ချုံချင့်-ရန်ကုန် လေကြောင်းလိုင်း စတင်ပျံသန်း
-----------------------

တရုတ်နိုင်ငံ၊ ချုံချင့်လေကြောင်းအုပ်စုရဲ့ ချုံချင့်-ရန်ကုန်၊ ရန်ကုန်-ချုံချင့် လေကြောင်း တိုက်ရိုက်ပျံသန်းမှုခရီး စဉ်ကို ဒီဇင်ဘာ(၈)ရက်ကစတင်ကာ ပျံသန်းပြေးဆွဲနေပြီဖြစ်တယ်လို့ သိရပါတယ်။
ချုံချင့်-ရန်ကုန်လေကြောင်းနဲ့ ယဉ်ကျေးမှုခရီးသွားလာရေးမြှင့်တင်မှုကွန်ဖရင့်ကို ဒီဇင်ဘာ(၉)ရက်က ရန်ကုန်မြို့ရှိ Lotte Hotal မှာ ပြုလုပ်ခဲ့ပါတယ်။ အခမ်းအနားပြုလုပ်ရတာကတော့ ချုံချင့်နဲ့ရန်ကုန်အကြား လေကြောင်းနဲ့ ခရီးသွားလာရေး ဈေးကွက်ပူးပေါင်းဆောင်ရွက်မှုကို အားဖြည့်နိုင်ဖို့ ရည်ရွယ်ပြုလုပ်တာဖြစ်တယ်လို့ သိရပါတယ်။
အခုလေကြောင်းခရီးစဉ်ဟာ ချုံချင့်မြို့မှာရှိတဲ့ စီးပွားရေးလုပ်ငန်းရှင်တွေအနေနဲ့ မြန်မာနိုင်ငံကို လာရောက် ရင်းနှီး မြှုပ်နှံနိုင်ဖို့နဲ့ ခရီးသွားတွေ ပိုမိုလာရောက်စေဖို့အတွက်ဖြစ်တယ်လို့ ချုံချင့်မြန်မာဂရု ဥက္ကဋ္ဌ မစ္စတာကျောက်ကျန့်ဟုန်က ပြောပါတယ်။
လေကြောင်းခရီးစဉ်ကို တစ်ပတ်မှာ နှစ်ကြိမ် တနင်္လာနေ့နဲ့သောကြာနေ့တွေမှာ ပျံသန်းပြေးဆွဲပေးသွားမှာ ဖြစ်ပါ တယ်။ မနက် ၉ နာရီအချိန်မှာ ချုံချင့်ကစတင်ထွက်ခွာကာ ရန်ကုန်ကို နေ့လယ် ၁၁ နာရီ မိနစ် ၂၀ မှာ ရောက်ရှိ မှာ ဖြစ်ပြီး ရန်ကုန်ကနေ နေ့လယ် ၁၂ နာရီ ၁၅ မိနစ်မှာ စတင်ထွက်ခွာပြီး ချုံချင့်မြို့ကို နေ့လယ် ၃ နာရီ ၄၅ မိနစ်မှာ ရောက်ရှိမှာ ဖြစ်တယ်လို့ ဆိုပါတယ်။
ချုံချင့်-ရန်ကုန်လေကြောင်းခရီးစဉ်က မြန်မာနိုင်ငံအတွက် ပိုပြီး အကျိုးရှိစေမှာဖြစ်တယ်လို့ Blue Ocean Star ကုမ္မဏီ CEO ဦးကျော်မိုးက ပြောပါတယ်။ ချုံချင့်လေကြောင်းအုပ်စုအနေနဲ့ ခရီးသည်တင်လေယာဉ်ခရီးစဉ်အပြင် ကုန်တင်လေယာဉ်ကိုလည်း အင်္ဂါ၊ ကြာသပတေးနဲ့ စနေနေ့တွေမှာ ပျံသန်းပြေးဆွဲပေးသွားမှာ ဖြစ်တယ်လို့ သိရပါတယ်။

မြန်မာ့ပို့ကုန်များ ရုရှားတွင် ဈေးကွက်ပိုမိုရရှိရေးဆွေးနွေး
-----------------------------

