ရာသီအကုန်တွင် ထွက်ခွာမယ့် အိုင်ရာအိုလာနေရာတွင် ရို့စ်ကို ခန့်အပ်ရန် သဘောတူညီမှု ရရှိသွားပြီဖြစ်တဲ့ ဘုန်းမောက်
======================
ဘုန်းမောက်ဟာ ရာသီအကုန်တွင် အသင်းမှ ထွက်ခွာမယ့် အန်ဒိုနီအိုင်ရာအိုလာရဲ့ နေရာတွင် မာကိုရို့စ်အား ၃ နှစ်စာချုပ်ဖြင့် ခန့်အပ်ရန် သဘောတူညီမှု ရရှိသွားပြီ ဖြစ်ပါတယ်။

ဘုန်းမောက်ဟာ ပြီးခဲ့တဲ့အပတ် ကြာသပတေးနေ့တုန်းက အသက် ၄၃ နှစ်ရှိ အိုင်ရာအိုလာမှာ စာချုပ်သစ်ချုပ်ဆိုလာမှာ မဟုတ်ဘဲ နွေရာသီတွင် Vitality Stadium မှ ထွက်ခွာမယ်လို့ ကြေညာခဲ့ပါတယ်။

ဂျာမန်လူမျိုးနည်းပြရို့စ်ဟာ အစ္စဝှစ်ချ်နည်းပြကီရန်မက်ကန်နာ၊ ဗယ်လီကာနိုနည်းပြအိုင်နီဂိုပီရက်ဇ်တို့နှင့်အတူ ဘုန်းမောက်နည်းပြရာထူးအတွက် လျာထား ၃ ဦးစာရင်းတွင် ပါဝင်ခဲ့ပါတယ်။

အသက် ၄၉ နှစ်ရှိ ရို့စ်ဟာ ၂၀၂၅ ခုနှစ် မတ်လတုန်းက လိုက်ဇစ်နည်းပြရာထူးမှ ထုတ်ပယ်ခြင်းခံရပြီးနောက် ကလပ်လက်မဲ့ ဖြစ်နေသူ ဖြစ်ပြီး အင်္ဂလန်တွင် နည်းပြဖူးတဲ့ အတွေ့အကြုံမရှိပါဘူး။

ရို့စ်ဟာ ၂၀၁၂ ခုနှစ်တွင် လိုကိုမိုးတစ်လိုက်ဇစ်ကို ကိင်တွယ်ကာ နည်းပြဘဝစတင်ခဲ့သူ ဖြစ်ပြီး ရက်ဘူးလ်ဆဲလ်ဘတ်၊ ဒေါ့မွန်၊ မိုချင်ဂလက်ဘတ်နှင့် ရက်ဘူးလ်လိုက်ဇစ်တို့အား ကိုင်တွယ်ခဲ့ဖူးပါတယ်။

သူဟာ ရက်ဘူးလ်ဆဲလ်ဘတ်နှင့်အတူ ဩစတြီးယားဘွန်ဒက်စ်လီဂါဖလား ၂ ကြိမ်ဆွတ်ခူးခဲ့ဖူးသလို လိုက်ဇစ်နှင့်အတူ ဂျာမန်ပိုကယ်ဖလား၊ ဂျာမန်စူပါဖလားတို့ ဆွတ်ခူးခဲ့ဖူးပါတယ်။

ဒေါ့မွန်နှင့်လည်း ဂျာမန်ပိုကယ်ဖလားဆွတ်ခူးခဲ့ဖူးတဲ့ ရို့စ်ဟာ ဖေဖော်ဝါရီလတုန်းက သောမတ်စ်ဖရန့် ထုတ်ပယ်ခံရစဉ်တုန်းက လစ်လပ်နေတဲ့ စပါးစ်နည်းပြရာထူးအတွက် ဆက်သွယ်ခြင်းခံခဲ့ရသူလည်း ဖြစ်ပါတယ်။

ဘုန်းမောက်ဟာ ပရီးမီးယားလိဂ်အမှတ်ပေးဇယားအဆင့် ၈ နေရာမှာ ရပ်တည်နေပြီး ယနေ့တွင် လိဒ်အား ဧည့်ခံကစားရပါမယ်။

နာပိုလီနှင့် အပြုသဘောဆောင်တဲ့ ဆွေးနွေးမှု ပြုလုပ်ပြီးနောက် ဘယ်လ်ဂျီယံတွင်ပင် ဆက်လက် ပြန်လည်ထူထောင်ရေး လေ့ကျင့်ခန်းပြုလုပ်လာမယ့် လူကာကူ
=====================
ရိုမီလူလူကာကူဟာ နာပိုလီနှင့် အပြုသဘောဆောင်တဲ့ ဆွေးနွေးမှုများ ပြုလုပ်ပြီးနောက် ဘယ်လ်ဂျီယံတွင်ပင် ဒဏ်ရာမှ ပြန်လည်ကောင်းမွန်ရေး ပြန်လည်ထူထောင်ရေး ဆက်လက် ပြုလုပ်လာတော့မှာ ဖြစ်ပါတယ်။

