စားအုန်းဆီ အခြေခံလက်ကားရည်ညွှန်းဈေး ထပ်မံကျဆင်း

ယခုသီတင်းပတ်အတွက် စားအုန်းဆီ ရန်ကုန်အထိုင်ဈေး အခြေခံလက်ကားရည်ညွှန်းဈေးအနေဖြင့် တစ်ပိဿာလျှင် ၆၁၁၅ ကျပ်ဖြစ်ပြီး ယခင်တစ်ပတ်ဈေးနှုန်းထက် တစ်ပိဿာလျှင် ၂၅ ကျပ် ကျဆင်းခဲ့သည်။
ယခုတစ်တပတ် ဒီဇင်ဘာ ၁၂ ရက်မှ ၁၈ ရက်ထိ ရန်ကုန်အထိုင်ဈေး စားအုန်းဆီ အခြေခံလက်ကား ရည်ညွှန်းဈေးနှုန်းမှာ တစ်ပိဿာလျှင် ၆၁၁၅ ကျပ်ဖြစ်ပြီး ပြီးခဲ့သည့် ဒီဇင်ဘာ (၅) ရက် မှ (၁၁) ရက်အထိ ဈေးမှာ တစ်ပိဿာ ကျပ် ၆၁၄၀ ဖြစ်သည်။
စားအုန်းဆီ အခြေခံလက်ကားရည်ညွှန်းဈေးသည် အောက်တိုဘာလတွင် တစ်ပိဿာ (၆၅၈၅) ကျပ်မှ လက်ရှိကာလ ဒီဇင်ဘာ ဒုတိယအပတ်တွင် ကျပ် (၆၁၄၀) ထိ ဈေးနှုန်း ဆက်တိုက်ကျဆင်းလာပြီး နှစ်လအတွင်း တစ်ပိဿာလျှင် ကျပ် (၄၅၀) ဝန်းကျင်အထိ ကျဆင်းလာခြင်းဖြစ်သည်။
စားအုန်းဆီများကို ဈေးကွက်အတွင်း ထုတ်ပြန်ကြေညာထားသည့် စျေးနှုန်းထက် ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းအပါအဝင် မသမာသည့်လုပ်ဆောင်မှုများပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း စားသုံးသူရေးရာဦးစီးဌာနမှ အသိပေးထားသည်။
ပြည်ပမှစာအုန်းဆီကို ဝယ်ယူတင်သွင်းရာတွင် စားအုန်းဆီတင်ပိုသည့် နိုင်ငံများ၏ ဈေးနှုန်းအတက်အကျပေါ်မူတည်၍ ပြည်တွင်းတွင် ဖြစ်သင့်ဖြစ်ထိုက်သည့် ဈေးနှုန်းများ ဖြစ်ပေါ်စေရေး ထိန်းကျောင်းဆောင်ရွက်နေကြောင်းလည်း သိရသည်။

သေဒ-ဏ်ပေးရေး ပြောကြားချက်များကြောင့် သမ္မတ ထရမ့်အား စွပ်စွဲပြစ်တင်ရန် ကြိုးပမ်းမှုကိုအောက်လွှတ်တော်က ပယ်ချ

