ပြင်ဦးလွင်မြို့ရှိ စစ်မှုထမ်းဟောင်းအိမ်ရာ၌ နေအိမ်များထပ်မံဆောက်လုပ်နေ

စစ်မှုထမ်းဟောင်းအဖွဲ့ဝင်များနှင့် မိသားစုဝင်များကို စနစ်တကျနေရာချထားပေးရန် နိုင်ငံတော် ယာယီသမ္မ တမှာကြား
မန္တလေးတိုင်း၊ ပြင်ဦးလွင်မြို့ရှိ စစ်မှုထမ်းဟောင်းအိမ် ရာ၌ နေအိမ်အဆောက်အအုံများကိုတိုးချဲ့တည် ဆောက်လျက်ရှိရာ နိုင်ငံတော် ယာယီသမ္မတ၊ နိုင်ငံ တော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်မှ ဒီဇင်ဘာ ၂ ရက်နံနက်ပိုင်းကကြည့်ရှုစစ်ဆေးခဲ့သည်။
ထိုသို့ ကြည့်ရှုစစ်ဆေးပြီးနောက် အိမ်ရာများ၌ စစ်မှု ထမ်းဟောင်းအဖွဲ့ဝင်များနှင့် မိသားစုဝင်များကို စနစ် တကျနေရာချထားပေးရန်၊ အဆောက်အအုံများတည် ဆောက်ရာတွင် သတ်မှတ်ကာလအတွင်းပြီးစီးမှုရှိစေရန်၊ စံချိန်စံညွှန်းပြည့်မီမှုရှိစေရေး စနစ်တကျကြပ် မတ်ဆောင်ရွက်ရန်တို့ကို မှာကြားသည်။
ထို့ပြင် အိမ်ရာတွင်နေထိုင်သူများ ကျန်းမာရေး အ ထောက်အကူပြုရန် ကိုယ်လက်လှုပ်ရှားအားကစားပြု လုပ်ရန်နေရာများထည့်သွင်းတည်ဆောက်ရန်၊ အထပ်မြင့်အဆောက်အဦများကို သဘာဝဘေးအန္တရာယ်ကာကွယ်နိုင်အောင် စနစ်တကျတွက်ချက်ဆောက်လုပ်ရန်တို့ကိုလည်း မှာကြားခဲ့သည်။
ထို့နောက် နိုင်ငံတော် ယာယီသမ္မတ၊ ဗိုလ်ချုပ်မှူးကြီးမင်းအောင်လှိုင်မှ စစ်မှုထမ်းဟောင်းအိမ်ရာအတွင်းကြည့်ရှုစစ်ဆေးပြီး အိမ်ရာတွင်နေထိုင်သည့် စစ်မှု ထမ်းဟောင်းများ၊ မိသားစုဝင်များအားနှုတ်ဆက်ကာ လိုအပ်ချက်များကိုမေးမြန်းခဲ့သည်။
အဆိုပါ ပြင်ဦးလွင်မြို့၊ စစ်မှုထမ်းဟောင်းအိမ်ရာတွင် အခြားအဆင့်နေအိမ်(၂)ခန်းတွဲ (၄)ထပ် (၁၀)လုံး၊ အ ခြားအဆင့်နေအိမ်(၄)ခန်းတွဲ (၆)ထပ် (၁၀)လုံး၊ အရာရှိငယ်နေအိမ်(၄)ခန်းတွဲ (၆)ထပ် (၃)လုံး၊ အရာရှိကြီးနေ အိမ်(၄)ခန်းတွဲ (၆)ထပ် (၁)လုံးတို့ကိုဆောက်လုပ်ပြီးစီးပြီဖြစ်ကာ အရာရှိကြီးနေအိမ်၊ အရာရှိငယ်နေအိမ်နှင့် အခြားအဆင့်နေအိမ်များကိုလည်း ထပ်မံဆောက်လုပ်ပေးသွားမည်ဖြစ်သည်။

