ပီအက်စ်ဂျီရဲ့ ကမ်းလှမ်းမှုကို ပယ်ချကာ ဘာစီလိုနာနှင့် စာချုပ်သစ်ချုပ်ဆိုရန် နီးစပ်နေပြီ ဖြစ်တဲ့ အဲရစ်ဂါစီယာ
====================

အဲရစ်ဂါစီယာဟာ ပီအက်စ်ဂျီရဲ့ ကမ်းလှမ်းမှုကို ပယ်ချကာ ဘာစီလိုနာနှင့် စာချုပ်သစ်ချုပ်ဆိုရေး ဆွေးနွေးမှု အပြီးသတ်လုနီးပါး ဖြစ်နေပြီ ဖြစ်ပါတယ်။
အသက် ၂၄ နှစ်ရှိ စပိန်နောက်ခံလူဟာ ယခုရာသီတွင် ဟန်ဆီဖလစ်လက်အောက်တွင် အရေးပါတဲ့ ကစားသမားအဖြစ် ကစားခွင့်ရနေသူ ဖြစ်ပြီး ပွဲချိန်အများဆုံးကစားခွင့်ရသူအဖြစ် ရပ်တည်နေသူလည်း ဖြစ်ပါတယ်။
Mundo Deportivo က အသက် ၂၄ နှစ်ရှိ ဂါစီယာဟာ ဘာစီလိုနာနှင့်စာချုပ်သစ်ချုပ်ဆိုရေး ဆွေးနွေးမှု ပြုလုပ်လာခဲ့ရာ ယခုအခါ နောက်ဆုံး အပြီးသတ်နိုင်တော့မယ့် အဆင့်သို့ ရောက်နေပြီ ဖြစ်ကြောင်း ဖော်ပြလာပါတယ်။
မန်စီးတီးနောက်ခံလူဟောင်းရဲ့ လက်ရှိ စာချုပ်မှာ ရာသီအကုန်တွင် ကုန်ဆုံးမှာ ဖြစ်ပြီး လာမယ့် ဇန်နဝါရီလမှ စတင်ကာ နိုင်ငံခြားကလပ်များနှင့် လွတ်လပ်စွာ ဆွေးနွေးခွင့် ရှိနေသူလည်း ဖြစ်ပါတယ်။
သူဟာ ဘာစီလိုနာနည်းပြဟောင်းလူးဝစ်အန်းနရစ်ကိုင်တွယ်နေတဲ့ ပီအက်စ်ဂျီရဲ့ ကမ်းလှမ်းမှု ရရှိပေမယ့်လည်း ဘာစီလိုနာတွင် ပျော်ရွှင်နေမှုနှင့်အတူ ယင်းတွင်ပင် ဆက်ကစားရန် ဆုံးဖြတ်ထားတာလည်း ဖြစ်ပါတယ်။
တဖက်တွင် ဘာစီလိုနာကလည်း အဲရစ်ဂါစီယာကို အသင်းရဲ့ အုတ်မြစ်အဖြစ် ယူဆထားသလို အနာဂတ် အသင်းခေါင်းဆောင်အဖြစ်လည်း သတ်မှတ်ထားပါတယ်။

စံချိန်တင် အနီကတ်ပြစ်ဒဏ်အတွက် ၃ ပွဲပယ်နှင့် ယူရို ၁၅၀၀၀ ဒဏ်ရိုက်ခြင်းခံလာရတဲ့ မိန့်ဇ်စတား
==================

မိန့်ဇ်နောက်ခံလူဒိုမီနစ်ခ်ခိုးလ်ဟာ သောကြာနေ့တုန်းက ဟော်ဖန်ဟိမ်းနှင့်ပွဲစဉ်တွင် မက်စ်မိုအာစတက်အား ကြမ်းတမ်းစွာ ဖျက်ထုတ်ခဲ့မှုအတွက် ဘွန်ဒက်စ်လီဂါ ၃ ပွဲပယ်နှင့် ယူရို ၁၅၀၀၀ ဒဏ်ရိုက်ခြင်းခံလာရပါတယ်။
နောက်ခံလူဟာ တစ်ဂိုးစီသရေကျတဲ့ ယင်းပွဲစဉ်ရဲ့ နှောင်းပိုင်းတွင် အလွန်အန္တရာယ်များတဲ့ ဖျက်ထုတ်မှု ပြုလုပ်ခဲ့ပြီးနောက် တိုက်ရိုက် အနီကတ်ပြထုတ်ပယ်ခြင်းခံလာရတာလည်း ဖြစ်ပါတယ်။
သူဟာ ယင်းပွဲအပြီးတွင် အနီကတ်ပြစ်ဒဏ်အတွက် ချက်ချင်းပင် တောင်းပန်မှု ပြုလုပ်ခဲ့ပါတယ်။
အစောပိုင်းတုန်းက သူဟာ ယင်းဆိုးရွားတဲ့ ဖျက်ထုတ်မှုအတွက် ပွဲရှည်ပွဲပယ်ခံရမယ်လို့ ယူဆထားရပေမယ့်လည်း ၃ ပွဲပယ်သာ ခံလာရပါတယ်။ တကယ်လို့များ သူဟာ ၄ ပွဲပယ်ခံလာရမည်ဆိုပါက ၂၀၂၅ ခုနှစ် လက်ကျန် ဘွန်ဒက်စ်လီဂါပွဲအားလုံးကို လွဲချော်လာပါမယ်။
သူဟာ ၃ ပွဲပယ်သာ ခံလာရမှုနှင့်အတူ ဒီဇင်ဘာလ ၂၁ ရက်နေ့ စိန့်ပေါ်လီနှင့် ပွဲစဉ်တွင် ပြန်လည် ကစားလာနိုင်ဦးမှာ ဖြစ်ပါတယ်။
ဒါ့အပြင် သူဟာ ဘွန်ဒက်စ်လီဂါပွဲပယ်ခံထားရစဉ်အတွင်း မိန့်ဇ်ရဲ့ ယူအီးအက်ဖ်အေကွန်ဖရင့်လိဂ်ပွဲစဉ်များတွင်လည်း ပါဝင်ကစားလာနိုင်ပါဦးမယ်။
သူဟာ ယင်းအနီကတ်ကြောင့် အနီကတ် ၉ ကတ်ဖြင့် ဘွန်ဒက်စ်လီဂါသမိုင်းတွင် အနီကတ်အများဆုံးကစားသမားအဖြစ် ဘယ်သူမှ မလိုချင်တဲ့ မှတ်တမ်းဆိုးလည်း ပိုင်ဆိုင်လာပါတယ်။
သူဟာ ယခုရာသီတွင် ဒုတိယမြောက် အနီကတ်ပြသခံလာရတာဖြစ်ပြီး မိန့်ဇ် ကစားသမားဘဝအတွင်းတွင် ၆ ကြိမ်မြောက် အနီကတ်ပြသခြင်းခံလာရတာလည်း ဖြစ်ပါတယ်။

