ချဲလ်ဆီးနည်းပြဘဝ စိတ်ပျက်စရာအကောင်းဆုံးရလဒ်ကြုံခဲ့ရကြောင်း ရိုဆင်နီယာ ဖွင့်ဟလာ
=====================
အဲဗာတန်ကို ၃-၀ ဂိုးဖြင့် ရှုံးနိမ့်ပြီးနောက် ချဲလ်ဆီးနည်းပြလီယမ်ရိုဆင်နီယာက ချဲလ်ဆီးနည်းပြဘဝ စိတ်ပျက်စရာအကောင်းဆုံးရလဒ်ကြုံခဲ့ရခြင်းဖြစ်ကြောင်း ဖွင့်ဟ ပြောကြားလာပါတယ်။

ချဲလ်ဆီးဟာ ပီအက်စ်ဂျီကို အရှက်တကွဲ ရှုံးနိမ့်ကာ ချန်ပီယံလိဂ် ၁၆ သင်း ရှုံးထွက်အဆင့်မှ ထွက်ခွာခဲ့ရပြီးနောက် ရက်အနည်းငယ်အကြာတွင် ပရီးမီးယားလိဂ်တွင် အဲဗာတန်အား ထပ်မံ ရှုံးနိမ့်ခဲ့တာလည်း ဖြစ်ပါတယ်။

ရိုဆင်နီယာရဲ့ ချဲလ်ဆီးဟာ အဲဗာတန်ကို ရှုံးနိမ့်ပြီးနောက် ပြိုင်ပွဲအရပ်ရပ် ၄ ပွဲဆက် နိုင်ပွဲ ပျောက်ဆုံးထားပါတယ်။

ချဲလ်ဆီးဟာ ပရီးမီးယားလိဂ်အမှတ်ပေးဇယားအဆင့် ၆ နေရာတွင် ရပ်တည်နေဆဲ ဖြစ်ပေမယ့်လည်း အဲဗာတန်နှင့် ၂ မှတ်တည်းသာ ကွာဟပါတော့တယ်။

ဒါ့အပြင် ချဲလ်ဆီးဟာ အဲဗာတန်နှင့်ပွဲတွင် ဂိုးမသွင်းနိုင်ခဲ့ပြီးနောက် ၃ ပွဲဆက် ဂိုးပေါက်ပျောက်ခဲ့ရပါတယ်။

ရိုဆင်နီယာက "အရမ်းစိတ်ပျက်ရတယ်။ ဂိုးတွေ လက်ဆောင်မပေးရတာ၊ ပွဲထိန်းချုပ်တာတွေ မဖြစ်ခဲ့ဘူး။ တတိယဇုန်ကို ကျွန်တော်တို့ အများကြီး ရောက်ခဲ့တယ်။ ဒါပေမယ့် အဆုံးမသတ်နိုင်ခဲ့ကြဘူး။ တဖက်မှာ သူတို့ ဂိုးသွင်းတယ်။ ဒီလို ဖြစ်တာ ပထမဆုံးအကြိမ် မဟုတ်ဘူး။ ဒုတိယပိုင်းမှာ ခြေစွမ်းထွက်လာတယ်။ ပွဲကို ထိန်းချုပ်နိုင်တယ်။ အမှားတစ်ခုလုပ်တယ်။ ၂-၀ ဖြစ်သွားတယ်။ ကြိုးစားအားထုတ်မှုနည်းတာ၊ အသင်းအပေါ် မယုံကြည်တာကို ပြောလိုတာ မဟုတ်ပါဘူး။ ရှုံးပွဲတွေ ဆက်တိုက်ကြုံလာတဲ့အခါ အဲဒီအရာတွေက ပြောစရာတွေ ဖြစ်လာတယ်။ ဒါပေမယ့် အခုအချိန်မှာ ဒီပြဿနာ ရှိတယ်လို့တော့ မထင်ပါဘူး။ ဒီရာသီကို တွေးကြည့်လိုက်တဲ့အခါ ကျွန်တော်မတိုင်မီ မှတ်တမ်းကို ကြည့်ရင်လည်း မကောင်းတာ တွေ့ရပါတယ်။ အပြစ်ကို ရှောင်လွဲတာ မဟုတ်ပါဘူး။ ပြီးခဲ့တဲ့အပတ်ကလည်း မကောင်းခဲ့ပါဘူး။ ဒါကြောင့်လည်း နိုင်ငံတကာပွဲနားရက် ရောက်လာတာ ကျွန်တော်တို့အတွက် အချိန်ကောင်းပါ။ ကစားသမားအချို့ ပြန်လည်စတင်နိုင်မယ်။ ကွဲပြားတဲ့ ဝန်းကျင်မှာ နေခွင့်ရလာပါမယ်။ ပြီးရင် ပြန်လာကြမယ်"လို့ ပြောကြားသွားပါတယ်။

ရိုဆင်နီယာဟာ အန်ဇိုမာရက်စ်ကာနေရာတွင် အစားထိုးခန့်အပ်ခြင်းခံရပြီးနောက် ချဲလ်ဆီးအား ၁၉ ပွဲ ကိုင်တွယ်ရာတွင် ၁၀ ပွဲတည်းသာ နိုင်ပွဲ ရထားပါတယ်။ ယင်းမှ နိုင်ပွဲ ၄ ပွဲက အက်ဖ်အေဖလားပြိုင်ပွဲတွင် ဝရက်စ်ဟမ်း၊ ဟားလ်၊ ချာလ်တန်နှင့် ချန်ပီယံလိဂ်တွင် Pafos တို့အား အနိုင်ယူခဲ့တာပါ။

