တိုက်လေယာဉ်များပြဿနာအတွက် တရုတ်သံအမတ်ကြီးကို ဂျပန်အစိုးရဆင့်ခေါ်

အိုကီနာဝါ ကျွန်းစုအနီးတရုတ်တိုက်လေယာဉ်များက ဂျပန်တိုက်လေယာဉ်များကို လက်နက်ပစ်လွှတ်မှု ထိန်းချုပ်ရေးရေဒါစနစ်ဖြင့်ချိန်ရွယ်ခဲ့ပြီးနောက် ယင်းဖြစ်စဉ်နှင့်ပတ်သက်၍ ဂျပန်နိုင်ငံခြားရေးဝန်ကြီးဌာနက ဂျပန်နိုင်ငံဆိုင်ရာတရုတ်သံအမတ်ကြီးကို ဒီဇင်ဘာ ၇ရက်တွင် ဆင့်ခေါ်ကန့်ကွက်ခဲ့ကြောင်း သိရသည်။
ဒီဇင်ဘာ ၆ ရက်က တရုတ်ရေတပ် လျောင်နင်းလေယာဉ်တင်သင်္ဘောပေါ်မှ ပျံတက်ခဲ့သော ဂျေ၁၅ တိုက်လေယာဉ်များက အိုကီနာဝါကျွန်းစုအနီးတွင် ဂျပန်တိုက်လေယာဉ်များကို လက်နက်ပစ်လွှတ်မှု
ထိန်းချုပ်ရေးရေဒါစနစ်များဖြင့် နှစ်ကြိမ်တိုင်တိုင် ချိန်ရွယ်ခဲ့ကြောင်း ဂျပန်ကာကွယ်ရေးဝန်ကြီးဌာနက ဒီဇင်ဘာ ၇ ရက်တွင် ပြောကြားထားသည်။
တိုက်လေယာဉ် များသည်ပစ်မှတ်ရှာဖွေသတ်မှတ်ရေးအတွက်ရေဒါစနစ်ကို အသုံးပြုနိုင်သလို ရှာဖွေရေးနှင့် ကယ်ဆယ်ရေးလုပ်ငန်းများအတွက်လည်း ရေဒါစနစ်များ အသုံးချနိုင်သည်။
သို့ရာတွင် တရုတ်တိုက်လေယာဉ်များ၏ ဒီဇင်ဘာ ၆ ရက် လုပ်ရပ်များသည် အလွန်အန္တရာယ်ကြီး
ကြောင်း ဂျပန်နိုင်ငံက ဝေဖန်ထားသည်။
သို့ရာတွင် တိုက်လေယာဉ်များဖြစ်စဉ်နှင့်ပတ်သက်၍ ဂျပန်အစိုးရ၏ပြောကြားချက်ကို တရုတ်ရေတပ်ကငြင်းပယ်ထားသည်။အိုကီနာဝါကျွန်းစုအနီး နိုင်ငံတကာရေပြင်အတွင်း တရုတ်ရေတပ် စစ်ရေးလေ့ကျင့် နေစဉ် ဂျပန်တိုက်လေယာဉ်များက အကြိမ်ကြိမ်ချဉ်းကပ်ပျံသန်း၍ အနှောင့်အယှက်ပေးခဲ့ကြောင်း တရုတ်ရေတပ် ပြောရေးဆိုခွင့်ရှိသူက ဒီဇင်ဘာ ၇ ရက်တွင်ပြောကြားထားသည်။