ဘီဘီစီ အမျိုးသမီးတစ်နှစ်တာအကောင်းဆုံးကစားသမားဆုကို ဟမ်တွန်ဆွတ်ခူး
====================

ချဲလ်ဆီးနှင့် အင်္ဂလန်ဂိုးသမားဟန်နာဟမ်တွန်ဟာ ပြီးခဲ့တဲ့ ၁၂ လအတွင်းတွင် ကလပ်နှင့် နိုင်ငံတို့နှင့် အတူ လက်စွမ်းပြကစားနိုင်ခဲ့ပြီးနောက် ဘီဘီစီရဲ့ အမျိုးသမီးတစ်နှစ်တာအကောင်းဆုံးကစားသမားအဖြစ် မဲပေးရွေးချယ်ခြင်းခံလာရပါတယ်။
ဟမ်တွန်ဟာ ပြီးခဲ့တဲ့ရာသီတုန်းက ချဲလ်ဆီးအသင်းကို ဆုဖလား ၃ လုံး ဆွတ်ခူးနိုင်အောင် စွမ်းဆောင်ခဲ့တဲ့အပြင် အမျိုးသမီးစူပါလိဂ်ပြိုင်ပွဲတွင်လည်း ၁၃ ပွဲ ဂိုးမပေးရအောင် စွမ်းဆောင်ခဲ့သူ ဖြစ်ပါတယ်။
အင်္ဂလန်ရဲ့ ပထမဦးစားပေးဂိုးသမားဖြစ်လာပြီးနောက် အသက် ၂၅ နှစ်ရှိ ဂိုးသမားဟာ စပိန်နှင့် ယူရို ၂၀၂၅ ဗိုလ်လုပွဲ ပင်နယ်တီအဆုံးအဖြတ်တွင် ပင်နယ်တီ ၂ ကြိမ်ကာကွယ်ကာ ချန်ပီယံဖြစ်အောင် ကူညီပေးခဲ့ပါတယ်။
သူမဟာ အင်္ဂလန်ကစားဖော် အလက်ဆီယာရူဆိုနှင့် စပိန်ရဲ့ အေတာနာဘွန်မာတီတို့ကို ကျော်ဖြတ်ကာ ပရိသတ်မဲအများဆုံး ရရှိခဲ့တာလည်း ဖြစ်ပါတယ်။
ဟမ်တွန်က "အခြားဆန်ကာတင်ကစားသမားတွေလည်း ပါဝင်တော့ ဆွတ်ခူးလာလိမ့်မယ်လို့ လုံးဝ မျှော်လင့်မထားဘူး။ သူတို့အားလုံးက မယုံနိုင်စရာ နှစ်တွေ ပိုင်ဆိုင်လာခဲ့တဲ့သူတွေပါ"လို့ ပြောကြားသွားပါတယ်။
၂၀၂၃ ခုနှစ်တုန်းက အင်္ဂလန်ကစားဖော်ဟောင်းအပ် ဆွတ်ခူးပြီးနောက် ဟမ်တွန်မှာ ဒီဆုကို ဆွတ်ခူးနိုင်တဲ့ ဒုတိယမြောက် ဂိုးသမားဖြစ်လာပါတယ်။

ဘိုတန်း လေ့ကျင့်ရေးကွင်းသို့ လာရောက်လည်ပတ်မှုအတွက် ဝေဖန်ခြင်းခံရပြီးနောက် ဘာစီလိုနာ တုံ့ပြန်လာ
=====================