မတ်လတုန်းက ချဲလ်ဆီး၊ ယူနိုက်တက်နှင့် အင်တာမီလန်တိုက်စစ်မှူးဟောင်းဟာ အီတလီတွင် လေ့ကျင့်ခန်းပြုလုပ်ရန် ပြောကြားမှုအား ငြင်းပယ်ကာ ဘယ်လ်ဂျီယံသို့ သွားရောက်ကာ လေ့ကျင့်ခန်းဆင်းခဲ့မှုကြောင့် အရေးယူခြင်းခံရမယ့်အရေးနှင့် ရင်ဆိုင်နေရသူ ဖြစ်ပါတယ်။

တိုက်စစ်မှူးလူကာကူဟာ တံကောက်ကြောဒဏ်ရာကြောင့် ယခုရာသီတွင် နာပိုလီအတွက် ၇ ပွဲတည်းသာ ကစားထားနိုင်သူ ဖြစ်ပြီး နောက်ဆုံးအကြိမ်ကစားခဲ့တာ မတ်လ ၆ ရက်နေ့တုန်းက တိုရီနိုအား ၂-၁ ဖြင့် အနိုင်ရတဲ့ပွဲတွင် အရန်အဖြစ် ဝင်ကစားခဲ့တာ ဖြစ်ပါတယ်။

အသက် ၃၂ နှစ်ရှိ လူကာကူဟာ ဒဏ်ရာပြန်လည် ရရှိပြီးနောက် မွေးရပ်မြေ ဘယ်လ်ဂျီယံတွင် လေ့ကျင့်ခန်းဆင်းနေကာ ကလပ်နှင့်အတူ လေ့ကျင့်ခန်းဆင်းရန် ငြင်းဆိုနေခဲ့ပါတယ်။

ဒါပေမယ့် သူဟာ နေပယ်သို့ ပြန်လာကာ အေးဂျင့်ဖီဒီရီကိုပါစတိုရယ်လို၊ နာပိုလီအားကစားဒါရိုက်တာဂျီယိုဗန်နီမန်နာတို့နှင့် တွေ့ဆုံဆွေးနွေးမှုများ ပြုလုပ်ပြီးနောက် ဘယ်လ်ဂျီယံတွင်ပင် ဆက်လက် လေ့ကျင့်ခန်းဆင်းလာနိုင်တော့မှာ ဖြစ်ပါတယ်။

လူကာကူဟာ ယင်းတွေ့ဆုံဆွေးနွေးပွဲတွင် ဒဏ်ရာအခြေအနေကိုလည်း တင်ပြခဲ့ပြီး လာမယ့်နှစ်ပတ်တွင် ပြန်လည်ကစားလာနိုင်တော့မယ်လို့ သိရပါတယ်။

ဘရာဇီးပါရမီရှင်ကွန်အီဒွါဒိုကွန်စီဆာအိုအား ပေါင် ၃၄ သန်းဖြင့် ကမ်းလှမ်းကာ မန်စီးတီးနှင့် အပြိုင်ကြိုးပမ်းလာတဲ့ ယူနိုက်တက်
====================
ယူနိုက်တက်ဟာ ပါးမီးရပ်စ်ပါရမီရှင်အီဒွါဒိုကွန်စီဆာအိုအား ယူရိုသန်း ၄၀ (ပေါင် ၃၄ သန်း)ဖြင့် ကမ်းလှမ်းရန် စီစဉ်နေပါတယ်။ ယူနိုက်တက်ဟာ ဘရာဇီးပါရမီရှင်အား ပြောင်းရွှေ့ကြေး ပေါင် ၃၄ သန်းအပြင် အပိုဆုကြေးများလည်း ပေးလာဦးမှာ ဖြစ်ပါတယ်။

အသက် ၁၆ နှစ်ရှိ ကွန်စီဆာအိုဟာ တောင်အမေရိကဘောလုံးလောကရဲ့အလားအလာအကောင်းဆုံးပါရမီရှင်များထဲမှ တစ်ဦးဖြစ်ပြီး ဥရောပထိပ်သီးကလပ်များအကြား ခေါ်ယူရေး အပြိုင်ကြိုးပမ်းနေကြပါတယ်။

ယူနိုက်တက်ဟာ ကွန်စီဆာအိုကို ခေါ်ယူရေး စောင့်ကြည့်လာခဲ့တာ ကြာမြင့်ပြီ ဖြစ်ပြီး ယခုအခါ တရားဝင်ကမ်းလှမ်းရေး လုပ်ဆောင်လာတော့မှာ ဖြစ်ပါတယ်။ ဒီလူငယ်ပါရမီရှင်ကို မန်စီးတီးနှင့် ဘာစီလိုနာတို့ကလည်း ခေါ်ယူလိုနေပြီး ဆွေးနွေးမှုများ ပြုလုပ်နေကြပြီး ဖြစ်ပါတယ်။

တဖက်တွင် ပါးမီးရပ်စ်ဘက်က ပြောင်းရွှေ့ကြေးအမြင့်ဆုံးရရှိလုနေပါတယ်။ ပါးမီးရပ်စ်ဟာ အနည်းဆုံး ယူရိုသန်း ၄၀ ရရှိလိုနေပါတယ်။

