ချော်တွင်းကုန်းမီးပွိုင့်အနီးတွင် ရပ်ထားသည့်ကား(၃) စီးကို ဝင်တိုက်ခဲ့သည့် အိမ်စီးကားမောင်းသူအား မရမ်းကုန်းမြို့မရဲစခန်းတွင်အမှုဖွင့်ထား

ရန်ကုန်တိုင်း၊ မရမ်းကုန်းမြို့နယ်၊ ပါရမီလမ်း၏ ချော်တွင်းကုန်းမီးပွိုင့်အနီးတွင်ရပ်ထားသော ကား(၃)စီးကို အိမ်စီးကားမှဝင်တိုက်မိခဲ့မှု ဒီဇင်ဘာ ၄ ရက်နံနက် ၂ နာ ရီကျော်ခန့်ကဖြစ်ပွားခဲ့ရာ ဝင်တိုက်ခဲ့သည့်အိမ်စီးကားမောင်းသူကို မရမ်းကုန်းမြို့မရဲစခန်း၌အမှုဖွင့်ထားကြောင်း သိရသည်။
Rav 4 ကားမှ Mark 2 (ရွှေငါး)ကား၊ Honda fit ကားနှင့် Suzuki Solio ကားတို့အားပြင်းထန်စွာတိုက်မိခဲ့ရာ Mark 2 ကားမှာကြေမွပျက်စီးမှုများပြားခဲ့ပြီး အခြား ကား(၂)စီးမှာလည်း ပျက်စီးမှုများဖြစ်ပေါ်ခဲ့၍ ထိခိုက်ပျက်စီးခဲ့သည့် ကားပိုင်ရှင်များမှ Rav 4 ကားမောင်းသူအား မရမ်းကုန်းမြို့နယ်ရဲစခန်းတွင်အမှုဖွင့်လှစ်ခဲ့ကြကြောင်း သိရသည်။
" ကျွန်တော်တို့လည်းခံစားရတာပေါ့ဗျာ။ ဒီကားလေးနဲ့ တက္ကဆီဆွဲနေရတာ။ ဝင်ငွေလည်းနစ်နာတယ်။ ကိုယ့်ပိုက်ဆံလည်းစိုက်ထုတ်ပြင်ရဦးမယ်။ အိမ်က ကလေးကိုလည်းကျောင်းပို့ဖို့ခက်သွားတယ်။ ကျူးလွန်သူတွေက သူတို့အမှားအတွက်လေးလေးစားစားတောင်းပန်တာလည်းမရှိဘူး"ဟု Suzuki Solio ကားပိုင်ရှင်က ပေါ်ပြူလာနယူးစ်ကိုပြောသည်။
ဖြစ်စဥ်တွင်ဝင်တိုက်ခဲ့သည့် Rav 4 ကားအား သက်ဆိုင်ရာတာဝန်ရှိသူများက တရားရင်ဆိုင်နေချိန်တွင် ခေတ္တထိန်းသိမ်းထားကာ တိုက်ခံရသောကား(၃)စီးအား ပိုင်ရှင်ဖြစ်သူများမှသာ ပြန်လည်ပြင်ဆင်ရမည်ဖြစ်သည့်အပြင် ဖြစ်စဥ်ဖြစ်ပွားချိန်က ကားများအားကရိန်းဖြင့်ဆွဲရသဖြင့် ကရိန်းဆွဲခကုန်ကျစရိတ်များကိုလည်း ပေးချေရမည်ဖြစ်ကြောင်း သိရသည်။
ယခုကာလသည် ရန်ကုန်မြို့ပေါ်၌ ယာဉ်အန္တရာယ်ကင်းစင်ရေးအတွက်အထူးကြပ်မတ်စောင့်ကြည့်နေသောကာလဖြစ်သည်။ ယာဉ်တိုက်မှုဖြစ်ပွားသောအချိန်မှာ ညမထွက်ရအချိန်အကန့်အသတ်အတွင်းဖြစ်ပွားခဲ့ခြင်းဖြစ်သည်။

ရွေးကောက်ပွဲကို လူအခွင့်အရေးကော်မရှင် စောင့်ကြည့်မည်

မကြာမီကျင်းပမည့် ပါတီစုံ ဒီမိုကရေစီအထွေထွေရွေးကောက်ပွဲတွင် လွတ်လပ်ပြီးတရားမျှတသည့် ရွေးကောက်ပွဲတစ်ရပ်ဖြစ်စေရေးတို့အတွက် မြန်မာနိုင်ငံအမျိုးသားလူအခွင့်အရေးကော်မရှင်မှ စောင့်ကြည့်မည် ဖြစ်ကြောင်း သိရသည်။
ကော်မရှင်မှ စောင့်ကြည့်လေ့လာရေးလုပ်ငန်းစဉ်များကို သတ်မှတ်ထားသည့် စည်းကမ်းများ နှင့်အညီ ဆောင်ရွက်သွားမည်ဖြစ်ကြောင်း လူအခွင့်အရေးနေ့နှင့်ပတ်သက်ပြီး ဒီဇင်ဘာ(၁၀)ရက်နေ့ ထုတ်ပြန်ချက်တွင် ထည့်သွင်းဖော်ပြခဲ့ခြင်းဖြစ်သည်။
၂၀၂၅ အထွေထွေရွေးကောက်ပွဲ အပိုင်း(၁)ကို ဒီဇင်ဘာ(၂၈)ရက်နေ့မှာ စတင်ကျင်းပမည်ဖြစ်ပြီး အပိုင်း(၂)ကို ၂၀၂၆ ဇန်နဝါရီ (၁၁)ရက်နေ့တွင် ကျင်းပမည်ဖြစ်ကြောင်း ပြည်ထောင်စုရွေးကောက်ပွဲကော်မရှင်က အသိပေးထားသည်။
ယခုအချိန်တွင် ဒုတိယအကြိမ် မဲစာရင်းကို ကြေညာထားပြီး ပြည်ပနိုင်ငံများတွင်လည်း ကြိုတင်ဆန္ဒမဲပေးခြင်းများကို လုပ်ဆောင်နေပြီလည်း ဖြစ်သည်။

ငွေကြေးခဝါချမှုနှင့်အကြမ်းဖက်မှုကို ငွေကြေးထောက်ပံမှုတိုက်ဖျက်ရေးလုပ်ငန်းများ ပိုမိုထိရောက်စွာ ဆောင်ရွက်နိုင်ရေး ထိုင်းနိုင်ငံမှ ကူညီမည်