မြန်မာ့ပို့ကုန်တွေ ရုရှားနိုင်ငံမှာ ‌ဈေးကွက်ပိုမိုရရှိနိုင်ဖို့အတွက် မြန်မာ - ရုရှား နှစ်နိုင်ငံ တာဝန်ရှိသူတွေ ဆွေးနွေးထားတယ်လို့ စီးပွားရေးနှင့်ကူးသန်းရောင်း ဝယ်ရေးဝန်ကြီးဌာနက သိရပါတယ်။
အခုဒီဇင်ဘာလထဲမှာ စီးပွားရေးနှင့်ကူးသန်းရောင်း ဝယ်ရေးဝန်ကြီးဌာန ပြည်ထောင်စုဝန်ကြီး ဦးချစ်ဆွေဟာ ရုရှားဖက်ဒရေးရှင်းနိုင်ငံ၊ ခရက်စ်နောဂေါ့စ်ခ်မြို့အခြေစိုက် မော်စကိုခရိုင်ဆိုင်ရာ မြန်မာဂုဏ်ထူး ဆောင်ကောင်စစ်ဝန်၊ ရော့စ်ကွန်ဂရက်ဖောင်ဒေးရှင်းရဲ့ ကြီးကြပ်ရေးဘုတ်အဖွဲ့ဝင်၊ ရင်းနှီးမြှုပ်နှံမှု ရန်ပုံငွေအဖွဲ့ (Fund RC-Investment)ရဲ့ အရှေ့တောင်အာရှစီမံကိန်းများ ညှိနှိုင်းရေးမှူး မစ္စတာ ဆာဂေးရှတီရော့ဗ် ဦးဆောင်တဲ့ ကိုယ်စားလှယ်အဖွဲ့ကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ အစည်းအဝေးခန်းမ-၁ မှာ လက်ခံတွေ့ဆုံခဲ့ပါတယ်။ တွေ့ဆုံစဉ် နှစ်နိုင်ငံ ကုန်သွယ်မှုပမာဏ ပိုမိုမြင့်တက်လာစေဖို့အတွက် မြန်မာနိုင်ငံက လယ်ယာထွက်ကုန်နဲ့ ရေထွက်ကုန်ပစ္စည်းတွေ အပါအဝင် အဓိကပို့ကုန်တွေကို ရုရှားနိုင်ငံမှာ ဈေးကွက် ပိုမိုရရှိနိုင်ရေးကိစ္စတွေကို ဆွေး နွေးခဲ့ကြပါတယ်။ အဲဒီအပြင် ရုရှားနိုင်ငံထုတ် ဓာတ်မြေဩဇာတွေ မြန်မာနိုင်ငံကို တင်ပို့နိုင်ဖို့၊ နှစ်နိုင်ငံအကြား ကုန်စည်ပြပွဲတွေကျင်းပကာ စီးပွားရေးလုပ်ငန်းရှင်အချင်းချင်း ရင်းနှီးမှုရှိစေရဖို့နဲ့ ကုန်ပစ္စည်းတွေ ပါဝင်ပြသနိုင်ဖို့အတွက် အပြန်အလှန် ဖိတ်ကြားသွားဖို့၊ နှစ်နိုင်ငံကုန်သွယ်မှု စင်တာတွေ အပြန်အလှန် ဖွင့်လှစ်ဖို့ကိစ္စတွေအပြင် နေပြည်တော်ကောင်စီနယ်မြေမှာ တည်ဆောက်မဲ့ သဘာဝမြေဩဇာစက်ရုံအတွက် လိုအပ်တဲ့စက်ပစ္စည်းတွေ တင်သွင်းနိုင်ဖို့နဲ့ စီးပွားရေးနဲ့ ကုန်သွယ်ရေးကဏ္ဍတွေမှာ ပူးပေါင်းဆောင်ရွက်နိုင်ဖို့ကိုလည်း ဆွေးနွေးခဲ့ကြတယ်လို့ သိရပါတယ်။

၇ လအတွင်း ငါးတန်ချိန် ၁၆၅,၀၀၀ ကျော်တင်ပိုနိုင်ခဲ့
--------------------------------------

အခု ၂၀၂၅- ၂၀၂၆ ဘဏ္ဍာနှစ် ဧပြီလကနေ အောက် တိုဘာအထိ (၇)လအတွင်း ပြည်ပနိုင်ငံတွေကို ငါးတန်ချိန် ၁၆၅,၀၀၀ ကျော်တင်ပိုထားတယ်လို ငါးလုပ်ငန်းဦးစီးဌာနက သိရပါတယ်။
၇ လအတွင်း ပြည်ပကို ငါးတင်ပိုမှုကနေ ပိုကုန်ဝင်ငွေ အမေရိကန်ဒေါ်လာ ၂၀၁ သန်းကျော် ရရှ်ထားတယ်လို ဆိုပါတယ်။
ပြည်ပကို ပင်လယ်ရေကြောင်းကနေ ငါးတန်ချိန် ၈၅,၇၀၀ ကျော်တင်ပိုခဲ့ပြီး နယ်စပ်ကုန်သွယ်ရေးလမ်းကြောင်းကနေ ငါးတန်ချိန် ၇၉,၃၀၀ တင်ပိုခဲ့တာဖြစ်ပြီ ပြည်တွင်းကထွက်ရှိတဲ့ ငါး၊ ပုစွန် အပါအ၀င် ရေထွက်ကုန်ပစ္စည်းတွေကို တရုတ်၊ ထိုင်း၊ ဘင်္ဂလားဒေ့ရှ်နဲ့ ဂျပန် အပါအဝင် ပြည်ပနိုင်ငံပေါင်း (၄ဝ) ကျော်ကို အဓိကထား တင်ပိုနေတယ်လို သိရပါတယ်။