ပါးမီးရပ်စ်ဟာ နယူးကာဆယ်ဘက်က ယူရို ၂၅ သန်းအပြင် ယူရို ၁၅ သန်း အပိုဆုကြေးပေးမယ့် အချက်ဖြင့် ကမ်းလှမ်းမှုကို ပယ်ချခဲ့ပြီး ဖြစ်ပါတယ်။

ပါးမီးရပ်စ်ရဲ့ ကွန်စီဆာအိုအား ရောင်းချမှုမှာ အသင်းရဲ့အရေးပါတဲ့ ကွင်းလယ်ကစားသမားအယ်လန်အပေါ်တွင်လည်း မူတည်နေပါတယ်။

အသက် ၂၂ နှစ်ရှိ အယ်လန်ဟာ နည်းပြအဘယ်ဖာရီရာလက်အောက်တွင် ပုံမှန်ကစားခွင့် ရနေသူ ဖြစ်ပြီး နာပိုလီဘက်က ယူရို ၃၅ သန်းဖြင့် ကမ်းလှမ်းမှု ရရှိထားပြီး ဖြစ်ပါတယ်။

ပါးမီးရပ်စ်ဟာ အယ်လန်ကို ရောင်းချပြီးချိန်တွင်မှ ကွန်စီဆာအိုအား ရောင်းမရောင်း ဆုံးဖြတ်လာပါမယ်။

ယူနိုက်တက်ဘက်က ကွန်စီဆာအိုအား ခေါ်ယူရေး ကြိုးပမ်းနေပေမယ့်လည်း မန်စီးတီးနှင့် ဘာစီလိုနာတို့ကလည်း လူငယ်ပါရမီရှင်အား ခေါ်ယူရေး ရှေ့တိုးလုပ်ဆောင်နေကြပြီ ဖြစ်ပါတယ်။

ဒါ့အပြင် ချန်ပီယံလိဂ်ချန်ပီယံ ပီအက်စ်ဂျီကလည်း ကွန်စီဆာအိုရဲ့ အခြေအနေအား စောင့်ကြည့်နေကာ ကြားဝင်ရောက်ရန် ချောင်းနေပါတယ်။

တဖက်တွင် ကွန်စီဆာအိုရဲ့ မိသားစုဝင်များကလည်း အင်္ဂလန်၊ ပြင်သစ်အပါအဝင် ဥရောပတလွှား ခရီးသါားကာ ပါရမီရှင်ရဲ့အနာဂတ်အား ဆုံးဖြတ်ရေး သွားရောက်လေ့လာထားပါတယ်။

ကွန်စီဆာအိုရဲ့ အေးဂျင့်အဖြစ် အန်းဒရစ်ရဲ့ ဖခင်ဒေါက်ကလပ်ဆူဆာနှင့် အက်ဒရီယာနိုရီဘိုင်ရိုတို့ ဦးဆောင်နေတဲ့ အေဂျင်စီ DSA Sports က လုပ်ဆောင်နေတာပါ။

DSA Sports ဟာ ကစားသမား ရရှိလာမယ့် အကျိုးခံစားအပြင် အားကစားဆိုင်ရာရည်မှန်းချက်အပေါ် မူတည်ပြီး အနာဂတ်ကို ဆုံးဖြတ်လာပါမယ်။

လည်ပင်းရိုးကျိုးဒဏ်ရာရရှိကာ ဆေးရုံသို့ အရေးပေါ် ပို့ဆောင်ခဲ့ရတဲ့ ကလင်းစမန်းရဲ့သား
====================
ဂျာဂင်ကလင်းစမန်းရဲ့သားဂျိုနသန်ဟာ ပြီးခဲ့တဲ့အပတ်ပွဲစဉ်တွင် လည်ပင်ရိုးကျိုးဒဏ်ရာရရှိကာ ဆေးရုံသို့ အရေးပေါ် တက်ရောက်ခဲ့ရပါတယ်။

အသက် ၂၉ နှစ်ရှိ ဂိုးသမားဟာ အင်္ဂလန်လက်ရွေးစင်ဟောင်းအက်ရှ်လေကိုးလ်ကိုင်တွယ်နေတဲ့ စီးရီးဘီကလပ် စီဆီနာမှာ ကစားနေသူ ဖြစ်ပြီး စနေနေ့ညတုန်းက ပါလာမိုနှင့်ပွဲစဉ်တွင် ဒဏ်ရာရရှိခဲ့တာလည်း ဖြစ်ပါတယ်။

စီဆီနာက ၂-၀ ဂိုးဖြင့် ဦးဆောင်နေတဲ့ ဒုတိယပိုင်းနာကျင်အချိန်ပိုတွင် ကလင်းစမန်းဟာ ဖီးလစ်ပိုရာနိုချီယာအား ကျော်ဖြတ်ကာ ဘောလုံးကို ရရှိခဲ့ပါတယ်။ ဒါပေမယ့် ရာနော့ခီယာရဲ့ ခြေထောက်က ဂိုးသမားရဲ့လည်ပင်းကို မတော်တဆ ထိသွားခဲ့ပါတယ်။

အမေရိကန်လူငယ်လက်ရွေးစင်ဂိုးသမားဟောင်းဟာ ကွင်းအတွင်း အချိန်အတန်ကြာ ဆေးကုသမှုခံယူပြီးနောက် လည်ပင်းအပတ်ဖြင့် လူနာတင်ထမ်းစင်ဖြင့် ထွက်ခွာခဲ့ရပါတယ်။