မြန်မာ-ဘင်္ဂလားဒေ့ရှ်နှစ်နိုင်ငံ ဘုံအကျိုးစီးပွားဖြစ် ထွန်းစေမည့် နယ်ပယ်များတွင် ပူးပေါင်းဆောင်ရွက်ရန်ဆွေးနွေး

နိုင်ငံခြားရေးဝန်ကြီးဌာန၊ ပြည်ထောင်စုဝန်ကြီးဦးသန်းဆွေနှင့် ဘင်္ဂလားဒေ့ရှ်သံအမတ်ကြီး ဒေါက်တာ မိုဟာမက် မွန် (န)ဝါဟူစိန်တို့သည် ဒီဇင်ဘာ ၂ ရက်နံနက်ပိုင်းက ရန်ကုန်မြို့၌တွေ့ဆုံခဲ့ကြသည်။
တွေ့ဆုံစဉ် နှစ်နိုင်ငံဆက်ဆံမှုတိုးမြှင့်ရေးနှင့် နှစ်နိုင်ငံကြား ဘုံအကျိုးစီးပွားဖြစ်ထွန်းစေမည့် နယ်ပယ်များတွင် ပူးပေါင်းဆောင်ရွက်ရေးဆိုင်ရာများကို ဆွေးနွေးခဲ့ကြသည်။

ပြင်ဦးလွင်ဘူတာကြီးအား နိုင်ငံတော် ယာယီသမ္မတကြည့်ရှုစစ်ဆေး

မန္တလေးတိုင်း၊ ပြင်ဦးလွင်မြို့ရှိ ပြင်ဦးလွင်ဘူတာကြီးအား ဒီဇင်ဘာ ၂ ရက်နံနက်ပိုင်းက နိုင်ငံတော် ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်မှ ကြည့်ရှုစစ်ဆေးခဲ့သည်။
ပို့ဆောင်ရေးနှင့် ဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးမြထွန်းဦးနှင့် တာဝန်ရှိသူများက ဘူတာရုံအတွင်း သန့်ရှင်းသာယမှုရှိစေရေးဆောင်ရွက်ထားရှိမှု၊ ဘူတာရုံဧရိယာအတွင်း တရားမဝင်ဝင်ရောက်နေထိုင်သူများ၊ စီးပွားရေးလုပ်ငန်းဝင်ရောက်လုပ်ကိုင်နေသူများအားဖယ်ရှားရှင်းလင်းပြီးစီးမှုတို့ကို ရှင်းလင်းတင်ပြခဲ့ကြသည်။
နိုင်ငံတော် ယာယီသမ္မတမှ ဘူတာရုံဧရိယာအတွင်း စနစ်တကျဖြစ်စေရေးစီမံဆောင်ရွက်ရန်နှင့် လိုအပ်သည်များကိုမှာကြားပြီး ဘူတာရုံအတွင်းကြည့်ရှုစစ်ဆေးခဲ့သည်။