အင်အား ၃ ဒသမ ၃ အဆင့်ရှိ ငလျင်လှုပ်ခတ်
-------------------------------

ကယားပြည်နယ်၊ ဘောလခဲမြိုအနီးမှာ ဒီဇင်ဘာလ ၉ ရက် ည ၈ နာရီ ၃၂ မိနစ် ၂၂ စက္ကန့်အချိန်က ၃ ဒသမ ၃ ရစ်(ခ်)တာစကေးအဆင့်ရှိတဲ့ မြေငလျင်တစ်ခု လှုပ်ရှားသွားတယ်လို မိုးလေဝသနှင့်ဇလဗေဒညွှန်ကြားမှုဦးစီးဌာနက ထုတ်ပြန်ပါတယ်။
ဘောလခဲမြိုရဲ့ မြောက် - အနောက်မြောက်ဘက် ၁၀ မိုင်ခန့်အကွာ အနက် ၁၇ ကီလိုမီတာကို ဗဟိုပြုပြီး အင်အားရစ်(ခ်)တာစကေး ၃ ဒသမ ၃ အင်အားအနည်းငယ်ရှိတဲ့ မြေငလျင်တစ်ခု လှုပ်ရှားသွားတာဖြစ်တယ်လို ဆိုပါတယ်။
မြန်မာနိုင်ငံမှာ စစ်ကိုင်းပြတ်ရွေ့အပါအဝင် သက်ရှင်ပြတ်ရွေ့ကြောတွေရှိတဲ့ စစ်ကိုင်း ၊ မန္တလေး၊ ပဲခူး၊ရန်ကုန် ၊ရခိုင်နဲ့ ချင်းဒေသတစ်လျှောက်မှာ မြေငလျင်တွေ မကြာခဏလှုပ်ခတ်တာတွေ ရှိနေတဲ့အတွက် မြေငလျင်နဲ့ ပတ်သက်လို အမြဲသတိပြုနေဖို လိုအပ်တယ်လို မြေငလျင်လေ့လာသူတွေက ပြောကြားထားပါတယ်။

အပြည်ပြည်ဆိုင်ရာ အဂတိလိုက်စားမှုတိုက်ဖျက်ရေးနေ့ အထိမ်းအမှတ်အခမ်းအနား နေပြည်တော်တွင် ကျင်းပ

အဂတိလိုက်စားမှုများသည် နိုင်ငံရေး၊ စီးပွားရေးနှင့် အုပ်ချုပ်ရေးနယ်ပယ်အသီးသီးတွင် ပုံစံအမျိုးမျိုးဖြင့် ဆက်နွှယ်ဖြစ်ပွားနေကြောင်းနှင့် အဂတိလိုက်စားမှုတွင် လုပ်ပိုင်ခွင့်အာဏာကို အလွဲသုံးစားပြုခြင်းနှင့် မလျော်သြဇာသုံးခြင်းလည်း ပါဝင်ကြောင်း အမျိုးသားကာကွယ်ရေးနှင့် လုံခြုံရေးကောင်စီ အမှုဆောင်ချုပ် ပြောကြား
အပြည်ပြည်ဆိုင်ရာ အဂတိလိုက်စားမှုတိုက်ဖျက်ရေးနေ့ အထိမ်းအမှတ်အခမ်းအနားကို ဒီဇင်ဘာ ၉ ရက်တွင် နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်းဗဟိုဌာန-၁ ၌ ကျင်းပခဲ့ပြီး အဆိုပါ အခမ်းအနားသို့ အမျိုးသားကာကွယ်ရေးနှင့်လုံခြုံရေးကောင်စီရုံး အမှုဆောင်ချုပ် ဦးအောင်လင်းဒွေး တက်ရောက်အမှာစကား ပြောကြားသည်။
အခမ်းအနားတွင် ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က အပြည်ပြည်ဆိုင်ရာ အဂတိလိုက်စားမှုတိုက်ဖျက်ရေးနေ့ အထိမ်းအမှတ်အခမ်းအနားအတွက် ပေးပို့သည့် Video Message ကို ဦးစွာပြသသည်။
ထို့နောက် အမျိုးသားကာကွယ်ရေးနှင့် လုံခြုံရေးကောင်စီရုံးအမှုဆောင်ချုပ် ဦးအောင်လင်းဒွေးက အမှာစကားပြောကြားရာတွင် နိုင်ငံတော်အစိုးရအနေဖြင့် ပြည်ထောင်စုတစ်ဝန်းလုံး တည်ငြိမ်အေးချမ်းပြီး တရားဥပဒေစိုးမိုးရေး၊ တိုင်းရင်းသားပြည်သူအားလုံး စည်းလုံးညီညွတ်ရေး၊ တိုင်းပြည်သာယာဝပြောရေးနှင့် စားရေရိက္ခာဖူလုံရေးတို့အတွက် ပြည်သူအခြေပြုနည်းလမ်းများဖြင့် နိုင်ငံတော်ပြုပြင်ပြောင်းလဲရေး တည်ဆောက်ရေးလုပ်ငန်းများကို ကြိုးပမ်းအကောင်အထည်ဖော်ဆောင်ရွက်နေကြောင်း၊ ထိုသို့ ကြိုးပမ်းဆောင်ရွက်နေသော်လည်း အခြားအခြားသော အနှောင့်အယှက်၊ အဖျက်အမှောင့်၊ အခက်အခဲများနှင့် အတူ အဂတိလိုက်စားမှုသည်လည်း အဓိကအဟန့်အတားတစ်ခုဖြစ်နေသည်မှာ အားလုံးအသိပင်ဖြစ်ကြောင်း ပြောကြားသည်။
အဂတိလိုက်စားမှုများသည် နိုင်ငံရေး၊ စီးပွားရေးနှင့် အုပ်ချုပ်ရေးနယ်ပယ်အသီးသီးတွင် ပုံစံအမျိုးမျိုးဖြင့် ဆက်နွှယ်ဖြစ်ပွားလျက်ရှိကြောင်း၊ အဂတိလိုက်စားမှုဆိုရာတွင် နိုင်ငံတော်ဘဏ္ဍာ၊ ငွေကြေး နှင့်ပစ္စည်းများကို အလွဲသုံးစားပြုမှုသာမဟုတ်ဘဲ လုပ်ပိုင်ခွင့်အာဏာများကို အလွဲသုံးစားပြုခြင်း၊ မလျော်ဩဇာသုံးခြင်းလည်း ပါဝင်ကြောင်း အမျိုးသားကာကွယ်ရေးနှင့် လုံခြုံရေးကောင်စီရုံးအမှုဆောင်ချုပ်က ပြောကြားသည်။
အဂတိလိုက်စားမှုတိုက်ဖျက်ရေးလုပ်ငန်းများကို ဆောင်ရွက်နေကြသူများအနေဖြင့် အဂတိကင်းစင်သည့် နိုင်ငံတစ်နိုင်ငံဖြစ်လာစေရန်အတွက် ကိုယ်ကျင့်သိက္ခာမြှင့်တင်ရေးသည် မရှိမဖြစ်လိုအပ်ချက်ဖြစ်နေသည်မှာ အားလုံးအသိပင်ဖြစ်ကြောင်း၊ ထို့ကြောင့် အနာဂတ်မျှော်မှန်းချက်များချမှတ်ပြီး မဟာဗျူဟာစီမံချက်တွင် အစိတ်အပိုင်းတစ်ခုအနေဖြင့် ရေးဆွဲဆောင်ရွက်မည့် လုပ်ငန်းအစီအစဉ်များကို ခိုင်ခိုင်မာမာချမှတ်ထားရန်နှင့် အများပြည်သူတို့၏ မျှော်လင့်ချက်နှင့် အဂတိလိုက်စားမှုတိုက်ဖျက်ရေး ရည်မှန်းချက်များကို နီးကပ်နိုင်သမျှ နီးကပ်မှုရှိစေရေး ကြိုးစားအားထုတ်ရန်လိုအပ်ကြောင်း အမျိုးသားကာကွယ်ရေးနှင့် လုံခြုံရေးကောင်စီရုံးအမှုဆောင်ချုပ်က ပြောကြားသည်။
အဂတိလိုက်စားမှုသည် ကိုယ်ကျင့်တရားဆိုင်ရာ အားနည်းချို့ယွင်းမှု၊ ကိုယ်ကျင့်တရား ပျက်ယွင်းခြင်းဖြစ်သည်ဆိုသည်ကို ငယ်စဉ်ကတည်းက သိမြင်နားလည်ပြီး အဂတိလိုက်စားမှုပြုလုပ်ခြင်းသည် ရှက်ရွံ့စရာတစ်ခုဖြစ်ကြောင်း၊ အသိတရားပြည့်ဝလာရန်အတွက် သွန်သင်ဆုံးမမှု၊ အသိပညာပေးမှုများ လိုအပ်ကြောင်း၊ ထို့ကြောင့် ကျောင်းနေအရွယ်ကစပြီး လူငယ်လူရွယ်များကို အဂတိလိုက်စားမှုသည် ကိုယ်ကျင့်တရားပျက်ယွင်းမှုအဖြစ် သိမြင်နားလည်ပြီး ထိန်းသိမ်းရှောင်ကြဉ်နေထိုင်ကြစေရန် အသိပညာပေးမှုများကို ပိုမိုကျယ်ကျယ်ပြန့်ပြန့် ဆောင်ရွက်သွားကြရမည်ဖြစ်ကြောင်း အမျိုးသားကာကွယ်ရေးနှင့် လုံခြုံရေးကောင်စီရုံးအမှုဆောင်ချုပ်က ပြောကြားသည်။

