၂၀၂၆ ခုနှစ် တက္ကသိုလ်ဝင်စာမေးပွဲအား စလင်းမြို့ နယ်မှ ကျောင်းသား၊ ကျောင်းသူ(၁,၀၀၅)ဦးဝင်ရောက်ဖြေဆိုမည်

၂၀၂၆ ခုနှစ် တက္ကသိုလ်ဝင်စာမေးပွဲအား လာမည့် မတ် ၁၁ ရက်မှစတင်၍ကျင်းပမည်ဖြစ်ရာ မကွေးတိုင်း၊ စလင်းမြို့နယ်မှ ကျောင်းသား၊ ကျောင်းသူ(၁၀၀၅)ဦး ဝင်ရောက်ဖြေဆိုမည်ဖြစ်ကြောင်း စလင်းမြို့နယ်ပညာရေးမှူးရုံးထံမှ သိရသည်။

စလင်းမြို့နယ်တွင် အခြေခံပညာအထက်တန်းကျောင်း အသီးသီးမှဝင်ရောက်ဖြေဆိုမည့်ကျောင်းသား(၂၉၁) ဦး၊ ကျောင်းသူ(၄၁၆)ဦး၊ ကိုယ်ပိုင်အထက်တန်း ကျောင်းများမှဝင်ရောက်ဖြေဆိုမည့် ကျောင်းသား (၁၂၆)ဦး၊ ကျောင်းသူ(၁၇၂)ဦးရှိကြောင်း သိရသည်။

ထို့ကြောင့် တက္ကသိုလ်ဝင်စာမေးပွဲဖြေဆိုရန် အ.ထ.က (စလင်း)စာစစ်ဌာန၊ အ.ထ.က(ဆင်ဖြူကျွန်း)စာစစ်ဌာန၊ အ.ထ.က(တပ်တွင်း)စာစစ်ဌာနတို့ကိုဖွင့်လှစ်သွားမည်ဖြစ်ကာ ဝင်ရောက်ဖြေဆိုမည့် ကျောင်းသား၊ကျောင်းသူများအတွက် တက္ကသိုလ်ဝင်စာမေးပွဲဖြေဆိုခွင့်ကတ်ပြားများကိုလည်း ဖေဖော်ဝါရီ ၂၃ ရက်မှစတင်ကာ သက်ဆိုင်ရာစာစစ်ဌာနများ၌ထုတ်ပေးလျက်ရှိကြောင်း သိရသည်။

ဗိုလ်ကလေးစျေးလမ်းထိပ်တွင် ပေ(၄၀)ရှိ ကွန်တိန်နာ (၃)စီးဆင့်တိုက် ကားမောင်းသူ(၁)ဦးခေါင်းခန်းအတွင်းညပ်ပြီးဒဏ်ရာရခဲ့

ရန်ကုန်တိုင်း၊ ဗိုလ်တထောင်မြို့နယ်၊ ဗိုလ်ကလေးစျေးလမ်းထိပ်တွင် မတ် ၅ ရက်ည ၈ နာရီခွဲခန့်က ပေ(၄၀)ရှိ ကွန်တိန်နာ(၃)စီးဆင့်တိုက်မှုဖြစ်ပွားခဲ့ကြောင်း ကျောက်တံတားအရန်မီးသတ်တပ်ဖွဲ့ထံမှ သိရသည်။

ဗိုလ်တထောင်မြို့နယ်၊ ဗိုလ်ကလေးစျေးလမ်းထိပ်၊ ကမ်းနားကျောက်လမ်းမကြီးပေါ်တွင် ပေ(၄၀)ရှိ ကွန်တိန်နာ(၃)စီးဆင့်တိုက်မိရာမှ ကားမောင်းသူ(၁)ဦးမှာ ကားခေါင်းခန်းအတွင်းညပ်နေသဖြင့် ကျောက်တံတားအရန်မီးသတ်စခန်းမှ တပ်ဖွဲ့ဝင်များက သက်ဆိုင်ရာအဖွဲ့များနှင့်ပူးပေါင်း၍ ကူညီကယ်ဆယ်မှုများပြုလုပ်ပေးခဲ့ကြကြောင်း သိရသည်။