အာရှယဉ်ကျေးမှုအမွေအနှစ်များ မဟာမိတ်အဖွဲ့၏ အထွေထွေညီလာခံကို မြန်မာပါဝင်တက်ရောက်

အာရှတိုက်တစ်ခုလုံးရှိ ယဉ်ကျေးမှုအမွေအနှစ်များ ထိန်းသိမ်းရေးနှင့် ပတ်သက်၍ Network ထားရှိရန် ကိစ္စများဆွေးနွေး
တရုတ်နိုင်ငံ ချုံချင့်မြို့၌ နိုဝင်ဘာ (၂၆) ရက်မှ (၂၉) ရက်အထိ ကျင်းပသည့် အာရှယဉ်ကျေးမှုအမွေအနှစ်များ မဟာမိတ်အဖွဲ့၏ ဒုတိယအကြိမ်မြောက် အထွေထွေညီလာခံကို သာသနာရေးနှင့် ယဉ်ကျေးမှုဝန်ကြီးဌာန ဒုတိယဝန်ကြီး ဒေါ်နုမြဇံ ဦးဆောင်သည့် ကိုယ်စားလှယ်အဖွဲ့က တက်ရောက်ခဲ့ကြောင်း သိရသည်။
အဆိုပါ ညီလာခံကို အဖွဲ့ဝင်နိုင်ငံပေါင်း (၂၆) နိုင်ငံက ဖိတ်ကြားထားသည့် တာဝန်ရှိသူများ တက်ရောက်ခဲ့ပြီး တာဝန်ရှိသူများ နိုင်ငံအလိုက်ဆွေးနွေးခဲ့ခြင်းဖြစ်ကြောင်း သိရသည်။
မြန်မာနိုင်ငံကိုယ်စားပြု ဒုတိယဝန်ကြီးက “ မြန်မာယဉ်ကျေးမှုအမွေအနှစ်များကို ထိန်းသိမ်းစောင့်ရှောက်နေမှု၊ နိုင်ငံတကာပူးပေါင်းဆောင်ရွက်မှုများပြုလုပ်ရာ၌ တရုတ်နိုင်ငံက သဗ္ဗညုဘုရားကို MOU ရေးထိုးပြီးပြုပြင်ထိန်းသိမ်နေမှု၊ လန်ချန်း-မဲခေါင်း ပူးပေါင်းဆောင်ရွက်ရေးအစီအစဉ်ဖြင့် တရုတ်နိုင်ငံအထောက်အပံဖြင့် လုပ်ဆောင်နေမှုများကို ဆွေးနွေးခဲ့ကြောင်း သိရသည်။
ထို့ပြင် မန္တလေးငလျင်ကြီးကြောင့် ပြိုကျပျ-က်ဆီးခဲ့သည့် မန္တလေးနန်းမြို့ရိုး၊ အင်းဝပြတိုက် ဘုရားပုထိုးအချို့ကို တရုတ်ပညာရှင်များ လာရောက်ကွင်းဆင်းမှတ်တမ်းတင်အကြံပြုခဲ့ကြမှုများကိုလည်း ဆွေးနွေးခဲ့သည်။
ထို့အတူ အာရှတိုက်တစ်ခုလုံးရှိ ယဉ်ကျေးမှုအမွေအနှစ်များထိန်သိမ်းရေးနှင့် ပတ်သက်၍ Net Work ထားရှိရန် ကိစ္စအပါအဝင် အကြံပြုချက်များကိုလည်း ဆွေးနွေးခဲ့ခြင်းဖြစ်သည်။

လယ်ယာထွက်ကုန်များ ကမ္ဘာ့ဈေးကွက်သို့ တိုးမြှင့်တင်ပို့နိုင်ရေးအတွက် ပြည်ပနိုင်ငံများတွင် စီးပွားရေးသံမှူးများ ခန့်အပ်ဆောင်ရွက်လျက်ရှိ

