လူမျိုးရေးခွဲခြားမှုပပျောက်ရေး တိုက်ပွဲဝင်နေသူများအတွက် နိုင်ပွဲ ရယူခဲ့တဲ့ ရီးရဲလ်မက်ဒရစ်
====================
ဘင်ဖီကာအား အနိုင်ယူကာ ချန်ပီယံလိဂ် ၁၆ သင်း ရှုံးထွက်အဆင့်သို့ တက်ခဲ့တဲ့ ရီးရဲလ်မက်ဒရစ်ရဲ့အောင်ပွဲမှာ လူမျိုးရေးခွဲခြားမှု တိုက်ဖျက်ရေး လုပ်ဆောင်နေသူများအတွက် ဖြစ်ကြောင်း အလယ်တန်းကစားသမားအူရယ်လီယန်ချူကွာမီနီက ပြောကြားလာပါတယ်။

ဗီနီရှပ်စ်ဂျူနီယာဟာ လစ္စဘွန်းတွင် ကစားတဲ့ ပထမအကျော့ပွဲစဉ်တုန်းက တစ်လုံးတည်းသော အနိုင်ဂိုးအား သွင်းယူပြီးနောက် ဘင်ဖီကာတောင်ပံကစားသမားဂျီယန်လူကာပရီစတီယန်နီရဲ့ လူမျိုးရေးခွဲခြားမှုခံခဲ့ရပါတယ်။

ပရီစတီယန်နီက လူမျိုးရေးခွဲခြားမှု ပြုလုပ်ခဲ့ခြင်း မရှိကြောင်း ငြင်းဆိုထားပါတယ်။ ယင်းအမှုကို ယူအီးအက်ဖ်အေက စုံစမ်းစစ်ဆေးနေဆဲ ဖြစ်ပြီး စုံစမ်းဆဲကာလတွင် ယာယီ ၁ ပွဲပယ်ပြစ်ဒဏ်ချမှတ်ထားပြီး ဗုဒ္ဓဟူးနေ့ ဘာနေဗျူးရှုံးပွဲအား လွဲချော်ခဲ့ပါတယ်။

ဗုဒ္ဓဟူးနေ့ညတုန်းက ဘာနေဗျူးနိုင်ပွဲတွင် ရီးရဲလ်မက်ဒရစ်ပရိသတ်များဟာ "no to racism"လို့ စပိန်လို ရေးသားကာ ဗီနီရှပ်စ်အား အားပေးခဲ့ကြပါတယ်။

မနေ့ညက ပွဲတွင် ဗီနီရှပ်စ်ဟာ ရီးရဲလ်မက်ဒရစ်တို့ ၂-၁ ဖြင့် အနိုင်ရစေမယ့် ဒုတိယဂိုးအား သွင်းယူခဲ့ပြီး နှစ်ကျော့ပေါင်း ရလဒ် ၃-၁ ဖြင့် ချန်ပီယံလိဂ် ၁၆ သင်း ရှုံးထွက်အဆင့်သို့ တက်ရောက်ခဲ့ပါတယ်။

ပထမပိုင်းတွင် ရီးရဲလ်မက်ဒရစ်အတွက် ချေပဂိုးကို သွင်းယူခဲ့တဲ့ ချူကွာမီနီက "ဒီပွဲထက်၊ ဘောလုံးထက် အရေးကြီးတာတွေ အများကြီး ရှိပါတယ်။ ဗီနီရှပ်စ်က သူ့ယုံကြည်မှုကို ဆက်ထိန်းထားခဲ့တယ်။ လိုအပ်တဲ့ အာရုံစူးစိုက်မှု ထားထားတယ်။ ဒီပွဲမှာ ဒီကောင်လေး(ပရီစတီယန်နီ)ကို မကစားခွင့်မပေးတာ မှန်ကန်တဲ့ ဆုံးဖြတ်ချက်ပါ။ ကျွန်တော် ပြောခဲ့သလိုပဲ ဘောလုံးထက် အရေးကြီးတာတွေ ရှိပါတယ်။ ဒီနိုင်ပွဲ က ကျွန်တော်တို့အားလုံးအတွက် အောင်ပွဲပါ"လို့ ပြောကြားသွားပါတယ်။