ငွေကြေးခဝါချမှုနှင့်အကြမ်းဖက်မှုကို ငွေကြေးထောက်ပံမှု တိုက်ဖျက်ရေးလုပ်ငန်းများကို ပိုမိုထိရောက်စွာ အကောင်ထည်ဖော်ဆောင်ရွက်နိုင်ရေးအတွက် ထိုင်းနိုင်ငံ ၊ငွေကြေးခဝါချမှု တိုက်ဖျက်ရေးရုံးမှ သင်တန်းနှင့် နည်းပညာအကူအညီပေးအပ်မည်ဖြစ်ကြောင်း မြန်မာနိုင်ငံတော်ဗဟိုဘဏ်ဥက္ကဋ္ဌ ဒေါ်သန်းသန်းဆွေက ပြောသည်။
ယမန်နေ့က ကျင်းပသည့် ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံမှု တိုက်ဖျက်ရေးလုပ်ငန်းဖွဲ့ ညိနှိုင်းအစည်းဝေးတွင် မြန်မာနိုင်ငံတော်ဗဟိုဘဏ်ဥက္ကဋ္ဌ ၊ ငွေကြေးခဝါချမှု နှင့် အကြမ်းဖက်မှုကို ငွေကြေးထောက်ပံမှု တိုက်ဖျက်ရေးလုပ်ငန်းအဖွဲ့ ဥက္ကဌ ဒေါ်သန်းသန်းဆွေက အထက်ပါအတိုင်း ပြောကြားခဲ့ခြင်းဖြစ်သည်။
ထိုင်းနိုင်ငံမှ ကူညီပေးမည့်ကိစ္စနှင့်ပတ်သက်ပြီး စီစဉ်ထားရှိရမည့်အခြေအနေများကိုလည်း ပြောကြားခဲ့ကြောင်း သိရသည်။
မြန်မာနိုင်ငံအနေဖြင့် ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံမှုတိုက်ဖျက်ရေး အကောင်ထည်ဖော်မှုဆိုင်ရာ (၁၆)ကြိမ်မြောက် တိုးတက်မှုအစီရင်ခံစာအပေါ် အာရှပစိဖိတ်ဒေသပူးတွဲအဖွဲ့ (APJG) မှ အကဲဖြတ်သူများ၏ ထပ်မံမေးမြန်း အကြံပြုချက်များကို ထိရောက်မှန်ကန်စွာ ပြန်လည်ရှင်းလင်း ဖြေကြားနိုင်ရေးအတွက် လိုအပ်သည့်အချက်အလက်များနှင့် ထပ်မံဖြည့်စွက်ဖြေကြားရမည့် အချက်အလက်များကိုလည်း ကြိုတင်ပြင်ဆင်ထားရန် ဒေါ် သန်းသန်းဆွေက‌ ပြောကြားခဲ့သည်။
အဆိုပါ (၁၆)ကြိမ်မြောက် တိုးတက်မှုအစီရင်ခံစာအပေါ် မေးမြန်းထားသည့် မေးခွန်းများနှင့် ပြင်ဆင်ဆောင်ရွက်မှုများကိုလည်း ဆွေးနွေးမှုများလုပ်ဆောင်ခဲ့ကြောင်း သိရသည်။

ရိုးရာခြင်းလုံးအားကစား (Linking) အမျိုးအစားများ စတင်ယှဉ်ပြိုင်နေ၊ မြန်မာ့လက်ရွေးစင် အမျိုးသား၊ အမျိုးသမီးအသင်းတို့ ဗိုလ်လုပွဲယှဉ်ပြိုင်နေ

(၃၃) ကြိမ်မြောက် အရှေ့တောင်အာရှအားကစား ပြိုင်ပွဲကြီး၌ ရိုးရာခြင်းလုံးအားကစား (Linking) အမျိုးအစားများကို ယနေ့ (ဒီဇင်ဘာ ၁၀) တွင် စတင်ယှဉ်ပြိုင်နေရာ မြန်မာ့လက်ရွေးစင် အမျိုးသား၊ အမျိုးသမီးအသင်းတို့ ဗိုလ်လုပွဲတွင် ယှဉ်ပြိုင်နေကြောင်း သိရသည်။
ဗိုလ်လုပွဲကို Readers Channel နှင့် Pyone Play Application တွင် တို-က်ရို-က်ထုတ်လွှင့်ပြသနေသည်။
ထိုပွဲများကို ထိုင်းနိုင်ငံ ဗန်ကောက်မြို့ရှိ Nakhonpathom Sport Center ၌ကျင်းပလျက်ရှိနေခြင်းလည်း ဖြစ်သည်။
ရိုးရာခြင်းလုံး အမျိုးသမီးပြိုင်ပွဲ အသင်းလိုက်အုပ်စုပတ်လည်ပွဲစဉ် Linking (Event 3) ပြိုင်ပွဲတွင် မြန်မာ၊ ထိုင်း၊ မလေးရှားအသင်း လာအိုအသင်းတို့ ယှဉ်ပြိုင်ခတ်ကစားခဲ့ရာ ထိုင်းအသင်းကရမှတ် ၉၄ မှတ်၊ လာအိုအသင်းက ရမှတ် ၃၁၇ မှတ်၊ မြန်မာအသင်းက ရမှတ် ၄၆၁ မှတ်၊ မလေးရှားအသင်းမှ ရမှတ် ၁၁၈ မှတ် ရရှိခဲ့သည့်အတွက် မြန်မာအမျိုးသမီးအသင်းအနေဖြင့် ရမှတ်အများဆုံး ရရှိထားပြီးဖြစ်သည်။
ရိုးရာခြင်းလုံး အမျိုးသားပြိုင်ပွဲ အသင်းလိုက်အုပ်စုပတ်လည်ပွဲစဉ် Linking (Event 3) ပြိုင်ပွဲတွင် မြန်မာ၊ ထိုင်း၊ မလေးရှားအသင်း၊ လာအိုအသင်းနှင့် အရှေ့တီမောအသင်းတို့ ယှဉ်ပြိုင်ခတ်ကစားခဲ့ရာ ထိုင်းအသင်းက ရမှတ် ၅၀၁ မှတ်၊ လာအိုအသင်းက ရမှတ် ၄၁၀ မှတ်၊ မြန်မာအသင်းက ရမှတ် ၅၄၅ မှတ်၊ မလေးရှားအသင်းက ရမှတ် ၁၆၇ မှတ်နှင့် အရှေ့တီမောအသင်းက ရမှတ် ၆၈ မှတ်တို့ အသီးသီး ရရှိခဲ့သည့်အတွက် မြန်မာအမျိုးသားအသင်းအနေဖြင့် ရမှတ်အများဆုံး ရရှိထားပြီးဖြစ်သည်။