ထို့ကြောင့် ကားခေါင်းခန်းအတွင်းညပ်နေသည့် ကားမောင်းသူအား ကယ်ထုတ်နိုင်ခဲ့ကာ ကားမောင်းသူ၌ ထိခိုက်ဒဏ်ရာ(မစိုးရမ်ရ)ရရှိခဲ့ပြီး ကွန်တိန်နာများတွင်လည်း ပျက်စီးမှုများဖြစ်ပေါ်ခဲ့ကြောင်း သိရသည်။

Photo-ကျောက်တံတားအရန်မီးသတ်

ယူကရိန်းထုတ် ဒရုန်းပစ်ဒုံးကျည်များကို ဝယ်ယူရန် ပင်တဂွန်နှင့် ပင်လယ်ကွေ့နိုင်ငံများ ဆွေးနွေးနေ

အီရန်ထုတ် ဒရုန်းများ၏ တိုက်ခိုက်မှုကို တုံ့ပြန်ရန်အတွက် ယူကရိန်းနိုင်ငံထုတ် ဒရုန်းပစ်ဒုံးကျည်(Interceptor) များကို ဝယ်ယူရန် ပင်တဂွန်စစ်ဌာနချုပ်နှင့် အနည်းဆုံး ပင်လယ်ကွေ့အစိုးရတစ်ရပ်တို့ ဆွေးနွေးလျက်ရှိကြောင်း Financial Times(FT) သတင်းစာက ယူကရိန်းစစ်ဘက်ဆိုင်ရာ အသိုင်းအဝိုင်းကို ကိုးကား၍ ဖော်ပြခဲ့သည်။

သတင်းစာ၏ ဖော်ပြချက်အရ ပင်လယ်ကွေ့နိုင်ငံများသည် အီရန်ဒရုန်းများကို ပစ်ချရာတွင် အလွန်စျေးကြီးသော Patriot ဒုံးကျည်များကို အသုံးပြုနေရပြီး လက်ရှိတွင် ထိုဒုံးကျည်လက်ကျန်များ လျော့နည်းလာနေသည်ဟု ဆိုသည်။ ယူကရိန်းထုတ် Interceptor တစ်စင်း၏ ကုန်ကျစရိတ်မှာ ဒေါ်လာအနည်းငယ်မျှသာ ရှိသော်လည်း Patriot ဒုံးကျည်တစ်စင်း၏ တန်ဖိုးမှာ ဒေါ်လာ ၁၃.၅ သန်း ကျော်အထိ ရှိနေပါသည်။

ယူကရိန်း ကာကွယ်ရေးသတင်းရင်းမြစ်တစ်ခု၏ အဆိုအရ ထိုသို့သော အရောင်းအဝယ်ပြုလုပ်ရန်အတွက် ယူကရိန်း အစိုးရ၏ ခွင့်ပြုချက် လိုအပ်မည်ဖြစ်ကြောင်း သိရသည်။ ယူကရိန်းစနစ်များကို ပြည်ပတွင် ထုတ်လုပ်ထားသည့်တိုင် မည်သည့်ရောင်းချမှုမျိုးကိုမဆို အစိုးရနှင့် ညှိနှိုင်းဆောင်ရွက်ရမည်ဖြစ်ကြောင်း ၎င်းက ပြောကြားခဲ့သည်။

ယခင်ကလည်း ယူကရိန်းသမ္မတ ဗိုလိုဒီမာ ဇလန်းစကီးက အရှေ့အလယ်ပိုင်းရှိ စစ်ရေးအခြေအနေများကြောင့် ယူကရိန်းသို့ မဟာမိတ်များ ထောက်ပံ့နေသည့် လက်နက်များ၊ အထူးသဖြင့် Patriot လေကြောင်းကာကွယ်ရေး ဒုံးကျည်များ လျော့နည်းသွားနိုင်သည့်အပေါ် စိုးရိမ်ကြောင်း ထုတ်ဖော်ပြောကြားခဲ့ဖူးသည်။

ယခု စစ်ပွဲကြောင့် အစ္စရေးစီးပွားရေး ထိခိုက်မှုမှာ တစ်ပတ်လျှင် ဒေါ်လာ ၃ ဘီလီယံခန့် ရှိလာမည်

