ရေလက်ကြားကို ဘေးကင်းစွာဖြတ်သန်းနိုင်အောင်ဆောင်ရွက်ပေးကြောင်း လိမ်လည်ငွေတောင်းနေကြ
ဟော်မုဇ်ရေလက်ကြားကို ဘေးကင်းစွာဖြတ်သန်းနိုင်စေရမည်ဟု ကတိပြုကာ ခရစ်တိုငွေကြေးတောင်းခံသည့် လိမ်ညာလှည့်ဖြားသည့်စာများကို ရေလမ်းကြောင်း၏ အနောက်ဘက်တွင် ပိတ်မိလျက်ရှိသော သင်္ဘောများ၏ သက်ဆိုင်ရာကုမ္ပဏီအချို့ထံ ပေးပို့မှုများရှိနေကြောင်း ဂရိရေကြောင်းအန္တရာယ်စီမံခန့်ခွဲမှုကုမ္ပဏီ Marisks က ပြောကြားခဲ့သည်။
အမေရိကသည် အီရန်ဆိပ်ကမ်းများကို ပိတ်ဆို့ထားဆဲဖြစ်ပြီး အီရန်သည်လည်း အရှေ့အလယ်ပိုင်းစစ်ပွဲမဖြစ်ပွားမီက ကမ္ဘာ့ရေနံနှင့် သဘာဝဓာတ်ငွေ့ရည်၏ ငါးပုံတစ်ပုံခန့် ဖြတ်သန်းသယ်ဆောင်ရာ ဟော်မုဇ်ရေလက်ကြားကို တကျော့ပြန် ပိတ်ဆို့ထားခဲ့သည်။
ရေလက်ကြား၏ ဝင်ထွက်ပေါက်ကို ထိန်းချုပ်ထားသော အီရန်သည် သင်္ဘောများ ဘေးကင်းစွာဖြတ်သန်းနိုင်ရေးအတွက် အခွန်ကောက်ခံမည်ဟု အပစ်အခတ်ရပ်စဲရေး ဆွေးနွေးပွဲများတွင် အဆိုပြုထားသည်။
မည်သူမည်ဝါမှန်း မသိရသူများက အီရန်အာဏာပိုင်များကို ကိုယ်စားပြုသည်ဆိုကာ လမ်းကြောင်းရှင်းလင်းမှုအတွက် ရေလက်ကြားဖြတ်သန်းခများတောင်းခံသည့်စာကို သင်္ဘောကုမ္ပဏီများထံ ပေးပို့ခဲ့သည်ဟု Marisks က ဧပြီ ၂၁ ရက်တွင် သင်္ဘောပိုင်ရှင်များထံ သတိပေးချက် ထုတ်ပြန်ခဲ့သည်။
ထိုစာများသည် လိမ်လည်မှုသာဖြစ်ကြောင်းနှင့် စာသည် အီရန်အာဏာပိုင်များထံမှ ပေးပို့ခြင်းမဟုတ်ကြောင်း ကုမ္ပဏီက ပြောကြားခဲ့သည်။
ယင်းနှင့်ပတ်သက်၍ တေရန်က လတ်တလောတွင် မှတ်ချက်မပေးသေးပေ။
သင်္ဘောရာပေါင်းများစွာနှင့် သင်္ဘောသား ၂၀,၀၀၀ ခန့်သည် ပင်လယ်ကွေ့တွင် ပိတ်မိနေဆဲဖြစ်သည်။
ဧပြီလ ၁၈ ရက် နေ့တွင် အီရန်က စစ်ဆေးမှုများဖြင့် ရေလက်ကြားကို ခေတ္တဖွင့်ပေးခဲ့ချိန်တွင် သင်္ဘောများဖြတ်သန်းရန် ကြိုးစားခဲ့သော်လည်း ရေနံတင်သင်္ဘောတစ်စင်းအပါအဝင် သင်္ဘောနှစ်စင်းသည် အီရန်သင်္ဘောများ၏ ပစ်ခတ်ခြင်းခံခဲ့ရကာ နောက်ကြောင်းပြန်လှည့်ခဲ့ရသည်။
ယင်းနေ့က ရေလက်ကြားမှ ထွက်ခွာရန် ကြိုးပမ်းစဉ် သေနတ်ပစ်ခံခဲ့ရသော သင်္ဘောများထဲမှ အနည်းဆုံးတစ်စင်းသည် လိမ်လည်မှု၏ သားကောင်ဖြစ်ခဲ့သည်ဟု Marisks က ပြောကြားခဲ့သည်။
Ref: သယ်စထရိတ်တိုင်းမ်စ်
