KIA အဖွဲ့နှင့် KPDF ပူးပေါင်းအဖွဲ့များ ပစ်ခတ်သည့် လက်နက်ကြီးကျည် ဖားကန့်မြို့ရှိ အထက ကျောင်းအတွင်း ကျရောက်ပေါက်ကွဲသဖြင့် ​ကျောင်းသား​ကျောင်းသူ ကလေးငယ်နှစ်ဦး ဗုံးစထိမှန်ဒဏ်ရာရ

KIA အဖွဲ့နှင့် KPDF ပူးပေါင်းအဖွဲ့များ ပစ်ခတ်သည့် လက်နက်ကြီးကျည် ဖားကန့်မြို့ အခြေခံပညာ အထက်တန်းကျောင်းအတွင်း ကျရောက်ပေါက်ကွဲသဖြင့် အသက် ၁၀ နှစ်အရွယ် ​​ကျောင်းသား ကျောင်းသူ ကလေးငယ်နှစ်ဦး ဗုံးစထိမှန်ဒဏ်ရာရရှိခဲ့ကြောင်း သိရသည်။
ဖေဖော်ဝါရီ ၂ ရက် နံနက်ပိုင်းက KIA အဖွဲ့နှင့် KPDF အဖွဲ့များသည် ဖားကန့်မြို့အတွင်းသို့ မြို့၏အနောက် တောင်ဘက် မီတာ ၃၀၀၀ ခန့်အကွာမှ လက်နက်ကြီးများဖြင့် ပစ်ခတ်တိုက်ခိုက်ခဲ့ခြင်းဖြစ်​ကြောင်း သိရသည်။
ထိုသို့ပစ်ခတ်မှု​ကြောင့် လက်နက်ကြီးကျည်များသည် အခြေခံပညာအထက်တန်းကျောင်း(ဖားကန့်)အဆောက် အအုံနှင့် အနီးဝန်းကျင်သို့ ကျရောက်ပေါက်ကွဲခဲ့ပြီး စာသင်ဆောင်အဆောက်အအုံများ ပျက်စီးဆုံးရှုံးခဲ့ပြီး Grade-4 တွင် တက်ရောက်ပညာသင်ယူလျက်ရှိသည့် ဖားကန့်မြို့၊ ငှက်ပျောတောရပ်ကွက်နေ မောင်လင်းခန့်ကိုနှင့် ဂျန်ဂတ်ကျေးရွာနေ မရွန်ဒင့်တို့တွင် ဗုံးစထိမှန်ဒဏ်ရာများ ရရှိခဲ့ကြောင်း သိရှိရပြီး အဆိုပါ ထိခိုက်ဒဏ်ရာရရှိခဲ့သည့် ကလေးငယ်နှစ်ဦးအား လိုအပ်သည့် ဆေးဝါးကုသမှုများ ဆောင်ရွက်ပေးလျက် ရှိကြောင်း သိရသည်။

ထိုင်းတွင် မြန်မာလုပ်သား ၁ ဦးကို အကြောင်းမဲ့ အလုပ်ထုတ်သည့် အလုပ်ရှင်အား တရားစွဲဆိုမည်

