တပေါင်းလပြည့်နေ့တွင် လအပြည့်ကြတ်ခြင်းကို ထိုင်းမှ မြင်တွေ့ရမည်

ထိုင်းနိုင်ငံတစ်ဝန်းမှပြည်သူများသည် မတ်လ ၃ ရက် နေ့ တပေါင်းလပြည့်နေ့တွင် သွေးနီရောင်လအပြည့်ကြတ်ခြင်းကို မြင်တွေ့နိုင်ကြမည်ဖြစ်သည်။

လအပြည့်ကြတ်ခြင်းကို အမေရိကန်ပြည်ထောင်စု၊ ကနေဒါ၊ သြစတြေးလျနှင့် ဗဟိုနှင့် အရှေ့အာရှနိုင်ငံများစွာမှ မြင်တွေ့ရမည်ဖြစ်ပြီး ဥရောပ နှင့် အာဖရိကဒေသများကမူ မြင်တွေ့ရမည်မဟုတ်ကြောင်း ထိုင်းနိုင်ငံ နိုင်ငံတော်နက္ခတ္တဗေဒ သုတေသနဌာန (NARIT) က ပြောကြားသည်။

လအပြည့်ကြတ်သွားသည့်အဆင့်သည် ကမ္ဘာတစ်ဝန်းရှိ ဒေသစံတော်ချိန်အမျိုးမျိုးတွင် ကျရောက်မည်ဖြစ်ပြီး အရှေ့အာရှနှင့် သြစတြေးလျတွင် ညနေပိုင်းအချိန်၊ ပစိဖိတ်ဒေသတလျှောက်တွင် ညပိုင်းအချိန်၊ မြောက်နှင့် ဗဟိုအမေရိက၊ တောင်အမေရိက အနောက်ဖျားစွန်းဒေသများတွင် အရုဏ်မတက်မီ ကျရောက်မည်ဖြစ်သည်။

ထိုင်းနိုင်ငံတွင် လကြတ်ခြင်းသည် ညနေ 3 နာရီ 44 မိနစ် မှ ည 9 နာရီ 23 မိနစ် အထိ ကြာမြင့်မည်ဖြစ်ကြောင်း NARIT က ပြောဆိုသည်။ လသည် ကမ္ဘာမြေ၏ အပြင်ပိုင်းအရိပ် သို့မဟုတ် အရိပ်မည်းအတွင်းကို ညနေ ၃း၄၄ နာရီတွင် စတင်ဝင်ရောက်မည်ဖြစ်ကာ ကမ္ဘာအရိပ်၏ အမှောင်ဆုံးအပိုင်းဖြစ်သော umbra အတွင်းသို့ ရွေ့လျားမည်ဖြစ်ပြီး ညနေ ၄း၅၀ နာရီတွင် တစ်စိတ်တစ်ပိုင်းလကြတ်ခြင်းစတင်မည်ဖြစ်သည်။

လပြည့်ဝန်းကြီးသည် သွေးနီရောင်ပြောင်းလဲလာချိန် ည ၆း၀၄ နာရီမှ ၇း၀၂ နာရီအထိ ကြာမြင့်မည်ဖြစ်ပြီး နက္ခတ်ဗေဒင်ဆိုင်ရာ ဖြစ်စဉ်ကို ကြည့်ရှုရန်အကောင်းဆုံးအချိန်ဖြစ်သည်။ ထို့နောက် လသည် ည ၈း၁၇ နာရီတွင် အရိပ်မှ ထွက်ခွာပြီး အရိပ်မှ ကင်းလွတ်သွားမည့် ည ၉း၂၃ နာရီ မတိုင်မီတွင် တစ်စိတ်တစ်ပိုင်း လကြတ်မှုအဆင့်ကို ပြန်လည်ရောက်ရှိသွားမည်ဖြစ်သည်။

လကြတ်ခြင်းကို သာမန်မျက်စိဖြင့် ဘေးကင်းစွာ ကြည့်ရှုနိုင်သည်ဟု NARIT က ပြောကြားခဲ့သည်။

ပါမောက္ခချုပ်ဆရာတော်ကြီးမှ ဆရာတော် (၅) ပါးအား ပညာဘူမိတက္ကသိုလ်၏ အမြင့်ဆုံးဘွဲ့ဖြစ်သော D.Litt ဘွဲ့ အား ကိုယ်တိုင်အပ်နှင်းတော်မူ

ပါမောက္ခချုပ်ဆရာတော်ကြီးမှ ဆရာတော်(၅)ပါးအား ပညာဘူမိတက္ကသိုလ်၏ အမြင့်ဆုံးဘွဲ့ဖြစ်သော ပါဠိစာပေပညာရှင် ပါဠိသတ္ထဝိဘာဝီ Doctor of Literature (D.Litt) ဘွဲ့အား ကိုယ်တိုင်အပ်နှင်းတော်မူခဲ့သည်။