ကမ္ဘောဒီးယား - ထိုင်းတိုက်ပွဲ နယ်စပ်တစ်လျှောက်ကျယ်ပြန့်လာ၊ လူသိန်းချီရွှေ့ပြောင်းရ

အရှေ့တောင်အာရှအိမ်နီးချင်းနှစ်နိုင်ငံကြား တစ်ကျော့ပြန်တိုက်ပွဲများ အငြင်းပွားနယ်စပ်တစ်လျှောက် ကျယ်ပြန့် လာစဉ် ၎င်းတို့ ပိုင်နက်ထဲ ရောက်ရှိနေသော ကမ္ဘော ဒီးယားတပ်ဖွဲ့များအား တိုက်ထုတ်ရန် လုပ်‌ဆောင် သွား မည်ဟု ထိုင်းက ယနေ့တွင် ပြောကြားသည်။
ဇူလိုင်လက အမေရိကန်သမ္မတ ဒေါ်နယ်ထရန့်၏ ကြားဝင်စေ့စပ်ပေးမှုဖြင့် ရရှခဲ့သည့် ထိရှလွယ် အပစ်အခတ် ရပ်စဲမှုကို လမ်းလွဲသွားစေခဲ့သော ယခုတိုက်ခိုက်မှုများကို အ ခြားတစ်ဖက်က စတင်ခဲ့ကြောင်း အပြန်အလှန် စွပ်စွဲ နေကြသည်။
အပစ်အခတ်ရပ်စဲမှုကို လေးစားလိုက်နာကြရန် အမေရိကန်သမ္မတနယ်ထရန့်က တိုက်တွန်းထားသည်။
ယမန်နေ့ည တိုက်ခိုက်မှုတွင် အရပ်သားနှစ်ဦး သေဆုံးခဲ့ကြောင်း ကမ္ဘောဒီးယားကာကွယ်ရေးဝန်ကြီးဌာနက ပြောကြားခဲ့ရာသေဆုံးသူ ခြောက်ဦးရှိလာခဲ့သည်။
ထိုင်းကမ်းရိုးတန်း ထရက်ပြည်နယ်ထဲတွင် ကမ္ဘောဒီးယားတပ်ဖွဲ့များ ရောက်ရှိနေသည်ကို တွေ့ရပြီး ၎င်းတို့အား တိုက်ထုတ်ရန် စစ်ဆင်ရေးစတင်သွားမည်ဖြစ်ကြောင်း ထိုင်းရေတပ်က ယနေ့ နံနက်တွင် ပြောကြားသည်။
တစ်ကျော့ပြန်လာသည့် နယ်စပ်တိုက်ခိုက်မှုများတွင် က မ္ဘောဒီးယားကလည်း လက်တုံ့ပြန်ခဲ့ကြောင်း ဩဇာကြီး သောခေါင်းဆောင်ဟောင်း ဟွန်ဆန်က ပြောကြားသည်။
ပြီးခဲ့သည့် နှစ်ရက်တွင် ၎င်းတို့က လက်တုံ့ပြန် တိုက်ခိုက်ခြင်းမရှိကြောင်း ဖနွမ်းပင်က ပြောသည်။
အပစ်အခတ်ရပ်စဲမှုကို လေးစားလိုက်နာပြီး လူများဘေးကင်းရာသို့ ရွှေ့ပြောင်းနိုင်ရေး အချိန်ပေးပြီးနောက် မိမိတို့ ဘက်က ယမန်နေ့ညနေနှင့် ယနေ့နံနက်တွင် လက်တုံ့ပြန် တိုက်ခိုက်ခဲ့ကြောင်း အထက်လွှတ်တော်ဥက္ကဌ နှင့် ဝန် ကြီးချုပ်ဟောင်း ဟွန်ဆန်က ဖေ့စ်ဘွတ်ခ်တွင် ရေးသားသည်။
ရန်သူ တိုက်ခိုက်လာသော နေရာအားလုံးတွင် မိမိတို့တပ်ဖွဲ့များက ပြန်တိုက်ရမည်ဖြစ်ကြောင်း၊ ရန်သူ့ တပ်ဖွဲ့ များ အား ဖျက်ဆီးရန် မဟာဗျူဟာကိုလည်း အကောင်အ ထည်ဖော်ရမည်ဖြစ်ကြောင်း ဟွန်ဆန်က ဆက်ပြောသည်။
ထိုင်းနိုင်ငံအနေဖြင့် အချုပ်အခြာ ပြန်လည်ရရှိရေး အ ကြောင်းပြ၍ အရပ်သားကျေးရွာများကို တိုက်ခိုက်ရန် စစ်အင်အားသုံးရမည် မဟုတ်ကြောင်း ဟွန်ဆန်၏သားဖြစ်သူ လက်ရှိကမ္ဘောဒီးယားဝန်ကြီးချုပ် ဟွန်မာနက်က တနင်္လာ နေ့တွင် ပြောကြားသည်။
