ပညာရေးကဏ္ဍမြှင့်တင်ရေး မဖြစ်မနေဆောင်ရွက်သွားမည် ဟုဆို
--------------------------
ပညာရေးကဏ္ဍ မြှင့်တင်ရေးကို မဖြစ်မနေ ဆောင်ရွက်သွားမှာ ဖြစ်တယ်လို့ နိုင်ငံတော် လုံခြုံရေးနှင့် အေးချမ်းသာယာရေးကော်မရှင် ဥက္ကဋ္ဌ တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြောပါတယ်။
ဖေဖော်ဝါရီ ၃ ရက်က နိုင်ငံတော် ကာကွယ်ရေးတက္ကသိုလ်က နည်းပြအရာရှိကြီးတွေနဲ့ သင်တန်းသားအရာရှိကြီး တွေကို Video Conferencing နဲ့ အမှာစကား ပြောကြားရာမှာ အခုလို ထည့်သွင်း ပြောကြားခဲ့တာပါ။
မိမိတို့နိုင်ငံအနေနဲ့ နိုင်ငံရေး၊ စီးပွားရေး၊ ပညာရေးကဏ္ဍတွေမှာ နိမ့်ပါးခဲ့ပြီး နိုင်ငံတိုးတက်ရေး၊ တည်ငြိမ်အေးချမ်း ရေးနဲ့ ဖွံ့ဖြိုးတိုးတက်ရေးအတွက် နိုင်ငံသားတွေရဲ့ ပညာရေးကဏ္ဍ မြင့်မားနေဖို့ လိုတယ်လို့ ဗိုလ်ချုပ်မှူးကြီး မင်းအောင်လှိုင်က ပြောပါတယ်။
“အမျိုးသားစည်းကမ်းအစ စာသင်ကျောင်းက” ဆိုတဲ့ ဆောင်ပုဒ်အတိုင်း အတန်းပညာရှိမှသာ စည်းကမ်းကောင်း မွန်တဲ့ နိုင်ငံသားတွေများပြားလာမှာဖြစ်ပြီး နိုင်ငံတိုးတက်ရေး၊ တည်ငြိမ်အေးချမ်းရေးနဲ့ ဖွံ့ဖြိုးတိုးတက်ရေးကို များစွာ အထောက်အကူပြုမှာဖြစ်တယ်လို့ ဆိုပါတယ်။
၂၀၂၄ ခုနှစ် လူဦးရေနှင့် အိမ်အကြောင်းအရာ သန်းခေါင်စာရင်းမှာ နိုင်ငံတော်ရဲ့ အခြေအနေတွေကို အသေးစိတ် ဖော်ပြထားတာကို တွေ့မြင်ရမှာဖြစ်ပြီး ပညာရေးကဏ္ဍကို များစွာအဆင့်မြှင့်တင်ဖို့ လိုအပ်နေတာကို တွေ့မြင်နိုင် မှာဖြစ်တယ်လို့လည်း ဗိုလ်ချုပ်မှူးကြီး မင်းအောင်လှိုင်က ပြောပါတယ်။
နိုင်ငံ့လူဦးရေရဲ့ အများစုဟာ မိမိတို့ ကိုယ်ကို ဖွံ့ဖြိုးတိုးတက်ရေးကို ဆောင်ရွက်နိုင်မှုမရှိတဲ့အတွက် ဆင်းရဲမွဲတေမှု လည်းများပြားပြီး ဆင်းရဲမွဲတေမှုတွေရှိနေသမျှ ကာလပတ်လုံး ပုဂ္ဂိုလ်ရေး ခံစားချက်တွေရှိကာ မနာလိုတာမ ကျေနပ်တာတွေ ဖြစ်ပေါ်နိုင်တယ်လို့ ဆိုပါတယ်။
