ဘောလုံးအေးဂျင့်တစ်ဦးရဲ့ ခြိမ်းခြောက်ခံခဲ့ရတဲ့ အူဒိုဂီကို ကြည့်ရှုစောင့်ရှောက်ပေးထားကြောင်း စပါးအသင်း ကြေညာ

စပါးအသင်းက ပြီးခဲ့တဲ့ စက်တင်ဘာလအတွင်း ဘောလုံးအေးဂျင့်တစ်ဦးရဲ့ သေနတ်နဲ့ ခြိမ်းခြောက်ခြင်းခံခဲ့ရတဲ့ အီတလီနောက်ခံလူ အူဒိုဂီကို ကြည့်ရှုစောင့်ရှောက်ပေးထားကြောင်း ကြေညာခဲ့ပါတယ်။

အသက်(၂၂)နှစ်သာရှိသေးတဲ့ အီတလီဘယ်နောက်ခံလူ အူဒိုဂီဟာ ၂၀၂၂ နွေရာသီမှာ စပါးအသင်းဆီ ယူရိုသန်း(၂၀)နဲ့ ပြောင်းရွှေ့ခဲ့သူဖြစ်ပြီး ၂၀၂၂-၂၃ ရာသီမှာ အူဒီးနီးစ်အသင်းဆီ အငှားပြန်ကစားခဲ့ပေမဲ့ နောက်ရာသီကစပြီး စပါးအသင်းမှာ ကစားနေခဲ့တာပါ။

အူဒိုဂီရဲ့ အေးဂျင့်ဖြစ်သူက စက်တင်ဘာ(၆)ရက်နေ့မှာ အူဒိုဂီကို သေနတ်ပြခြိမ်းခြောက်ပြီး ယူရို(၇၀၀၀၀၀)ဝန်းကျင် ငွေညှစ်ခဲ့ခြင်းဖြစ်ကြောင်း သိရပါတယ်။

ဗြိတိန်မီဒီယာတွေက ပရီးမီးယားလိဂ်ကစားသမားတစ်ဦး ခြိမ်းခြောက်ငွေညှစ်ခံခဲ့ရကြောင်းသာ ဖော်ပြခဲ့ပေမဲ့ အင်္ဂါနေ့မှာ စပါးအသင်းက အူဒိုဂီနဲ့ မိသားစုကို အဲဒီဖြစ်ရပ် ဖြစ်ပွားချိန်ကတည်းက ကြည့်ရှုစောင့်ရှောက်ပေးထားကြောင်းနဲ့ ဥပဒေရေးရာကိစ္စဖြစ်တာကြောင့် နောက်ထပ်မှတ်ချက်မပေးလိုကြောင်း ကြေညာချက် ထုတ်ပြန်ပြီး အသိပေးခဲ့တာပါ။

အူဒိုဂီကို ခြိမ်းခြောက်ခဲ့တဲ့ အသက်(၃၁)နှစ်အရွယ် အေးဂျင့်ကို စက်တင်ဘာ(၈)ရက်ကတည်းက ဖမ်းဆီးထိန်းသိမ်းထားပြီး စုံစမ်းစစ်ဆေးမှု ပြုလုပ်နေကြောင်း မက်ထရိုပိုလီတန်ရဲတပ်ဖွဲ့ကလည်း အတည်ပြုခဲ့ပါတယ်။

နိုဗိုစီဗစ်ဒေသမှ “မဟာရုရှားနှင့် ဆိုက်ဘေးရီးယား”အ မည်ရှိ ပဒေသာကပွဲကို နေပြည်တော်၌ဖျော်ဖြေကပြ

နိုဗိုစီဗစ်နှင့် မြန်မာကြား ကဏ္ဍစုံပူးပေါင်းဆောင်ရွက်မှုကိုပိုမိုမြှင့်တင်သွားမည်ဟု ယာယီသမ္မတပြောကြား
ရုရှားနိုင်ငံ၊ နိုဗိုစီဗစ်ဒေသမှ နိုဗိုစီဗစ် “Chaldony” State Song and Dance Ensemble အဖွဲ့မှ “မဟာရု ရှားနှင့် ဆိုက်ဘေးရီးယား”အမည်ရှိ ပဒေသာကပွဲကို ယနေ့ နိုဝင်ဘာ ၄ ရက်မွန်းလွဲပိုင်းက နေပြည်တော်ရှိမြန်မာအပြည်ပြည်ဆိုင်ရာကွန်ဗင်းရှင်းဗဟိုဌာန(၁)၌ ဖျော်ဖြေကပြခဲ့ကြောင်း သိရသည်။

အဆိုပါ ကပြဖျော်ဖြေမှုကို နိုင်ငံတော်ယာယီသမ္မတ၊ နိုင်ငံတော်လုံခြုံရေးနှင့်အေးချမ်းသာယာရေးကော်မ ရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်နှင့် ဇနီးတို့တက်ရောက်ခဲ့ကြပြီး ယာယီသမ္မတမှ ကာကွယ်ရေး၊ ပ ညာရေး၊ သိပ္ပံ၊ နည်းပညာ၊ ကျန်းမာရေးနှင့် ယဉ်ကျေးမှု အပါအဝင်နယ်ပယ်များစွာ၌ အပြန်အလှန်လေးစားမှု၊ နားလည်မှုနှင့် ပူးပေါင်းဆောင်ရွက်မှုတို့အပေါ်အခြေခံပြီး မိမိတို့နှစ်နိုင်ငံသည် ဆယ်စုနှစ်များစွာကြာရှည်ခိုင် မာသည့် ဆက်ဆံရေးကိုတည်ဆောက်ထားပြီးဖြစ်၍ နိုဗိုစီဗစ်နှင့် မြန်မာကြား ကဏ္ဍစုံပူးပေါင်းဆောင်ရွက်မှုကိုပိုမိုမြှင့်တင်သွားမည်ဟုပြောကြားခဲ့ကြောင်း သိရသည်။