စီဆီနာက ကလင်းစမန်းမှာ စစ္စလီရှိ ဆေးရုံတွင် တက်ရောက်ခဲ့ရကြောင်း အတည်ပြုသွားပါတယ်။

ကလင်းစမန်းရဲ့ဒဏ်ရာကို စစ်ဆေးမှုအရ လည်ပင်းနှင့် ကျောရိုးအကြား ပထမဆုံးလည်ပင်းရိုးအဆစ်ကျိုးသွားခြင်း ဖြစ်ကြောင်း တွေ့ရပါတယ်။

ကလင်းစမန်းဟာ အထူးကြပ်မတ်ကုသမှုအောက်တွင် ဆက်ရှိနေရပြီး နောက်ထပ် စစ်ဆေးမှုများ ခံယူရမှာ ဖြစ်ပါတယ်။ သူဟာ အထူးစပါယ်ရှယ်ခွဲစိတ်ဆရာဝန်နှင့် ဆွေးနွေးပြီးနောက် ခွဲစိတ်ကုသမှုခံယူလာနိုင်ပါတယ်။

ဒုတိယကလေးမွေးပြီး ရက်အတန်ကြာတွင်ပင် ဂျာမန်ဘောလုံးသမားရဲ့ ဘောလုံးမယ်ဟောင်း ကွယ်လွန်
==================
ဂျာမန်ဘောလုံးသမားမားကပ်စ်မန်ဒလာရဲ့ ဇနီးသည်တာမာရာဟာ ဒုတိယကလေးမွေးဖွားပြီး ရက်အတန်ကြာတွင်ပင် ကွယ်လွန်သွားရှာခဲ့ပါတယ်။

တာမာရာမန်ဒလာဟာ အသက် ၃၂ နှစ်အရွယ်တွင် ကာလတို မကျန်းမမာ ဖြစ်ပြီးနောက် စနေနေ့တုန်းက ကွယ်လွန်သွားခဲ့တာ ဖြစ်ပါတယ်။

အသက် ၃၃ နှစ်ရှိ မားကပ်စ်ဟာ ဘွန်ဒက်စ်လီဂါတွင် နူရင်ဘတ်နှင့်အတူ ကစားခဲ့သူဖြစ်ပြီး လက်ရှိ စတုတ္ထတန်းကလပ် အက်ဖ်စီဟွမ်ဘတ်တွင် ကစားနေပါတယ်။ ဇနီးသည်မှာလည်း ဘောလုံးသမားဟောင်းဖြစ်ပြီး Saarbrucken တွင် ကစားနေစဉ် မားကပ်စ်နှင့် တွေ့ဆုံခဲတာ ဖြစ်ပါတယ်။

မားကပ်စ်ဟာ ကိုယ်ရေးကိုယ်တာကိစ္စရပ်ကြောင့် သောကြာနေ့တုန်းက FSV Frankfurt နှင့် သရေကျတဲ့ပွဲကို လွဲပြီးနောက် ဇနီးသည်ရဲ့ နာရေးသတင်းကို ကြေညာလာခဲ့တာလည်း ဖြစ်ပါတယ်။

မားကပ်စ်ရဲ့ ဇနီးသည်ရဲ့ နာရေးသတင်းအပေါ် လက်ရှိ ကစားနေတဲ့ ကလပ်များ၊ ကလပ်ဟောင်းများက ဝမ်းနည်းကြေကွဲကြောင်း ကြေညာချက်များ ထုတ်ပြန်ထားကြပါတယ်။

ဓားဖြင့် အထိုးခံရပြီးနောက် အသက်ကယ်ဆယ်ရေး ခွဲစိတ်ကုသမှု ပြုလုပ်ခဲ့ရတဲ့ ယူရိုပါလိဂ်စတား
====================
မက်ဂျီလန်းစတားအလာမာရာဒီဂျာဘီဟာ ဓားထိုးခံရပြီး ပြင်းထန်ဒဏ်ရာရရှိပြီးနောက် အသက်ကယ်ဆယ်ရေး ခွဲစိတ်ကုသမှု ပြုလုပ်ခဲ့ရပါတယ်။

အသက် ၁၉ နှစ်ရှိ အလယ်တန်းကစားသမားဟာ တနင်္ဂနွေနေ့ နံနက် ၃ နာရီ ၃၀ မိနစ် ဝန်းကျင်အချိန်တွင် ဒိန်းမတ်ရှိ ဟာနင်းမြို့တွင် တုန်လှုပ်ဖွယ် တိုက်ခိုက်မှုနှင့် ကြုံခဲ့ရတာ ဖြစ်ပြီး ယခုအခါ အခြေအနေမှာ စိုးရိမ်စရာအနေအထားတွင် မရှိတော့ပါဘူး။

ဒီဂျာဘီဟာ ဓားထိုးခံရကာ သတိမေ့လျော့နေခဲ့ပြီးနောက် ပြန်လည်သတိရလာခဲ့ပြီဖြစ်ပြီး ခွဲစိတ်ကုသမှု ၂ ကြိမ်ပြုလုပ်ခဲ့ရပါတယ်။