မြန်မ့ာလယ်ယာထွက်ကုန်များ ကမ္ဘ့ာဈေးကွက်သို့ တိုးမြှင့်တင်ပို့နိုင်ရေး ဈေးကွက်ရှာဖွေနိုင်ရေးနှင့် အမယ်သစ်ပို့ကုန်များ တင်ပို့နိုင်ရေးအတွက် ပြည်ပနိုင်ငံများတွင် စီးပွားရေးသံမှူးများ ခန့်အပ်ဆောက်ရွက်လျက်ရှိကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာ ပြည်ထောင်စုဝန်ကြီး ဦးချစ်ဆွေက ပြောသည်။
ယမန်နေ့ မနက်ပိုင်းက ဧရာဝတီတိုင်းဒေသကြီး ဓနုဖြူမြို့ရှိ ဆန်စက်၌ မြို့မိမြို့ဖများ ဌာနဆိုင်ရာတာဝန်ရှိသူများ နှင့် စီးပွားရေးလုပ်ငန်းရှင်များနှင့်တွေ့ဆုံစဉ် ပြည်ထောင်စုဝန်ကြီး ဦးချစ်ဆွေက အထက်ပါအတိုင်းပြောကြားခဲ့ခြင်း ဖြစ်သည်။
နိုင်ငံပို့ကုန်ကဏ္ဍနှင့် သွင်းကုန်ကဏ္ဍ လွယ်ကူချောမွေ့စေရေးအတွက် သက်ဆိုင်ရာဝန်ကြီးဌာနများ နိုင်ငံတကာကုမ္ပဏီများ စီးပွား‌ရေးလုပ်ငန်းရှင်များနှင့် ဆက်သွယ်ဆောင်ရွက်ပေးလျက်ရှိကြောင်းလည်း ပြည်ထောင်စုဝန်ကြီး ကပြောသည်။
လယ်ယာစိုက်ပျိုးရေးနှင့် မွေးမြူရေးထုတ်ကုန်များသည် နိုင်ငံဝင်ငွေရရှိရေးအတွက် အဓိကနေရာမှ ပံ့ပိုးပေးလျက်ရှိကြောင်း၊ ကုန်ထုတ်လုပ်မှုကဏ္ဍ၏ ကွင်းဆက်လုပ်ငန်းစဉ်တွင် လိုအပ်သောပစ္စည်းများနှင့် သွင်းအားစုများကို နိုင်ငံတော်ကနေ ပြည်ပမှ လစဉ် ဝယ်ယူဖြည့်တင်ပေးနေကြောင်းလည်း ဦးချစ်ဆွေက ပြောသည်။
ကမ္ဘာ့ဈေးကွက် လိုအပ်ချက်နှင့်အညီ ဈေးကွက်ဝင်ထုတ်ကုန်များဖြစ်စေရေး ဈေးကောင်းရရှိရေးအတွက် ပူးပေါင်းဆောင်ရွက်ရန်လည်း ပြောကြားခဲ့ကြောင်း သိရသည်။

အီကွေဒေါဆယ်ကျော်သက် အမြွာကစားသမားနှစ်ဦးကို အာဆင်နယ် ခေါ်ယူမယ်

အာဆင်နယ်အသင်းဟာ အီကွေဒေါကလပ် အင်ဒီပန်ဒီယန်တေဒယ်ဗယ်လေအသင်းက ဆယ်ကျော်သက် အမြွာကစားသမားနှစ်ဦးဖြစ်တဲ့ အက်ဒ်ဝင်ကင်တဲရိုးနဲ့ ဟိုလ်ဂါကင်တဲရိုးတို့ကို အနာဂတ်မှာခေါ်ယူဖို့ သဘောတူညီမှု ရခဲ့ပြီလို့
သိရပါတယ်။
၁၆ နှစ်အရွယ် ညီအစ်ကိုနှစ်ဦးဟာ အသက် ၁၈ နှစ်ပြည့်မယ့် ၂၀၂၇ ခုနှစ် သြဂုတ်လမှာ အာဆင်နယ်အသင်းနဲ့ ပူးပေါင်းပါလိမ့်မယ်။
၎င်းတို့နှစ်ဦးဟာ အာဆင်နယ်အသင်းနဲ့ စာချုပ်ချုပ်ဆိုဖို့ အင်္ဂလန်ကို ရောက်ရှိနေပြီလို့လည်း သိရပါတယ်။
ဆယ်ကျော်သက်ကစားသမား နှစ်ဦးစလုံးက တိုက်စစ်အားသန်သူတွေဖြစ်ပေမဲ့ အက်ဒ်ဝင်က တောင်ပံမှာကစားကာ ဟိုလ်ဂါကတော့ ကွင်းလယ်တိုက်စစ်ကစားသမား ဖြစ်ပါတယ်။
အင်ဒီပန်ဒီယန်တေဒယ်ဗယ်လေအသင်းဟာ လက်ရှိအသင်းနောက်ခံလူ ဟင်ကာပိုင် ကစားခဲ့တဲ့အသင်းဖြစ်ပြီး ချယ်လ်ဆီးကွင်းလယ်လူ ကိုင်စီဒိုကိုလည်း မွေးထုတ်ပေးခဲ့ပါတယ်။
အာဆင်နယ်အနေနဲ့ အောက်တိုဘာလကလည်း အိုင်ယာလန်ကလပ် ရှမ်ရော့ခ်ရိုဗာအသင်းက ၁၆ နှစ်အရွယ် အိုဟီယန်ဗူနာကိုလည်း ၁၈ နှစ်ပြည့်မယ့် ၂၀၂၇ ခုနှစ် ဇန်နဝါရီမှာ ခေါ်ယူဖို့ သဘောတူညီမှု ရထားပါတယ်။