ထို့ပြင် ယနေ့ဖျော်ဖြေပွဲမှတစ်ဆင့် နိုဗိုစီဗစ်ဒေသ၏ အ နုပညာရသနှင့် ဆိုက်ဘေးရီးယန်းအနုပညာများကို မြန် မာနိုင်ငံသားများ ကြည့်ရှုခံစားနိုင်ရုံသာမက နှစ်နိုင်ငံပြည်သူများအချင်းချင်းကြား ခိုင်မြဲသည့်ချစ်ကြည်ရင်းနှီးမှုကို ထပ်လောင်းအတည်ပြုနိုင်မည်ဟုလည်းပြောကြားခဲ့ကြောင်း သိရသည်။

ထို့ကြောင့် ယနေ့ဖျော်ဖြေပွဲသည် ယဉ်ကျေးမှုဖလှယ်ရေး၊ ဖျော်ဖြေရေးသက်သက်သာမဟုတ်ဘဲ မိမိတို့နှစ်နိုင်ငံကြား နွေးထွေးရင်းနှီးသည့်ဆက်ဆံရေးကိုများစွာအထောက်အကူဖြစ်စေမည်ကိုယုံကြည်ကာ ရှေ့ဆက် ၍ မိမိတို့ဒေသများကြားဆက်လက်ပူးပေါင်းဆောင် ရွက်မှုနှင့် ချစ်ကြည်ရင်းနှီးမှုအတွက် စိတ်အားထက် သန်မှုများကို ထပ်လောင်းအားဖြည့်နိုင်ပါစေ၊ မြန်မာနှင့် နိုဗိုစီဗစ်ဒေသတို့ကြား ကောင်းမွန်ခိုင်မာပြီး နောင်မျိုးဆက်သစ်များစွာတိုင် ဆက်လက်ရှင်သန်ထွန်းကားပါစေရန် ဆုမွန်ကောင်းတောင်းသည်ဟုလည်းပြောကြားခဲ့ကြောင်း သိရသည်။

ထို့အတူ နိုဗိုစီဗစ်ဒေသအုပ်ချုပ်ရေးမှူးမှလည်း နှုတ် ခွန်းဆက်စကားပြန်လည်ပြောကြားပြီးနောက် ယာယီသမ္မတနှင့် ဇနီး၊ တက်ရောက်လာကြသူများက နိုဗိုစီဗစ် Chaldony State Song and Dance Ensemble အဖွဲ့မှ အနုပညာရှင်များ၊ သာသနာရေးနှင့် ယဉ်ကျေးမှု ဝန် ကြီးဌာန၊ အနုပညာဦးစီးဌာနမှ အနုပညာရှင်များ၏ ဖျော်ဖြေတင်ဆက်မှုများကို ကြည့်ရှုအားပေးခဲ့ကြကြောင်း သိရသည်။

ဖျော်ဖြေတင်ဆက်မှုအပြီး၌ နိုဗိုစီဗစ် Chaldony State Song and Dance Ensemble အဖွဲ့မှ အနုပညာရှင်များက ယာယီသမ္မတနှင့် ဇနီးတို့ထံ ဧည့်ဝတ်ကျေပွန်မှုနှင့် ခင်မင်ရင်းနှီးမှုတို့ကိုကျေးဇူးတင်ပြီး နွေးထွေးမှုနှင့် ပျော်ရွှင်မှုတို့ကို မျှဝေလိုသည့်အနေဖြင့် ရုရှားရိုးရာဓ လေ့ထုံးတမ်းစဉ်လာဖြစ်သည့် ပေါင်မုန့်နှင့် ဆားတို့ကိုယူဆောင်၍ တည်ခင်းဧည့်ခံဂါရဝပြုခဲ့ကြကာ ယာယီသမ္မတနှင့် ဇနီးတို့မှလည်း နိုဗိုစီဗစ် Chaldony State Song and Dance Ensemble အဖွဲ့မှ အနုပညာရှင်များ၊ နိုဗိုစီဗစ်ဒေသအုပ်ချုပ်ရေးမှူးက သာသနာရေးနှင့် ယဉ်ကျေးမှုဝန်ကြီးဌာန၊ အနုပညာဦးစီးဌာနမှ အနုပညာရှင်များအား ဂုဏ်ပြုပန်းခြင်းများပေးအပ်ခဲ့ကြကြောင်း သိရသည်။

ထို့ပြင် Chaldony State Song and Dance Ensemble a အနုပညာရှင်များက မြန်မာနိုင်ငံတော်အတွက်အထူးဖန်တီးထားသည့် “လတ်တီး” သီချင်းဖြင့်လည်းဖျော်ဖြေတင်ဆက်ခဲ့ကြကြောင်း သိရသည်။

KK Park က ထွက်ပြေးတဲ့ ကျားဖြန့်တွေကို အခြားဂိုဏ်းတွေက ပြန်လည်စုဆောင်းနေ

မြန်မာနိုင်ငံမှာ နာမည်ဆိုနဲ့ကျော်ကြားတဲ့ အွန်လိုင်ငွေလိမ်ဂိုဏ်းတွေ အခြေစိုက်ရာ KK Park မကြာသေးမီက ဝင်ရောက်စီးနင်းမှုတွေကြောင့် ထွက်ပြေးနေတဲ့ ကျားဖြန့်စင်တာက အလုပ်သမားတွေဟာ အနီးအနားရှိ အခြားကျားဖြန့်စင်တာတွေမှာ အလုပ်ရဖို့ အလုအယက်ဝင်ရောက် စာရင်းပေးနေကြတယ်လို့ ကျွမ်းကျင်သူတွေနဲ့ အတွင်းလူတွေက AFP သတင်းဌာနကို ပြောပါတယ်။