ကမ္ဘောဒီးယားတပ်ဖွဲ့များက အင်အားဖြည့်တင်းနေပြီး လက်ဖြောင့်တပ်သားများ၊ လက်နက်ကြီးများချထားခြင်း၊ ဘန်ကာများကို ပိုမိုခိုင်မာ‌အောင်လုပ်ခြင်း၊ ကတုတ်ကျင်းတူးခြင်းများ လုပ်ဆောင်နေကြောင်း ထိုင်းရေတပ်က ပြော ကြားသည်။
ထိုလုပ်ရပ်များသည် ထိုင်းနိုင်ငံ၏ အချုပ်အခြာကို လေ းနက်စွာ ခြိမ်းခြောက်နေသည်ဟု ထိုင်းရေတပ်က ဆက် ပြောသည်။
ကမ္ဘောဒီးယားစစ်ဘက်ကို ချည့်နဲ့သွားစေရန် ကြိုးပမ်းမှုအဖြစ် ၎င်းတို့၏တိုက်လေယာဉ်များက ကမ္ဘော ဒီးယား စစ်စခန်းများကို တိုက်ခိုက်ခဲ့သည်ဟု ထိုင်းက ယမန်နေ့က ပြောကြားသည်။
ထိုင်းက လူမဆန်သော ရက်စက်သော တိုက်ခိုက်မှုများ လုပ်နေကြောင်း ကမ္ဘောဒီးယားက စွပ်စွဲခဲ့ပြီး ၎င်းတို့ ဘက် က လက်တုံ့မပြန်သေးဟု ဆိုသည်။
ကမ္ဘောဒီးယားက အသစ်ထောင်ထားသည်ဟု ထိုင်းကပြောသော မြေမြုပ်မိုင်းနင်းမိ၍ ထိုင်းစစ်သားတစ်ဦး ဒုက္ခိ တဖြစ်သွားခဲ့ကာ အခြားခုနစ်ဦး ဒဏ်ရာရရှိသွားခဲ့ချိန်၌ စစ်ရှိန်လျှော့ချရေး အစီအစဉ်များကို ဆိုင်းငံ့ထားမည် ဖြစ် ကြောင်း ထိုင်းအစိုးရက ပြီးခဲ့သည့်လက ပြောကြားခဲ့ပြီးနောက်တွင် နှစ်နိုင်ငံကြားတင်းမာမှုများ တအုံနွေးနွေး ပြန် ဖြစ်လာခဲ့သည်။
ကမ္ဘောဒီးယားကမူ မိုင်းများ ထပ်ထောင်ထားကြောင်းကို ငြင်းဆိုခဲ့သည်။
ကမ္ဘောဒီးယားက မတောင်းပန်မချင်း အပစ်ရပ်ရေးသ ဘောတူညီချက်ပါ အချက်များကို အကောင်အထည် ဖော် မည်မဟုတ်ဟု ထိုင်းက ပြောသည်။
မိမိတို့အစိုးရအနေဖြင့် နိုင်ငံ၏အချုပ်အခြာတည်မြဲရေးအတွက် လိုအပ်သမျှလုပ်‌ဆောင်သွားမည်ဖြစ်ကာ ကမ္ဘောဒီး ယားနှင့် ဆွေးနွေးမှုများ လုပ်မည်မဟုတ်ကြောင်း ထိုင်းဝန်ကြီးချုပ် အနုတင်ချန်ဗီရာကူးလ် က ယမန်နေ့တွင် ပြော သည်။
ကမ္ဘောဒီးယားက ဒရုန်းများအသုံးပြု၍ ထိုင်းစစ်စခန်းများအပေါ် ဗုံးကြဲနေပြီး အရပ်သား ဧရိယာများကို ယာဉ်တင် BM-21 ဒုံးကျည်များဖြင့် ပစ်ခတ်နေသည်ဟု ထိုင်းစစ်ဘက်က ပြောကြားသည်။
၎င်းတို့၏ လေကြောင်းတိုက်ခိုက်မှု ပစ်မှတ်များတွင် တ ရုတ်နိုင်ငံလုပ် တာဝေးပစ်ဒုံးကျည်များလည်း ပါဝင်ခဲ့ ကြောင်း ထိုင်းစစ်ဘက်အရာရှိတစ်ဦးက ရိုက်တာသတင်းဌာနကို ပြောသည်။
နယ်စပ်တိုက်ခိုက်မှု အသစ်များကြောင့် ထိုင်းအာဏာပိုင်များက နယ်စပ်ခရိုင် ဒေသကြီး ငါးခုမှ အရပ်သား ၄၃၈၀၀၀ ကို ဘေးလွတ်ရာရွှေ့ပြောင်းထားကြပြီး ကမ္ဘောဒီယားတွင်လည်း လူထောင်ပေါင်းများစွာကို ရွှေ့ပြောင်း ထားကြောင်း တာဝန်ရှိသူများက ပြောကြားကြသည်။