ဘဒ္ဒန္တဝိဇ္ဇာနန္ဒာဘိဝံသ မဟာဂန္ဓာရုံကျောင်းတိုက်၊ စစ်ကိုင်းတောင်ရိုး၊ စစ်ကိုင်းမြို့(ကျမ်းအမည်- သဒ္ဒသင်္ဂ ဟပါဠိမဟာဗျာကရဏ(ပေမူ) (နှာ- ၈၆၅))၊ ဘဒ္ဒန္တသာသနဝရ စိန်ရတနာ ဓမ္မာစရိယစာသင်တိုက်၊ ရန်ကုန်မြို့(ကျမ်းအမည်- ဂန္ထာဘရဏာဒိပကရဏစတုက္က (နှာ-၂၅၇))၊ ဘဒ္ဒန္တ အာဒိစ္စဝံသာလင်္ကာရ ဓမ္မာဓိပတိဓမ္မရိပ်သာ၊ လှည်းကူးမြို့(ကျမ်းအမည်- အင်္ကုရဋီကာ (နှာ-၄၄၂))၊ ဘဒ္ဒန္တသိရိန္ဒ ဓမ္မပါရဂူကျောင်း၊ ရှိမ္မကားရွာ၊ ဝက်လက်မြို့နယ်(ကျမ်းအမည်- ပရမတ္ထဝိသောဓနီဋီကာ (နှာ-၂၈၁))၊ ဘဒ္ဒန္တပညာနန္ဒာလင်္ကာရ မဟာမင်းထင်ကျောင်းတိုက်၊ မင်းဝံတောင်ရိုး၊ စစ်ကိုင်းမြို့ (ကျမ်းအမည်- နိရုတ္တိသာရမဉ္ဇူသာဋီကာ ( နှာ-၇၂ဝ)) တို့အား D.Litt ဘွဲ့အပ်နှင်းတော်မူခဲ့ခြင်းဖြစ်သည်။

အဆိုပါ ဆရာတော်ကြီးများ ပြင်ဆင်သုတ်သင်တည်းဖြတ်ခဲ့ပြီး တက္ကသိုလ်သို့တင်သွင်းခဲ့သည့် ကျမ်းစာများမှာ နှစ်ပေါင်း (၁၀၀) ကျော်မှ နှစ်ပေါင်း (၄၄၈) နှစ်အကြာရှိ ကျမ်းစာများပါဝင်သည်။

ပေ၊ ပုရပိုက်များ၌သာရှိသော ပါဠိကျမ်းစာများနှင့် နှစ်ပေါင်းများစွာတည်းဖြတ်ခြင်းမရှိ၍ အရေးအသားချွတ်ချော်တိမ်းပါးလျက်ရှိသော ပါဠိကျမ်းအိပ်များကိုပြင်ဆင်တည်းဖြတ်ပြီး ပညာဘူမိတက္ကသိုလ် Academic Board အဖွဲ့သို့ တင်သွင်းသူအားစိစစ်ရွေးချယ်ကာ ပါဠိသတ္ထဝိဘာဝီ(ပါဠိစာပေပညာရှင်) Doctor of literature (D.Litt) ဘွဲ့အပ်နှင်းမည့် (မူဝါဒ) နှင့်အညီ အပ်နှင်းခဲ့ခြင်းဖြစ်သည်။

မြောင်မြို့နယ် ကြက်သွန်နီစိုက်တောင်သူများ စျေးကောင်းရရန် ချိတ်ဆက်ဆောင်ရွက်ပေးနေ

စစ်ကိုင်းတိုင်းဒေသကြီး၊ စစ်ကိုင်းခရိုင်၊ မြောင်မြို့နယ်တွင် ဆောင်းသီးနှံ ကြက်သွန်နီ ဧက (၁၄၀၀) ကျော်အထိ နှုတ်သိမ်းပြီးဖြစ်ကြောင်း စစ်ကိုင်းခရိုင် စိုက်ပျိုးရေးဦးစီးဌာနကသိရသည်။

မြောင်မြို့နယ်တွင် ဆောင်းသီးနှံ ကြက်သွန်နီကို ဧက (၁၈၀၀) ကျော် စိုက်ပျိုးထားရာ ဇန်နဝါရီလမှ စတင်နှုတ်သိမ်းခဲ့ရာ ဧက (၁၄၀၀) ကျော်နှုတ်သိမ်းပြီးနေပြီဖြစ်ရာ တစ်ဧကလျင် ကြက်သွန်နီပိသာချိန် (၄၀၀၀) ကျော်ထွက်ကြောင်းသိရသည်။

"ကြက်သွန်နီတွေ စျေးကွက်မှာ စျေးကောင်းရအောင် ချိတ်ဆက်ဆောင်ရွက်ပေးနေပါတယ်" ဟု စစ်ကိုင်းခရိုင်စိုက်ပျိုးရေးဦးစီးဌာန၊ ခရိုင်ဦးစီးမှူး ဒေါ်မြတ်မိုးဝင်းက ပြောသည်။

