မြစ်ဆုံရေအားလျှပ်စစ်မီမံကိန်းကို ပြန်လည်သုံးသပ် ဆွေးနွေးအကောင်ထည်ဖော်သွားရန် လိုအပ်

ငလျက်ဒ-ဏ်ခံနိုင်မှုအတွက် အဓိကထားတွက်ချက်ဆောင်ရွက်မှု အခြေအနေကို ဒေသခံများကို ရှင်းလင်း
ရေအားလျှပ်စစ်သည် ကုန်ကျစရိတ်အသက်သာဆုံးဖြစ်ပြီး ကချင်ပြည်နယ်တွင် လျှပ်စစ်ဓါတ်အားထုတ်လုပ်ရန် မေခ၊ မလိခမြစ်နှစ်ခုမှ ပေါင်းစည်းပေးသည့် ဧရာဝတီမြစ်ဆုံ ရေအားလျှပ်စစ်စီမံကိန်းကို ပြန်လည်သုံးသပ်ဆွေးနွေးအကောင်အထည်ဖော်ဆောင်ရွက်သွားရန် လိုအပ်ကြောင်း နိုင်ငံတော်သမ္မတရုံး ဝန်ကြီးဌာန (၁) ပြည်ထောင်စုဝန်ကြီး ဦးတင်အောင်စန်းက ပြောသည်။
ယမန်နေ့က မြစ်ကြီးနားမြို့တွင် သွားရောက်ပြီး ကချင်ပြည်နယ်အစိုးရအဖွဲ့ ဌာနဆိုင်ရာတာဝန်ရှိသူများ တိုင်းရင်းသားစာပေနှင့်ယဉ်ကျေးမှုအဖွဲ့များ၊ လူမှုရေးအသင်းအဖွဲ့များနှင့် ဒေသခံပြည်သူများကို တွေ့ဆုံစဉ် ပြည်ထောင်စုဝန်ကြီး ဦးတင်အောင်စန်းက အထက်ပါအတိုင်း‌ ပြောကြားခဲ့ခြင်းဖြစ်သည်။
မြစ်ဆုံစီမံကိန်း အောင်မြင်ပါက ကချင်ပြည်နယ်နှင့် နိုင်ငံတော်၏ အကျိုးပြုစေမည့် ကုန်ထုတ်စွမ်းအား ပိုမိုတိုးတက်စေမည့် လျှပ်စစ်ဓါတ်အားများရရှိပြီး နောင်လာနောက်သားများ အကျိုးများစွာ ခံစားရမည်ဖြစ်ကြောင်းလည်း ဦးတင်အောင်စန်းက ပြောကြားခဲ့သည်။
ထို့နောက် လျှပ်စစ်စွမ်းအားဝန်ကြီးဌာနမှ ငလျင်နှင့်အင်ဂျင်နီယာ ဘူမိဗေဒပညာရှင် ဒေါက်တာအေးလွင်က ရေလှောင်တမံတည်ဆောက်မှုနှင့် ပတ်သက်၍ ငလျက်ဒ-ဏ်ခံနိုင်မှုအတွက် အဓိကထားတွက်ချက်ဆောင်ရွက်မှုအခြေအနေများကို အသေးစိတ်ရှင်းလင်းခဲ့ကြောင်း သိရသည်။
ထို့ပြင် မြစ်ဆုံရေအားလျှပ်စစ်စီမံကိန်းဆိုင်ရာအချက်အလက်များနှင့် ရေကြီးရေလျှံမှုများကို ထိန်းသိမ်းဆောင်ရွက်နိုင်မှု၊ ဧရာဝတီမြစ်အတွင်းသို့ စီးဝင်သော မြစ်လက်တက်များကြောင့် ဧရာဝတီမြစ်ရေ ပုံမှန်အတိုင်းဆက်လက်စီးဆင်းနိုင်မှု မြစ်ကြောင်းတစ်လျှောက်ရေယာဉ်များ ပုံမုန်ခုတ်မောင်းသွားလာနိုင်မှု ပြည်နယ်အတွင်းနှင့် နိုင်ငံအတွက် လျှပ်စစ်ဓာတ်အား လုံလောက်စွာ ထုတ်လုပ်ဖြန့်ဖြူးပေးနိုင်မှု အခြေအနေများကိုလည်း လျှပ်စစ်စွမ်းအားဝန်ကြီးဌာန ပြည်ထောင်စုဝန်ကြီး ဦးဉာဏ်ထွန်းက ပြောကြားခဲ့သည်။
ပြည်သူလူထုစိုးရိမ်မှုမရှိစေရေး နည်းပညာပိုင်းဆိုင်ရာအဖွဲ့အစည်းများ စနစ်တကျဖွဲ့စည်းဆောင်ရွက်သွားမည် အခြေအနေများကိုလည်း ဒေသခံများကို ရှင်းလင်းခဲ့ကြောင်း သိရသည်။

