ဆာလာရဲ့ ခံစားမှုကို နားလည်ပေမဲ့ အခုလို မပြောကြားသင့်ဘူးလို့ အိုဝင် မှတ်ချက်ပြု

လီဗာပူးလ်အသင်းရဲ့ တိုက်စစ်မှူးဟောင်း မိုက်ကယ်အိုဝင်က လက်ရှိ လီဗာပူးလ်တိုက်စစ်ကစားသမား ဆာလာရဲ့ ခံစားမှုကို နားလည်ပေမဲ့ အခုလို မပြောကြားသင့်ဘူးလို့ မှတ်ချက်ပြုခဲ့ပါတယ်။
လီဗာပူးလ်အသင်းဟာ ဒီရာသီမှာ ရလဒ်ဆိုးတွေနဲ့ ရင်ဆိုင်နေရပြီး ဒီအတွက် အီဂျစ်တိုက်စစ်ကစားသမား ဆာလာရဲ့ စွမ်းဆောင်ရည်ကို မေးခွန်းထုတ်ခဲ့ကြသလို၊ နည်းပြ အာနယ်ဆလော့ကလည်း နောက်ဆုံး(၃)ပွဲဆက်တိုက် ပွဲထွက်စာရင်းက ချန်လှပ်ပြီး အရန်ခုံထိုင်ခိုင်းခဲ့ပါတယ်။
ဒါကြောင့် လိဒ်စ်နဲ့ ပွဲအပြီးမှာ ဆာလာက သူ့အနေနဲ့ မမျှမတဆက်ဆံခံနေရတယ်လို့ ခံစားရကြောင်းနဲ့ အသင်းမှာ ဆက်ရှိဖို့ မသေချာတော့ကြောင်း ပြောကြားခဲ့ပါတယ်။
ဒီအတွက် မိုက်ကယ်အိုဝင်က လူမှုကွန်ရက်မှာ ''အိုး မိုဆာလာ။ မင်း ဘယ်လိုခံစားရတယ်ဆိုတာ ငါ တွေးကြည့်နိုင်ပါတယ်။ မင်းက အသင်းကို အချိန်အကြာကြီး သယ်ပိုးလာခဲ့ပြီး ဆုဖလားအားလုံးလည်း ရယူခဲ့တာပါ။ ဒါပေမဲ့ ဒါက အသင်းလိုက်အားကစားနည်းပါ။ ပြီးတော့ မင်းအနေနဲ့ လူသိရှင်ကြားမပြောသင့်ဘူး။ တစ်ပတ်အတွင်း အာဖရိကဖလားပွဲ သွားတဲ့အခါ မင်းရဲ့နှုတ်ခမ်းကို ကိုက်ထားပြီး မင်းရဲ့နိုင်ငံကို ပျော်ရွှင်စွာကိုယ်စားပြုလိုက်ပါ။ ပြီးတော့မှ မင်းပြန်လာတဲ့အခါ ဘယ်လိုဖြစ်မလဲ ကြည့်လိုက်ပါ'' လို့ ရေးသားခဲ့ပါတယ်။
လီဗာပူးလ်အသင်းတာဝန်ရှိသူတွေကလည်း ဆာလာရဲ့ လူသိရှင်ကြားထုတ်ဖော်ပြောကြားမှုအတွက် စိတ်ပျက်နေကြပြီး အင်တာမီလန်နဲ့ ယှဉ်ပြိုင်ရမယ့် ချန်ပီယံလိဂ်ပွဲအတွက် ခေါ်ယူမသွားဘဲ ချန်လှပ်ခဲ့ဖွယ်ရှိကြောင်းလည်း သတင်းထွက်နေပါတယ်။

ဥရောပထိပ်သီးလိဂ်(၅)ခုထဲမှာ ၂၀၂၅ ခုနှစ်အတွင်း အိမ်ကွင်းရှုံးပွဲမရှိတဲ့ တစ်သင်းတည်းသောအသင်းအဖြစ် နာပိုလီ မှတ်တမ်းဝင်