ထိုင်းနိုင်ငံ အယုဒ္ဓယမြို့ရှိကားအပိုပစ္စည်းစက်ရုံတစ်ရုံမှ အလုပ်ရှင်တစ်ဦးသည် မြန်မာ အလုပ်သမား၁၈ ဦးကို အကြောင်းမဲ့ အလုပ်ထုတ်ခဲ့သည့်အတွက် ၎င်းအလုပ်ရှင်အားတရား စွဲဆိုရန် ဆောင်ရွက်နေကြောင်း ကူညီပေးနေသည့် MHACအဖွဲ့မှ သိရသည်။
မြန်မာအလုပ်သမားများသည် ၂၀၂၅ ခုနှစ် မေ ၂၀ ရက်တွင် အလုပ်ထုတ်ခံခဲ့ရခြင်းဖြစ်ပြီး အလုပ်သမားများနှင့်အတူ MHAC အဖွဲ့က ၂၀၂၅ ခုနှစ်မေ၂၆ ရက်တွင် နယ်မြေခံအလုပ်သမား ကာကွယ်စောင့်ရှောက်ရေးရုံး (ဆဝါဒီကန်)၌ ကူညီမှုစတင်ခဲ့ကြောင်း သိရသည်။
ထိုရုံး၏တာဝန်ရှိသူကအလုပ်သမားများ၏နစ်နာကြေးဆိုင်ရာများအားဆောင်ရွက်ပေးလျက်ရှိပြီး လုပ်ငန်းရှင်အား တရားရုံး၌ တရားစွဲဆိုခြင်းအတွက်ဆက်လက်ဆောင်ရွက်နေကြောင်း MHAC အဖွဲ့က ထုတ်ပြန်ထားသည်။
တရားစွဲဆိုရန်အတွက် ထိုင်းဥပဒေအရ တစ်ဆင့်ချင်းစီသွားရမည် ဖြစ်ကြောင်း၊ သက်ဆိုင်ရာ ဆဝါဒီကန်ရုံးမှ ခရိုင်မြို့တော်ဝန်ကို တင်ရမည်ဖြစ်ပြီးမြို့တော်ဝန်၏ စာကျလာမှသာ တရား ရုံးသွားရမည်ဖြစ်သည့်အတွက် လက်ရှိတွင် မြို့တော်ဝန်ထံစာတင်ထားကြောင်း သိရသည်။

နေပြည်တော်ရှိ ရွှေမြို့ဆိုလာစီမံကိန်းမှ ဓာတ်အားစတင်ထုတ်လွှတ်ရန် စီစဉ်နေ

နေပြည်တော် ကောင်စီနယ်မြေ ဇေယျာသီရိမြို့နယ်ရှိ နေရောင်ခြည်စွမ်းအင်သုံး လျှပ်စစ် ဓာတ်အားပေး ရွှေမြို့ဆိုလာစီမံကိန်းမှ ဇွန်လအတွင်း ဓာတ်အားစတင်ထုတ်လွှတ်နိုင်ရန် ဆောင်ရွက်နေကြောင်း သိရသည်။
အဆိုပါစီမံကိန်းအား ၂၀၂၅ ခုနှစ် ဧပြီလတွင် စတင်ဆောင်ရွက်ခဲ့ခြင်းဖြစ်ပြီး ယခုနှစ် ဇွန်လတွင် ဓာတ်အားစတင်ထုတ်လွှတ်နိုင်တော့မည်ဖြစ်ကာဆိုလာတပ်ဆင်မှုအား ဖေဖော်ဝါရီလအတွင်း အပြီးသတ်တပ်ဆင်သွားမည်ဖြစ်ကြောင်း သိရသည်။
နိုင်ငံတော်၏ လျှပ်စစ်ဓာတ်အားလိုင်းထဲသို့ တိုက်ရိုက်ပို့သွင်းကာဆက်လက်ပြီး လျှပ်စစ်စွမ် းအားဝန်ကြီးဌာန၏ ရွှေမြို့ခွဲရုံထဲသို့ ပို့သွင်းဆောင်ရွက်ပေးသွားမည်ဖြစ်ရာ စီမံကိန်းမှ ဓာတ်အား မဂ္ဂါဝပ် ၂၀၀ နီးပါးထုတ်လွှတ်ပေးနိုင်မည်ဖြစ်ကြောင်း သိရသည်။

