လီဂူး ၁ ပွဲတွင် ကွင်းအတွင်း မေ့လဲကျခဲ့တဲ့ ဘီလာလ်နာဒီယာရဲ့အခြေအနေကို မာဆေး ကြေညာလာ

ပြင်သစ်ကလပ်မာဆေးဟာ လီဂူး ၁ ပွဲတစ်ပွဲ ပြီးခါနီးအချိန်တွင် ကွင်းအတွင်း မေ့လဲကျခဲ့တဲ့ အလယ်တန်းကစားသမားဘီလာလ်နာဒီယာရဲ့ ကျန်းမာရေးအခြေအနေအား ထုတ်ပြန်ကြေညာလာပါတယ်။

ဗုဒ္ဓဟူးနေ့တုန်းက မာဆေးက အန်ဂါးကို ၂-၁ ဖြင့် ဦးဆောင်နေချိန် ပွဲချိန် ၈၆ မိနစ်တွင် ဘီလာလ်နာဒီယာဟာ ကွင်းအတွင်း မေ့လဲကျခဲ့ပါတယ်။

မော်ရိုကိုယူ-၂၁ လက်ရွေးစင်ကစားသမားဟာ ကစားဖော်များ၊ ပြိုင်ဘက်များရဲ့ အလျှင်အမြန် ပြုစုမှုကြောင့် အလျှင်အမြန် သက်သာလာခဲ့ပြီး ဆေးအဖွဲ့က လူနာတင်ထမ်းစင်ဖြင့် ခေါ်ထုတ်သွားခဲ့ပါတယ်။

ယခုအခါ မာဆေးက နာဒီယာမှာ ကွင်းအတွင်း လဲကျချိန်မှာ သတိမေ့ခဲ့ခြင်း မရှိကြောင်း၊ အသင့်ရှိနေတဲ့ လူနာတင်ယာဉ်ဖြင့် ဆေးရုံသို့ တက်ရောက်ခဲ့ကြောင်း၊ လက်ရှိအချိန်တွင် အခြေအနေကောင်းမွန်ပေမယ့်လည်း အထူးကြပ်မတ် စောင့်ကြည့်နေရဆဲ ဖြစ်ပြီး နောက်ထပ်စစ်ဆေးစမ်းသပ်မှုများ ပြုလပ်ရဦးမည်ဖြစ်ကြောင်း ကြေညာလာပါတယ်။

နာဒီယာဟာ နိုက်စ်အကယ်ဒမီထွက်တစ်ဦးဖြစ်ပြီး ၂၀၂၁ ခုနှစ် ဇူလိုင်လတွင် မာဆေးနှင့် ပထမဆံးပရော်ဖက်ရှင်နယ်စာချုပ်ချုပ်ဆိုခဲ့သူလည်း ဖြစ်ပါတယ်။

သူဟာ ၂၀၂၃ ခုနှစ် စက်တင်ဘာလတုန်းက ပီအက်စ်ဂျီအား ၄-၀ ဂိုးဖြင့် ရှုံးနိမ့်တဲ့ပွဲတွင် မာဆေးအတွက် ပထမဆုံးပွဲ ကစားခွင့် ရရှိပြီးနောက် ကလပ်အတွက် ၃၄ ပွဲကစားကာ ၁ ဂိုးသွင်းယူပေးထားပါတယ်။

ဗုဒ္ဓဟူးနေ့က ပွဲတွင် မာဆေးဟာ အချိန်ပိုတွင် ချေပဂိုးပေးခဲ့ရပြီး ၂ ဂိုးစီသရေကျခဲ့ပါတယ်။

ပေါင် ၃၅ သန်းဖြင့် အပြီးသတ်ခေါ်ယူနိုင်မယ့်အချက် ပါဝင်ပေမယ့် စာချုပ်ပါအချက်ကြောင့် လီဗာပူးသို့ ပြန်ရဖို့ ရှိနေတဲ့ ဟာဗေးအီးလီးယော့

ဟာဗေးအီးလီးယော့ဟာ နွေရာသီ အပြောင်းအရွှေ့ဈေးကွက် နောက်ဆုံးရက်မှာ အပြီးသတ်ပြောင်းရွှေ့နိုင်မယ့်အချက်ဖြင့် လီဗာပူးမှ ဗီလာသို့ အငှားဖြင့် ပြောင်းခဲ့ပါတယ်။

အင်္ဂလန်ယူ-၂၁ အသင်းနှင့်အတူ ယူရို ယူ-၂၁ ပြိုင်ပွဲမှာ ခြေစွမ်းပြခဲ့တဲ့ အီးလီးယော့ဟာ အန်ဖီးလ်သို့ ဖလိုရီယန်ဝါ့ဇ်‌ ရောက်လာမှုနှင့်အတူ ဗီလာသို့ ပြောင်းခဲ့ရတာလည်း ဖြစ်ပါတယ်။

ဒါပေမယ့် အီးလီးယော့ဟာ ဗီလာပါ့ခ်မှာ ထင်မှတ်ထားသလို မကြုံရဘဲ ပုံမှန်ပွဲကစားခွင့် ရရှိရေး ရုန်းကန်နေရပါတယ်။
အသက် ၂၂ နှစ်အလယ်တန်းကစားသမားဟာ ယခုအပတ် မိခင်ကလပ် လီဗာပူးနှင့်ရင်ဆိုင်ရမယ့်ပွဲမှာ ဗီလာအတွက် ပါဝင်ကစားခွင့် ရလာမှာ မဟုတ်ပါဘူး။