နာပိုလီအသင်းဟာ ဥရောပထိပ်သီးလိဂ်(၅)ခုထဲမှာ ၂၀၂၅ ခုနှစ်အတွင်း အိမ်ကွင်းရှုံးပွဲမရှိတဲ့ တစ်သင်းတည်းသောအသင်းအဖြစ် မှတ်တမ်းဝင်ခဲ့ကြောင်း သိရပါတယ်။
နာပိုလီအသင်းဟာ မနေ့က ယှဉ်ပြိုင်ကစားခဲ့တဲ့ စီးရီးအေအိမ်ကွင်းပွဲစဉ်မှာ ဂျူဗင်တပ်စ်အသင်းကို (၂-၁)ဂိုးနဲ့ အနိုင်ရခဲ့တာကြောင့် မှတ်တမ်းကောင်း ပိုင်ဆိုင်ခဲ့တာပါ။
ဂျူဗင်တပ်စ်နဲ့ပွဲက နာပိုလီအသင်းအတွက် ၂၀၂၅ ခုနှစ်အတွင်း ယှဉ်ပြိုင်ကစားရတဲ့ အိမ်ကွင်းနောက်ဆုံးပွဲစဉ်ဖြစ်ပြီး လာမယ့် စီးရီးအေပွဲစဉ်နှစ်ပွဲကိုတော့ အဝေးကွင်းတွေမှာသာ ယှဉ်ပြိုင်ကစားရမှာပါ။
နာပိုလီအသင်းဟာ ၂၀၂၅ ခုနှစ်အတွင်း စီးရီးအေအိမ်ကွင်းပွဲစဉ် (၁၇)ပွဲ ယှဉ်ပြိုင်ကစားခဲ့ရာမှာ (၁၃)ပွဲနိုင်၊ (၄)ပွဲသရေရလဒ်နဲ့ ရှုံးပွဲမရှိခဲ့ပါဘူး။
နာပိုလီအသင်းဟာ ၁၉၈၇ ခုနှစ်တုန်းက တစ်နှစ်အတွင်း အိမ်ကွင်းရှုံးပွဲမရှိအောင် စွမ်းဆောင်ခဲ့ပြီးနောက်ပိုင်း ဒီနှစ်မှာ ထပ်မံစွမ်းဆောင်နိုင်ခဲ့တာဖြစ်ကြောင်း သိရပါတယ်။
ဂျူဗင်တပ်စ်နဲ့ပွဲမှာ နာပိုလီအသင်းရဲ့ သွင်းဂိုးနှစ်ဂိုးစလုံးကို တိုက်စစ်မှူး ဟွိုင်လန်းက သွင်းယူပေးခဲ့ပြီး အမှတ်ပေးဇယားထိပ်ဆုံးနေရာကိုလည်း ရယူနိုင်ခဲ့ပါတယ်။

၂၀၂၅ ဆီးဂိမ်းစ် အမျိုးသမီးဘောလုံးပြိုင်ပွဲမှာ မြန်မာအသင်း နှစ်ပွဲဆက်အနိုင်ရ

မလေးရှား ၀-၃ မြန်မာ
၂၀၂၅ ဆီးဂိမ်းစ် အမျိုးသမီးဘောလုံးပြိုင်ပွဲရဲ့ အုပ်စု ( ဒုတိယပွဲစဥ်တွေကို ဒီနေ့ ယှဥ်ပြိုင်ကစားခဲ့ရာမှာ မြန်မာအသင်းက မလေးရှားကို ဂိုးပြတ်အနိုင်ယူပြီး နှစ်ပွဲဆက် အနိုင်ရခဲ့ပါတယ်။
မြန်မာအသင်းက ပွဲထွက်လူစာရင်းကို အပြောင်းအလဲလုပ်ခဲ့တာကြောင့် အားနည်းချက်တချို့ရှိခဲ့ပေမဲ့ ပြိုင်ဘက်အသင်းကို အသာစီးယူကစားနိုင်ခဲ့တဲ့အပြင် ဒုတိယပိုင်းမှာ မလေးရှားကစားသမားတစ်ယောက် ထုတ်ပယ်ခံခဲ့ရတာကြောင့် ပိုပြီးလွယ်ကူသွားခဲ့ပါတယ်။
မြန်မာအသင်းအတွက် ဂိုးတွေကို စန်းသော်သော် ( ၂၇ မိနစ်)၊ မေထက်လူ ( ၃၆ မိနစ်)၊ ဝင်းသိင်္ဂီထွန်း ( ၆၅ မိနစ်) တို့မှာ သွင်းယူခဲ့တာပါ။
မြန်မာအသင်းဟာ နှစ်ပွဲဆက်အနိုင်ရလဒ်ကြောင့် ဆီမီးဖိုင်နယ်တက်ရောက်ဖို့ အတော်လေးအခြေအနေကောင်းသွားခဲ့ပြီး ဗီယက်နမ် - ဖိလစ်ပိုင်ပွဲမှာ ဖိလစ်ပိုင်အနိုင်မရခဲ့ရင် ပွဲမကုန်ခင် အဖြေထွက်မှာ ဖြစ်ပါတယ်။