မိမိတို့ နိုင်ငံရဲ့ သမိုင်းကြောင်းမှာ ဖြစ်ပေါ်ခဲ့တဲ့ နိုင်ငံမတည်ငြိမ်မှု ဖြစ်စဉ်တွေဟာ ပညာရေးဆိုင်ရာ အားနည်းချက် ကြောင့်ဖြစ်တာကိုတွေ့ရပြီး ပညာရေးကဏ္ဍ မြှင့်တင်ရေးကို မဖြစ်မနေ ဆောင်ရွက်ရမှာဖြစ်တယ်လို့လည်း ဗိုလ်ချုပ်မှူးကြီး မင်းအောင်လှိုင်က ပြောပါတယ်။
ဒါ့ကြောင့် ကျောင်းနေအရွယ်ကလေးငယ်တွေ အားလုံး ကျောင်းနေစေရေး နိုင်ငံသားအားလုံး ဝိုင်းဝန်းဆောင်ရွက် သွားကြဖို့ လိုတယ်လို့လည်း ဗိုလ်ချုပ်မှူးကြီး မင်းအောင်လှိုင်က ပြောကြားခဲ့ပါတယ်။

“ဝ” နယ်မြေတွင် မူးယစ်ဆေး တစ်တန်ခွဲကျော် ဖမ်းမိပြီး တရုတ်သို့ လွှဲပြောင်း
----------------------------
“ဝ” ကိုယ်ပိုင်အုပ်ချုပ်ခွင့်ရ နယ်မြေအတွင်း မူးယစ်ဆေးဝါး တစ်တန်ခွဲကျော် သယ်ဆောင်လာတဲ့ ကားကို ပြီးခဲ့တဲ့ ရက်ပိုင်းက ဖမ်းဆီးရမိခဲ့ပြီး တရုတ်ဘက်ကို လွှဲပြောင်းပေးအပ်ခဲ့တယ်လို့ UWSA က ဖေဖော်ဝါရီ ၃ ရက်မှာ ထုတ်ပြန်ပါတယ်။
တရုတ်ဘက်က ပေးပို့တဲ့ သတင်းအချက်အလက်တွေပေါ် အခြေခံပြီး စုံစမ်းထောက်လှမ်းကာ ဖမ်းဆီးခဲ့တာ ဖြစ် တယ်လို့ ဆိုပါတယ်။
ဖမ်းဆီးရမိတဲ့ အိုက်စ် ၁၆၂၂ ဒသမ ၉ ကီလိုဂရမ် (စုစုပေါင်း ၅၆ အိတ်) နဲ့ မူးယစ်ဆေးဝါး ထုတ်လုပ်ရာမှာ အသုံးပြုတဲ့ ပစ္စည်း နှစ်မျိုးတို့ကို ဖေဖော်ဝါရီ ၂ ရက်မှာ “ဝ” - တရုတ် နယ်စပ် ယုံးဟော် နယ်စပ်ဂိတ်မှာ တရုတ်ဘက်ကို လွှဲပြောင်းပေးအပ်ခဲ့တယ်လို့ ထုတ်ပြန်ချက်အရ သိရပါတယ်။
အဲဒီ မူးယစ်ဆေးဝါးတွေဟာ “ဝ” ကိုယ်ပိုင်အုပ်ချုပ်ခွင့်ရ နယ်မြေအတွင်းက တစ်ဆင့် နယ်စပ်ဖြတ်ကျော်သယ် ဆောင်ဖို့ ရည်ရွယ်ထားတာဖြစ်ပြီး “ဝ” ဘက်က ကြားဖြတ်ဟန့်တားကာ ဖမ်းဆီးခဲ့နိုင်ခဲ့သလို ပြစ်မှုကျူးလွန်သူတွေကို ဥပဒေအရ အရေးယူဆောင်ရွက်ထားတယ်လို့ ထုတ်ပြန်ချက်မှာ ဖော်ပြထားပါတယ်။
“ဝ” တရားစီရင်ရေး ကော်မတီအနေနဲ့ မူးယစ်ဆေးဝါးကို လူ့အဖွဲ့အစည်းရဲ့ အန္တရာယ်တစ်ခုအဖြစ် ရှုမြင်ပြီး နယ်စပ်ဒေသ သတင်းအချက်အလက်ဖလှယ်တာနဲ့ ပူးပေါင်းစစ်ဆေးတာတွေကို အရှိန်မြှင့် လုပ်ဆောင်သွားမှာ ဖြစ်တယ်လို့လည်း ထုတ်ပြန်ထားပါတယ်။