ဗီယက်နမ်နဲ့ ရင်ဆိုင်ဖို့ မြန်မာအမျိုးသမီးဘောလုံးအသင်း ကြိုတင်ပြင်ဆင် လေ့ကျင့်နေ

မြန်မာအမျိုးသမီးအသင်းဟာ အုပ်စု B နောက်ဆုံးပွဲစဥ်အဖြစ် ဗီယက်နမ်အသင်းနဲ့ မနက်ဖြန် ဒီဇင်ဘာ ၁၁ ရက်နေ့ ညနေ ၃ နာရီ မိနစ် ၃၀ အချိန် ထိုင်းနိုင်ငံမှာ ယှဥ်ပြိုင်ကစားရမှာဖြစ်လို့ ဒီကနေ့ ကြိုတင်ပြင်ဆင် လေ့ကျင့်နေပြီ ဖြစ်ပါတယ်။
မလေးရှား အသင်းနဲ့ ထိုင်းနိုင်ငံ၊ ချွန်ဘူရီမြို့က၊ ချွန်ဘူရီအားကစားကွင်းမှာ ဒီဇင်ဘာ ၈ ရက် ညနေ ၃ နာရီ ၃၀ မိနစ် က ယှဥ်ပြိုင်ကစားခဲ့တဲ့ပွဲမှာ မလေးရှားအသင်းကို ၃ ဂိုးပြတ် အနိုင်ရရှိခဲ့ပြီး အုပ်စုအဆင့်မှာ ရမှတ် ၆ မှတ်နဲ့ ရပ်တည်နေပါတယ်။
ဗီယက်နမ်အသင်းက ရမှတ် ၃ မှတ်၊ ဂိုးအရေတွက် အများဆုံးနဲ့ အုပ်စုရဲ့ ဒုတိယနေရာမှာ ရပ်တည်နေပေမယ့်လို့ ဒီပွဲမှာ ဗီယက်နမ်အသင်းကို အရှုံးပေးလို့မရတဲ့ အနေအထားဖြစ်နေပါတယ်။
ဗီယက်နမ်အသင်းနဲ့ ကစားမယ့်ပွဲမှာ မြန်မာအမျိုးသမီးဘောလုံးအသင်း အနေနဲ့ သရေကျအောင် ကစားတာနဲ့ အနိုင်ကန်မှသာ အုပ်စုဗိုလ်အဖြစ်နဲ့ နောက်တဆင့်ကို တက်လှမ်းနိုင်မှာဖြစ်ပါတယ်။
၃၃ ကြိမ်မြောက် ဆီးဂိမ်းစ် အမျိုးသမီးဘောလုံးပြိုင်ပွဲမှာ နိုင်ငံပေါင်း ၈ နိုင်ငံက နိုင်ငံကိုယ်စားပြု အမျိုးသမီးဘောလုံးအသင်း ၈ သင်း ပါဝင်ယှဥ်ပြိုင်တာဖြစ်ပြီး အုပ်စု A နဲ့ B Group နှစ်ခု ခွဲထားပါတယ်။
အုပ်စု A မှာ ထိုင်း၊ ကမ္ဘောဒီးယား၊ စင်ကာပူ၊ အင်ဒိုနီးရှား၊ စင်ကာပူ နိုင်ငံကိုယ်စားပြု အမျိုးသမီးဘောလုံးအသင်းတွေဖြစ်ကြပြီး မြန်မာအမျိုးသမီးအသင်းဟာ လက်ရှိချန်ပီယံ ဗီယက်နမ်၊ ဖိလစ်ပိုင်၊ မလေးရှားအသင်းတို့နဲ့အတူ အုပ်စု(မှာ ကျရောက် နေပါတယ်။
၂၀၂၅ Womens Football ပြိုင်ပွဲကို ၂၀၂၅ ဒီဇင်ဘာ ၄ ရက်ကနေ ၂၀၂၅ ဒီဇင်ဘာ ၁၇ ရက်နေ့အတွင်း ကျင်းပမှာ ဖြစ်တယ်။
ပြိုင်ပွဲရဲ့ Final အဆုံးဖြတ်ပွဲကို ၂၀၂၅ ခုနှစ် ဒီဇင်ဘာ ၁၇ ရက်နေ့မှာ ထိုင်းနိုင်ငံက Chonburi Stadium မှာ ကျင်းပမှာဖြစ်တယ်။

ခွေးရူးပြန် ကာကွယ်ဆေးထိုးပြီးနောက် ကလေးငယ် သေဆုံးမှု ပခုက္ကူက သပြေညို ယာယီချိတ်ပိတ် စစ်ဆေးခံနေရ