ထိုင်းကလပ် နာခွန်ရတ်ချာဆီမာအသင်း ဟိန်းဖြိုးဝင်းကို ခေါ်ယူ

ထိုင်းလိဂ်-၁ ကလပ် နာခွန်ရတ်ချာဆီမာအသင်းဟာ မြန်မာ့လက်ရွေးစင် ညာနောက်ခံလူ ဟိန်းဖြိုးဝင်းကို ကာလတိုစာချုပ်နဲ့ ခေါ်ယူလိုက်ကြောင်း သိရပါတယ်။
နာခွန်ရတ်ချာဆီမာအသင်းဟာ မြန်မာ့လက်ရွေးစင် ညာနောက်ခံလူ ဟိန်းဖြိုးဝင်းကို ယခုရာသီအတွက် ရာသီဝက်စာချုပ်နဲ့ ခေါ်ယူလိုက်တာဖြစ်ပြီး ကစားသမားရဲ့ ခြေစွမ်းပေါ်မူတည်ကာ သက်တမ်းတိုးစာချုပ် ချုပ်ဆိုသွားမှာဖြစ်ကြောင်း သိရပါတယ်။
ဟိန်းဖြိုးဝင်းဟာ ယခုရာသီမှာ MNL ကလပ် ရှမ်းယူနိုက်တက်အသင်းမှာ ကစားနေသူဖြစ်ပြီး ယခုအခါ ရှမ်းယူနိုက်တက်အသင်းက ကစားသမားရဲ့ ဆန္ဒကို ဦးစားပေးတဲ့အနေနဲ့ ထိုင်းလိဂ်-၁ ကလပ် နာခွန်ရတ်ချာဆီမာအသင်းထံကို ပြောင်းရွှေ့ခွင့်ပြုခဲ့တာဖြစ်ကြောင်း သိရပါတယ်။
နာခွန်ရတ်ချာဆီမာအသင်းဟာ ယခုရာသီ ထိုင်းလိဂ်-၁ အမှတ်ပေးပြိုင်ပွဲမှာ (၁၃) ပွဲကစား၊ နိုင်ပွဲ တစ်ပွဲ သာရသေးပြီး အမှတ်ပေးဇယားအောက်ဆုံးနေရာမှာ ရပ်တည်နေလျက်ရှိပါတယ်။
နာခွန်ရတ်ချာဆီမာအသင်းဟာ ယခုရာသီဝက်အ ပြောင်းအရွှေ့ကာလမှာ ဟိန်းဖြိုးဝင်းအပြင် ပြင်သစ်တိုက်စစ်မှူးတစ်ဦးကိုလည်း ခေါ်ယူ ဖြည့်တင်လိုက်ကြောင်း သိရပါတယ်။
ဟိန်းဖြိုးဝင်းဟာ ထိုင်းလိဂ်-၁ ကလပ် ရတ်ချာဘူရီအသင်းမှာ ၂၀၂၂ ခုနှစ်ကနေ ၂၀၂၄ ခုနှစ်အထိ ကစားခဲ့ပြီး ယခုရာသီအစမှာ မိခင်ကလပ် ရှမ်းယူနိုက်တက်အသင်းထံကို ပြန်လည် ရောက်ရှိလာကာ ယခုအခါ ထိုင်းကလပ်အသင်းထံကို ပြန်လည်ပြောင်းရွှေ့သွားတာဖြစ်ပါတယ်။