အွန်လိုင်းလိမ်လည်မှု စင်တာတွေဟာ အရှေ့တောင်အာရှတဝန်းမှာ မှိုလိုပေါက်လာပြီး နှစ်စဉ် ဒေါ်လာဘီလီယံပေါင်းများစွာကို အွန်လိုင်းလိမ်လည်မှုပြုလုပ်ပြီး ရယူနေကြပါတယ်။ အလုပ်သမားများစွာဟာ ကျားဖြန့်စင်တာတွေမှာ လူကုန်ကူးခံရကြောင်း လေ့လာသုံးသပ်သူတွေက ဆိုပေမယ့် အချို့ကတော့ များပြားတဲ့ လုပ်ခလစာကြောင့် ဆန္ဒအလျောက် လုပ်ကိုင်သူတွေလည်း ရှိနေပါတယ်။

အောက်တိုဘာလနှောင်းပိုင်းမှာ ဝင်ရောက်စီးနင်းမှုတွေကြောင့် ထိုင်း-မြန်မာနယ်စပ် မြ၀တီရှိ KK Park မှာ လူ ၁၅၀၀ ကျော် နယ်စပ်ဖြတ်ကျော်ပြီး ထိုင်းနိုင်ငံသို့ ထွက်ပြေးခဲ့ကြပေမယ့်လည်း အများစုမှာ ကျားဖြန့်လုပ်ငန်း အခွင့်အလမ်းအသစ်တွေကို ရှာဖွေရန် ကျန်ရစ်ခဲ့ကြတယ်လို့ AFP ကဆိုပါတယ်။

KK Park ကနေ ထွက်ခွာလာတဲ့ လူရာပေါင်းများစွာဟာ အမေရိကန်ဒေါ်လာ ၁၄၀၀ အထိ လစဉ်လစာရမယ်ဆိုတဲ့ သုံးကီလိုမီတာအကွာမှာရှိတဲ့ သူကျားဖြန့်လုပ်နေတဲ့ ကိုယ်ပိုင်ခြံဝင်းကို အောက်တိုဘာ ၂၃ ရက်မှာ ရောက်ရှိလာခဲ့ကြောင်း ဆန္ဒအလျောက် ကျားဖြန့်လုပ်ကိုင်နေတဲ့ တရုတ်နိုင်ငံသားတယောက်က AFP ကိုပြောပါတယ်။

လုံခြုံရေးအကြောင်းပြချက်ကြောင့် အမည်မဖော်လိုသူ အဲဒီအမျိုးသားပြောဆိုချက်အရ သူအလုပ်လုပ်ကိုင်တဲ့ နေရာဟာ ထိုင်းနယ်စပ်အနီးရှိ မြန်မာနိုင်ငံတွင် ရှိနေကြောင်း ပြသတဲ့ တည်နေရာတခုကိုလည်း AFP ကို မျှဝေခဲ့ပါတယ်။

"လူတချို့ကို မသမာတဲ့ သူဌေးတွေက ခေါ်သွားမယ်၊ တချို့ကိုတော့ ကောင်းတဲ့ကုမ္ပဏီတွေက ခေါ်သွားမယ်" လို့ သူကပြောပါတယ် ။ "ဒါဟာ ကံကြမ္မာအပေါ်မှာပဲ မူတည်တယ်။" လို့ဆိုပါတယ်။

နိုင်ငံတကာ ရာဇ၀တ်မှုတိုက်ဖျက်ရေး Global Initiative မှ အကြီးတန်းကျွမ်းကျင်သူ Jason Tower က AFP သို့ ပြောကြားရာမှာတော့ KK Park က ကျားဖြန့်တွေကို အခြားဂိုဏ်းတွေက ပြန်လည်စုဆောင်း ခဲ့ကြတယ်လို့ ဆိုပါတယ်။

"လိမ်လည်မှုလုပ်ငန်းကို ဆက်လက်လုပ်ကိုင်ဖို့ နေရာသစ်ရှာနေတဲ့ လူတချို့ရှိတယ်။ သူတို့ကတော့ ဒါကို အလုပ်တစ်ခုအနေနဲ့ မြင်ကြတယ်။ " လို့ ပြောပါတယ်။ အရှေ့တောင်အာရှနဲ့ အရှေ့အာရှ‌ဒေသမှာ ကျားဖြန့်လိမ်လည်မှုတွေကြောင့် ၂၀၂၃ ခုနှစ်အတွင်း အမေရိကန်‌ဒေါ်လာ ၃၇ ဘီလီယံထိ လိမ်လည်ခံခဲ့ရတယ်လို့ ကုလသမဂ္ဂရဲ့ အစီရင်ခံစာတရပ်မှာ ဖော်ပြထားပါတယ်။

ကွင်းအတွင်း မေ့လဲကျပြီးနောက် ဥရောပထိပ်တန်းလိဂ်နည်းပြ သေဆုံး
=====================

ဥရောပထိပ်တန်းလိဂ်ကလပ်နည်းပြတစ်ဦးဖြစ်တဲ့ မလာဒန်ဇီဇိုဗစ်ဟာ ကွင်းအတွင်း မေ့လဲကျပြီးနောက် သေဆုံးသွားခဲ့ပါတယ်။

အသက် ၄၄ နှစ်ရှိ ဘော့စနီးယားနည်းပြဟာ တနင်္ဂနွေနေ့ညတုန်းက Mladost နှင့် ရင်ဆိုင်ကစားရတဲ့ Radnicki 1923 ရဲ့ ဆားဘီးယားလိဂ်ပွဲစဉ်ရဲ့ ပွဲချိန် ၂၂ မိနစ်မှာ မေ့လဲကျခဲ့ပါတယ်။

ဆေးအဖွဲ့ဝင်များက ချက်ချင်းပင် ဇီဇိုဗစ်အား အရေးပေါ် ဆေးကုသမှုများ ပြုလုပ်ကာ ဆေးရုံသို့ ပို့ခဲ့ကြပေမယ့် အသက်ကို မကယ်တင်နိုင်ခဲ့ပါဘူး။

ဇီဇိုဗစ် ကွင်းအတွင်း မေ့လဲကျပြီးနောက် ဒိုင်လူကြီးက ပွဲကို ရပ်ဆိုင်းခဲ့ပေမယ့် ဆေးရုံသို့ ခေါ်ဆောင်သွားချိန်မှာ ပွဲကို ပြန်လည်စတင်ခဲ့ပါတယ်။