ဒါ့အပြင် သူဟာ ဗီလာမှာ ပုံမှန်ကစားခွင့် ရရေး ရုန်းကန်နေရမှုနှင့်အတူ လာမယ့်နွေရာသီမှာ အပြီးသတ် ပြောင်းခွင့်မရဘဲ လီဗာပူးသို့ ပြန်ရကိန်းဆိုက်နေပါတယ်။

အီးလီးယော့ဟာ ယခုရာသီတွင် ဗီလာအတွက် ပရီးမီးယားလိဂ်ပွဲတစ်ပွဲတည်းသာ ပွဲထွက်ခွင့် ရထားပါတယ်။ သူဟာ ပြီးခဲ့တဲ့လတုန်းက ဖူလ်ဟမ်ကို အိမ်ကွင်းမှာ ၃-၁ ဖြင့် အနိုင်ရတဲ့ပွဲမှာ ပွဲထွက်ခွင့်ရခဲ့တာပါ။

သူဟာ အူနိုင်းအမ်မရီရဲ့အသင်းအတွက် ၉၇ မိနစ်တည်းသာ ကစားခွင့်ရထားပါတယ်။

သူဟာ ဘရန့်ဖို့ဒ်ကို ရှုံးနိမ့်တဲ့ ခါရာဘောင်ဖလားပွဲမှာ ပွဲထွက်ခွင့်ရခဲ့ပေမယ့်လည်း ပထမပိုင်းအပြီးမှာ လူစားလဲလှယ်ခြင်းခံခဲ့ရပါတယ်။

ဗီလာဟာ နွေရာသီတုန်းက အီးလီးယော့ကို အငှားဖြင့် ခေါ်ယူစဉ်တုန်းက စာချုပ်အတွင်းတွင် သတ်မှတ် ပွဲအရေအတွက် ပြည့်အောင် အသုံးပြုမှသာလျှင် ပေါင် ၃၅ သန်းဖြင့် ခေါ်ယူရမယ့် အချက်ကို ထည့်သွင်းထားတာပါ။

ဒီတော့ အီးလီးယော့သာ သတ်မှတ်ပွဲပမာဏ ကစားခွင့်မရဘဲ ဗီလာသို့ အပြီးသတ်ပြောင်းခွင့်ရလာမှာ မဟုတ်ဘဲ မိခင်ကလပ် လီဗာပူးသို့ ပြန်ရပါမယ်။

အီးလီးယော့ဟာ ပြီးခဲ့တဲ့အပတ်တုန်းက မန်စီးတီးအား အနိုင်ရတဲ့ပွဲတွင် ဗီလာလူစာရင်းထဲတွင်ပင် ပါဝင်လာခြင်း မရှိရာ သူ့ရဲ့ လက်ရှိ အခြေအနေက ချက်ချင်း ပြောင်းလဲလာမယ့် အခြေအနေမျိုး မရှိပါဘူး။

ဒါ့အပြင် ဗီလဟာ ပြိုင်ပွဲအရပ်ရပ် နောက်ဆုံး ၇ ပွဲတွင် ၆ ပွဲ အနိုင်ရထားပြန်ရာ အီးလီးယော့အတွက် ပွဲထွက်လူစာရင်းသို့ ထိုးဖောက်ရေး ပိုမိုခက်ခဲနေပါတယ်။

တဖက်တွင် အီးလီးယော့ဟာ လာမယ့်နွေရာသီမှာ ကမ္ဘာ့ဖလားပြိုင်ပွဲရှိနေမှုနှင့်အတူ ဗီလာတွင် ပုံမှန်ပွဲကစားခွင့် ရရှိရန် လိုအပ်နေပါတယ်။

ယူနိုက်တက်ပရိသတ်များရဲ့ ကျေးဇူးကြောင့် ယူနိုက်တက်စီအီးအိုဟောင်းရဲ့ နေအိမ်ကို လျှော့ဈေးဖြင့် အချောင်နှိုက်နိုင်ခဲ့တဲ့ လီဗာပူးတိုက်စစ်မှူးဟောင်း


လီဗာပူးစတားဟောင်းဖေဘီယိုဘိုရီနီဟာ ပရိသတ်များရဲ့ ဆန္ဒပြမှုကြောင့် ယူနိုက်တက်စီအီးအိုဟောင်းအက်ဝုဒ်ဝတ်ရဲ့ နေအိမ်ကို ပုံမှန်ထက် လျှော့တဲ့ ဈေးနှုန်းဖြင့် ဝယ်ယူနိုင်ခဲ့ပါတယ်။

အသက် ၃၄ နှစ်ရှိ အီတလီတိုက်စစ်မှူးဟာ ပရီးမီးယားလိဂ်ကလပ်များဖြစ်ကြတဲ့ ချဲလ်ဆီး၊ လီဗာပူးနှင့် ဆန်းဒါးလန်းတို့တွင် ကျင်လည်ခဲ့ဖူးသူ ဖြစ်ပါတယ်။