ဒိန်းမတ်ရဲတပ်ဖွဲ့က ဒီဂျာဘီကို ဓားဖြင့် ထိုးခဲ့တဲ့ အသက် ၂၀ နှစ်အရွယ်ရှိ အသားဖြူဖြူ၊ အနက်ရောင်ဆံပင်တိုတို လူငယ်အား ရှာဖွေနေကြောင်း ကြေညာထားပါတယ်။

ဒီဂျာဘီဟာ နွေရာသီတုန်းက ယူရိုပါလိဂ်ဝင်ခွင့်ရ မက်ဂျီလန်းသို့ ပြောင်းလာခဲ့သူ ဖြစ်ပြီး ဆဲလ်တစ်၊ ရိုးမား၊ ဂျန့်၊ ဒိုင်နမိုဇာဂရက်တို့နှင့်ပွဲစဉ်များတွင် အရန်အဖြစ် ဝင်ရောက်ကစားခွင့်ရခဲ့ပါတယ်။

သူဟာ ပေါ်တူဂီဒုတိယတန်းကလပ် စီဒီမာဖရာတွင် ကစားသမားဘဝ စတင်ခဲ့သူလည်း ဖြစ်ပါတယ်။

ပရိသတ်တစ်ဦးအား ကိုယ်ထိလက်ရောက် တိုက်ခိုက်မှုအတွက် ဗီရိုနာတိုက်စစ်မှူးအော်ဘင် အပြည့်အဝ တာဝန်ယူလာ
=======================
ဗီရိုနာတိုက်စစ်မှူးဂစ်ဖ်အော်ဘင်ဟာ ပရိသတ်အမြောက်အမြားရဲ့ ရှေ့မှောက်တွင် ပရိသတ်တစ်ဦးအား ကိုယ်ထိလက်ရောက်တိုက်ခိုက်မှုအတွက် လူသိရှင်ကြား တောင်းပန်မှု ပြုလုပ်လာပါတယ်။

အထက်ပါ မတော်တဆမှုမှာ တနင်္ဂနွေနေ့တုန်းက အေစီမီလန်ကို ၁-၀ ဂိုးဖြင့် ရှုံးနိမ့်တဲ့ပွဲအပြီး Stadio Bentegodi ရဲ့ကားပါကင်တွင် ဖြစ်ပျက်ခဲ့တာ ဖြစ်ပါတယ်။

ပရိသတ်တစ်ဦးဟာ Stadio Bentegodi မှ အိမ်ပြန်ရန် ကားမောင်းနှင်နေတဲ့ အော်ဘင်ကို တစုံတရာ အော်ဟစ်ပြောဆိုခဲ့ပါတယ်။

အော်ဘင်ဟာ ကားကို ရပ်တန့်ပြီး ကားပေါ်မှ ဆင်းလာပြီးနောက် အမှတ်တရလက်မှတ်ရေးထိုးရန်၊ အမှတ်တရ ဓာတ်ပုံရိုက်ကူးရန် စောင့်ဆိုင်းနေတဲ့ ပရိသတ်များရဲ့ ရှေ့မှောက်တွင်ပင် ယင်းပရိသတ်ကို ကိုယ်ထိလက်ရောက် တိုက်ခိုက်မှု ပြုလုပ်ခဲ့ပါတယ်။

ယင်းအဖြစ်အပျက်ကို ပရိသတ်များက ဖုန်းကင်မရာများဖြင့် ရိုက်ကူးနိုင်ခဲ့ပြီး ဆိုရှယ်မီဒီယာတွင် ပျံ့နှံ့လျက်ရှိပါတယ်။

ဗီရိုနာအသင်းက ကိုယ်ထိလက်ရောက်ကျူးလွန်တဲ့ မည်သည့်လုပ်ရပ်များကိုမဆို ရှုတ်ချကြောင်း ကြေညာထားပါတယ်။