ဒါပေမယ့်လည်း ဇီဇိုဗစ်ကို ဆေးရုံသိ့ ခေါ်ဆောင်သွားပြီး မိနစ် ၂၀ အကြာမှာတော့ သေဆုံးသွားခဲ့ပါတယ်။

နှစ်ဖက်အသင်းမှ ကစားသမားများနှင့် နည်းပြများဟာ ကွင်းအတွင်း မျက်ရည်ကျခဲ့ကြရပြီး ပွဲကိုလည်း လုံးဝ ရပ်ဆိုင်းလိုက်ပါတယ်။

ဘော့စနီးယားလက်ရွေးစင်ဟောင်းဇီဇိုဗစ်ဟာ အောက်တိုဘာလ ၂၃ ရက်နေ့တုန်းကမှ Radnicki 1923 နည်းပြအဖြစ် ခန့်အပ်ခြင်းခံခဲ့ရတာ ဖြစ်ပြီး တတိယမြောက်ပွဲ ကိုင်တွယ်ချိန်တွင် ယခုကဲ့သို့ ကြေကွဲစရာ အဖြစ်အပျက် ကြုံလာရတာပါ။

လက်ရှိချန်ပီယံ ပီအက်စ်ဂျီကို အဝေးကွင်းမှာ တစ်ယောက်အလျှော့ဖြင့် အနိုင်ယူပြီး ယခုရာသီပြိုင်ပွဲအရပ်ရပ် ၁၆ ပွဲလုံး အနိုင်ရရှိလာတဲ့ ဘိုင်ယန်မြူးနစ်
========================

ဘိုင်ယန်မြူးနစ်ဟာ မနေ့ညတုန်းက ပဲရစ်တွင် လက်ရှိ ချန်ပီယံလိဂ်ချန်ပီယံ ပီအက်စ်ဂျီကို တစ်ယောက်အလျှော့ဖြင့် ကစားကာ အနိုင်ရရှိပြီးနောက် ယခုရာသီ ကစားသမျှ ပွဲအားလုံး အနိုင်ရရှိတဲ့ မှတ်တမ်းအား ဆက်လက် ထိန်းသိမ်းလာပါတယ်။
ဘိုင်ယန်မြူးနစ်ဟာ ပထမပိုင်း၃၂ မိနစ်အတွင်းတွင် လူးဝစ်ဒီယာ့ဇ်ရဲ့ သွင်းဂိုး ၂ ဂိုးဖြင့် ဦးဆောင်ထားနိုင်ခဲ့ပါတယ်။ ဒါပေမယ့် လူးဝစ်ဒီယာ့ဇ်ဟာ ပထမပိုင်းအချိန်ပိုတွင် ဟာကီမီကို နောက်ကျနေ ဆိုးရွားစွာ ဖျက်ထုတ်မှုကြောင့် တိုက်ရိုက်အနီကတ်ပြသခြင်းခံခဲ့ရပါတယ်။

ဟာကီမီဟာ ဒီယာ့ဇ်ရဲ့ ဖျက်ထုတ်မှုကြောင့် ခြေကျင်းဝတ်ဒဏ်ရာ ဆိုးဆိုးရွားရွား ရရှိသွားတယ်လို့ ယူဆရပြီး ဒီဇင်ဘာလတွင် မော်ရိုကိုက အိမ်ရှင်အဖြစ် ကျင်းပမယ့် အာဖရိကဖလားပြိုင်ပွဲကို လွဲချော်လာမှာ စိုးရိမ်နေရပြီလည်း ဖြစ်ပါတယ်။

ဟာကီမီဟာ ကွင်းမှာ ခြေအကာအကွယ်စွပ်ပြီး ချိုင်းထောက်ဖြင့် ထွက်ခွာသွားခဲ့ရတာ တွေ့ရပါတယ်။

ဘိုင်ယန်မြူးနစ်ဟာ ဒုတိယပိုင်းတစ်ပိုင်းလုံး တစ်ယောက်အလျော့ဖြင့် ကစားခဲ့ရပေမယ့်လည်း နီဗက်စ်ရဲ့ ချေပဂိုးတစ်ဂိုးတည်းကိုသာ ပေးခဲ့ရကာ ၂-၁ ဖြင့် အနိုင်ရရှိခဲ့ပါတယ်။

ဘိုင်ယန်မြူးနစ်ဟာ ပီအက်စ်ဂျီနိုင်ပွဲကြောင့် ချန်ပီယံလိဂ်ပွဲ ၄ ပွဲလုံး အနိုင်ရရှိထားသလို ပြည်တွင်းပွဲ ၁၂ ပွဲလုံး အနိုင်ရယူထားနိုင်ပြီလည်း ဖြစ်ပါတယ်။

ဘိုင်ယန်မြူးနစ်ဟာ လာမယ့်ချန်ပီယံလိဂ်ပွဲစဉ်အဖြစ် ၎င်းတို့ကဲ့သို့ပင် ၄ ပွဲလုံး အနိုင်ရရှိထားတဲ့ အာဆင်နယ်ကို အဝေးကွင်းမှာ ရင်ဆိုင်ရမှာ ဖြစ်ပါတယ်။ ပီအက်စ်ဂျီကတော့ စပါးစ်ကို ဧည့်ခံကစားရပါမယ်။

ကိုယ့်အသင်းဧရိယာအစပ်မှ ၇၅ မီတာလိမ်ခေါက်ဆွဲပြေးကာ ကြီးကျယ်ခမ်းနားလွန်းလှတဲ့ ဂိုးကို သွင်းယူခဲ့တဲ့ စပါးစ်နောက်ခံလူဗန်ဒီဗန်
====================

မစ်ကီဗန်ဒီဗန်ဟာ မနေ့ညကတုန်းက ကိုပင်ဟေဂင်နှင့်ပွဲစဉ်တွင် စပါးစ်အသင်းပင်နယ်တီဧရိယာအစပ်မှ စတင်ကာ ၇၅ မီတာအထိ လိမ်ခေါက်ဆွဲပြေးပြီး ကြီးကျယ်ခမ်းနားလွန်းလှတဲ့ဂိုးတစ်ဂိုးအား သွင်းယူပြခဲ့ပါတယ်။