အမေရိကန်သမ္မတဒေါ်နယ်ထရန့်၏ အမျိုးသားလုံခြုံရေး မဟာဗျူဟာ ရုရှားကြိုဆို

အမေရိကန်သမ္မတ ဒေါ်နယ်ထရန့်၏ အမျိုးသားလုံခြုံရေး မဟာဗျူဟာသစ်ကို ရုရှားအစိုးရကဒီဇင်ဘာ ၇ ရက်တွင် ကြိုဆိုလိုက်ကြောင်း သိရသည်။
ရုရှားနိုင်ငံသည် စစ်အေးတိုက်ပွဲခေတ် ရန်သူဟောင်းဖြစ်သော အမေရိကန်ပြည်ထောင်စုကထုတ်ပြန်သည့် အမျိုးသားလုံခြုံရေး မဟာဗျူဟာစာတမ်းတစ်ရပ်ကို ပထမဆုံးအကြိမ်အဖြစ် ကြိုဆိုစကားပြောကြား ခဲ့ခြင်းဖြစ်သည်။
အမေရိကန်သမ္မတ ဒေါ်နယ်ထရန့်၏ အမျိုးသားလုံခြုံရေး မဟာဗျူဟာသစ်ပါ သဘောတရားများမှာ ရုရှားနိုင်ငံ၏ ကိုယ်ပိုင်သဘောတရားများနှင့် အတော်လေးတိုက်ဆိုင်မှုရှိကြောင်း ကရင်မလင်
နန်းတော် သတင်းထုတ်ပြန်ချက်၌ ဖော်ပြထားသည်။
အမေရိကန်အမျိုးသားလုံခြုံရေး မဟာဗျူဟာသစ်တွင် သမ္မတဒေါ်နယ်ထရန့်၏ သဘောထားကို ပြောင်းလွယ်ပြင်လွယ်ရှိသော လက်တွေ့ဝါဒအဖြစ် ရည်ညွှန်းထားသည်။
ယင်းအပြင် အထက်ပါ အမျိုးသားလုံခြုံရေးမဟာဗျူဟာသစ်တွင် အမေရိကန်ပြည်ထောင်စုအနေဖြင့် ၁၉ ရာစုခေတ်အတွင်း ကျင့်သုံးခဲ့သောမွန်ရိုးအယူအဆကို ပြန်လည်ကျင့်သုံးသင့်ကြောင်းအဆိုပြုထားသည်။
မွန်ရိုးအယူအဆတွင် အနောက်ယဉ်စွန်းတန်းဒေသကို အမေရိကန်ပြည်ထောင်စု၏ ဩဇာ သက်ရောက် ရမည့် ပထဝီဒေသအဖြစ် ကြေညာထားသည်။
အမေရိကန်အမျိုးသားလုံခြုံရေး မဟာဗျူဟာသစ်တွင် အမေရိကန် အစိုးရအနေဖြင့် ရုရှားနှင့် မဟာဗျူဟာမြောက် တည်ငြိမ်မှု ပြန်လည်ထားရှိသင့်ကြောင်း အဆိုပြုထားသည်။

ပိုက်လိုင်းရေယိုမှုကြောင့် လုဗ်ပြတိုက်၌ရှားပါးစာအုပ် ၄၀၀ ခန့် ပျက်စီးခဲ့ရ

ပင်သစ်နိုင်ငံ ပါရီမြို့တော်ရှိ ကမ္ဘာကျော်လုဗ်ပြတိုက်၌ ရေယိုစိမ့်မှုပြဿနာတစ်ရပ်ကြောင့် ရှားပါးစာအုပ်အရေအတွက် ရာနှင့်ချီ၍ ပျက်စီးခဲ့ရကြောင်းပြင်သစ်မီဒီယာများက ဒီဇင်ဘာ ၇ ရက်တွင် သတင်းထုတ်ပြန်ထားသည်။
လုဗ်ပြတိုက်၌ တပ်ဆင်ထားသော ရေပိုက်လိုင်းတစ်ခု ရေယိုစိမ့်မှုကြောင့်အီဂျစ်ယဉ်ကျေးမှုပြတိုက်၌ ထိန်းသိမ်းထားသော ရှားပါးစာအုပ် ၄၀၀ ခန့် ပျက်စီးခဲ့ရကြောင်း ပြတိုက်တာဝန်ရှိသူများကလည်း အတည်ပြုပြောကြားထားသည်။
ပိုက်လိုင်းရေယိုစိမ့်မှုပြဿနာသည် ကမ္ဘာပေါ်၌ ခရီးသွားဧည့်သည်လာရောက်မှုအများဆုံး ပြတိုက်ဖြစ်သောလုဗ်ပြတိုက်၏ ယိုယွင်းနေသော အခြေအနေကို ပြသလျက်ရှိသည်။
ယခုနှစ် အောက်တိုဘာ ၁၉ ရက်ကလည်း ဖောက်ထွင်းသမားလေးဦးတို့က လုဗ်ပြတိုက်ကို ဖောက်ထွင်းခဲ့ပြီး အမေရိကန်ဒေါ်လာ ၁၀၂ သန်းတန်ဖိုးရှိအဖိုးတန်ရတနာပစ္စည်းများ ခိုးယူခဲ့သည်။
အလားတူ ယခုနှစ်နိုဝင်ဘာလကလည်း ဂရိပန်းအိုးများနှင့် ပြတိုက်ရုံးခန်းအချို့တည်ရှိရာ ခန်းမဆောင်တစ်ခုကိုလည်း ဖွဲ့စည်းတည်ဆောက်မှုပုံစံအားနည်းလာမှုကြောင့် တာဝန်ရှိသူများက ပိတ်ထားခဲ့ရသည်။
ရေပိုက်လိုင်းရေယိုစိမ့်မှုကြောင့် ပျက်စီးခဲ့ရသော ရှားပါးစာအုပ်များမှာ၃၀၀ နှင့် ၄၀၀အကြားရှိပြီး စစ်ဆေးရေတွက်မှု ဆက်လက်ပြုလုပ်နေကြောင်းပြတိုက်တာဝန်ရှိသူများက ပြောကြားသည်။