ဘာစီလိုနာဟာ ကလပ်ရဲ့ လေ့ကျင့်ရေးကွင်းသို့ ဂျာမနီနှင့် ဘိုင်ယန်မြူးနစ်နောက်ခံလူဟောင်းဂျီရိုမီဘိုတန်းအား လာရောက်လည်ပတ်ခွင့်ပြုမှုအပေါ် ဝေဖန်ခြင်းခံရပြီးနောက် ၎င်းတို့မှာ အမျိုးသမီးများအား အိမ်တွင်းအကြမ်းဖက်မှုများအပေါ် ဆန့်ကျင်ရာတွင် အလုံးစုံအားပေးထောက်ခံဆဲ ဖြစ်ကြောင်း ကြေညာလာပါတယ်။
ပြီးခဲ့တဲ့အပတ်တုန်းက ဘာစီလိုနာရဲ့ X အကောင့်တွင် ကလပ်လေ့ကျင့်ရေးကွင်းတွင် ဘိုတန်းနှင့် ကစားဖော်ဟောင်းရောဘတ်လီဝန်ဒေါ့စကီးတို့ ဖက်နေတဲ့ ဓာတ်ပုံအား တင်ခဲ့ပါတယ်။
ဘိုတန်းဟာ ပြီးခဲ့တဲ့နှစ်တုန်းက ချစ်သူဟောင်းအား ဒဏ်ရာအနာတရ ဖြစ်အောင် တိုက်ခိုက်မှုအတွက် ယူရို ၂၀၀၀၀၀ ဆိုင်းငံ့ဒဏ်ငွေ ချမှတ်ခြင်းခံခဲ့ရသလို အပြင်းအထန် သတိပေးခြင်းလည်း ခံခဲ့ရပါတယ်။
အသက် ၃၇ နှစ်ရှိ ဂျာမနီလက်ရွေးစင်ဟောင်းက ၂၀၁၈ ခုနှစ် အားလပ်ရက်ခရီးစဉ်တွင် အမြွာသမီးနှစ်ဦးရဲ့ အမေအား တိုက်ခိုက်ခဲ့ခြင်း မရှိကြောင်း ငြင်းဆိုခဲ့ပါတယ်။
သူဟာ ၂၀၂၁ ခုနှစ်တွင် သူ့အား အပြစ်ရှိတယ်လို့ ဆုံးဖြတ်မှုအား အယူခံဝင်ခဲ့ပါတယ်။
ပြီးခဲ့တဲ့နှစ်တုန်းက မြူးနစ်တရားရုံးက ဘိုတန်းအား တတိယအမှုဖြင့် ထပ်မံ စစ်ဆေးခဲ့ပါတယ်။ ဘိုတန်းဟာ အထက်ပါ အမှုကြောင့် ဘိုင်ယန်မြူးနစ်နည်းပြအဖွဲ့ရာထူးမှ ထွက်ခွာခဲ့ရသူလည်း ဖြစ်ပါတယ်။
ဘာစီလိုနာဟာ နူးကမ့်ကွင်းသစ် ဖွင့်ပွဲမတိုင်မီ ၂ ရက်အလိုတွင် ဘိုတန်းရဲ့ ဗီဒီယိုအား တင်ခဲ့တာ ဖြစ်ပါတယ်။
ဒါ့အပြင် ဘာစီလိုနာဟာ ဘီလ်ဘာအိုနှင့် နူးကမ့်ကွင်းသစ် ပထမဆုံးပွဲတွင် နိုင်ငံတကာ အမျိုးသမီးများအား အကြမ်းဖျက်မှု တိုက်ဖျက်ရေးနေ့ အထိမ်းအမှတ်အဖြစ် အမျိုးသားများရဲ့ သတ်ဖြတ်ခြင်းခံခဲ့ရတဲ့ အမျိုးသမီးများအတွက် တစ်မိနစ်ကြာ ဝမ်းနည်းခြင်းအထိမ်းအမှတ်ပြုလုပ်ခဲ့ပါတယ်။
တဆက်တည်းတွင် ဘာစီလိုနာက ဘိုတန်းနှင့် ကလပ်အကြားတွင် မည်သည့်ဆက်စပ်မှုမျှ မရှိကြောင်း၊ ဂျာမနီကစားသမားဟောင်းမှာ နည်းပြလိုင်စင် ရရှိရေးအတွက် လုပ်ဆောင်မှုတစ်ရပ်အနေဖြင့် ကလပ်လေ့ကျင့်ရေးကွင်းသို့ လာရောက်လည်ပတ်ခြင်းမျှသာ ဖြစ်ပြီး ကလပ်မှာလည်း အမျိုးသမီးများအား အကြမ်းဖက်မှု ရပ်တန့်ရေး အပြည့်အဝ ထောက်ခံအားပေး လုပ်ဆောင်နေဆဲဖြစ်ကြောင်း ကြေညာသွားပါတယ်။
ဘိုတန်းဟာ ၂၀၂၄ ခုနှစ် နိုဝင်ဘာလတုန်းက ယူအီးအက်ဖ်အေနည်းပြဘီလိုင်စင် ရရှိခဲ့သူ ဖြစ်ပြီး နည်းပြတစ်ဦးဖြစ်လာရန် ကြိုးပမ်းနေသူ ဖြစ်ပါတယ်။
ဘိုတန်းရဲ့ ရည်းစားဟောင်းတစ်ဦးမှာ ဂျာမနီစတားဟောင်းနှင့် လမ်းခွဲလိုက်မှုရဲ့ အကျိုးဆက်အဖြစ် ၂၀၂၁ ခုနှစ်တုန်းက ကိုယ့်ကိုယ်ကို အဆုံးစီရင်သွားခဲ့ပါတယ်။

၂၀၂၄ တောင်အမေရိကဖလားဗိုလ်လုပွဲဖြစ်ရပ်အတွက် ပရိသတ်များကို နစ်နာကြေး ဒေါ်လာ ၁၄ သန်းပေးလာမယ့် ပွဲစီစဉ်သူ
=======================

