံချိန်သစ်တစ်ခု ထပ်မံရေးထိုးပြီး လီဗာပူးပရိသတ်များကို နှုတ်ဆက်လာတဲ့ ဆာလက်
======================

မိုဟာမက်ဆာလက်ဟာ စံချိန်သစ်တစ်ခု ထပ်မံရေးထိုးပြီး လီဗာပူးကစားသမားဘဝအား အဆုံးသတ်လာပါတယ်။
အီဂျစ်ဂန္ထဝင်ဟာ ဘရန့်ဖို့ဒ်နှင့် တစ်ဂိုးစီသရေကျတဲ့ ပရီးမီးယားလိဂ်ရာသီသိမ်းပွဲတွင် ကာတစ်ဂျုံးစ်အတွက် နောက်ထပ် ဖန်တီးမှု ပြုလုပ်ကာ စံချိန်သစ်ရေးထိုးလာတာပါ။
ဆာလက်ဟာ ယင်းဖန်တီးမှုကြောင့် ပရီးမီးယားလိဂ်တွင် ဖန်တီးမှု ၉၃ ကြိမ် ပြုလုပ်လာနိုင်ပြီး လီဗာပူးဂန္ထဝင်စတီဗင်ဂျရတ်အား ကျော်ဖြတ်ကာ ကလပ်သမိုင်းတွင် ပရီးမီးယားလိဂ်မှာ ဖန်တီးမှုအများဆုံးကစားသမားအဖြစ် သမိုင်းမှတ်တိုင်သစ် စိုက်ထူလာပါတယ်။
မနေ့ညက ပွဲစဉ်မတိုင်မီကတည်းက လီဗာပူးပရိသတ်များဟာ We have gone from great to glory. Salah is our king.” စာသားပါ နဖူးစည်းအပြင် ဆိုင်းဘုတ်များ ကိုင်ဆောင်ကာ ဆာလက်အား နှုတ်ဆက်ခဲ့ကြပါတယ်။
၂၀၁၇ ခုနှစ်တွင် ကလော့ပ်ရဲ့ခေါ်ဆောင်မှုဖြင့် အန်ဖီးလ်သို့ ရောက်လာတဲ့ အီဂျစ်စူပါစတားဟာ လီဗာပူးအတွက် ၄၄၂ ပွဲကစားပေးခဲ့ရာမှာ ၂၅၇ ဂိုးသွင်းယူပေးနိုင်ခဲ့ပါတယ်။
သူဟာ လီဗာပူးနှင့်အတူ ပရီးမီးယားလိဂ်ဖလား ၂ ကြိမ်၊ ချန်ပီယံလိဂ် ၁ ကြိမ်၊ ဖီဖာကလပ်ကမ္ဘာ့ဖလား၁ ကြိမ်၊ အက်ဖ်အေဖလား ၁ ကြိမ်၊ ဥရောပစူပါဖလား ၁ ကြိမ်၊ လိဂ်ဖလား ၂ ကြိမ်၊ ကွန်မြူနတီဒိုင်း ၁ ကြိမ် ဆွတ်ခူးနိုင်ခဲ့ပါတယ်။