၂၀၂၅ ဆီးဂိမ်းစ် အမျိုးသမီးဘောလုံးပြိုင်ပွဲမှာ ဗီယက်နမ်ကို ဖိလစ်ပိုင်အသင်း အနိုင်ရခဲ့လို့ ဆီမီးဖိုင်နယ်တက်ရောက်ခွင့်အတွက် နောက်ဆုံးပွဲစဥ်အထိ အမှတ်လုရမယ်

ထိုင်းနိုင်ငံမှာ ကျင်းပနေတဲ့ ၂၀၂၅ ဆီးဂိမ်းစ် အမျိုးသမီးဘောလုံးပြိုင်ပွဲရဲ့ အုပ်စု( ပွဲစဥ်တွေကို ဒီနေ့ယှဥ်ပြိုင်ခဲ့ရာမှာ မြန်မာက မလေးရှားကို (၃-၀)ဂိုးနဲ့ အနိုင်ရပြီး ဖိလစ်ပိုင်က ဗီယက်နမ်ကို (၁-၀) ဂိုးနဲ့ အနိုင်ရခဲ့တာကြောင့် ဆီမီးဖိုင်နယ်တက်ရောက်ခွင့်အတွက် အဖြေမပေါ်သေးဘဲ ဖြစ်ခဲ့ပါတယ်။
နှစ်ပွဲစီ ယှဥ်ပြိုင်ကစားအပြီးမှာ မြန်မာအသင်းက ၆ မှတ်ရရှိထားပြီး ဖိလစ်ပိုင်နဲ့ ဗီယက်နမ်တို့က ၃ မှတ်စီ ရရှိထားပါတယ်။
အုပ်စုနောက်ဆုံးပွဲမှာ မြန်မာနဲ့ ဗီယက်နမ်၊ ဖိလစ်ပိုင်နဲ့ မလေးရှားတို့ ယှဥ်ပြိုင်ကစားရမှာဖြစ်ပြီး မြန်မာအသင်း ရှုံးလို့မရတဲ့အနေအထား ဖြစ်နေတုန်းပါပဲ။
အုပ်စုနောက်ဆုံးပွဲတွေကို ဒီဇင်ဘာ ၁၁ မှာ ယှဥ်ပြိုင်ကစားရမှာဖြစ်ပြီး အုပ်စုပထမနဲ့ ဒုတိယရရှိတဲ့အသင်း ဆီမီးဖိုင်နယ် တက်ရောက်ခွင့်ရမှာပါ။

၂၀၂၅ ဆီးဂိမ်းစ် အမျိုးသားဘောလုံးပြိုင်ပွဲမှာ
ဖိလစ်ပိုင် ဆီမီးဖိုင်နယ်တက်ရောက်ခဲ့ပြီး မြန်မာအသင်း အကောင်းဆုံးအုပ်စုဒုတိယနေရာသာ မျှော်လင့်နိုင်တော့မယ်

ထိုင်းနိုင်ငံမှာ ကျင်းပနေတဲ့ ၂၀၂၅ ဆီးဂိမ်းစ် အမျိုးသားဘောလုံးပြိုင်ပွဲမှာ မြန်မာအသင်းဟာ အကောင်းဆုံးအုပ်စုဒုတိယနေရာသာ မျှော်လင့်နိုင်တော့မှာဖြစ်ကြောင်း သိရပါတယ်။
ဒီနေ့ ယှဥ်ပြိုင်ကစားခဲ့တဲ့ အုပ်စုတွင်းပြိုင်ဘက်နှစ်သင်းရဲ့ ပွဲစဥ်မှာ ဖိလစ်ပိုင်အသင်းက အင်ဒိုနီးရှားကို (၁-၀) ဂိုးနဲ့ အနိုင်ရပြီး အုပ်စုပထမနေရာ ရရှိသွားတာကြောင့် ဖြစ်ပါတယ်။
ဆီးဂိမ်းစ်အမျိုးသားဘောလုံးပြိုင်ပွဲမှာ သုံးသင်းစီပါဝင်တဲ့ အုပ်စုသုံးခု ခွဲခြားယှဥ်ပြိုင်နေပြီး အုပ်စုပထမရတဲ့သုံးသင်းနဲ့ အကောင်းဆုံးအုပ်စုဒုတိယတစ်သင်းသာ ဆီမီးဖိုင်နယ်အဆင့်ကို တက်ရောက်နိုင်မှာပါ။
မြန်မာအသင်းပါဝင်တဲ့ အုပ်စုမှာ ဖိလစ်ပိုင်က နှစ်ပွဲစလုံးအနိုင်ရရှိခဲ့တာကြောင့် အုပ်စုပထမနေရာရရှိခဲ့ပြီး မြန်မာနဲ့ အင်ဒိုနီးရှားကတော့ အုပ်စုဒုတိယနေရာအတွက်သာ ဒီဇင်ဘာ ၁၂ မှာ အမှတ်လုရတော့မှာ ဖြစ်ပါတယ်။