၂၀၂၄ တောင်အမေရိကဖလားဗိုလ်လုပွဲဖြစ်ရပ်အတွက် ပွဲစီစဉ်သူများနှင့် ကွင်းတာဝန်ခံများဟာ ပရိသတ်များကို နစ်နာကြေး ဒေါ်လာ ၁၄ သန်းပေးရန် သဘောတူညီလိုက်ပြီ ဖြစ်ကြောင်း သိရပါတယ်။
ယင်းဗိုလ်လုပွဲအတွက် လက်မှတ်ကိုင်ဆောင်ထားတဲ့ ပရိသတ်များဟာ Hardrock Stadium တွင် ကစားတဲ့ ယင်းပွဲစဉ်တွင် လုံခြုံရေးပြဿနာများကြောင့် ကွင်းအတွင်း ဝင်ရောက်ခွင့် မရရှိပြီးနောက် တရားစွဲဆိုလာခဲ့ကြတာလည်း ဖြစ်ပါတယ်။
အာဂျင်တီးနားနှင့် ကိုလံဘီယာတို့ ကစားတဲ့ ဗိုလ်လုပွဲကို ဝင်ကြည့်ခွင့်မရမှုနှင့်အတူ ပရိသတ်များဟာ တောင်အမေရိကဘောလုံးအဖွဲ့ချုပ်၊ ကွန်ကာကပ်ဖ်ဘောလုံးအဖွဲ့ချုပ်အပြင် Best Security ၊ South Florida Stadium LLC (Hard Rock Stadium ပိုင်ရှင်)တို့အား တရားစွဲဆိုလာတာလည်း ဖြစ်ပါတယ်။
ယခုအခါ ပွဲစီစဉ်သူများနှင့် ကွင်းတာဝန်ခံများက ဗိုလ်လုပွဲသို့ သွားရောက်ကြည့်ရှုခွင့် မရမှုအတွက် တရားစွဲဆိုသူ ပရိသတ်များအား နစ်နာကြေးအဖြစ် ဒေါ်လာ ၁၄ သန်းပေးရန် တရားရုံးပြင်ပတွင် သဘောတူညီမှု ရရှိသွားခဲ့ပြီ ဖြစ်ပါတယ်။
အဆိုပါပွဲစဉ်တွင် ပရိသတ်များ ကွင်းအတွင်း ဝင်ရောက်ခွင့် မရမှုကြောင့် ပွဲကို ၈၂ မိနစ်အထိ ရွှေ့ဆိုင်းခဲ့ရပါတယ်။ ယင်းပွဲမတိုင်မီ ကွင်းပြင်ပတွင် ရုန်းရင်းဆန်ခတ်မှုများ ဖြစ်ပွားခဲ့ပြီး ပရိသတ်များလည်း ဖမ်းဆီးခံခဲ့ရပါတယ်။
ယင်းဖြစ်ရပ်ကြောင့် လက်မှတ်ပိုင်ဆိုင်ထားတဲ့ ပရိသတ်အမြောက်အမြားတို့မှာ ကွင်းအတွင်းသို့ ဝင်ခွင့်မရခဲ့သလို တချို့လည်း ဝင်ရန် ခက်ခဲမှုကြောင့် အိမ်လှည့်ပြန်သွားခဲ့ကြပါတယ်။
ယခုအခါ ပွဲစီစဉ်သူများနှင့် ကွင်းတာဝန်ခံတို့က ကွင်းအတွင်းဝင်ခွင့်မရခဲ့တဲ့ ပရိသတ်တစ်ဦးစီလျှင် နစ်နာကြေး ဒေါ်လာ ၂၀၀၀ နှုန်း၊ ခရီးစရိတ် ဒေါ်လာ ၃၀၀ ပေးကာ စုစုပေါင်း ဒေါ်လာ ၁၄ သန်းပေးလာပါမယ်။

မက်ဆီရဲ့ ကြီးကျယ်ခမ်းနားတဲ့ ကစားသမားဘဝပိုင်ဆိုင်ရေး ကြီးမားတဲ့ အခမ်းကဏ္ဍမှ ပါဝင်ခဲ့သူ အသက် ၇၃ နှစ်အရွယ်တွင် ကွန်လွန်လာ
==================