ချဲလ်ဆီးဟာ နိုင်ငံတကာပွဲစဉ်များအပြီးတွင် ပေါ့ဗေးလ်နှင့် အက်ဖ်အေဖလားကွာတားဖိုင်နယ်ကစားရမှာ ဖြစ်ပြီး မန်စီးတီး၊ ယူနိုက်တက်တို့နှင့် ပရီးမီးယားလိဂ်တွင် ထိပ်တိုက်တွေ့ပါမယ်။

မက်ဒရစ်ဒါဘီပွဲတွင် ရီးရဲလ်မက်ဒရစ်ကွင်းလယ်လူဘယ်လင်ဂမ် ပြန်ပါဝင်လာမည်
=====================
အယ်ဗာရိုအာဘီလိုအာက ယနေ့ည အက်သလက်တီကိုနှင့် မက်ဒရစ်ဒါဘီပွဲစဉ်တွင် ဒဏ်ရာကြောင့် ခြောက်ပတ်ကြာ အနားယူလာခဲ့ရတဲ့ ကွင်းလယ်ကစားသမားဂျူ့ဘယ်လင်ဂမ် ပြန်လည် ကစားလာနိုင်မည်ဖြစ်ကြောင်း အတည်ပြုလာပါတယ်။

ယခုလနှောင်းပိုင်း နိုင်ငံတကာခြေစမ်းပွဲစဉ်များအတွက် အင်္ဂလန်အသင်းတွင် ရွေးချယ်ခံထားရတဲ့ ဘယ်လင်ဂမ်ဟာ ဖေဖော်ဝါရီလ ၁ ရက်နေ့ နောက်ပိုင်း ပထမဆုံးပွဲအဖြစ် မက်ဒရစ်ဒါဘီပွဲတွင် ပြန်လည် ကစားလာပါမယ်။

ဘယ်လင်ဂမ်ဟာ ပြီးခဲ့တဲ့ကြားရက်တုန်းက မန်ချက်စတာတွင် မန်စီးတီးနှင့် ရင်ဆိုင်ကစားရမယ့် ချန်ပီယံလိဂ်ပွဲသို့ ရီးရဲလ်မက်ဒရစ်နှင့်အတူ လိုက်ပါခဲ့ပေမယ့်လည်း ပါဝင်ကစားခဲ့ခြင်း မရှိပါဘူး။

ဒါပေမယ့် ဒေါ့မွန်ကွင်းလယ်ကစားသမားဟောင်းဟာ ယနေ့ည မက်ဒရစ်ဒါဘီပွဲစဉ်မှာတော့ ရီးရဲလ်မက်ဒရစ်အတွက် ပြန်လည် ကစားလာနိုင်တော့မှာ ဖြစ်ပါတယ်။

အာဘီလိုအာက "သူ ကစားနိုင်ပါပြီ။ လူစာရင်း ပြန်ပါလာပါမယ်။ ကစားနိုင်မလားဆိုတာ ကြည့်ရမယ်။ ကစားနိုင်မယ် ထင်တယ်။ ကွင်းထဲမှာ သူ့ကို မြင်ချင်နေပြီ။ သူက ဉာဏ်ကောင်းတဲ့ ကစားသမားပါ။ အခိုက်အတန့်တိုင်းမှာ ဘာလုပ်ရမယ်ဆိုတာ သူ သိပါတယ်။ သူ ပြန်ပါလာလို့ ဝမ်းသာတယ်။ မနက်ဖြန်အတွက် ကျွန်တော်တို့အတွက် ကစားဖို့ အသင့်ဖြစ်နေပါပြီ"လို့ ပြောကြားသွားပါတယ်။

ဒါ့အပြင် ရီးရဲလ်မက်ဒရစ်အတွက် နောက်ထပ် သတင်းကောင်းကတော့ မန်စီးတီးနှင့်ပွဲတွင် အရန်အဖြစ် ပါဝင်ကစားခဲ့တဲ့ ကိုင်လီယန်ဘက်ပေးမှာ မက်ဒရစ်ဒါဘီပွဲစဉ်တွင် ပွဲထွက်ကစားရန် အသင့်ဖြစ်နေတာ ဖြစ်ပါတယ်။

နယူးကာဆယ်အသင်းခေါင်းဆောင်ဂူမာရေးစ်အား ခေါ်ယူရေး ယူနိုက်တက်ရဲ့ လျို့ဝှက်တွေ့ဆုံမှု နောက်ကွယ်မှ အမှန်တရား
=====================
ယူနိုက်တက်ဟာ နွေရာသီတွင် ကွင်းလယ်ကစားသမားတစ်ဦး ခေါ်ယူအားဖြည့်ရေး လုပ်ဆောင်တဲ့အနေဖြင့် နယူးကာဆယ်အသင်းခေါင်းဆောင်ဘရူနိုဂူမာရေးစ်ရဲ့ အေးဂျင့်များနှင့် အထူးလျို့ဝှက်တွေ့ဆုံမှု ပြုလုပ်ခဲ့ပါတယ်။

ယူနိုက်တက်ဟာ နွေရာသီတွင် အသင်းမှ ထွက်ခွာမယ့် ဝါရင့်ကွင်းလယ်ကစားသမားကက်စ်မီရိုရဲ့ နေရာတွင် အစားထိုးရန် ဘရာဇီးလက်ရွေးစင်ကစားသမားအား ပစ်မှတ်ထားနေတာပါ။

ကက်စ်မီရိုနေရာတွင် အစားထိုးရေး လွယ်ကူခြင်းမရှိတာနှင့်အညီ ယူနိုက်တက်ဟာ ကစားသမားအမြောက်အမြားကို လျာထားထားပါတယ်။

ဂူမာရေးစ်ဟာ နယူးကာဆယ်သို့ ရောက်လာပြီးနောက် အရေးပါတဲ့ ကစားသမားအဖြစ် ခြေစွမ်းပြနေသူဖြစ်ပြီး ပရီးမီးယားလိဂ်ရဲ့အကောင်းဆုံးကွင်းလယ်သမားများထဲမှ တစ်ဦးလည်း ဖြစ်ပါတယ်။