ဂရိကမ်းလွန်ရေပြင်တွင် ရေယာဉ်တိုက်မိ ၁၄ ဦးသေဆုံး
-------------------------
တရားမဝင် ရွှေ့ပြောင်း အခြေချသူတွေကို တင်ဆောင်လာတဲ့ မော်တော်ဘုတ်တစ်စီးနဲ့ ဂရိ ကမ်းခြေစောင့်တပ် ရေယာဉ်တို့ တိုက်မိခဲ့ရာမှာ ရွှေ့ပြောင်း အခြေချသူ ၁၄ ဦးထက်မနည်း သေဆုံးခဲ့တယ်လို့ CNBC သတင်းမှာဖော်ပြထားပါတယ်။
ဂရိပိုင် ချီယော့စ်ကျွန်းရဲ့ ကမ်းလွန်ရေပြင်မှာ ဖေဖော်ဝါရီ ၃ ရက်နေ့က ရေယာဉ်နှစ်စီး တိုက်မိခဲ့ကြတာ ဖြစ်ပါတယ်။ ရွှေ့ပြောင်း အခြေချသူတွေ လိုက်ပါလာတဲ့မော်တော်ဘုတ်ကို ကမ်းခြေစောင့် ရေယာဉ်က အပူတပြင်း လိုက်လံ ဖမ်းဆီးခဲ့လို့ မော်တော်ဘုတ်က ရှောင်တိမ်းကွေ့ဝိုက်မောင်းနှင်ခဲ့တာလို့ ကမ်းခြေစောင့်တပ် တာဝန်ရှိသူတွေက ပြောပါတယ်။
အဲ့ဒီနောက် မော်တော်ဘုတ်က အရှိန်မထိန်းနိုင်ဘဲ ကမ်းခြေစောင့်တပ် ရေယာဉ်ကို တည့်တည့် ဝင်တိုက်ခဲ့ပြီး ထိခိုက်သေကြေမှုတွေ ဖြစ်ခဲ့တာလို့ ဆိုပါတယ်။ ဗရွန်တာဒက်စ် ကျေးရွာနားက ရေပြင်မှာ ကြုံတွေ့ခဲ့တဲ့ အဲ့ဒီဖြစ်ရပ်အပြီး လူပေါင်း ၂၄ ဦးကို ဂရိ အာဏာပိုင်တွေက ကယ်ဆယ်နိုင်ခဲ့ပါတယ်။ အဲဒီထဲမှာ ဒဏ်ရာ အပြင်းအထန် ရထားသူတွေလည်း ပါဝင်ခဲ့ပါတယ်။ဖြစ်စဉ်နဲ့ ပတ်သက်တဲ့ အသေးစိတ် အချက်အလက်တွေကိုတော့ ကမ်းခြေစောင့်တပ်က မထုတ်ပြန်သေးပါဘူး။

ဆောက်လုပ်မှုကဏ္ဍဖွံ့ဖြိုးတိုးတက်ရေးဥပဒေ ပြဋ္ဌာန်း
-----------------------
အမျိုးသားကာကွယ်ရေးနှင့် လုံခြုံရေးကောင်စီက ဆောက်လုပ်မှုကဏ္ဍဖွံ့ဖြိုးတိုးတက်ရေးဥပဒေကို ဖေဖော်ဝါရီ ၄ရက် ရက်စွဲနဲ့ ပြဋ္ဌာန်းလိုက်တယ်လို့ အမျိုးသားကာကွယ်ရေးနှင့်လုံခြုံရေးကောင်စီ သတင်းထုတ်ပြန်ရေးအဖွဲ့က ထုတ်ပြန်ပါတယ်။
ဒီဥပဒေရဲ့ မူကြမ်းကို ပြီးခဲ့တဲ့၂၀၁၈ခုနှစ်က စတင်ရေးဆွဲခဲ့တာဖြစ်ပြီး အခုအခါမှာတော့ ဥပဒေကို ပြဋ္ဌာန်းနိုင်ခဲ့တာဖြစ်တယ်လို့ ဆောက်လုပ်ရေးဝန်ကြီးဌာနကနေ သိရပါတယ်။