မြောင်မြို့နယ် ကြက်သွန်နီစိုက်တောင်သူများအနေဖြင့် အရည်အသွေးကောင်း ကြက်သွန်နီများရရှိရန် GAP နည်းစနစ်သုံးစိုက်ပျိုးကာ ကြာရှည်အထားခံနည်းများကို စိုက်ပျိုးရေးဌာနဝန်ထမ်းများက အသိပညာမျှဝေခဲ့ကြောင်း သိရသည်။

အမိုရမ်အား ထုတ်ပယ်လိုက်မှုအတွက် ပေါင် ၁၆ သန်းနီးပါး ကုန်ကျခဲ့တဲ့ ယူနိုက်တက်
====================
ယူနိုက်တက်က ရူဘင်အမိုရမ်အား ထုတ်ပယ်မှုအတွက် ပေါင် ၁၆ သန်းနီးပါး ကုန်ကျခဲ့ကြောင်း အတည်ပြုလာပါတယ်။

ယူနိုက်တက်ဟာ လိဒ်နှင့် တစ်ဂိုးစီသရေကျတဲ့ပွဲအပြီးတွင် အသင်းတာဝန်ရှိသူများကို တိုက်ရိုက်ဝေဖန်ပြောဆိုမှု ပြုလုပ်ခဲ့တဲ့ အမိုရမ်အား ဇန်နဝါရီလ ၅ ရက်နေ့တုန်းက ထုတ်ပယ်ခဲ့ပါတယ်။

ယူနိုက်တက်ဟာ ကြာသပတေးနေ့တုန်းက ၂၀၂၅ ခုနှစ် ဒီဇင်ဘာလ ၃၁ ရက်နေ့အထိ ခြောက်လတာ ဘဏ္ဍာရေးရှင်းတမ်းအား ထုတ်ပြန်ခဲ့ရာမှာ ပေါင် ၃၂.၆ သန်းအမြတ် ရခဲ့ကြောင်း သိရပါတယ်။

ယင်းဘဏ္ဍာရေးရှင်းတမ်းအရ ယူနိုက်တက်ဟာ အမိုရမ်နှင့် နည်းပြအဖွဲ့ဝင်များအား ထုတ်ပယ်လိုက်မှုအတွက် ပေါင် ၁၅.၉ သန်းကျော် ကုန်ကျခဲ့ကြောင်းလည်း ဆိုထားပါတယ်။

အသက် ၄၁ နှစ်ရှိ ရူဘင်အမိုရမ်ဟာ ယူနိုက်တက်မှ ထုတ်ပယ်ခြင်းခံရပြီးနောက် ယင်းနှင့်ပတ်သက်ပြီး လူသိရှင်ကြား ပြောကြားလာခြင်း မရှိသေးပါဘူး။

ယူနိုက်တက်ဟာ အမိုရမ်အား စပို့တင်းလစ္စဘွန်းမှ ခေါ်ယူနိုင်ရေးအတွက် ပေါင် ၁၁ သန်းအထိ အသုံးပြုခဲ့သလို ယခင်နည်းပြအဲရစ်တန်ဟက်အား ထုတ်ပယ်မှုအတွက် နစ်နာကြေး ပေါင် ၁၀.၄ သန်းအသုံးပြုခဲ့ပါသေးတယ်။

ဒါကြောင့်လည်း ယူနိုက်တက်ဟာ ယခင် နည်းပြနှစ်ဦး အပြောင်းအလဲ လုပ်မှုအတွက် ပေါင် ၃၇.၃ သန်းအထိ အသုံးပြုခဲ့ရပါတယ်။

ပေါ်တူဂီလူမျိုးနည်းပြအမိုရမ်ဟာ ယူနိုက်တက်အား ၁၄ လတာကိုင်တွယ်စဉ်အတွင်း ၆၃ ပွဲ ကိုင်တွယ်ခဲ့ရာမှာ နိုင်ပွဲ ၂၅ ပွဲတည်းသာ ရယူနိုင်ခဲ့ပြီး ၂၀၂၄-၂၅ ရာသီတုန်းက အဆင့် ၁၅ နေရာတွင်သာ ရပ်တည်ကာ ၁၉၇၃-၇၄ ရာသီနောက်ပိုင်း အဆိုးရွားဆုံးအဆင့်တွင် ရပ်တည်ခဲ့ရပါတယ်။

ဒါ့အပြင် ယူနိုက်တက်ဟာ ယူရိုပါလိဂ်ဗိုလ်လုပွဲတွင်လည်း စပါးစ်ကို ရှုံးနိမ့်ခဲ့ကာ ၁၉၉၀ ခုနှစ်နောက်ပိုင်း ဒုတိယအကြိမ်မြောက် ဥရောပပြိုင်ပွဲမရှိတဲ့ ရာသီ ပိုင်ဆိုင်ခဲ့ပါတယ်။