တရုတ်ကအာကာသထဲသို့ဂြိုဟ်တု ၂၀၀,၀၀၀ လွှတ်တင်ရန် လျှောက်ထား

အီလွန်မတ်စ်၏ စပေ့အိတ်စ် ကုမ္ပဏီသည် မျှဝေသုံးစွဲရသည့် ပတ်လမ်းအရင်းအမြစ်များကို ဖောင်းပွအောင် လုပ်ဆောင်နေသည်ဟု တရုတ်က စွပ်စွဲခဲ့ပြီးနောက် တရုတ်ကုမ္ပဏီများက အင်တာနက်ဂြိုဟ်တုပေါင်း ၂၀၀,၀၀၀ ကျော် လွှတ်တင်မည့် အစီအစဉ် ကုလသမဂ္ဂအေဂျင်စီတစ်ခုထံ တင်ပြခဲ့ကြောင်း သိရသည်။
ပြီးခဲ့သည့်လကုန်ပိုင်းက တရုတ်ဂြိုဟ်တုလုပ်ငန်းရှင်အသီးသီးထံမှ တင်ပြချက်ပေါင်း တစ်ဒါဇင်ခန့်ကို အပြည်ပြည်ဆိုင်ရာဆက်သွယ်ရေး အဖွဲ့ထံသို့ ပေးပို့ခဲ့သည်။
အကြီးမားဆုံး စီမံကိန်းများဖြစ်သည့် စီတီစီ-၁နှင့် စီတီစီ-၂ တို့သည် တစ်ခုလျှင် ဂြိုဟ်တု ၉၆,၇၁၄ လုံးစီအတွက် ဖြစ်ကာ အသစ်တည်ထောင်လိုက်သော ရေဒီယိုလှိုင်းစဉ် အသုံးချမှုနှင့် နည်းပညာဆန်းသစ်တီထွင်မှုဆိုင်ရာ အဖွဲ့အစည်းက တင်ပြခဲ့ခြင်းဖြစ်သည်။
မကြာသေးမီနှစ်များအတွင်း အမေရိကနှင့် တရုတ်တို့သည် အင်တာနက်ဂြိုဟ်တု အုပ်စုကြီးများ လွှတ်တင်ရန် အပြိုင်အဆိုင် ကြိုးပမ်းလာကြရာ အမေရိကန်အခြေစိုက် စပေ့အိတ်စ်သည် ၎င်း၏ စတားလင့်ခ် ဂြိုဟ်တုများဖြင့် သိသိသာသာ ရှေ့ပြေးနေသည်။ စတားလင့်ခ်သည် ကမ္ဘာ့အနိမ့်ပိုင်း ပတ်လမ်းရှိ ဂြိုဟ်တုအများစုကို ပိုင်ဆိုင်ထားပေသည်။ သို့သော် ရေဒီယိုလှိုင်းနှုန်းစဉ်များနှင့် ပတ်လမ်းနေရာများသည် အကန့်အသတ်ရှိနေပြီး ဦးဦးဖျားဖျား လုပ်ဆောင်နိုင်သူများက အဆိုပါအရင်းအမြစ်များအသုံးပြုရန် ဦးစားပေးအခွင့်အရေး ရရှိနိုင်မည်ဖြစ်သည်။ ပြီးခဲ့သည့် သောကြာနေ့က စပေ့အိတ်စ်အား ဒုတိယမျိုးဆက် စတားလင့်ခ် ဂြိုဟ်တုအလုံးပေါင်း ၇,၅၀၀ ထပ်မံလွှတ်တင်ရန် ခွင့်ပြုချက်ပေးလိုက်ကြောင်း အမေရိကန် ဖက်ဒရယ် ဆက်သွယ်ရေးကော်မရှင် (အက်ဖ်စီစီ) က ကြေညာခဲ့ပါသည်။
အဆိုပါ ဂြိုဟ်တုများကို ၂၀၃၁ ခုနှစ်ကုန်တွင် ပတ်လမ်းအတွင်းသို့ ရောက်ရှိနေရမည်ဖြစ်ပြီး၊ ထိုအခါ စပေ့အိတ်စ် ၏ စုစုပေါင်းဂြိုဟ်တုအရေအတွက်မှာ ၁၅,၀၀၀ အထိ ရှိလာမည်ဖြစ်သည်။ စတားလင့်ခ်သည် ဂြိုဟ်တုပေါင်း ၃၀,၀၀၀ လွှတ်တင်ရန် အက်ဖ်စီစီထံ လျှောက်ထားခဲ့သော်လည်း ကျန်ရှိသော အရေအတွက်အား ခွင့်ပြုရန်အတွက် ဆုံးဖြတ်ချက်ကိုမူ ဆိုင်းငံ့ထားဆဲဖြစ်ကြောင်း သိရသည်။

ထန်းတပင် ထွေအုပ်ရုံးပေါ် ဗုံးကြဲခံရပြီး ခရိုင်ထွေအုပ် လက်ထောက်ညွှန်မှူးသေဆုံးကာ ခရိုင်ရွေးကော်အဖွဲ့ဝင်ဒဏ်ရာရ

ရွေးကောက်ပွဲ အပိုင်း ၂ ကျင်းပနေတဲ့ ပဲခူးတိုင်း ၊ တောင်ငူခရိုင် ၊ ထန်းတပင်မြို့နယ်က ထွေအုပ်ရုံးကို ဒီကနေ့ ဇန်နဝါရီ ၁၁ ရက်နေ့ မနက်ပိုင်းမှာ ဒရုန်းဗုံး ကြဲချတိုက်ခိုက်ခံရပြီး သေဆုံံးသူ နဲ့ ထိခိုက်ဒဏ်ရာ ရသူရှိခဲ့တယ်လို့ စုံစမ်းသိရှိရပါတယ်။
ဗုံးကြဲတိုက်ခိုက်မှုမှာ တောင်ငူခရိုင်အထွေထွေအုပ်ချုပ်ရေးဦးစီးဌာနမှ လက်ထောက်ညွှန်ကြားရေးမှူး သေဆုံးခဲ့ပြီး ထိခိုက်ဒဏ်ရာ ရရှိသူကတော့ ခရိုင်ရွေးကောက်ပွဲကော်မရှင်အဖွဲ့ဝင် တယောက် ဖြစ်တယ်လို့ သိရပါတယ်။
" မနက်က ထွေအုပ်ရုံး ခေါင်မိုးပေါ်ကို ကျတာ။ တောင်ငူခရိုင် ထွေအုပ်ရုံးက AD ဆုံးသွားတယ်။ လက်ထောက်ညွှန်ကြားရေးမှူးပေါ့။ ခရိုင်ရွေးကောက်ပွဲကော်မရှင်အဖွဲ့ဝင်တယောက်က ပေါင်မှာ ဒဏ်ရာရတယ် ကြားတယ်။ " လို့ ဖြစ်စဥ်သိရှိသူ လုံခြုံရေး တပ်ဖွဲ့နဲ့နီးစပ်သူက ပြောပါတယ်။
ထန်းတပင်မြို့နယ်က ထွေအုပ်ရုံးကို ဗုံးကြဲတိုက်ခိုက်ခံခဲ့ရပြီး လူသေဆုံးမှုရှိခဲ့ပေမယ့်လည်း မဲရုံတွေ ပိတ်သိမ်းလိုက်တာမျိုး မရှိဘဲ ပုံမှန်အတိုင်း ဆက်ဖွင့်ထားတယ်လို့ တောင်ငူခရိုင် ရွေးကောက်ပွဲကော်မရှင်ဥက္ကဋ္ဌ ဦးဌေးဝင်က ပြောပါတယ်။
အလားတူ ရွေးကောက်ပွဲ အပိုင်း ၂ ကျင်းပနေတဲ့ ပဲခူးတိုင်းထဲက မင်းလှမြို့နယ်၊ လမ်းမတော်လမ်းမှာ ဖွင့်လှစ်ထားတဲ့ မဲရုံအနီးမှာလည်း ဒီကနေ့ မနက်ပိုင်းက မိုင်းပေါက်ကွဲမှုဖြစ်ပွားခဲ့တယ်လို့ သိရပါတယ်။
မကွေးတိုင်း ၊ စလင်းမြို့နယ် မှာလည်း ဒီကနေ့မနက်ပိုင်းက တောင်ကန်မဲရုံ(မြို့အရှေ့ဘက်) မြေမိရပ်ကွက်မဲရုံ၊ ပုထိုးဖြူရပ်ကွက်မဲရုံ အနီးဝန်းကျင်နဲ့ မြို့ထဲက မဲရုံတချို့ အနီးမှာလည်း ဒရုန်းဗုံး ကြဲချတိုက်ခိုက်မှုတွေ ရှိခဲ့တယ်လို့ သိရပါတယ်။
" မြို့ထဲမှာ ဒရုန်းတွေက သွားလိုက်ပြန်လိုက်နဲ့ ဝဲနေတယ်။ မြို့ထဲက အမှတ် ၁ နဲ့ ၂ မဲရုံအနီးက ဘုန်းကြီးကျောင်းမှာ လုံခြုံရေးချထားတဲ့ စစ်တပ်ကိုလည်း လာကြဲတယ်။ အပြင်ဘက်ကျတော့ ထိခိုက်ဘာညာမရှိဘူး ။ " လို့ စလင်းဒေသခံက ပြောပါတယ်။
ရွေးကောက်ပွဲ အပိုင်း ၂ ကိုတော့ ရှမ်းပြည်နယ် ၊ ကယား ၊ ကချင် ၊ကရင် ၊မွန် ၊ ဧရာဝတီ ၊ ပဲခူးတိုင်း ၊မကွေးတိုင်း ၊ရန်ကုန်တိုင်း ၊ တနင်္သါရီတိုင်း ၊ စစ်ကိုင်းတိုင်း ၊ မန္တလေးတိုင်းထဲက မြို့နယ်ပေါင်း ၁၀၀ မှာ ဒီကနေ့ တပြိုင်တည်း ကျင်းပနေတာ ဖြစ်ပါတယ်။