သမ္မတ ဒေါ်နယ်လ် ထရမ့်က သေဒ-ဏ်ပေးရေးနှင့်ပတ်သက်၍ ပြောကြားခဲ့သည့် မှတ်ချက်များအပေါ် စွပ်စွဲပြစ်တင်ရေး လုပ်ငန်းစဉ် စတင်ရန် ကွန်ဂရက်အမတ် အယ်လ် ဂရင်း (Al Green) ၏ တောင်းဆိုမှုကို အမေရိကန် ကွန်ဂရက်လွှတ်တော်၏ အောက်လွှတ်တော်က ပယ်ချခဲ့သည်။
မဲခွဲဆုံးဖြတ်မှုအတွင်း လွှတ်တော်အမတ် ၂၇၃ ဦးက ကန့်ကွက်မဲ ပေးခဲ့ကြပြီး၊ ၁၄၀ ဦးက ထောက်ခံမဲ ပေးခဲ့ကြကာ၊ ၄၇ ဦးက ကြားနေခဲ့ကြသည်။
သမ္မတထရမ့်သည် ၎င်း၏ သမ္မတအာဏာကို အလွဲသုံးစားလုပ်ခြင်း၊ “အကြမ်းဖက်မှုကို အားပေးမြှင့်တင်ရန်၊ ရွံမုန်းဖွယ်ရာ မုန်းတီးမှုကို ဖန်တီးရန်၊ ကျွန်ုပ်တို့၏ ဒီမိုကရေစီကို ထိခိုက်စေရန်နှင့် ကျွန်ုပ်တို့၏ သမ္မတနိုင်ငံကို ပျက်စီးစေရန်” ကြိုးပမ်းခြင်းတို့ဖြင့် ထုတ်ပြန်ချက်တစ်ခုတွင် ကွန်ဂရက်အမတ် ဂရင်းက စွပ်စွဲခဲ့သည်။
ဤမှတ်တမ်းသည် ထရန့်ပ်၏ အစောပိုင်းပြောကြားချက်ကို တုံ့ပြန်ခြင်းဖြစ်ပြီး၊ စစ်တပ်အဖွဲ့ဝင်များအနေဖြင့် ၎င်းတို့ရရှိနိုင်သည့် မည်သည့်တရားမဝင်သောအမိန့်ကိုမဆို ငြင်းပယ်ရန် တိုက်တွန်းပြောဆိုခြင်းများသည် ‘သေဒ-ဏ်ပေးနိုင်သော ပုန်ကန်မှုလုပ်ရပ်များ’ ဖြစ်သည်ဟု ဒီမိုကရက်တစ် အထက်လွှတ်တော်အမတ်များနှင့် ကွန်ဂရက်အမတ်များအား ထရမ့်က သတိပေးခဲ့ခြင်းသာဖြစ်သည်။
ထို့ပြင်၊ ကွန်ဂရက်အမတ် ဂရင်းက ထရမ့်သည် ဥပဒေပြုအမတ်များနှင့် တရားသူကြီးများအား နိုင်ငံရေးအကြမ်းဖက်မှုနှင့် ကိုယ်ထိလက်ရောက် တိုက်ခိုက်မှုအန္တရာယ်များနှင့် ရင်ဆိုင်စေနိုင်သည့် “နိုင်ငံရေးရာ ပတ်ဝန်းကျင်ကို ဖန်တီးခဲ့သည်” ဟုလည်း စွပ်စွဲခဲ့သည်။
ယင်းမတိုင်မီကလည်း ကွန်ဂရက်အမတ် ဂရင်းသည် သမ္မတ ထရမ့်၏ ပြည်တွင်းနှင့် ပြည်ပ မူဝါဒများကို ဝေဖန်ရင်း ၎င်းကို စွပ်စွဲပြစ်တင်ရန် မဲခွဲဆုံးဖြတ်ပွဲများ ကျင်းပနိုင်ရန် အကြိမ်များစွာ ကြိုးပမ်းခဲ့သော်လည်း အောင်မြင်မှုမရရှိခဲ့ပေ။
လက်ရှိတွင် သမ္မတ ထရမ့်၏ ရီပတ်ဘလစ်ကန်ပါတီသည် အောက်လွှတ်တော်နှင့် အထက်လွှတ်တော် နှစ်ခုလုံးတွင် အများစုနေရာ ရရှိထားသောကြောင့် နိုင်ငံတော်အကြီးအကဲကို စွပ်စွဲပြစ်တင်ရန် မည်သည့်ကြိုးပမ်းမှုမဆို လက်တွေ့အားဖြင့် မဖြစ်နိုင်ပေ။
ဒီမိုကရက်များသည် ၂၀၁၉ ခုနှစ်နှင့် ၂၀၂၁ ခုနှစ်တို့တွင်လည်း ထရမ့်အား စွပ်စွဲပြစ်တင်ရန် ကြိုးစားခဲ့ကြဖူးသည်။

လ.၀.ကမှ ပြည်နှင်ဒဏ်ပေးသူများအား ပြန်ပို့ရန်အတွက် Boeing 737 လေယာဉ်များ အမိမြေလုံခြုံရေးဌာန ဝယ်ယူမည်