စစ်ရေးအရ အမေရိကန်တိုက်ခိုက်ခဲ့ ပါက ဒေသတွင်းစစ်ပွဲတစ်ပွဲ ပေါ်ထွက်လာနိုင်ကြောင်း အီရန်ခေါင်းဆောင် သတိပေး
အမေရိကန်ပြည်ထောင်စုအနေဖြင့် အီရန်ကို စစ်ရေးအရ တိုက်ခိုက်ခဲ့ပါက ဒေသတွင်း စစ်ပွဲ တစ်ခု ပေါ်ထွက်လာလိမ့်မည်ဖြစ်ကြောင်း အီရန်ခေါင်းဆောင် အယာတိုလာအလီခါမေနီက ဖေဖော်ဝါရီ ၁ ရက်တွင် သတိပေးလိုက်သည်။
နျူကလီးယား သဘောတူညီချက်တစ်ရပ်ရယူခြင်းမရှိပါက အီရန်နိုင်ငံကို အရေးယူမည်ဖြစ် ကြောင်း အမေရိကန်သမ္မတဒေါ်နယ်ထရန့် ကအကြိမ်ကြိမ်သတိပေးထားပြီး အရှေ့အလယ်ပိုင်း ဒေသရှိ အမေရိကန်ရေတပ်အင်အားကိုလည်း မြှင့်တင်ထားသည်။
သို့ရာတွင် အီရန်နိုင်ငံအနေဖြင့် အမေရိကန်ပြည်ထောင်စု၏ စစ်အင်အားကို ကြောက်လန့်နေ လိမ့်မည်မဟုတ်ကြောင်း အီရန်ခေါင်းဆောင်အယာတိုလာခါမေနီက နိုင်ငံပိုင်မီဒီယာများသို့ ထုတ်ဖော်ပြောကြားထားသည်။
အလားတူ အီရန်ကို စစ်ရေးအရ အမေရိကန်ပြည်ထောင်စုက တိုက်ခိုက်ခဲ့ပါက ဒေသတွင်းစစ်ပွဲ တစ်ခု ပေါ်ထွက်လာနိုင်ကြောင်းလည်း အီရန်ခေါင်းဆောင်က သတိပေးထားသည်။
အီရန်ခေါင်းဆောင်များနှင့် အမေရိကန်တာဝန်ရှိသူများအကြား နှုတ်ရေးအားဖြင့် တင်းမာနေ သော်ငြား တွေ့ဆုံဆွေးနွေးပွဲများ ပြန်လည်ကျင်းပရေးအတွက် အသင့်ရှိကြောင်း နှစ်နိုင်ငံစလုံး က သဘောထားပြသထားသည်။
အီရန်နိုင်ငံ၏ ကာကွယ်ရေးစွမ်းပကားကိုချုပ်ကိုင်ကန့်သတ်ရေးအတွက် ရည်ရွယ်ချက်မရှိသည့် ဆွေးနွေးပွဲများ၌ ပါဝင်ရန် အသင့်ရှိကြောင်းအီရန်တာဝန်ရှိသူများက ထုတ်ဖော်ပြောကြားထား သည်။
အမေရိကန်သမ္မတ ဒေါ်နယ်ထရန့်သည်ယခုနှစ် ဇန်နဝါရီလအတွင်း ဖြစ်ပွားခဲ့သည့် အစိုးရ ဆန့်ကျင်ရေးဆန္ဒပြပွဲများကို အီရန်အစိုးရကအကြမ်းဖက်နှိမ်နင်းခဲ့ပြီးနောက် အရှေ့အလယ်ပိုင်း ဒေသ၌ စစ်အင်အားမြှင့်တင်ထားခဲ့သည်။
လက်ရှိအချိန်တွင် အရှေ့ အလယ်ပိုင်းဒေသ၌ အမေရိကန်ရေတပ်မှ လေယာဉ်တင်သင်္ဘော တစ်စင်း၊ ဖျက်သင်္ဘောခြောက်စင်း နှင့် အမြန်တိုက်ရေယာဉ် သုံးစင်း ရောက်ရှိနေကြောင်း သိရသည်။

ထိုင်းနိုင်ငံ ရနောင်းထိန်းသိမ်းရေးစခန်းမှ မြန်မာနိုင်ငံသား ၅၈ ဦးကို ကော့ သောင်းသို့ ပြန်ပို့