ယူနိုက်တက်ဟာ ယခုရာသီတွင် နယူးကာဆယ်တို့ ချန်ပီယံလိဂ်ဝင်ခွင့် မရရှိလာပါက ထိပ်တန်းကစားသမားများအား ဆက်ထိန်းသိမ်းရေး ခက်ခဲလာနိုင်တဲ့အခြေအနေမျိုး ကြုံရချိန်တွင် ဂူမာရေးစ်အား ခေါ်ယူရေး ခြေလှမ်းလှမ်းလာတာပါ။

UOL ရဲ့ ဖော်ပြလာမှုအရ ယူနိုက်တက်နှင့် ဂူမာရေးစ်ရဲ့အေးဂျင့်များဟာ အပြောင်းအရွှေ့ ဖြစ်မြောက်လာရေး ဆွေးနွေးလာကြောင်း သိရပါတယ်။

ယူနိုက်တက်ဟာ ဂူမာရေးစ်ကို ပေါင်သန်း ၆၀ (ဒေါ်လာသန်း ၈၀)ဖြင့် ကမ်းလှမ်းမှုပြုလုပ်လာပါက အပြောင်းအရွှေ့ အောင်မြင်လာမယ်လို့ ယုံကြည်နေကြောင်းလည်း သိရပါတယ်။

တကယ်လို့ ယူနိုက်တက်ပစ်မှတ်နေတဲ့ နယူးကာဆယ်ကစားသမားက ဂူမာရေးစ်တစ်ဦးတည်း မဟုတ်ပါဘူး။ ယူနိုက်တက်ဟာ ဂူမာရေးစ်အပြင် အီတလီကွင်းလယ်ကစားသမားဆန်ဒရိုတိုနာလီကို ခေါ်ယူရန်လည်း စိတ်ဝင်စားနေပါတယ်။

ဒါပေမယ့် ယူနိုက်တက်ဟာ တိုနာလီအား ခေါ်ယူရေး အာဆင်နယ်၊ ရီးရဲလ်မက်ဒရစ်၊ မန်စီးတီးတို့နှင့်အပြိုင် ကြိုးပမ်းရပါမယ်။

တိုနာလီဟာလည်း လာမယ့်ရာသီတွင် နယူးကာဆယ်တို့ ချန်ပီယံလိဂ်ဝင်ခွင့် မရရှိပါက ထွက်ခွာနိုင်တဲ့ စတားများထဲတွင် ပါဝင်နေပါတယ်။

ယူနိုက်တက်ဟာ ဂူမာရေးစ် (သို့မဟုတ်)တိုနာလီအား အိုးထရက်ဖို့ဒ်သို့ အရောက်ခေါ်ယူရေး ပစ်မှတ်ထားနေပုံရပါတယ်။

တဖက်တွင် ယူနိုက်တက်ရဲ့ ကွင်းလယ်ပစ်မှတ်ထဲတွင် နော်တင်ဟမ်ဖောရက်စ်ရဲ့ အီးလီးယော့အင်ဒါဆင်လည်း ပါဝင်နေတာပါ။

ဂီယာထရူဒါ လူမျိုးရေးခွဲခြားမှုခံရပြီးနောက် နယူးကာဆယ်-ဆန်းဒါးလန်းတို့ရဲ့ တိုင်နီဆိုက်ဒါဘီပွဲကို ရပ်ဆိုင်းခဲ့ရ
====================
နယူးကာဆယ်က တနင်္ဂနွေနေ့ည ဆန်းဒါးလန်းနှင့် ရင်ဆိုင်ရတဲ့ တိုင်နီဆိုက်ဒါဘီပွဲစဉ်တွင် ဧည့်သည်အသင်းကစားသမားလတ်ရှာရယ်ဂီယာထရူဒါကို ပရိသတ်များထဲမှ တစ်ဦးဦးက လူမျိုးရေးခွဲခြားမှု ပြုလုပ်မှုကြောင့် ပွဲကို ရပ်ဆိုင်းခဲ့ရပြီးနောက် ယင်းဖြစ်ရပ်ကို စုံစမ်းစစ်ဆေးအရေးယူသွားမယ်လို့ ကြေညာလာပါတယ်။

ဒိုင်လူကြီးအန်တိုနီတေလာဟာ လူမျိုးရေးခွဲခြားမှု ဖြစ်ပျက်ပြီးနောက် လူမျိုးရေးခွဲခြားမှုပပျောက်ရေးစည်းမျဉ်းဥပဒေအရ တိုင်နီဆိုက်ဒါဘီပွဲစဉ်အား ၃ မိနစ်ကြာ ရပ်ဆိုင်းခဲ့ပါတယ်။

ပွဲချိန် ၅၂ မိနစ်တွင် နယူးကာဆယ်ကစားသမားဆဗင်ဘော့မန်း ဆေးကုသမှုခံယူနေစဉ် ဆန်းဒါးလန်းအသင်းခေါင်းဆောင်ဂရာနစ်ဇာခါဟာ ဒိုင်လူကြီးတေလာထံသို့ ပြေးလွှားသွားခဲ့ပြီး လူမျိုးရေးခွဲခြားမှုအား တိုင်ကြားခဲ့တာပါ။

ယင်းနောက် တေလာဟာ နှစ်ဖက်နည်းပြအဖွဲ့ဝင်များ၊ ဒတ်ချ်နောက်ခံလူဂီယာထရူဒါ၊ ဇာခါတို့နှင့် စကားပြောပြီးနောက် ပွဲကို ပြန်လည်စတင်ခဲ့ပါတယ်။