အီရန်နှင့် ဖြစ်ပွားနေသော လေကြောင်းစစ်ပွဲကြောင့် အစ္စရေး၏ စီးပွားရေး ထိခိုက်ဆုံးရှုံးမှုသည် တစ်ပတ်လျှင် ရှီကယ်(Shekels) ၉ ဘီလီယံကျော် (အမေရိကန်ဒေါ်လာ ၂.၉၃ ဘီလီယံ) အထိ ရှိလာနိုင်ကြောင်း အစ္စရေးဘဏ္ဍာရေးဝန်ကြီးဌာနက ဗုဒ္ဓဟူးနေ့တွင် ပြောကြားခဲ့သည်။

အလုပ်သွားလာခွင့် ကန့်သတ်ခြင်း၊ စာသင်ကျောင်းများ ပိတ်ထားခြင်းနှင့် အရန်တပ်ဖွဲ့ဝင်များကို ဆင့်ခေါ်ခြင်း စသည့် အစ္စရေးပြည်တွင်း လုံခြုံရေးတပ်ဖွဲ့ ၏ လက်ရှိ "အနီရောင်" အဆင့် ကန့်သတ်ချက်များအောက်တွင် စီးပွားရေး ဆုံးရှုံးမှုမှာ တစ်ပတ်လျှင် ၉.၄ ဘီလီယံ ရှီကယ် ရှိမည်ဟု ခန့်မှန်းထားပြီး၊ အဆိုပါ ဆုံးရှုံးမှုအများစုမှာ လာမည့်အပတ်မှစ၍ ဖြစ်ပေါ်လာမည်ဟု ဆိုသည်။

ဝန်ကြီးဌာနကမူ အလုပ်ခွင်များအတွက် "အနီရောင်" ထက် ကန့်သတ်ချက် ပိုမိုနည်းပါးသည့် "လိမ္မော်ရောင်" - သို့မဟုတ် လှုပ်ရှားမှုအကန့်အသတ်ရှိသော အဆင့်သို့ ပြောင်းလဲရန် ပြည်တွင်းလုံခြုံရေးတပ်ဖွဲ့ကို တောင်းဆိုထားသည်။ ဤအခြေအနေမျိုးတွင်မူ စီးပွားရေးဆုံးရှုံးမှုမှာ တစ်ပတ်လျှင် ၄.၃ ဘီလီယံ ရှီကယ်သာ ရှိမည်ဖြစ်သည်။

အစ္စရေးနှင့် အမေရိကန်တို့သည် စနေနေ့တွင် အီရန်နိုင်ငံကို စတင်ဗုံးကြဲတိုက်ခိုက်ခဲ့ရာ၊ ယင်းက အစ္စရေးနှင့် အရှေ့အလယ်ပိုင်းတစ်လွှားတွင် လက်တုံ့ပြန်တိုက်ခိုက်မှုများကို ဖြစ်ပေါ်စေခဲ့ပြီး ပင်လယ်ကွေ့ဒေသမှ စွမ်းအင်တင်ပို့မှုများကိုပါ အနှောင့်အယှက်ဖြစ်စေခဲ့သည်။

အဆိုပါ စစ်ဆင်ရေးမှာ ရက်သတ္တပတ်ပေါင်းများစွာ ကြာမြင့်နိုင်ကြောင်း အမေရိကန်နှင့် အစ္စရေးအရာရှိများက ပြောကြားခဲ့သည်။

ယခုသတ္တပတ်အတွင်း အစ္စရေးရှိ စာသင်ကျောင်းများကို ပိတ်ထားသည်။ လူစုလူဝေးပြုလုပ်ခြင်းကို တားမြစ်ထားပြီး၊ အရေးကြီး ဝန်ဆောင်မှုလုပ်ငန်းများမှလွဲ၍ အလုပ်ခွင် လှုပ်ရှားမှုများကို ပိတ်ပင်ထားကာ ဝန်ထမ်းအများစုမှာ အိမ်မှနေ၍ အလုပ်လုပ်ကိုင်နေကြရသည်။