လီယွန်နယ်မက်ဆီဟာ သူ့ရဲ့ ကြီးကျယ်ခမ်းနားတဲ့ ကစားသမား ဖြစ်မြောက်လာရေးတွင် အဓိကနေရာမှ ပါဝင်ခဲ့တဲ့ လူတစ်ဦး ကွယ်လွန်သွားမှုအတွက် ဝမ်းနည်းကြောင်း ပြသလာပါတယ်။
အသက် ၃၈ နှစ်ရှိ အာဂျင်တီးနားနှင့် အင်တာမိုင်ယာမီစူပါစတားဟာ ဘောလုံးသမိုင်းတွင် အကောင်းဆုံးကစားသမားများထဲမှ တစ်ဦးအဖြစ် သတ်မှတ်ခံထားရသူ ဖြစ်ပါတယ်။
သူဟာ ချန်ပီယံလိဂ်ဖလား ၄ ကြိမ်၊ ကမ္ဘာ့ဖလား ၁ ကြိမ်၊ အိုလံပစ်ရွှေတံဆိပ်ဆု ၁ ကြိမ်၊ ကိုပါအမေရိကဖလား ၂ ကြိမ်အပါအဝင် ဆုဖလား ၄၅ လုံး ဆွတ်ခူးထားနိုင်သူလည်း ဖြစ်ပါတယ်။
ဒါ့အပြင် အာဂျင်တီးနားဂန္ထဝင်ဟာ Ballon d'Or ဆုကိုလည်း ၈ ကြိမ် ဆွတ်ခူးထားပါသေးတယ်။
ဒါပေမယ့် သူ့အောင်မြင်မှုတွင် အသက် ၇၃ နှစ်အရွယ်တွင် ကွယ်လွန်သွားခဲ့တဲ့ အာဂျင်တီးနားနိုင်ငံသား အိုမာဆူတိုက ကြီးမားတဲ့ အခန်းကဏ္ဍမှ ပါဝင်ခဲပါတယ်။
ဆူတိုဟာ အာဂျင်တီးနားဘောလုံးအဖွဲ့ချုပ်တွင် ဆယ်စုနှစ်သုံးခုကျော်ကြာ တာဝန်ထမ်းဆောင်လာခဲ့သူ ဖြစ်ပါတယ်။
သူဟာ ၂၀၀၄ ခုနှစ်တုန်းက အာဂျင်တီးနားယူ-၂၀ အသင်းအတွက် ပထဆုံးကစားခဲ့တဲ့ မက်ဆီအား နိုင်ငံအတွက် ကစားလာအောင် ဆွဲဆောင်နိုင်ခဲ့သူလည်း ဖြစ်ပါတယ်။ မက်ဆီဟာ ထိုစဉ်တုန်းက စပိန်အသင်းအတွက်လည်း ကစားခွင့်ရှိနေသူ ဖြစ်ပါတယ်။
သူဟာ အာဂျင်တီးနားဘောလုံးအဖွဲ့ချုပ်ကိုယ်စား ပထမဆုံးပုဂ္ဂိုလ်အဖြစ် မက်ဆီနှင့် ဆက်သွယ်ခဲ့တဲ့သူလို့ ယူဆရပါတယ်။
သူဟာ ရိုဆာရီယိုရှိ မက်ဆီရဲ့ ဦးလေး၊ အဘွားတို့မှ တဆင့် မက်ဆီရဲ့ ဖခင်နှင့် ဆက်သွယ်မှု ပြုလုပ်ခဲ့တာလည်း ဖြစ်ပါတယ်။
မက်ဆီဟာ ထိုစဉ်မှ စတင်ကာ အာဂျင်တီးနားအတွက် ကစားလာခဲ့ပြီး နိုင်ငံအတွက် ၁၉၆ ပွဲကစားကာ ၁၁၅ ဂိုးသွင်းပြီး နိုင်ငံအတွက် ပွဲအများဆုံးကစားထားသူ၊ ဂိုးအများဆုံးသွင်းယူထားသူ ဖြစ်လာပါတယ်။
ဆူတိုဟာ လွန်ခဲ့တဲ့နှစ်အနည်းငယ်ခန့်မှ စတင်ကာ နာမကျန်းလာဖြစ်ခဲ့သူလည်း ဖြစ်ပါတယ်။
မက်ဆီဟာ သူနှင့် ဆူတိုတို့ တွဲရိုက်ကူးထားတဲ့ ဓာတ်ပုံအား ပို့စ်တင်ကာ "ခင်ဗျားက အဲဒီမှာ အမြဲ ရှိနေခဲ့တယ်။ ပြီးတော့ အာဂျင်တီးနားဘောလုံးအဖွဲ့ချုပ်က ကျွန်တော့်ကို ရှာတွေ့နိုင်အောင် လမ်းခင်းပေးခဲ့တဲ့သူပါ။ အရမ်းကို လူသားဆန်မှု၊ လက်ရွေးစင်အသင်းကို ဖြတ်သန်းရတဲ့ ကျွန်တော်တို့အတွက် ခင်ဗျားက မေ့ဖျောက်ဖို့ ခက်တဲ့ လူပါ။ ခင်ဗျားရဲ့ အမှတ်အသားတွေက ထာဝရ တည်ရှိနေမှာပါ။ အိုမာရေ ခင်ဗျားကို ဘယ်တော့မှ မမေ့ဘူး။ ငြိမ်းချမ်းစွာ အနားယူနိုင်ပါစေ"လို့ ရေးသားသွားပါတယ်။

ဗာဒီနှင့် ရီဘက်ကာဇနီးမောင်နှံတို့ရဲ့ အီတလီနေအိမ် စီးနင်းခံရပြီး ပေါင် ၈ သောင်းတန်ဖိုးရှိ ငွေများ၊ နာရီများနှင့် လက်ဝတ်ရတနာများ အခိုးခံရ
===================