ခရစ္စတယ်ပဲလေ့စ်နဲ့ မာတက်တာတို့ စာချုပ်သစ်ချုပ်ဆိုရေး ဆွေးနွေးမှု ရပ်ဆိုင်း

ခရစ္စတယ်ပဲလေ့စ်တိုက်စစ်မှူး မာတက်တာဟာ အသင်းနဲ့ စာချုပ်သစ်ချုပ်ဆိုရေး ဆွေးနွေးမှု ရပ်ဆိုင်းထားတယ်လို့ သိရပါတယ်။
ဒါကြောင့် ၎င်းအနေနဲ့ အသင်းမှာ ကာလကြာရှည်ဆက်ရှိမယ့် အနာဂတ်ဟာ မသေမချာဖြစ်လာ
ခဲ့ပါတယ်။
ပြင်သစ်လက်ရွေးစင်လည်းဖြစ်တဲ့ မာတက်တာဟာ ပဲလေ့စ်အသင်းနဲ့ ၂၀၂၇ ခုနှစ် ဇွန်လအထိ စာချုပ်သက်တမ်း ရှိနေတာပါ။
အခုနှစ်အစောပိုင်းကတည်းက စာချုပ်သစ်ချုပ်ဆိုဖို့ ဆွေးနွေးခဲ့ပြီး အစပိုင်းမှာ အပြုသဘောဆောင်
ခဲ့ပေမဲ့ လက်ရှိမှာ ရပ်တန့်နေတာဖြစ်တယ်။
မာတက်တာဟာ ပရီးမီးယားလိဂ်မှာ အန္တရာယ်
အရှိဆုံး တိုက်စစ်မှူးတွေထဲက တစ်ဦးအဖြစ် ရပ်တည်နေခဲ့ပါတယ်။
ပြီးခဲ့တဲ့အောက်တိုဘာလမှာ ပြင်သစ်အသင်းနဲ့
ပွဲထွက်ခဲ့ပြီး သုံးပွဲမှာ နှစ်ဂိုး သွင်းယူထားပါတယ်။