ထိုင်းနိုင်ငံ ရနောင်းထိန်းသိမ်းရေးစခန်းမှ မြန်မာနိုင်ငံသား ၅၈ ဦးကိုကော့သောင်းဘက်သို့ ဖေဖော်ဝါရီ ၂ရက်က နေရပ်ပြန်ပို့လိုက်ကြောင်းသိရသည်။
ယခု ဇန်နဝါရီလ၌ နှစ်ကြိမ်နေရပ်ပြန်ပို့ခဲ့ရာတွင် မြန်မာနိုင်ငံသား၁၆၈ ဦးကို ပြန်လည်လွှဲပြောင်း ထားပြီးဖြစ်ကာ ဖေဖော်ဝါရီ ၂ ရက်ကထိုင်းနိုင်ငံအတွင်း အကြောင်းအမျိုးမျိုးဖြင့် ပြစ်ဒဏ်ကျခံ ပြီးနောက်ရနောင်း ထိန်းသိမ်းရေးစခန်းတွင်ထိန်းသိမ်းထားသော မြန်မာနိုင်ငံသားအမျိုးသား ၄၃ ဦး၊အမျိုးသမီး၁၅ဦးစုစုပေါင်၅၈ဦးကိုကော့သောင်းမြို့သို့ထပ်မံလွှဲပြောင်းပေးခဲ့ခြင်းဖြစ်ကြောင်း သိရသည်။
ယင်းကြောင့် ယခုနေရပ်ပြန်ပို့မှုမှာ ၂၀၂၆ ခုနှစ်အတွင်း သုံးကြိမ်မြောက်ဖြစ်ပြီး မြန်မာနိုင်ငံသား ၂၂၈ဦးကို ပြန်လည်လွှဲပြောင်းခဲ့ပြီးဖြစ်ကာပြီးခဲ့သော ၂၀၂၅ ခုနှစ် ဒီဇင်ဘာလတွင် မြန်မာနိုင်ငံသား ၁၇၅ ဦး နေရပ်ပြန်ပို့ခဲ့ကြောင်း သိရသည်။
၂၀၂၅ ခုနှစ်အတွင်းရနောင်းမှ ကော့သောင်းသို့နေရပ်ပြန်ပို့ခံရမှု ၁၆ ကြိမ် ရှိခဲ့ပြီးနေရပ်ပြန်ပို့ ခံရသူ ၂၀၇၂ ဦး ရှိခဲ့ကြောင်း သိရသည်။

မြန်မာ-ရုရှားနှစ်နိုင်ငံ ကာကွယ်ရေးဝန်ကြီးဌာနများကြား စစ်ဘက်ဆိုင်ရာပူးပေါင်းဆောင်ရွက်ရေးအစီအစဥ်ကို လက်မှတ်ရေးထိုး

မြန်မာ-ရုရှားနှစ်နိုင်ငံ ကာကွယ်ရေးဝန်ကြီးဌာနများကြား စစ်ဘက်ဆိုင်ရာပူးပေါင်းဆောင်ရွက်ရေးအစီအစဥ်ကို ယနေ့ ဖေဖော်ဝါရီ ၂ ရက်က လက်မှတ်ရေးထိုးခဲ့ကြသည်။
အဆိုပါ လက်မှတ်အား နှစ်နိုင်ငံ ဒု-ကာကွယ်ရေးဝန် ကြီးများဖြစ်သည့် ဗိုလ်ချုပ်အောင်မျိုးသန့်နှင့် ရုရှားနိုင်ငံ၊ ဒု-ကာကွယ်ရေးဝန်ကြီး Mr. Vasilii Sergeevich Osmakov တို့ကရေးထိုးလဲလှယ်ခဲ့ကြသည်။
ထို့ပြင် ရုရှားနိုင်ငံ၊ ဒု-ကာကွယ်ရေးဝန်ကြီး Mr. Vasilii Sergeevich Osmakov သည် ပြည်ထောင်စုဝန်ကြီး ဗိုလ်ချုပ်ကြီးမောင်မောင်အေးနှင့်လည်းတွေ့ဆုံခဲ့ပြီးနောက် နှစ်နိုင်ငံကာကွယ်ရေးဝန်ကြီးဌာနများကြား ကာကွယ်ရေးဆိုင်ရာပူးပေါင်းဆောင်ရွက်မှုများကို ဆက်လက်တိုးမြှင့်ဆောင်ရွက်သွားနိုင်မည့်အခြေအနေများ၊ တပ်မတော်နှစ်ရပ်ကြား စစ်ဘက်နည်းပညာ၊ သင်တန်းနှင့် လေ့ကျင့်ရေးဆိုင်ရာပူးပေါင်းဆောင်ရွက်မှုများကို ဆွေးနွေးခဲ့ကြသည်။