ဒီဥပဒေပြဋ္ဌာန်းလိုက်တဲ့အတွက် ဆောက်လုပ်ရေးလုပ်ငန်းခွင်တွေမှာ စံချိန်စံညွှန်းပြည့်မီတဲ့ ဆောက်လုပ်ရေးလုပ်ငန်းသုံးပစ္စည်းတွေ အသုံးပြုနိုင်ဖို့၊ ကျွမ်းကျင်လုပ်သားတွေ မွေးထုတ်ပေးနိုင်ဖို့၊ ဆောက်လုပ်ရေးကဏ္ဍ ပိုမိုဖွံ့ဖြိုးလာဖို့ စတဲ့ကိစ္စရပ်တွေမှာ အထောက်အကူပြုနိုင်မှာဖြစ်တယ်လို့လည်း ဆောက်လုပ်ရေးပညာရှင်တွေက သုံးသပ်ကြပါတယ်။
ဆောက်လုပ်မှုကဏ္ဍဖွံ့ဖြိုးတိုးတက်ရေးဥပဒေအပြည့်အစုံကို နေ့စဉ်ထုတ်သတင်းစာတွေမှာ ဖော်ပြပေးသွားမှာဖြစ်တယ်လို့လည်း သိရပါတယ်။

မန္တလေးတိုင်းအတွင်းရှိ စက်မှုဇုန်များအား LNGဖြင့်ဓာတ်အားပေးမည်
--------------------------------------
မန္တလေးတိုင်းဒေသကြီးအတွင်းမှာရှိတဲ့ စက်မှုဇုန်တွေ၊ စက်မှုလက်မှုလုပ်ငန်းတွေနဲ့ စီးပွားရေးလုပ်ငန်းတွေကို LNGဓာတ်အားပေးစက်ရုံတွေကနေ လျှပ်စစ်ဓာတ်အားဖြန့်ဖြူးပေးသွားမှာဖြစ်တယ်လို့ လျှပ်စစ်စွမ်းအားဝန်ကြီးဌာနကနေ သိရပါတယ်။
အဲဒီလို LNGဓာတ်အားပေးစက်ရုံတွေကနေ လျှပ်စစ်ဓာတ်အားဖြန့်ဖြူးပေးမဲ့အကြောင်းကို ဖေဖော်ဝါရီ၃ရက်က မန္တလေးတိုင်းဒေသကြီးအစိုးရအဖွဲ့ရုံးမှာပြုလုပ်တဲ့ လျှပ်စစ်စွမ်းအားဝန်ကြီးဌာန ပြည်ထောင်စုဝန်ကြီးဦးဉာဏ်ထွန်း၊ မန္တလေးတိုင်းဒေသကြီးဝန်ကြီးချုပ် ဦးမျိုးအောင်၊ လျှပ်စစ်ဓာတ်အားထုတ်လုပ်ရေးလုပ်ငန်း၊ လျှပ်စစ်ဓာတ်အားပို့လွှတ်ရေးနှင့် ကွပ်ကဲရေးဦးစီးဌာနနဲ့ မန္တလေးလျှပ်စစ်ဓာတ်အားပေးရေးကော်ပိုရေးရှင်းတို့က တာဝန်ရှိသူတွေနဲ့ မန္တလေးတိုင်းဒေသကြီးအတွင်းရှိ စက်မှုလုပ်ငန်းရှင်တွေ၊ စီးပွားရေးလုပ်ငန်းရှင်တွေ တွေ့ဆုံပွဲမှာ ရှင်းလင်းပြောကြားခဲ့တာဖြစ်တယ်လို့ ဆိုပါတယ်။
LNGဓာတ်အားပေးစက်ရုံတွေကနေ လျှပ်စစ်ဓာတ်အားဖြန့်ဖြူးရာမှာ တစ်ယူနစ်ကို ကျပ်၉၀၀နှုန်း သတ်မှတ်ကောက်ခံမှာဖြစ်ပြီး အိမ်သုံးဓာတ်အားခနှုန်းထားတွေကတော့ အရင်အတိုင်း ပြောင်းလဲမှုမရှိဘူးလို့ ပြည်ထောင်စုဝန်ကြီး ဦးဉာဏ်ထွန်းက ပြောပါတယ်။