ပရီးမီးယားလိဂ်ကလည်း ယင်းအဖြစ်အပျက်ကို စုံစမ်းစစ်ဆေးမှု ပြုလုပ်သွားမယ်လို့ ကြေညာထားသလို နော့သမ်ဘီးယားရဲတပ်ဖွဲ့ကလည်း ခွဲခြားဆက်ဆံမှုသတင်းကို သိရှိထားကြောင်း ကြေညာသွားပါတယ်။

ဆန်းဒါးလန်းနည်းပြရီဂစ်လီဘရစ်က "သူ(ဂီယာထရူဒါ) အိုကေပါတယ်။ လက်မခံနိုင်စရာပါ။ သတင်းပို့ဖို့ အရေးကြီးတယ်။ ပြီးရင် လုပ်သင့်လုပ်ထိုက်တာ လုပ်ရမယ်။ သူ့ အိုကေပါတယ်။ ဒါပေမယ့် ကျွန်တော်တို့ သူ့ကို အားပေးကူညီဖို့ လိုတယ်"လို့ ဆိုသွားပါတယ်။

နယူးကာဆယ်ဟာ တိုင်နီဆိုက်ဒါဘီပွဲစဉ်တွင် ပထမပိုင်းမှာ ၁-၀ ဂိုးဖြင့် အနိုင်ရနေခဲ့ပေမယ့်လည်း ဘရိုင်ယန်ဘရော့ဘ်ဘီရဲ့ နောက်ကျအနိုင်ဂိုးကြောင့် ၂-၁ ဖြင့် ရှုံးနိမ့်လာပါတယ်။

တဖက်တွင် ရဲတပ်ဖွဲ့ကလည်း တိုင်နီဆိုက်ဒါဘီပွဲမတိုင်မီ ခိုက်ရန်ဖြစ်ပွားမှုကြောင့် လူတစ်ဦးကို ဖမ်းဆီးထိန်းသိမ်းထားကြောင်း ကြေညာသွားပါတယ်။

ခါရာဘောင်ဖလားဗိုလ်လုပွဲ ရှုံးပွဲတွင် အမှားပြုလုပ်မှုကြောင့် ဝေဖန်မှုခံနေရတဲ့ ကီပါကို အာတီတာ ကာကွယ်ပြောကြားလာ
=====================
အာဆင်နယ်နည်းပြမီခေးလ်အာတီတာဟာ မန်စီးတီးအား ၂-၀ ဖြင့် ရှုံးနိမ့်တဲ့ ခါရာဘောင်ဖလားဗိုလ်လုပွဲတွင် အမှားပြုလုပ်ခဲ့တဲ့ နံပါတ် ၂ ဂိုးသမားကီပါအာရီဇာဘာလာဂါအား ကာကွယ်မှု ပြုလုပ်လာပါတယ်။

စပိန်ဂိုးသမားဟာ ဝင်ဘာလေကွင်းတွင် ဖြတ်တင်ဘောအား ပုတ်မထုတ်ခဲ့မှုနှင့်အတူ နီကိုအိုရိုင်လီရဲ့ ပထမဂိုးအား ခွင့်ပြုခဲ့ရပါတယ်။

မန်စီးတီးနည်းပြပက်ဂွါဒီယိုလာဟာ မန်စီးတီးနိုင်ပွဲကြောင့် ၅ ကြိမ်မြောက် ခါရာဘောင်ဖလား ဆွတ်ခူးလာကာ ခါရာဘောင်ဖလားပြိုင်ပွဲတွင် အအောင်မြင်ဆုံးနည်းပြအဖြစ် သမိုင်းမှတ်တိုင်စိုက်ထူလာပါတယ်။

ဒါပေမယ့် အာတီတာက မှားယွင်းမှုမှာ ပွဲရဲ့အစိတ်အပိုင်း ဖြစ်ကြောင်း၊ ကီပါမှာ ခါရာဘောင်ဖလားပွဲအားလုံးတွင် ကစားလာသူ ဖြစ်ရာ ဗိုလ်လုပွဲတွင် နံပါတ်တစ်ဂိုးသမားဒေးဗစ်ရာယာကို အသုံးပြုလာမည်ဆိုပါက မျှတမှု ရှိလာမှာ မဟုတ်ကြောင်း ဆိုသွားပါတယ်။

အာတီတာက "သူက ဒီရာသီတစ်လုံး ကစားလာတာဆိုတော့ ပွဲမတိုင်ခင်ကတည်းက သူ့ကိုပဲ ဆက်သုံးဖို့ ဆုံးဖြတ်ခဲ့တာပါ။ သူက ဒီပြိုင်ပွဲမှာ ကစားလာတယ်။ ဒီကနေ့ အချိန်အထိ ရောက်လာအောင် သူ ကူညီခဲ့တယ်။ အခြားတစ်ယောက်ကို ရွေးလာမယ်ဆိုရင် ဘယ်မျှတတော့မလဲ။ လုပ်သင့်လုပ်ထိုက်တာကို လုပ်ခဲ့တာပါ။ ရိုးရိုးသားသား မျှမျှတတ လုပ်ခဲ့တာပါ။ ကီပါနဲ့လည်း နားလည်မှု ရှိထားပြီးသားပါ။ သူ ပြိုင်ပွဲအားလုံးကို ကစားခဲ့တယ်။ တခြားတစ်ဦးကို သုံးမယ်ဆိုရင် သူ့အတွက် မျှတလာတော့မှာ မဟုတ်ပါဘူး။ သူဟာ ဒီပြိုင်ပွဲမှာ ဒီလိုအခြေအနေအထိ ရောက်အောင် အကောင်းဆုံးကူညီပြီး လုပ်ဆောင်ပေးလာခဲ့တယ်။ လုပ်သင့်လုပ်ထိုက်တာကို ကျွန်တော်လုပ်ခဲ့တာပါ။ မှားယွင်းမှုတွေဆိုတာ ဘောလုံးရဲ့အစိတ်အပိုင်းပါ။ ကံဆိုးစွာပဲ ဒီကနေ့ ဖြစ်သွားတယ်။ တကယ့်ကို အရေးပါတဲ့အခိုက်အတန့်မှာ ဖြစ်သွားတာပါ"လို့ ပြောကြားသွားပါတယ်။