ဖားကန့်မှာ တိုက်ပွဲပြင်းထန်နေပြီး အ.ထ.က ကျောင်းပေါ် လက်နက်ကြီးကျလို့ ကျောင်းသားနှစ်ယောက်ဒဏ်ရာရပြီး​နောက် ဖားကန့်ဆိမ့်မူလမ်းပိတ်ထား

ဖားကန့်မြို့နယ်မှာ တကျော့ပြန် တိုက်ပွဲ ပြင်းထန်ဖြစ်ပွားနေပြီး ဒီကနေ့ ဖေဖော်ဝါရီ ၂ ရက်နေ့မနက်ပိုင်းက ဖားကန့်မြို့ပေါ်ရှိ အ.ထ.က ကျောင်းပေါ်ကို လက်နက်ကြီး ကျရောက်ခဲ့လို့ ကျောင်းသားနှစ်ယောက် ထိခိုက်ဒဏ်ရာ ရရှိခဲ့ပါတယ်။
" ကံကောင်းတယ်ပြောရမယ် ။လက်နက်ကြီးကျတဲ့ KG အဆောင်က ပိတ်ထားလို့ ကလေးတွေ သက်သာတာ ။ အခုထိတဲ့ ကလေးနှစ်ယောက်က အဆောင်ဘေးဖြတ်သွားချိန် ထိသွားတာလို့ သိရတယ်။ ယောကျ်ားလေး တယောက် ၊မိန်းကလေး တယောက်ပါ ။ ကလေးတွေ ခေါင်းထိတယ် ။ခြေထောက် ထိတယ်။ ဆေးကုသမှုပေးနေတယ်။ " လို့ ဒေသခံက ပြောပါတယ်။
အဆိုပါ လက်နက်ကြီး ကျရောက်ခဲ့တဲ့ ကျောင်းအနီးမှာ အစိုးရတပ်စခန်းဖြစ်တဲ့ တပ်မကုန်းနဲ့ ရဲစခန်းရှိကြောင်း သိရပါတယ်။
" ကျောင်းထဲကျတဲ့ လက်နက်ကြီးက တောဘက်အဖွဲ့တွေပစ်တာ ။ ပစ်တာသိပေမယ့် ဘယ်သူမှ မပြောရဲဘူး ။ အနားက တပ်မကုန်းကို ပစ်တာကို ကျောင်းထဲလာကျတာ ပေါ့ ။ " လို့ ဖားကန့် ဒေသခံက ပြောပါတယ်။
ဒီကနေ့ မနက် ၅ နာရီလောက်က ဖားကန့်မြို့၊ မရှီကထောင်ရပ်ကွက်မှာလည်း လက်နက်ကြီး ထိမှန်လို့ ဒေသခံတယောက် ထိခိုက်ဒဏ်ရာ ရရှိခဲ့တယ်လို့ သိရပါတယ်။
လက်ရှိမှာ တိုက်ပွဲအခြေအနေကြောင့် ဖားကန့်-ဆိပ်မူသွားတဲ့ မိန်းလမ်းမကို ပိတ်ထားသလို ဆိပ်မူကနေ ဖားကန့်ကို သွားလို့ရတဲ့ ကွင်းလမ်းကိုလည်း အရေးပေါ်ကိစ္စသာသွားလာခွင့်ပြုပြီး လမ်းပိတ်ထားတယ်လို့ သိရပါတယ်။
ဖားကန့်မှာ ဇန်နဝါရီ ၃၁ ရက်နေ့ကတည်းက တကျော့ပြန်တိုက်ပွဲ ပြန်လည် ဖြစ်ပွားနေတာဖြစ်ပြီး နေ့စဥ် လက်နက်ကြီး လက်နက်ငယ် ပစ်ခတ်မှုတွေ ရှိပြီး လက်နက်ကြီး ကျရောက်ပေါက်ကွဲ မှုတွေလည်း ရှိကြောင်း သိရပါတယ်။
လက်ရှိမှာ တိုက်ပွဲက မရှီကထောင် ၊ ထုံးဘိုရွာ ၊ ယူမာ ၊ရှရော်ခ ၊ညောင်ပင်ကုန်း စတဲ့ ကျေးရွာတချို့ ဘက်တွေမှာ တိုက်ပွဲ ဖြစ်နေတာ ဖြစ်ကြောင်း ၊ တိုက်ပွဲ ဖြစ်ပွားရာ ဒေသက ဒေသခံတွေကတော့ နေရပ်စွန့်ခွာ စစ်ရှောင်နေကြရတယ်လို့ သိရပါတယ်။