LNGနဲ့ဓာတ်အားထုတ်လုပ်တာဟာ ဈေးနှုန်းကြီးမြင့်ပေမဲ့လည်း လျှပ်စစ်ဓာတ်အားလိုအပ်ချက်ကို အချိန်တိုအတွင်း ဖြည့်ဆည်းပေးနိုင်တာကြောင့် စက်မှုလုပ်ငန်းရှင်တွေအတွက် ခိုင်မာတဲ့စွမ်းအင်အာမခံချက် ရရှိမှာဖြစ်တယ်လို့လည်း မန္တလေးတိုင်းဒေသကြီးဝန်ကြီးချုပ် ဦးမျိုးအောင်က ပြောပါတယ်။
လက်ရှိမှာ LNGဓာတ်အားပေးစက်ရုံတွေကနေ တိုးမြှင့်ထုတ်လုပ်လာနိုင်တဲ့အခြေအနေအရ ဇန်နဝါရီ၁၅ရက်ကနေ ၃၁ရက်အထိ တစ်ရက်ကို လျှပ်စစ်ဓာတ်အား ၆၂၀၀၀မဂ္ဂါဝပ်နာရီ ထုတ်လုပ်ပေးနိုင်ခဲ့တယ်လို့လည်း လျှပ်စစ်စွမ်းအားဝန်ကြီးဌာနကနေ သိရပါတယ်။

အမေရိကန်ကနေ တရုတ်နိုင်ငံကို ပြန်ရောက်ပြီး ၃ နှစ်နီးပါးအကြာမှာ ကျန်းမာဝဖြိုးနေပြီဖြစ်တဲ့ ပန်ဒါကြီးယာယာ
အမေရိကန်နိုင်ငံ၊ Memphis Zoo မှာ နှစ် ၂၀ နေထိုင်ခဲ့တဲ့ ပန်ဒါကြီးယာယာကို အရင်နဲ့မတူတဲ့ပုံစံမျိုးနဲ့ မကြာသေးခင်ကမှ မြင်တွေ့ခဲ့ရပါတယ်။ တရုတ်နိုင်ငံ၊ Beijing Zoo က ထုတ်ပြန်ခဲ့တဲ့ ဗီဒီယိုတစ်ခုမှာ ယာယာဟာ ကျန်းမာဝဖြိုးလို့နေပါတယ်။
ယာယာက အမေရိကန်နိုင်ငံကနေ တရုတ်နိုင်ငံကို ၂၀၂၃ ခုနှစ် ဧပြီ ၂၇ ရက်နေ့က ပြန်ရောက်ရှိခဲ့ပြီး Beijing Zoo မှာ နေထိုင်နေတာပါ။ အမေရိကန်မှာ ရှိနေစဉ်က ယာယာဟာ ပိန်ပိန်ပါးပါးနဲ့ အဟာရချို့တဲ့နေသလိုဖြစ်နေခဲ့တာပါ။
အခုဆို ယာယာရဲ့ကျန်းမာဝဖြိုးနေတဲ့အသွင်အပြင်ဟာ တရုတ်လူမှုကွန်ယက်မှာ ရေပန်းစားနေတဲ့ အကြောင်းအရာတစ်ခုဖြစ်နေပါတယ်။ ယာယာက တရုတ်နိုင်ငံကို ပြန်ရောက်တဲ့အချိန်မှာ ကိုယ်အလေးချိန် ၇၅ ကီလိုဂရမ်သာရှိပါတယ်။ သူ ပြန်ရောက်လာပြီး ၃ နှစ်နီးပါးအကြာမှာ ကိုယ်အလေးချိန် ၉၅ ကီလိုဂရမ်ရှိနေပါပြီ။