ဟားမတ်စ်နှင့်ဖြစ်ပွားသော ဂါဇာစစ်ပွဲကြောင့် အတန်ငယ် ထိခိုက်မှုရှိခဲ့သော်လည်း အစ္စရေး၏ စီးပွားရေးသည် ၂၀၂၅ ခုနှစ်တွင် ၃.၁ ရာခိုင်နှုန်း တိုးတက်ခဲ့သည်။ အောက်တိုဘာလ အပစ်အခတ်ရပ်စဲရေးအပြီးတွင် ၂၀၂၆ ခုနှစ်အတွက် စီးပွားရေးတိုးတက်မှုနှုန်းကို ၅ ရာခိုင်နှုန်းကျော်အထိ ရှိမည်ဟု ခန့်မှန်းထားခဲ့ခြင်း ဖြစ်သည်။

(၁ဒေါ်လာ = ၃.၀၇၃၃ ရှီကယ်)

ဘင်ဂူရီယန်လေဆိပ်ကို ၁ တန် ထိပ်ဖူးတပ် ဒုံးကျည်များဖြင့် ပစ်ခတ်ခဲ့‌ကြောင်း အီရန်ဆို

အီရန်အစ္စလာမ်မစ် တော်လှန်ရေးအစောင့်တပ်ဖွဲ့ (IRGC) က ယနေ့နံနက်ပိုင်းတွင် အစ္စ‌ရေး ဘင်ဂူရီယန်လေဆိပ် သို့ ပေါက်ကွဲစေတတ်သော ပစ္စည်း ၁ တန်ခန့်ပါရှိသည့် ထိပ်ဖူးတပ် ဘော်လစ်စတစ်ဒုံးကျည်များဖြင့် ပစ်ခတ်ခဲ့ကြောင်း ပြောကြားခဲ့သည်။

IRGC ၏ ထုတ်ပြန်ချက်အရ အရုဏ်တက်ချိန်တွင် Khorramshahr-4 အမျိုးအစား ဒုံးကျည်များကို "တယ်လ်အဗစ် (Tel Aviv) မြို့လယ်၊ ဘင်ဂူရီယန်လေဆိပ်နှင့် အဆိုပါလေဆိပ်ရှိ အစ္စရေးလေတပ်၏ ၂၇ ခုမြောက် လေယာဉ်အုပ် အခြေစိုက်စခန်း (27th Squadron base)" တို့ကို ဦးတည်ပစ်ခတ်ခဲ့ခြင်းဖြစ်သည်ဟု ဆိုသည်။

သို့ရာတွင် အစ္စရေးလေတပ်၌ ၂၇ ခုမြောက် လေယာဉ်အုပ်(27th Squadron) ဟူ၍ မရှိဘဲ၊ ထိုပြောဆိုချက်မှာ ၂၀၁၀ ပြည့်နှစ်ကတည်းက လုံးဝပိတ်သိမ်းခဲ့သည့် ဘင်ဂူရီယန်လေဆိပ်၏ အစိတ်အပိုင်းတစ်ခုဖြစ်ခဲ့ဖူးသော လော့ဒ်လေတပ်စခန်း(Lod Airbase) သို့မဟုတ် အခြေစိုက်စခန်း ၂၇ (Airbase 27) ကို ရည်ညွှန်းနေခြင်းဖြစ်နိုင်ခြေရှိသည်။

အစ္စရေးကာကွယ်ရေးတပ်ဖွဲ့ (IDF) ၏ အဆိုအရ ညအကူးတွင် အစ္စရေးသို့ အီရန်က ပစ်ခတ်ခဲ့သော ဘော်လစ်စတစ်ဒုံးကျည်အားလုံးကို လေကြောင်းကာကွယ်ရေးစနစ်ဖြင့် ကြားဖြတ်ဟန့်တားနိုင်ခဲ့ကြောင်း သိရသည်။ နံနက်ပိုင်းတွင် ပစ်ခတ်ခဲ့သော ဒုံးကျည်တစ်စင်းမှာမူ မြို့လယ်ရှိ လူသူမရှိသော ကွင်းပြင်တစ်ခုအတွင်းသို့ ကျရောက်ခဲ့သည်။