ပခုက္ကူမြို့နယ်ရှိ " သပြေညို ဆေးရုံ " က
ခွေးရူးပြန် ရောဂါကာကွယ်ဆေး ထိုးနှံပေးမှုကြောင့် အသက် ၈ နှစ်အရွယ် ကလေးငယ် သေဆုံးမှု ဖြစ်ပွားခဲ့တယ်လို့ မြို့ခံတွေ ဆီကသိရပါတယ်။
ဒီကိစ္စကြောင့်" သပြေညို ဆေးရုံ " ကိုတော့ မနေ့က ဒီဇင်ဘာ ၈ ရက်မှာ ကျန်းမာရေးဝန်ကြီးဌာနက တာဝန်ရှိသူတွေ လာရောက်ပြီး ယာယီချိတ်ပိတ်ကာ စစ်ဆေးမှုတွေ လုပ်ဆောင်နေတယ်လို့ သိရပါတယ်။
" ကလေးဆုံးတော့ ဆေးရုံက မိဘတွေကို သိန်း ၁၀၀ နဲ့ညှိတယ်သိရတယ် ။ သက်ဆိုင်ရာကို မတိုင်ဖို့ပေါ့ ။ ကလေးမိဘတွေက လက်မခံဘူး ။ တဦးတည်းသော ကလေး ဖြစ်နေ တယ်။ပြောကြတာတော့ ကလေးကို ခွေးရူးပြန်ဆေး နဲ့ မြွေဆိပ်ဖြေဆေး မှားထိုးတယ်ဆိုပြီး မြို့ထဲ သတင်းထွက်နေတယ်။ ဒါပေမယ့် ဆေးရုံကကျတော့ ဆေးတွေရဲ့ သိုလှောင်မှု မကောင်းလို့ ပိုးမွှားဝင်တယ်လို့ ဆေးရုံအနီးနားက ပြောကြတယ် ။ ဆေးရုံကိုတော့ မနေ့က ပိတ်သွားပြီ ။ ပြည်သူ့ဆေး ရုံအုပ်ကြီးလည်း လာတာတွေ့တယ်။ ကျန်းမာရေးဘက်က လာပိတ်သွားတာ ။ အဲဒီ ခွေးရူးပြန် ရောဂါကာကွယ်ဆေး မှားထိုးတဲ့ ဖြစ်စဥ်ကြောင့် ပိတ်တာလို့ သိရတယ် ။ " လို့ ဖြစ်စဥ် သိရှိတဲ့ ဒေသခံက ပြောပါတယ်။
သေဆုံးခဲ့တဲ့ ကလေးငယ်ကတော့ ရေစကြိုမြို့နယ် ၊ရွာသစ်ရွာက ဖြစ်ပြီး ခွေးကိုက်ခံရတာကြောင့် ပခုက္ကူမြို့ပေါ်ရှိ သပြေညို ဆေးရုံကို ခွေးရူးပြန်ရောဂါ ကာကွယ်ဆေးထိုးနှံတာဖြစ်ကြောင်း ၊ ပထမအကြိမ်လည်း အဲဒီဆေးရုံမှာပဲ ထိုးနှံခဲ့ပြီး ယခု ဒုတိယအကြိမ် ထိုးနှံချိန်မှာ ကလေးငယ်သေဆုံး ခဲ့ရတာ ​ဖြစ်တယ်လို့ ကလေးရဲ့ မိသားစုဝင်က လူမှုကွန်ယက်ကနေ အသိပေး ပြောဆိုထား ပါတယ်။
" ကလေးက ၈ နှစ်ပါ ။ဆေးမတည့်တာ မဟုတ်ဘူး ။မှားထိုးတာပါ ။ ပထမတ လုံးက တသိန်းလေးသောင်းပါ ။ ခုက ဒုတိယကြိမ်မှာ ထိုးပြီး လို့ ငွေရှင်းနေချိန်မှာ ကလေးက မေ့လဲပြီး ဆုံးသွားတာပါ ။ ဆုံးသွားတဲ့ ကလေးက ပြန်ရှင်လာမှာ မဟုတ်ပေမယ့် နောက်လူတွေ ထပ်မဖြစ်အောင် တင်တာပါ ။
ဆုံးသွားတော့ ဆေးစာအုပ်တွေ အကုန် ပြန်သိမ်း သွားပါတယ် ။ "လို့ ကလေးရဲ့ မိသားစုဝင်က သူရဲ့လူမှုကွန်ယက်ကနေ ဒီဇင်ဘာ ၁ ရက်မှာ အသိပေးပြောဆို ထားတာ ဖြစ်ပါတယ်။
ခွေးရူးပြန်ရောဂါ ကာကွယ်ဆေး ထိုးနှံရာမှ ကလေးငယ် သေဆုံးမှု ဖြစ်စဥ်နဲ့ ပတ်သက်ပြီး သိရှိနိုင်ဖို့ သပြေညို ဆေးရုံကို ဖုန်းနဲ့ ဆက်သွယ်ခဲ့ပေမယ့် ဆက်သွယ်လို့ မရခဲ့ပါဘူး ။
အလားတူ ပခုက္ကူ ပြည်သူ့ဆေးရုံအုပ်ကြီး ဆီကိုလည်း ဖုန်းဆက်သွယ်ခဲ့ပေမယ့် ဆက်သွယ်လို့ မရရှိခဲ့ပါဘူး ။
ပခုက္ကူမြို့နယ်မှာတော့ ကျန်းမာရေးပိုင်းနဲ့ ပတ်သက်ပြီး ဆေးစစ်ချက် နဲ့ ကုသမှုအပိုင်း အခြေအနေတွေက မှားယွင်းကာ ဆိုးရွားလာနေကြောင်း ပခုက္ကူ ဒေသခံတွေက ပြောဆိုပါတယ်။
" ပခုက္ကူမှာက ကျန်းမာရေးနဲ့ ပတ်သက်ရင် ကုသမှုအပိုင်းတွေ တော်တော်များများ ဆိုးဝါးနေတယ်။ ဆေးစစ်ချက်တွေ ကုသမှုတွေမှားနေတယ်။ငါကိုဗစ်ဖြစ်တော့ ပခုက္ကူမှာ အဆုတ်ရိုက်ရမှာကို ဆရာဝန်ကြီးက ဒီမှာဆိုမရိုက်နဲ့ ။ပိုက်ဆံတတ်နိုင်ရင် မန္တလေး သွားရိုက်ပါ ။ဒီကစက်တွေက ကြည့်ရတာရမ်းသမ်းကုရတယ် ပြောတယ်။ငါက ကိုယ်တိုင်ခံခဲ့ရတာလေ။ မန္တလေးကို လူနာသွားပို့ ရင်လည်း ဒီကပေးတဲ့ဆေးတွေကို လွှင့်ပစ်တယ်။ လက်တွေ့တွေပေါ့။အခုက ပုဂ္ဂလိကရော အစိုးရဆေးရုံရော အကုန်ဖြစ်နေတာ ။လက်ရှိရှိနေတဲ့ သမားတော်ကြီးတွေကလည်း သူတို့ဆီတကြိမ်တခါမှ မပြဖူးရင် ချက်ခြင်း ကြည့်မပေးဘူး။ငါလေဖြတ်သလိုဖြစ်တော့လည်း သွားပြတော့ ဆရာဝန်ကသူနဲ့ တကြိမ်တခါမှ မပြဖူးလို့ဆိုပြီး နှစ်ပတ်ခွာချိန်းတယ်။ အဲတော့ ငါကအရေးပေါ် ဖြစ်နေပြီလေ ။ " လို့ ကိုယ်တိုင် ကြုံခဲ့ရတဲ့ ဒေသခံက ပြောပါတယ် ။
ပြီးခဲ့တဲ့ ဇူလိုင်လတုန်းကလည်း ပခုက္ကူဆေးရုံကြီးမှာ သွေးလွန်တုပ်ကွေး ရောဂါနဲ့ တက်ရောက် ဆေးကုသမှု ခံယူခဲ့တဲ့ အသက် ၃ နှစ်နဲ့ ၈ လကလေးငယ်မှာ သွေးမှားသွင်း မှုကြောင့် သေဆုံးခဲ့ရတယ်လို့ မြို့ခံ တွေဆီက သိရပါတယ်။
" ကလေးအထူးကု သွားပြတော့ ကလေးက သွေးလွန်တုပ်ကွေး ဖြစ်နေတယ် ။ဆေးရုံကြီး တက်ခိုင်းတယ်။ဆေးရုံရောက်တဲ့အထိ ကလေးက အကောင်း သွားသွားလာလာရှိတယ်။ ဆေးရုံတက် ညနေ ၆ နာရီလောက်မှာ သွေးရမယ်ဆိုပြီး သွေးသွင်းတယ် ။သွေးသွင်းပြီးတော့ ကလေးက ချမ်းတုန်းပြီး ဘာမှမပြောနိုင် မလှုပ်နိုင် မရှားနိုင်တော့ဘူး ။ဆရာဝန်တွေက ဖြေဆေးတွေထိုးတော့ နည်းနည်း ပြန်လည်လာပေမယ့် မရတော့ဘူး ။နောက်နေ့ညကျတော့ ကလေးက ရုန်းကန်ပြီးဆုံးသွားတယ်။ ၃ နှစ်နဲ့ ၈ လကလေးပါ ။ သွေးသွင်းပြီးတော့ပိုဆိုးပြီး ဆုံးသွားတာ ။ သွေးမှားသွင်းတယ် သိရတယ် ။ " လို့ သေဆုံးခဲ့ရတဲ့ ကလေးငယ် မိသားစုနဲ့ နီးစပ်သူက ပြောပါတယ်။
ဒါကြောင့် ပခုက္ကမြို့နယ်မှာ ဖြစ်ပွားနေတဲ့ ကျန်းမာရေး ကဏ္ဍရဲ့ ဆိုးရွားတဲ့ အခြေအနေတွေကို သက်ဆိုင်ရာ တာဝန်ရှိ သူတွေအနေနဲ့ ထိရောက်တဲ့ အရေးယူမှုတွေ ပြုလုပ်ပေးဖို့ အရေးကြီး လိုအပ်နေတယ်လို့ ဒေသခံတွေက ပြောဆိုနေပါတယ်။
လက်ရှိ ပခုက္ကူမြို့မှာ ပုဂ္ဂလိက ဆေးရုံအနေနဲ့ ချမ်းမြေ့ဆေးရုံ ရှိပြီး ပြည်သူ့ဆေးရုံကြီးသာ ရှိတော့ တယ်လို့ သိရပါတယ်။