ကသာစစ်ရှောင်တွေ ရောက်ရှိရာဒေသမှာ ကျောင်းဆက်တက်ပြီး စာမေးပွဲ ဖြေဆိုခွင့်ရဖို့ လိုအပ်နေ

ကသာမှာ ဖြစ်ပွားနေတဲ့ စစ်ရေးအခြေအနေကြောင့် ကျောင်းတက်ခွင့် ဆုံးရှုံးနေရတဲ့ ကျောင်းသူ ကျောင်းသားတွေအတွက် လက်ရှိ စစ်ရှောင်နေရတဲ့ ဒေသရှိ ကျောင်းတွေမှာ ကျောင်းဆက်တက်ခွင့်ရပြီး စာမေးပွဲ ဖြေဆိုခွင့်ရရှိဖို့ လိုအပ်နေတယ်လို့ ဒေသခံတွေဆီက သိရပါတယ်။
အခြေခံပညာကျောင်းသူ ကျောင်းသားတွေဟာ လာမယ့်ဖေဖော်ဝါရီလမှာ နှစ်ဆုံးစာမေးပွဲကို ဖြေဆိုရမှာ ဖြစ်ပြီး ၂၀၂၆ ခုနှစ် Grade 12 တက္ကသိုလ်ဝင်စာမေးပွဲကိုတော့ မတ်လ ၁၁ ရက်ကနေ ၁၇ ရက်အထိ ဖြေဆိုကြရမှာ ဖြစ်တယ်လို့ သိရပါတယ်။
အဲဒီအတွက် ကသာမြို့​ကနေ အခြားဒေသတွေမှာ စစ်ရှောင်နေကြရတဲ့ ဒေသခံတွေက အခြေခံပညာ ကျောင်းသူကျောင်းသားတွေကို စာမေးပွဲ ဖြေခွင့်ဆုံးရှုံးမှု မရှိစေရေးအတွက် ရောက်ရှိရာမြို့နယ်တွေက ကျောင်းတွေမှာ စာသင်ကြားခွင့် နဲ့ ဖြေဆိုခွင့်ပြုပေးဖို့ ဆန္ဒရှိနေကြတာ ဖြစ်တယ်လို့ သိရပါတယ် ။
" စစ်ရှောင်တွေ ရောက်တဲ့နေရာ တိုင်းမှာစာသင်ခွင့်ရမှပဲ အဆင်ပြေမယ် ။ ကသာမှာ ကျောင်းတွေ ပြန်ဖွင့်မယ်ဆိုလည်း လမ်းတွေကပိတ်ထားတော့ ဘယ်လိုလာမလဲ ။ကလေးတွေ ဘယ်လိုကျောင်းတက်မလဲ ။အဆင်မပြေနိုင်ဘူး ။ အခုထိလည်း ကလေးတွေ ကျောင်းကိစ္စနဲ့ ပတ်သက်ပြီး တရားဝင်စာထုတ်တာမျိုးမရှိသေးဘူး ။ ကသာမှာလည်း ကျောင်းပြန်ဖွင့်မယ်ဆိုပြီး သတင်းထွက်တာပဲရှိတယ်။ ကသာစစ်ရှောင်တွေကို ရောက်ရာအရပ်မှာ ကျောင်းတက်ခွင့်ပြုဖို့ တိုင်းအဆင့်ကနေ လုပ်နေတယ်ဆိုပေမယ့်လည်း စာမထွက်သေးဘူး ။ တရားဝင်စာထွက်မှ အတည်ဖြစ်မှာလေ။ " လို့ ကသာ ဒေသခံက ပြောပါတယ် ။
လက်ရှိမှာတော့ မိုးညှင်းမြို့ကို ရောက်ရှိနေတဲ့ ကသာစစ်ရှောင်တွေထဲက ကျောင်းသူကျောင်းသားတွေကို တာဝန်ရှိသူတွေက မိုးညှင်းမြို့နယ်မှာပဲ ဆက်လက် ကျောင်းတက်ရောက်ခွင့် ပြုထားတဲ့ အခြေအနေ ရှိတယ်လို့ စစ်ရှောင်တွေဆီက သိရပါတယ်။
မိုးညှင်းရောက် ကသာစစ်ရှောင်ထဲက ကျောင်းသူကျောင်းသူ အချို့မှာတော့ ကျောင်းသုံးဖတ်စာအုပ်တွေ နဲ့ စာရေးကိရိယာ လိုအပ်မှုရှိနေတဲ့ အတွက် မြို့ခံတွေနဲ့အတူ ပြင်ပဒေသရှိ အလှူရှင်တွေက လှူဒါန်းပေးမှု ရှိနေတယ်လို့ သိရပါတယ်။
" ကသာကနေ မိုးညှင်းကို စစ်ရှောင်လာတဲ့ ကလေးတွေကို စာမေးပွဲ နီး၊ စာမေးပွဲ ဖြေဖို့ စီစဥ်ပေးနေတယ်။ စာအုပ်တွေ အထောက်ထားတွေ မစုံလည်း ကသာက စစ်ဘေးရှောင်ဆိုရင် စာအုပ် ကျောင်းသုံးပစ္စည်းကအစ ပြင်ပေးပြီး မိုးညှင်းက ကျောင်းတွေမှာ စာသင်ပေးနေတယ်။ တချို့ကလေးတွေ သောကြာနေ့က စတက်နေကြပြီ ။ ကသာက ငြိမ်နေပေမယ့် ပြန်လို့ကလည်းမရ၊ လမ်းကလည်းမပွင့်၊ PDF ဖက်ကလည်း ဒရုန်းတွေ ဝဲပြီး စစ်တပ်တွေ ရှိတဲ့ဖက် လာလာချတော့ မပြန်ရဲကြသေးဘူး။ " လို့ မိုးညှင်းရောက် ကသာစစ်ဘေးရှောင် တယောက်က ပြောပါတယ်။
ကသာမြို့မှာ ဖြစ်ပွားတဲ့ တိုက်ပွဲကြောင့် ၂၀၂၅ ခုနှစ် ၊ ဒီဇင်ဘာ ၂၉ ရက်နေ့ကတည်း​က အခြေခံပညာကျောင်းတွေအားလုံး ပိတ်ထားရပြီး မြို့ပေါ်ဒေသခံအများစုဟာ တောတောင်တွေထဲနဲ့ မိုးညှင်း ၊အင်းတော် ၊ မော်လူး ၊ မြစ်ကြီးနား ၊ရန်ကုန် ၊ မန္တလေး ဘက်တွေကို စစ်ဘေးရှောင်နေကြရတာ ဖြစ်တယ်လို့ သိရပါတယ်။
ကသာမြို့မှာတော့ ၂၀၂၅ ခုနှစ် ဒီဇင်ဘာလ ၂၇ ရက်နေ့ညက စပြီး ဇန်နဝါရီ ၂ ရက်နေ့အထိ တိုက်ပွဲ အပြင်းထန်ဖြစ်ပွားခဲ့ပါတယ်။ အဲဒီနောက်ပိုင်းကစပြီး ဒီကနေ့အထိတော့ စစ်ရေးပြင်းထန်မှု မရှိတော့ဘဲ ရံဖန်ရံခါ ပစ်ခတ်မှုသာ ရှိနေတာ ဖြစ်တယ်လို့ သိရပါတယ် ။
အဆိုပါ ကသာမြို့တိုက်ပွဲအကြားမှာ ရပ်ကွက် ၈ ထဲက အိမ်ခြေ ၁၅ လုံးလောက် မီးလောင်ပျက်စီးခဲ့ရပြီး အ.ထ.က ၂ ကျောင်းလည်း မီးလောင်မှု ရှိခဲ့တယ်လို့ သိရပါတယ်။
လက်ရှိမှာ ကသာမြို့ကို ဝင်ရောက်နိုင်တဲ့ မိန်းလမ်းမကြီးတွေကို ဒေသတွင်းလက်နက်ကိုင်အဖွဲ့က ထိန်းချုပ်ထားပြီး လမ်းပိတ်ထားသလို ကသာမြို့ အဝင်အထွက်ကိုလည်း တပ်ဘက်က ပိတ်ထားဆဲ ဖြစ်တယ်လို့ သိရပါတယ် ။

ကံမမြို့နယ်မှာ မဲရုံတွေကို လိုက်စစ်ဆေးတဲ့အဖွဲ့ တိုက်ခိုက်ခံရပြီး မြို့နယ်အုပ်ချုပ်ရေးမှူး သေဆုံး