ယာယာရဲ့ခန္ဓာကိုယ်အခြေအနေကလည်း တိုးတက်နေပါပြီ။ သူ့ကိုယ်အလေးချိန်က အသက်ကြီးတဲ့ပန်ဒါကြီးတွေအတွက် သင့်တော်တဲ့ပမာဏအတွင်း ရှိပြီး တည်ငြိမ်နေတယ်။ ရုပ်ပိုင်းဆိုင်ရာလုပ်ဆောင်ချက်အားလုံးကလည်း ကောင်းမွန်တယ်လို့ တိရစ္ဆာန်ဆရာဝန်တွေက အကဲဖြတ်ထားပါတယ်။
၂၀၀၀ ခုနှစ် ဩဂုတ် ၃ ရက်နေ့မှာ မွေးဖွားခဲ့တဲ့ ယာယာကို Memphis Zoo မှာရှိနေစဉ်က သူ့ရဲ့ကျန်းမာရေးနဲ့ပတ်သက်ပြီး တိရစ္ဆာန်စောင့်ရှောက်ရေးလှုပ်ရှားသူတချို့က စိုးရိမ်ခဲ့ရပါတယ်။ ပန်ဒါကြီးကို နှိပ်စက်ညှဉ်းပန်းမှုမရှိဘူးလို့ Memphis Zooက ငြင်းဆိုကာ သူ့ရဲ့မျိုးရိုးဗီဇက သူ့ရဲ့အရွယ်အစားသေးငယ်ရခြင်းရဲ့အကြောင်းအရင်းဖြစ်တယ်လို့ ဖြေရှင်းချက်ထုတ်ခဲ့ပါတယ်။

တစ်ရက်အတွင်း ငလျင်နှစ်ကြိမ်လှုပ်ခတ်
-----------------------
ဖေဖော်ဝါရီလ(၅)ရက်နေ့၊နံနက်(၁)နာရီ၉မိနစ်၄၂စက္ကန့်အချိန်ကမြန်မာနိုင်ငံပြည်တွင်းဟုမ္မလင်းမြို့ကိုဗဟိုပြုပြီးအင်အားရစ်(ခ်)စကေး(၄ဒသမ၄)အဆင့်ရှိငလျင်နဲ့နံနက်(၂)နာရီ၈မိနစ်၄၀စက္ကန့်အချိန်ကအုတ်တွင်းမြို့ကိုဗဟိုပြုပြီးအင်အားရစ်(ခ်)စကေး(၄ဒသမ၃)အဆင့်ရှိငလျင်လှုပ်ခတ်သွားတယ်လို့ မိုးလေဝသနှင့် ဇလဗေဒ ညွှန်ကြားမှု ဦးစီးဌာနက ထုတ်ပြန်ပါတယ်။
ဟုမ္မလင်းငလျင်ဟာတမူးမြေငလျင်စခန်းကနေအရှေ့မြောက်ဘက်(၇၅)မိုင်ခန့်ကွာဝေးတဲ့မြန်မာနိုင်ငံပြည်တွင်းဟုမ္မလင်းမြို့ရဲ့အရှေ့အရှေ့မြောက်ဘက်(၁၈)မိုင်ခန့်အကွာ၊အနက်(၇၅)ကီလိုမီတာကိုဗဟိုပြုပြီးလှုပ်ခတ်သွားတာလို့ဆိုပါတယ်။ ဒါ့အပြင်အုတ်တွင်းငလျင်ဟာ အဲဒီမြို့ရဲ့အနောက်ဘက် (၂၁)မိုင်ခန့်အနက်-၁၁ကီလိုမီတာကိုဗဟိုပြုပြီး လှုပ်ခတ်ခဲ့တာလို့သိရပါတယ်။
ဖေဖော်ဝါရီ၃ရက်၊ နေ့လယ်၁၂နာရီ ၄၂မိနစ်ခန့်ကလည်း မန္တလေးတိုင်းဒေသကြီး၊ ပုသိမ်ကြီးမြို့နယ်ရဲ့ အနောက် မြောက်ဘက် ၃မိုင်ခန့်အကွာကို ဗဟိုပြုပြီး အင်အားရစ်ခ်တာစကေး ၃ဒသမ၉အဆင့်ရှိတဲ့ ငလျင်တစ်ခုနဲ့ ည(၁၀) နာရီအချိန်ခန့်ကလည်း မကွေးတိုင်းဒေသကြီး၊ စေတုတ္တရာမြို့အနီးကို ဗဟိုပြုပြီး အင်အား ရစ်(ခ်)တာစကေး ၆ အဆင့်ရှိမြေငလျင်တစ်ခုလှုပ်ခတ်ခဲ့ပါသေးတယ်။