ယခုအခါ အော်ဘင်ကလည်း "ကျွန်တော့်အပြုအမူအတွက် ပရိသတ်အားလုံးကို အနူးအညွှတ်တောင်းပန်ပါတယ်။ ပရိသတ်တွေရဲ့အားပေးမှုက ဘယ်လောက် အရေးပါတယ်ဆိုတာ သိပါတယ်။ ဓာတ်ပုံရိုက်ဖို့၊ အမှတ်တရလက်မှတ်ထိုးပေးဖို့ တောင်းဆိုမှုတွေကို ဂရုမစိုက်ခဲ့မှုအတွက် တောင်းပန်ပါတယ်။ ခင်ဗျားတို့ လေးစားမှုခံရဖို့ ထိုက်တန်ပါတယ်။ အဲဒီအချိန်တုန်းက ခင်ဗျားတို့ကို စိတ်ပျက်စေခဲ့တယ်။ စိတ်မထိန်းနိုင်ခဲ့မှုအတွက် အပြည့်အဝ တာဝန်ယူပါတယ်။ ဒီအတွက်လည်း တောင်းပန်ပါတယ်။ ဒီဖြစ်ရပ်အပေါ် အပြည့်အဝ တာဝန်ယူပါတယ်။ ဒီအမှားကနေ သင်ယူသွားမယ်လို့ ကတိပေးပါတယ်။ အကောင်းဆုံးလုပ်သွားပါမယ်။ ပရိသတ်တွေက ဒီကလပ်ရဲ့အသက်သွေးကြောပါ။ နေ့စဉ်နေ့တိုင်း ဒီကလပ်အပေါ် ချစ်ခင်မြတ်နိုးမှု၊ သစ္စာရှိမှုကို ပြသလာတဲ့ ခင်ဗျားတို့လုပ်ဆောင်မှုအတွက် အသိအမှတ်ပြုပါတယ်။ ကျွန်တော်လည်း ခင်ဗျားတို့ ယုံကြည်မှု ပြန်ရလာအောင် အစွမ်းကုန် အလုပ်ကြိုးစားပါမယ်။ အပြောနဲ့တင်မဟုတ်ဘဲ အလုပ်နဲ့ သက်သေပြပါမယ်။ ဆက်ပြီးတော့ အားပေးတဲ့အတွက်လည်း ကျေးဇူးတင်ပါတယ်။ ကွင်းထဲခြေချတိုင်း ကလပ်အတွက် အချိန်အတိုင်း အကောင်းဆုံးပေးနိုင်ဖို့ အပြည့်အဝ အာရုံစိုက်သွားပါမယ်"လို့ ကြေညာသွားပါတယ်။

ဗီရိုနာဟာ ယခုရာသီတွင် ရှုံးပွဲ ၂၁ ပွဲအထိ ကြုံကာ ၉ ပွဲသရေကျပြီး ၃ ပွဲသာ နိုင်ပွဲရထားကာ စီးရီးဘီသို့ တန်းဆင်းထားရပြီး ဖြစ်ပါတယ်။

အသက် ၂၃ နှစ်ရှိ တိုက်စစ်မှူးဟာ ဟော်ဖန်ဟိမ်းမှ အငှားဖြင့် လာရောက်ကစားနေသူ ဖြစ်ပြီး အငှားစာချုပ်တွင် ယူရို ၈ သန်းဖြင့် အပြီးသတ်ခေါ်ယူနိုင်မယ့်အချက် ပါဝင်ပေမယ့် ယခု အဖြစ်အပျက်ကြောင့် အပြီးသတ်ခေါ်ယူလာဖို့ မရှိတော့ပါဘူး။

သူဟာ ယခုရာသီတွင် ဗီရိုနာအတွက် စီးရီးအေပွဲ ၂၈ ပွဲကစားထားရာမှာ ၇ ဂိုးသွင်းပြီး ၃ ကြိမ် ဖန်တီးပေးထားပါတယ်။

ရက်ဖို့ဒ်၊ ချဲလ်ဆီးစတားဟောင်းအပါအဝင် နွေရာသီတွင် ထွက်ခွာခွင့်ပေးလာမယ့် ဘာစီလိုနာကစားသမား ၅ ဦးအမည်ထွက်ပေါ်လာ
=====================
ဘာစီလိုနာဟာ နွေရာသီတွင် အသင်းကို ကြီးမားတဲ့ အပြောင်းအလဲ ပြုလုပ်တဲ့အနေဖြင့် ကစားသမား ၅ ဦးအား ထွက်ခွာခွင့်ပေးလာတော့မှာ ဖြစ်ပါတယ်။

ဘာစီလိုနာဟာ ရီးရဲလ်မက်ဒရစ်အား ၉ မှတ်ဖြတ်ကာ လာလီဂါအမှတ်ပေးဇယားထိပ်ဆုံးနေရာတွင် ရပ်တည်နေပြီး လာလီဂါဖလားအား ၂ ကြိမ်ဆက် ဆွတ်ခူးရန် အခြေအနေကောင်းနေပါတယ်။

ဒါပေမယ့် ဘာစီလိုနာဟာ အက်သလက်တီကိုအား ရှုံးနိမ့်ကာ ချန်ပီယံလိဂ်မှ ထွက်ခွာခဲ့ရပြီးနောက် ရာသီအကုန်တွင် အသင်းကို ကြီးမားတဲ့ အပြောင်းအလဲ ပြုလုပ်ရန် စီစဉ်ထားပါတယ်။

စပိန်မီဒီယာများရဲ့ ဖော်ပြလာမှုအရ ဘာစီလိုနာဟာ နွေရာသီတွင် ကစားသမား ၅ ဦးကို ထွက်ခွာခွင့်ပေးလာမှာ ဖြစ်ကြောင်း သိရပါတယ်။

ယင်းအထဲတွင် မားကပ်စ်ရက်ဖို့ဒ်လည်း ပါဝင်ပါတယ်။ ဘာစီလိုနာဟာ ယူနိုက်တက်မှ အငှားဖြင့် လာရောက်ကစားနေတဲ့ ရက်ဖို့ဒ်ကို ပေါင် ၂၆ သန်းဖြင့် အပြီးသတ် ဝယ်ယူနိုင်တဲ့အချက်ကို ထည့်သွင်းချုပ်ဆိုထားပေမယ့် စာချုပ်အတိုင်း လုပ်ဆောင်လာတော့မှာ မဟုတ်ပါဘူး။