ရွေးကောက်ပွဲ အပိုင်း ၂ ကျင်းပနေတဲ့ မကွေးတိုင်း သရက်ခရိုင် ၊ ကံမမြို့နယ်ထဲမှာ ဒီကနေ့ ဇန်နဝါရီ ၁၁ ရက်နေ့ ၊ နေ့လယ်ပိုင်းက မဲရုံတွေကိုလိုက်လံစစ်ဆေးခဲ့တဲ့ မြို့နယ်အုပ်ချုပ်​ရေးမှူးနဲ့အဖွဲ့ ပစ်ခတ်တိုက်ခိုက်ခံရပြီး သေဆုံးသူနဲ့ ထိခိုက် ဒဏ်ရာရသူ​တွေ ရှိခဲ့တယ်လို့ စုံစမ်းသိရှိ ရပါတယ်။
တိုက်ခိုက်မှုအတွင်းမှာ ကံမမြို့နယ်အုပ်ချုပ်​ရေးမှူး ဦးဇော်မင်းနိုင် သေဆုံးခဲ့ပြီး နောက်ထပ် ဦးသန့်ဇင်အောင် ဆိုသူမှာ သေနတ်ကျည် ထိမှန်ဒဏ်ရာတွေ ရရှိခဲ့တယ်လို့ သိရပါတယ် ။
" ၁၂ နာရီကျော်လောက်မှာ ပစ်ခံရတယ် သိရတယ် ။မြို့နယ် အုပ်ချုပ်ရေးမှူးက ဆေးရုံပို့ပေမယ့် ဆုံးသွားတယ်။ နောက်တယောက်ကတော့ ယာဥ်မောင်းလို့သိရတယ် ။ သူမှာလည်း ဒဏ်ရာက များတယ် ။ " လို့ လုံခြုံရေး အဖွဲ့နဲ့ နီးစပ်သူက ပြောပါတယ်။
မြို့နယ်အုပ်ချုပ်ရေးမှူး အဖွဲ့နဲ့ ရဲတပ်ဖွဲ့မှူး အပါလုံခြုံရေးတပ်ဖွဲ့ဝင်တွေပါတဲ့ ပူးပေါင်းအဖွဲ့ဟာ ကံမမြို့နယ်အတွင်းရှိ မဲရုံတွေကို လှည့်လည် စစ်ဆေးမှုပြုလုပ်စဥ် ပြောင်ကျရွာနဲ့ ပယ်ကျရွာအကြားမှာ ဒေသတွင်းလက်နက်ကိုင်အဖွဲ့ရဲ့ ပစ်ခတ်တိုက်ခိုက်မှုကို ခံခဲ့ရတာ ဖြစ်တယ်လို့ သိရပါတယ်။
"ကျွန်တော်တို့လည်း သတင်းတော့ကြားတယ် ။ အတိအကျတော့ သေချာ မသိသေးဘူး ။ " လို့ သရက်ခရိုင် ရွေးကောက်ပွဲကော်မရှင် ဥက္ကဋ္ဌ ကပြောပါတယ် ။
ဒီကနေ့ ကျင်းပခဲ့တဲ့ ရွေးကောက်ပွဲ အပိုင်း ၂ မှာ သရက်ခရိုင်ထဲက ကံမမြို့နယ် ၊ မင်းတုန်း နဲ့ မင်းလှ မြို့နယ်တွေမှာ ရွေးကောက်ပွဲအသီးသီး ကျင်းပခဲ့တာ ဖြစ်ပါတယ်။
အလားတူ ရွေးကောက်ပွဲ အပိုင်း ၂ မှာ ပါဝင်တဲ့ ပဲခူးတိုင်း ၊ ထန်းတပင်မြို့နယ်မှာလည်း ဒီကနေ့ ဇန်နဝါရီ ၁၁ ရက်နေ့ မနက်ပိုင်းက မြို့နယ်ထွေအုပ်ရုံးကို ဒရုန်းဗုံးကြဲချ တိုက်ခိုက်ခံရပြီး တောင်ငူခရိုင်အထွေထွေအုပ်ချုပ်ရေးဦးစီးဌာနမှ လက်ထောက်ညွှန်ကြားရေးမှူး သေဆုံးခဲ့ပြီး ခရိုင်ရွေးကောက်ပွဲကော်မရှင်အဖွဲ့ဝင် တယောက်ထိခိုက်ဒဏ်ရာ ရရှိခဲ့တယ်လို့ သိရပါတယ် ။
ရွေးကောက်ပွဲ အပိုင်း ၂ ကိုတော့ ရှမ်းပြည်နယ် ၊ ကယား ၊ ကချင် ၊ကရင် ၊မွန် ၊ ဧရာဝတီ ၊ ပဲခူးတိုင်း ၊မကွေးတိုင်း ၊ရန်ကုန်တိုင်း ၊ တနင်္သါရီတိုင်း ၊ စစ်ကိုင်းတိုင်း ၊ မန္တလေးတိုင်းထဲက မြို့နယ်ပေါင်း ၁၀၀ မှာ ဒီကနေ့ တပြိုင်တည်း ကျင်းပနေတာ ဖြစ်ပါတယ်။

အီရန်မှာ ဆန္ဒပြပွဲတွေအတွင်း လူရာပေါင်းများစွာ သေဆုံး၊ အမေရိကန်စစ်တပ် တိုက်ခိုက်လာရင် လက်တုံ့ပြန်မယ် သတိပေး