ယခုရာသီတွင်လည်း အမိုရမ်ကိုင်တွယ်ခဲ့တဲ့ ယူနိုက်တက်ဟာ ခါရာဘောင်ဖလားနှင့် အက်ဖ်အေဖလားပြိုင်ပွဲတို့မှာ အစောဆုံးအဆင့်မှပင် ထွက်ခဲ့ရပါတယ်။

ဒါပေမယ့် ယူနိုက်တက်ဟာ အမိုရမ်ကို ထုတ်ပယ်ပြီးနောက် မိုက်ကယ်ကာရစ်အား ယာယီနည်းပြအဖြစ် ခန့်အပ်လာချိန်မှာတော့ ၆ ပွဲတွင် ၅ ပွဲ အနိုင် ရရှိကာ ချန်ပီယံလိဂ်ဝင်ခွင့် အဆင့် ၄ နေရာမှာ ရပ်တည်နေပါတယ်။

ကမ္ဘာ့ဖလားပြိုင်ပွဲဝင် ထိပ်တန်းလက်ရွေးစင်အသင်းနည်းပြရာထူးအတွက် ထိပ်ဆုံးမှ ရေပန်းစားနေတဲ့ ဇာဗီး
==================
ဇာဗီးဟာ ကမ္ဘာ့ဖလားပြိုင်ပွဲ စတင်ရန် လေးလခန့်သာ လိုတော့တဲ့အချိန်တွင် မော်ရိုကိုအသင်းနည်းပြရာထူးအတွက် ထိပ်ဆုံးမှ ရေပန်းစားနေပါတယ်။

စပိန်လူမျိုးနည်းပြဟာ ၂၀၂၄ ခုနှစ်တုန်းက ဘာစီလိုနာနည်းပြရာထူးမှ ထုတ်ပယ်ခြင်းခံရပြီးနောက် အသင်းလက်မဲ့ ဖြစ်နေခဲ့သူ ဖြစ်ပါတယ်။

မော်ရိုကိုအသင်းကို နည်းပြဝါလစ်ရီဂရာဂူက ကိုင်တွယ်နေပြီး အသင်းမှ ထွက်ခွာလာတော့မယ်လို့ သတင်းများ ကျယ်ပြန့်စွာ ထွက်ပေါ်နေပါတယ်။

မော်ရိုကိုဘောလုံးအဖွဲ့ချုပ်က နည်းပြရီဂရာဂူနှင့် လမ်းခွဲတော့မယ်ဆိုတဲ့ သတင်းကို ငြင်းဆိုထားပါတယ်။

ရီဂရာဂူဟာ ၂၀၂၂ ကမ္ဘာ့ဖလားပြိုင်ပွဲတွင် မော်ရိုကိုအား ဆီမီးဖိုင်နယ်သို့ ပို့ဆောင်ပေးခဲ့သလို မကြာသေးမီတုန်းက အာဖရိကဖလားပြိုင်ပွဲတွင် ဒုတိယရရှိ‌အောင် စွမ်းဆောင်ပေးနိုင်ခဲ့သူ ဖြစ်ပါတယ်။

ဒါပေမယ့် Marca ရဲ့ ဖော်ပြလာမှုအရ မော်ရိုကိုဟာ ဇာဗီးအား ခန့်အပ်ရန် မျှော်လင့်နေကြောင်း သိရပါတယ်။ တဖက်တွင် ဇာဗီးကိုယ်တိုင်ကလည်း စိတ်ဝင်စားစရာစီမံကိန်းတစ်ခု ဖြစ်ပါက လက်ခံရန် အသင့်ရှိနေပါတယ်။

ဒါပေမယ့် ဇာဗီးက စီမံကိန်းအား စတင်ကတည်းက လုပ်ဆောင်လိုနေတာ ဖြစ်ပြီး ယခုကဲ့သို့ ကမ္ဘာ့ဖလားပြိုင်ပွဲ နီးကပ်နေတဲ့အချိန်မျိုးတွင်မှ မော်ရိုကိုအသင်းအား ကိုင်တွယ်လိုဖွယ်မရှိကြောင်းလည်း Marca က ဖော်ပြသွားပါတယ်။

မော်ရိုကိုဟာ ကမ္ဘာ့ဖလားပြိုင်ပွဲတွင် ဘရာဇီး၊ စကော့တလန်၊ ဟေတီတို့နှင့် တစ်အုပ်စုတည်း ကျရောက်နေတာ ဖြစ်ပါတယ်။

ဒါပေမယ့် မော်ရိုကိုအသင်းဟာ ဘရာဟမ်ဒီယာ့ဇ်၊ အာခရပ်ဖ်ဟာကီမီ၊ နူဆာမာ့ဇ်ရာဝီတို့ကဲ့သို့ နာမည်ကျော်ကစားသမားများကိုလည်း ပိုင်ဆိုင်ထားမှုနှင့်အတူ ကမ္ဘာ့ဖလားအုပ်စုအဆင့်ကို ကျော်ဖြတ်ရန် အခြေအနေကောင်းတစ်ခု ပိုင်ဆိုင်ထားပါတယ်။

