🤓

မူးယစ်ဆေးစွဲသူများ ပြန်လည်ထူထောင်ရေးအသင်းအနေဖြင့် တနှစ်အတွင်း မူးယစ်ဆေးစွဲသူ ၃၈၀ ကျော်ကို မူးယစ်ဆေးဖြတ်ကာ စောင့်ရှောက်မှုများ ဆောင်ရွက်ပေးခဲ့

မူးယစ်ဆေးစွဲသူများ ပြန်လည်ထူထောင်ရေးအသင်း (ဗဟို) အနေဖြင့် ၂၀၂၅-ခုနှစ်အတွင်း မူးယစ်ဆေးဖြတ်ပြီးသူဦးရေ (၃၈၀) ကျော်အား စိတ်ပိုင်း၊ ရုပ်ပိုင်းဆိုင်ရာ နောက်ဆက်တွဲစောင့်ရှောက်မှုများ ဆောင်ရွက်ပေးနိုင်ခဲ့ပြီးဖြစ်ကြောင်း သိရသည်။
အသင်းအနေဖြင့် မူးယစ်ဆေးစွဲလူနာများအား ရှာဖွေဖော်ထုတ်ခြင်း၊ ဆိုရှယ်မီဒီယာမှ ဆက်သွယ်လာသည့် မူးယစ်ဆေးစွဲလူနာများအား ဆေးရုံသို့ လွှဲပြောင်းညွှန်းပို့၍ ဆေးဖြတ်ပေးခြင်း၊ ဆေးရုံမှ ပြန်ဆင်းလာသည့်အခါ ပြန်လည်ထူထောင်မှုလုပ်ငန်းများ ဆောင်ရွက်ပေးခြင်း၊ ပြန်လည်ထူထောင်မှုခံယူပြီးသူများအား နောက်ဆက်တွဲစောင့်ရှောက်မှုများ ဆောင်ရွက်ပေးခြင်းတို့ကို (၂၄) နာရီ ဝန်ဆောင်မှုပေးလျက်ရှိခဲ့ခြင်း ဖြစ်သည်။
ယမန်နေ့ (ဇန်နဝါရီ ၈) ကမူ ထိုမူးယစ်ဆေးဖြတ်သင်တန်းဆင်းသင်တန်းသားများ၏ မိဘအုပ်ထိန်းသူများနှင့် တွေ့ဆုံဆွေးနွေးပွဲအခမ်းအနားပြုလုပ်ခဲ့ကာ သက်ဆိုင်ရာတာဝန်ရှိသူများက သင်တန်းဆင်းလက်မှတ်များအား အသီးသီးပေးအပ်ခဲ့ကြသည်ဟုလည်း သိရသည်။

Marinera သင်္ဘောအမှုထမ်းများအား အမေရိကန်က ရာဇဝတ်မှုဖြင့် တရားစွဲဆိုမည်ဟု အမေရိကန်ရှေ့နေချုပ်ပြောကြား