နိုင်ဂျီးရီးယားတွင် ပြန်ပေးဆွဲခံကျောင်းသား ၁၀၀ ကျော် ပြန်လည်လွတ်မြောက်လာ

နိုင်ဂျီးရီးယားနိုင်ငံ နိုင်ဂျာပြည်နယ်တွင်လွန်ခဲ့သည့်လက ပြန်ပေးဆွဲခံခဲ့ရသူများအနက်ကျောင်းသား ၁၀၀ ကျော်ကို ပြန်လည်လွတ်မြောက်အောင် လုပ်ဆောင်ခဲ့ကြောင်း နိုင်ဂျီးရီးယားသတင်းဌာနများက ဒီဇင်ဘာ ၇ ရက်တွင်ပြောသည်။
နိုဝင်ဘာ ၂၁ ရက်တွင် နိုင်ဂျာပြည်နယ်ရှိ ပါပီရီရွာငယ်လေးရှိ စိန့်မေရီ ကက်သလစ်ဘော်ဒါကျောင်း၌ သေနတ်သမားများက ကလေး ၃၀၃ ဦးနှင့် ကျောင်းဝန်ထမ်း ၁၂ဦးကို ပြန်ပေးဆွဲခဲ့ကြောင်း နိုင်ဂျီးရီးယားခရစ်ယာန်အသင်းက ပြောသည်။
ကျောင်းသား ၅၀ သည် များမကြာမီတွင် ထွက်ပြေးလွတ်မြောက်ခဲ့သော်လည်းထိုအချိန်မှစ၍ ကျန် ကျောင်းသားများနှင့်ကျောင်းဝန်ထမ်းများ ရှိနေသည့်နေရာ၊သို့မဟုတ် အခြေအနေများအကြောင်း
သတင်းအစ ပျောက်ခဲ့သည်။
လက်ရှိလွတ်မြောက်မှုနှင့် ပတ်သက်သည့် အသေးစိတ်အချက်အလက်များကိုရှင်းလင်းစွာ မသိရသေးပေ။
နိုင်ဂျာပြည်နယ်အာဏာပိုင်များက ကလေးများ လွတ်မြောက်ကြောင်းတရားဝင်ထုတ်ပြန်ခြင်းမရှိဟုသတင်းဌာနများက ဆိုသည်။ နိုင်ဂျီးရီးယားအစိုးရကမူယင်းကိစ္စ အပေါ် ချက်ချင်းမှတ်ချက်ပေးခြင်းမရှိပေ။