နေအိမ်ရှေ့တွင် ကမ္ဘာ့ဖလားကိုင်မြှောက်ထားတဲ့ ဂေါ်ရီလာရုပ်ထုအား စိုက်ထူလာတဲ့ ၂၀၁၈ ကမ္ဘာ့ဖလားချန်ပီယံ
=====================
ပြင်သစ်စတားလူကပ်စ်ဟာနန်ဒက်ဇ်ဟာ နေအိမ်ရှေ့တွင် ကမ္ဘာ့ဖလားဆုဖလား ကိုင်မြှောက်ထားတဲ့ ဂေါ်ရီလာရုပ်ထုအား ထားထားလာပါတယ်။

အသက် ၃၀ နှစ်ရှိ ပီအက်စ်ဂျီနောက်ခံလူဟာ ပြင်သစ်အသင်းနှင့်အတူ ၂၀၁၈ ကမ္ဘာ့ဖလားချန်ပီယံဖြစ်ခဲ့သူ ဖြစ်ပါတယ်။

ရုရှားတွင် ကမ္ဘာ့ဖလားဆွတ်ခူးပြီး ၈ နှစ်အကြာမှာတော့ ဟာနန်ဒက်ဇ်ဟာ နေအိမ်ရှေ့တွင် ကမ္ဘာ့ဖလားကိုင်မြှောက်ထားတဲ့ ဂေါ်ရီလာအား တည်ထားကာ ကိုယ့်ကိုယ်ကို ဂုဏ်ပြုလာပါတယ်။

ယင်းဂေါ်ရီလာတွင် ပြင်သစ်အသင်းဝတ်စုံ ဆေးအပြာရောင် သုတ်ထားပြီး ဟာနန်ဒက်ဇ်ရဲ့ အမည်နှင့် ကျောနံပါတ် ၂၁ တို့ကိုလည်း ထည့်သွင်းထားပါတယ်။

လက်မောင်း၊ ခေါင်း၊ ခြေထောက်တို့ကို အနီရောင်ဆေးသုတ်ထားကာ ကမ္ဘာ့ဖလားကိုင်မြှောက်ထားပါတယ်။

ဟာနန်ဒက်ဇ်ဟာ ပြင်သစ်အသင်းအတွက် ပွဲ ၄၀ ကစားထားသူ ဖြစ်ပြီး ၂၀၁၈ ကမ္ဘာ့ဖလားအပြင် ၂၀၂၁ ခုနှစ် နေးရှင်းလိဂ်ဖလားလည်း ဆွတ်ခူးထားပါတယ်။ သူဟာ ပြင်သစ်နှင့်အတူ ၂၀၂၂ ကမ္ဘာ့ဖလားဗိုလ်လုပွဲသို့လည်း တက်ခဲ့ပါတယ်။

သူဟာ အက်သလက်တီကိုတွင် ကစားသမားဘဝစတင်ခဲ့သူ ဖြစ်ပြီး ဘိုင်ယန်မြူးနစ်သို့ ပြောင်းရွှေ့ကစားပြီးနောက် ချန်ပီယံလိဂ်ဖလားလည်း ဆွတ်ခူးခဲ့ပါတယ်။

သူဟာ ၂၀၂၃ ခုနှစ်တွင် ပီအက်စ်ဂျီသို့ ပြောင်းလာပြီးနောက် ၉၁ ပွဲကစားထားကာ ပြီးခဲ့တဲ့ရာသီတုန်းက ချန်ပီယံလိဂ်ဖလား ဆွတ်ခူးခဲ့ပါတယ်။

နာဇီအလေးပြုမှု ပြုလုပ်ခဲ့တဲ့ ပရိသတ်အား ဘာနေဗျူးကွင်းအပြင်သို့ ဆွဲထုတ်ခဲ့တဲ့ ရီးရဲလ်မက်ဒရစ်
======================
ရီးရဲလ်မက်ဒရစ်ဟာ ဗုဒ္ဓဟူးနေ့ညတုန်းက ဘင်ဖီကာအား အနိုင်ရတဲ့ ချန်ပီယံလိဂ်ပွဲစဉ်မတိုင်မီ နာဇီအလေးပြုမှု ပြုလုပ်ခဲ့တဲ့ ပရိသတ်တစ်ဦးအား ဘာနေဗျူးကွင်းအပြင်ဘက်သို့ ဆွဲထုတ်သွားခဲ့ပြီး ယင်းဖြစ်ရပ်အား စုံစမ်းစစ်ဆေးမှုများ ဆက်လက် ပြုလုပ်နေပါတယ်။