ဆီးဂိမ်းစ်ပြိုင်ပွဲအတွက် လာရောက်ပူးပေါင်းပြီဖြစ်သည့် တိုက်စစ်မှူး မေထက်လူ

ဆီးဂိမ်းစ်ပြိုင်ပွဲဝင်အတွက် တိုက်စစ်မှူး မေထက်လူမှာ မြန်မာလက်ရွေးစင်အမျိုးသမီးအသင်းနှင့် လာရောက်ပူးပေါင်းပြီဖြစ်ကြောင်း မြန်မာနိုင်ငံဘောလုံးအဖွဲ့ချုပ်ထံမှ သိရသည်။
တိုက်စစ်မှူး မေထက်လူသည် ယမန်နေ့က အမေရိကန်နိုင်ငံမှတစ်ဆင့် ထိုင်းနိုင်ငံသို့ရောက်ရှိခဲ့ပြီး အသင်းနှင့်အတူ ပူးပေါင်းခြင်းဖြစ်သည်။
မြန်မာ့လက်ရွေးစင်အမျိုးသမီးအသင်းသည် ယမန်နေ့ နံနက်ပိုင်းက ရန်ကုန်လေဆိပ်မှတဆင့် ထိုင်းနိုင်ငံသို့ထွက်ခွာခဲ့ရာ ညနေပိုင်းတွင် အသင်းတည်းခိုရာ ချွန်ဘူရီမြို့ရှိ Classic Kameo Hotel သို့ ရောက်ရှိခဲ့သည်။
ဆီးဂိမ်းပြိုင်ပွဲအတွက် မြန်မာအမျိုးသမီးအသင်းသည်အုပ်စု (ခ) တွင် ဗီယက်နမ်၊ ဖိလစ်ပိုင်၊ မလေးရှားအသင်းတို့နှင့် အတူကျရောက်နေသည်။
(၃၃) ကြိမ်မြောက် ဆီးဂိမ်းစ်ပြိုင်ပွဲတွင် အမျိုးသမီးဘောလုံးပွဲစဉ်များကို ထိုင်းနိုင်ငံ၊ ချွန်ဘူရီမြို့တွင် ဒီဇင်ဘာ အစောပိုင်း၌ ကျင်းပသွားမည်ဖြစ်သည်ဟု အဖွဲ့ချုပ်၏ အသိပေးချက်အရ သိရသည်။

အမျိုးသမီး Nations League ချန်ပီယံဆုကို စပိန်အသင်း နှစ်ကြိမ်ဆက်ဆွတ်ခူး

စပိန်အမျိုးသမီးအသင်းဟာ မနေ့က ယှဉ်ပြိုင်ခဲ့တဲ့ အမျိုးသမီး Nations League ဗိုလ်လုပွဲဒုတိယအကျော့မှာ ဂျာမနီအသင်းကို (၃-၀)ဂိုးနဲ့ အနိုင်ယူပြီး ချန်ပီယံဆုကို နှစ်ကြိမ်ဆက်ဆွတ်ခူးခဲ့ကြောင်း သိရပါတယ်။
အဝေးကွင်းမှာ ကစားခဲ့တဲ့ ပထမအကျော့ပွဲစဉ်မှာ ဂိုးမရှိသရေကျခဲ့ပေမဲ့ အိမ်ကွင်းမှာ ကစားရတဲ့ ဒုတိယအကျော့မှာတော့ စပိန်အသင်းက ပီနာ(၂ ဂိုး)၊ လိုပက်ဇ်တို့ရဲ့ဂိုးတွေနဲ့ အနိုင်ယူပြီး ချန်ပီယံဆု ရယူနိုင်ခဲ့တာပါ။
အမျိုးသမီး Nations League ပြိုင်ပွဲကို ၂၀၂၃-၂၄ ရာသီမှာမှ စတင်ကျင်းပခဲ့တာဖြစ်ပြီး အဲဒီရာသီမှာလည်း စပိန်အသင်းက ဗိုလ်စွဲခဲ့သလို၊ ဒုုတိယအကြိမ်ကျင်းပတဲ့ ဒီနှစ်ပြိုင်ပွဲမှာလည်း ထပ်မံဗိုလ်စွဲခဲ့တာဖြစ်ပါတယ်။
ဒီနှစ်ပြိုင်ပွဲရဲ့ တတိယလုပွဲမှာတော့ ပြင်သစ်က ဆွီဒင်ကို နှစ်ကျော့ပေါင်း(၄-၃)ဂိုးနဲ့ အနိုင်ရခဲ့ပါတယ်။
ဗိုလ်လုပွဲဒုတိယအကျော့ရဲ့ အကောင်းဆုံးကစားသမားဆုကို နှစ်ဂိုးသွင်းခဲ့တဲ့ စပိန်တိုက်စစ်မှူး ကလော်ဒီယာပီနာက ရရှိခဲ့ပြီး အခုနှစ်ပြိုင်ပွဲရဲ့အကောင်းဆုံးကစားသမားဆုကိုတော့ စပိန်ကွင်းလယ်ကစားသမား ပူတဲလက်စ်က ရရှိခဲ့ပါတယ်။