ဂျကာတာ မီးလောင်မှု ၂၂ ဦး သေဆုံး

အင်ဒိုနီးရှားနိုင်ငံ၊ မြို့တော် ဂျကာတာမှ ခုနစ်ထပ်ရုံး အ ဆောက်အဦး တစ်ခု၌ ယနေ့ မီးလောင်မှု ဖြစ်ပွားခဲ့ပြီး အနည်းဆုံး လူ ၂၂ ဦး သေဆုံးခဲ့သည်။
မြေညီထပ်၌ ဒရုန်းဘက်ထရီတစ်ခု ပေါက်ကွဲပြီး မီးလောင်မှုစတင်ခဲ့ကာ အ ခြား အထပ်များသို့ ကူးစက်သွားခဲ့ ကြောင်း ရဲ တပ်ဖွဲ့က ပြောသည်။
သို့ရာတွင် မီးလောင်မှုဖြစ်ရသည့် အကြောင်းရင်း အ တိအကျကို ကျွမ်းကျင်ပညာရှင် အဖွဲ့တစ်ဖွဲ့က စုံစမ်းစစ်ဆေးနေဆဲ ဖြစ်ကြောင်း ဂျကာတာဗဟို ရဲတပ် ဖွဲ့ အကြီးအကဲ ဆူ ဆက်တိုကွန်ဒရိုက ပြောကြားသည်။
မီးလောင်မှုမှာ ထမင်းစားချိန်၌ စတင်ခဲ့ပြီး မီးသတ်တပ်ဖွဲ့များ ရောက်လာချိန်တွင် မီးများနေကြောင်း မျက်မြင် သက်သေတစ်ဦးက အေအက်ဖ်ပီ သတင်းဌာ နကို ပြောကြားသည်။
သေဆုံးသူ ၂၂ ဦးတွင် အမျိုးသမီး ၁၅ ဦး ပါဝင်ကြောင်းနှင့် တစ်ဦးမှကိုယ်ဝန်ဆောင် ဖြစ်ကြောင်း ဂျကာတာ ရဲမှူး ကြီးက ပြောသည်။
လူ ၁၉ ဦးက အဆောက်အအုံ အမိုးပေါ်သို့ တက်ရောက် ရှောင်တိမ်းခဲ့ပြီး အ သက်ဘေးမှ လွတ်မြောက်ခဲ့ကြသည်။
လူအသွားအလာ များသော မြို့လယ်မှ မီးလောင်မှုကို မီးသတ်ယာဥ် ၂၉ စီးမီးသတ်တပ်ဖွဲ့ဝင် ၁၀၀ ခန့်ဖြင့် ငြှိမ်း သတ်ခဲ့ကြောင်း မီးသတ်တပ်ဖွဲ့က ပြောသည်။
သေဆုံးသူ အများစုသည် မီးလောင်ဒဏ်ရာ များကြောင့် မဟုတ်ဘဲ မီးခိုးကြောင့် မွန်းကြပ်ပြီး သေဆုံးခဲ့ပုံရကြောင်း ရဲတပ်ဖွဲ့ အကြီးအကဲက ပြောသည်။
မီးလောင်ခဲ့သော အဆောက်အဦကို စိုက်ပျိုးရေး လုပ်ငန်းအတွက် ဒရုန်းဝန်ဆောင်မှုများ ပေးသောကုမ္ပဏီက အသုံး ပြုနေကြာင်း သိရသည်။
ရဲတပ်ဖွဲ့က စီးပွားရေးလုပ်ငန်းပိုင်ရှင် အဆောက်အဦးပိုင် ရှင် အပါအဝင် မျက်မြင်သက်သေများကို မေးမြန်းစစ်ဆေးနေသည်ဟု ဂျကာတာ ရဲမှူးကြီးက ဆက်ပြောသည်။