တာမွေမြို့နယ် ၁၅၅ လမ်းရှိ တိုက်ခန်းတစ်ခန်း ဖောက်ထွင်းခံရပြီး ငွေသား ၁၆ သိန်းနှင့် အခြားပစ္စည်းများ စုစုပေါင်း တန်ဖိုးကျပ်သိန်း ၄၀ ခန့်ယူဆောင်သွား

တာမွေမြို့နယ် တာမွေကြီး(က+ဂ) ရပ်ကွက် ၁၅၅ လမ်း အိမ်အမှတ် ၇၇ ပထမထပ် အခန်း (A) ယနေ့(ဒီဇင်ဘာ ၈ ရက်)က ဖောက်ထွင်းခံရပြီး ငွေသား ၁၆ သိန်း၊ စက်ဘီး၊ လက်တော့၊ နားကပ်အပါအဝင် သိန်း ၄၀ ခန့်ပါသွားကြောင်း သိရသည်။
ယင်းအိမ်တွင် နေထိုင်သူများသည် ကလေးအပါအဝင် ငါးဦးနေထိုင်ပြီး နေထိုင်သူများသည် နံနက် ၉ နာရီတွင် အလုပ်သွားကြကာ ညနေ ၆ နာရီခန့်မှ ပြန်ရောက်ကြကြောင်း သိရသည်။
"ကျွန်တော်တို့က မနက်ဘက်ဆို အလုပ်သွားပြီး ညနေမှ ပြန်ရောက်တာ။ ဒီညနေ ၆ နာရီလောက်ရောက်တော့ အိမ်က သော့မရှိပဲ ပွင့်နေတယ်။ အိမ်ထဲဝင်တော့ ပစ္စည်းတွေ အကုန်ဖွထားတာ။ ‌သေတ္တာသော့ကိုတောင် သော့ဖြတ်တဲ့ cutter နဲ့ ဖြတ်သွားတာ။ cutter ကို သေတ္တာဘေးမှာ ထားသွားတယ်။ စက်ဘီးဆို ကျနော် ဝယ်ထားတာ ရက်ပိုင်းရှိပါသေးတယ်ဗျာ။ ခုတော့ အကုန်ပါသွားရော။ ပါဝါပန့်နှစ်လုံးရော ပစ္စည်းတွေရော အကုန် စုစုပေါင်းတန်ဖိုး သိန်း ၄၀ နီးပါး ပါသွားတယ်" ဟု အိမ်ပိုင်ရှင်က ပြောကြားသည်။
အဆိုပါဖြစ်စဉ်နှင့်ပတ်သက်ပြီး တာမွေရဲစခန်းက ဆက်လက်စစ်ဆေးဆောင်ရွက်လျက်ရှိကြောင်း သိရသည်။