အမေရိကန်ပြည်ထောင်စုက တိုက်ခိုက်ရင် အီရန်က သတိပေးလိုက်ပါတယ်။ အီရန်အစိုးဆန့်ကျင်ရေး ဆန္ဒပြပွဲတွေကို အစိုးရရဲ့ နှိမ်နင်းမှုတွေ မြင့်တက်လာနေပြီး ဆန္ဒပြသူ ရာပေါင်းများစွာ သေဆုံးခဲ့တယ်လို့ သတင်းတွေလည်း ထွက်ပေါ်နေပါတယ်။
"ဒီမှာ အခြေအနေတွေက အရမ်းဆိုးနေတယ်" လို့ တီဟီရန်က သတင်းရင်းမြစ်တယောက်က ပြောပါတယ်။ "ကျွန်တော်တို့ရဲ့ မိတ်ဆွေတွေ အများကြီး သေဆုံးခဲ့ပါတယ်။ သူတို့က ကျည်ဆန်အစစ်တွေနဲ့ ပစ်ခတ်နေကြတာ။ စစ်မြေပြင်လိုပါပဲ။ လမ်းတွေက သွေးတွေနဲ့ ပြည့်နေတယ်။ သူတို့က ထရပ်ကားတွေနဲ့ အလောင်းတွေကို ယူဆောင်သွားနေကြတယ်။" လို့ ဆိုပါတယ်။
ဘီဘီစီက တီဟီရန်အနီးက ရင်ခွဲရုံကနေ ရိုက်ကူးထားတဲ့ ရုပ်သံဖိုင်မှာတော့ အလောင်းအိတ် ၁၈၀ လောက်ကို ရှိနေပါတယ်။ ဆန္ဒပြသူ ၄၉၅ ယောက်နဲ့ လုံခြုံရေးတပ်ဖွဲ့ဝင် ၄၈ ယောက် သေဆုံးတယ်လို့ လူ့အခွင့်အရေးအဖွဲ့တွေက ပြောပါတယ်။
သောကြာနေ့ညတွင် ရက်ရှ်မြို့ရှိ ဆေးရုံတရုံကို အလောင်း ၇၀ သယ်ဆောင်လာခဲ့ကြောင်း BBC Persian သတင်းဌာနက အတည်ပြုခဲ့ပြီး တီဟီရန်ဆေးရုံမှ ကျန်းမာရေးဝန်ထမ်းတယောက်ကတော့ ပြောကြားရာတွင် လူ ၃၈ ယောက်သေဆုံးခဲ့တယ်ဆိုပါတယ်။ လူငယ်တွေရဲ့ ဦးခေါင်းနဲ့ ရင်ဘတ်တွေကို သေနတ်နဲ့ ပစ်ခတ်ခံခဲ့ရပြီး အများစုက ဆေးရုံမရောက်ဘူးလို့ ဆိုပါတယ်။
နိုင်ငံတကာသတင်းဌာနတွေကတော့ အီရန်နိုင်ငံအတွင်းမှာ သတင်းယူနိုင်ခြင်းမရှိပါဘူး ။ အီရန်အစိုးရဟာ ကြာသပတေးနေ့မှစပြီး အင်တာနက်ဖြတ်တောက်ထားတာကြောင့် သတင်းအချက်အလက်ရယူဖို့နဲ့ အတည်ပြုဖို့တို့ကို ခက်ခဲနေပါတယ်။
သီတင်းနှစ်ပတ်ကြာ မငြိမ်မသက်မှုတွေအတွင်း လူ တသောင်းကျော် ဖမ်းဆီးခံထားရပါတယ်။ ဆန္ဒပြသူတွေ သတ်ဖြတ်ခံရမှုနဲ့ ပတ်သက်ပြီး အီရန်ကို တိုက်ခိုက်မယ်လို့ အမေရိကန်ပြည်ထောင်စုက ခြိမ်းခြောက်ထားပြီး သမ္မတ ဒေါ်နယ်ထရန့်ကတော့ လွတ်မြောက်ရေးကို ရှာဖွေနေသူတွေကို ကူညီဖို့ အသင့်ရှိတယ်လို့ ပြောပါတယ်။
ဒါပေမယ့် ဒီကိစ္စကို ဘယ်လိုကိုင်တွယ်မလဲကိုဆိုကတော့ ထရန့်က အသေးစိတ်မပြောပါဘူး။ အီရန်အပေါ် စစ်ရေးအရ တိုက်ခိုက်မှုတွေအတွက် ရွေးချယ်စရာတွေရှိတယ်လို့ အစိုးရထိပ်တန်း တာဝန်ရှိသူတယောက်ကလည်း ထုတ်ဖော်ပြောကြားထားပါတယ်။
အမေရိကန်က တိုက်ခိုက်ပါက အစ္စရေးနဲ့ ဒေသတွင်းရှိ အမေရိကန်စစ်အခြေစိုက်စခန်းနဲ့ သင်္ဘောဌာတွေဟာ တရားဝင်ပစ်မှတ်များ ဖြစ်လာလိမ့်မယ်လို့ အီရန်လွှတ်တော်ဥက္ကဋ္ဌက သတိပေးထားပါတယ်။ ငွေကြေးဖောင်းပွမှု မြင့်တက်လာတာကြောင့် စတင်ခဲ့တဲ့ ဆန္ဒပြမှုတွေဟာ အီရန်ဘာသာရေးခေါင်းဆောင် အယာတိုလာ အလီ ခါမေနီရဲ့ ဘာသာရေးအုပ်ချုပ်မှုကို အဆုံးသတ်ဖို့ တောင်းဆိုမှုတွေလည်း ထွက်ပေါ်ခဲ့ပါတယ်။