အမေရိကန်ပြည်ထောင်စု လူဝင်မှုကြီးကြပ်ရေးနှင့် အကောက်ခွန်ထိန်းသိမ်းရေး (U.S. Immigration and Customs Enforcement - ICE) မှ ပြည်နှင်ဒဏ်ပေးသူများအား မိခင်တိုင်းပြည်ပြန်ပို့ရေး လုပ်ငန်းများအတွက် အသုံးပြုရန် Boeing 737 လေယာဉ် ခြောက်စင်း ဝယ်ယူရန် အမိမြေလုံခြုံရေးဌာန (Department of Homeland Security - DHS) က သဘောတူညီကြောင်း ဗုဒ္ဓဟူးနေ့တွင် အတည်ပြုခဲ့သည်။
Daedalus Aviation ကုမ္ပဏီထံမှ 737 လေယာဉ်များအတွက် ဒေါ်လာ သန်း ၁၄၀ နီးပါး တန်ဖိုးရှိ DHS ၏ စာချုပ်အကြောင်းကို The Washington Post သတင်းစာက ပထမဆုံး ဖော်ပြခဲ့သည်။
အဆိုပါ ဗာဂျီးနီးယားအခြေစိုက် ကုမ္ပဏီ၏ အမှုဆောင်အရာရှိချုပ် (CEO) နှင့် ဘဏ္ဍာရေးအရာရှိချုပ် (CFO) တို့သည် Salus Worldwide Solutions ဟူသော သီးခြားကုမ္ပဏီတစ်ခုတွင် ရာထူးတူများအဖြစ် လုပ်ကိုင်နေကြပြီး၊ ထိုကုမ္ပဏီသည် စေတနာအလျောက် "ကိုယ်တိုင်-ပြည်နှင်ဒဏ်ပေးခြင်း" ကို ပံ့ပိုးရန်အတွက် DHS နှင့် ဒေါ်လာ ၁ ဘီလီယံနီးပါး တန်ဖိုးရှိ စာချုပ်ချုပ်ဆိုထားကြောင်းကိုလည်း ယင်းသတင်းစာက မှတ်ချက်ပြုခဲ့သည်။
ထရမ့်အစိုးရအဖွဲ့သည် ယခုနှစ်အတွင်း ရွှေ့ပြောင်းနေထိုင်သူ ၁ သန်းကို ပြည်နှင်ရန် ပန်းတိုင်ထားရှိကြောင်း သိရသည်။
"ရာဇ၀တ်မှုကျူးလွန်သော တရားမဝင်နိုင်ငံခြားသားများကို အစုလိုက်အပြုံလိုက် ပြည်နှင်ဒဏ်ပေးရန်အတွက် အမေရိကန်ပြည်သူလူထု၏ တောင်းဆိုချက်ကို ထရမ့်အစိုးရအဖွဲ့မှ ကုန်ကျစရိတ်သက်သာပြီး ဆန်းသစ်သောနည်းလမ်းများ ဖြင့် အကောင်အထည်ဖော်နေခြင်းကို မီဒီယာများက မီးမောင်းထိုးပြသည်ကို မြင်ရ၍ ကျွန်ုပ်တို့ ဝမ်းမြောက်မိပါတယ်" ဟု DHS ပြောရေးဆိုခွင့်ရှိသူ Tricia McLaughlin က ပြောကြားခဲ့သည်။
"ဒီ အစီအစဉ်အသစ်က အမေရိကန်ပြည်ထောင်စု လူဝင်မှုကြီးကြပ်ရေးနှင့် အကောက်ခွန်ထိန်းသိမ်းရေး ကို ပိုမိုထိရောက်တဲ့ ပျံသန်းမှုပုံစံများ အသုံးပြုခြင်းအပါအဝင် ပိုမိုထိရောက်စွာ လုပ်ကိုင်နိုင်စေခြင်းဖြင့် အခွန်ထမ်းပြည်သူတွေရဲ့ ဒေါ်လာ ၂၇၉ သန်း ကို သက်သာစေပါလိမ့်မယ်" ဟု McLaughlin က ဆိုသည်။
"သမ္မတ ထရမ့်နဲ့ [DHS ဝန်ကြီး Kristi] Noem တို့ဟာ ရာဇ၀တ်မှုကျူးလွန်တဲ့ တရားမဝင်နိုင်ငံခြားသားတွေကို ကျွန်ုပ်တို့နိုင်ငံကနေ လျင်မြန်ပြီး ထိရောက်စွာ ထွက်သွားအောင် လုပ်ဆောင်ဖို့ ကတိပြုထားပါတယ်" ဟုလည်း သူမက ပြောသည်။
လက်ရှိတွင် လူဝင်မှုကြီးကြပ်ရေးနှင့် အကောက်ခွန်ထိန်းသိမ်းရေးဌာန၏ ဌာနခွဲတစ်ခုဖြစ်သည့် ICE Air Operations မှ ကြီးကြပ်သော ပြည်နှင်ဒဏ်ပေးရေး လေယာဉ်ပျံသန်းမှု အများစုကို လေယာဉ်စင်းလုံးငှားရမ်းသည့် ကုမ္ပဏီများ က ပို့ဆောင်ပေးနေသည်။

ပညာရေးတွင် ရင်းနှီးမြှုပ်နှံမှုများသည် အနာဂတ်တိုင်းပြည်အတွက်ရင်းနှီးမြှုပ်နှံခြင်းဖြစ်