နိုင်ငံခြားရင်းနှီးမြှုပ်နှံမှုအသစ် ၅ခုနှင့် ပြည်တွင်းရင်းနှီးမြှုပ်နှံမှုအသစ် ၉ခုတို့ကို ခွင့်ပြု
----------------------------------------------------------

စက်မှုကဏ္ဍမှာ နိုင်ငံခြားရင်းနှီးမြှုပ်နှံမှုအသစ် ၅ခုနဲ့ စက်မှု၊ ဟိုတယ်နှင့်ခရီးသွား၊ ဝန်ဆောင်မှုကဏ္ဍတွေမှာ မြန်မာနိုင်ငံသားရင်းနှီးမြှုပ်နှံမှုအသစ် ၉ခုတို့ကို ခွင့်ပြုပေးလိုက်တယ်လို့ မြန်မာနိုင်ငံရင်းနှီးမြှုပ်နှံမှုကော်မရှင်ကနေ သိရပါတယ်။
ဒီဇင်ဘာ ၈ရက်က ကျင်းပတဲ့ မြန်မာနိုင်ငံရင်းနှီးမြှုပ်နှံမှုကော်မရှင်အစည်းအဝေးမှာ အခုလိုခွင့်ပြုပေးလိုက်တာပါ။
အခုခွင့်ပြုပေးလိုက်တဲ့လုပ်ငန်းတွေထဲမှာ နှစ်ဘီး၊ သုံးဘီး လျှပ်စစ်သုံးမော်တော်ဆိုင်ကယ်တပ်ဆင်ထုတ်လုပ်တဲ့လုပ်ငန်း၊ မော်တော်ယာဉ်အမျိုးမျိုးတပ်ဆင်ထုတ်လုပ်တဲ့လုပ်ငန်း၊ ပညာရေးဝန်ဆောင်မှုလုပ်ငန်း၊ စားသောက်ကုန်ထုတ်လုပ်တဲ့လုပ်ငန်းနဲ့ အထည်ချုပ်လုပ်ငန်းတွေ ပါဝင်တယ်လို့ ဆိုပါတယ်။
၂၀၂၅ခုနှစ်၊ နိုဝင်ဘာလကုန်အထိ မြန်မာနိုင်ငံမှာ ရင်းနှီးမြှုပ်နှံထားတဲ့ နိုင်ငံ/ဒေသပေါင်း ၅၃ခု ရှိပြီး ရင်းနှီးမြှုပ်နှံမှု အများဆုံးပြုလုပ်ထားတဲ့ နိုင်ငံတွေကတော့ စင်ကာပူ၊ တရုတ်နဲ့ ထိုင်းနိုင်ငံတွေဖြစ်ပါတယ်။
ရင်းနှီးမြှုပ်နှံမှု အများဆုံးပြုလုပ်ထားတဲ့ ကဏ္ဍတွေကတော့ လျှပ်စစ်ဓာတ်အားထုတ်လုပ်တဲ့ကဏ္ဍ၊ ရေနံနဲ့သဘာဝဓာတ်ငွေ့ကဏ္ဍနဲ့ စက်မှုကဏ္ဍ တွေဖြစ်တယ်လို့ သိရပါတယ်။

တိုကျိုမြို့ရှိ မြန်မာသံရုံးအမည်သုံး၍ အွန်လိုင်းလောင်းကစားစာမျက်နှာတစ်ခု ဖွင့်လှစ်နေဟု အသိပေး

မြန်မာသံရုံး၊ တိုကျိုမြို့မှ ၂၀၂၄ ခုနှစ်၊ ဒီဇင်ဘာလမတိုင်မီက အသုံးပြုခဲ့သည့် website အမည်ကို တုပ၍ အွန်လိုင်း လောင်းကစားစာမျက်နှာတစ်ခု ဖွင့်လှစ်အသုံးပြုနေကြောင်း မြန်မာသံရုံး၊ တိုကျိုမြို့က ယနေ့(ဒီဇင်ဘာ ၈ ရက်) တွင် အသိပေးထုတ်ပြန်ထားသည်။
myanmar-embassy-tokyo . net ကို အသုံးပြုကာ MYANMAR EMBASSY TOKYO အမည်ဖြင့် အွန်လိုင်း လောင်းကစားစာမျက်နှာတစ်ခု ဖွင့်လှစ်အသုံးပြုနေကြောင်း စိစစ်တွေ့ရှိရသည်ဟုဆိုသည်။
မြန်မာသံရုံး၊ တိုကျိုမြို့အနေဖြင့် တရားဝင် website ဖြစ်သည့် myanmarembassytokyo. org ကိုသာ အသုံးပြုလျက်ရှိကြောင်းနှင့် myanmar-embassy-tokyo. net တွင် ဖော်ပြချက်များနှင့် အဆိုပါ website သည် မြန်မာသံရုံး၊ တိုကျိုမြို့နှင့် သက်ဆိုင်ခြင်း မရှိကြောင်း အသိပေးထားသည်။