အက်ပ်စတိန်း ၏ ကျွန်းသို့ သွားရောက်ခဲ့သည်ဆိုသည့် စွပ်စွဲချက်များကို ထရမ့်ငြင်းဆို

ကာမရာဇဝတ်မှုများဖြင့် စွပ်စွဲခံခဲ့ရသူ ဂျက်ဖရီအက်ပ်စတိန်း ၏ ပုဂ္ဂလိကပိုင်ကျွန်းသို့ တစ်ကြိမ်တစ်ခါမျှ မသွားရောက်ခဲ့ဖူးကြောင်း အမေရိကန်သမ္မတ ဒေါ်နယ်ထရမ့်က ထပ်လောင်းပြောကြားလိုက်သည်။
ထရမ့် နှင့် သမ္မတဟောင်း ဘီလ်ကလင်တန် တို့သည် အဆိုပါကျွန်းသို့ သွားရောက်ခဲ့ကြသည်ဟု တောင်အာဖရိကလူရွှင်တော်နှင့် Grammy ဆုပေးပွဲ တင်ဆက်သူ Trevor Noah က ပွဲတစ်ခုတွင် နောက်ပြောင်ပြောဆိုခဲ့မှုအပေါ် ထရမ့် တုံ့ပြန်ခဲ့ခြင်းဖြစ်သည်။
"ကလင်တန် အတွက်တော့ ကျွန်တော် ပြောမပေးနိုင်ဘူး။ ဒါပေမဲ့ ကျွန်တော်ကတော့ အက်ပ်စတိန်း ကျွန်းကို ဘယ်တုန်းကမှ မသွားခဲ့သလို အနားတောင် မသီဖူးပါဘူး။ ဒီညက မှားယွင်းပြီး အသရေဖျ-က်တဲ့ ပြောဆိုမှုတွေ မထွက်လာခင်အထိ Fake News မီဒီယာတွေကတောင် ကျွန်တော့်ကို အဲဒီကို သွားခဲ့တယ်လို့ မစွပ်စွဲဖူးပါဘူး" ဟု ထရမ့် က Truth Social တွင် ရေးသားခဲ့သည်။
အဆိုပါစွပ်စွဲချက်များအတွက် တရားရင်ဆိုင်သွားမည်ဟုလည်း ထရမ့်ကပြောဆိုခဲ့ပြီး " အဆင့်အတန်းမရှိတဲ့၊ အရည်အချင်းမရှိတဲ့ အရှုံးသမား အစီအစဉ်တင်ဆက်သူကို တရားစွဲဖို့ ကျွန်တော့်ရဲ့ ရှေ့နေတွေကို လွှတ်ရတော့မယ် ထင်တယ်။ Noah ရေ... မင်း‌တော့ပျော်ရတော့မယ်၊ ပြင်ထားပေတော့ " ဟု လည်း ပြောကြားခဲ့သည်။