မြန်မာနိုင်ငံမှာ စစ်ကိုင်းပြတ်ရွေ့ အပါအဝင် သက်ရှင်ပြတ်ရွေ့ကြောတွေရှိတဲ့ စစ်ကိုင်း၊ မန္တလေး၊ ပဲခူး၊ ရန်ကုန်၊ ရခိုင်နဲ့ ချင်းဒေသ တစ်လျှောက်မှာ မြေငလျင်တွေ မကြာခဏ လှုပ်ခတ်တာတွေ ရှိနေတဲ့အတွက် မြေငလျင်နဲ့ ပတ်သက်လို့ အမြဲသတိပြုနေဖို့ လိုအပ်တယ်လို့ မြေငလျင်လေ့လာသူတွေက ပြောကြားထားပါတယ်။

နေပြည်တော်-ရန်ကုန်အမြန်လမ်းတွင် ယာဉ်တိုက်မှုကြောင့် လူတစ်ဦးသေဆုံး
-------------------------------
နေပြည်တော်-ရန်ကုန်အမြန်လမ်းမကြီးမှာ ဖေဖော်ဝါရီလ ၅ ရက် မနက် ၂ နာရီ ၃၀ မိနစ်အချိန်လောက်က ယာဉ်တိုက်မှုကြောင့် အမျိုးသားတစ်ဦး သေဆုံးခဲ့တယ်လို့ အမြန်လမ်း မီးသတ်တပ်ဖွဲ့ကနေ သိရပါတယ်။
နေပြည်တော်-ရန်ကုန်အမြန်လမ်းမကြီးရဲ့ မိုင်တိုင်အမှတ်(၁၅၇/၇)နဲ့ (၁၅၇/၆) ဖာလုံကြားမှာ ဖြစ်ပွားခဲ့တဲ့ အဲ့ဒီယာဉ်တိုက်မှုကို သာဂရအမြန်လမ်းမီးသတ်စခန်းမှ မီးသတ်ယာဉ်(၁)စီးနဲ့ သန္ဓေမီးသတ်တပ်ဖွဲ့ဝင်တွေက ရှာဖွေကယ်ဆယ်ရေးလုပ်ငန်းတွေ သွားရောက်ဆောင်ရွက်ခဲ့တယ်လို့ ဆိုပါတယ်။
အဲ့ဒီဖြစ်စဉ်ကြောင့် ယာဉ်ပေါ်ပါ ယာဉ်မောင်း အမျိုးသား (၁)ဦး သေဆုံးခဲ့ပြီး အမျိုးသမီး (၃)ဦး ထိခိုက်ဒဏ်ရာ ရရှိခဲ့တယ်လို့ သိရပါတယ်။
ဒါကြောင့် သေဆုံးသူနဲ့ ထိခိုက်ဒဏ်ရာရရှိခဲ့သူတွေကို တောင်ငူ (192) ပရဟိတအသင်းမှ သူနာတင်ယာဉ်နဲ့ တောင်ငူပြည်သူ့ဆေးရုံကြီးကို ပို့ဆောင်ပေးခဲ့ပါတယ်။

ONE Friday Fights 141တွင် မြန်မာဖိုက်တာ (၄) ဦးပါဝင်မည်
---------------------------
ONE Friday Fights 141ပြိုင်ပွဲကို ဖေဖော်ဝါရီ(၆)ရက် သောကြာည ထိုင်းနိုင်ငံ၊ဘန်ကောက်မြို့ရှိ လုမ္မဏီ အားကစားရုံမှာ ကျင်းပမှာဖြစ်ပြီး မြန်မာဖိုက်တာ(၄)ဦး ပါဝင်ယှဉ်ပြိုင်မယ်လို့ ONE Championship ထုတ်ပြန်ချက်အရသိရပါတယ်။ ပြိုင်ပွဲမှာထိုးသတ်မယ့် တွဲဆိုင်း ၁၄ ဆိုင်းမှာ မြန်မာဖိုက်တာ (၄) ဦးရဲ့ တွဲဆိုင်းတွေကိုလည်း ထည့်သွင်းထားတယ်လို့ဆိုပါတယ်။