အမေရိကန် အာဏာပိုင်များသည် ဖမ်းဆီးထိန်းသိမ်းထားသည့် Marinera (Bella 1 ဟုလည်း သိကြသော) ရေနံတင်သင်္ဘောမှ သင်္ဘောအမှုထမ်းများအား ရာဇဝတ်မှုဖြင့် တရားစွဲဆိုသွားမည်ဖြစ်ကြောင်း အမေရိကန် ရှေ့နေချုပ် ပမ်ဘွန်ဒီ(Pam Bondi) က X လူမှုကွန်ရက်တွင် ရေးသားဖော်ပြခဲ့သည်။
သူမ၏ ပြောကြားချက်အရ အဆိုပါသင်္ဘောသည် "ဗင်နီဇွဲလားနှင့် အီရန်နိုင်ငံတို့မှ ပိတ်ဆို့အရေးယူခံထားရသော ရေနံများကို သယ်ယူပို့ဆောင်ပေးနေခြင်းဖြစ်သည်" ဟု သတင်းရရှိထားပြီး၊ သင်္ဘောအမှုထမ်းများသည် ဖမ်းဆီးခြင်းမခံရစေရန်အတွက် "အပြင်းအထန် ကြိုးပမ်းအားထုတ်မှုများ" ပြုလုပ်ခဲ့ကြသည်ဟု ဆိုသည်။
"ကမ်းခြေစောင့်တပ်ဖွဲ့၏ အမိန့်ကို လိုက်နာရန် ပျက်ကွက်ခဲ့သည့် အကျိုးဆက်အနေဖြင့် ဤသင်္ဘောရှိ အမှုထမ်းများအား အပြည့်အဝ စုံစမ်းစစ်ဆေးလျက်ရှိပြီး၊ ပြစ်မှုကျူးလွန်ရာတွင် ပါဝင်သူအားလုံးကို ရာဇဝတ်မှုဖြင့် တရားစွဲဆိုသွားမည်ဖြစ်သည်" ဟု သူမက ပြောကြားခဲ့သည်။
"အလားတူ အရေးယူဆောင်ရွက်မှုမျိုး ပြုလုပ်ရန်အတွက် အခြားသော သင်္ဘောအချို့ကိုလည်း တရားရေးဝန်ကြီးဌာနက စောင့်ကြည့်လျက်ရှိသည်။ ကမ်းခြေစောင့်တပ်ဖွဲ့ သို့မဟုတ် အခြားသော ဖက်ဒရယ်အရာရှိများ၏ ညွှန်ကြားချက်ကို လိုက်နာရန် ပျက်ကွက်သည့် မည်သည့်သင်္ဘောပေါ်မှမဆို မည်သူ့ကိုမဆို စုံစမ်းစစ်ဆေးပြီး ဥပဒေအရ အပြင်းထန်ဆုံး အရေးယူသွားမည်ဖြစ်သည်" ဟု ရှေ့နေချုပ်က ဆက်လက်ပြောကြားခဲ့သည်။
အစောပိုင်းတွင် အိမ်ဖြူတော် သတင်းပြန်ကြားရေးအတွင်းရေးမှူး ကာရိုလင်းလဲဗစ်(Karoline Leavitt)က နေ့စဉ်သတင်းစာရှင်းလင်းပွဲတွင် ပြောကြားရာ၌ အမေရိကန်ဖက်ဒရယ်ဥပဒေကို ချိုးဖောက်သည်ဟု ယူဆရသည့်အတွက် Marinera သင်္ဘောအမှုထမ်းများအား အမေရိကန်နိုင်ငံသို့ ခေါ်ဆောင်လာပြီး တရားစီရင်ရေးလုပ်ငန်းစဉ်များ ဆောင်ရွက်နိုင်ဖွယ်ရှိကြောင်း ပြောဆိုခဲ့သည်။
ပင်တဂွန်စစ်ဌာနချုပ်ကလည်း ရုရှားအလံလွှင့်ထူထားသည့် Marinera ရေနံတင်သင်္ဘောကို မြောက်အတ္တလန္တိတ်သမုဒ္ဒရာအတွင်း ဖမ်းဆီးထိန်းသိမ်းလိုက်ပြီဖြစ်ကြောင်း အစောပိုင်းက ထုတ်ပြန်ခဲ့သည်။ ပင်တဂွန်အကြီးအကဲ ပိထ်ဟက်ဆက်(Pete Hegseth) က ရုရှားသင်္ဘောကို ဖမ်းဆီးခြင်းသည် ဗင်နီဇွဲလားရေနံအပေါ် ပိတ်ဆို့အရေးယူမှုနှင့် ဆက်စပ်နေကြောင်း ပြောကြားခဲ့သည်။
ယနေ့ အစောပိုင်းတွင် ရုရှားသယ်ယူပို့ဆောင်ရေးဝန်ကြီးဌာနက ဇန်နဝါရီ ၇ ရက် မော်စကိုစံတော်ချိန် ညနေ ၃ နာရီခန့် (GMT ၀၀:၀၀ နာရီ) တွင် အမေရိကန်ရေတပ်အင်အားစုများသည် မည်သည့်နိုင်ငံ၏ ပိုင်နက်အတွင်းမှမဟုတ်သော နိုင်ငံတကာရေပိုင်နက်အတွင်း၌ အဆိုပါသင်္ဘောပေါ်သို့ တက်ရောက်စီးနင်းခဲ့ကြောင်း ပြောကြားခဲ့သည်။ ထို့နောက်တွင် သင်္ဘောနှင့် အဆက်အသွယ် ပြတ်တောက်သွားခဲ့သည်။ ၁၉၈၂ ခုနှစ် ကုလသမဂ္ဂ ပင်လယ်ပြင်ဥပဒေဆိုင်ရာ သဘောတူစာချုပ် (UNCLOS) ပါ ပြဋ္ဌာန်းချက်များအရ ပင်လယ်ပြင်သည် လွတ်လပ်စွာသွားလာခွင့်မူဖြင့် အုပ်ချုပ်ခြင်းဖြစ်ပြီး၊ အခြားနိုင်ငံတစ်ခု၏ လက်အောက်တွင် တရားဝင်မှတ်ပုံတင်ထားသော သင်္ဘောများကို မည်သည့်နိုင်ငံကမျှ အင်အားသုံး၍ အရေးယူပိုင်ခွင့်မရှိကြောင်း ဝန်ကြီးဌာနက အလေးပေးပြောကြားခဲ့သည်။
ရုရှားနိုင်ငံခြားရေးဝန်ကြီးဌာနကမူ မြောက်အတ္တလန္တိတ်သမုဒ္ဒရာအတွင်းရှိ ရုရှားအလံတင် Marinera သင်္ဘောပေါ်သို့ အမေရိကန်တပ်ဖွဲ့ဝင်များ တက်ရောက်စီးနင်းခဲ့သည့် သတင်းများနှင့်ပတ်သက်၍ မော်စကိုအနေဖြင့် အနီးကပ်စောင့်ကြည့်လျက်ရှိကြောင်း ထုတ်ပြန်ခဲ့သည်။ အမေရိကန်ဘက်အနေဖြင့် သင်္ဘောအမှုထမ်းများအပေါ် သင့်လျော်ပြီး လူသားဆန်စွာ ဆက်ဆံရန်၊ ၎င်းတို့၏ အခွင့်အရေးနှင့် အကျိုးစီးပွားများကို တိကျစွာ လိုက်နာရန်နှင့် ၎င်းတို့အား မိခင်နိုင်ငံသို့ အမြန်ဆုံးပြန်နိုင်ရေးအတွက် မည်သည့်အတားအဆီးမျှ မပြုလုပ်ရန် ရုရှားက တောင်းဆိုထားသည်။

