ကက်ရှ်မီးယား တိုက်ခိုက်မှုအပြီး ပါကစ္စတန်နဲ့ အိန္ဒိယတို့ သံတမန်ရေး ပိုမိုတင်းမာလာ
အစ္စလာမ္မာဘတ်၊ ဧပြီ-၂၅-၂၀၂၅
ရတီ(VOM)
အိန္ဒိယထိန်းချုပ်ထားတဲ့ ကက်ရှ်မီးယားဘက်ခြမ်းမှာ စစ်သွေးကြွတိုက်ခိုက်မှုကြောင့် ခရီးသွာ ၂၆ ယောက်သေဆုံးမှုအပြီး ပါကစ္စတန်နဲ့ အိန္ဒိယတို့အကြား အပြန်အလှန် ကန့်သတ်တုံ့ပြန်မှုတွေနဲ့အတူ သံတမန်ရေး တင်းမာမှုတွေ မြင့်တက်နေပါတယ်။
ပါကစ္စတန်ဟာ အိန္ဒိယနိုင်ငံသားတွေအတွက် ဗီဇာထုတ်ပေးတာ ရပ်ဆိုင်းလိုက်တဲ့အပြင် သံတမန်တွေကိုလည်း နှင်ထုတ်ပြီး အိန္ဒိယကိုသွားတဲ့ လေကြောင်းလိုင်းတွေကိုပါ ပိတ်ပင်လိုက်ပါတယ်။
တိုက်ခိုက်မှုနောက်ကွယ်က သံသယရှိသူလေးယောက်အနက် သုံးယောက်ရဲ့ အမည်စာရင်းတွေကို အိန္ဒိယက ထုတ်ပြန်ထားပြီး နှစ်ယောက်က ပါကစ္စတန်နိုင်ငံသားဖြစ်ကာ တတိယတယောက်ကတော့ ကက်ရှ်မီးယားဒေသခံဖြစ်တယ်လို့ ဆိုပါတယ်။
ဒီသုံးယောက်စလုံးဟာ ပါကစ္စတန်အခြေစိုက် စစ်သွေးကြွအဖွဲ့ Lashkar-e-Taiba (LeT) အဖွဲ့ဝင်တွေဖြစ်တယ်လို့ ကက်ရှ်မီးယားဒေသဆိုင်ရာ တာဝန်ရှိသူတွေက ပြောပါတယ်။ ပါကစ္စတန်ကတော့ ဒီတိုက်ခိုက်မှုမှာ ပါဝင်ပတ်သက်တာမရှိဘူးလို့ ငြင်းဆိုထားပါတယ်။
အိန္ဒိယဝန်ကြီးချုပ်မိုဒီကတော့ ဒီအကြမ်းဖက်သမားတွေနဲ့ သူတို့ကို ကျောထောက်နောက်ခံပြုသူတွေကို ကမ္ဘာအဆုံးတိုင် မြေလှန်ရှာပြီး အပြစ်ပေးမယ်လို့ အစောပိုင်းမှာ ထုတ်ဖော်ပြောဆိုထားပါတယ်။
ဒီကိစ္စကြောင့် ပါကစ္စတန်သံတမန်ကို နှင်ထုတ်ပြီး အဓိကနယ်စပ်ဂိတ်ကိုလည်း ပိတ်ပစ်လိုက်ကာ နှစ်နိုင်ငံအကြား ရေမျှဝေရေး အထင်ကရ သဘောတူစာချုပ်ကိုလည်း ရပ်ဆိုင်းလိုက်ပါတယ်။ ပါကစ္စတန်နိုင်ငံသားတွေအတွက် ဗီဇာပေးတာကိုလည်း ဖျက်သိမ်းလိုက်ပါတယ်။
ပါကစ္စတန်ဟာ အစ္စလာမ္မာဘတ်မှာရှိတဲ့ အိန္ဒိယအဆင့်မြင့်ကော်မရှင် သံတမန်အရေအတွက်ကို ၃၀ ထိလျှော့ချလိုက်ပြီး ကာကွယ်ရေး၊ ရေကြောင်းနဲ့ လေကြောင်းအကြံပေးတွေကို ဧပြီ ၃၀ မတိုင်ခင် ထွက်ခွာဖို့ ညွှန်ကြားထားကာ နှစ်နိုင်ငံအကြား သံတမန်ရေးတင်းမာမှုတွေ ဆက်လက်ဖြစ်ပေါ်နေပါတယ်။