သူဟာ လီဗာပူးအတွက် ၃ ဂိုးသွင်းခဲ့သလို ဆန်းဒါးလန်းအတွက် ၁၇ ဂိုးသွင်းခဲ့သူ ဖြစ်ပြီး အီတလီကလပ်များဖြစ်ကြတဲ့ အေစီမီလန်၊ ဗီရိုနာ၊ ဆမ်ဒိုးရီးယားတို့တွင်လည်း ကျင်လည်ခဲ့ဖူးပါတယ်။

လက်ရှိအချိန်တွင် သူဟာ ယူနိုက်တက်ဂန္ထဝင်ကစားသမားများပိုင်ဆိုင်တဲ့ လိဂ် ၂ ကလပ် ဆဲလ်ဖို့ဒ်စီးတီးမှာ ကစားနေပါတယ်။
သူဟာ ဗြိတိန်သို့ တကျော့ပြန်ရောက်လာခဲ့ပေမယ့်လည်း လွန်ခဲ့တဲ့လေးနှစ်တုန်းက ယူနိက်တက်စီအီးအိုဟောင်းအက်ဝုဒ်ဝတ်ထံမှ ပေါင် ၂ သန်း‌ဖြင့် ဝယ်ယူထားတဲ့ နေအိမ်ကြောင့် ချက်ချင်းဆိုသလိုပဲ အခြေတကျ နေထိုင်နိုင်ပါတယ်။

ဘိုရီနီဟာ ၂၀၂၀ ခုနှစ်တုန်းက ပရိသတ်များရဲ့ ဆန္ဒပြမှုခံခဲ့ရမှုရဲ့အကျိုးဆက်အဖြစ် အက်ဝုဒ်ဝတ်ရဲ့ နေအိမ်ကို လျှော့ဈေးဖြင့် ဝယ်ယူနိုင်ခဲ့တာလည်း ဖြစ်ပါတယ်။

၂၀၂၀ ခုနှစ်တုန်းက ယူနိုက်တက်ပရိသတ်များဟာ အက်ဝုဒ်ဝတ်ရဲ့ အသင်းကို ဦးဆောင်နေပုံအား သဘောမကျမှုနှင့်အတူ နေအိမ်ကို မီးခိုးဗုံး၊ မီးရှူးများဖြင့် ပစ်လွှတ်ကာ ဆန္ဒပြခဲ့ကြပါတယ်။

ဒါ့အပြင် ယူနိုက်တက်ပရိသတ်များဟာ ခြံဂိတ်တွင်လည်း အနီရောင်ဆေးဗူးဖြင့် စာများရေးကာ ဆန္ဒပြခဲ့တာလည်း ဖြစ်ပါတယ်။

ယင်းသို့ အခြေအနေကြောင့် အက်ဝုဒ်ဝတ်ဟာ ယင်းနေအိမ်ကို လျှော့ဈေးဖြင့် အလျှင်စလိုပင် ရောင်းချမှု ပြုလုပ်ခဲ့ရတာလည်း ဖြစ်ပါတယ်။

ဘိုရီနီက "လွန်ခဲ့တဲ့လေးနှစ်တုန်းက ဒီအိမ်ကို ဝယ်ခဲ့တာ။ ယူနိုက်တက်စီအီးအိုဆီကပါ။ ဘာကြောင့်လဲဆိုတော့ အဲဒီတုန်းက ဆန္ဒပြခံနေခဲ့ရတယ်။ လူတိုင်း စိုးရိမ်နေခဲ့ကြတယ်။ ဒီတော့ ကျုပ်က မပူနဲ့ ကျုပ်ဝယ်မယ်၊ ဈေးတော့ လျှော့ပေးရမယ်လို့ ပြောခဲ့တယ်"လို့ The Times သို့ ပြောကြားသွားခဲ့ပါတယ်။

အက်ဝုဒ်ဝတ်ရဲ့ ဇနီးသည်အစ္စဘယ်လီနှင့် အမြွှာသမီးနှစ်ဦးတို့ဟာ ယူနိုက်တက်ပရိသတ်များရဲ့ ဆန္ဒပြချိန်တွင် နေအိမ်တွင် မရှိကြပါဘူး။

ယခုအခါ အသက် ၅၃ နှစ်ရှိ အက်ဝုဒ်ဝတ်ဟာ ၂၀၂၁ ခုနှစ်တင် ယူနိုက်တက်စီအီးအိုရာထူးမှ ထွက်ခွာခဲ့ရပြီး လက်ရှိအချိန်တွင် AI အားကစားကုမ္ပဏီ Sentient Sports and Bloomsbury Football တွင် တာဝန်ထမ်းဆောင်နေပါတယ်။
ဒါ့အပြင် ဘိုရီနီက ဘောလုံးသာ ဆက်ကစားနေလိုခြင်းနှင့်အတူ လိဂ် ၂ ကလပ်ဖြစ်တဲ့ ဆဲလ်ဖို့ဒ်သို့ ပြောင်းရန် ဆုံးဖြတ်ခဲ့ခြင်း ဖြစ်ကြောင်းလည်း ဆိုသွားပါတယ်။
ဘိုရီနီဟာ တူရကီကလပ် Fatih Karagumruk တွင် ကစားစဉ်တုန်းက ခြေစွမ်းပြနိုင်မှုနှင့်အတူ အီတလီအသင်းတွင် ရွေးချယ်ခြင်းခံခဲ့ရပြီး ၁ ပွဲကစားခွင့်ရခဲ့ပါတယ်။
သူဟာ ၂၀၂၂-၂၃ ရာသီတုန်းက Fatih Karagumruk အတွက် ၁၉ ဂိုးအထိ သွင်းနိုင်ခဲ့ကာ အကောင်းဆုံးရာသီတစ်ခု ပိုင်ဆိုင်ခဲ့ပါတယ်။