ဖောက်ထွင်းဂိုဏ်းတစ်ဂိုဏ်းဟာ ဂျေမီဗာဒီရဲ့ အီတလီနေအိမ်ကို ဖောက်ထွင်းကာ ပေါင် ၈ သောင်းတန်ဖိုးရှိ လက်ဝတ်ရတနာများ၊ နာရီများကို ခိုးယူသွားခဲ့ကြပါတယ်။
အင်္ဂလန်တိုက်စစ်မှူးဟောင်းဗာဒီနှင့် ဇနီးသည်ရီဘက်ကာတို့ဟာ အီတလီမြောက်ပိုင်း Lake Garda ကို အပေါ်စီးမှ မြင်ရတဲ့ နေအိမ်မှာ နေထိုင်နေကြတာပါ။
ဗာဒီဟာ သမိုင်းဝင် ဆိုလိုမြို့ရှိ ပေါင် ၂ သန်းတန်ဖိုးရှိ ဇိမ်ခံအိမ်ကြီးတွင် နေထိုင်နေကြတာပါ။
၎င်းတိုဟာ နွေရာသီတုန်းက စီးရီးအေတန်းတက် ခရီမိုနက်စ်သို့ ပြောင်းလာပြီးနောက် နာမည်ကျော်ကန်ကြီးကို အလှအပကို မြင်နိုင်မယ့် နေအိမ်သို့‌ ပြောင်းရွှေ့နေထိုင်လာကြတာလည်း ဖြစ်ပါတယ်။
ဒါပေမယ့် ဖောက်ထွင်းသမားများဟာ နေအိမ်ကို ပြတင်းပေါက်မှ တဆင့် ထိုးဖောက်ဝင်ရောက်ပြီးနောက် လက်ဝတ်ရတနာများ၊ ငွေသားများအပြင် တန်ဖိုးကြီး Patek Philippe နာရီကိုလည်း ရယူသွားခဲ့ပါတယ်။
ဖောက်ထွင်းသမားများဟာ တနင်္ဂနွေနေ့တုန်းက ရောမသို့ သွားရောက်ကာ ခရီမိုနက်စ်တို့ ရိုးမားအား ၃-၁ ဖြင့် ရှုံးနိမ့်တဲ့ အဝေးကွင်းပွဲအား သွားရောက်ကစားနေစဉ် စနစ်တကျ အကွက်ချဖောက်ထွင်းခဲ့ကြတာပါ။
ဗာဒီဟာ နွေရာသီတုန်းက ခရီမိုနက်စ်သို့ ပြောင်းပြီးနောက် ဆိုလိုရှိ နေအိမ်ကို ဝယ်ယူခဲ့တာလည်း ဖြစ်ပါတယ်။
ဆိုလိုမြို့မှာ ဒုတိယကမ္ဘာ့စစ် အီတလီအာဏာရှင်ဘီနီတိုမူဆိုလီနီရဲ့ အိမ်ရှိရာ မြို့လည်း ဖြစ်ပါတယ်။ မူဆိုလီနီရဲ့ မြေးတော်စပ်သူ ရိုမာနိုမှာလည်း ခရီမိုနက်စ်တွင် ကစားနေပါတယ်။
ဗာဒီဟာ နွေရာသီတုန်းက ၁၃ ရာသီကြာ ကစားလာခဲ့တဲ့ လက်စတာကို စွန့်ခွာကာ စီးရီးအေကလပ်သို့ ၁၂ လစာချုပ်ဖြင့် ပြောင်းလာခဲ့တာပါ။
သူဟာ လက်စတာအတွက် ပွဲ ၄၄၀ ကစားခဲ့ရာမှာ ၁၈၃ ဂိုးသွင်းပေးခဲ့ပါတယ်။
သူဟာ အီတလီသို့ ပြောင်းပြီးနောက် ခရီမိုနက်စ်အတွက် ၈ ပွဲကစားထားရာမှာ ၂ ဂိုးသွင်းထားပါတယ်။ သူဟာ ပထမဆုံးစီးရီးအေဂိုးအား ပြီးခဲ့တဲ့လတုန်းက အတ္တလန္တာနှင့်ပွဲမှာ သွင်းယူနိုင်ခဲ့ပါတယ်။

အနီကတ်ပြသခြင်းခံရပေမယ့်လည်း ဖီဖာရဲ့ မျက်နှာသာပေးမှုကြောင့် ကမ္ဘာ့ဖလားအဖွင့်ပွဲတွင် ပါဝင်ကစားလာနိုင်မယ့် ခရစ္စတီယာနိုရော်နယ်ဒို
===================

ခရစ္စတီယာနိုရော်နယ်ဒိုဟာ အိုင်ယာလန်နှင့် ကမ္ဘာ့ဖလားခြေစစ်ပွဲတွင် အနီကတ်ပြသခြင်းခံခဲ့ရကာ ၃ ပွဲပယ်ခံခဲ့ရပေမယ့်လည်း လာမယ့်နှစ် နွေရာသီ ကမ္ဘာ့ဖလားအဖွင့်ပွဲတွင် ပါဝင်ကစားလာနိုင်တော့မှာ ဖြစ်ပါတယ်။
အသက် ၄၀ နှစ်ရှိ ခရစ္စတီယာနိုရော်နယ်ဒိုဟာ ယခုလအစောပိုင်းတုန်းက အိုင်ယာလန်အား ၂-၀ ဂိုးဖြင့် ရှုံးနိမ့်တဲ့ပွဲတွင် ဒါရာအိုရှီးယားကို တံတောင်ဖြင့် တွက်ခဲ့မှုအတွက် အနီကတ်ပြထုတ်ပယ်ခြင်းခံခဲ့ရပါတယ်။
ရန်လိုတဲ့ အပြုအမူဖြင့် ပြုမှုအတွက် ပုံမှန်အားဖြင့် ၃ ပွဲခံရပါတယ်။ ဒါပေမယ့်လည်း ခရစ္စတီယာနိုရော်နယ်ဒိုကတော့ ဒုတိယပွဲနှင့် တတိယပွဲပယ်တို့အား တစ်နှစ် ဆိုင်းငံ့ပြစ်ဒဏ်အဖြစ် ချမှတ်ခြင်းခံလာရပါတယ်။
ခရစ္စတီယာနိုရော်နယ်ဒိုဟာ ပေါ်တူဂီအသင်းအတွက် ၂၂၆ ပွဲကစားထားရာတွင် ပထမဆုံးအကြိမ် အနီကတ်ပြသခြင်းခံရမှုနှင့်အတူ ၁ ပွဲပယ်ပြစ်ဒဏ်သာ ချမှတ်ခံလာရတာ ဖြစ်ပြီး ကျန် ၂ ပွဲကို ဆိုင်းငံ့ပြစ်ဒဏ်အဖြစ် ကျခံလာရတာလည်း ဖြစ်ပါတယ်။
ရော်နယ်ဒိုဟာ နိုဝင်ဘာလ ၁၆ ရက်နေ့တုန်းက အာမေးနီးယားနှင့် ကမ္ဘာ့ဖလားခြေစစ်ပွဲ နောက်ဆုံးပွဲအား လွဲချော်ခဲ့ပြီး ဖြစ်ရာ ၁ ပွဲပယ်ပြစ်ဒဏ်ကျခံထားပြီး ဖြစ်ပါတယ်။
ဒါကြောင့်လည်း ခရစ္စတီယာနိုရော်နယ်ဒိုဟာ လာမယ့် ၂၀၂၆ ကမ္ဘာ့ဖလားတွင် တစ်ပွဲမျှ လွဲချော်လာတော့မှာ မဟုတ်ပါဘူး။
ရော်နယ်ဒိုဟာ ပေါ်တူဂီအသင်း ကမ္ဘာ့ဖလား ၇ ကြိမ်ဆက် ခြေစစ်ပွဲအောင်မြင်အောင် ၅ ဂိုးသွင်းကာ ကူညီပေးခဲ့ပါတယ်။
ကမ္ဘာ့ဖလားပြိုင်ပွဲဝင် အသင်း ၄၈ သင်းတို့ဟာ လာမယ့် ဒီဇင်ဘာလ ၅ ရက်နေ့ ကမ္ဘာ့ဖလားအုပ်စုမဲခွဲပွဲတွင် ဘယ်အုပ်စုတွင် ဘယ်ပြိုင်ဘက်နှင့် တွေ့ဆုံမယ်ဆိုတာ သိရပါမယ်။