ဗီနီရှပ်စ်ဂျူနီယာဟာ ပထမအကျော့တုန်းက ရီးရဲလ်မက်ဒရစ်ရဲ့ တစ်လုံးတည်းသော အနိုင်ဂိုးကို သွင်းယူပြီးနောက် ထောင့်ကန်ဘောအလံတိုင်နားသို့ သွားရောက်ကာ ခါးလှုပ်ပြီး ကကာ အောင်ပွဲခံခဲ့ပါတယ်။ ယင်းသို့ ကကာ အောင်ပွဲခံပြီးနောက် ပရီစတီယန်နီရဲ့ လူမျိုးရေးခွဲခြားဆက်ဆံမှု ခံခဲ့ရတာလည်း ဖြစ်ပါတယ်။

မနေ့ညက ပွဲစဉ်တွင်လည်း ဗီနီရှပ်စ်ဟာ ရီးရဲလ်မက်ဒရစ်အတွက် ဒုတိယဂိုးအား သွင်းပြီးနောက် ပထမအကျော့တုန်းကကဲ့သို့ပင် ကကာ အောင်ပွဲခံခဲ့ပါတယ်။

အမြတ်ရရှိလာပေမယ့် အကြွေး ပေါင် ၁.၃ ဘီလီယံအထိ မြင့်မားလာတဲ့ ယူနိုက်တက်
=====================
ယူနိုက်တက်ဟာ ၂၀၂၅ ခုနှစ် ဒီဇင်ဘာလ ၃၁ ရက်နေ့အထိ ခြောက်လတာကာလအတွက် ဘဏ္ဍာရေးရှင်းတမ်း ထုတ်ပြန် ကြေညာလာပါတယ်။

ယူနိုက်တက်ဟာ ၂၀၂၅ ခုနှစ် နောက်ဆုံး‌ခြောက်လအတွင်းတွင် ပေါင် ၃၂.၆ သန်းအထိ အမြတ်ငွေ ရရှိခဲ့ပါတယ်။

ပရီးမီးယားလိဂ်အမှတ်ပေးဇယားအဆင့် ၄ နေရာတွင် ရပ်တည်နေတဲ့ ယူနိုက်တက်ဟာ ယမန်တစ်နှစ်တုန်းက ယင်းကာလမျိုးတွင် ပေါင် ၃.၉ သန်းအရှုံးပေါ်ပြီးနောက် တစ်နှစ်အကြာတွင် အမြတ်ငွေများစွာ ရရှိလာတာလည်း ဖြစ်ပါတယ်။

တဖက်တွင် ယူနိုက်တက်ဟာ ချေးငွေထောက်ပံ့မှု ပေါင် ၂၅ သန်းထပ်မံ ရယူခဲ့ရကာ ယခုအခါ ပေါင် ၂၉၅.၇ သန်းအထိ ရှိလာပါတယ်။

ယူနိုက်တက်ဟာ ဂလေဇာမိသားစုက အကြွေးဖြင့် ဝယ်ယူပြီးကတည်းက အကြွေးနွံနစ်လာခဲ့တာ ဖြစ်ပြီး အပြောင်းအရွှေ့ကြွေးမြီများ ထပ်မံတင်လာမှုနှင့်အတူ ယခုအခါ ကြွေးမြီ ပေါင် ၁.၂၉ ဘီလီယံအထိ ရှိလာပြီလည်း ဖြစ်ပါတယ်။

ယူနိုက်တက်ဟာ အသားတင်ဘဏ္ဍာရေးကုန်ကျစရိတ် ပေါင် ၁၃.၉ သန်းပေးခဲ့ရပေမယ့်လည်း ယမန်တစ်နှစ်တုန်းကထက် ပေါင် ၃၇.၆ သန်းအထိ နည်းပါးလာခဲ့ပါတယ်။

ယူနိုက်တက်ဟာ ၂၀၂၅ ခုနှစ်တုန်းက ပရီးမီးယားလိဂ်ရဲ့အကြွေ့းအများဆုံးစာရင်းတွင် အဲဗာတန်၊ စပါးစ်တို့အောက်တွင် ရပ်တည်နေဲ့တာ ဖြစ်ပါတယ်။ အဲဗာတန်နှင့် စပါးစ်တို့ဟာ ကွင်းသစ်စီမံကိန်းကြောင့် ကြွေးမြီများ တင်နေခဲ့တာပါ။

ယူနိုက်တက်ဟာလည်း ကွင်းသစ် တည်ဆောက်ရန် စီစဉ်နေပြီး ပေါင် ၂ ဘီလီယံအထိ ကုန်ကျလာဖို့ ရှိနေပါတယ်။