အမြန်လမ်းရှိ ဆွာချောင်းတံတားကျိုးသည်ဆိုခြင်းမှာ သတင်းမှားသာဖြစ်

ယာဥ်ကြီး/ယာဥ်ငယ်များကို လုံခြုံစိတ်ချစွာဖြတ်သန်းသွားလာခွင့်ပြုထား

လူမှုကွန်ယက်များ​၌ပျံ့နှံ့နေသည့် ရန်ကုန်-မန္တလေးအမြန်လမ်းမကြီးပေါ်ရှိ ဆွာ​ချောင်းတံတားကျိုးသည်ဆိုခြင်းမှာ သတင်းမှားသာဖြစ်ပြီး ယာဥ်ကြီး/ယာဥ်ငယ်များကို လုံခြုံစိတ်ချစွာဖြတ်သန်းသွားလာခွင့်ပြုထားပြီးဖြစ်သည်ဟု အမြန်လမ်းမကြီးထိန်းသိမ်းပြု ပြင်ရေးနှင့်ကြီးကြပ်ရေးအဖွဲ့ထံမှ သိရသည်။

အမြန်လမ်းမကြီး၏ မိုင်တိုင်အမှန် ၁၆၅/၁ နှင့် ၁၆၅/၃ ကြားရှိ ဆွာချောင်းတံတား၏ ကြံ့ခိုင်မှုအားနည်းသွား​သောကြမ်းခင်းပြား(၂)ချပ်နှင့် အလယ်ယက်မ(၁) ချောင်းအား မတ် ၄ ရက်နေ့လည် ၃ နာရီခန့်မှစတင်ကာ (၁၃)မိနစ်ကြာလဲလှယ်တပ်ဆင်ခဲ့ကြောင်း သိရသည်။

ထိုသို့ လဲလှယ်တပ်ဆင်နေချိန်၌ ခရီးသည်တင်ယာဉ်နှင့် ကုန်တင်ယာဉ်ကြီးများအား ဖြတ်သန်းခွင့်ယာယီပိတ်ခဲ့ပြီး မော်တော်ယာဉ်ငယ်များကိုမူ ဆက်လက်ဖြတ် သန်းမောင်းနှင်ခွင့်ပြုခဲ့ပြီးနောက် လဲလှယ်တပ်ဆင်မှုပြီးချိန်မှစ၍ ယာဉ်ကြီး/ယာဉ်ငယ်များအားလုံးကို လုံခြုံစိတ်ချစွာဖြတ်သန်းသွားလာခွင့်ပြုခဲ့ကြောင်း သိရသည်။

ဆွာချောင်းတံတားသည် ယာဥ်+ကုန် စုစု​ပေါင်း အ​လေးချိန်(၂၃)တန်အထိ ဖြတ်သန်းခွင့်ပြုထားသည့် တံတားတစ်စင်းဖြစ်ကြောင်း သိရသည်။

လျှောက်ထားမှု(၂)သောင်းခန့်ရှိသည့် ကြော်ငြာဆိုင်း ဘုတ်အတွက် မဲနှိုက်ရွေးချယ်

ရန်ကုန်မြို့တော်စည်ပင်၏ ရန်ကုန်တိုင်းအတွင်း ကြော် ငြာဆိုင်းဘုတ်များအတွက် လုပ်ကိုင်ခွင့်ရရှိရန် ၂၀၂၆ -၂၀၂၇ ခုနှစ်အတွက် လျှောက်ထားမှု(၂)သောင်းခန့်ရှိကြောင်း သိရသည်။

အဆိုပါ ၄၅ ပေ × ၁၅ ပေ ကြော်ငြာဆိုင်းဘုတ်များအတွက် လျှောက်ထားမှုများအား မဲနှိုက်ရွေးချယ်မှုပြုလုပ်ခဲ့ပြီး မဲပေါက်အဌားရရှိသူများစာရင်းကိုလည်း ဘုတ်များတွင်ကပ်၍ အသိပေးကြေညာခဲ့ကြောင်း သိရသည်။

ကိုဗစ်ကာလမှစကာ ​ကြော်ငြာဆိုင်းဘုတ်များတွင် ​ကြော်ငြာခြင်းများ ကျဆင်းခဲ့ပြီး ယခု နှစ်ပိုင်း၌ မြို့ထဲ အဝိုင်းပတ်​နေရာများတွင် ​ကြော်ငြာဆိုင်းဘုတ်များ ပြန်လည်များပြားလာသည်ကို​တွေ့ရသည်။