အနီကတ်ပြသခြင်းခံရပေမယ့်လည်း ဖီဖာရဲ့ မျက်နှာသာပေးမှုကြောင့် ကမ္ဘာ့ဖလားအဖွင့်ပွဲတွင် ပါဝင်ကစားလာနိုင်မယ့် ခရစ္စတီယာနိုရော်နယ်ဒို
===================

ခရစ္စတီယာနိုရော်နယ်ဒိုဟာ အိုင်ယာလန်နှင့် ကမ္ဘာ့ဖလားခြေစစ်ပွဲတွင် အနီကတ်ပြသခြင်းခံခဲ့ရကာ ၃ ပွဲပယ်ခံခဲ့ရပေမယ့်လည်း လာမယ့်နှစ် နွေရာသီ ကမ္ဘာ့ဖလားအဖွင့်ပွဲတွင် ပါဝင်ကစားလာနိုင်တော့မှာ ဖြစ်ပါတယ်။
အသက် ၄၀ နှစ်ရှိ ခရစ္စတီယာနိုရော်နယ်ဒိုဟာ ယခုလအစောပိုင်းတုန်းက အိုင်ယာလန်အား ၂-၀ ဂိုးဖြင့် ရှုံးနိမ့်တဲ့ပွဲတွင် ဒါရာအိုရှီးယားကို တံတောင်ဖြင့် တွက်ခဲ့မှုအတွက် အနီကတ်ပြထုတ်ပယ်ခြင်းခံခဲ့ရပါတယ်။
ရန်လိုတဲ့ အပြုအမူဖြင့် ပြုမှုအတွက် ပုံမှန်အားဖြင့် ၃ ပွဲခံရပါတယ်။ ဒါပေမယ့်လည်း ခရစ္စတီယာနိုရော်နယ်ဒိုကတော့ ဒုတိယပွဲနှင့် တတိယပွဲပယ်တို့အား တစ်နှစ် ဆိုင်းငံ့ပြစ်ဒဏ်အဖြစ် ချမှတ်ခြင်းခံလာရပါတယ်။
ခရစ္စတီယာနိုရော်နယ်ဒိုဟာ ပေါ်တူဂီအသင်းအတွက် ၂၂၆ ပွဲကစားထားရာတွင် ပထမဆုံးအကြိမ် အနီကတ်ပြသခြင်းခံရမှုနှင့်အတူ ၁ ပွဲပယ်ပြစ်ဒဏ်သာ ချမှတ်ခံလာရတာ ဖြစ်ပြီး ကျန် ၂ ပွဲကို ဆိုင်းငံ့ပြစ်ဒဏ်အဖြစ် ကျခံလာရတာလည်း ဖြစ်ပါတယ်။
ရော်နယ်ဒိုဟာ နိုဝင်ဘာလ ၁၆ ရက်နေ့တုန်းက အာမေးနီးယားနှင့် ကမ္ဘာ့ဖလားခြေစစ်ပွဲ နောက်ဆုံးပွဲအား လွဲချော်ခဲ့ပြီး ဖြစ်ရာ ၁ ပွဲပယ်ပြစ်ဒဏ်ကျခံထားပြီး ဖြစ်ပါတယ်။
ဒါကြောင့်လည်း ခရစ္စတီယာနိုရော်နယ်ဒိုဟာ လာမယ့် ၂၀၂၆ ကမ္ဘာ့ဖလားတွင် တစ်ပွဲမျှ လွဲချော်လာတော့မှာ မဟုတ်ပါဘူး။
ရော်နယ်ဒိုဟာ ပေါ်တူဂီအသင်း ကမ္ဘာ့ဖလား ၇ ကြိမ်ဆက် ခြေစစ်ပွဲအောင်မြင်အောင် ၅ ဂိုးသွင်းကာ ကူညီပေးခဲ့ပါတယ်။
ကမ္ဘာ့ဖလားပြိုင်ပွဲဝင် အသင်း ၄၈ သင်းတို့ဟာ လာမယ့် ဒီဇင်ဘာလ ၅ ရက်နေ့ ကမ္ဘာ့ဖလားအုပ်စုမဲခွဲပွဲတွင် ဘယ်အုပ်စုတွင် ဘယ်ပြိုင်ဘက်နှင့် တွေ့ဆုံမယ်ဆိုတာ သိရပါမယ်။

မန်စီးတီးအတွက် ချန်ပီယံလိဂ်ရာပြည့်ပွဲတွင် ရှုံးနိမ့်ပြီးနောက် ကစားသမား ၁၀ ဦးအပြောင်းအလဲလုပ်မှုမှာ အလွန်အမင်းများပြားသွားမှု ဖြစ်နိုင်ကြောင်း ဂွါဒီယိုလာဝန်ခံလာ
=====================