၂၀၂၅ ထိုင်းဆီးဂိမ်းစ် ဖွင့်ပွဲအခမ်းအနားကို
ယနေ့ကျင်းပမယ်

၃၃ ကြိမ်မြောက်အဖြစ် ကျင်းပမယ့် ထိုင်းဆီးဂိမ်းစ် ဖွင့်ပွဲအခမ်းအနားကို ယနေ့ မြန်မာစံတော်ချိန် ညနေ ၆ နာရီခွဲမှာ ဘန်ကောက်မြို့ရှိ ရာဇမင်္ဂလာကွင်းအတွင်း ကျင်းပပြုလုပ်မှာဖြစ်ပါတယ်။
ပြိုင်ပွဲကို ဒီဇင်ဘာလ ၉ ရက်ကနေ ၂၀ ရက်အထိ ၁၂ ရက်ကြာ ကျင်းပသွားမှာပါ။
ပြိုင်ပွဲမှာ အာဆီယံ ၁၁ နိုင်ငံက အားကစားသမားပေါင်း ၉၃၆၆ ဦး ဝင်ရောက်ယှဉ်ပြိုင်ကြပါ
လိမ့်မယ်။
အားကစားနည်းအမျိုးအစားပေါင်း ၅၀ မျိုး ထည့်သွင်းကျင်းပမှာဖြစ်ပြီး ပွဲစဉ်ပေါင်း ၅၇၄ ပွဲ
ရှိမှာဖြစ်တယ်။
မြန်မာအားကစားအဖွဲ့ကတော့ အားကစားသမား ၅၄၃ ဦးနဲ့ ဝင်ရောက်ယှဉ်ပြိုင်မှာပါ။
အိမ်ရှင် ထိုင်းအားကစားအဖွဲ့က အများဆုံးအဖြစ် အားကစားသမား ၁၅၃၅ ဦး ပါဝင်ယှဉ်ပြိုင်မှာ
ဖြစ်တယ်။
ထိုင်းပြီးနောက် ဖိလစ်ပိုင်က ၁၁၆၈ ဦး၊ မလေးရှားက ၁၁၄၂ ဦး၊ အင်ဒိုနီးရှားက ၁၀၅၅ ဦး ဝင်ရောက်ယှဉ်ပြိုင်မှာဖြစ်ပါတယ်။