ချန်ပီယံလိဂ်နှင့် ၂ နှစ်ဆက်တိုက် ဝေးကွာလာခဲ့တဲ့ ယူနိုက်တက်ဟာ လာမယ့်ရာသီတွင် ချန်ပီယံလိဂ်ဝင်ခွင့် ရရှိကာ ဘဏ္ဍာရေးကောင်းမွန်လာရေး မျှော်လင့်နေပါတယ်။

ယူနိုက်တက်ဟာ ၂၀၂၅ ခုနှစ် နောက်ဆုံး ၆ လတွင် စပွန်ဆာ ဝင်ငွေ ပေါင်သန်း ၁၉၀.၃ သန်း ရရှိခဲ့ပြီး ယမန်တစ်နှစ်ကထက် ၈ ရာခိုင်နှုန်းအထိ လျှော့ကျပါတယ်။ ဒါပေမယ့် ယူနိုက်တက်ဟာ လုပ်ခ အသုံးစရိတ် ၉ ရာခိုင်နှုန်းလျှော့ကျလာပြီး ပေါင် ၇၅.၁ သန်းသာ အသုံးပြုခဲ့ရပါတယ်။

လွန်ခဲ့တဲ့နှစ်နှစ်ကျော်တုန်းက ယူနိုက်တက်ရဲ့ ရှယ်ယာ ၂၉ ရာခိုင်နှုန်းကို ဝယ်ယူခဲ့တဲ့ ပူးတွဲပိုင်ရှင်ဆာဂျမ်ရက်ကလစ်ဖ်ဟာ ဝန်ထမ်း ၄၅၀ ဦးတို့အား ဖယ်ရှားမှုအပါအဝင် အသုံးစရိတ်လျှော့ချမှု အမြောက်အမြား ပြုလုပ်လာမှုကြောင့် လုပ်ခအသုံးစရိတ်လျှော့ကျလာတာလည်း ဖြစ်ပါတယ်။

ဆော်ဒီပရိုလိဂ်အား Al-Nassr ဆက်လက် ဦးဆောင်နိုင်အောင် ထပ်မံ ဂိုးသွင်းကာ ကူညီလာတဲ့ ခရစ္စတီယာနိုရော်နယ်ဒို
===================
ခရစ္စတီယာနိုရော်နယ်ဒိုဟာ နောက်ထပ် အရေးပါတဲ့ နိုင်ပွဲအဖြစ် Al-Najma အား ၅-၀ ဂိုးဖြင့် အနိုင်ရအောင် ထပ်မံ ဂိုးသွင်းကာ Al-Nassr အား ဆော်ဒီပရိုလိဂ်အား ဆက်လက် ဦးဆောင်နိုင်အောင် ကူညီလာပါတယ်။

Al-Nassr ဟာ မကြာသေးမီတုန်းက Al-Hazem ကို အနိုင်ရပြီးနောက် ဆော်ဒီပရိုလိဂ်အား ပြန်လည် ဦးဆောင်လာနိုင်ခဲ့တာ ဖြစ်ပြီး ဗုဒ္ဓဟူးနေ့ည နိုင်ပွဲကြောင့် အမှတ်ပေးဇယားကို ဆက်လက် ဦးဆောင်လာနိုင်ခဲ့တာလည်း ဖြစ်ပါတယ်။

Al-Nassr ဟာ Al-Hilal မှာ ၂ ပွဲဆက် သရေကျလာမှုကို အခွင့်ကောင်း ယူနိုင်မှုနှင့်အတူ အမှတ်ပေးဇယားအား ၂ မှတ်ဖြတ်ကာ ဦးဆောင်လာနိုင်ခဲ့ပါတယ်။

မနေ့က အဝေးကွင်းပွဲစဉ်တွင် ခရစ္စတီယာနိုရော်နယ်ဒိုက ပွဲအစ ၇ မိနစ်မှာပင် ပင်နယ်တီမှ တဆင့် ဦးဆောင်ဂိုးသွင်းခဲ့တာ ဖြစ်ပြီး ကင်စလေကိုးမန်း၊ မာတီနက်ဇ်(၂ဂိုး)၊ ဆာဒေယိုမာနေးတို့ကလည်း အသီးသီး ဂိုးသွင်းခဲ့ကြပါတယ်။

