ဘင်္ဂလားပင်လယ်အော်တွင် မုန်တိုင်းငယ်ဖြစ်ပေါ်၊ ရခိုင်နှင့် မြစ်ဝကျွန်းပေါ်ကမ်းရိုးတန်းတွင် လှိုင်းကြီးပြီး လေပြင်းတိုတ်ခတ်နိုင်ကြောင်း မိုး/ဇလ သတိပေး
ဘင်္ဂလားပင်လယ်အော်အနောက်မြောက်ပိုင်းတွင် ဖြစ်ပေါ်နေသည့် အားကောင်းသောလေဖိအားနည်းရပ်ဝန်းသည် ယနေ့ (ဇူလိုင် ၂၆ ရက်) မွန်းလွဲ ၁ နာရီခွဲခန့်တွင် မုန်တိုင်းငယ် (Depression) အဖြစ်သို့ ပိုမိုအားကောင်းလာကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနက ထုတ်ပြန်ထားသည်။
ထုတ်ပြန်ချက်အရ မုန်တိုင်းငယ်သည် စစ်တွေမြို့၏ အနောက်-အနောက်မြောက်ဘက် ရေမိုင် ၂၅၅ မိုင်ခန့်အကွာ ပင်လယ်ပြင်တွင် ဗဟိုပြုနေပြီး၊ လက်ရှိအခြေအနေအရ မြန်မာနိုင်ငံဘက်သို့ ဦးတည်ရွေ့လျားမည့် အလားအလာမရှိသဖြင့် အဝါရောင်အဆင့် သတ်မှတ်ထားကြောင်း သိရသည်။
မိုးဇလ၏ ခန့်မှန်းချက်အရ မုန်တိုင်းငယ်သည် နောက် ၂၄ နာရီအတွင်း အားကောင်းသောမုန်တိုင်းငယ် (Deep Depression) အဖြစ်သို့ ပိုမိုအားကောင်းလာနိုင်ပြီး အနောက်မြောက်ဘက်သို့ ရွေ့လျားကာ နောက် ၃၆ နာရီအတွင်း အိန္ဒိယနိုင်ငံ ဩရိဿပြည်နယ်မြောက်ပိုင်းနှင့် အနောက်ဘင်္ဂလားပြည်နယ်ကမ်းခြေတို့ကြားမှ ဖြတ်ကျော်ဝင်ရောက်နိုင်ကြောင်း သိရသည်။
သို့သော် မုန်တိုင်း၏အရှိန်ကြောင့် မြစ်ဝကျွန်းပေါ်ဒေသ၊ ရခိုင်ကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင် တစ်ခါတစ်ရံ မိုးသက်လေပြင်းကျရောက်နိုင်ပြီး လှိုင်းအမြင့် ၈ ပေမှ ၁၀ ပေခန့်အထိ မြင့်တက်နိုင်ကြောင်း မိုးဇလက သတိပေးထားသည်။
မိုးသက်လေပြင်းကျစဉ် ရေပြင်နှင့် မြေပြင်လေတိုက်နှုန်းမှာ တစ်နာရီလျှင် မိုင် ၃၀ ခန့်အထိ ရှိနိုင်သည်။
ထို့ကြောင့် ကုန်းမြင့်ဒေသများတွင် နေထိုင်သူများအနေဖြင့် မြေပြိုမှုအန္တရာယ်၊ မြစ်ငယ်နှင့် ချောင်းငယ်များအနီး နေထိုင်သူများအနေဖြင့် ရုတ်တရက်ရေကြီး ရေလျှံမှုအန္တရာယ်များကို ကြိုတင်သတိပြုကြရန်၊ ထို့ပြင် ပြည်တွင်းလေကြောင်းလိုင်းများနှင့် မြစ်ဝကျွန်းပေါ်၊ ရခိုင်ကမ်းရိုးတန်းတစ်လျှောက်ရှိ ကမ်းနီး၊ ကမ်းဝေးငါးရေယာဉ်များ၊ သင်္ဘောများအနေဖြင့်လည်း မိုးလေဝသအခြေအနေကို အနီးကပ်စောင့်ကြည့်ကာ ကြိုတင်သတိပြုဆောင်ရွက်ကြရန် မိုးဇလက အသိပေးထားသည်။