မြန်မာဖိုက်တာတွေဖြစ်တဲ့ ရဲရင့်နောင်၊စိုးနောင်ဦး၊စောမင်းမင်းနဲ့ လင်းထက်အောင် တို့ယှဉ်ပြိုင်ကြမှာပါ။ မြန်မာပါဝင်တဲ့ တွဲဆိုင်း(၄)ဆိုင်းပွဲစဉ်တွေမှာ ပွဲစဥ် (၄) ဖလိုင်းဝိတ်မွေထိုင်းမှာ ရဲရင့်နောင်နဲ့ မလေးရှား/ အမေရိကန်ဖိုက်တာ ဂျိုဟန်ဂါဇာလီ (ဂျိုဂျို)၊ ပွဲစဥ် (၈) စတောဝိတ်မွေထိုင်းမှာ လင်းထက်အောင်နဲ့ ဂျပန်ဖိုက်တာ ဟာရာယုကီတာနစ်ဆု၊ ပွဲစဥ် (၁၁) စတောဝိတ်မွေထိုင်းမှာ စိုးနောင်ဦးနဲ့ ထိုင်းဖိုက်တာ ဖေ့စ်အီရာဝမ်၊ ပွဲစဥ် (၁၃) ဘင်တမ်ဝိတ်မွေထိုင်းမှာ စောမင်းမင်းနဲ့ ထိုင်းဖိုက်တာ ဒတ်ချာဝါလစ်တို့ယှဥ်ပြိုင်ထိုးသတ်ကြမှာဖြစ်ပါတယ်။
ပြိုင်ပွဲမှာ ထိုးသတ်မယ့် မြန်မာဖိုက်တာ (၄) ဦးထဲမှာ စောမင်းမင်းနဲ့ စိုးနောင်ဦးတို့က ONE Championship မှာ ထိုးသတ်ဖူးသူတွေဖြစ်ပြီး ရဲရင့်နောင်နဲ့ လင်းထက်အောင်တို့ကတော့ ပထမဆုံးထိုးသတ်ကြမှာ ဖြစ်ပါတယ်။

ဂါဇာတွင် အစ္စရေး၏ပစ်ခတ်မှုကြောင့် ပါလက်စတိုင်း ၂၄ ဦး သေဆုံး
----------------------
ဂါဇာမှာ ဖေဖော်ဝါရီလ ၄ရက်နေ့က အစ္စရေးတင့်ကားပစ်ခတ်မှုနဲ့ လေကြောင်းတိုက်ခိုက်မှုတွေကြောင့် ကလေးခုနစ်ဦးအပါအဝင် ပါလက်စတိုင်း ၂၄ ဦး သေဆုံးခဲ့ကြောင်း ကျန်းမာရေးအရာရှိတွေကို ကိုးကားပြီး Reuters သတင်းမှာဖော်ပြထားပါတယ်။ ဒါဟာ လေးလနီးပါးရှိပြီဖြစ်တဲ့ အပစ်အခတ်ရပ်စဲရေးကို ပျက်ပြားစေတဲ့ လုပ်ရပ်ဖြစ်ပါတယ်။
သေဆုံးသူတွေထဲမှာ တောင်ပိုင်းKhan Younis(ခန်ရောနစ်) မြို့ တိုက်ခိုက်မှုအတွင်း ဒဏ်ရာရရှိသူတွေကို ကူညီဖို့ အပြေးအလွှားသွားနေတဲ့ ဆေးဘက်ဆိုင်ရာဝန်ထမ်းတစ်ဦးလည်းပါဝင်တယ်လို့ကျန်းမာရေး အရာရှိတွေက ပြောပါတယ်။ မြောက်ပိုင်းရှိ ဂါဇာမြို့မှာလည်း တိုက်ခိုက်မှုတွေဖြစ်ပွားခဲ့ပြီး ၅ လသားအရွယ် ယောက်ျားလေးတစ်ဦး သေဆုံးခဲ့ကြောင်း သိရပါတယ်။