YUFL မှ အင်္ဂလိပ်ဘာသာစကား Online နှင့် On Campus သင်တန်း ဖွင့်လှစ်မည်

တက္ကသိုလ်ဝင်စာမေးပွဲ အောင်မြင်သူများတတ်ရောက်နိုင်မည့် အင်္ဂလိပ်ဘာသာစကား Online နှင့် On Campus သင်တန်းကို YUFL မှ ဖွင့်လှစ်မည်ဖြစ်ကြောင်း သိရသည်။
အဆိုပါ Diploma in English Communication Skill သင်တန်းကို အွန်လိုင်းမှဖြစ်စေ၊ ကျောင်းတွင် လူကိုယ်တိုင်ဖြစ်စေ တက်ရောက်နိုင်မည်ဖြစ်ပြီး သင်တန်းကို ၂၀၂၆ ခုနှစ် ဇန်နဝါရီလ (၁၇) ရက်နေ့တွင် ဖွင့်လှစ်မည်ဖြစ်သည်။
Basic I (Online) သင်တန်း လျှောက်ထားသူများသည် အနိမ့်ဆုံးပညာအရည်အချင်း တက္ကသိုလ်ဝင်စာမေးပွဲ အောင်မြင်ထားရမည်ဖြစ်ပြီး ဇန်နဝါရီ (၈) ရက်နေ့၊ နေ့လည် (၁၂) နာရီတိတိတွင် Online Registration ပြုလုပ်ရမည်ဖြစ်သည်။
လူဦးရေ (၄၀၀) ပြည့်သည်နှင့် Registration Form အား စာရင်းပိတ်မည်ဖြစ်ပြီး Registration အောင်မြင်သူများကို ဇန်နဝါရီ (၉) ရက်နေ့ ည (၈) နာရီတွင် YUFL Facebook Page တွင် ကြေညာပေးမည်ဖြစ်သည်။
Registration အောင်မြင်သူများသည် YUFL KBZ Quick Pay ဖြင့် စာမေးပွဲကြေး (၃,၀၀၀) ကျပ်ကို ဇန်နဝါရီ (၁၁) ရက်နေ့မတိုင်မီ ပေးသွင်းရမည်ဖြစ်သည်။
ယင်းအပြင် ဇန်နဝါရီ (၁၁) ရက်နေ့ Page တွင်ကြေညာထားမည့် Exam Form ၌ငွေသွင်းချလန်အား Screenshot ရိုက်၍ အချက်အလက် ပြည့်စုံစွာ ဖြည့်စွက်မှသာ စာမေးပွဲဖြေဆိုရမည့် Link ကို အီးမေးလ်မှတဆင့် ရရှိမည်ဖြစ်ကြောင်း၊ ဇန်နဝါရီ (၁၃) ရက်နေ့ နံနက် (၁၀) နာရီတွင် ဝင်ခွင့်စာမေးပွဲ ဖြေဆိုရမည်ဖြစ်သည်။
ဝင်ခွင့်စာမေးပွဲအောင်စာရင်းကို ဇန်နဝါရီ (၁၅) ရက်နေ့ ကြေညာပေးမည်ဖြစ်ပြီး အမှတ်အများဆုံးရရှိသူ (၂၀၀) ဦးသာ သင်တန်းတက်ရောက်ခွင့်ရရှိမည်ဖြစ်ပြီး သင်တန်းတက်ရောက်ခွင့် မရရှိသူများအား စာမေးပွဲကြေး (၃,၀၀၀) ကျပ်အား ပြန်လည်ထုတ်ပေးမည် မဟုတ်ကြောင်း သိရသည်။