လွှတ်တော်အစည်းအဝေးများကျင်းပနိုင်ရေးအတွက် နိုင်ငံတော်ဝန်ကြီးချုပ်ဦးညိုစော ဦးဆောင်စည်းဝေး

လွှတ်တော်အစည်းအဝေးများ မကြာမှီကျင်းပမည်ဖြစ်၍ လွှတ်တော်ဝင်းလုံခြုံရေးကို ဦးစားပေးဆောင်ရွက်ရန်မှာကြား

တတိယအကြိမ် လွှတ်တော်အစည်းအဝေးများကို မကြာမှီကျင်းပမည်ဖြစ်၍ လွှတ်တော်ဝင်းလုံခြုံရေးအားဦးစားပေးဆောင်ရွက်ရမည်ဟု လွှတ်တော်အစည်းဝေးများကျင်းပရေးဗဟိုကော်မတီ ဥက္ကဋ္ဌ၊ နိုင်ငံတော်ဝန် ကြီးချုပ် ဦးညိုစောက ပြောသည်။

ယနေ့ မတ် ၅ ရက်ကကျင်းပသည့် လွှတ်တော်အစည်းဝေးများကျင်းပရေးဗဟိုကော်မတီ၏ လွှတ်တော်အစည်းအဝေးများကျင်းပနိုင်ရေးအတွက် ဒုတိယအကြိမ် လုပ်ငန်းညိနှိုင်းအစည်းဝေးတွင် ပြောကြားခဲ့ခြင်းဖြစ်သည်။

တတိယအကြိမ် လွှတ်တော်အသီးသီး၏ ပထမပုံမှန်အစည်းဝေးများကျင်းပရန် လွှတ်တော်အလိုက် ရက် သတ်မှတ်ခေါ်ယူပြီးဖြစ်ကာ လွှတ်တော်ကိုယ်စားလှယ်များကိုလည်း သက်ဆိုင်ရာလွှတ်တော်များသို့ရောက်ရှိ သတင်းပို့ရမည်ရက်ကို အသိပေးထုတ်ပြန်ခဲ့ပြီးဖြစ်သည်ဟု ပြောသည်။

ထို့ကြောင့် တတိယအကြိမ်လွှတ်တော်အသီးသီး၏ ပထမပုံမှန်အစည်းဝေးတွင်ဆောင်ရွက်ရမည့်လုပ်ငန်းစဥ်များ အဆင်ပြေချောမွေ့စေရန် လွှတ်တော်ရုံးအသီးသီးနှင့် သက်ဆိုင်ရာလုပ်ငန်းကော်မတီများက ပူးပေါင်းဆောင်ရွက်ရမည်ဟု ပြောသည်။

ထို့ပြင် လွှတ်တော်အဆောက်ဦးပြင်ဆင်နေခြင်းအား ရာနှုန်းပြည့်ပြီးစီးအောင်ဆောင်ရွက်ရန်၊ တိုင်း(သို့)ပြည်နယ်လွှတ်တော်များ၏ ပထမပုံမှန်အစည်းဝေးများ အောင်မြင်စွာကျင်းပနိုင်ရေးအတွက် တိုင်းနှင့်ပြည်နယ် အစိုးရများက လိုအပ်သည်များကိုကြိုတင်ဖြည့်ဆည်းထားရန်လည်း နိုင်ငံတော်ဝန်ကြီးချုပ် ဦးညိုစောက မှာကြားခဲ့သည်။

အမြန်လမ်းမကြီးတွင် ဘုရားဖူးယာဉ်နှင့် ဆိုင်ကယ်တိုက်၊ ဆိုင်ကယ်မှ အမျိုးသားသုံးဦး အသက်ဆုံး

ယနေ့ (မတ် ၅) ညနေက အမြန်လမ်းမကြီး မိုင်တိုင် ၇၅/၃-၇၅/၄ ကြားတွင် ဖြစ်ပွါးခဲ့ခြင်း ဖြစ်သည်။