ဒတ်ချ်နောက်ခံလူဟာ ယင်းဆွဲပြေးစဉ်အတွင်း အနည်းဆုံးကိုပင်ဟေဂင်ကစားသမား ၄ ဦးကို ကျော်ဖြတ်ခဲ့ရပါတယ်။

ယင်းသိ့ သွင်းဂိုးမျိုးကို ၂၀၁၉ ခုနှစ် ဒီဇင်ဘာလတုန်းက ဘန်လေနှင့်ပွဲမှာ စပါးစ်အသင်းခေါင်းဆောင်ဟောင်းဆန်ဟောင်မင်းလည်း သွင်းခဲ့ဖူးပါတယ်။ ဆန်ဟောင်မင်းဟာ ယင်းဂိုးဖြင့်ပင် ကမ္ဘာ့အကောင်းဆုံးဂိုးဆု Puskas Award ကို ဆွတ်ခူးခဲ့ပါတယ်။
ဗန်ဒီဗန်ဟာ အပြေးမြန်တဲ့သူအဖြစ် လူသိများပေမယ့်လည်း ဘောလုံးအလိမ်အခေါက်စွမ်းရည်နှင့်ပတ်သက်ပြီး လူသိများခြင်း မရှိပါဘူး။

ဂျာအိုပယ်ဟင်ဟာက ဘောလုံးပြန်ဆယ်နိုင်ပြီးနောက် ပင်နယ်တီဧရိယာအစပ်နားတွင် ရှိနေတဲ့ ဗန်ဒီဗန်ကို ဘောလုံးပေးပို့ခဲ့ပါတယ်။

ယင်းနောက်မှာတော့ ဗဟိုနောက်ခံလူဟာ ပြိုင်ဘက် ပင်နယ်တီအတွင်းသို့အထိ ဆွဲပြေးပါတော့တယ်။

သူဟာ လျှင်မြန်တဲ့ ပြေးနှုန်းဖြင့် ကိုပင်ဟေဂင်ကစားသမားများကို ကျော်ဖြတ်ခဲ့ပါတယ်။ သူဟာ မူအာနီကို ဘောလုံးပေးပို့နိုင်တဲ့ အခွင့်အရေး ရခဲ့ပေမယ့် မပေးခဲ့ဘဲ ကိုယ်တိုင်ပင် ဂိုးသွင်းခဲ့ပါတယ်။

ဗန်ဒီဗန် အခုလို ဂိုးသွင်းနိုင်တာနဲ့ပတ်သက်ပြီး အံ့ဩစရာတော့ မရှိပါဘူး။ ဒီဂိုးက သူ့ရဲ့ ယခုရာသီ ၆ ဂိုးမြောက်ဂိုး ဖြစ်ပါတယ်။
မစ်ကီဗန်ဒီဗန်ဟာ မနေ့ညကပွဲတွင် စပါးစ်ရဲ့ တတိယမြောက်ဂိုးကို သွင်းယူခဲ့တာပါ။ စပါးစ်ဟာ မနေ့ညက ကိုပင်ဟေဂင်ကို ၄-၀ ဂိုးဖြင့် အနိုင်ရခဲ့တာ ဖြစ်ပြီး စပါးစ်ရဲ့ ကျန်အနိုင်ဂိုးများကို ဘရန်နန်ဂျွန်ဆင်၊ ဝီလ်ဆင်အိုဒိုဘတ်၊ ပယ်ဟင်ဟာတို့က သွင်းခဲ့ကြပါတယ်။

လူးဝစ်ဗီးလ်လေဆိပ်မှာ လောင်စာတင်လေယာဉ် ပျက်ကျ မီးလောင်လို့ ခုနှစ်ယောက်သေဆုံး

အမေရိကန်ပြည်ထောင်စု ကင်တပ်ကီပြည်နယ်၊ လူးဝစ်ဗီးလ် အပြည်ပြည်ဆိုင်ရာလေဆိပ်မှာ ကုန်တင်လေယာဉ်တစင်း ပျံတက်စဉ် ပျက်ကျပြီးနောက် မီးဆက်လက်လောင်ကျွမ်းနေဆဲဖြစ်တယ်လို့ တာဝန်ရှိသူတွေက ပြောပါတယ်။

ယခုအချိန်အထိ သေဆုံးသူ ခုနှစ်ယောက်ယောက်ရှိကြောင်း အတည်ပြုပြီး သေဆုံးသူတိုးလာမယ်လို့ အာဏာပိုင်တွေက ဆိုပါတယ်။ ဖြစ်စဉ်ကြောင့် လူ ၁၁ ယောက်ဒဏ်ရာရရှိခဲ့ပြီး ပျောက်ဆုံးနေသူတွေလည်း ရှိနေပါတယ်။

အနီးနားမှာ နေထိုင်သူတွေကတော့ ဘေးလွတ်ရာ ရွှေ့ဖို့ ညွှန်ကြားထားပါတယ်။ လေယာဉ်ဟာ လောင်စာဆီဂါလံ သုံးသောင်းရှစ်ထောင်ခန့် သယ်ဆောင်လာစဉ် ပေါက်ကွဲခဲ့ပြီး မီးတောက်တွေဟာ အနီးအနားရှိ လုပ်ငန်းတွေကိုပါ လောင်ကျွမ်းခဲ့ပါတယ်။
လေယာဉ်ပေါ်မှာ လေယာဉ်အမှုထမ်းသုံးယောက် လိုက်ပါလာပြီး အားလုံး ပျောက်ဆုံးနေဆဲဖြစ်ပါတယ်။ ဟာဝိုင်အီသို့ ဦးတည်ပျံသန်းနေတဲ့ လေယာဉ်ခရီးစဉ် ၂၉၇၆ ဟာ ဒေသစံတော်ချိန် ၅ နာရီ ၁၅ မိနစ်မှာ ပျက်ကျခဲ့တယ်လို့ အမေရိကန် ဖက်ဒရယ်လေကြောင်းစီမံခန့်ခွဲရေးဌာနက အတည်ပြုထုတ်ပြန်ထားပါတယ်။