ကျိုက်ထီးရိုး စေတီတော်ကို ဇန်နဝါရီ ပထမအပတ်အတွင်း ခရီးသွား ခုနှစ်သောင်းနီးပါး ဝင်ရောက်ခဲ့

ကျိုက်ထီးရိုး စေတီတော်မြတ်ကြီးသို့ ယခုနှစ် ဇန်နဝါရီလ ပထမအပတ်အတွင်း ပြည်တွင်းပြည်ပ ခရီးသွားဧည့်သည် (၆၉,၀၀၀) ကျော် လာရောက်ဖူးမြော်ခဲ့သည်ဟု နိုင်ငံပိုင်သတင်းစာမှ သိရသည်။
နှစ်ဦးဖြစ်သည်နှင့်အညီ ကျိုက်ထီးရိုးစေတီတော်မြတ်သို့ အနယ်နယ်အရပ်ရပ်မှ ဘုရားဖူးပြည်သူများ စည်ကားသိုက်မြိုက်စွာဖြင့် နေ့စဉ်လာရောက်ဖူးမြော်ခဲ့ကြပြီး ယခုနှစ်ပထမအပတ်တွင်းပင် လာရောက်သူများပြားခဲ့ခြင်းဖြစ်သည်။
“ရင်ပြင်တော်ပေါ်မှာ ညဘက်ဆို ခြေချစရာတောင်မရှိဘူး၊ တည်းခိုခန်းတွေလည်း အပြည့်ပဲ၊ ဒီပိတ်ရက်တွေမှာလည်း လာဖို့ရှိကြအုံးမှာပါ” ဟု သွားရောက်ဖူးမျှော်ခဲ့သူတစ်ဦးထံမှလည်း သိရသည်။
ဘုရားဖူးလာရောက်ကြသည့် ပြည်သူများ၊ အန္တရာယ်ကင်းဝေးစေရန်နှင့် စိတ်ချမ်းမြေ့စွာ ဘုရားဖူးမြော်နိုင်ရန်အတွက် စေတီတော် ဘဏ္ဍာတော်ထိန်းဂေါပကအဖွဲ့နှင့် တာဝန်ရှိသူများက လုံခြုံရေး၊ အခမဲ့တည်းခိုနေထိုင်ရေး၊ စားသောက်ရေးနှင့် ကျန်းမာရေးစောင့်ရှောက်မှုများကို ကြပ်မတ်ဆောင်ရွက်ပေးလျက်ရှိသည်။
ကျိုက်ထီးရိုး‌ တောင်တော်တလျှောက် အထင်ကရနေရာများဖြစ်သည့် မုဆိုးတောင်တော်၊ ကျီးကန်းပါးစပ် လိုဏ်ဂူတော်၊ ကျောက်ထပ်ကြီး စေတီတော်၊ ရေတံခွန် စသည့်နေရာများ၊ ရင်ပြင်တော် ဈေးဆိုင်တန်းတစ်လျှောက်ရှိ ထမင်းဆိုင်များ၊ အမှတ်တရအရောင်းဆိုင်များ၌ ဘုရားဖူးများဖြင့် စည်ကားလျက်ရှိကြောင်းလည်း သိရသည်။