ပြည်ပပို့ ငရုတ်သီးများ ဓာတ်ခွဲစစ်ဆေးပြီးမှသာ တင်ပို့ခွင့်ပြုမည်

ပြည်ပသို့ ငရုတ်သီးတင်ပို့သည့်ကုမ္ပဏီများအနေဖြင့် ဓာတ်ခွဲစစ်ဆေးပြီးမှသာ တင်ပို့ခွင့်ပြုတော့မည်ဖြစ်ကြောင်း စိုက်ပျိုးရေးဦးစီးဌာနသီးနှံကာကွယ်ရေးဌာနခွဲက ထုတ်ပြန်ထားသည်။
မြန်မာနိုင်ငံမှ ထိုင်းနိုင်ငံသို့တင်ပို့သည့် ငရုတ်သီးများတွင်ပိုးသတ်ဆေး၊ ပေါင်းသတ်ဆေး၊မှိုအဆိပ် ဓာတ်ကြွင်းများ တွေ့ရှိရပြီးနောက်ပိုင်းယင်းကဲ့သို့ အသိပေးလာခြင်းဖြစ်သည်။
မှိုအဆိပ်ဓာတ်ကြွင်းများထိုင်းနိုင်ငံသို့ တင်ပို့ခဲ့သည့် ငရုတ်သီး(အခြောက်)နှင့် ငရုတ်သီး (အစို)များတွင် Chlorpyrifos နှင့် Triazophos ပိုးသတ်ဆေး၊ Glyphosateပေါင်းသတ်ဆေး၊ Aflatoxin မှိုအဆိပ်ဓာတ်ကြွင်းများ တွေ့ရှိရကြောင်းသိရသည်။
အဆိုပါဖြစ်စဉ်အား စိစစ်ရာတွင် မြ၀တီနယ်စပ် ပိုးမွှားထိန်းချုပ်ရေးစခန်းမှ ကုမ္ပဏီ ၁၁ ခုနှင့် မောတောင်နယ်စပ် ပိုးမွှားထိန်းချုပ်ရေးစခန်းမှကုမ္ပဏီတစ်ခုတွင် တွေ့ရှိခဲ့ခြင်းဖြစ်သည်။
ထို့ကြောင့် စိုက်ပျိုးရေးဦးစီးဌာန သီးနှံကာကွယ်ရေးဌာနခွဲ (ရုံးချုပ်)မှISO 17025 လက်မှတ်ရရှိသည့် စိုက်ပျိုးရေးထွက်ကုန်များ အရည်အသွေးစစ်ဆေးရေး ဓာတ်ခွဲခန်းသို့ ပေးပို့စစ်ဆေးရမည်ဖြစ်သည်။
ပြည်တွင်း၌ စိုက်ပျိုးထွက်ရှိသော ငရုတ်သီးကို ထိုင်းနိုင်ငံသို့ အဓိကထားတင်ပို့ပြီး တရုတ်၊ လာအို၊ မလေးရှား စသည့်နိုင်ငံများသို့လည်း တင်ပို့လျက်ရှိကြောင်း သိရသည်။
မိုးခေါင်ခြင်း၊ ရေကြီးခြင်း စသော ရာသီဥတုပြောင်းလဲမှုများကြောင့်ဖျက်ပိုးပေါက်ဖွားမှုနှုန်း မြင့်မားလာ သည့်အတွက် ပိုးသတ်ဆေးများကိုပမာဏမြှင့်ပြီး သုံးစွဲလာရကာ ထိုအခါ နည်းစနစ်မမှန်ကန်ခြင်း၊ ပိုးနှင့်ရောဂါမှား၍ ဆေးဖျန်းခြင်း၊ ပိုမိုထိရောက်စေရန် ဆေးပမာဏကို တိုးမြှင့်သုံးခြင်း၊ပိုးသတ်ဆေး တစ်မျိုးတည်းကို ထပ်ကာထပ်ကာအသုံးပြုသဖြင့် ဆေးယဉ်ပါးမှုကြောင့် ပိုးသတ်ဆေးများ ပိုမိုသုံးစွဲရခြင်း၊ ပိုးသတ်ဆေးဖျန်းပြီးနောက် သီးနှံမရိတ်သိမ်းခင် စောင့်ဆိုင်းရ မည့်အချိန်ကာလကို မစောင့်ဆိုင်းဘဲ ခူးဆွတ်ပြီးဈေးကွက်အလျင်မီရန် တင်ပို့ရသဖြင့် နေ့စဉ်စားသုံးသော အသီးအနှံများတွင်ပိုးသတ်ဆေး၊ မှိုသတ်ဆေး စသည့် ဓာတုဓာတ်ကြွင်းများ ပါဝင်မှုများလာခြင်းဖြစ်ကြောင်း သိရသည်။

မလေးရှားနိုင်ငံတွင် အကျဉ်းကျခံပြီးသည့် နိုင်ငံခြားသား ၁၄၇ ဦး နေရပ်ပြန်ပို့

မလေးရှားနိုင်ငံတွင် အကျဉ်းကျခံပြီးသည့် မြန်မာနိုင်ငံသား ၉၁ဦးအပါအဝင် နိုင်ငံခြားသား ၁၄၇ ဦးအား သက်ဆိုင်ရာ နိုင်ငံများသို့ ဒီဇင်ဘာလ ပထမပတ်အတွင်း ပြန်ပို့ခဲ့ကြောင်း မလေးရှားလူဝင်မှု ကြီးကြပ်ရေးဌာန၏ ထုတ်ပြန်ချက်အရ သိရသည်။
ပြန်ပို့ခဲ့သည့် နိုင်ငံခြားသားများတွင် မြန်မာနိုင်ငံသား ၉၁ ဦး၊ အင်ဒိုနီးရှားနိုင်ငံသား ၂၉ ဦး၊အိန္ဒိယနိုင်ငံသား ၁၁ ဦး၊ ဖိလစ်ပိုင်နိုင်ငံသား ကိုးဦး၊ လာအိုနိုင်ငံသား သုံးဦး၊ နီပေါနိုင်ငံသား နှစ်ဦး၊ ပါကစ္စတန်နိုင်ငံသားတစ်ဦးနှင့် သီရိလင်္ကာနိုင်ငံသား တစ်ဦးစီ ပါဝင်ကြောင်း သိရသည်။
၎င်းတို့အားလုံးကို ကွာလာလမ်ပူ KLIA 1 နှင့် KLIA 2အပြည်ပြည်ဆိုင်ရာလေဆိပ်များနှင့်စတူလန်းလော့တ်သင်္ဘောဆိပ်များမှ တစ်ဆင့် သက်ဆိုင်ရာနိုင်ငံများသို့လွှဲပြောင်းပေးအပ်ခဲ့ကြောင်း သိရသည်။
နိုင်ငံခြားသားများအား နေရပ်ပြန်ပို့ရာတွင် လိုအပ်သော ခရီးစရိတ်များအား သက်ဆိုင်ရာသံရုံးမှ တာဝန်ယူခြင်း၊ ကိုယ်ပိုင်နှင့် မိသားစုဝင်များက ကျခံခြင်းများဖြင့်ဆောင်ရွက်ခဲ့ပြီး ၎င်းတို့အားလုံးအား အမည်ပျက် စာရင်း(Blacklisted) သွင်းထားပြီး သတ်မှတ်ကာလအတွင်းမလေးရှားနိုင်ငံထဲသို့ ပြန်လည်ဝင်ရောက်ခွင့် ပြုမည်မဟုတ်ကြောင်း မလေးရှားလူဝင်မှုကြီးကြပ်ရေးဌာနကထုတ်ပြန်ထားသည်။