မန္တလေး - မြစ်ကြီးနား ကုန်ကားတွေ တိုင်းဖြတ်ကျော်ခွင့် လျှောက်ထားမှု ခွင့်ပြုချက်ကျဖို့ ကြန့်ကြာလို့ အခက်ကြုံ

မန္တလေး - မြစ်ကြီးနား ကုန်ကားတွေ တိုင်းဖြတ်ကျော်ခွင့် လျှောက်တာမှာ ခွင့်ပြုချက်ကျဖို့ ကြန့်ကြာလို့ အခက်ကြုံနေရကြောင်း လုပ်ငန်းရှင်တွေဆီက သိရပါတယ်။
"မနေ့က တိုင်း Pass ကျမယ် ဆိုပြီးတော့ မကျလာဘူး။ စောင့်နေတာ ၆ ရက်လောက်ရှိပြီ။ တရက် တရက် ကား တစီးကို စားစရိတ် ငါးသောင်း လောက်ကုန်တယ်" လို့ လုပ်ငန်းရှင် တယောက်က ပြောပါတယ်။
ခါတိုင်း တိုင်းဖြတ်သန်းခွင့် စာရွက် စာတမ်း မလိုပေမယ့် ဒီတခေါက်က ပြည်တွင်းထွက်ကုန်ဖြစ်တဲ့ ဘိလပ်မြေကိုလည်း နယ်လုံ ထောက်ခံချက်နဲ့ တိုင်း/ပြည်နယ် ဖြတ်သန်းခွင့် တင်ခိုင်းတယ်လို့ သူက ပြောပါတယ်။
နယ်လုံ ထောက်ခံစာကို မြစ်ကြီးနား နယ်လုံ ဝန်ကြီးဆီက ယူရပြီး တိုင်း/ပြည်နယ် ဖြတ်သန်းခွင့်ကို နန့်စီးအောင်က တာဝန်ကျ အရာရှိတွေကနေတဆင့် မြောက်ပိုင်းတိုင်းစစ်ဌာနချုပ်ဆီ တင်ရကာ ခွင့်ပြုချက်ရမှာ ကားတွေ သွားလို့ ရတာလို့ ဆိုပါတယ်။
"ရွှေဘိုဘက်တော့ ဘိလပ်မြေတင်ရင် ခါတိုင်း ရဲစခန်းထောက်ခံစာ၊ ရပ်ကွက်ထောက်ခံစာ၊ ဆိုင်ထောက်ခံစာတွေ ပါရင်ရတယ်" လို့ ကုန်တင်ယာဉ်မောင်း တယောက်က ပြောပါတယ်။
ထောက်ခံစာ တမျိုးပါလာရင်လည်း နောက်တမျိုး ထပ်တောင်းပြီး ရစ်တာမျိုး ရှိသလို တောင်းတဲ့ စာရွက်စာတမ်း မပါရင် ငွေတောင်းတယ်လို့ သူက ပြောပါတယ်။
ပြည်တွင်းကုန်စည်တွေ ဖြစ်သလို တရားဝင် အခွန်နဲ့ လာတဲ့ ကုန်ပစ္စည်းတွေ ဖြစ်တာကြောင့် အခုလို ကြန့်ကြာတာဟာ ကုန်သည်လုပ်ငန်းရှင်တွေရော ယာဉ်မောင်းတွေပါ အခက်ကြုံစေတယ်လို့ ဆိုပါတယ်။
ဒါ့အပြင် မန္တလေး - မြစ်ကြီးနား လမ်းကြောင်းမ လမ်းမကြီး အတိုင်း သွားခို့ မရတဲ့ နေရာတွေကိုပါ ကွင်းလမ်း ကနေ သွားရတာကြောင့် ပိုမို ကြန့်ကြာလို့ အခက်ကြုံရကြောင်း ကုန်သည် လုပ်ငန်းရှင်တွေနဲ့ ယာဉ်မောင်း တွေက ပြောပါတယ်။

ပေ ၃၀၀ ခန့် ချောက်အနက်ထဲ ပြုတ်ကျသူကို ခြောက်ရက်​မြောက်မှာ အသက်ရှင်လျက် ကယ်ဆယ်နိုင်ခဲ့

