အသင်းဟောင်းအာဆင်နယ်ကို ဂိုးပြတ်ရှုံးနိမ့်ပြီးနောက် အာတီတာနှင့် လက်ဆွဲနှုတ်ဆက်ခြင်းပင် မပြုလုပ်နိုင်ဘဲ ဥမင်လှိုဏ်ခေါင်းသို့ ဆင်းသွားတဲ့ အမ်မရီ
=====================
အူနိုင်းအမ်မရီဟာ အမ်းမရိတ်ကွင်းတွင် အသင်းဟောင်းအာဆင်နယ်ကို ဂိုးပြတ် ရှုံးနိမ့်ပြီးနောက် ပွဲပြီးခရာမှုတ်ပြီးချိန်တွင် အာဆင်နယ်နည်းပြမီခေးလ်အာတီတာနှင့် လက်ဆွဲနှုတ်ဆက်မှုပင် မပြုလုပ်နိုင်ဘဲ ဥမင်လှိုဏ်ခေါင်းသို့ ဝင်ရောက်သွားပါတယ်။
အာဆင်နယ်ဟာ ဗီလာကို ၄-၁ ဖြင့် အနိုင်ရရှိကာ အမှတ်ပေးဇယားထိပ်တွင် ၅ မှတ်ဖြတ်ပြီး ဦးဆောင်လာနိုင်ခဲ့ပါတယ်။
အာဆင်နယ်ဟာ ပေါင် ၁၀၅ သန်းတန်ကွင်းလယ်ကစားသမားဒီကလန်ရိုက် မပါဝင်နိုင်ပေမယ့်လည်း ဒုတိယပိုင်းတွင် ဂါဘရီရယ်၊ မာတင်ဇူဘီမန်ဒီ၊ လီယန်ဒရိုထရိုဆတ်၊ ဂါဘရီရယ်ဂျေဆူးတို့ သွင်းယူတဲ့ဂိုးဖြင့် ၄-၁ ဖြင့် အနိုင်ရခဲ့ပါတယ်။
ဗီလာအတွက် နှစ်သိမ့်ဂိုးကို နာကျင်အချိန်ပိုတွင် အိုလီဝတ်ကင်က သွင်းယူခဲ့ပေမယ့်လည်း ၁၁ ပွဲဆက် နိုင်ပွဲ ရပ်တန့်သွားပြီ ဖြစ်ပါတယ်။
အသက် ၄၃ နှစ်ရှိ အာတီတာဟာ ပွဲပြီးခရာမှုတ်ချိန်တွင် လက်ဆွဲနှုတ်ဆက်ရန်အတွက် ဗီလာနည်းပြအူနိုင်းအမ်မရီကို ရှာဖွေခဲ့ပေမယ့်လည်း ရှာမတွေ့ခဲ့ပါဘူး။ အူနိုင်းအမ်မရီဟာ ပွဲအပြီးတွင် ချက်ချင်းပင် ဥမင်လှိုဏ်ခေါင်းသို့ ဆင်းသွားခဲ့ပါတယ်။
အမ်မရီနှင့် လက်ဆွဲနှုတ်ဆက်ခြင်း မပြုလုပ်မှုနှင့်ပတ်သက်ပြီး မေးမြန်းလာချိန်တွင် မီခေးလ်အာတီတာက ၎င်းတို့အကြား မည်သည့်ပြဿနာမျှ မရှိကြောင်း ပြန်လည်ဖြေကြားသွားပါတယ်။
အာတီတာက "ဘာပြဿနာမှ မရှိပါဘူး။ တခါတလေ ဒီလိုမျိုး ဖြစ်တတ်တယ်။ ကျွန်တော့်အတွက် ပြဿနာမဟုတ်ပါဘူး"လို့ ပြောကြားသွားပါတယ်။
တဖက်တွင် အမ်မရီကလည်း ၎င်းမှာ အာတီတာအား လက်ဆွဲနှုတ်ဆက်ရန် စောင့်ဆိုင်းနေခဲ့ကြောင်း ဆိုသွားပါတယ်။
၎င်းက "အဖြစ်က ရိုးရှိုးလေးပါ။ ကြည့်နေနိုင်တယ်။ ပွဲပြီးတော့ ကျွန်တော့်လုပ်ငန်းစဉ်က မြန်တယ်။ လက်ဆွဲနှုတ်ဆက်မယ်။ နည်းပြတွေ၊ ကစားသမားတွေနဲ့အတူ အဝတ်အစားလဲခန်းဝင်မယ်။ ကျွန်တော် စောင့်နေခဲ့တယ်။ သူ့နည်းပြတွေနဲ့ ပျော်နေတယ်။ ဒီတော့ အတွင်းကို ဝင်ဖို့ ဆုံးဖြတ်ခဲ့တယ်။ ကျွန်တော့်အတွက် ပြဿနာမရှိပါဘူး"လို့ ပြောကြားသွားပါတယ်။