နာပိုလီနည်းပြရာထူးမှ အန်တိုနီယိုကွန်တီ ထွက်ခွာလာ
====================

အန်တိုနီယိုကွန်တီက နာပိုလီနည်းပြရာထူးမှ ထွက်ခွာမည်ဖြစ်ကြောင်း ကြေညာလာပါတယ်။ ချဲလ်ဆီးနှင့် စပါးစ်နည်းပြဟောင်းဟာ နာပိုလီကို စီးရီးအေချန်ပီယံဖြစ်အောင် စွမ်းဆောင်ပြီး ၁၂ လအကြာတွင်ပင် ထွက်ခွာလာမှာလည်း ဖြစ်ပါတယ်။
ဂျူဗင်တပ်နှင့် အင်တာမီလန်နည်းပြဟောင်းဟာ ၂၀၂၄ ခုနှစ်တွင် နာပိုလီအား ကိုင်တွယ်ပြီးနောက် ပထမဆုံးရာသီတွင် ကလပ်သမိုင်းတွင် စတုတ္ထအကြိမ်မြောက် စီးရီးအေဖလား ရရှိအောင် ဦးဆောင်ပေးနိုင်ခဲ့ပါတယ်။
ဒါပေမဲ့ ယခုရာသီမှာတော့ နာပိုလီဟာ ချန်ပီယံ အင်တာမီလန်နှင့် ရမှတ် ၁၁ မှတ်အကွာ အဆင့် ၂ နေရာဖြင့်သာ အဆုံးသတ်ခဲ့ပါတယ်။
ကွန်တီဦးဆောင်တဲ့ နာပိုလီဟာ ချန်ပီယံလိဂ်တွင်လည်း ရုန်းကန်ခဲ့ရကာ ရှုံးထွက်အဆင့်သို့ တက်ရောက်နိုင်ခဲ့ခြင်း မရှိခဲ့ပါဘူး။
တနင်္ဂနွေနေ့ညတုန်းက စီးရီးအေရာသီသိမ်းပွဲအပြီးမှာတော့ ကွန်တီက နာပိုလီမှ ထွက်ခွာလာတော့မယ်လို့ အတည်ပြုလာပါတယ်။
ကွန်တီက "နာပိုလီကို ကိုင်တွယ်ခွင့်ရတာ ဂုဏ်ယူပါတယ်။ တကယ့်ကို အခွင့်အရေးကြီး ဖြစ်ပါတယ်။ ကြီးကျယ်တဲ့ရာသီနှစ်ခု ပိုင်ဆိုင်ခဲ့တယ်။ တကယ့်ကို ရှားပါးတဲ့အတွေ့အကြုံ ဖြစ်ပါတယ်။ ဒါက ကျွန်တော့် ဆုံးဖြတ်ချက်ပါ။ လွန်ခဲ့တဲ့ ရက်သတ္တပတ်အနည်းငယ်ကတည်းက ဥက္ကဌကို ပြောထားခဲ့ပြီးသားပါ။ နာပိုလီက အမြဲတမ်း ကျွန်တော့်အိမ် ဖြစ်နေပါမယ်"လို့ ပြောကြားသွားပါတယ်။
ကွန်တီဟာ နာပိုလီနည်းပြရာထူးမှ ထွက်ခွာလာမှုနှင့်အတူ လစ်လပ်နေတဲ့ အီတလီနည်းပြရာထူးအတွက် ထိပ်ဆုံးမှ ရေပန်းစားနေပါတယ်။
အီတလီနည်းပြရာထူးကို ပြန်လည်ရယူလာမလားလို့ မေးမြန်းလာချိန်မှာတော့ ကွန်တီက "ဂွါဒီယိုလာကိုပဲ ခန့်လို့ အကြံပေးချင်တယ်"လို့ ပြောကြားသွားပါတယ်။

စပို့တင်းအား အနိုင်ယူကာ ပေါ်တူဂီရှုံးထွက်ဖလား ဆွတ်ခူးကာ ယူရိုပါလိဂ်ဝင်ခွင့် ရရှိလာတဲ့ ဒုတိယတန်းကလပ်
===================

ဒုတိယတန်းကလပ် Torreense ဟာ အချိန်ပို ပင်နယ်တီဂိုးဖြင့် လက်ရှိ ချန်ပီယံ စပို့တင်းလစ္စဘွန်းအား အနိုင်ယူကာ ပေါ်တူဂီရှုံးထွက်ဖလားဆွတ်ခူးလာပါတယ်။
Torreense ဟာ ပွဲအစ ၃ မိနစ်မှာပင် ကီဗင်ဇိုဟီ သွင်းယူတဲ့ ဂိုးဖြင့် ပွဲကို ဦးဆောင်ထားနိုင်ခဲ့ပေမဲ့ စပို့တင်းက ဒုတိယပိုင်းအစမှာ ပြန်လည်ချေပဂိုးသွင်းယူခဲ့ပါတယ်။
အချိန်ပိုမှာ စပို့တင်းရဲ့ ဥရုဂွေးဘယ်နောက်ခံလူမက်ဆီမီလီယာနိုအရူဂျို အနီကတ်ပြထုတ်ပယ်ခြင်းခံခဲ့ရပြီး ပင်နယ်တီလည်း ပေးခဲ့ရပါတယ်။ ယင်းပင်နယ်တီကနေ ကိတ်ဗာဒီနောက်ခံလူစတိုပီရာက Torreense အတွက် အဖိုးတန်အနိုင်ဂိုးသွင်းယူသွားခဲ့ပါတယ်။
Torreense ဟာ ကလပ်သက်တမ်း ၁၀၉ နှစ်အတွင်း ပထမဆုံးဆုဖလား ဆွတ်ခူးလာတာ ဖြစ်ပြီး လာမဲ့ ရာသီမှာ ယူရိုပါလိဂ်ဝင်ခွင့် ရရှိလာခဲ့ပါတယ်။
Torreense က လစ္စဘွန်းနှင့် ၂၅ မိုင်အကွာ တောရက်စ်ဗီဒရက်စ်မှာ အခြေစိုက်တဲ့ ကလပ် ဖြစ်ပြီး ပရိသတ် ၂၅၀၀ တည်းသာ ဆန့်တဲ့ ကွင်းအသုံးပြုနေတဲ့ ကလပ်ပါ။
Torreense ဟာ ယခင် ၁၉၅၆ ခုနှစ်တုန်းက ပေါ်တူဂီဖလား ဗိုလ်လုပွဲသို့ တစ်ကြိမ် တက်ရောက်ခဲ့ဖူးပေမဲ့ ပေါ်တိုအား အရေးနိမ့်ခဲ့ပါတယ်။
Torreense ဟာ ဒုတိယတန်းပလေးအော့ဖ်ကနေ တဆင့် ပေါ်တူဂီအဆင့်မြင့်တန်းလိဂ်သို့ တန်းတက်ခွင့် ပိုင်ဆိုင်ထားတဲ့ကလပ်လည်း ဖြစ်ပါတယ်။ Torreense ဟာ ပလေးအော့ဖ်ပထမအကျော့မှာ ကာဆာပီယာနှင့်ဂိုးမရှိသရေကျထားပြီး လာမဲ့ကြာသပတေးနေ့မှာ ဒုတိယအကျော့ကစားရပါမယ်။
စပို့တင်းဟာ ယခုရာသီ ပေါ်တူဂီအဆင့်မြင့်တန်းလိဂ်မှာ ဒုတိယနေရာဖြင့် အဆုံးသတ်ထားပါတယ်။ ၎င်းတို့ဟာ ပြီးခဲ့တဲ့ရာသီတုန်းက ပြည်တွင်းဖလား ၂ လုံး ဆွတ်ခူးခဲ့တဲ့အသင်းပါ။