ကချင်ပြည်နယ်၌ "ဒို့အတူတူမဲပေးကြမယ်" Bill Board စိုက်ထူ

ကချင်ပြည်နယ်၌ ဒီဇင်ဘာ ၂၈ ရက်မှစတင်ကာ အပိုင်းလိုက်ကျင်းပမည့် ပါတီစုံဒီမိုကရေစီအထွေထွေရွေး ကောက်ပွဲတွင် ပိုမိုပါဝင်ဆန္ဒမဲပေးနိုင်ရေးအတွက် "ဒို့အတူတူမဲပေးကြမယ်" Bill Board အား ယနေ့ ဒီဇင်ဘာ ၈ ရက်ကစိုက်ထူခဲ့ကြောင်း သိရသည်။
အဆိုပါ Bill Board များအား မြစ်ကြီးနားမြို့၊ ပြည် ထောင်စုလမ်းနှင့် ဆွမ်ပရာဘွမ်လမ်းဆုံ၊ စည်ပင်လမ်းနှင့် ပြည်ထောင်စုလမ်းမကြီးလမ်းဆုံ၊ ပူတာအိုမြို့၊ မြို့မရပ်ကွက် မနက်ဈေးနေရာ၊ တနိုင်းမြို့၊ စည်ပင်သာ ယာဈေးရှေ့၊ မြို့နယ်ပန်းခြံရှေ့၊ မြို့နယ်အထွေထွေအုပ်ချုပ်ရေးဦးစီးဌာနရုံးရှေ့၊ မိုးညှင်းမြို့၊ အမှတ်(၁) အခြေခံပညာအထက်တန်းကျောင်းဘေး ပြည်ထောင်စုလမ်းမကြီးမီးပွိုင့်လမ်းဆုံနှင့် အများပြည်သူဖြတ်သန်းသွားလာရာ အချက်အချာကျသည့်နေရာများတွင် စိုက်ထူခဲ့ကြကြောင်း သိရသည်။
မြစ်ကြီးနားမြို့တွင်စိုက်ထူသည့် " Bill Board အား ကချင်ပြည်နယ်ဝန်ကြီးချုပ်ဦးခက်ထိန်နန်၊ ပြည်နယ်တရားလွှတ်တော်တရားသူကြီးချုပ်ဒေါ်အေးအေး‌မော်၊ ပြည်နယ်လုံခြုံရေးနှင့်နယ်စပ်ရေးရာဝန်ကြီး ဗိုလ်မှူး ကြီးကျော်သူရတို့ကဖဲကြိုးဖြတ်ဖွင့်လှစ်ပေးခဲ့ကြကြောင်း သိရသည်။
ထို့ပြင် ပြည်နယ်ဝန်ကြီးချုပ်နှင့် ဇနီး၊ တာဝန်ရှိသူများ၊ ပြည်နယ်/ခရိုင်/မြို့နယ်ရွေးကောက်ပွဲကော်မရှင်အဖွဲ့ခွဲ ဥက္ကဋ္ဌများနှင့် တာဝန်ရှိသူများ၊ အမျိုးသမီးရေးရာနှင့်မိခင်နှင့်ကလေးစောင့်ရှောက်မှုကြီးကြပ်ရေးအဖွဲ့ဝင်များ၊ ကျောင်းသား/ကျောင်းသူများက "ဒို့အတူတူ မဲပေးကြမယ်"အသိပညာပေး လက်ကမ်းစာစောင်များကိုဖြန့်ဝေခဲ့ကြကြောင်း သိရသည်။