ရှမ်းပြည်နယ် (မြောက်ပိုင်း)၊ ကျောက်မဲမြို့နယ်မှာ ချောက်အနက် ပေ ၃၀၀ ခန့် နေရာအတွင်း ပြုတ်ကျနေသူ အမျိုးသား တယောက်ကို ​ခြောက်ရက်အကြာ မနေ့ ဒီဇင်ဘာ ၈ ရက်မှာ အသက်ရှင်လျက် ကယ်ဆယ်နိုင်ခဲ့တယ်လို့ ကျောက်မဲခရိုင် မီးသတ်ဦးစီးမှူး၊ လက်ထောက် ညွှန်ကြားရေးမှူး ဦးကိုကိုဦးက ပြောပါတယ်။
အဲဒီဖြစ်စဉ်ဟာ ကျောက်မဲမြို့၊ မန္တလေး - လားရှိုး ပြည်ထောင်စု လမ်းမကြီးဘေး၊ နောင်ပြစ်ကျေးရွာ၊ ပင်ပေါအုပ်စု၊ နမ့်ဆောင်ဟောင်ချောင်း ချောက်ကမ်းပါးမှာ ဖြစ်ပွားခဲ့တာလို့ သိရပါတယ်။
“သူက ပြီးခဲ့တဲ့ ဒီဇင်ဘာ ၃ ရက်နေ့က ရှဉ့်လိုက်ဖမ်းရင်း ချောက်ထဲ ပြုတ်ကျသွားတာ။ ရွာသားတွေက လိုက်ရှာကြရင်း ဒီဇင်ဘာ ၇ ရက်နေ့မှာ ချောက်ကမ်းပါးနား ရောက်လို့ ခေါ်ကြည့်တော့မှ အောက်က ပြန်ထူးသံကြားရတာပေါ့။ အဲဒီအခါကျမှ အောက်မှာ လူရှိတယ်ဆိုတဲ့အကြောင်း အတည်ပြုပြီးမှ ကျွန်တော်တို့ဆီ အကြောင်းကြားကြတာ။ အမှန်တော့ အဲဒီချောက်က ပေ ၁၀၀၀ လောက်နက်တာ။ သူတော်တော် ကံကောင်းလို့သာ ပေ ၃၀၀ အနက်လောက်က လှေခါးထစ်လို နေရာလေးမှာ တင်နေတာ” လို့ ဦးကိုကိုဦးက ပြောပါတယ်။
ကျောက်မဲခရိုင်/မြို့နယ် မီးသတ်စခန်းအနေနဲ့ လူတယောက် ချောက်ထဲ ပြုတ်ကျနေတဲ့အကြောင်း ပြီးခဲ့တဲ့ ဒီဇင်ဘာ ၇ ရက်နေ့၊ ညနေ ၅ နာရီ ၂၀ ဝန်းကျင်လောက်မှာ သတင်းရရှိခဲ့တာဖြစ်တယ်လို့ သိရပါတယ်။
ဒါကြောင့် မီးသတ်တပ်ဖွဲ့အနေနဲ့ လူနာတင်ယာဉ်တစီး၊ အုပ်ချုပ်မှုယာဉ် တစီးနဲ့ အခင်းဖြစ်နေရာကို သွားရောက်ခဲ့တာမှာ ညနေ ၆ နာရီခွဲဝန်းကျင်မှာ ရောက်ရှိခဲ့ပြီး နောင်ချိုမြို့နယ် မီးသတ်စခန်းတို့မှ ရှာဖွေကယ်ဆယ်ရေး တပ်ဖွဲ့ဝင်တွေနဲ့ ကယ်ဆယ်ရေး လုပ်ငန်းတွေ စတင် လုပ်ဆောင်ခဲ့တယ်လို့ သိရပါတယ်။
“အဲဒီ ၇ ရက်နေ့မှာ ရွာသားတွေက အောက်ကို ရေဘူးတွေဘာတွေ ပစ်ချပေးထားတယ်။ အဲဒီနေ့ ညမှာပဲ ကျွန်တော်တို့ အလုပ် စလုပ်တယ်။ ကျွန်တော်တို့ ခရိုင်က တပ်ကြပ်ကြီး သန်းလှိုင်ကို တောင်အောက်ကို ဆင်းခိုင်းပြီး လူနာအခြေအနေ အရင်ကြည့်တယ်။ လူနာအတွက် ရေတွေ၊ မုန့်တွေနဲ့ အနွေးထည်တွေပါ တခါတည်း ယူသွားခိုင်းတယ်။ ဒါပေမယ့် ညတွင်းချင်း ကယ်ဖို့က အခြေအနေက အဆင်မပြေဘူး” လို့ သူက ပြောပါတယ်။
အဲဒီ အခင်းဖြစ်နေရာဟာ ကမ်းပါးယံတွေလည်း ရှိသလို လှိုဏ်ခေါင်းတွေလည်း လေးနေရာလောက် ရှိနေပြီး ခြုံနွယ်၊ သစ်ကိုင်းတွေလည်း ထူထပ်နေတာကြောင့် မြေပြင် အခြေအနေအရ ကယ်ဆယ်ရေး လုပ်ဆောင်သူရော၊ လူနာပါ အန္တရာယ်ရှိနိုင်တဲ့ အနေအထား ဖြစ်နေတယ်လို့ ဆိုပါတယ်။
ဒါကြောင့် လူနာကို နှစ်သိမ့် အားပေးမှုတွေ လုပ်ဆောင်ခဲ့ပြီး တညစောင့်ကာ နောက်တနေ့ ဒီဇင်ဘာ ၈ ရက်၊ နေ့လယ် ၁၂ နာရီ ၅ မိနစ်ဝန်းကျင်မှာ ကယ်ဆယ်ရေး လုပ်ငန်းတွေ ပြန်လည် လုပ်ဆောင်ခဲ့တယ်လို့ သူက ပြောပါတယ်။
“တကယ်တမ်း ကယ်ဆယ်ရေး လုပ်တော့ ကျွန်တော်တို့ဆီမှာ တောင်တွေဘာတွေနဲ့ ပတ်သက်လို့ ကယ်ဆယ်ရေးလုပ်တဲ့ ပစ္စည်းတွေက မရှိဘူး။ ပစ္စည်းတွေက ၁၀၂၇ တုန်းက ပျောက်သွားတယ်။ ဒါကြောင့် ဝါးပိုးဝါးတွေ ခုတ်တယ်။ သီပေါမှာရှိတဲ့ double ပူလီတွေ၊ ကြိုးတွေ သွားယူတယ်။ ကျွန်တော်တို့ဆီမှာရှိတဲ့ ကြိုးအဟောင်းတွေနဲ့ နောင်ချိုမှာရှိတဲ့ လက်ကျန်ပစ္စည်းနဲ့ အသက်ကယ်ကွင်းတွေနဲ့ ပူးပေါင်းပြီး တောင်စောင်းတွေမှာ ကယ်တဲ့ပစ္စည်းတွေနဲ့ ပုံသဏ္ဍာန်တူပေါ့၊ ဝါးပိုးဝါးတွေနဲ့ ထောင်ပြီး လုပ်ကြရတယ်” လို့ သူက ပြောပါတယ်။
အဲဒီနောက် double ပူလီတွေ အသုံးပြုပြီး ဝန်အား လျှော့ချတဲ့ နည်းစနစ်နဲ့ ကြိုးလိုင်း နှစ်လိုင်းကို ဆင်ကြရာမှာ တလိုင်းက ကယ်တင်တဲ့သူအတွက်၊ တလိုင်းက လူနာအတွက်ဖြစ်ပြီး တပ်ကြပ်ကြီးသန်းလှိုင်ကပဲ ချောက်အတွင်းကို တဦးတည်း ထပ်မံဆင်းကာ ကယ်ဆယ်ရေး လုပ်ဆောင်ခဲ့တာ ဖြစ်တယ်လို့ ဆိုပါတယ်။
“နေ့လယ် ၁ နာရီလောက်မှာ လူနာဆီကို ရောက်သွားတယ်။ လူနာကို နှစ်သိမ့်အားပေးပြီး လူနာက တက်နိုင်တဲ့အား ရှိပြီဆိုတာနဲ့ ဆွဲတင်ဖို့ ကျွန်တော်တို့ ဆုံးဖြတ်တယ်။ ၁ နာရီ၊ မိနစ် ၅၀ လောက်မှာ လူနာကို တောင်ပေါ်ကို စပြီး ဆွဲတင်တယ်။ ဆွဲတင်တဲ့အခါမှာ ကယ်တဲ့သူက လူနာကို ရင်ခွင်မှာပိုက်ပြီး ကယ်လာတာ။ နေ့လယ် ၂ နာရီ ၁၀ မိနစ်လောက်မှာ တော်ပေါ်ကိုရောက်တယ်” လို့ သူက ပြောပါတယ်။
လူနာအနေနဲ့ မေးစေ့နဲ့ မျက်နှာမှာ ပွန်းပဲ့ ဒဏ်ရာလောက်သာ ရရှိခဲ့တာ ဖြစ်တယ်လို့ သိရပြီး အဲဒီနောက် လူနာကို ကျောက်မဲမြို့နယ် မီးသတ်စခန်းမှ သူနာတင်ယာဉ်နဲ့ ကျောက်မဲခရိုင် ပြည်သူ့ဆေးရုံကြီးကို ပို့ဆောင်ပေးခဲ့တယ်လို့ သူက ပြောပါတယ်။
အဲဒီ ကယ်ဆယ်ရေး လုပ်ဆောင်မှုကို ကျောက်မဲခရိုင် မီးသတ်ဦးစီးမှူး၊ လက်ထောက် ညွှန်ကြားရေးမှူး ဦးကိုကိုဦး အပါအဝင် ဦးစီးအရာရှိ နှစ်ယောက်၊ ဒုတိယဦးစီးမှူး နှစ်ယောက်နဲ့ ခရိုင်တပ်ကြပ်ကြီးတွေအပြင် အဖွဲ့ဝင်အင်အား ၁၇ ယောက်က ဆောင်ရွက်ခဲ့တာ ဖြစ်ပြီး ဒေသခံ ၁၅၀ ကျော်ကလည်း ဝိုင်းဝန်း ကူညီခဲ့ကြတယ်လို့ သိရပါတယ်။