အချိန်မနှောင်းခင် သဘောတူညီချက်ယူဖို့ ကျူးဘားကို ဒေါ်နယ်ထရန့် သတိပေး

ကျူးဘားအနေနဲ့ သဘောတူညီချက်တခု ပြုလုပ်ဖို့ အမေရိကန်သမ္မတ ဒေါ်နယ်ထရန့်က တိုက်တွန်းလိုက်ပြီး ဒီလိုမှမဟုတ်ရင် အကျိုးဆက်တွေကို ရင်ဆိုင်ရလိမ့်မယ်လို့ သတိပေးလိုက်ပါတယ်။ ဗင်နီဇွဲလားကနေ ရေနံနဲ့ ငွေကြေးစီးဆင်းမှု ရပ်တန့်သွားမယ်လို့ လည်း ဆိုပါတယ်။

ဇန်နဝါရီလ ၃ ရက်နေ့မှာ အမေရိကန်တပ်ဖွဲ့တွေက ဗင်နီဇွဲလားခေါင်းဆောင် နီကိုလတ်စ် မာဒူရိုကို မြို့တော် ကရာကတ်စ်မှာ ဝင်ရောက်စီးနင်းပြီး ဖမ်းဆီးခဲ့ပြီးနောက်ပိုင်း အမေရိကန်သမ္မတဟာ ကျူးဘားကို သတိပေးမှုတွေ ပြုလုပ်လာတာပါ။

ကျူးဘားရဲ့ ကာလရှည်ကြာ မဟာမိတ်ဖြစ်တဲ့ ဗင်နီဇွဲလားဟာ တနေ့ကို ရေနံစည် သုံးသောင်းခွဲခန့် ကျူးဘားကျွန်းကို ပို့ဆောင်နေတယ်လို့ ယုံကြည်ရပါတယ်။ ကျူးဘားအနေနဲ့ ဗင်နီဇွဲလားအရေးမှာ ဝင်ရောက်စွက်ဖက်ခြင်းမရှိဘဲ လောင်စာတင်သွင်းခွင့်ကို ထိန်းသိမ်းထားတယ်လို့ ကျူးဘားနိုင်ံငံခြားရေးဝန်ကြီးက ပြောပါတယ်။

ကျူးဘားသမ္မတကတော့ မိမိတို့ ဘာလုပ်ရမယ်ဆိုတာကို ဘယ်သူကမှ အမိန့်ပေးလို့မရဘူးလို့ ပြောပါတယ်။ ပိတ်ဆို့အရေးယူခံထားရတဲ့ ဗင်နီဇွဲလား ရေနံတင်သင်္ဘောတွေကို သိမ်းယူလိုက်တဲ့ ထရန့်အစိုးရရဲ့ လုပ်ရပ်ကြောင့် ကျူးဘားရှိ လောင်စာနဲ့ လျှပ်စစ်ဓာတ်အား အကျပ်အတည်းကို ပိုမိုဆိုးရွားစေခဲ့ပါတယ်။

သောကြာနေ့မှာတာ့ ပိတ်ဆို့အရေးယူခံထားရတဲ့ ရေနံတွေကို တင်ဆောင်လာတဲ့ ပဉ္စမမြောက် ရေနံတင်သင်္ဘောကို အမေရိကန်စစ်တပ်က သိမ်းယူခဲ့ပါတယ်။