ပညာရေးတွင်ရင်းနှီးမြှုပ်နှံမှုများသည် အနာဂတ်တိုင်းပြည်အတွက်ရင်းနှီးမြှုပ်နှံခြင်းဖြစ်သည်ဟု နိုင်ငံတော်ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်မှ ယနေ့ ဒီဇင်ဘာ ၁၁ ရက်မွန်းလွဲပိုင်းက ရန်ကုန်တိုင်းအစိုးရအဖွဲ့ဝင်များ၊ တိုင်းဒေသကြီးနှင့် ခရိုင်အဆင့်ဌာနဆိုင်ရာ တာဝန်ရှိသူများအားတွေ့ဆုံ၍ ဒေသဖွံဖြိုးတိုးတက်ရေးဆိုင်ရာများကိုဆွေးနွေးပြောကြားစဥ် ထည့်သွင်းပြောကြားခဲ့ခြင်းဖြစ် သည်။
နိုင်ငံတော်အစိုးရအနေဖြင့် ပညာရည်မြှင့်တင်ရေးလုပ်ငန်းများကို အလေးထားအားပေးမြှင့်တင်ဆောင်ရွက်လျက်ရှိပြီး ပညာရေးတွင်ရင်းနှီးမြှုပ်နှံမှုများသည် အနာဂတ်တိုင်းပြည်အတွက် ရင်းနှီးမြှုပ်နှံခြင်းဖြစ်ကာ ၂၀၂၆ ခုနှစ်၊ ဖေဖော်ဝါရီလအတွင်း အခြေခံပညာအဆင့်အတန်းတင်စာမေးပွဲများဖြေဆိုတော့မည်ဖြစ်၍ ရာနှုန်းပြည့်ဖြေဆိုနိုင်ရေးနှင့် နောင်နှစ်တန်းစဉ်ကူး ပြောင်းမှုမြင့်မားရေးအတွက် လိုအပ်သည့်ကြိုတင်ပြင်ဆင်ခြင်းများကိုဆောင်ရွက်ရမည်ဟု မှာကြားသည်။
ထို့ပြင် ကောက်ယူရရှိသည့် ကိန်းဂဏန်းအချက်အ လက်များအရ မြန်မာနိုင်ငံတွင် ပညာရေးနှင့်ပတ်သက်၍ အားနည်းမှုများရှိနေသည်ကိုတွေ့မြင်နိုင်၍ မိမိတို့အစိုးရအနေဖြင့် ပညာရေးကဏ္ဍမြှင့်တင်ခြင်းလုပ်ငန်းများကို အလေးထားအားပေးဆောင်ရွက်လျက်ရှိသည်ဟု ပြောသည်။
ပညာရေးကဏ္ဍအားနည်းပါက ကျန်ရှိသည့် ကဏ္ဍများတွင်လည်းအားနည်းလာမည်ဖြစ်ကာ အနာဂတ်တွင်ခေတ်မီနိုင်ငံတော်တည်ဆောက်ရေးအတွက် အသိပညာ၊ အတတ်ပညာနှင့်ပြည့်စုံသည့် လူသားအရင်းအမြစ်ကောင်းများစွာကိုမွေးထုတ်ပေးနိုင်ရန်လိုသည်ဟု ပြောသည်။
ပညာရေးတွင် ကျောင်းနေရာခိုင်နှုန်းမြင့်မားရေးနှင့် တန်းစဉ်ကူးပြောင်းမှုမြင့်မားရေးကိုဆောင်ရွက်ရမည်ဖြစ်ပြီး အကြောင်းမျိုးမျိုးကြောင့် တန်းစဉ်ကူးပြောင်းမှုများ အားနည်းမှုများဖြစ်ပေါ်နေသည်ကိုတွေ့ရှိရ၍ ရန်ကုန်တိုင်းအနေဖြင့်လည်း တန်းစဉ်ကူးပြောင်းမှုများ ယခုထက်ပိုမိုမြင့်မားစေရေး ကြိုးပမ်းဆောင်ရွက်ရမည်ဟု နိုင်ငံတော် ယာယီသမ္မတမှ မှာကြားခဲ့သည်။

တ့ာခ်မင်နစ္စတန်နိုင်ငံ၏ အမြဲတမ်းကြားနေ မူဝါဒနှစ် (၃၀) ပြည့်အခမ်းနားကို မြန်မာပါဝင်တက်ရောက်

တာ့ခ်မင်နစ္စတန်နိုင်ငံ သမ္မတနှင့် တွေ့ဆုံပြီးနှစ်နိုင်ငံ ပူးပေါင်းဆောင်ရွက်မှုများ အရှိန်မြှင့်တင်ရေးကိစ္စရပ်များ ဆွေးနွေး
တာ့ခ်မင်နစ္စတန်နိုင်ငံ၏ အမြဲတမ်းကြားနေ မူဝါဒ နှစ် (၃၀) ပြည့် အထိမ်းမှတ်အခမ်းနားကို အက်ရှ်ဂါဘတ်မြို့၌ ယနေ့ ဒီဇင်ဘာ ၁၁ ရက်မနက်ပိုင်းတွင် ကျင်းပခဲ့ပြီး နိုင်ငံတော်ဝန်ကြီးချုပ်ဦးညိုစောက ပါဝင်တက်ရောက်ခဲ့ကြောင်း သိရသည်။
အဆိုပါ အခမ်းနားကို နိုင်ငံတကာမှ ခေါင်းဆောင်များ၊ ကုလသမဂ္ဂ နှင့် နိုင်ငံတကာအဖွဲ့အစည်း အသီးသီးမှ ကိုယ်စားလှယ်ခေါင်းဆောင်များလည်း တက်ရောက်ခဲ့ခြင်းလည်း ဖြစ်သည်။
အခမ်းနားတက်ရောက်သည့်အပြင် နိုင်ငံတော်ဝန်ကြီးချုပ် ဦးညိုစောသည် တာ့ခ်မင်နစ္စတန်နိုင်ငံ သမ္မတ H.E Mr. Serdar Berdimuhamedov နှင့်လည်း တွေ့ဆုံခဲ့ပြီး နှစ်နိုင်ငံချစ်ကြည်ရင်းနှီးမှုနှင့် သံတမန်ဆက်ဆံရေး ပိုမိုတိုးမြှင့်ဆောင်ရွက်ရေးဆိုင်ရာကိစ္စရပ်များကို ဆွေးနွေးခဲ့ကြောင်း သိရသ်။
ထို့ပြင် ကဏ္ဍပေါင်းစုံ၌ ပူးပေါင်းဆောင်ရွက်မှု မြှင့်တင်ရေးကိစ္စရပ်များ၊ နိုင်ငံတကာစာမျက်နှာတွင် အပြုသဘောဆောင်သော ပူးပေါင်းဆောင်ရွက်မှုများ ဆက်လက်အရှိန်မြှင့်တင်ဆောင်ရွက်သွားမည်အခြေအနေများကိုလည်း ဆွေးနွေးခဲ့ကြောင်း သိရသည်။