ဘာနေဗျူးကွင်းပွဲစဉ်ရဲ့ ပွဲစမတင်မီ ပရိသတ်တစ်ဦးဟာ ရုပ်သံကင်မရာက ရိုက်ကူးမှု ပြုလုပ်စဉ် နာဇီအလေးပြုမှု ပြုလုပ်ခဲ့တာလည်း ဖြစ်ပါတယ်။

လုံခြုံရေးဝန်ထမ်းများဟာ ယင်းပရိသတ်ကို သိရှိပြီးနောက် ကွင်းမှ ဆွဲထုတ်ခဲ့ကြပါတယ်။

ဗုဒ္ဓဟူးနေ့ည ဘာနေဗျူးကွင်းပွဲစဉ်တွင် ရီးရဲလ်မက်ဒရစ်တို့ ၂-၁ ဖြင့် အနိုင်ရရှိခဲ့ပြီး နှစ်ကျော့ပေါင်းရလဒ် ၃-၁ ဖြင့် အနိုင်ရရှိကာ ၁၆ သင်း ရှုံးထွက်အဆင့်သို့ တက်ရောက်ခဲ့ပါတယ်။

လစ္စဘွန်းတွင် ကစားတဲ့ ချန်ပီယံလိဂ်ပလေးအော့ဖ်ပထမအကျော့ပွဲစဉ်တုန်းကလည်း ရီးရဲလ်မက်ဒရစ်စတားဗီနီရှပ်စ်ဂျူနီယာကို ဘင်ဖီကာရဲ့ ပရီစတီယန်နီက လူမျိုးရေးခွဲခြားမှု ပြုလုပ်မှုကြောင့် ပွဲကို ၁၀ မိနစ်ခန့် ရပ်ဆိုင်းခဲ့ရပါသေးတယ်။

ပရီစတီယန်နီဟာ ယင်းအဖြစ်အပျက်ကြောင့် ယာယီ ၁ ပွဲပယ်ပြစ်ဒဏ်ချမှတ်ခြင်းခံထားရပြီး ဗုဒ္ဓဟူးနေ့ည ပွဲစဉ်အား လွဲချော်ခဲ့ပါတယ်။

ကစားသမားဘဝ ဆိုးရွားတဲ့အခြေအနေရောက်နေကာ ပရိသတ်များရဲ့ လှောင်ပြောင်ခြင်းခံခဲ့ရပြီး ကစားသမားဘဝမှ အနားယူရန် ပြောဆိုခံလာရတဲ့ ကာဗာနီ
=================
အက်ဒီဆင်ကာဗာနီဟာ ကိုယ့်အသင်းပရိသတ်များရဲ့ လှောင်ပြောင်မှု ရင်ဆိုင်နေရပြီး ကစားသမားဘဝ အဆိုးရွားဆုံးအခြေအနေသို့ မရောက်မီ စောစောစီးစီး အနားယူရန် တိုက်တွန်းခြင်းခံလာရပါတယ်။

အသက် ၃၉ နှစ်ရှိ အက်ဒီဆင်ကာဗာနီဟာ နာပိုလီ၊ ပီအက်စ်ဂျီ၊ ယူနိုက်တက်တို့တွင် ကစားခဲ့ကာ ထိပ်တန်းတိုက်စစ်မှူးတစ်ဦးအဖြစ် သတ်မှတ်ခြင်းခံခဲ့ရသူ ဖြစ်ပါတယ်။

လက်ရှိအချိန်တွင် သူဟာ အာဂျင်တီးနားထိပ်သီး ဘိုကာဂျူနီယာတွင် ကစားနေပြီး ယင်းတွင် ကစားလာခဲ့တာ သုံးနှစ်နီးပါး ရှိလာပြီ ဖြစ်ပါတယ်။

သူဟာ ဘိုကာဂျူနီယာအတွက် ၈၁ ပွဲကစားထားရာတွင် ၂၈ ဂိုးအထိ သွင်းထားနိုင်ပါတယ်။

ဒါပေမယ့် သူဟာ နောက်ပိုင်းပွဲများတွင် အကောင်းဆုံးပုံစံ ပြသနိုင်ခြင်း မရှိမှုနှင့်အတူ ဘိုကာဂျူနီယာပရိသတ်များရဲ့ ပစ်မှတ်ထားခြင်းခံလာရပါတယ်။

ကာဗာနီဟာ သောကြာနေ့တုန်းက ရေဆင်းကလပ်နှင့် ဂိုးမရှိသရေကျတဲ့ ပွဲစဉ်တွင် စက်တင်ဘာနောက်ပိုင်း ပထမဆုံးအကြိမ်အဖြစ် ပွဲထွက်ကစားခွင့်ရခဲ့ပါတယ်။

ဝါရင့်တိုက်စစ်မှူးဟာ ၂၀၂၃ ခုနှစ် ဖေဖော်ဝါရီလနောက်ပိုင်းတွင် ဒဏ်ရာပြဿနာ ၃ ကြိမ် ရင်ဆိုင်ခဲ့ရပြီး ၃၆ ပွဲအထိ လွဲခဲ့သူလည်း ဖြစ်ပါတယ်။