ပက်ဂွါဒီယိုလာဟာ အင်္ဂါနေ့ညတုန်းက လေဗာကူဆင်နှင့် ချန်ပီယံလိဂ်ပွဲမှာ မန်စီးတီးအတွက် ချန်ပီယံလိဂ် ၁၀၀ ပြည့်ပွဲအဖြစ်အောင်ပွဲခံခဲ့ပါတယ်။ ဒါပေမယ့် ပွဲပြီးချိန်မှာ တကယ်တမ်း ကခုန်ပျော်ရွှင်နေခဲ့ကြတာကတော့ လေဗာကူဆင်နှင့် သူတို့ရဲ့ ပရိသတ်တွေ ဖြစ်နေပါတယ်။
အင်္ဂလန်သို့ နောက်ကျပြီးမှ ရောက်လာခဲ့တဲ့ လေဗာကူဆင်ဟာ အီတီဟတ်မှာ ခက်ခဲတဲ့ ပွဲတစ်ပွဲ ကြုံလာမယ်လို့ ယူဆထားခဲ့ပေမယ့်လည်း အမှတ်ရစရာကောင်းတဲ့ ၂-၀ ဂိုးဖြင့် နိုင်ပွဲ ကြုံလာခဲ့ပါတယ်။
တနင်္လာနေ့တုန်းက သတင်းစာရှင်းလင်းပွဲတွင် စပိန်လူမျိုးနည်းပြက ကလပ်နှင့်အတူ ချန်ပီယံလိဂ်ပြိုင်ပွဲတွင် ကောင်းမွန်တဲ့ အခိုက်အတန့်များထက် စိတ်ပျက်စရာအခိုက်အတန့် ပိုကြုံခဲ့ရတယ်လို့ ဝန်ခံခဲ့ပါတယ်။ အခု ဂွါဒီယိုလာဟာ နောက်ထပ် မမေ့နိုင်စရာ အခိုက်အတန့်တစ်ခု ထပ်ကြုံလာပြန်ပါတယ်။
လေဗာကူဆင်ကို ရှုံးနိမ့်ခဲ့ရတဲ့ အဓိကအကြောင်းရင်းကတော့ စနေနေ့တုန်းက နယူးကာဆယ်ရှုံးပွဲမှ လူစာရင်းကို ၁၀ ဦးအထိ အပြောင်းအလဲ ပြုလုပ်ပြီး ပွဲထွက်စေပြီး အရဲစွန့်တဲ့ အခင်းအကျင်းနဲ့ ပွဲထွက်လာလို့ ဖြစ်ပါတယ်။
ပွဲအပြီးတွင် ဂွါဒီယိုလာက "ဒါကို လက်ခံပါတယ်(လူစာရင်းအပြောင်းအလဲအများအပြားလုပ်မှုအတွက် ဝေဖန်မှု)။ တကယ်လို့ ကျုပ်တို့သာ နိုင်သွားရင် ဘာပြဿနာမှရှိလာမှာ မဟုတ်ဘူး။ ဒီတော့ အလွန်များလွန်းနိုင်တယ်ဆို‌တော့ ဝေဖန်တာကို လက်ခံပါတယ်"လို့ ပြောကြားသွားပါတယ်။
ဆက်လက်ပြီး ဂွါဒီယိုလာက "ရာသီက ရှည်လျားလွန်းတယ်၊ ဒီတော့ အားလုံး ပါဝင်ဖို့ လိုအပ်နေတယ်။ ဒါပေမယ့် အရမ်းများသွားတာလည်း ဖြစ်နိုင်တယ်။ သူတို့ဟာ လုပ်ရမယ့်အရာကို မလုပ်ဘဲ အမှားတွေ လုပ်ခဲ့ကြတယ်။ ကျွန်တော်တို့ တွေးထားတဲ့ ခြေစွမ်းမျိုး မဟုတ်ပါဘူး။ ဒီအတွက် အပြည့်အဝ တာဝန်ယူပါတယ်။ ကျွန်တော်တို့ တခုခု လိုအပ်နေခဲ့တယ်။ အခွင့်အရေးကြီးတွေကို ဖြုန်းတီးပစ်ခဲ့တယ်။ အခု နောက်ပွဲအတွက် တိုက်ပွဲဝင်ဖို့ လိုနေတယ်"လို့ ပြောကြားသွားပါတယ်။
လေဗာကူဆင်ဟာ တနင်္လာနေ့တုန်းက ဂျာမန်တွင် ခရီးသွားအိတ် ပြဿနာတက်ခဲ့ပြီးနောက် လေယာဉ်ထွက်ခွာရေး နှောင့်နှေးခဲ့ရကာ အင်္ဂလန်သို့ နောက်ကျပြီးမှ ရောက်လာခဲ့တာပါ။
လေဗာကူဆင်ဟာ အဓိကကစားသမားများဖြစ်ကြတဲ့ အက်မွန်တစ်ဆိုဒါ၊ ရီးရဲလ်မက်ဒရစ်နောက်ခံလူဟောင်းလူးကပ်စ်ဗက်ဇ်ကွက်ဇ်၊ အာဂျင်တီးနားကစားသမားများဖြစ်ကြတဲ့ အက်စီကွီလ်ပလာစီယို၊ အီကွီဖာနန်ဒက်ဇ်တို့ မပါဝင်နိုင်မှုနှင့်အတူ ယူ-၁၉ အသင်းမှ ကစားသမား ၆ ဦးအထိ လူစာရင်းထဲတွင် ထည့်သွင်းခဲ့ရတာပါ။