ချောင်းများ၊ မြောင်းများမှစွန့်ထုတ်ရေများပိတ်ဆို့မှုမရှိစေရေး ခေတ်မီနည်းပညာများအသုံးပြုကြည့်ရှုစစ်ဆေးရှင်းလင်းရမည်

ရန်ကုန်မြို့တွင်းရှိ ချောင်းများ၊ မြောင်းများမှစွန့်ထုတ်ရေများပိတ်ဆို့မှုမရှိစေရေး ခေတ်မီနည်းပညာများအ သုံးပြုကြည့်ရှုစစ်ဆေးရှင်းလင်းရမည်ဟု နိုင်ငံတော် ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်က မှာကြားသည်။
နိုင်ငံတော် ယာယီသမ္မတမှ ယနေ့ ဒီဇင်ဘာ ၁၁ ရက်က ရန်ကုန်မြို့အတွင်း သမိုင်းချောင်းအပါအဝင် ချောင်းများ၊ မြောင်းများရေစီးရေလာကောင်းမွန်ရေးအတွက်ကြည့်ရှုစစ်ဆေးစဥ် တာဝန်ရှိသူများအားမှာကြားခဲ့ခြင်းဖြစ်သည်။
မရမ်းကုန်းမြို့နယ်၊ မင်းဓမ္မလမ်းရှိ သမိုင်းချောင်း တံတားနေရာနှင့် ဘုရင့်နောင်လမ်းမကြီးရှိ သမိုင်းချောင်းတံတားနေရာတို့ကို နိုင်ငံတော်ယာယီသမ္မတမှကြည့်ရှုစစ်ဆေးရာ ရန်ကုန်မြို့တော်ဝန် ဦးဗိုလ်ဌေးနှင့် တာဝန်ရှိသူများက ရေစီးရေလာကောင်းမွန်စေရေးဆောင်ရွက်ထားရှိမှုတို့ကို ရှင်းလင်းတင်ပြခဲ့ကြသည်။
နိုင်ငံတော်ယာယီသမ္မတမှ ရန်ကုန်မြို့သန့်ရှင်းသာယာလှပရေးနှင့် ရေစီးရေလာကောင်းမွန်စေရေးအတွက်ချောင်းများ၊ ရေနုတ်မြောင်းများ စနစ်တကျဖြစ်ရန်လိုကာ အမှိုက်များအား သတ်မှတ်နေရာများ၌သာစွန့်ပစ်ရမည်ဖြစ်ပြီး မြောင်းများအတွင်းသို့ စွန့်ပစ်မှုမရှိစေရန်ပြည်သူများအား စည်းရုံးဆောင်ရွက်ရမည်ဖြစ်ပြီး ရေကောင်းမွန်စွာစီးဆင်းမှုမရှိသည့် ချောင်းများ၊ မြောင်းများအတွင်းမှ အနံ့အသက်ဆိုးများသည် ပြည်သူများ ၏ကျန်းမာရေးကိုထိခိုက်စေမည်ဖြစ်၍ ရေစီးရေလာကောင်းမွန်အောင် စနစ်တကျဆောင်ရွက်ရမည်ဟု မှာ ကြားခဲ့သည်။
ထို့ပြင် သမိုင်းချောင်းအပါအဝင် ရန်ကုန်မြို့အတွင်းစီးဆင်းလျက်ရှိသည့် ချောင်းများ၊ မြောင်းများမှစွန့်ထုတ်ရေများ ရေထွက်ပေါက်များမှတဆင့် သက်ဆိုင်ရာမြစ်များ၊ ချောင်းများအတွင်းစီးဆင်းရာတွင် ပိတ်ဆို့မှုမရှိစေရေးခေတ်မီနည်းပညာများအသုံးပြု၍ ချောင်း၊ မြောင်းများတစ်လျှောက်ကြည့်ရှုစစ်ဆေးပြီး ပိတ်ဆို့နေသည့်နေရာများအားရှင်းလင်းရမည်ဟု မှာကြားသည်။
ယခင်က ရန်ကုန်မြို့အတွင်း၌ မိုးရာသီကာလများတွင် ရေကြီးရေလျှံမှုများ မကြာခဏဖြစ်ပေါ်လျက်ရှိသော်လည်း ယခုနောက်ပိုင်းနှစ်များတွင် ရန်ကုန်မြို့အတွင်း စီးဆင်းလျက်ရှိသည့် ချောင်းများ၊ မြောင်းများအား ရေစီးရေလာကောင်းမွန်စေရေး ရန်ကုန်မြို့တော်စည်ပင်မှ စနစ်တကျစဉ်ဆက်မပြတ်ဆောင်ရွက်လျက်ရှိရာ ယခင်နှစ်များထက် ရေကြီးရေလျှံမှုများ များစွာလျော့နည်းလာသည်ကိုတွေ့မြင်ရသည်ဟု ပြောသည်။
မရမ်းကုန်းမြို့နယ်ရှိ သမိုင်းချောင်းအားပြုပြင်ထိန်း သိမ်းမှုများပြုလုပ်၍ ရေစီးရေလာများကောင်းမွန်အောင်ဆောင်ရွက်ပါက မိုးရာသီကာလများတွင် မရမ်းကုန်းမြို့နယ်အတွင်း ရေကြီးရေလျှံမှုကို များစွာလျှော့ချနိုင်မည့်အပြင် ချောင်းတစ်လျှောက်အနံ့အသက်ဆိုးများလျော့ပါးသွားမည်ဖြစ်၍ သမိုင်းချောင်းပြုပြင်ထိန်းသိမ်းခြင်းလုပ်ငန်းများကိုဆောင်ရွက်သွားမည်ဟု ပြောသည်။
ထို့အတူ မြို့နေပြည်သူများအနေဖြင့်လည်း ချောင်းများ၊ မြောင်းများတစ်လျှောက် ရေစီးရေလာ ကောင်းမွန်စေရန် စည်းကမ်းမဲ့အမှိုက် စွန့်ပစ်မှုများမရှိစေရေးအတွက် ကိုယ်စီအသိစိတ်ဖြင့်ဝိုင်းဝန်းပူးပေါင်းဆောင်ရွက်ပါက ယခုထက်ပိုမိုသာယာလှပသည့်မြို့ကို ဖော်ဆောင်နိုင်မည်ဟု နိုင်ငံတော် ယာယီသမ္မတက ပြောကြားခဲ့သည်။