Sky Sports တွင် ဘောလုံးဝေဖန်ရေးသမားအဖြစ် တာဝန်ထမ်းဆောင်နေတဲ့ ဂယ်ရီနဗီးလ်က ကီပါမှာ ခါရာဘောင်ဖလားဗိုလ်လုပွဲတွင် ပုတ်ထုတ်မှုများသာ ဆက်တိုက် ပြုလုပ်နေပြီး စိတ်လှုပ်ရှားနေခဲ့ကြောင်း ဝေဖန်သွားပါတယ်။

၎င်းက "သူတိ့က တံခါးလာခေါက်နေတယ်။ ပြီးတော့ မန်စီးတီးပရိသတ်တွေလည်း ဂိုးနောက်မှာ သွေးနံ့ရနေတယ်။ ဂိုးသမားတစ်ယောက်ရဲ့ တကယ့်ကို ဆိုးရွားတဲ့ မှားယွင်းမှုပါ။ တကယ့်ကို ကြီးကျယ်တဲ့အခိုက်အတန့်မှာ တကယ့်အမှားကြီး လုပ်ခဲ့တာ။ ဒါပေမယ့် ပုတ်ထုတ်ပြီးရင်း ပုတ်ထုတ်နေတယ်။ အိုရိုင်လီက အမိအရ ယူသွားတယ်"လို့ ပြောကြားသွားပါတယ်။

ကီပါဟာ ချဲလ်ဆီးတွင် ကစားစဉ်တုန်းကလည်း ခါရာဘောင်ဖလားဗိုလ်လုပွဲသို့ ၂ ကြိမ် ရောက်ခဲ့ပြီး ၂ ကြိမ်လုံး ရှုံးနိမ့်ခဲ့ဖူးပါတယ်။

နော်တင်ဟမ်ဖောရက်စ်ပွဲအပြီးတွင် မိသားစုဝင်နာရေးကြောင့် သတင်းစာရှင်းလင်းပွဲသို့ မတက်ခဲ့တဲ့ အိုင်ဂေါ်ကျူဒေါ်
====================
အိုင်ဂေါ်ကျူဒေါ်ဟာ နော်တင်ဟမ်ဖောရက်စ်အား အိမ်ကွင်းတွင် ၃-၀ ဂိုးဖြင့် ရှုံးနိမ့်ပြီးနောက် ချက်ချင်းပင် မိသားစုဝင် နာရေးသတင်းကြားရပြီးနောက် ပွဲပြီးသတင်းစာရှင်းလင်းပွဲအား တက်ရောက်နိုင်ခဲ့ခြင်း မရှိပါဘူး။

ခရိုအေးရှားနည်းပြဟာ ပွဲအပြီး ချက်ချင်းပင် နာရေးသတင်းကြားသိရပြီးနောက် သတင်းစာရှင်းလင်းပွဲအား လက်ထောက်နည်းပြဘရူနိုဆယ်တော်အား တက်စေခဲ့ပါတယ်။

ဆယ်တော်က "ကိုယ်ရေးကိုယ်တာကိစ္စပါ။ မိသားစုအရေးပါ။ သူ့အတွက် စကားပြောဖို့ သင့်တော်တဲ့အချိန်မဟုတ်လို့ ကျွန်တော် ဒီကို ရောက်လာတာပါ။ အိုင်ဂေါ်က မိသားစုအရေးကြောင့် ဒီကို (သတင်းစာရှင်းလင်းပွဲ)သို့ မရောက်လာပါ။ ဒီကနေ့ သတင်းစာရှင်းလင်းပွဲသို့ သူ မတက်တာက အကောင်းဆုံးပါ"လို့ ပြောကြားသွားပါတယ်။

စပါးစ်ဟာ နော်တင်ဟမ်ဖောရက်စ်အား ရှုံးနိမ့်ခဲ့ပေမယ့် ဝက်စ်ဟမ်းမှာလည်း ဗီလာအား ရှုံးနိမ့်သွားမှုနှင့်အတူ တန်းဆင်းဇုန်နှင့် တစ်မှတ်အကွာတွင် ဆက်လက် ရပ်တည်နေရတုန်း ဖြစ်ပါတယ်။

အိုင်ဂေါ်ကျူဒေါ်ဟာ စပါးစ်ယာယီနည်းပြအဖြစ် ခန့်အပ်ခြင်းခံရပြီးနောက် ပရီးမီးယားလိဂ် ၅ ပွဲဆက် နိုင်ပွဲပျောက်ဆုံးနေမှုနှင့်အတူ ဖိအားများအောက်သို့ ကျရောက်နေပါတယ်။

စပါးစ်ဟာ ဧပြီလ ၁၂ ရက်နေ့တွင် ဆန်းဒါးလန်းအား အဝေးကွင်းသို့ သွားရောက် ကစားရပါမယ်။

ခါရာဘောင်ဖလားဗိုလ်လုပွဲတွင် ရှုံးနိမ့်ပြီးနောက် ပရီးမီးယားလိဂ်ဖလားကိုလည်း အာဆင်နယ် လက်လွှတ်လာရလိမ့်မယ်လို့ ပရိသတ်များ ယုံကြည်နေ
=====================
ပရိသတ်များက အာဆင်နယ်မှာ ခါရာဘောင်ဖလားဗိုလ်လုပွဲတွင် ရှုံးနိမ့်ပြီးနောက် ပရီးမီးယားလိဂ်ဖလားကိုလည်း ထပ်မံ လက်လွှတ်လာရလိမ့်မယ်လို့ ယုံကြည်နေကြပါတယ်။