နောက်ထပ် ဒဏ်ရာပြဿနာကြုံကာ မိုနာကိုအတွက် ပထမဆုံးပွဲကစားရေး ရွှေ့ဆိုင်းလာရပြန်တဲ့ ပေါလ်ပေါ့ဘာ

ပေါလ်ပေါ့ဘာဟာ လေ့ကျင့်ခန်းအစီအစဉ်တွင် ခြေကျင်းဝတ်ဒဏ်ရာထပ်မံ ရရှိလာမှုနှင့်အတူ ကာလရှည်ကြာ စောင့်ဆိုင်းလာခဲ့တဲ့ မိုနာကိုအတွက် ပထမဆုံးပွဲ ကစားရေး ရွှေ့ဆိုင်းလာရပြန်ပါတယ်။

လွန်ခဲ့တဲ့နှစ်နှစ်တုန်းက ပရော်ဖက်ရှင်နယ်ပွဲ နောက်ဆုံးကစားခဲ့တဲ့ အသက် ၃၂ နှစ်ရှိ ပြင်သစ်ကွင်းလယ်ကစားသမားဟာ ယခုအပတ် ပဲရစ်အက်ဖ်စီနှင့် ပွဲစဉ်တွင် မိုနာကိုအတွက် ပထမဆုံးပွဲကစားရန် စီစဉ်ထားတာပါ။

ဒါပေမယ့် သူဟာ ကြာသပတေးနေ့တုန်းက လေ့ကျင့်ခန်းအစီအစဉ်တွင် ခြေကျင်းဝတ်ဒဏ်ရာရရှိမှုနှင့်အတူ ယနေ့ည ပဲရစ်အက်ဖ်စီနှင့် ကစားမယ့်ပွဲကို လွဲချော်လာပါမယ်။

အစောပိုင်းတုန်းက မိုနာကိုနည်းပြဆီဘာတီယန်ပိုဂနိုလီက ပေါ့ဘာမှာ ၂၆ လအတွင်းတွင် ပထမဆုံးအကြိမ်အဖြစ် အသင်းလူစာရင်းတွင် ပါဝင်လာဖို့ ရှိကြောင်း ပြောဆိုခဲ့ပေမယ့် ယခုအခါ ဒဏ်ရာကြောင့် လွဲချော်လာပါတော့မယ်။

ပေါ့ဘာအတွက် နောက်ဆုံးအကြိမ် ပရော်ဖက်ရှင်နယ်ပွဲကစားခဲ့တာ ၂၀၂၃ ခုနှစ် စက်တင်ဘာလတုန်းက ဂျူဗင်တပ်အတွက် ကစားခဲ့တာ ဖြစ်ပြီး ယင်းနောက်ပိုင်းတွင် တားမြစ်ဆေးသုံးစွဲမှုကြောင့် ပွဲပယ်ခံခဲ့ရပါတယ်။

သူဟာ ဇွန်လတုန်းက မိုနာကိုသို့ ပြောင်းပြီးနောက် ကြံ့ခိုင်မှုပြည့်ဝလာရေး သုံးလစီမံကိန်းဖြင့် ပြုလုပ်ကာ ပွဲကစားရေးပြင်ဆင်ခဲ့ပါတယ်။

သူဟာ အန်ဂါးနှင့်ပွဲစဉ်တွင် မိုနာကိုအတွက် ပထမဆုံးပွဲကစားရန် စီစဉ်ခဲ့ပေမယ့် အသေးစားဒဏ်ရာပြဿနာကြောင့် ရွေ့ဆိုင်းခဲ့ရပြီးလည်း ဖြစ်ပါတယ်။

ယခုအခါ ယူနိုက်တက်နှင့် ဂျူဗင်တပ်ကွင်းလယ်ကစားသမားဟောင်းဟာ ခြေကျင်းဝတ်ဒဏ်ရာထပ်မံ ရရှိလာမှုနှင့်အတူ ပထမဆုံးမိုနာကိုပွဲ ကစားရေး စောင့်ဆိုင်းလာရပါဦးမယ်။

အမေရိကန်ဒေါ်လာ ၁.၂၁၂ သန်း ဗဟိုဘဏ် ရောင်းပေး

CMP ကုမ္ပဏီတွေဆီက ဝယ်ယူထားတဲ့ နိုင်ငံခြားငွေတွေထဲက အမေရိကန်ဒေါ်လာ ၁.၁၃၇ သန်းကို မြန်မာနိုင်ငံတော်ဗဟိုဘဏ်က အောက်တိုဘာလ ၃၁ ရက်နေ့မှာ စားသုံးဆီတင်သွင်းတဲ့ ကုမ္ပဏီတွေထံ ထုတ်ရောင်းပေးခဲ့ပါတယ်။

ဒါ့အပြင် စက်သုံးဆီတင်သွင်းတဲ့ ကုမ္ပဏီတွေထံ အမေရိကန်ဒေါ်လာ ၇၅,၉၄၄ ကိုလည်း ရောင်းပေးခဲ့ပါတယ်။