သီရိမင်္ဂလာစျေးနှင့် ရွှေပိတောက်ငါးစျေးတို့ကို နိုင်ငံတော် ယာယီသမ္မတကြည့်ရှုစစ်ဆေး
စျေးများအတွင်း ရေစီးရေလာကောင်းမွန်ရေးကို အဓိကထားမှာကြား

နိုင်ငံတော် ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်သည် ယနေ့ ဒီဇင်ဘာ ၁၁ ရက်က ရန်ကုန်တိုင်း၊ လှိုင်မြို့နယ်ရှိ သီရိမင်္ဂလာဈေးနှင့် ရွှေပိတောက်ငါးဈေးသို့ ကြည့်ရှုစစ်ဆေးခဲ့ကြောင်း သိရသည်။
သီရိမင်္ဂလာဈေးအတွင်း ဈေးဆိုင်ခန်းများ၌ ဈေး ရောင်းချနေသူများ၊ ကုန်များလာရောက်ပို့ဆောင်ကြသည့်ကုန်သည်များအား နိုင်ငံတော်ယာယီသမ္မတမှ ရင်းရင်းနှီးနှီးနှုတ်ဆက်၍ ကုန်များရရှိမှု၊ ဈေးကွက်ရရှိမှု၊ နေ့စဉ်ဈေးရောင်းချရာတွင်ကြုံတွေ့ရမှုများနှင့် သိရှိလိုသည်များကို မေးမြန်းဆွေးနွေးခဲ့ကြောင်း သိရသည်။
ထို့နောက် နိုင်ငံတော် ယာယီသမ္မတမှ သီရိမင်္ဂလာဈေးအတွင်းသန့်ရှင်းသပ်ရပ်မှုရှိစေရေး၊ ရေဝင်ရေထွက်မြောင်းများစနစ်တကျဖြစ်စေရေး အပိုင်းလိုက်သတ်မှတ်၍ ရေဆေးခြင်းများ၊ သန့်ရှင်းရေးဆောင်ရွက်ခြင်းများကို စနစ်တကျကြပ်မတ်ဆောင်ရွက်ရန်၊ ပျက်စီးနေသည့် အမိုးများကိုပြန်လည်ပြုပြင်ရန်၊ လေဝင်လေထွက်စနစ်များကောင်းမွန်စေရေးဆောင်ရွက်ရန်၊ လှိုင်မြစ်ကမ်းနံဘေး၌ ကုန်စိမ်းများလာရောက်ပို့ဆောင်ရာ တွင် စွန့်ပစ်အမှိုက်များအား မြစ်အတွင်းသို့ စွန့်ပစ်ခြင်းများမရှိစေရေးနှင့် စနစ်တကျဖြစ်စေရေးဆောင်ရွက်ရန်တို့ကိုမှာကြားခဲ့ကြောင်း သိရသည်။
ထို့ပြင် နိုင်ငံတော် ယာယီသမ္မတသည် ရွှေပိတောက်ငါးဈေးသို့သွားရောက်၍ ဈေးဆိုင်ခန်းများအလိုက် ဈေးရောင်းချနေသူများအား ရင်းရင်းနှီးနှီးနှုတ်ဆက်၍ ဈေးရောင်းချရမှုအားမေးမြန်းပြီးအားပေးစကားပြောကြားပြီးနောက် လှိုင်မြစ်နံဘေးရှိ ရွှေပိတောက်ငါးဈေးဆိပ်ခံဗောတံတား၌ ခရီးသည်များနှင့် ငါးကုန်သည်များ၏ သင်္ဘောများ၊ လှေများဆိုက်ကပ်မှု၊ အသုံးပြုမှုတို့ကို ကြည့်ရှုစစ်ဆေးခဲ့ကြောင်း သိရသည်။
ထို့နောက် နိုင်ငံတော်ယာယီသမ္မတမှ တာဝန်ရှိသူများအား ရွှေပိတောက်ငါးဈေးအတွင်း ရေစီးရေလာကောင်းမွန်စေရေး၊ အမှိုက်စွန့်ပစ်မှုများစနစ်တကျဖြစ်စေရေး၊ ပျက်စီးယိုယွင်းနေမှုများအား အမြန်ဆုံးပြန်လည်ပြင်ဆင်ပေးရေးတို့ကိုမှာကြားခဲ့ကြောင်း သိရသည်။