တနင်္ဂနွေနေ့ညတုန်းက ဝင်ဘာလေကွင်းတွင် ကစားတဲ့ ခါရာဘောင်ဖလားဗိုလ်လုပွဲတွင် ပက်ဂွါဒီယိုလာရဲ့ မန်စီးတီးက အာဆင်နယ်အား ၂-၀ ဖြင့် အနိုင်ယူကာ ဗိုလ်စွဲသွားခဲ့ပါတယ်။

အာဆင်နယ်ဟာ ယခုရာသီဆုဖလား ၄ လုံး ဆွတ်ခူးရေး ယှဉ်ပြိုင်နေတာ ဖြစ်ပြီး ယခုရာသီ ပထမဆုံးဆုဖလား ဆွတ်ခူးနိုင်မယ့် အခွင့်အရေး လက်လွှတ်လိုက်ရပြီလည်း ဖြစ်ပါတယ်။

ဒါပေမယ့် ၎င်းတို့ဟာ ပရီးမီးယားလိဂ်အမှတ်ပေးဇယားကို ၉ မှတ်ဖြတ်ကာ ဦးဆောင်နေတာ ဖြစ်ပြီး ချန်ပီယံလိဂ်နှင့် အက်ဖ်အေဖလားပြိုင်ပွဲတို့တွင်လည်း ကွာတားဖိုင်နယ်သို့ တက်ရောက်ထားပါတယ်။

ဒါပေမယ့် ပရိသတ်များက ခါရာဘောင်ဖလားဗိုလ်လုပွဲ ရှုံးပွဲနှင့်အတူ အာဆင်နယ်မှာ ပရီးမီးယားလိဂ်ဖလားပြိုင်ပွဲတွင်လည်း အရေးနိမ့်လာမယ်လို့ ယုံကြည်နေကြပါတယ်။

ပရိသတ်တစ်ဦးက "အခု လာမယ့် အီတီဟတ်ပရီးမီးယားလိဂ်ပွဲကျရင် ဘာဖြစ်လာမလဲဆိုတာ ကျွန်တော်တို့အားလုံး သိထားနင့်ကြပြီ"လို့ ဆိုသွားပါတယ်။

အခြားတစ်ဦးကလည်း "ဘာဖြစ်လာမယ်ဆိုတာ အမြည်းလေးခံစားလိုက်ရပြီ"လို့ ပြောကြားသွားပါတယ်။

အခြားတစ်ဦးကလည်း "ဒီရာသီမှာလည်း အာဆင်နယ်တို့ ပရီးမီးယားလိဂ်ဖလား လက်လွတ်လာရမယ်"လို့ဆိုသွားပါတယ်။

အာဆင်နယ်နှင့် မန်စီးတီးတို့ဟာ လာမယ့် ဧပြီလတွင် ပရီးမီးယားလိဂ်ဖလားအတွက် အဆုံးအဖြတ်ပွဲစဉ်အဖြစ် အီတီဟတ်ကွင်းမှာ ကစားရပါမယ်။

မန်စီးတီးဟာ တစ်ပွဲကျန်ပွဲအား အနိုင်ရရှိကာ အိမ်ကွင်းတွေ့ဆုံတဲ့ပွဲတွင် အနိုင်ရရှိလာပါက အာဆင်နယ်နှင့် ၃ မှတ်အကွာသို့ ရောက်လာပါမယ်။

ခါရာဘောင်ဖလားဗိုလ်လုပွဲ နိုင်ပွဲတွင် ခေါင်းကို သွေးထွက်အောင် ကုပ်ခဲ့ပြန်တဲ့ ဂွါဒီယိုလာ
==================
ပက်ဂွါဒီယိုလာဟာ မန်စီးတီးတို့ ခါရာဘောင်ဖလားဆွတ်ခူးတဲ့ ပွဲစဉ်တွင်လည်း ခေါင်းကို သွေးထွက်အောင် ကုပ်ခြစ်ခဲ့ကြောင်း တွေ့ရှိရပြန်ပါတယ်။

စပိန်နိုင်ငံသားနည်းပြဟာ အာဆင်နယ်ကို ၂-၀ ဖြင့် အနိုင်ရရှိကာ ယခုရာသီ ပထမဆုံးဆုဖလားအဖြစ် ဆွတ်ခူးသလို စံချိန်တင် ၅ ကြိမ်မြောက် ခါရာဘောင်ဖလားကို ဆွတ်ခူးနိုင်ခဲ့ပါတယ်။

မန်စီးတီးဟာ ခါရာဘောင်ဖလား ဆွတ်ခူးနိုင်ခဲ့မှုနှင့်အတူ အက်ဖ်အေဖလားနှင့် ပရီးမီးယားလိဂ်ဖလားတို့ပါ ဆွတ်ခူးအရေးအတွက် တွန်းအားတစ်ခု ဖြစ်လာခဲ့ပါတယ်။

တဖက်တွင် အာတီတာရဲ့ ယခုရာသီ ဆုဖလား ၄ လုံး ဆွတ်ခူးရေးအိပ်မက် အဆုံးသတ်သွားခဲ့ပေမယ့် ဆုဖလား ၃ လုံးအတွက် တိုက်ပွဲဝင်နိုင်ပါသေးတယ်။

ခါရာဘောင်ဖလားဗိုလ်လုပွဲအပြီး မန်စီးတီးအသင်းသားတို့ အကြီးအကျယ် အောင်ပွဲခံချိန်တွင် ဂွါဒီယိုလာရဲ့ ခေါင်းတွင် အနီရောင်ကုပ်ခြစ်ရာ အစင်းကြောင်းများ တွေ့ရှိခဲ့ရပါတယ်။