FX Trading မှာ ဆောက်လုပ်ရေးပစ္စည်း၊ တိရစ္ဆာန်အစာ၊ ပေါင်းသတ်ဆေး၊ ဓာတ်မြေသြဇာ၊ ကတ္တရာ၊ ဆေးဝါးနှင့် ဆေးဝါးကုန်ကြမ်း၊ စက်မှုကုန်ကြမ်း၊ တိရစ္ဆာန်အစာ၊ ကား/ဆိုင်ကယ်အပိုပစ္စည်း၊ ထုတ်ပိုးမှုပစ္စည်း၊ ဆက်သွယ်ရေးပစ္စည်း၊ သံမဏိ၊ စားသုံးကုန်စည် တင်သွင်းတဲ့ Importer များမှ နိုင်ငံခြားငွေ ဝယ်ယူရရှိခဲ့ပါတယ်။

ဗဟိုဘဏ်အနေနဲ့ အောက်တိုဘာလ ၃၁ ရက်နေ့၊ FX Trading Platform မှာတော့ အမေရိကန်ဒေါ်လာငွေလဲနှုန်းကို ၃၆၄၀ ကျပ် သတ်မှတ်ရောင်းဝယ်ခဲ့ပါတယ်။

ရန်ကုန်တွင် မိုးကြိုးပ-စ်ခြင်းနှင့်အတူ ပြည်နယ်နှင့် တိုင်းအချို့တွင် အချိန်အခါမဟုတ်မိုးရွာသွန်း

ရန်ကုန်တွင် မိုးကြိုးပ-စ်ခြင်းနှင့်အတူ မိုးရွာသွန်းနေသလို ကျန်ပြည်နယ်နှင့် တိုင်းအချို့တွင် အချိန်အခါမဟုတ်မိုးရွာသွန်းနေကြောင်း သိရသည်။

ရန်ကုန်တွင် ယမန်နေ့ အောက်တိုဘာ (၃၁)ရက်မှစတင်၍ မိုးရွာသွန်းခဲ့ပြီး ယနေ့ နိုဝင်ဘာ(၁) နံနက်ပိုင်းတွင်လည်း ယမန်နေ့ထက် မိုးသည်းထန်စွာရွာသွန်းကာ မိုးကြိုးပ-စ်ခြင်းနှင့် မိုးချုန်းခြင်းများပါ ဖြစ်ပေါ်ခဲ့သည်။

"မနက်က မိုးကြိုးပ-စ်ချတာ ကိုယ်နေတဲ့ နေရာနဲ့နီးနီးလေးလိုဘဲ။ မိုးက အချိန်အခါ မဟုတ်ကို ရွာနေတာ"ဟု ရန်ကုန်နေ ပြည်သူတစ်ဦးက မှတ်ချက်ပြုပြောသည်။

ယနေ့ နံနက်ပိုင်း မိုးဇလ၏ အသိပေးချက်အရ ရန်ကုန်တိုင်း ၊ ဧရာဝတီတိုင်း၊ တနင်္သာရီတိုင်း၊ မွန် ပြည်နယ်နှင့် ရခိုင်ပြည်နယ်တို့တွင် နေရာအနှံ့အပြား၊ ပဲခူးတိုင်း၊ မကွေးတိုင်းနှင့် ကရင်ပြည် နယ်တို့တွင် နေရာစိပ်စိပ်၊ နေပြည်တော်၊ ကချင်ပြည်နယ်နှင့် ချင်းပြည်နယ်တို့တွင် နေရာကျဲကျဲနှင့် ကျန်တိုင်းဒေသကြီးနှင့် ပြည်နယ်တို့တွင် နေရာကွက်ကျား မိုးထစ်ချုန်းရွာမည်ဖြစ်ကာ ရွာရန်ရာနှုန်းပြည့်ဖြစ်သည်ဟု ထုတ်ပြန်ထားသည်။

နောက် (၂) ရက်အတွက်ခန့်မှန်းချက်အရ နေပြည်တော်၊ ရန်ကုန်တိုင်း၊ ပဲခူးတိုင်း၊ ဧရာဝတီတိုင်း၊ တနင်္သာရီတိုင်း၊ ကရင် ပြည်နယ်၊ မွန်ပြည်နယ်နှင့် ရခိုင်ပြည်နယ်တို့တွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာနိုင်သေးသည်ဟု ဖော်ပြထားသည်။

၂၄ နာရီအတွင်း မယ်ဆိုင်ချောင်းရေ တာချီလိတ်မြို့၏ စိုးရိမ်ရေမှတ်ရောက်ရှိနိုင်

မယ်ဆိုင်ချောင်းရေသည် လက်ရှိအချိန်၌ ရှမ်းပြည် နယ်၊ တာချီလိတ်မြို့(လွယ်တော်ခမ်းကျေးရွာ)တွင် မြို့၏စိုးရိမ်ရေမှတ်အောက် ပေဝက်ခန့်တွင်ရောက်ရှိနေရာမှ လာမည့် ၂၄ နာရီအတွင်း မြို့၏စိုးရိမ်ရေမှတ်သို့ရောက်ရှိနိုင်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနထံမှ သိရသည်။

ထို့ကြောင့် တာချီလိတ်မြို့နယ်အတွင်းရှိ ချောင်းကမ်းအနီးနှင့် မြေနိမ့်ပိုင်းနေထိုင်သူများအနေဖြင့် ကြိုတင်သတိပြုနေထိုင်ကြရန်နှင့် ချောင်းရေမြင့်တက်လာပါက အချိန်မီရှောင်ရှားကြရန် မိုးဇလက အတိပေးနှိုးဆော်ထားကြောင်း သိရသည်။