တို-က်ပွဲပြင်းထန်၍ကမ္ဘောဒီးယားနယ်စပ်မှ ထိုင်းများကိုအမြန်ရွှေ့ပြောင်း

ကမ္ဘောဒီးယားနယ်စပ်တလျှောက်တွင် နေထိုင်သူများသည် တနင်္လာနေ့တွင် ၎င်းတို့၏နေရပ်များသို့ ဆက်လက်ထွက်ခွာနေကြပြီး ကမ္ဘောဒီးယားနယ်စပ်တလျှောက် လက်နက်ကိုင်တို-က်ခို-က်မှုများ ပြန်လည်စတင်ပြီးနောက် ကုန်းတွင်းပိုင်း ဘေးကင်းသော နေရာများသို့ ထပ်မံပြောင်းရွှေ့နေထိုင်ခဲ့ကြသည်။
တနင်္လာနေ့တွင် ထိုင်းဘုရင့်တပ်မတော်က ကမ္ဘောဒီးယားနယ်စပ်ရှိ ပြည်နယ်အားလုံးရှိ ကျေးရွာများမှ ဒေသခံများကို ဘေးကင်းရာသို့ ချက်ချင်း ရွှေ့ပြောင်းရန် ညွှန်ကြားထားသည်။
ဆူရင်နှင့် အခြားနယ်စပ်ပြည်နယ်များမှ ကားလမ်းများတွင် လူများကို ဘေးကင်းရာသို့ ခေါ်ဆောင်သွားသည့် ယာဉ်များဖြင့် လမ်းပိတ်နေကြောင်း သိရသည်။
"အားလုံးသတိထားကြပါ။ မင်းတို့ရဲ့အဝတ်အစားနဲ့ ဆေးဝါးတွေ ပြင်ဆင်ပြီး သက်သေခံလက်မှတ်တွေ ဆောင်ထားပါ။ တခြား အဖိုးတန်ပစ္စည်းတွေနဲ့ ဆိုင်ကယ်တွေကို မင်းတို့အိမ်ထဲမှာ သိမ်းဆည်းထားပြီး မထွက်ခွာခင်မှာ သေချာပေါက်သော့ခတ်ထားရမယ်" ဟု ဆခေါ်ဝ် ရှိ ဘန်နောင်ရခွေခရိုင် နှင့် ဘန်နောင်စမတ် ခရိုင် တို့တွင် လူထုခေါင်းဆောင်များက ကြေငြာချက်တွင် ပြောကြားခဲ့ပါသည်။
နယ်စပ်တလျှောက်ရှိ မိုဘိုင်းလ်ဖုန်းအသုံးပြုသူများထံသို့ သဘာဝဘေးအန္တရာယ် ကာကွယ်ရေးနှင့် လျော့ပါးရေး ဦးစီးဌာနက ထုတ်လွှင့်သည့် မက်ဆေ့ချ်တွင် ဘေးကင်းလုံခြုံသော အမိုးအကာရှိသောနေရာများသို့ ရွှေ့ပြောင်းခြင်းမပြုပါက မကြာမီ အန္တရာယ်ရှိနိုင်ကြောင်း သတိပေးထားသည်။
တို-က်ခို-က်မှုများသည် ဘူရီယမ်၊ ဆီစာကတ်၊ ဆူရင်နှင့် အဘွန် ရက်ချက်ဌာနီ ပြည်နယ်လေးခုတွင် ဖြစ်ပွားခဲ့သည်။
အစိုးရရုံးများတွင် လုံခြုံရေးအဆင့်မြှင့်ရန် နိုင်ငံပိုင်အဖွဲ့အစည်းများအားလုံးကို တပ်မတော်က သတိပေးထားပြီး နိုင်ငံပိုင်ပစ္စည်းများကို ရန်သူက ပစ်မှတ်ထားနိုင်ကြောင်း သတိပေးထားသည်။
ကမ္ဘောဒီးယားသည် တနင်္ဂနွေနေ့တွင် ထိုင်းတပ်များကို ပြန်လည်တို-က်ခို-က်ခဲ့ပြီး တနင်္လာနေ့ နံနက် ၅ နာရီခန့်မှ ဆက်လက်တို-က်ခို-က်ခဲ့သည်။ တနင်္လာနေ့ မနက်နှောင်းပိုင်းအထိ နှစ်ရက်ကြာ တိုက်ပွဲများအတွင်း ထိုင်းစစ်သားတစ်ဦး ‌ေ-သဆုံးပြီး ရှစ်ဦး ဒ-ဏ်ရာရရှိခဲ့ကြောင်း အတည်ပြုခဲ့သည်။
လက်တုံ့ပြန်သည့်အနေဖြင့် ထိုင်းလေယာဉ်များသည် စစ်ဘက်ဆိုင်ရာပစ်မှတ်များကို တို-က်ခို-က်ခဲ့သည်။ ကမ္ဘောဒီးယားဘက်မှ အ‌ေ-သအပျောက်သတင်းများကိုမူ မသိရသေးပါ။