မန်ယူနိုက်တက်အသင်း ယခုထက် ပိုကောင်း
နိုင်သေးကြောင်း အာမိုရင်မ် ပြောကြား

မန်ယူနိုက်တက်အသင်းနည်းပြ ရူဘင်အာမိုရင်မ်က ဝုလ်ဗ်အသင်းကို ၄-၁ ဂိုးနဲ့ ဂိုးပြတ်နိုင်ပြီးနောက် အသင်းအနေနဲ့ ယခုထက် ပိုကောင်းနိုင်သေးကြောင်း ပြောကြားခဲ့ပါတယ်။
ပထမပိုင်းမှာ တစ်ဂိုးစီ သရေကျခဲ့ပေမဲ့ ဒုတိယပိုင်းသွင်းဂိုးတွေနဲ့ မန်ယူနိုက်တက်အသင်း နိုင်ပွဲပြန်ရှာတွေ့ခဲ့တာပါ။
မန်ယူနိုက်တက်အတွက် ဂိုးများကို အသင်းခေါင်းဆောင် ဘရူနိုဖာနန်ဒက်စ်က ပယ်နယ်တီဂိုးအပါအဝင် နှစ်ဂိုး၊ အမ်ဘူမိုနဲ့ မေဆန်မောင့်တို့က တစ်ဂိုးစီ သွင်းခဲ့တာပါ။
မန်ယူနိုက်တက်အသင်းဟာ ယခုနိုင်ပွဲနဲ့အတူ ပရီးမီးယားလိဂ် အမှတ်ပေးဇယားမှာ အဆင့်ခြောက်နေရာကို တက်လှမ်းလာပြီး အဆင့်ငါးနေရာက ချယ်လ်ဆီးအသင်းနဲ့ အမှတ်တူရပ်တည်နေပါတယ်။
''ပွဲကို ကျွန်တော်တို့ ကောင်းကောင်းစတင်နိုင်ခဲ့တယ်လို့ ယူဆပါတယ်။ ကျွန်တော်တို့ တစ်ဂိုးသွင်းနိုင်ခဲ့တယ်။ ပြီးတော့ ဝုလ်ဗ်အသင်းကို အခွင့်အရေး အနည်းငယ် ပြန်ပေးခဲ့တယ်။ ပထမပိုင်းပြီးခါနီးမှာ ကျွန်တော်တို့ အခြေအနေ ဆိုးရွားခဲ့တယ်။ ဒါပေမဲ့ ဒုတိယပိုင်းမှာတော့ ကျွန်တော်တို့ ဆုံးဖြတ်ချက်တွေအတွက် ကောင်းမွန်တဲ့ အရှိန်အဟုန်နဲ့
အရည်အသွေးရှိခဲ့ပါတယ်။ ကျွန်တော်တို့ ပွဲကို ပြီးဆုံးစေခဲ့တယ်။ ဝုလ်ဗ်နဲ့ပွဲမှာ ခက်ခဲတဲ့အခိုက်အတန့်တွေလည်း ရှိခဲ့တယ်။ ကောင်းမွန်တဲ့ ညနေခင်းတစ်ခုပါပဲ။ ပြီးခဲ့တဲ့ရာသီကနဲ့ နှိုင်းယှဉ်ရင် ကျွန်တော်တို့ များစွာတိုးတက်လာတယ်လို့ ယူဆပါတယ်။ ဒီရာသီမှာ ကျွန်တော်တို့ အခွင့်အရေးတွေ ပိုဖန်တီးနိုင်ခဲ့တယ်။ ဂိုးတွေ ပိုသွင်းနိုင်ခဲ့တယ်။
အန္တရာယ်ပေးနိုင်တဲ့ အခြေအနေတွေလည်း ပိုရှိလာတယ်။ ဒါနဲ့ပတ်သက်ပြီး ကျွန်တော် တကယ်ကျေနပ်ပါတယ်။ ပထမဆုံးမိနစ်ကတည်းက ခပ်မြန်မြန်မဖြစ်ရင်လည်း ဒီပွဲကိုအနိုင်ရမယ်လို့ ကျွန်တော် ခံစားမိခဲ့ပါတယ်။ ဒုတိယပိုင်းကစားပုံနဲ့ပတ်သက်ပြီး ကျွန်တော် အမှန်တကယ် ကျေနပ်ဝမ်းသာမိပါတယ်''လို့ အာမိုရင်မ်က ပြောခဲ့ပါတယ်။
မန်ယူနိုက်တက်အသင်းဟာ အာမိုရင်မ်လက်ထက် ၁၃ လတာအတွင်း ဂိုးအများဆုံးပွဲ သွင်းဂိုးအရေအတွက်ကို လိုက်မီခဲ့ပါတယ်။
အာမိုရင်မ်လက်အောက် အဝေးကွင်းပွဲစဉ်တစ်ပွဲမှာ ပထမဆုံးအကြိမ် လေးဂိုး သွင်းခဲ့တာပါ။
ယခုပွဲမှာ မန်ယူနိုက်တက်အသင်းဟာ ဂိုးကန်သွင်းခွင့် ၂၇ ကြိမ်ရခဲ့ပြီး အာမိုရင်မ်ကိုင်တွယ်မှုအောက်မှာ အများဆုံးဖြစ်ခဲ့ပါတယ်။
မန်ယူနိုက်တက်အနေနဲ့ ၂၀၂၃ ခုနှစ် ဒီဇင်ဘာလက ချယ်လ်ဆီးနဲ့ပွဲမှာ ၂၈ ကြိမ် ရှိခဲ့ပြီးနောက် အများဆုံးအဖြစ် မှတ်တမ်းဝင်ခဲ့ပါတယ်။