မန်စီးတီးနည်းပြဂွါဒီယိုလာဟာ ၂၀၂၄ ခုနှစ်တုန်းကလည်း ဖီယင်နုအား ရှုံးနိမ့်တဲ့ ပွဲစဉ်အပြီးတွင် ခေါင်းကို သွေးထွက်အောင် လက်သည်းဖြင့် ကုပ်ခြစ်ထားခဲ့ကြောင်း စိုးရိမ်ဖွယ်ရာ တွေ့ရှိခဲ့ရဖူးပါတယ်။

ထိုစဉ်တုန်းက ပွဲအပြီး သတင်းစာရှင်းလင်းပွဲတွင် ဂွါဒီယိုလာအား မျက်နှာဘယ်ခြမ်းနှင့် နှာခေါင်းတို့တွင် လက်သည်းဖြင့် ကုပ်ခြင်းထားမှုကြောင့် အစင်းကြောင်းများဖြင့် တွေ့ခဲ့ရပါတယ်။

ယင်းနောက် ၂၀၂၅ ခုနှစ်တုန်းကလည်း ရီးရဲလ်မက်ဒရစ်နှင့် ပွဲအပြီးတွင် ဂွါဒီယိုလာအား ခေါင်းတွင် ကုပ်ခြစ်ရာများဖြင့် တွေ့ခဲ့ရပါသေးတယ်။

တိုင်နီဆိုက်ဒါဘီပွဲရှုံးပွဲအပြီးတွင် ပရိသတ်လှောင်ပြောင်မှုနှင့် ထိုက်တန်ကြောင်း အက်ဒီဟောင်းဖွင့်ဟလာ
====================
အက်ဒီဟောင်းက နယူးကာဆယ်ရဲ့ တိုင်နီဆိုက်ဒါဘီရှုံးပွဲအပြီးတွင် ပရိသတ်များရဲ့ လှောင်ပြောင်မှုနှင့် ထိုက်တန်ကြောင်း ဝန်ခံပြောကြားလာပါတယ်။

နယူးကာဆယ်နည်းပြနှင့် အသင်းသားများဟာ ဆန်းဒါးလန်းအား တိုင်နီဆိုက်ဒါဘီပွဲရှုံးပွဲအပြီးတွင် ပရိသတ်များရဲ့ လှောင်ပြောင်မှုများနှင့် ကြုံခဲ့ရပါတယ်။

အက်ဒီဟောင်းဟာ ဖေဖော်ဝါရီလ ၇ ရက်တုန်းက အိမ်ကွင်းတွင် ဘရန့်ဖို့ဒ်အား ရှုံးနိမ့်တဲ့ပွဲတုန်းကလည်း အပြင်းအထန် ဝေဖန်မှုများနှင့် ကြုံရကာ အနာဂတ်နှင့်ပတ်သက်ပြီး မေးခွန်းထုတ်ခြင်းခံခဲ့ရပါတယ်။

အက်ဒီဟောင်းဟာ အိမ်ကွင်းတွင်ပင် မြို့ခံပြိုင်ဘက် ဆန်းဒါးလန်းအား ရှုံးနိမ့်လာချိန်မှာတော့ လှောင်ပြောင်မှုများနှင့် ထပ်မံကြုံလာရပါတယ်။

အက်ဒီဟောင်းက "ဒါမျိုး ဘယ်တော့မှ မကြုံချင်ပါဘူး။ ဒါပေမယ့် ကျုပ်က ခေါင်းဆောင်တစ်ဦးဆိုတော့ ရှေ့ထွက်ရပါမယ်။ ဒါတွေကို ကြံ့ကြံ့ခံမယ်။ အများစုကို ပုံမှန်အတိုင်းပဲ လုပ်ဆောင်ပါမယ်။ ဒါက ကျုပ်အတွက် အရမ်းအရေးကြီးပါတယ်။ ဝေဖန်မှုကို နားလည်ပါတယ်။ မျှော်လည်း မျှော်လင့်ထားပြီးသားပါ။ ဒါနဲ့ပတ်သက်ပြီး ပြဿနာ မရှိပါဘူး"လို့ ပြောကြားသွားပါတယ်။

နယူးကာဆယ်ဟာ ဘာစီလိုနာအား ၇-၂ ဖြင့် ရှုံးနိမ့်ကာ ချန်ပီယံလိဂ်မှ ထွက်ခွာခဲ့ရပြီးနောက် ဆန်းဒါးလန်းအား ထပ်မံ ရှုံးနိမ့်လာတာလည်း ဖြစ်ပါတယ်။

နယူးကာဆယ်ဟာ လာမယ့် ဧပြီလ ၁၂ ရက်နေ့အထိ ပွဲကစားလာရမှာ မဟုတ်ပါဘူး။ အက်ဒီဟောင်းဟာ နည်းပြဘဝအတွင်း အရှည်လျားဆုံး နိုင်ပွဲတစ်ပွဲကြုံရရေး အချိန်စောင့်ဆိုင်းလာရတော့မှာ ဖြစ်ပါတယ်။

ဆက်လက်ပြီး အက်ဒီဟောင်းက "ဒီအလုပ်အပေါ် အပြည့်အဝ စိတ်နှစ်ထားပြီးသားပါ။ ဒီကနေ့ လုပ်ဆောင်မှုအပေါ် စိတ်ပျက်မိသလို ပြီးခဲ့တဲ့ ရက်သတ္တပတ် လုပ်ဆောင်မှုကိုလည်း စိတ်ပျက်ပါတယ်။ ဘာစီလိုနာပွဲက အရမ်း ခက်ခဲတယ်။ ဒီနေ့ပွဲလည်း ခက်ခဲတယ်။ ဘရန့်ဖို့ဒ်နဲ့ပွဲအပြီးမှာ ပြောခဲ့သလို ဝေဖန်မှုကို အမြဲခံယူပါမယ်"လို့ ပြောကြားသွားပါတယ်။