"ကျူးဘားဟာ ဗင်နီဇွဲလားမှ ရေနံ၊ ငွေကြေးအမြောက်အမြားနဲ့အတူ နှစ်ပေါင်းများစွာ နေထိုင်ခဲ့ခဲ့ပြီး အပြန်အလှန်အားဖြင့် ဗင်နီဇွဲလားအာဏာရှင် နောက်ဆုံးနှစ်ယောက်အတွက် လုံခြုံရေးဝန်ဆောင်မှုတွေကို ကျုးဘားက ပေးအပ်ခဲ့ပေမယ့် လက်ရှိမှာတော့ ဒီလိုလုပ်လို့ မရတော့ပါဘူး။ ကျူးဘားကို ရေနံ ဒါမှမဟုတ် ငွေတွေ နောက်ထပ် ရောက်မှာမဟုတ်တော့ဘဲ နောက်မကျခင် သဘောတူညီချက်တခု လုပ်ဖို့ ကျွန်တော် အထူးအကြံပြုလိုပါတယ်။ " လို့ ထရန့်က သူ့ရဲ့ လူမှုကွန်ရက်မှာ ပြောပါတယ်။

သဘောတူညီချက်ရဲ့ စည်းကမ်းချက်တွေ ဒါမှမဟုတ် ကျူးဘား ရင်ဆိုင်ရမယ့် အကျိုးဆက်တွေကို တိတိကျကျ တော့ မဖော်ပြခဲ့ပါဘူး။ ဒါပေမယ့် ကျူးဘားနိုင်ငံခြားရေးဝန်ကြီး ဘရူနိုရိုဒရီဂပ်ဇ်ကတော့ ကျူးဘားဟာ ဆန္ဒရှိတဲ့ တင်ပို့သူ ဘယ်သူ့ဆီကမဆို လောင်စာဆီ တင်သွင်းဖို့ လုံးဝအခွင့်အရေး ရှိတယ်လို့ ပြောပါတယ်

အမိုရမ် ထုတ်ပယ်ခြင်းခံရပြီးနောက် ဇတ်ဇီးရဲ့ ရိုးမားအပြောင်းအရွှေ့ ပျက်ပြယ်လာ
======================

ရိုးမားအားကစားဒါရိုက်တာက ဂျိုရှာဇတ်ဇီးရဲ့ ဆောင်းရာသီတွင် အီတလီမြို့တော်သို့ ပြောင်းရွှေ့ကစားရေး ပျက်ပြယ်လာခဲ့ပြီ ဖြစ်ကြောင်း ပြောကြားလာပါတယ်။
နယ်သာလန်တိုက်စစ်မှူးဟာ နည်းပြရူဘင်အမိုရမ်လက်အောက်တွင် မိနစ် ၅၀၀ ခန့်သာ ကစားခွင့် ရရှိပြီးနောက် ဇန်နဝါရီတွင် ပုံမှန်ကစားခွင့်ရမယ့် အသင်းတစ်သင်းသို့ ပြောင်းလိုနေခဲ့သူလည်း ဖြစ်ပါတယ်။
ဒါပေမယ့် ယူနိုက်တက်ဟာ တနင်္လာနေ့တုန်းက ရူဘင်အမိုရမ်အား ထုတ်ပယ်ကာ နည်းပြအပြောင်းအလဲ ပြုလုပ်လာမှုနှင့်အတူ ဇတ်ဇီးရဲ့ ရိုးမားသို့ ပြောင်းရေးမှာလည်း ပျက်ပြယ်လာပါတယ်။
အသက် ၂၄ နှစ်ရှိ ဇတ်ဇီးဟာ ၂၀၂၄ ခုနှစ်တွင် ယူနိုက်တက်သို့ ရောက်လာပြီးနောက် ပြီးခဲ့တဲ့ ၁၈ လကာလလုံး ရုန်းကန်လာခဲ့ရသူ ဖြစ်ပြီး ယခုရာသီတွင် ၂ ဂိုးတည်းသာ သွင်းထားနိုင်ပါတယ်။
သူဟာ ယူနိုက်တက်အတွက် ၆၄ ပွဲကစားထားရာတွင် ၉ ဂိုးတည်းသာ သွင်းထားနိုင်ပါတယ်။ သူဟာ ပရီးမီးယားလိဂ်ပွဲ ၄၆ ပွဲတွင် ၅ ဂိုးသာ သွင်းထားနိုင်ပါတယ်။
ယခုအခါ ရိုးမားအားကစားဒါရိုက်တာရစ်ကီမာဆာရာက "ဇတ်ဇီးနဲ့ပတ်သက်ပြီး ပြောရရင် အခုအချိန်မှာ ယူနိုက်တက်ဘက်က အပြောင်းအရွှေ့ဆွေးနွေးမှုအားလုံး ပိတ်လိုက်ပါပြီ။ နည်းပြအပြောင်းအလဲ ဖြစ်တော့ သူတို့က ဘာလှုပ်ရှားမှုမှ မလုပ်ချင်တော့ဘူး။ သူတို့ စိတ်ပြောင်းသွားကြပါပြီ"လို့ ပြောကြားသွားပါတယ်။
ဇတ်ဇီးဟာ အမိုရမ်လက်အောက် ၄၆ ပွဲတွင် ၁၉ ပွဲတည်းသာ ပွဲထွက်ကစားခွင့်ရခဲ့ပြီး ၈ ဂိုးသွင်းထားနိုင်ပါတယ်။

အပျော်တမ်းကလပ်ကို ရှုံးနိမ့်ကာ အက်ဖ်အေဖလားပြိုင်ပွဲမှ ထွက်ခဲ့ရပြီးနောက် ပရိသတ်များနှင့် အချင်းများခဲ့တဲ့ ပဲလေ့စ်အသင်းခေါင်းဆောင်
====================