မနေ့ညက ပင်နယ်တီဂိုးကြောင့် ခရစ္စတီယာနိုရော်နယ်ဒိုဟာ ပရော်ဖက်ရှင်နယ်ကစားသမားဘဝ သွင်းဂိုး ၉၆၅ ဂိုးအထိ ရှိလာခဲ့ပြီ ဖြစ်ပြီး ဂိုး ၁၀၀၀ ရည်မှန်းချက် ပြည့်ရန်အတွက် ၃၅ ဂိုးတည်းသာ လိုပါတော့တယ်။

ခရစ္စတီယာနိုရော်နယ်ဒိုဟာ ယခုနှစ်အစောပိုင်းတုန်းက Al-Nassr ပိုင်ရှင် PIF ရဲ့ မမျှမတ ဆက်ဆံမှုအပေါ် ဒေါသထွက်ကာ Al-Nassr အတွက် မကစားဘဲ သပိတ်မှောက်မှုကြောင့် အနာဂတ် မရေမရာ ဖြစ်နေခဲ့သူလည်း ဖြစ်ပါတယ်။

ဒါပေမယ့် ပေါ်တူဂီစူပါစတားက မကြာသေးမီတုန်းက ဆော်ဒီတွင် ပျော်ရွှင်နေပြီး Al-Nassr တွင်ပင် ရှိနေမှာ ဖြစ်ကြောင်း ပြောကြားကာ အနာဂတ်နှင့်ပတ်သက်ပြီး ရှင်းရှင်းလင်းလင်း ပြုလုပ်ခဲ့ပါတယ်။

ဥရောပတွင်ပင် ဆက်လက်ကစားရန် ကက်စ်မီရို ဆန္ဒရှိနေ
===================
ကက်စ်မီရိုဟာ လာမယ့် နွေရာသီတွင် ယူနိုက်တက်မှ ထွက်ခွာပြီးပါက ဥရောပတွင်ပင် ဆက်လက် ကစားသွားလိုနေကြောင်း သိရပါတယ်။

အသက် ၃၄ နှစ်ရှိ ကက်စ်မီရိုဟာ ထိပ်တန်းအဆင့်တွင် ကစားနိုင်သေးတယ်လို့ ယုံကြည်မှု အပြည့် ရှိနေမှုနှင့်အတူ ဥရောပထိပ်တန်းလိဂ်တွင်ပင် ဆက်လက်ကျင်လည်လိုနေတာ ဖြစ်ပါတယ်။

ကက်စ်မီရိုဟာ ယခုရာသီအကုန်တွင် စာချုပ်သက်တမ်းကုန်ဆုံးမှာ ဖြစ်ပြီး တစ်နှစ်စာချုပ်သက်တမ်းတိုးနိုင်မယ့် အချက်ပါဝင်ပေမယ့် တစ်ပတ်လုပ်ခ ပေါင် ၃၅၀၀၀၀ ပေးနေရမှုကြောင့် ယူနိုက်တက်ဘက်က စာချုပ်သက်တမ်းမတိုးရန် ဆုံးဖြတ်ထားပြီး ဖြစ်ပါတယ်။

ကက်စ်မီရိုနှင့် မိသားစုတို့ဟာ မကြာသေးမီတုန်းက ယူနိုက်တက်တို့ ၁၃ ရက် ပွဲနားရက် ရချိန်အတွင်း မိုင်ယာမီသို့ သွားရောက် အပန်းဖြေစဉ်အတွင်း မေဂျာလိဂ်သို့ ပြောင်းကစားသွားရေး သွားရောက် ကင်းထောက်မှု ပြုလုပ်ခဲ့ပါတယ်။

ဒါ့အပြင် ကက်စ်မီရိုရဲ့ ဇနီးသည်အန်နာဟာ ယခုလအစောပိုင်းတုန်းကလည်း လော့စ်ဗီးဂက်စ်သို့ သွားရောက်ခဲ့ပါသေးတယ်။

ဒါပေမယ့် ကက်စ်မီရိုဟာ ဥရောပတွင်ပင် ဆက်လက် ကစားသွားရန် ဆန္ဒရှိနေပါတယ်။

မက်ဒရစ်တွင် နေအိမ်ပိုင်ဆိုင်နေဆဲ ဖြစ်တဲ့ ကက်စ်မီရိုဟာ ရီးရဲလ်မက်ဒရစ်ကစားဖော်ဟောင်းလူကာမိုဒရစ်ရှိရာ အေစီမီလန်သို့ ပြောင်းရွှေ့လာနိုင်တယ်လို့လည်း သတင်းများ ထွက်နေပါတယ်။