ယူကရိန်းသို့ တိုမာဟော့ ဒုံးကျည်များပေးရန် ပင်တဂွန်က ခွင့်ပြုပေးလိုက်ပြီဖြစ်၍ ယင်းဒုံးကျည်များ ပံ့ပိုးရေးကို သမ္မတဒေါ်နယ်ထရန့်ကသာ ဆုံးဖြတ်ရတော့မည်

ယူကရိန်းသို့ တိုမာဟော့ ဒုံးကျည်များပေးရန် ပင်တဂွန်က ခွင့်ပြုပေးလိုက်ပြီဖြစ်၍ ယင်းဒုံးကျည်များ ပံ့ပိုးရေးကို သမ္မတဒေါ်နယ်ထရန့်ကသာ ဆုံးဖြတ်ရတော့မည်ဖြစ်ကြောင်း CNN သတင်းဌာနက ဖော်ပြသည်။

ယူကရိန်းသို့ တိုမာဟော့ဒုံးကျည်များပေးခြင်းက အမေရိကန်၌ သိုလှောင်ထားသော ယင်းဒုံးကျည်များနှင့် ပတ်သက်၍ အပျက်သဘောအားဖြင့် သက်ရောက်မှုမရှိကြောင်း စိစစ်ခဲ့ပြီးနောက် ပင်တဂွန်က တိုမာဟော့ဒုံးကျည်များကို ယူကရိန်းသို့ ပံ့ပိုးပေးရန် အိမ်ဖြူတော်အား ခွင့်ပြုပေးလိုက်ပြီဖြစ်သောကြောင့် ဒုံးကျည်များပံ့ပိုးပေးရေးအတွက် အပြီးသတ်နိုင်ငံရေးဆိုင်ရာဆုံးဖြတ်ချက်သည် သမ္မတဒေါ်နယ်ထရန့် လက်ထဲကို ရောက်ရှိသွားပြီဟု ယင်းကိစ္စနှင့် နီးစပ်သည့် အမေရိကန်နှင့် ဥရောပတာဝန်ရှိသူသုံးဦး၏ ပြောကြားချက်များအရ သိရကြောင်း CNNသတင်းဌာနက ဖော်ပြခဲ့သည်။

ထရန့်က ‌အောက်တိုဘာလ စောစောပိုင်းတွင် ယူကရိန်းသမ္မတ ဗိုလိုဒီမာဇယ်လန်းစကီးနှင့် အိမ်ဖြူတော်တွင် အလုပ်သဘောနေ့လည်စာစားခဲ့ရာတွင် ပြောကြားခဲ့ရာ၌ "မိမိတို့သည် မိမိတို့၏ နိုင်ငံကို ကာကွယ်ရန် လိုအပ်သောအရာများကို ပေးရန် ဆန္ဒမရှိသောကြောင့် ယူကရိန်းထံ ဒုံးကျည်များကို မပေးလို"ဟု ပြောကြားခဲ့သည်။

သမ္မတဒေါ်နယ်ထရန့်က ဇယ်လန်းစကီးကို မတွေ့ဆုံမီ အောက်တိုဘာလစောစောပိုင်းတွင် စစ်ဦးစီးချုပ်က ၎င်း၏ စိစစ်ချက်ကို အိမ်ဖြူတော်သို့ အကြောင်းကြားထားခဲ့သည်။ အကွာအဝေးအားဖြင့် မိုင် ၁,၀၀၀ ပတ်လည် ရောက်ရှိနိုင်ပြီး ရုရှားနိုင်ငံအတွင်းပိုင်းတွင် တည်ရှိသော ရေနံချက်စက်ရုံများနှင့် လျှပ်စစ်အားပေးစက်ရုံများကို ပိုမိုထိရောက်စွာ ပစ်မှတ်ထား တိုက်ခိုက်နိုင်သော တိုမာဟော့ဒုံးကျည်များကို ပေးရန် ဇယ်လမ်းစကီးက ထရန့်ကို ဖိအားပေးလျက်ရှိသည်။

ပင်တဂွန်၏ စိစစ်ချက်က အမေရိကန်၏ ဥရောပမဟာမိတ်နိုင်ငံများကို အားတက်စေခဲ့သည်။ အမေရိကန်သည် ယူကရိန်းထံ ဒုံးကျည်များ ပေးပို့ခြင်းမပြုရေးအတွက် ယခုအခါ ဆင်ခြေနည်းနည်းသာကျန်တော့သည်ဟု ဥရောပတာဝန်ရှိသူနှစ်ဦးက ပြောကြားခဲ့သည်။

အိမ်ဖြူတော်၌ ဇယ်လန်းစကီးနှင့် တွေ့ဆုံစဉ် အမေရိကန်သမ္မတက အမေရိကန်သည်လည်း တိုမာဟော့ဒုံးကျည်များ လိုအပ်သည်ဟု ပြောကြားခဲ့သည့်အပေါ် အမေရိကန်တာဝန်ရှိသူများနှင့် ဥရောပ တာဝန်ရှိသူများ အံ့အားသင့်ခဲ့ရသည်။ ထို့အပြင် ဇယ်လန်းစကီးနှင့် တံခါးပိတ်ဆွေးနွေးခဲ့ရာတွင်လည်း ဒေါ်နယ်ထရန့်က အမေရိကန်သည် ယခုအချိန်ထိ တိုမာဟော့ ဒုံးကျည်များကို ပံ့ပိုးပေးဦးမဟုတ်ဟု ပြောကြားခဲ့သည်။