ဖေဖော်ဝါရီလ ရက်ရှည်ရုံးပိတ်ရက်အတွက် ကမ်းခြေများရှိ ဟိုတယ်နှင့်တည်းခိုခန်းများတွင် ကြိုတင်မှာယူမှု များပြား
လာမည့် ဖေဖော်ဝါရီလတွင် ပြည်ထောင်စုနေ့နှင့် တရုတ်နှစ်သစ်ကူး ပိတ်ရက်ရှည်များရှိသည့်အတွက် ဧရာဝတီတိုင်းဒေသကြီးရှိ ကမ်းခြေများ၌ ဟိုတယ်နှင့် တည်းခိုခန်းအားလုံး ၉၀ ရာခိုင်နှုန်းနီးပါး ကြိုတင်မှာယူမှုများဖြင့် ပြည့်နေပြီဖြစ်ကြောင်း ဧရာဝတီတိုင်းဒေသကြီး ဟိုတယ်နှင့်ခရီးသွားညွှန်ကြားမှုဦးစီးဌာနမှ သိရသည်။
ရုံးပိတ်ရက်ရှည်ဖြစ်သည့် လာမည့် ဖေဖော်ဝါရီလ ၁၂ ရက် (ပြည်ထောင်စုနေ့) မှ ၁၇ ရက် (တရုတ်နှစ်သစ်ကူး ပိတ်ရက်) အထိ ၆ ရက်တာအတွင်း ဧရာဝတီတိုင်းဒေသကြီးရှိ ငွေဆောင်၊ ချောင်းသာ၊ ရွှေသောင်ယံနှင့် ဂေါ်ရန်ဂျီ ကမ်းခြေတို့၏ အပန်းဖြေခရီးစဉ်တို့အတွက် ဟိုတယ်နှင့်တည်းခိုခန်းများအား ကြိုတင်မှာယူမှုများ ရှိနေခဲ့ခြင်းဖြစ်ကြောင်း သိရသည်။
ဧရာဝတီတိုင်းဒေသကြီးအတွင်း ပင်လယ်ကမ်းခြေ အပန်းဖြေစခန်းများတွင် ပြည်တွင်း/ပြည်ပခရီးသွားများ တည်းခိုအနားယူနိုင်ရန် ငွေဆောင်ကမ်းခြေ၌ ဟိုတယ် ၃၈ လုံး၊ တည်းခိုခန်း ၇၀ ခု၊ ချောင်းသာကမ်းခြေ၌ ဟိုတယ်နှင့်တည်းခိုရိပ်သာ ၃၂ လုံး၊ တည်းခိုခန်း ၅၅ လုံး၊ ရွှေသောင်ယံကမ်းခြေ၌ ဟိုတယ် ၆ လုံး၊ တည်းခိုခန်း ၃ လုံးနှင့် ပုသိမ်မြို့နှင့် အခြားဒေသများ၌ ဟိုတယ်နှင့်တည်းခိုရိပ်သာ ၄၉ လုံး၊ တည်းခိုခန်း ၃၁၅ လုံး ဖွင့်လှစ်ထားကြောင်း သိရသည်။

ပြည်မြို့နယ်၌ ငလျင်ဒ-ဏ်သင့် သုံးပန်လှအုတ်ကျောင်းတော်ကြီးကို အသစ်ပြန်လည်ပြုပြင်နေ

ပဲခူးတိုင်း၊ ပြည်မြို့နယ်၌ မန္တလေးငလျင်ကြီးဒ-ဏ်ကြောင့် သုံးပန်လှအုတ်ကျောင်းတော်ကြီးမှာ ပြိုကျပျ-က်စီးမှုများဖြစ်ပေါ်ခဲ့၍ အသစ်ပြန်လည်ပြုပြင်လျက်ရှိရာ ပဲခူးတိုင်းဝန်ကြီးချုပ်ဦးမျိုးဆွေဝင်းမှ ဖေဖော်ဝါရီ ၁ ရက်ကကြည့်ရှုစစ်ဆေးခဲ့ကြောင်း သိရသည်။
ထို့ပြင် တိုင်းဝန်ကြီးချုပ်သည် ပြည်မြို့၊ ဆံတော်ရပ်ကွက်ရှိ မြောက်စောင်းတန်းလမ်းနှင့် ပြည်မြို့တွင်း ရန်ကုန်-ပြည်ကားလမ်းပိုင်းလမ်းချဲ့ခြင်း၊ လမ်းအဆင့်မြင့်တင်ခြင်းနှင့် ပလပ်ဖောင်များပြန်လည်ဆောင်ရွက်နိုင်ရေးကြည့်ရှုစစ်ဆေးခဲ့ကြောင်း သိရသည်။
ထို့နောက် လမ်းများအလိုက် လမ်းဧရိယာများကိုအများပြည်သူသိရှိနိုင်ရေးသတ်မှတ်ထားရန်၊ လျှပ်စစ်မီးတိုင်နှင့် ဖုန်းတိုင်များကြိုတင်ပြောင်းရွေ့ထားရန်နှင့် လမ်းဧရိယာအတွင်း ကျူးကျော်မှုမရှိစေရေးကြီးကြပ်ဆောင်ရွက်ရန်တို့ကိုမှာကြားခဲ့ကြောင်း သိရသည်။