သူဟာ သောကြာနေ့က ပွဲစဉ်မှာတော့ ပွဲတွင် ထူးထူးခြားခြားလုပ်ပြနိုင်ခြင်း မရှိမှုနှင့်အတူ ဘိုကာဂျူနီယာပရိသတ်များရဲ့ လှောင်ပြောင်ခြင်းခံခဲ့ရပါတယ်။

ပိုပြီးတော့ ဆိုးရွားလာတာကတော့ ကာဗာနီဟာ တနင်္လာနေ့တုန်းက ဂျမ်နာစီယာချီဗီလ်ကွိုင်းနှင့်ပွဲအတွက် ဘိုကာဂျူနီယာလူစာရင်းမှ ဖယ်ရှားခြင်းခံခဲ့ရတာပါ။

ယခုအခါ ဘိုကာဂျူနီယာဂန္ထဝင်တစ်ဦးဖြစ်တဲ့အပြင် အာဂျင်တီးနားနှင့်အတူ ကမ္ဘာ့ဖလားဆွတ်ခူးခဲ့တဲ့ အော်စကာရူဂီရီက ကာဗာနီအနေဖြင့် ကစားသမားဘဝမှ မြန်မြန်ဆန်ဆန် အနားယူရန် တိုက်တွန်းလာပါတယ်။

ရူဂီရီက "ကာဗာနီအနေနဲ ကစားတာ ရပ်ရတော့မယ်။ လှောင်ပြောင်ခံရတယ်ဆိုတာ ကြီးကျယ်တဲ့ကစားသမားဘဝပိုင်ဆိုင်ခဲ့တဲ့ စတားတစ်ဦးအတွက် အပြစ်တစ်ခုပါပဲ။ သူ့ကို မသိပါဘူး။ အကြိမ်အနည်းငယ်တော့ ဆုံဖူးတယ်။ ဒါပေမယ့် သူ့ကို ဒီလိုတွေ့ရတော့ စိတ်မကောင်းဖြစ်ရတယ်။ အာဂျင်တီးနားမှာ အသက် ၄၀ အရွယ်တစ်ဦးအတွက် ကစားရတာ ခက်ခဲ့ပါတယ်။ သူက အခြေအနေကို အလှည့်အပြောင်းဖြစ်အောင် ကြိုးစားလိုနေတာပါ။ ကျွန်တော်ဆိုရင်တော့ နားပါပြီ"လို့ ပြောကြားသွားပါတယ်။

ရူဂီရီဟာ ဇန်နဝါရီလတုန်းက ကာဗာနီအား ကစားသမားဘဝမှ အနားယူရန် တိုက်တွန်းပြောဆိုခဲ့ဖူးသူ ဖြစ်ပါတယ်။

ဘာနေဗျူးတကျော့ပြန် ပွဲစဉ်ကို ပဟေဠိဆန်တဲ့ နေရာမှ ကြည့်ရှုသွားခဲ့တဲ့ မော်ရင်ဟို
===================
ဟိုဆေးမော်ရင်ဟိုဟာ ၄၆၅၂ ရက်အကြာတွင် အသင်းဟောင်းရီးရဲလ်မက်ဒရစ်ရဲ့ ဘာနေဗျူးကွင်းသို့ တကျော့ပြန်ရောက်လာခဲ့ပါတယ်။

ဘင်ဖီကာနည်းပြဟာ ချန်ပီယံလိဂ်ပလေးအော့ဖ်ပထမအကျော့ပွဲစဉ်တုန်းက အနီကတ်ပြသခြင်းခံခဲ့ရလို့ ဒုတိယအကျော့ ဘာနေဗျူးကွင်းပွဲစဉ်တွင် ပွဲပယ်ခံထားရကာ ကိုယ်တိုင် ကြီးကြပ်နိုင်ခဲ့ခြင်း မရှိပါဘူး။

ပထမအကျော့ပွဲစဉ်တွင် ဗီနီရှပ်စ်အား ဂီယန်လူကာပရီစတီယန်နီက လူမျိုးရေးခွဲခြားမှု ပြုလုပ်ခဲ့မှုနှင့်အတူ မော်ရင်ဟိုနှင့် ရီးရဲလ်မက်ဒရစ်အကြား ဆက်ဆံရေးက ဆက်ဆံရေးကလည်း အဆုံးသတ်သွားခဲ့ပါတယ်။

မော်ရင်ဟိုဟာ ဗုဒ္ဓဟူးနေ့ညတုန်းက ဘာနေဗျူးတွင် ရီးရဲလ်မက်ဒရစ်အား ၂-၁ ဖြင့် ရှုံးနိမ့်တဲ့ပွဲစဉ်ကို ပွဲကြည့်စင်မှ ကြည့်ရှုခြင်း မပြုဘဲ သတင်းထောက်များ မျက်ကွယ်နေရာမှာ ကြည့်ရှုသွားခဲ့ပါတယ်။