အခင်းဖြစ်ပွားရာနေရာမှာ မီးသတ်သမား အယောက် ၁၀၀ ကျော်က မီးငြှိမ်းသတ်ဖို့ အပြင်းအထန် ကြိုးပမ်းနေပါတယ်။

မိုးအဆက်မပြတ်ရွာလို့ ကွတ်ခိုင် နမ့်ဖတ်ကာရွာဘက်မှာ လယ်ဧကရာချီရေမြုပ်ပြီး စပါးတေွ ပျက်စီး

မိုးအဆက်အပြတ် ရွာလို့ ကွတ်ခိုင်မြို့နယ်၊ နမ့်ဖတ်ကာရွာဘက်က လယ်ဧက ရာချီရေမြုပ်မှုကြောင့် စပါးတွေပျက်စီး ဆုံးရှုံးသွားကြောင်း ဒေသခံတွေဆီက သိရပါတယ်။

“မိုးရွာလို့ ရေကြီး မျောပါကုန်တာရှိတယ်။ ရေတွေ မြုပ်နေတာရှိတယ်။ ရိတ်ထားတဲ့ စပါးတွေလည်း မိုးဆက်တိုက် ရွာတော့ အညှောက်တွေ ထွက်ကုန်ပြီ။ ကျနော့် လယ်လည်းပါတယ်။ အဲဒီ ခမောပါ လယ်တောဘက်က လယ်ကွက်တွေက စက်နဲ့ ရိတ်တာ မရှိပဲ” လို့ ဒေသခံ လယ်သမား တယောက်က ပြောပါတယ်။

နမ့်ဖတ်ကာ ခမောပါဘက် လယ်တောတွေက ဧက ၆၀၀ ဝန်းကျင်ရှိပြီး ချောင်းနဲ့ နီးတဲ့ လယ်ကွက်တွေထဲက စပါးတွေက ရေကြီးလို့ မျောပါကုန်ပြီး တချို့လယ်တွေက ရေမြုပ်ကုန်ကာ ကုန်းဘက်ကျတဲ့ လယ်တွေမှာလည်း စပါးရိတ် ထားကြတာကြောင့် ကောက်လှိုင်းမှာပဲ စပါးတွေ အပင်ပေါက်ကုန်တယ်လို့ သူက ပြောပါတယ်။

“ပန်ကိုင်ရွာဘက်က လယ်တောတွေလည်း မိုးကြောင့် စပါးတွေ အကုန်ပျက်စီးကုန်ပြီ။ ကျနော့် လယ်တော သေးသေးလေး မရိတ်ရသေးတဲ့ဟာ အဲဒါပဲ ကျန်တော့တယ်။ သူများ လယ်တွေ အကုန်ပျက်စီးကုန်ပြီ။ ရိတ်ထားတဲ့ စပါးတွေ အညှောက်ပေါက် ကုန်ပြီ။” နောက်ထပ် လယ်သမား တယောက်က ပြောပါတယ်။

ခြွေယူလို့ ရမယ့် စပါးတွေလည်း ပုပ်ကုန် လောက်ပြီဖြစ်ပြီး မူဆယ်မြို့နယ် ထဲက တီးမရွာ ဘက်မှာလည်း စပါးခင်းတွေ မများပေမယ့် စပါး ပုံ တဝက်လောက်ထိ ရေနစ်မြုပ်သွားတယ်လို့ သူက ပြောပါတယ်။

မိုးရွာမှုကြောင့် ဒီလို ကြီးကြီးမားမား စပါးတွေ ပျက်စီးဆုံးရှုံးတာမျိုး လွန်ခဲ့တဲ့ နှစ်ပေါင်း ၅၀ ခန့်က သာ ဖြစ်ဖူးခဲ့တယ်လို့ သိရပေမယ့် အရင်နှစ်တွေမှာတော့ အခုနှစ်လောက် ဆိုးဆိုးဝါးဝါး မဖြစ်ဖူးဘူးလို့ ဒေသခံတွေက ပြောပါတယ်။

ထရန့်-ကင်ဂျုံအန် ထိပ်သီးဆွေးနွေးပွဲ ဖြစ်လာနိုင်ခြေများကြောင်း တောင်ကိုရီးယားထောက်လှမ်းရေး သုံးသပ်

အမေရိကန်သမ္မတ ဒေါ်နယ်ထရမ့်နဲ့ မြောက်ကိုရီးယားခေါင်းဆောင် ကင်ဂျုံအန်တို့အကြား ထိပ်သီးဆွေးနွေးပွဲ ဖြစ်လာနိုင်ခြေများကြောင်း တောင်ကိုရီးယား ထောက်လှမ်းရေးအဖွဲ့က ပြောပါတယ်။

တောင်ကိုရီးယား အမျိုးသားထောက်လှမ်းရေးဌာနဟာ မြောက်ကိုရီးယားနဲ့ ပတ်သက်တဲ့ အခြေအနေတွေကို အင်္ဂါနေ့မှာ လွှတ်တော်ကိုတင်ပြရာ အခုလို သုံးသပ်ထားတာပါ။ ကင်ဂျုံအန်ဟာ အမေရိကန်နဲ့ ဆွေးနွေးဖို့ ဆန္ဒရှိနေပြီး အခြေအနေတွေ ပြည့်စုံမယ်ဆိုရင် ထိပ်သီးဆွေးနွေးပွဲ ဖြစ်နိုင်တယ်လို့ ထောက်လှမ်းရေးအဖွဲ့က အကဲဖြတ်ထားပါတယ်။