ရုရှားသမ္မတဗလာဒီမာပူတင်နှင့် တယ်လီဖုန်းဖြင့် စကားပြောခဲ့ပြီး နောက်တစ်ရက်အကြာတွင် ထရန့်က တိုမာဟော့ဒုံးကျည်များကို ပေးမည်မဟုတ်ဟု ပြောကြားခဲ့ခြင်းဖြစ်သည်။ အဆိုပါဒုံးကျည်များသည် စစ်မြေပြင်တွင် ထူးခြားသိသာသော သက်ရောက်လာမှုများ ရှိမည်မဟုတ်ဘဲ ရုရှားမြို့ကြီးများဖြစ်သော မော်စကို၊ စိန့်ပီတာစဘတ်တို့လိုမြို့ကြီးများကို ထိခိုက်စေနိုင်သဖြင့်အမေရိကန်-ရုရှား ဆက်ဆံရေးကို ထိခိုက်စေနိုင်သည်ဟု ပူတင်က ပြောကြားခဲ့ကြောင်းဟု CNN က ဖော်ပြခဲ့သည်။

‎၂ဝ၂၅ ခုနှစ်၊ အာဆီယံအကောင်းဆုံးအင်ဂျင်နီယာဆုကို မြန်မာနိုင်ငံကရရှိ

‎
‎၂၀၂၅ ခုနှစ်၊ အာဆီယံ အကောင်းဆုံးအင်ဂျင်နီယာ(ASEAN Outstanding Engineering Achievement Award - Individual Category)ဆုကို မြန်မာနိုင်ငံ၊ ကာကွယ်ရေးဝန်ကြီးဌာနမှ ဗိုလ်မှူးပြည့်ဖြိုးမောင် က ရရှိခဲ့ကြောင်းသိရသည်။
‎
‎အောက်တိုဘာလ ၂၈ ရက်မှ ၃၀ ရက်အထိ ဖိလစ်ပိုင်နိုင်ငံ Pampanga မြို့ Mabalacat City ၏ SMX Convention Center Clark တွင် ကျင်းပပြုလုပ်ခဲ့သည့် (၄၃) ကြိမ်မြောက် ASEAN Federation of Engineering Organizations များ၏ ညီလာခံအစည်းအဝေးနှင့် Engineering Conference ၌ အဆိုပါဆုကို ပေးအပ်ခဲ့ကြောင်း သိရသည်။
‎
‎အဆိုပါ ညီလာခံသို့ အာဆီယံနိုင်ငံ ၁၀ နိုင်ငံမှ အင်ဂျင်နီယာကောင်စီနှင့် အင်ဂျင်နီယာအသင်းချုပ်မှ တာဝန်ရှိသူများ၊ World Engineering Organization နှင့် ASIA PACIFIC Region Engineering Organization တို့မှ တာဝန်ရှိသူများ၊ အာရှနှင့် အာဆီယံနိုင်ငံအသီးသီးမှ အင်ဂျင်နီယာများ တက်ရောက်ကြပြီး အင်ဂျင်နီယာပိုင်းဆိုင်ရာ ဖွံ့ဖြိုးတိုးတက်ရေးလုပ်ငန်းများ ညီလာခံများနှင့်အလုပ်ရုံဆွေးနွေးပွဲများပြုလုပ်ခြင်း၊ သုတေသနစာတမ်းဖတ်ကြားခြင်းများကို ဆောင်ရွက်ကြကြောင်း သိရသည်။
‎
‎အောက်တိုဘာလ ၃၀ ရက်တွင် ညီလာခံ၏ ညစာစားပွဲအခမ်းအနားကျင်းပခဲ့ပြီး အခမ်းအနား၌ ASEAN Federation of Engineering Organizations (AFEO) ဥက္ကဋ္ဌက အာဆီယံအကောင်းဆုံးအင်ဂျင်နီ ယာစီမံချက်ဆုနှင့် အာဆီယံအကောင်းဆုံး အင်ဂျင်နီယာဆုရရှိခဲ့သူများအား ဂုဏ်ပြုဆုများ ပေးအပ်ချီးမြှင့် ခဲ့ခြင်းဖြစ်ကြောင်း သိရသည်။
‎
‎အာဆီယံအကောင်းဆုံးအင်ဂျင်နီယာဆုရရှိသူ ဗိုလ်မှူး ပြည့်ဖြိုးမောင်အနေဖြင့် နိုင်ငံတကာသုတေသနစာတမ်း ဖတ်ပွဲများတွင် ဆုများရရှိခဲ့မှု၊ ကမ္ဘာ့အဆင့်နည်းပညာဆိုင် ရာပြိုင်ပွဲများဖြစ်သည့် Composite World Cup ပြိုင်ပွဲကြီးများတွင် ဆုများဆွတ်ခူးနိုင်ခဲ့မှု၊ ကမ္ဘာ့အကြီးဆုံးထိုင်တော်မူ ကျောက်ဆစ်ရုပ်ပွားတော်မြတ်ကြီး ဖြစ်သည့် မာရဝိဇယဗုဒ္ဓ ရုပ်ပွားတော်မြတ်ကြီး တည်ထားကိုးကွယ်ရေးအတွက် ခေတ်မီနည်းပညာနှင့် သမားရိုးကျနည်းပညာတို့ပေါင်းစပ်ဆောင်ရွက်နိုင်ခဲ့မှု၊ မြန်မာနိုင်ငံတွင်လှုပ်ခတ်ခဲ့သည့် မန္တလေးငလျင်ကြီးကြောင့် ထိခိုက်ပျက်စီးခဲ့ရသည့် ရှေးဟောင်းဘုရားများ၊ စေတီတော်ကြီးများနှင့် အဆောက်အအုံများအား Composite နည်းပညာဖြင့် ထိန်းသိမ်းပြုပြင်ခြင်း လုပ်ငန်းများဆောင်ရွက်ပေးနိုင်ခဲ့မှုတို့အတွက် ASEAN Federation of Engineering Organization (AFEO) ASEAN Outstanding Engineering Achievement Award (Individual Category)ကို ချီးမြှင့်ပေးရန် မြန်မာနိုင်ငံအင်ဂျင်နီယာအသင်းချုပ်က အဆိုပြုလွှာတင်သွင်းခဲ့ခြင်းဖြစ်ကြောင်း သိရသည်။
‎
‎ယင်းကြောင့် ဗီယက်နမ်နိုင်ငံ၊ Da Nang မြို့၌ ကျင်းပသည့် AFEO Midterm အစည်းအဝေးတွင် စိစစ်သုံးသပ်၍ Governing Board Meeting သို့ဆက်လက်အတည်ပြုချက်တောင်းခံပြီး အဆိုပါဆုကိုရွေးချယ်ချီးမြှင့်ခဲ့ခြင်းဖြစ်ကြောင်း သိရသည်။