အသက် ၂၈ နှစ်ရှိ အင်္ဂလန်တိုက်စစ်မှူးဟာ ယခုရာသီတွင် ဘာစီလိုနာအတွက် ၁၂ ဂိုးသွင်းကာ ၁၃ ကြိမ်ဖန်တီးမှု ပြုလုပ်ထားနိုင်ပါတယ်။

အစောပိုင်းတုန်းက ဘာစီလိုနာဟာ ရက်ဖို့ဒ်ကို အသင်းတွင် ဆက်ထိန်းထားမယ်လို့ ယုံကြည်ခဲ့ရပေမယ့် ကမ်းလှမ်းမှု မပြုလုပ်လာတော့မှာ မဟုတ်ပါဘူး။

ဒါကြောင့်လည်း ရက်ဖို့ဒ်ဟာ နွေရာသီတွင် အင်္ဂလန်နှင့်အတူ ကမ္ဘာ့ဖလားပြိုင်ပွဲ ကစားပြီးပါက အသင်းဟောင်းယူနိုက်တက်နှင့် ပြန်လည်ပူးပေါင်းလာရတော့မှာလည်း ဖြစ်ပါတယ်။

ဘာစီလိုနာမှ ထွက်ခွာလာရမယ့် နောက်တစ်ဦးကတော့ ဝါရင့်တိုက်စစ်မှူးရောဘတ်လီဝန်ဒေါ့စကီးဖြစ်ပါတယ်။

ပိုလန်တိုက်စစ်မှူးဟာ ဘာစီလိုနာအတွက် အရေးပါတဲ့ တိုက်စစ်မှူးအဖြစ် ကစားနေဆဲဖြစ်ပြီး ရာသီအကုန်တွင် စာချုပ်သက်တမ်းကုန်ဆုံးမယ့်သူ ဖြစ်ပါတယ်။

ဒါပေမယ့် ဘာစီလိုနာဟာ လီဝန်ဒေါ့စကီးရဲ့အသက်အရွယ်ကြောင့် အသင်းရဲ့ တိုက်စစ်ကို သွေးသစ်လောင်းရန် စီစဉ်လာပါတယ်။

ဒါ့အပြင် ဘာစီလိုနာဟာ တစ်ပတ်လုပ်ခ ယူရို ၄၀၀၀၀၀ ဝန်းကျင်ပေးနေတဲ့ ကွင်းလယ်ကစားသမားဖရန်ကီဒီယွန်ကိုလည်း အသင်းရဲ့ဘဏ္ဍာရေးဟန်ချက်ညီလာစေရန်အတွက် ရောင်းချလာတော့မှာ ဖြစ်ပါတယ်။

ဘာစီလိုနာဟာ ချဲလ်ဆီးနောက်ခံလူဟောင်းအင်ဒရီယပ်စ်ခရစ်တင်ဆင်၊ အကယ်ဒမီထွက် မာ့ခ်ကာဆာဒိုတို့ကိုလည်း ထွက်ခွာလာပါမယ်။

ဘာစီလိုနာတွင် ကစားတဲ့ ခြောက်ရာသီအတွင်း ၁၆၁ ပွဲကစားထားတဲ့ ခရစ်တင်ဆင်ဟာ ရာသီအကုန်တွင် ဘာစီလိုနာနှင့် စာချုပ်သက်တမ်းကုန်ဆုံးလာမယ့်သူလည်း ဖြစ်ပါတယ်။

ကာဆာဒိုမှာ ၂ နှစ်စာချုပ်သက်တမ်းကျန်နေသေးပေမယ့်လည်း ကလပ်တွင် အရေးပါတဲ့အခန်းကဏ္ဍမှ ကစားခွင့်ရနေသူလည်း မဟုတ်ပါဘူး။

ကွင်းလယ်ခံစစ်ကစားသမာဟာ ပီဒရို၊ ဂါဗီ၊ အဲရစ်ဂါစီယာတို့ ရှိနေမှုနှင့်အတူ နောက်ဆုံး လာလီဂါ ၈ ပွဲတွင် ၁ ပွဲတည်းသာ ပွဲထွက်ခွင့်ရထားပါတယ်။

ဝက်စ်ဟမ်းဒုဥက္ကဌရာထူးမှ ဘရာဒီ နုတ်ထွက်လာ
======================
ဘာရိုနက်စ်ကာရန်ဘရာဒီဟာ ၁၆ နှစ်တိုင်တိုင် တာဝန်ထမ်းဆောင်လာခဲ့တဲ့ ဝက်စ်ဟမ်းဒုဥက္ကဌရာထူးမှ နုတ်ထွက်လာပါတယ်။

စီးပွားရေးလုပ်ငန်းရှင်ဟာ ၂၀၁၀ ခုနှစ် ဇန်နဝါရီလတွင် ပူးတွဲဥက္ကဌများဖြစ်ကြတဲ့ ဒေးဗစ်ဆူလီဗန်နှင့် ဒေးဗစ်ဂိုးတို့ရဲ့ ခန့်အပ်ခြင်းခံခဲ့ရတာ ဖြစ်ပြီး ဧပြီလ ၁၅ ရက်ကတည်းက ရာထူးမှ ထွက်ခွာခဲ့တာပါ။