ဗဟိုကာကွယ်ဆေးသိုလှောင်အအေးခန်း (ရန်ကုန်) ကို နိုင်ငံတော် ယာယီသမ္မတကြည့်ရှုစစ်ဆေး
ဆိုလာစနစ်ဖြင့်လျှပ်စစ်မီးရရှိအောင်ဆောင်ရွက်ရန်မှာကြား

ရန်ကုန်တိုင်း၊ မရမ်းကုန်းမြို့နယ်၊ မင်းဓမ္မလမ်းရှိကျန်းမာရေးဝန်ကြီးဌာန၊ ပြည်သူ့ကျန်းမာရေးဦးစီးဌာန၏ ဗဟိုကာကွယ်ဆေးသိုလှောင်အအေးခန်း (ရန်ကုန်) တွင် ကာကွယ်ဆေးသိုလှောင်ဖြန့်ဖြူးနိုင်မှုကို နိုင်ငံတော် ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်မှ ယနေ့ ဒီဇင်ဘာ ၁၁ ရက်ကကြည့်ရှုစစ်ဆေးခဲ့သည်။
နိုင်ငံတော် ယာယီသမ္မတအား ဗဟိုကာကွယ်ဆေးသို လှောင်အအေးခန်း (ရန်ကုန်) ရှိ အပူချိန် အပေါင်း (၂) ဒီဂရီစင်တီဂရိတ်မှ အပေါင်း (၈) ဒီဂရီစင်တီဂရိတ်အတွင်းထားရှိနိုင်သော အအေးခန်းများနှင့် အပူချိန်အနုတ် (၁၅) ဒီဂရီစင်တီဂရိတ်မှ အနုတ် (၂၅) ဒီဂရီစင်တီဂရိတ် ထားရှိနိုင်သော အအေးခန်းများအတွင်း ကာကွယ်ဆေးများအား အမျိုးအစားအလိုက်သိုလှောင်ထားရှိမှု၊ ဆေးထိုးအပ်များသိုလှောင်ထားရှိမှုတို့ကို ကျန်းမာရေးဝန်ကြီးဌာန၊ ပြည်ထောင်စုဝန်ကြီး ဒေါက်တာသက်ခိုင်ဝင်းနှင့် တာဝန်ရှိသူများက ရှင်းလင်းတင်ပြခဲ့ကြသည်။
ထို့နောက် နိုင်ငံတော် ယာယီသမ္မတမှ ဆေးဝါးများသိုလှောင်ရာတွင် လျှပ်စစ်မီးလိုအပ်ချက်ပြတ်တောက်မှုမရှိစေရေးနှင့် ဆိုလာစနစ်ဖြင့်လျှပ်စစ်မီးရရှိအောင်ဆောင်ရွက်ရန်၊ သိုလှောင်ခန်းများအတွင်းအခန်းတွင်း အပူချိန်ထိန်းညှိမှုစနစ်တကျဖြစ်စေရန်တို့မှာကြားခဲ့သည်။

ရွှေတံဆိပ်ဆုရ မြန်မာ့လက်ရွေးစင်ခြင်းလုံးအသင်းအား ကမ္ဘောဇဘဏ် နာယက ဦးအောင်ကိုဝင်းက ဘတ်ခြောက်သိန်း ချီးမြှင့်ပေးအပ်

အမိနိုင်ငံအတွက် ရွှေတံဆိပ်ဆုရယူပေးခဲ့သည့် မြန်မာ့လက်ရွေးစင် အမျိုးသား/အမျိုးသမီးခြင်းလုံးအသင်းအား ထိုင်းနိုင်ငံဆိုင်ရာ မြန်မာသံအမတ်ကြီး ဦးဇော်ဇော်စိုးက ယနေ့ ဒီဇင်ဘာ ၁၁ ရက် နံနက် ၁၀ နာရီ အချိန်၌ ဘတ်ခြောက်သိန်း ချီးမြှင့်ပေးအပ်ခဲ့ကြောင်း သိရသည်။
အဆိုပါချီးမြှင့်ငွေကို ကမ္ဘောဇဘဏ် နာယက ဦးအောင်ကိုဝင်းက ပေးအပ်ခြင်းဖြစ်ပြီး ၊ ထိုင်းနိုင်ငံဆိုင်ရာ မြန်မာသံအမတ်ကြီး ဦးဇော်ဇော်စိုးက တဆင့်လွှဲပြောင်းပေးအပ်ခဲ့ခြင်းဖြစ်သည်။
(၃၃) ကြိမ်မြောက် အရှေ့တောင်အာရှ အားကစားပြိုင်ပွဲ၊ ရိုးရာခြင်းလုံး အမျိုးသားပြိုင်ပွဲ အသင်းလိုက်အုပ်စုပတ်လည်ပွဲစဉ် Linking (Event 3) ပြိုင်ပွဲ၌ ရွှေတံဆိပ်ဆုရရှိခဲ့သော မြန်မာအမျိုးသားခြင်းလုံးအသင်းအတွက် ဆုချီးမြှင့်ငွေ ထိုင်းဘတ် ၃၀၀,၀၀၀ သိန်းချီးမြှင့်ခဲ့ခြင်းဖြစ်သည်။
အလားတူ အမျိုးသမီးပြိုင်ပွဲအသင်းလိုက်အုပ်စုပတ်လည်ပွဲစဉ် Linking (Event 3) ပြိုင်ပွဲ၌ ရွှေတံဆိပ်ဆုရရှိခဲ့သော မြန်မာအမျိုးသမီးခြင်းလုံးအသင်းကိုလည်း ဆုချီးမြှင့်ငွေ ထိုင်းဘတ် ၃၀၀,၀၀၀ သိန်း ချီးမြှင့်ပေးအပ်ခဲ့သည်။
အဆိုပါ ဆုချီးမြှင့်ငွေအား ထိုင်းနိုင်ငံဆိုင်ရာ မြန်မာသံအမတ်ကြီး ဦးဇော်ဇော်စိုးက မြန်မာနိုင်ငံပိုက်ကျော်ခြင်းအဖွဲ့ချုပ်ကိုယ်စား မန်နေဂျာဖြစ်သူ ဦးထွဋ်ခိုင်နွယ်သို့ ပေးအပ်ခဲ့ကြောင်း သိရသည်။