ယနေ့ ရွှေဈေးနဲ့ နိုင်ငံခြားငွေလဲနှုန်းများ

( ၂၀၂၆ - မတ် ၂၃ ၊ နံနက် ၁၀ နာရီ)

#ရွှေဈေး

-ကမ္ဘာ့ရွှေဈေး
တအောင်စ ၄၃၅၂ ဒေါ်လာ

ရန်ကုန်တိုင်းရွှေလုပ်ငန်းရှင်များအသင်း (YGEA) ရဲ့ရွှေစျေးကွက် အဖွင့်ဈေးနှုန်း

- အကယ်ဒမီ မီးလင်းရွှေ တကျပ်သား
၇,၀၀၀,၀၀၀ ကျပ်

ပြင်ပ အရောင်းအဝယ်ဖြစ်တဲ့ ရွှေဈေးနှုန်း

-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၉,၉၃၀,၀၀၀ ကျပ်
ဝယ်ဈေး ၉,၈၉၀,၀၀၀ ကျပ်

-၁၅ ပဲရည် တကျပ်သား
ရောင်းဈေး ၉,၅၃၀,၀၀၀ ကျပ်
ဝယ်ဈေး ၉,၄၉၀,၀၀၀ ကျပ်

* စနစ်သစ်
(၁ိ - ၁၆.၃၂၉၃၂၅ ဂရမ် = ၁၂၀ ရွေး)

-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၉,၈၁၀,၀၀၀ ကျပ်
ဝယ်ဈေး ၉,၇၇၀,၀၀၀ ကျပ်

-၁၅ ပဲရည် တကျပ်သား
ရောင်းဈေး ၉,၄၁၀,၀၀၀ ကျပ်
ဝယ်ဈေး ၉,၃၇၀,၀၀၀ ကျပ်

“လက်ရှိ ရွှေဈေးကွက်အတွင်း ဈေးနှုန်းအတက်အကျ မငြိမ်သေးတဲ့အတွက် ရောင်းမှား၊ ဝယ်မှား မဖြစ်ဖို့ သတိပြုစေလိုပါတယ်။”

(ရွှေဈေးနှုန်းများ အချိန်နှင့်အမျှ ပြောင်းလဲနိုင်သည်။)

#နိုင်ငံခြားငွေလဲလှယ်နှုန်း

-မြန်မာနိုင်ငံတော်ဗဟိုဘဏ် ရည်ညွှန်းငွေလဲနှုန်း
အမေရိကန် တဒေါ်လာ - ၃၆၅၇ ကျပ်

ပြင်ပပေါက်စျေး

-အမေရိကန်ဒေါ်လာ‌
ရောင်းဈေး - ၄၃၁၀ ကျပ်
ဝယ်ဈေး - ၄၂၀၀ ကျပ်

-စင်္ကာပူဒေါ်လာ
ရောင်းဈေး - ၃၃၆၀ ကျပ်
ဝယ်ဈေး - ၃၂၆၀ ကျပ်

-ယူရို
ရောင်းဈေး - ၄၉၇၅ ကျပ်
ဝယ်ဈေး - ၄၈၅၀ ကျပ်

-ထိုင်းဘတ်
ရောင်းဈေး - ၁၃၀.၇၂ ကျပ်
ဝယ်ဈေး - ၁၂၇.၃၉ ကျပ်

-မလေးရှားရင်းဂစ်
ရောင်းဈေး - ၁၀၉၃ ကျပ်
ဝယ်ဈေး - ၁၀၆၅ ကျပ်

-တရုတ်ယွမ်
ရောင်းဈေး - ၆၂၄ ကျပ်
ဝယ်ဈေး - ၆၀၈ ကျပ်

-ဂျပန်ယန်း
ရောင်းဈေး - ၂၇.၀၂ ကျပ်
ဝယ်ဈေး - ၂၆.၃၃ ကျပ်

-အိန္ဒိယရူပီး
ရောင်းဈေး - ၄၅.၉၇ ကျပ်
ဝယ်ဈေး - ၄၄.၈ ကျပ်

-ကိုရီးယားဝမ်
ရောင်းဈေး - ၂.၈၆ ကျပ်
ဝယ်ဈေး - ၂.၇၈ ကျပ်

-စတာလင်ပေါင်
ရောင်းဈေး - ၅၇၄၀ ကျပ်
ဝယ်ဈေး - ၅၅၉၀ ကျပ်

-ဩစတြေးလျဒေါ်လာ
ရောင်းဈေး - ၃၀၁၁ ကျပ်
ဝယ်ဈေး - ၂၉၃၅ ကျပ်

-ကနေဒါဒေါ်လာ
ရောင်းဈေး - ၃၁၄၄ ကျပ်
ဝယ်ဈေး - ၃၀၆၄ ကျပ်

-ဟောင်ကောင်ဒေါ်လာ
ရောင်းဈေး - ၅၅၀ ကျပ်
ဝယ်ဈေး - ၅၃၆ ကျပ်

-ယူအေအီး
ရောင်းဈေး - ၁၁၇၄ ကျပ်
ဝယ်ဈေး - ၁၁၄၄ ကျပ်

ငွေလဲနှုန်းများ အချိန်နှင့်အမျှ ပြောင်းလဲနိုင်သည်။

***သတ်မှတ်ဈေးအတိုင်း အရောင်းအဝယ်မလုပ်ပါက အရေးယူခံရနိုင်သည်။