စပိန်သတင်းစာ Marca ရဲ့ ဖော်ပြလာမှုအရ မော်ရင်ဟိုဟာ ယင်းတစ်ပွဲလုံးအား အသင်းရဲ့ ဘတ်စ်ကားမှ ကြည့်ရှုသွားခဲ့ကြောင်း သိရပါတယ်။

ယင်းပွဲစဉ်တွင် ဂျာနယ်လစ်ပေါင်း ၃၀ ကျော်တို့ဟာ မော်ရင်ဟို ရောက်လာမှာကို စောင့်ဆိုင်းနေခဲ့ကြပေမယ့်လည်း စိတ်ပျက်စရာ ကြုံခဲ့ပါတယ်။

မော်ရင်ဟိုဟာ ဘာနေဗျူးကွင်းပွဲစဉ်တွင် လူလုံး ထွက်ပြခြင်း မပြုလုပ်ဘဲ အသင်းရဲ့ ဘတ်စ်ကားမှ တဆင့် တစ်ပွဲလုံးအား ကြည့်ရှုအား ကွင်းအတွင်းရှိ လက်ထောက်နည်းပြအား ညွှန်ကြားချက်များ ပေးခဲ့ပါတယ်။

စပိန်ဒုတိယတန်းအမှတ်ပေးဖလားအတွက် တိုက်ပွဲဝင်နေတဲ့ ကလပ်ရဲ့ ရှယ်ယာ ၂၅ ရာခိုင်နှုန်းကို ခရစ္စတီယာနိုရော်နယ်ဒို ဝယ်ယူလာ
=====================
ခရစ္စတီယာနိုရော်နယ်ဒိုဟာ စူပါစတားကစားသမားအဖြစ် ဘောလုံးလောကတွင် ဆယ်စုနှစ်နှစ်ခုကျော်ကြာ ရပ်တည်လာခဲ့ပြီးတဲ့နောက် ကစားသမားဘဝ အလွန်တွင်လည်း အသင်းပိုင်ရှင်အဖြစ် ဆက်ရှိနေလာတော့မှာ ဖြစ်ပါတယ်။

အသက် ၄၁ နှစ်ရှိ ခရစ္စတီယာနိုရော်နယ်ဒိုဟာ စပိန်ဒုတိယတန်းကလပ် အယ်လ်မီရီယာတွင် ရင်းနှီးမြှပ်နှံမှု ပြုလုပ်ပြီး တချိန်တွင် ဘောလုံးကလပ်ပိုင်ရှင် ဖြစ်လာရန် ရည်မှန်းထားကြောင်း ပြသလာပါတယ်။

ခရစ္စတီယာနိုရော်နယ်ဒိုဟာ အယ်လ်မီရီယာအသင်းရဲ့ ရှယ်ယာ ၂၅ ရာခိုင်နှုန်းအား CR7 Sports Investments ကုမ္ပဏီမှ တဆင့် ဝယ်ယူ ရင်းနှီးမြှပ်နှံလာတာပါ။

စပိန်ဒုတိယတန်းကလပ်ကို လွန်ခဲ့တဲ့ တစ်နှစ်တုန်းက ဆော်ဒီရင်းနှီးမြှပ်နှံသူများက ဝယ်ယူပြီးနောက် ခရစ္စတီယာနိုရော်နယ်ဒိုလည်း ပါဝင် ရင်းနှီးမြှပ်နှံလာတာပါ။

ရော်နယ်ဒိုဟာ အယ်လ်မီရီယာပိုင်ရှင် ဆော်ဒီရင်းနှီးမြှပ်နှံသူများအဖွဲ့ခေါင်းဆောင် မိုဟာမက်အယ်ခီရီဂျီနှင့် ရင်းနှီးသူ ဖြစ်ပြီး ၂၀၂၂ ခုနှစ်တုန်းက ယူနိုက်တက်မှ ထွက်ခွာလာစဉ် Al-Nassr သို့ ပြောင်းရွှေ့နိုင်အောင် ကြားဝင်ကူညီပေးခဲ့သူလည်း ဖြစ်ပါတယ်။

ယူဒီအယ်လ်မီရီယာအသင်းကို ၁၉၈၉ ခုနှစ်တွင် တည်ထောင်ခဲ့တာ ဖြစ်ပြီး ယခုရာသီ ဆီဂါဒန် ၂၇ ပွဲအပြီးတွင် ၄၈ မှတ်ဖြင့် တတိယနေရာတွင် ရပ်တည်နေပါတယ်။ ၎င်းတို့ဟာ ထိပ်ဆုံးမှ ရီးရဲလ်ရေဆင်းနှင့် ရမှတ် ၂ မှတ်တည်းသာ ကွာဟနေကာ ချန်ပီယံဆုအတွက် တိုက်ပွဲဝင်နေတဲ့အသင်းဖြစ်ပါတယ်။