တောင်ကိုရီးယားနဲ့ အမေရိကန်တို့ ပုံမှန်ပူးတွဲစစ်ရေးလေ့ကျင့်မှုတွေ ပြုလုပ်ဖို့စီစဉ်ထားတဲ့ လာမယ့်နှစ် မတ်လမှာ အလှည့်အပြောင်းတခု ဖြစ်လာလိမ့်မယ်လို့လည်း တောင်ကိုရီးယား ထောက်လှမ်းရေးအဖွဲ့က ဆိုပါတယ်

ပြီးခဲ့သည့်လက ဒေါ်နယ်ထရန့်ရဲ့ အာရှခရီးစဉ်အတွင်း တောင်ကိုရီးယားရှိနေစဉ် ကင်ဂျုံအန်နဲ့ တွေ့ဆုံဖို့ အသင့်ရှိကြောင်း ပြောကြားခဲ့ပါတယ်။ ဒီခရီးစဉ်မှာ ဆွေးနွေးပွဲ အထမမြောက်ခဲ့ပေမယ့်လည်း မြောက်ကိုရီးယားဟာ အမေရိကန်နဲ့ဆွေးနွေးဖို့ နောက်ကွယ်မှာ ပြင်ဆင်နေတယ်လို့ ဆိုပါတယ်။

အမေရိကန်ပြည်ထောင်စုအနေနဲ့ မြောက်ကိုရီးယားအပေါ် မူဝါဒပြောင်းလဲခြင်းမရှိကြောင်းနဲ့ သမ္မတထရန့်ဟာ ကြိုတင်ညှိနှိုင်းချက်တွေမရှိဘဲ ကင်ဂျုံအန်နဲ့ ဆွေးနွေးဖို့ အသင့်ရှိနေကာ လက်ရှိမှာတော့ ကြေညာရမယ့် အစည်းအဝေးမျိုးမရှိသေးဘူးလို့ အိမ်ဖြူတော်က ပြောပါတယ်။

ထရန့်နဲ့ ကင်ဂျံအန်တို့ဟာ ထရန့်ပထမအကြိမ် သမ္မတသက်တမ်းအတွင်း ၂၀၁၈ ခုနှစ်နဲ့ ၂၀၁၉ ခုနှစ်တို့မှာ ထိပ်သီးဆွေးနွေးပွဲတွေ ကျင်းပခဲ့ဖူးပါတယ်။ ဒါပေမယ့်လည်း မြောက်ကိုရီးယား နျုကလီးယားအစီအစဉ် စွန့်လွှတ်ရေးအပေါ်မှာတော့ သဘောထားကွဲလွဲမှုတွေ ဆက်လက်ရှိနေခဲ့ပါတယ်။

ယာယီသမ္မတ ဗိုလ်ချုပ်မှူးကြီး မင်းအောင်လှိုင်နှင့်ရုရှားနိုင်ငံ နိုဗိုစီဗစ်ဒေသအုပ်ချုပ်ရေးမှူး ​တွေ့ဆုံ၍မြန်မာနှင့် ရုရှားနိုဗိုစီဗစ်ဒေသအကြား ပူးပေါင်းဆောင်ရွက်မှုများကို တိုးမြှင့်ဆောင်ရွက်နိုင်​​ရေး ​ဆွေး​နွေး

ပြည်ထောင်စုသမ္မတမြန်မာနိုင်ငံတော် ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင် ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင် ထံသို့ ရုရှား ဖက်ဒရေးရှင်းနိုင်ငံ၊ နိုဗိုစီဗစ်ဒေသအုပ်ချုပ်ရေးမှူး H.E.Mr. Andrey Aleksandrovich Travnikov ဦးဆောင်သောကိုယ်စားလှယ်အဖွဲ့က နိုဝင်ဘာ ၄ ရက်တွင် လာရောက် ဂါရဝပြုတွေ့ဆုံခဲ့​ကြောင်း သိရသည်။

ထိုသို့တွေ့ဆုံရာတွင် မြန်မာနိုင်ငံနှင့် ရုရှားဖက်ဒရေးရှင်းနိုင်ငံ၊ နိုဗိုစီဗစ်ဒေသတို့ အကြား ပူးပေါင်းဆောင်ရွက်မှု များကို တိုးမြှင့်ဆောင်ရွက်သွားနိုင်မည့်အခြေအနေများ၊ နိုဗိုစီဗစ်ဒေသအုပ်ချုပ်ရေးမှူးနှင့်အစိုးရအဖွဲ့ဝင်များ အနေဖြင့် မြန်မာနိုင်ငံသို့ ရောက်ရှိနေစဉ်အတွင်း မြန်မာနိုင်ငံ၏ သာယာလှပမှု၊ ယဉ်ကျေးမှုဓလေ့ ထုံးတမ်းစဉ်လာမြင့်မား ပြီး ခမ်းနားထည်ဝါမှုတို့ကို လေ့လာတွေ့ရှိခဲ့ရသည့်အပြင် မြန်မာနိုင်ငံအစိုးရအဖွဲ့ တာဝန်ရှိသူများနှင့် တွေ့ဆုံဆွေးနွေးမှုများကိုလည်း ဆောင်ရွက်နိုင်ခဲ့သည့်အခြေအနေ များ၊ နိုဗိုစီဗစ်ဒေသ သို့ပြန်လည်ရောက်ရှိပါက မြန်မာနိုင်ငံ၏ သာယာလှပမှု၊ ခမ်းနား ထည်ဝါမှုများကို နိုဗာစီဗစ်ဒေသမှတစ်ဆင့် ရုရှားနိုင်ငံသူ၊ နိုင်ငံသားများ သိရှိနိုင်ရေး ဆက်လက် ဆောင်ရွက်သွားမည်ဖြစ်သကဲ့သို့ နှစ်ဖက်ဆွေးနွေးမှုရလဒ် များကိုလည်း ဆက်လက်အကောင်အထည်ဖော်ဆောင်ရွက်သွားမည့် အခြေအနေများ၊ ရုရှားဖက်ဒ ရေးရှင်း နိုင်ငံသမ္မတ မစ္စတာ ဗလာဒီမာပူတင် အနေဖြင့်လည်း မြန်မာနိုင်ငံနှင့် ရုရှား ဖက်ဒရေးရှင်းနိုင်ငံအကြား၊ နိုဗိုစီဗစ်ဒေသတို့အကြား ပူးပေါင်းဆောင်ရွက်မှုမြှင့်တင်နိုင်ရေး လမ်းညွှန်မှာကြားထားရှိပြီး နိုဗိုစီဗစ်ဒေသ အစိုးရအဖွဲ့အနေဖြင့်လည်း အကောင် အထည်ဖော်ဆောင်ရွက်လျက်ရှိသည့် အခြေအနေများ ​ဆွေး​နွေးခဲ့​ကြောင်း သိရသည်။