ပရီးမီးယားလိဂ်သမိုင်းတွင် အသက်အငယ်ဆုံးပွဲထွက်ကစားခွင့်ရသူအဖြစ် သမိုင်းမှတ်တိုင်စိုက်ထူလာတဲ့ ဒေါ်မန်း
===================

အာဆင်နယ်ရဲ့မက်စ်ဒေါ်မန်းဟာ ခရစ္စတယ်ပဲလေ့စ်နှင့် ပရီးမီးယားလိဂ်ရာသီသိမ်းပွဲတွင် အာဆင်နယ်အတွက် ပွဲထွက်ကစားခွင့်ရရှိလာပြီးနောက် ပရီးမီးယားလိဂ်သမိုင်းတွင် အသက်အငယ်ဆုံးပွဲထွက်ကစားခွင့်ရရှိသူအဖြစ် သမိုင်းမှတ်တိုင်စိုက်ထူလာပါတယ်။
ယခုရာသီတွင် အာဆင်နယ်အတွက် အရန်အဖြစ် ပရီးမီးယားလိဂ်ပွဲ ၅ ပွဲကစားခွင့် ရရှိထားခဲ့ပြီးဖြစ်တဲ့ ဒေါ်မန်းဟာ အသက် ၁၆ နှစ်၊ ၁၄၄ ရက်ဖြင့် ပရီးမီးယားလိဂ်သမိုင်းတွင် အသက်အငယ်ဆုံးပွဲထွက်ကစားခွင့်ရသူ ဖြစ်လာတာ ဖြစ်ပါတယ်။
သူဟာ ၂၀၀၈ ခုနှစ်တုန်းက အဲဗာတန်အတွက် အသက် ၁၆ နှစ်နှင့် ၁၉၈ ရက်တွင် ပွဲထွက်ကစားခွင့်ရခဲ့တဲ့ ဂျိုဆေးဘက်စ်တာရဲ့စံချိန်ကို ရိုက်ချိုးလာတာလည်း ဖြစ်ပါတယ်။
ဒေါ်မန်းဟာ အာဆင်နယ်နှင့်အတူ ပရီးမီးယားလိဂ်ချန်ပီယံဖြစ်ပြီးနောက် အသက်အငယ်ဆုံးပရီးမီးယားလိဂ်ချန်ပီယံအဖြစ် သမိုင်းမှတ်တိုင်စိုက်ထူထားသူလည်း ဖြစ်ပါတယ်။
သူဟာ ၂၀၂၅ ခုနှစ် နိုဝင်ဘာလတုန်းက အသက် ၁၅ နှစ်နှင့် ၃၀၈ ရက်ဖြင့် ချန်ပီယံလိဂ်သမိုင်းတွင် အသက်အငယ်ဆုံးပွဲကစားခွင့်ရသူအဖြစ်လည်း သမိုင်းမှတ်တိုင်စိုက်ထူခဲ့သူ ဖြစ်ပါတယ်။
သူဟာ ၂၀၂၅ ခုနှစ် ဩဂုတ်လတုန်းက အသက် ၁၅ နှစ်နှင့် ၂၃၅ ရက်ဖြင့် ပရီးမီးယားလိဂ်တွင် အသက်အငယ်ဆုံး ပွဲကစားခွင့်ရသူအဖြစ် သမိုင်းမှတ်တိုင်စိုက်ထူခဲ့သလို မတ်လတုန်းက အဲဗာတန်နှင့်ပွဲတွင် ဂိုးသွင်းယူပြီးနောက် အသက်အငယ်ဆုံးဂိုးသွင်းယူသူအဖြစ်လည်း သမိုင်းမှတ်တိုင်စိုက်ထူခဲ့သူ ဖြစ်ပါတယ်။