ကာတာနိုင်ငံ၏ အမျိုးသားနေ့အထိမ်းအမှတ်ညစာစားပွဲကို ရန်ကုန်မြို့တွင်ကျင်းပ

ကာတာနိုင်ငံ၏ အမျိုးသားနေ့အထိမ်းအမှတ်ညစာစားပွဲကို ယနေ့ ဒီဇင်ဘာ ၈ ရက်ညနေပိုင်းက ရန်ကုန်မြို့ရှိ Lotte Hotel ၌ကျင်းပရာ နိုင်ငံတော်ဝန်ကြီးချုပ်ဦးညိုစောနှင့် ဇနီး၊ ရန်ကုန်တိုင်းဝန်ကြီးချုပ်ဦးစိုးသိန်း၊ နိုင်ငံခြားရေးဝန်ကြီးဌာန ဒု-ဝန်ကြီးဦးနိုင်မင်းကျော်၊ နိုင်ငံခြားသံရုံးများမှ သံအမတ်ကြီးများ၊ သံရုံးယာယီတာဝန်ခံများ၊ ကုလသမဂ္ဂဆိုင်ရာဌာနေကိုယ်စားလှယ်များနှင့် ဖိတ်ကြားထားသူများတက်ရောက်ခဲ့ကြသည်။
နိုင်ငံတော်ဝန်ကြီးချုပ်နှင့် တက်ရောက်လာကြသူများအား မြန်မာနိုင်ငံဆိုင်ရာ ကာတာနိုင်ငံ သံရုံးတာဝန်ခံ Mr.Ahmad Ali R.A. AL-Marri နှင့်တာ၀န်ရှိသူများကကြိုဆိုနှုတ်ဆက်ပြီးနောက် ညစာစားပွဲကို မြန်မာ နိုင်ငံ တော်သီချင်း၊ ကာတာနိုင်ငံတော်သီချင်းတို့ဖြင့် ဖွင့်လှစ်ခဲ့သည်။
ထို့ပြင် နိုင်ငံတော်ဝန်ကြီးချုပ်နှင့် ကာတာနိုင်ငံ သံရုံးတာဝန်ခံတို့မှ အထိမ်းအမှတ်ကိတ်ကိုလှီးဖြတ်ပြီးနောက် ကာတာနိုင်ငံ သံရုံးတာဝန်ခံက ကာတာနိုင်ငံ၏ အမျိုးသားနေ့အထိမ်းအမှတ် ညစာစားပွဲဖြင့်တည်ခင်းဧည့်ခံခဲ့သည်။