The Times သို့ ပြောကြားလာမှုအရ သူမဟာ ဇန်နဝါရီလတွင် ဝက်စ်ဟမ်းဒုဥက္ကဌရာထူးမှ နုတ်ထွက်ရန် စဉ်းစားလာခဲ့ပြီးနောက် ဖေဖော်ဝါရီလအလယ်ပိုင်းတွင် ဆုံးဖြတ်ချက်ချခဲ့တာလည်း ဖြစ်ပါတယ်။

ဘရာဒီက "အမှတ်ရစရာ မှတ်တိုင်တွေ အတူတကွ အများကြီးရရှိခဲ့ပေမယ့် အမှတ်ရဖို့ အကောင်းဆုံးကတော့ ယူအီးအက်ဖ်အေယူရိုပါကွန်ဖရင့်လိဂ်ဖလားကိုင်မြှောက်နိုင်ခဲ့တာပါ။ ဒီအခိုက်အတန့်ကတော့ ကျွန်မနဲ့အတူ အမြဲ ရှိနေမှာပါ။ ကလပ်မှာ ကျွန်မရှိနေစဉ်အတွင်း ပုံဖော်ခဲ့တဲ့ ဆက်ဆံရေး၊ စိန်ခေါ်မှုတွေနဲ့ အခွင့်အလမ်းတွေအတွက် အမြဲကျေးဇူးတင်နေမှာပါ"လို့ ပြောကြားသွားပါတယ်။

ဝက်စ်ဟမ်းပူးတွဲဥက္ကဌဆူလေဗန်က ဘရာဒီမှာ ထူးချွန်ထက်မြက်တဲ့ ခေါင်းဆောင်တစ်ဦးဖြစ်ကြောင်းနှင့် ကလပ်ရဲ့ ဖွံ့ဖြိုးတိုးတက်ရေးတွင် အရေးပါတဲ့ အခန်းကဏ္ဍမှ ပါဝင်သူ ဖြစ်ကြောင်း ဆိုထားပါတယ်။

အီတလီအသင်းကို ကိုင်တွယ်လိုပါက လုပ်ခများစွာ လျှော့ယူရမယ့် ကွန်တီ
=====================
အန်တိုနီယိုကွန်တီဟာ ရာသီအကုန်တွင် နာပိုလီအသင်းမှ ထွက်ခွာကာ အီတလီအသင်းကို ကိုင်တွယ်မည်ဆိုပါက လုပ်ခများစွာ လျှော့ယူလာရမှာ ဖြစ်ကြောင်း သိရပါတယ်။

အီတလီဟာ ကမ္ဘာ့ဖလားပလေးအော့ဖ်ဗိုလ်လုပွဲတွင် ဘော့စနီးယားကို အရေးနိမ့်ကာ ခြေစစ်ပွဲကျပြီးနောက် နည်းပြဂတ်တူဆို နုတ်ထွက်သွားရာ နည်းပြလက်မဲ့ ဖြစ်နေပါတယ်။

ကွန်တီဟာ လစ်လပ်နေတဲ့ အီတလီနည်းပြရာထူးအတွက် အေစီမီလန်နည်းပြမက်ဆီမိုအယ်လီဂရီနှင့်အတူ ထိပ်ဆုံးမှ ရေပန်းစားနေပါတယ်။

ကွန်တီဟာ အီတလီအသင်းကို ၂၀၁၄ မှ ၂၀၁၆ ခုနှစ်အတွင်း ကိုင်တွယ်ဖူးသူ ဖြစ်ပြီး နာပိုလီနှင့် တစ်နှစ်စာချုပ်သက်တမ်းကျန်နေသေးပေမယ့် အီတလီအသင်းကို ပြန်လည်ကိုင်တွယ်ရန် စိတ်ဝင်စားကြောင်း အရိပ်အမြွက်ပြောဆိုခဲ့ဖူးပါတယ်။

ဒါပေမယ့် ယနေ့တွင် TMW ရဲ့ ဖော်ပြလာမှုအရ ကွန်တီဟာ အီတလီအသင်းကို ကိုင်တွယ်မည်ဆိုပါက လုပ်ခများစွာ လျှောယူလာရမှာ ဖြစ်ကြောင်း သိရပါတယ်။

ကွန်တီဟာ နာပိုလီတွင် တစ်နှစ်လုပ်ခ ယူရို ၆.၅ သန်း ရရှိနေပြီး ချန်ပီယံလိဂ်ဝင်ခွင့် ရရှိပါက အပိုဆုကြေး ယူရို ၂.၅ သန်း အကျိုးခံစားခွင့် ရရှိနေပါတယ်။

ဒါပေမယ့် လက်ရွေးစင်အသင်းမှာတော့ နည်းပြချုပ်က အခြေခံလစာ ယူရို ၃ သန်းကျော်မျှသာ ပေးနိုင်ပါတယ်။

ကွန်တီဟာ အီတလီအသင်းကို ကိုင်တွယ်စဉ်တုန်းက ရုပ်ပုံလွှာမူပိုင်ခွင့်ကြောင်း PUMA ရဲ့ စပွန်ဆာကြေးပေးချေမှုကြောင့် ယူရို ၄.၅ သန်းအထိ ရရှိခဲ့ပါတယ်။