ဆာလာကို ချန်ပီယံလိဂ်လူစာရင်းက ချန်လှပ်ခဲ့ပြီး မီဒီယာတွေထက် ပြောကြားခဲ့မှုအပေါ် အံ့အားသင့်မိကြောင်း အာနယ်ဆလော့ မှတ်ချက်ပြု

လီဗာပူးလ်အသင်းနည်းပြ အာနယ်ဆလော့က မီဒီယာတွေထက် ဆာလာရဲ့ပြောကြားခဲ့မှုအပေါ် အံ့အားသင့်မိကြောင်း မှတ်ချက်ပြုခဲ့ပါတယ်။
ဆာလာဟာ ယနေ့ကစားမယ့် အင်တာမီလန်နဲ့ ချန်ပီယံလိဂ်ပွဲ လူစာရင်းကလည်း ချန်လှပ်ခံခဲ့ရပါတယ်။
''သူပြောတဲ့အကြောင်းတွေကို သိနားလည်ဖို့ဆိုတာ ကျွန်တော့်အဖို့ ခက်ခဲပါတယ်။ ဒါက ကျွန်တော် ခံစားရတဲ့ပုံစံမျိုး မဟုတ်ပါဘူး။ သူ့မှာလည်း သူ့အခွင့်အရေးရှိပါတယ်။ ဒါပေမဲ့ မီဒီယာတွေမှာတော့ ပြောဆိုခွင့် သူ့မှာ မရှိပါဘူး။
သူ အလွန်လေးစားတတ်သူဖြစ်ပြီး ပြီးခဲ့တဲ့အပတ် မတိုင်ခင်အထိတော့ လေ့ကျင့်ရေးလည်း ကောင်းကောင်းလုပ်ပါတယ်။ သူပြောတဲ့စကားတွေနဲ့ ပတ်သက်ပြီး ကျွန်တော် အံ့အားသင့်ရပါတယ်။ ကျွန်တော်တို့ စကားပြောနေတာ
ဟုတ်ပါတယ်။ ဒါပေမဲ့ အရာရာတိုင်း သဘောမတူထားပါဘူး။ ပွဲမကစားရတဲ့ ကစားသမားတစ်ယောက်က ဒီလိုပြောတာဟာ ပထမဆုံးနဲ့ နောက်ဆုံးအကြိမ်လည်း မဟုတ်ပါဘူး။ ကျွန်တော်တို့ ဒီရာသီမှာ ရုန်းကန်နေရတယ်။
ဒါကိုအဖြေရှာဖို့ ကြိုးစားခဲ့တယ်။ ဒါက ကျွန်တော့်အလုပ်ပါ။ နော်တင်ဟမ်ဖောရက်စ်၊ PSVနဲ့ပွဲက အားနည်းချက်တွေကို ရှာဖွေခဲ့ပြီး ကွင်းလယ်ကစားသမားတစ်ဦး ထပ်ထည့်ကစားဖို့ ဆုံးဖြတ်ခဲ့ပါတယ်''လို့ အာနယ်ဆလော့က
ပြောခဲ့ပါတယ်။
ဆာလာအနေနဲ့ လာမယ့်စနေနေ့ ဘရိုက်တန်နဲ့ ပရီးမီးယားလိဂ်ပွဲမှာလည်း ပါဝင်ကစားဖို့ မသေချာပါဘူး။
လာမယ့်တနင်္လာနေ့မှာတော့ အီဂျစ်လက်ရွေးစင်အသင်းနဲ့ အာဖရိကနိုင်ငံများဖလားယှဉ်ပြိုင်ဖို့ သွားရောက်ရပါလိမ့်မယ်။
ဆာလာဟာ ၂၀၁၇ ခုနှစ်မှာ ရိုးမားအသင်းကနေ ရောက်လာပြီးကတည်း ဂိုး ၂၅၀ သွင်းထားပြီး အခုရာသီမှာတော့ ပြိုင်ပွဲစုံ ၁၉ ပွဲမှာ ငါးဂိုးသာ သွင်းနိုင်ခဲ့ပါတယ်။