လသာမြို့နယ်က ရွှေဇင်ရွှေဆိုင် ဓားပြတိုက်သူနဲ့ ကြံရာပါတွေကို ဖမ်းမိ

ရန်ကုန်တိုင်း ၊ လသာမြို့နယ် ၊ အမှတ်(၃)ရပ်ကွက်၊မဟာဗန္ဓုလ လမ်းက " ရွှေဇင်ရွှေဆိုင် " ဓားပြတိုက်သူတွေ ကို ဒီဇင်ဘာ ၉ ရက်နေ့က ဖမ်းဆီးရမိ ခဲ့တယ်လို့ သိရပါတယ်။
ရွေဆိုင်ကို ဓားပြတိုက် လုယက်မှု ကျူးလွန်ခဲ့တဲ့ အမျိုးသား နှစ်ယောက်နဲ့ လုယက်ခဲ့တဲ့ ပစ္စည်းကို လက်ခံသိမ်းဆည်းပေးခဲ့တဲ့ ကြံရာပါ အမျိုးသမီးနဲ့ အမျိုးသား တယောက်တို့ကို ဖမ်းဆီးရမိ ခဲ့တာဖြစ်တယ်လို့ သိရပါတယ်။
ဓားပြတိုက်သူ နှစ်ယောက်ကတော့ သာကေတမြို့နယ်ရှိ Aung Brother လက်ဘက်ရည်ဆိုင် ပိုင်ရှင် အောင်ကိုဇင် ဆိုသူနဲ့ အဖျော်ဆရာ ဆိုသူအမျိုးသားတို့ ဖြစ်တယ်လို့ လုံခြုံရေးတပ်ဖွဲ့နဲ့ နီးစပ်သူဆီက သိရပါတယ်။
" လုတာက နှစ်ယောက်ပါ။ သူတို့ကတော့ သာကေတ ၈ ရပ်ကွက် ကလို့သိရတယ် ။ လုပြီးတဲ့ ပစ္စည်းကိုမှ သိမ်းပေးထားတဲ့ ကြံရာပါက နောက်ထပ်နှစ်ယောက်လို့ သိရတယ်။ ဓားပြတိုက်တာကို ဝန်ခံပြီလို့လည်း သိရတယ်။ ဘယ်လိုပုံစံ ဖမ်းမိတယ်ဆိုတာ မသိရသေးဘူး ။ အဓိက CCTV တွေ အရ စုံစမ်းရာကနေ မိသွားတာလို့တော့ သိရတယ်။ ပစ္စည်းတွေရာ ၊ သေနတ်ရော အကုန် မိတယ် သိရတယ် ။ " လို့ သူကပြောပါတယ်။
လက်ရှိမှာ ဓားပြတိုက်မှု ကျူးလွန်သူတွေကိုတော့ သက်ဆိုင်ရာ နယ်မြေရဲစခန်းမှာ ဖမ်းဆီးထိန်းသိမ်းကာ စစ်ဆေးမှုတွေ လုပ်နေတယ်လို့ သိရတဲ့အတွက် လသာမြို့နယ် ရဲစခန်းကို VOM မှ ဖုန်းနဲ့ ဆက်သွယ်ခဲ့ပေမယ့် " ဖြေကြားလို့ မရသေးကြောင်း " ပြန်လည်ပြောဆိုခဲ့ပါတယ်။
ရွှေဇင်ရွှေဆိုင် ဓားပြတိုက်မှုကတော့ ဒီဇင်ဘာ ၅ ရက်နေ့ မနက်ပိုင်းက ဖြစ်ပွားခဲ့တာ ဖြစ်ပြီး ဓားပြတိုက်လုယက်မှုမှာ ရွှေထည်ပစ္စည်းတွေ နဲ့ ငွေသား ကျပ်သိန်း ၁၀၀၀ လောက် ပါသွားတယ်လို့ သတင်းတွေအရ သိခဲ့ရပါတယ်။
မနက် ၉ နာရီလောက်မှာ ရွှေဆိုင်ဖွင့်ဖို့အတွက် ကားပေါ်ကနေ ရွှေထည်ပစ္စည်းထုတ်တွေ ချစဥ် သေနတ်ကိုင်ထားတဲ့ အမည်မသိ အမျိုးသား နှစ်ယောက် ရောက်ရှိလာပြီး သေနတ်ပြ ခြိမ်းခြောက်ကာ ပစ္စည်းနဲ့ ငွေသားကို လုယက်သွားတာ ဖြစ်ပါတယ် ။