ထို့ပြင် မြန်မာနိုင်ငံနှင့် နိုဗိုစီဗစ်ဒေသတို့အကြား စီးပွားရေး၊ ပညာရေး၊ ကျန်းမာရေး၊ ယဉ်ကျေးမှုဖလှယ်ရေး၊ ခရီးသွားလုပ်ငန်းမြှင့်တင်ရေး စသည်တို့အပြင် ကဏ္ဍပေါင်းစုံ၌ ပူးပေါင်းဆောင်ရွက်မှုများကို ကျယ်ကျယ်ပြန့်ပြန့် တိုးမြှင့်ဆောင်ရွက်သွားနိုင်မည့် အခြေအနေများ၊ မြန်မာနိုင်ငံနှင့် ရုရှားဖက်ဒရေးရှင်းနိုင်ငံအကြား၊ နိုဗိုစီဗစ် ဒေသတို့ အကြား ထုတ်ကုန်ပစ္စည်းများ အပြန်အလှန်တင်ပို့၍ ကုန်သွယ်မှုမြှင့်တင်ဆောင်ရွက် နိုင်မည့်အခြေ အနေများ၊ မြန်မာနိုင်ငံနှင့် နိုဗိုစီဗစ်ဒေသအပါအဝင် ရုရှားဖက်ဒရေးရှင်း နိုင်ငံတို့အကြား ယဉ်ကျေးမှုအဖွဲ့များ အပြန်အလှန်စေလွှတ်သွားမည့်အခြေအနေများ၊ နိုဗိုစီဗစ်ဒေသအုပ်ချုပ်ရေးမှူး ဦးဆောင်သည့် ယခုခရီးစဉ်သည် မြန်မာနိုင်ငံနှင့် ရုရှား ဖက်ဒရေးရှင်းနိုင်ငံအကြား၊ နိုဗိုစီဗစ်ဒေသတို့အကြား ချစ်ကြည်ရင်းနှီးမှုနှင့် ပူးပေါင်း ဆောင်ရွက်မှုများကို ပိုမိုခိုင်မာစေခဲ့ပြီး အောင်မြင်သည့်ခရီးစဉ်တစ်ခုဖြစ်ခဲ့သည့် အခြေ အနေများနှင့် နှစ်ဖက်ပူးပေါင်းဆောင်ရွက်မှုများကို ဆက်လက်တိုးမြှင့်ဆောင်ရွက်သွား မည်ဖြစ်သည့်အခြေအနေများ၊ မကြာမီကာလအတွင်း မြန်မာနိုင်ငံတွင် ကျင်းပပြုလုပ် မည့် ပါတီစုံဒီမိုကရေစီအထွေထွေရွေးကောက်ပွဲကို လွတ်လပ်ပြီး တရားမျှတသည့် ရွေး ကောက်ပွဲဖြစ်စေရေးဆောင်ရွက်သွားမည့်အခြေအနေများနှင့် ရွေးကောက်ပွဲကျင်းပပြီး ချိန်တွင် မြန်မာနိုင်ငံအနေဖြင့် ဒီမိုကရေစီလမ်းကြောင်းပေါ်တွင် ဆက်လက်လျှောက် လှမ်းသွားမည်ဖြစ်သည့်အခြေအနေများ၊ ရုရှားဖက်ဒရေးရှင်းနိုင်ငံနှင့် နိုဗိုစီဗစ်ဒေသတို့ အနေဖြင့်လည်း မြန်မာနိုင်ငံတွင်ကျင်းပပြုလုပ်မည့် ပါတီစုံဒီမိုကရေစီအထွေထွေရွေး ကောက်ပွဲကို အားပေးထောက်ခံ လျက်ရှိသည့် အခြေအနေများနှင့် ပတ်သက်၍ ဆွေးနွေးခဲ့​ကြောင်း သိရသည်

ယင်းတွေ့ဆုံပွဲသို့ နိုင်ငံတော်ယာယီသမ္မတ နိုင်ငံတော်လုံခြုံရေးနှင့် အေးချမ်း သာယာရေးကော်မရှင်ဥက္ကဋ္ဌ နှင့်အတူ ကော်မရှင်အတွင်းရေးမှူး တွဲဖက်အမှုဆောင်ချုပ် ဗိုလ်ချုပ်ကြီး ရဲဝင်းဦး၊ ကော်မရှင်အဖွဲ့ဝင်၊ နိုင်ငံခြားရေးဝန်ကြီးဌာန ပြည်ထောင်စု ဝန်ကြီး ဦးသန်းဆွေ၊ ပြည်ထောင်စုဝန်ကြီးများ ဖြစ်ကြသည့် ဦးတင်ဦးလွင်၊ ဦးချစ်ဆွေ၊ ဒေါက်တာ ချောချောစိန်နှင့် တာဝန်ရှိသူများ တက်ရောက်ကြပြီး ရုရှားဖက်ဒရေးရှင်း နိုင်ငံ၊ နိုဗိုစီဗစ်ဒေသအုပ်ချုပ်ရေးမှူးနှင့်အတူ မြန်မာနိုင်ငံဆိုင်ရာ ရုရှားဖက်ဒရေးရှင်း နိုင်ငံသံအမတ်ကြီး Mr. Iskander Azizov နှင့် နိုဗိုစီဗစ်ဒေသအစိုးရအဖွဲ့အကြီးအကဲ များ တက်ရောက်ခဲ့​ကြောင်း သိရသည်။