ကလပ်နှင့် ဆလော့ကို ဝေဖန်ခဲ့တဲ့ ဆာလက်ကို အင်တာမီလန်နှင့်ပွဲတွင် လူစာရင်းတွင်ပင် မထည့်သွင်းရန် လီဗာပူးစဉ်းစားနေ
======================

လီဗာပူးဟာ အင်တာမီလန်နှင့် ကစားရမယ့် ချန်ပီယံလိဂ်အဝေးကွင်းပွဲစဉ်တွင် မိုဟာမက်ဆာလက်ကို လူစာရင်းထဲတွင်ပင် မထည့်သွင်းဘဲ အိမ်တွင် ချန်ထားရစ်ခဲ့ရန် စဉ်းစားနေပါတယ်။
လီဗာပူးအသင်းတာဝန်ရှိသူများဟာ လိဒ်နှင့်သုံးဂိုးစီသရေကျတဲ့ပရီးမီးယားလိဂ်ပွဲစဉ်အပြီးတွ်င နည်းပြအန်းဆလော့နှင့် မည်သည့်ဆက်ဆံရေးမှ မရှိကြောင်း၊ လီဗာပူးတာဝန်ရှိသူများဘက်က ကတိချိုးဖောက်ကြောင်း ဝေဖန်ခဲ့တဲ့ ဆာလက်အား အရေးယူရေးနှင့်ပတ်သက်ပြီး အလေးအနက်ထား ဆွေးနွေးနေကြပါတယ်။
ဆာလက်ဟာ လိဒ်နှင့်ပွဲစဉ်တွင် လီဗာပူးကစားသမားဘဝတွင် ပထမဆုံးအကြိမ်အဖြစ် ၃ ပွဲဆက် အရန်ခုံမှာ ထိုင်နေခဲ့ရပါတယ်။
ယင်းနောက် ဆာလက်ဟာ လီဗာပူးအတွက် ဂိုး ၂၅၀ သွင်းယူကာ ဆုဖလားများစွာ ရယူနိုင်ရေး အဓိကနေရာမှ ကူညီခဲ့ပေမယ့်လည်း အသင်းရဲ့ ရလဒ်ဆိုးရွားမှုများအတွက် သူ့ကို အပြစ်ပုံကျလာအောင် ဆလော့နှင့် လီဗာပူးတို့ လုပ်နေကြောင်း စွပ်စွဲဝေဖန်ခဲ့ပါတယ်။
ယနေ့တွင် Daily Mail ရဲ့ဖော်ပြလာမှုအရ လီဗာပူးဟာ ကြားရက်တွင် ဆန်စီရိုသို့ သွားရောက်ကာ အင်တာမီလန်နှင့်ပွဲအတွက် လီဗာပူးလူစာရင်းတွင် ဆာလက်ကို ထည့်သွင်းရေးနှင့်ပတ်သက်ပြီး ဆွေးနွေးနေကြကြောင်း သိရပါတယ်။
လီဗာပူးတာဝန်ရှိသူများဟာ ရလဒ်ဆိုးရွားနေပေမယ့်လည်း နည်းပြအန်းဆလော့အပေါ်တွင် အပြည့်အဝထောက်ခံအားပေးနေဆဲ ဖြစ်ပြီး ကျောနံပါတ် ၁၁ ကစားသမားအား အရေးယူနှင့်ပတ်သက်ပြီး အလေးအနက်ထား ဆွေးနွေးနေကြပါတယ်။
လီဗာပူးနည်းပြဆလော့ဟာ အင်တာမီလန်နှင့်ပွဲစဉ်မတိုင်မီ သတင်းစာရှင်းလင်းပွဲတွင် ဆာလက်နှင့်ပတ်သက်တဲ့ မေးခွန်းများ မေးမြန်းခြင်းကိုလည်း ရင်ဆိုင်လာရပါဦးမယ်။