ခရစ္စတယ်ပဲလေ့စ်အသင်းခေါင်းဆောင်မာ့ခ်ဂူဟီဟာ အပျော်တမ်းကလပ် မက်ကယ်ဖီးလ်ကို အက်ဖ်အေဖလားတတိယအဆင့်တွင် ရှုံးနိမ့်ကာ ပြိုင်ပွဲမှ အရှက်တကွဲ ထွက်ခဲ့ရပြီးနောက် ပရိသတ်များနှင့် အချင်းများခဲ့တာ တွေ့ရပါတယ်။
လက်ရှိချန်ပီယံ ပဲလေ့စ်ဟာ ဆီမီးပရို ဆဌမတန်းကလပ် မက်ကယ်ဖီးလ်အား ၂-၁ ဖြင့် ရှုံးနိမ့်ခဲ့ပြီးနောက် ပရိသတ်များ အကြီးအကျယ် ဒေါသထွက်ခဲ့ကြပါတယ်။
ပဲလေ့စ်ဟာ ယူနိုက်တက်ဂန္ထဝင်တိုက်စစ်မှူးဝိန်းရွန်းနီရဲ့ ညီဖြစ်သူ ဂျွန်ရွန်းနီ ကိုင်တွယ်နေတဲ့ မက်ကယ်ဖီးလ်အား ၂-၀ ဂိုးဖြင့် နောက်ကလိုက်ကစားခဲ့ရပြီး ပွဲပြီးခါနှစ်သိမ့်ဂိုးကြောင့် ၂-၁ ဖြင့် အရေးနိမ့်ခဲ့တာပါ။
အသင်းခေါင်းဆောင်ဂူဟီဟာ ပွဲအပြီးတွင် ယင်းပွဲကို ချီရှိုင်းယားအထိ လာရောက်ကြည့်ရှုခဲ့တဲ့ ပရိသတ်အနည်းငယ်ထံသို့ သွားရောက်ကာ စကားပြောခဲ့ပါတယ်။
ပရိသတ်များဟာ အရှက်တကွဲရှုံးပွဲကြောင့် အကြီးအကျယ်‌ဒေါသထွက်နေခဲ့ကြတာ တွေ့ရပြီး ဒေါသတကြီး ပြောဆိုခဲ့တာ တွေ့ရပါတယ်။ ယင်းနောက် ပဲလေ့စ်နည်းပြအဖွဲ့ဝင်အချို့တို့ ရောက်လာကာ ဖြေဖျန်မှု ပြုလုပ်ခဲ့တာ တွေ့ရပါတယ်။
ပဲလေ့စ်ဟာ ပြီးခဲ့တဲ့နှစ်မေလတုန်းက ကလပ်သမိုင်းတွင် ပထမဆုံးဆုဖလားအဖြစ် မန်စီးတီးကို အနိုင်ရရှိကာ အက်ဖ်အေဖလား ဆွတ်ခူးခဲ့တာ ဖြစ်ပြီး ယခုအခါ အပျော်တမ်းကလပ်အား ရှုံးနိမ့်ကာ ဆိုးရွားတဲ့ သမိုင်းကြောင်း ပိုင်ဆိုင်လာခဲ့ပြီလည်း ဖြစ်ပါတယ်။
ဂူဟီဟာ ဇန်နဝါရီတွင် မန်စီးတီးနှင့် လီဗာပူးတို့ရဲ့ ပစ်မှတ်ထားခြင်းခံနေရသူ ဖြစ်ပြီး အသင်းပြောင်းရွှေ့လာပါက အက်ဖ်အေဖလား ဆွတ်ခူးလာနိုင်ပါသေးတယ်။

လက်ရှိအက်ဖ်အေဖလားချန်ပီယံပဲလေ့စ်ကို အနိုင်ရပြီးနောက် အပျော်တမ်းကလပ်မက်ကယ်ဖီးလ်ကစားသမားများအား အိုင်ဘီဇာသို့ ပို့ဆောင်လာမယ့် အသင်းပိုင်ရှင်
=====================

မက်ကယ်ဖီးလ်ပိုင်ရှင်ရော့ဘ်စမီသာ့စ်က အက်ဖ်အေဖလားပြိုင်ပွဲသမိုင်းတွင် အကြီးကျယ်အံ့ဩစရာရလဒ်အဖြစ် လက်ရှိချန်ပီယံပဲလေ့စ်အား အနိုင်ရရှိပြီးနောက် ကစားသမားများအား အိုင်ဘီဇာကမ်းခြေသို့ ပို့ဆောင်ရန် စီစဉ်ထားကြောင်း ပြောကြားလာပါတယ်။
စမီသာ့စ်ဟာ အပျော်တမ်းကလပ် မက်ကယ်ဖီးလ်အား ၂၀၂၀ ခုနှစ်တုန်းက ဝယ်ယူခဲ့တာလည်း ဖြစ်ပါတယ်။
သူဟာ ဆဌမတန်းအသင်းကို ပိုင်ဆိုင်တဲ့ ငါးနှစ်တာကာလအတွင်း အကြီးကျယ်ဆုံးအောင်ပွဲအဖြစ် မနေ့တုန်းက လက်ရှိ အက်ဖ်အေဖလားချန်ပီယံ ပဲလေ့စ်အား ၂-၁ ဖြင့် အနိုင်ရတဲ့ မျက်ဝါးထင်ထင် မြင်တွေ့ခဲ့ရပါတယ်။
အသင်းပိုင်ရှင်ဟာ ကလပ်သမိုင်းတွင် နာမည်ကျော်အောင်ပွဲအား မြင်တွေ့ခဲ့ရပြီးနောက် ကစားသမားများအား အိုင်ဘီဇာကမ်းခြေသို့ ပို့ဆောင်ကာ အောင်ပွဲခံရန် စီစဉ်လိုက်ပြီလည်း ဖြစ်ပါတယ်။
စမာသာ့စ်က "မယုံကြည်နိုင်စရာ အဖြစ်အပျက်တွေပါ။ အိပ်မက်ထဲမှာ ကြုံရတာတွေ။ ပြောစရာစကားမရှိပါဘူး။ ကွင်းထဲသို့ မက်ကယ်ဖီးလ်ပရိသတ်တွေ ပြေးဝင်လာတာ မြင်ရတော့ လူတွေအတွက် ဘယ်လောက် အရေးပါတယ်ဆိုတာ မြင်ခဲ့ရတယ်။ လွန်ခဲ့တဲ့ ငါးနှစ်တုန်းက ဒီကလပ်ကို ဝယ်တုန်းက ဒီကနေ့လို အဖြစ်အပျက်မျိုး ကြုံလာရလိမ့်မယ်လို့ မထင်မှတ်ထားမိခဲ့ဘူး။ လေးရက်ဆက် အရက်သောက်ပြီးတဲ့နောက် Rightmove ဆီကနေ ဝယ်ခဲ့တယ်။ ဘယ်လို ဝယ်လိုက်လဲဆိုတာ မမှတ်မိတော့ဘူး။ အခု ရောက်နေတဲ့ နေရာ ကြည့်လိုက်တော့ တကယ့်ကြီးကျယ်တယ်။ ကောင်လေးတွေကို အိုင်ဘီဇာပို့ဖို့ စီစဉ်ထားပြီးပါပြီ"လို့ ပြောကြားသွားပါတယ်။