ရုရှားနဲ့ တရုတ်စစ်လေယာဉ်တွေ တောင်ကိုရီးယား လေကြောင်းကာကွယ်ရေးဇုန်ထဲ ဝင်ရောက်

ရုရှားလေယာဉ်ခုနစ်စင်းနဲ့ တရုတ်စစ်ဘက်လေယာဉ်နှစ်စင်းဟာ တောင်ကိုရီးယား လေကြောင်းကာကွယ်ရေးဇုန်ထဲကို ဝင်ရောက်ပြီးနောက် တိုက်လေယာဉ်တွေ စေလွှတ်ခဲ့ရကြောင်း တောင်ကိုရီးယား စစ်တပ်က ပြောပါတယ်။
ရုရှားနဲ့ တရုတ်လေယာဉ်တွေဟာ ဒီဇင်ဘာ ၉ ရက် ဒေသစံတော်ချိန် နံနက် ၁၀ နာရီခန့် ကိုရီးယားလေကြောင်းကာကွယ်ရေးဇုန် (KADIZ)ထဲကို ဝင်ရောက်ခဲ့တာလို့ တောင်ကိုရီးယား ပူးတွဲစစ်ဦးစီးချုပ်များ အဖွဲ့က ထုတ်ပြန်ပါတယ်။
ဒါပေမယ့်လည်း လေယာဉ်တစ်စင်းမျှ တောင်ကိုရီးယားလေပိုင်နက်ကို ကျူးကျော်ဝင်ရောက်ခြင်းမရှိကြောင်း ရုရှားနဲ့ တရုတ်တို့က ဆိုပါတယ်။ တောင်ကိုရီးယားကတော့ အရေးပေါ်အခြေအနေတွေအတွက် ပြင်ဆင်မှုအနေနဲ့ နည်းဗျူဟာမြောက်အစီအမံတွေချမှတ်ဖို့ တိုက်လေယာဉ်တွေ စေလွှတ်ခဲ့ရတယ်လို့ ပြောပါတယ်။
ယွန်ဟတ်သတင်းဌာနရဲ့ အဆိုအရ လေယာဉ်တွေဟာ လေကြောင်းကာကွယ်ရေးဇုန်အတွင်း တနာရီကြာ ဝင်ထွက်သွားလာပျံသန်းခဲ့တယ်လို့‌ ဆိုပါတယ်။ လေကြောင်း ကာကွယ်ရေးဇုန်ဟာ လေပိုင်နက်သတ်မှတ်ထားတဲ့ ဧရိယာကို မရောက်မီ လုံခြုံရေးအကြောင်းပြချက်အရ နိုင်ငံတွေရဲ့ လေယာဉ်တွေကို စောင့်ကြည့်တဲ့ ဧရိယာအဖြစ် သတ်မှတ်ထားတဲ့နေရာဖြစ်ပါတယ်။
တရုတ်ကာကွယ်ရေးဝန်ကြီးဌာနရဲ့ နောက်ပိုင်းမှာတော့ နှစ်စဉ်ပူးပေါင်းဆောင်ရွက်မှုအစီအစဉ်တွေ အရ ရုရှားစစ်တပ်နဲ့ လေ့ကျင့်မှုတွေ ပြုလုပ်ခဲ့တယ်လို့ ဆိုပါတယ်။ လေ့ကျင့်ခန်းမှုတွေကို အင်္ဂါနေ့မှာ အရှေ့တရုတ်ပင်လယ်နဲ့ အနောက်ပစိဖိတ်သမုဒ္ဒရာ‌ဒေသတို့မှာ ပြုလုပ်ခဲ့ပြီး ဒါဟာ ၁၀ ကြိမ်မြောက် ပူးတွဲမဟာဗျူဟာမြောက်လေကြောင်းကင်းလှည့် လေ့ကျင့်မှုလို့ ပြောပါတယ်။
၂၀၁၉ ခုနှစ်မှစပြီး တရုတ်နဲ့ ရုရှားတို့ဟာ ပူးတွဲလေ့ကျင့်မှုတွေအတွင်း ကြိုတင်အသိပေးခြင်းမရှိဘဲ တောင်ကိုရီးယား လေကြောင်းကာကွယ်ရေးဇုန်ထဲကို စစ်လေယာဉ်တွေ ပျံသန်းလေ့ရှိပါတယ်။ ပြီးခဲ့တဲ့နှစ် နိုဝင်ဘာလကလည်း တရုတ်စစ်လေယာဉ် ငါးစင်းနဲ့ ရုရှားစစ်လေယာဉ် ခြောက်စင်းတို့ ဝင်ရောက်မှုကြောင့် တောင်ကိုရီးယား တိုက်လေယာဉ်တွေ စေလွှတ်ခဲ့ရပါတယ်။