တရားမဝင် ပြည်ပနိုင်ငံသား (၅၃) ဦး ထပ်မံထိန်းသိမ်းနိုင်ခဲ့ပြီး နိုင်ငံပေါင်း ၈ နိုင်ငံမှ ပြည်ပနိုင်ငံသား ၁၄၈ ဦး ထပ်မံစစ်ဆေးနိုင်ခဲ့

‎ထိုင်းနိုင်ငံအပါအဝင် အိမ်နီးချင်းနိုင်ငံအချို့ကို တစ်ဆင့်ခံ ဖြတ်သန်း၍ မြန်မာနိုင်ငံအတွင်းသို့ နယ်စပ်လမ်းကြောင်းများမှ တရားမဝင် ဝင်ရောက်လာပြီး ကရင်ပြည်နယ်၊ မြဝတီ-မဲ့ထော်သလေး(KK Park)နယ်မြေမှ အွန်လိုင်းလောင်းကစားမှုများ၊ အွန်လိုင်းလိမ်လည်မှုများကျူးလွန်ခဲ့ကြသည့် ပြည်ပနိုင်ငံသား ၅၃ ဦးအား ထပ်မံထိန်းသိမ်းနိုင်ခဲ့ကြောင်း သိရသည်။
‎
‎အလားတူ နိုင်ငံပေါင်း ၈ နိုင်ငံမှ ပြည်ပနိုင်ငံသား ၁၄၈ ဦးကို ထပ်မံစစ်ဆေးနိုင်ခဲ့၍ သက်ဆိုင်ရာနိုင်ငံများသို့ အမြန်ဆုံးပြန်လည်လွှဲပြောင်းပေးနိုင်ရေးအတွက် ဌာနဆိုင်ရာပူးပေါင်းအဖွဲ့များ၏ လိုအပ်သည့် ကိုယ်ရေးအချက်အလက်များနှင့် မှတ်တမ်းများစာရင်းကောက်ယူခြင်းလုပ်ငန်း ဆောင်ရွက်ခဲ့ကြောင်း သိရသည်။
‎
‎ဇန်နဝါရီလ ၃၀ ရက်မှ အောက်တိုဘာလ ၃၁ ရက်အထိ မြန်မာနိုင်ငံအတွင်းသို့ တရားမဝင် ဝင်ရောက်လာသည့် ပြည်ပနိုင်ငံသား စုစုပေါင်း ၁၀၇၄၄ ဦး ထိန်းသိမ်းနိုင်ခဲ့ကြောင်းနှင့် ယင်းနိုင်ငံသားအားလုံးကို စစ်ဆေးပြီးစီးခဲ့ပြီး ၎င်းတို့အနက်မှ ၉၃၆၅ ဦးကို ထိုင်းနိုင်ငံမှတစ်ဆင့် သက်ဆိုင်ရာနိုင်ငံများသို့ ဥပဒေလုပ်ထုံးလုပ်နည်းများနှင့်အညီစနစ်တကျ ပြည်နှင်လွှဲပြောင်းပေးခဲ့ပြီး ကျန်ရှိသည့်ပြည်ပနိုင်ငံသား ၁၃၇၉ ဦးကို သက်ဆိုင်ရာနိုင်ငံများ သို့ လွှဲပြောင်းပေးရန်အသင့်ဖြစ်နေပြီဖြစ်ကြောင်းနှင့် ၎င်းတို့ကိုကောင်းမွန်စွာ ထိန်းသိမ်းစောင့်ရှောက်ထားရှိကြောင်း သိရသည်။