ရန်ကုန်တိုင်းတွင် နေ့စဉ်စားအုန်းဆီတန်ချိန် (၁၄၈၅၀) တန် ဖြန့်ဖြူးပေးနေ

ရန်ကုန်တိုင်းဒေသကြီးတွင် ဆီလုံလောက်မှုပမာဏအနေဖြင့် ၁ ဒသမ ၉ ရာခိုင်နှုန်းသာဖြစ်ပြီး နေ့စဉ်စားအုန်းဆီတန်ချိန် (၁၄၈၅၀ )တန် ဖြန့်ဖြူးပေးနေကြောင်း ရန်ကုန်တိုင်းဒေသကြီးအစိုးရအဖွဲ့ စီးပွားရေးရာဝန်ကြီး ဦးမျိုးမြင့်အောင်က ပြောသည်။
ဒီဇင်ဘာ ၇ ရက် မွန်းလွဲ ၁ နာရီက ရန်ကုန်မြို့ လမ်းမတော်မြို့နယ်၊ မင်းရဲကျော်စွာလမ်းရှိ မြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် မင်္ဂလာခန်းမ၌ ကျင်းပသည့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်း (၃၃)ကြိမ်မြောက် နှစ်ပတ်လည်အသင်းသားစုံညီအစည်းအဝေးတွင် ထည့်သွင်းပြောကြားခဲ့ခြင်းဖြစ်သည်။
" ကျွန်တော်တို့နိုင်ငံမှာ ဆီထွက်သီးနှံစိုက်ပျိုးမှုဟာ စားသုံးမှုနဲ့တွက်လို့ရှိရင် အများကြီးလိုအပ်ချက်ရှိနေတဲ့အတွက် နိုင်ငံတော်အကြီးအကဲကလည်း ဆီထွက်သီးနှံစိုက်ပျိုးမှုကို အာရုံစိုက်ဖို့ လမ်းညွှန်နေတဲ့ အခြေအနေဖြစ်ပါတယ်။ ရန်ကုန်တိုင်းဆိုရင် ဆီလုံလောက်မှုက ၁ ဒသန ၉ ရာခိုင်နှုန်းဖြစ်ပါတယ်။ လူ ၁၀၀ မှာ ၂ ယောက်စာပဲထွက်တဲ့အနေအထားဖြစ်ပါတယ်။ အရင်က ဧက ၅၀၀၀ စိုက်ပျိုးတဲ့နေရာမှာ တိုးချဲ့ပြီး ဧက ၁၀၀၀၀ ကိုစိုက်ပျိုးနေရတဲ့အနေအထားဖြစ်ပါတယ်။ ဆီအသင်းအနေနဲ့ပြည်တွင်းစားသုံးဆီဖူလုံရေးအတွက်ဆီထွက်သီးနှံတိုးချဲ့စိုက်ပျိုးရေးနဲ့စားသုံးဆီထုတ်လုပ်ရေးလုပ်ငန်းများကိုပါတတ်ကြွစွာပါဝင်ဆောင်ရွက်ရေးဆိုတဲ့အချက်အတိုင်းနိုင်ငံခြားကတင်သွင်းလာတဲ့ ဆီတွေ ဖြန့်ဖြူးနေချိန်မှာ ဆီထွက်သီးနှံစိုက်ပျိုးရေးကိုပါ လှုပ်ရှားဆောက်ရွက်ဖို့ တိုက်တွန်းပြောကြားလိုပါတယ်" ဟု စီးပွားရေးရာဝန်ကြီးဦးမျိုးမြင့်အောင်က ပြောသည်။
ရန်ကုန်တွင် လူဦးရေ ၈ သန်းနီးပါးရှိပြီး ပိဿာချိန်အားဖြင့် နေ့စဉ် ၉ သန်းကျော်ဖြန့်ဖြူးပေးနေပြီး လူတစ်ဦးလျှင် တစ်ပိဿာဝန်းကျင် ဖြန့်ဖြူပေးနေကြောင်း သိရသည်။
စားအုန်းဆီရောင်းချမှုအနေဖြင့် ဈေးများတွင် ဆီစာအုပ်ဖြင့် ရောင်းချပေးနေပြီး Door to door စနစ်၊ ပင်စင်ထုတ်ချိန်တွင် ပင်စင်ထုတ်ယူသူများကို တစ်ဦးလျှင် ၂ ပိဿာခွဲ ရောင်းချပေးနေကြောင်း သိရသည်။
ထို့ပြင် အပလီကေးရှင်းဖြင့် ဝယ်ယူနိုင်ရေးကိုပါ အဆင့်မြှင့်တင်လှုပ်ဆောင်နေကြောင်းလည်း ၎င်း၏ပြောပြချက်အရ သိရသည်။