အက်သလက်တီကိုအသင်းကို အနိုင်ယူခဲ့တဲ့ပုံစံက ချန်ပီယံပြေးလမ်းအတွက် အဆုံးအဖြတ်ဖြစ်နိုင်တယ်လို့ ရာဖင်ညာ ပြောကြား

ဘာစီလိုနာအသင်းရဲ့ တိုက်စစ်ကစားသမား ရာဖင်ညာက အက်သလက်တီကိုအသင်းကို အနိုင်ယူခဲ့တဲ့ပုံစံက ချန်ပီယံပြေးလမ်းအတွက် အဆုံးအဖြတ်ဖြစ်နိုင်တယ်လို့ ပြောကြားခဲ့ပါတယ်။
မနေ့က ယှဉ်ပြိုင်ကစားခဲ့တဲ့ လာလီဂါကြိုကန်ပွဲမှာ ဘာစီလိုနာအသင်းက အက်သလက်တီကိုအသင်းကို (၃-၁)ဂိုးနဲ့ အနိုင်ယူပြီး လာလီဂါမှာ (၅)ပွဲဆက်အနိုင်ရရှိအောင် စွမ်းဆောင်နိုင်ခဲ့ပါတယ်။
အက်သလက်တီကိုနဲ့ပွဲမှာ ပြိုင်ဘက်အသင်းက ပွဲအစ(၁၉)မိနစ်ကတည်းက ဦးဆောင်ဂိုးသွင်းခဲ့ပေမဲ့ ဘာစီလိုနာအသင်းက (၃)ဂိုးပြန်သွင်းကာ ဂိုးပြတ်နိုင်ပွဲ ရယူခဲ့တာဖြစ်ပြီး ချေပဂိုးကို ရာဖင်ညာက (၂၆)မိနစ်မှာ သွင်းယူခဲ့တာပါ။
ရာဖင်ညာဟာ ပေါင်ခြံဒဏ်ရာကြောင့် ဘာစီလိုနာအသင်းရဲ့ ပွဲစဉ်(၉)ပွဲကို လွဲချော်ခဲ့ရပြီး ဘီလ်ဘာအိုနဲ့ပွဲမှာမှ ပြန်ကစားနိုင်တာဖြစ်သလို၊ ဒီပွဲမှာ ဂိုးသွင်းနိုင်တာက စက်တင်ဘာလနောက်ပိုင်း ပထမဆုံးဂိုးလည်း ဖြစ်ခဲ့ပါတယ်။
''ကျွန်တော်တို့ တစ်ပွဲထက်တစ်ပွဲ ယုံကြည်မှုမြင့်တက်လာတယ်လို့ ထင်ပါတယ်။ ဒီပွဲက လာလီဂါရဲ့ ပွဲကြီးပွဲကောင်းတစ်ပွဲဖြစ်ပြီး ဒီလိုမျိုး အနိုင်ယူခဲ့တဲ့ပုံစံက ချန်ပီယံပြေးလမ်းအတွက် အဆုံးအဖြတ်ဖြစ်နိုင်ပါတယ်။ ကျွန်တော်တို့ တစ်ပွဲပြီးတစ်ပွဲ အမှတ်ပြည့်ယူနိုင်ခဲ့ရင် အရာအားလုံးက ပိုကောင်းလာမှာပါ'' လို့ ရာဖင်ညာက ပြောကြားခဲ့ပါတယ်။
အက်သလက်တီကိုနည်းပြ ဆီမြွန်နီကတော့ ရာဖင်ညာရဲ့ခြေစွမ်းကို ချီးကျူးခဲ့ပြီး Ballon d'or ဆု မရသေးတဲ့အတွက် မယုံနိုင်အောင်ဖြစ်မိတယ်လို့ ပြောကြားခဲ့ပါတယ်။