ဗီဇာကင်းလွတ်ခွင့်ရခရီးသွားများ ဆိုရှယ်မီဒီယာမှတ်တမ်းဖော်ပြရမည်

ဗီဇာကင်းလွတ်ခွင့်ရသော နိုင်ငံခြားခရီးသွားများအနေဖြင့် နိုင်ငံအတွင်းသို့ မဝင်ရောက်မီတွင် အနည်းဆုံးလွန်ခဲ့သော ငါးနှစ်ခန့်မှ ၎င်းတို့၏ ဆိုရှယ်မီဒီယာမှတ်တမ်းရာဇဝင်များကို ဖော်ပြပေးရမည့် အမိန့်ကိုထုတ်ပြန်ရန် အမေရိကန်သမ္မတ ဒေါ်နယ်ထရမ့်ပ်အစိုးရအဖွဲ့က စီစဉ်နေသည်ဟု အစိုးရ နို့တစ်တစ်ခုအရ သိရသည်။
အင်္ဂါနေ့က ထုတ်ပြန်ခဲ့သော ပြည်ထောင်စုမှတ်ပုံတင်တွင် ဖော်ပြထားသည့် အဆိုပြုချက်သည် အမေရိကန်ပြည်ထောင်စုအတွင်းသို့ ဗီဇာမလိုဘဲ ဝင်ရောက်နိုင်သော ဗြိတိန်၊ ပြင်သစ်၊ သြစတြေးလျနှင့် ဂျပန်နိုင်ငံများအပါအဝင် နိုင်ငံပေါင်း ၄၂ နိုင်ငံမှ ခရီးသွားများနှင့် အကျူံးဝင်မည်ဖြစ်သည်။
လက်ရှိတွင် အဆိုပါခရီးသွားများအနေဖြင့် Electronic System for Travel Authorization (ESTA) ဟုသိကြသော ကင်းလွတ်ခွင့်အတွက် လျှောက်ထားရန် ကိုယ်ရေးအချက်အလက်များ ကိုပေးအပ်ရန် လိုနေသေးသည်။
ယခုအဆိုပြုထားသော စည်းမျဉ်းသစ်များအရ ဆိုရှယ်မီဒီယာဒေတာများကိုပေးအပ်ခြင်းသည် ESTA လျှောက်ထားသူများက မဖြစ်မနေဆောင်ရွက်ရမည့် ကိစ္စတစ်ရပ်ဖြစ်လာသည်။
လျှောက်ထားသူများသည် အနည်းဆုံးလွန်ခဲ့သောငါးနှစ်ခန့်က ၎င်းတို့၏ ဆိုရှယ်မီဒီယာမှတ်တမ်းရာဇဝင်များကို ပေးအပ်ရန်လိုအပ်မည်ဖြစ်သည်။
၎င်းတို့အနေဖြင့် လွန်ခဲ့သောငါးနှစ်ခန့်က ဖုန်းနံပါတ်များ၊ လွန်ခဲ့သော ဆယ်စုနှစ်မှ အီးမေးလ်လိပ်စာများ၊ မိသားစုဝင်များ၏ ကိုယ်ရေးအချက်အလက်များနှင့် ဘိုင်အိုမက်ထရစ် သတင်းအချက်အလက်များ အပါအဝင် အခြားအရေးကြီးဒေတာမှတ်တမ်းများကိုလည်း တင်ပြရမည်ဖြစ်သည်။
လူထုသည် ထိုအဆိုပြုချက်ကို တုန့်ပြန်ရန် ရက်ပေါင်း ၆၀ အချိန်ရမည်ဖြစ်သည်။
ထရမ့်ပ်အစိုးရသည် ရွှေ့ပြောင်းနေထိုင်သူများကို နှိမ်နင်းမှု၏ တစ်စိတ်တစ်ပိုင်းအနေဖြင့် အမေရိကသို့ ပြည်ဝင်ခွင့်များကို ပိုမိုတင်းကြပ်စွာ ထိန်းချုပ်လျက်ရှိသည်။