ဖြစ်စဉ်တွင် နေပြည်တော်မှ ရန်ကုန်သို့(အပြန်လမ်းအတိုင်း) မောင်းနှင် လာသော Higer အမျိုးအစား ဘုရားဖူးယာဉ်က အမြန်လမ်းမကြီးပေါ် မောင်းနှင်နေစဉ် မောင်းသူအပါ ကျား(၃)ဦး စီးနင်းလာသည့် မော်တော်ဆိုင်ကယ်သည် လမ်း၏အနောက်ဘက်မှ အရှေ့ဘက်သို့ရုတ်တရက် ဖြတ်ကူးစဉ် ဘုရားဖူးမှန်လုံခရီးသည်ယာဉ်နှင့်တို-က်မိခဲ့ခြင်း ဖြစ်သည်။

ထို့ကြောင့် ဆိုင်ကယ်ပေါ်ပါသူ ကျား(၃)ဦးစလုံးအခင်းဖြစ်ပွားသည့် နေရာတွင် ‌ေ-သဆုံးသွားခဲ့သည်ဟုလည်း သိရသည်။

အမြန်လမ်းမကြီးများ ဥပဒေအရ မော်တော်ဆိုင်ကယ်/စက်ဘီး/ထော်လာဂျီ/သုံးဘီး ယာဉ်များမှာ အမြန်လမ်းကို သုံးစွဲခွင့်မရှိကြောင်းနှင့် အမြန်လမ်းပေါ်၌အဆိုပါယာဉ်များကြောင့် မတော်တဆမှု ဖြစ်ပွားပါက အဆိုပါယာဉ်မောင်းနှင် သူသာအရေးယူခံရမည်ဖြစ်ကြောင်းကိုလည်း အမြန်လမ်းမကြီး ထိန်းသိမ်းပြုပြင်ရေးနှင့် ကြီးကြပ်ရေးအဖွဲ့က အသိပေးထားသည်။

ဓာတ်ပုံ- အမြန်လမ်းမကြီး ထိန်းသိမ်းပြုပြင်ရေးနှင့် ကြီးကြပ်ရေးအဖွဲ့

မြန်မာနိုင်ငံသို့ ချစ်ကြည်ရေးခရီးရောက်ရှိလာသည့် ရုရှားစစ်ရေယာဥ်(၃)စီး

မြန်မာနိုင်ငံသို့ချစ်ကြည်ရေးလည်ပတ်ရန် ရုရှားရေတပ်မှ စစ်ရေယာဥ်(၃)စီးသည် ယနေ့ မတ် ၅ ရက်ညနေပိုင်းက ရန်ကုန်မြို့၊ သီလဝါဆိပ်ကမ်းရှိ MITT တံတားသို့ရောက်ရှိလာခဲ့ကြောင်း သိရသည်။

ရောက်ရှိလာသည့် ရုရှားရေတပ်ပစိဖိတ်စစ်ရေယာဉ်စုမှ ကော်ဗက်စစ်ရေယာဉ်များဖြစ်သည့် Sovershenyi နှင့် Rezkiy ၊ အလတ်စားဆီတင်သင်္ဘော Pechenga တို့အား မြန်မာ့တပ်မတော်(ရေ)မှအရာရှိ၊ စစ်သည်များ၊ မြန်မာနိုင်ငံဆိုင်ရာ ရုရှားနိုင်ငံ စစ်သံမှူးနှင့် တာဝန်ရှိသူများကကြိုဆိုခဲ့ကြသည်။

အဆိုပါ စစ်ရေယာဉ်များအား အဖွဲ့ခေါင်းဆောင်အဖြစ် Captain 1st Rank Andrei Gaevoi မှဦးစီး၍ အရာရှိ၊ စစ်သည်(၃၅၀)ဦးလိုက်ပါလာပြီး မြန်မာနိုင်ငံတွင် မတ် ၁၀ ရက်အထိ ၆ ရက်ကြာနေထိုင်၍ လေ့လာလည်ပတ်မည်ဖြစ်ကာ နှစ်နိုင်ငံချစ်ကြည်ရေးအားကစားပြိုင်ပွဲများကိုလည်းပြုလုပ်သွားမည်ဖြစ်သည်။