စက်တင်ဘာလတုန်းက အသက် ၄၀ နှစ်ပြည့်ခဲ့တဲ့ လူကာမိုဒရစ်ဟာ အေစီမီလန်နှင့် တစ်နှစ်စာချုပ်ချုပ်ဆိုထားပေမယ့်လည်း တစ်နှစ်သက်တမ်းတိုးနိုင်မယ့်အချက်ကို ထည့်သွင်းချုပ်ဆိုထားသူ ဖြစ်ပါတယ်။

ကက်စ်မီရိုဟာ ယခုရာသီ ယူနိုက်တက်ရဲ့ ၂၉ ပွဲတွင် ၂၄ ပွဲ ပွဲထွက်ကစားထားသူ ဖြစ်ပြီး ၂ ပွဲမှာ ပွဲပယ်ကြောင့် မကစားနိုင်ခဲ့ခြင်းဖြစ်ကာ တစ်ပွဲမှာ အနားပေးခြင်းခံခဲ့ရတာ ဖြစ်ပါတယ်။

ကက်စ်မီရိုဟာ ယခုရာသီတွင် ယူနိုက်တက်အတွက် ၅ ဂိုးသွင်းထားပြီး ယင်းမှ ၄ ဂိုးမှာ အလွတ်တည်ကန်ဘောမှ သွင်းယူထားတာ ဖြစ်ပါတယ်။

ကက်စ်မီရိုဟာ ဆော်ဒီပရိုလိဂ်ကလပ်များရဲ့ စိတ်ဝင်စားခြင်းလည်း ခံနေရပါသေးတယ်။

ရုပ်ဆိုးအကျည်းတန်တဲ့ ရုန်းရင်းဆန်ခတ်ဖြစ်မှုအတွက် ချဲလ်ဆီးနှင့် ဝက်စ်ဟမ်းကို အက်ဖ်အေ အရေးယူလာ
====================
အက်ဖ်အေဟာ မကြာသေးမီတုန်းက ပရီးမီးယားလိဂ်လန်ဒန်ဒါဘီပွဲစဉ်တွင် ရုပ်ဆိုးအကျည်းတန်တဲ့ ရုန်းရင်းဆန်ခတ်ဖြစ်မှုအတွက် ချဲလ်ဆီးနှင့် ဝက်စ်ဟမ်းတို့အား အရေးယူလာပါတယ်။

စတမ်းဖို့ဒ်ဘရစ်ချ်တွင် ကစားတဲ့ ပွဲစဉ်ရဲ့ ပွဲနှောင်းပိုင်းတွင် နှစ်ဖက်ကစားသမားများ အကြား ရုန်းရင်းဆန်ခတ် ဖြစ်ခဲ့တာ ဖြစ်ပြီး နှစ်သင်းလုံးကို ဒဏ်ရိုက်လာပါတယ်။

ယင်းပွဲတွင် ဝက်စ်ဟမ်းရဲ့ အဒါမာထရာအိုရီနှင့် ချဲလ်ဆီးရဲ့မာ့ခ်ကူကူရယ်လာတို့ ပြဿနာစတက်ရာမှာ ဂျိုအာပီဒရိုလည်း ပါဝင်လာသလို နှစ်ဖက်ကစားသမားများအကြား ရုန်းရင်းဆန်ခတ်ဖြစ်ခဲ့ပါတယ်။

ယခုအခါ အက်ဖ်အေက ကစားသမားများကို ထိန်းသိမ်းနိုင်ခြင်း မရှိမှုအတွက် ချဲလ်ဆီးကို ပေါင် ၃၂၅၀၀၀ နှင့် ဝက်စ်ဟမ်းကို ပေါင် ၃၀၀၀၀၀ အသီးသီး ဒဏ်ရိုက်လာပါတယ်။

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ
************************************
🇲🇲 ရည်ညွှန်းလက်လီဈေးနှုန်းများ
💢ရန်ကုန်မြို့
💢မန္တလေးမြို့
💢နေပြည်တော်
💢တိုင်းဒေသကြီး/ ပြည်နယ်မြို့တော်များ

ဒူးရင်းသီးစားပြီးသောအခါ
အနံ့မခံနိုင်သော ငါ့ညီမနဲ့ငါ

March လ 28 ရက်နေ့မှာထွက်ရှိမယ့် Violet Evergarden Author ရဲ့ Anime အသစ် "Agents of the Four Seasons: Dance of Spring"