သီးနှံအာမခံစနစ်ကို အကောင်အထည်ဖော်ရာတွင် အစိုးရနှင့် ပုဂ္ဂလိကကဏ္ဍ ပူးပေါင်းဆောင်ရွက်သွားရန်ဖြစ်ပြီး အစိုးရအနေဖြင့် မူဝါဒရေးဆွဲခြင်းနှင့် အာမခံပရီမီယံကြေး သတ်မှတ်ပေးနိုင်‌ရေး ဆောင်ရွက်မည်ဖြစ်

သီးနှံအာမခံစနစ်ကို အကောင်အထည်ဖော်ရာတွင် အစိုးရနှင့် ပုဂ္ဂလိကကဏ္ဍ ပူးပေါင်းဆောင်ရွက်သွားရန်ဖြစ်ပြီး အစိုးရအနေဖြင့် လိုအပ်သည့် မူဝါဒ၊ ဥပဒေနှင့် လုပ်ထုံးလုပ်နည်းများကို ရေးဆွဲခြင်းနှင့် အာမခံပရီမီယံကြေး သတ်မှတ်ပေးနိုင်‌ရေးကိုလည်း စဉ်းစားဆောင်ရွက်သွားမည်ဖြစ်ကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ ပြည်ထောင်စုဝန်ကြီး ဦးမင်းနောင်က ပြောကြားခဲ့သည်။
စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၏ (၅၁) ကြိမ်မြောက် ဗုဒ္ဓဟူးနေ့စကားဝိုင်းဆွေးနွေးပွဲကို ရာသီဥတုဒ-ဏ်ကြောင့် သီးနှံအထွက်နှုန်း ထိခိုက်မှုကြောင့် တောင်သူအပေါ် ထိခိုက်မှုလျှော့ချရန် သီးနှံအာမခံစနစ် ပေါ်ပေါက်စေရေးခေါင်းစဉ်ဖြင့် ဇန်နဝါရီ ၈ ရက် မွန်းလွဲပိုင်းက ပြည်ထောင်စုဝန်ကြီးရုံး အစည်းအဝေးခန်းမ၌ ကျင်းပသည်။
ဆွေးနွေးပွဲတွင် ပြည်ထောင်စုဝန်ကြီး ဦးမင်းနောင်က သီးနှံအာမခံစနစ်ဆိုသည်မှာ တောင်သူများ အတွက်သာမက စားရေရိက္ခာဖူလုံရေး၊ ကျေးလက်ဒေသဖွံ့ဖြိုးရေး၊ နိုင်ငံ့စီးပွားတည်ငြိမ်ရေးအတွက်ပါ မဖြစ်မနေဖော်ဆောင်ရမည့်လုပ်ငန်းတစ်ခုဖြစ်ပါကြောင်း၊ ရိတ်သိမ်းခါနီးအချိန်တွင် မမျှော်လင့်ထားသည့် သဘာဝဘေးအန္တရာယ်တစ်ခုခုကြောင့် သီးနှံများပျ-က်စီးသွားပါက တောင်သူများ ရင်းနှီးမြှုပ်နှံထားသည့် အရင်းအနှီးများ ဆုံးရှုံးစေရုံသာမက တောင်သူတစ်ဦးချင်းစီ၏ မိသားစုဘဝကို ထိခိုက်စေပြီး နိုင်ငံတော်၏ စိုက်ပျိုးထုတ်လုပ်မှုကွင်းဆက် (Value Chain) တစ်ခုလုံးကိုပါ ထိခိုက်စေပါကြောင်း၊ ရာသီဥတုပြောင်းလဲဖြစ်စဉ်များကြောင့် သီးနှံအထွက်နှုန်းနှင့် တောင်သူအပေါ်ထိခိုက်မှုလျှော့ချနိုင်ရေးကို ထိရောက်စွာ ဖြေရှင်းနိုင်စေရန် တောင်သူများအတွက် နိုင်ငံတကာအသိအမှတ်ပြုသည့် သီးနှံအာမခံစနစ်ကို ထားရှိစေခြင်းဖြစ်ကြောင်း ပြောကြားသည်။
သီးနှံအာမခံစနစ်ကို ကြိုတင်ကာကွယ်မှုဆိုင်ရာ စီမံခန့်ခွဲမှုအဖြစ် စနစ်တကျ အကောင်အထည်ဖော်သွားကြရန်နှင့် သဘာဝဘေးကြောင့် သီးနှံပျ-က်စီးသည့်အခါ တောင်သူများအနေဖြင့် ထိုက်သင့်သည့် လျော်ကြေးငွေကို ပြန်လည်ရရှိစေပြီး နောက်တစ်ရာသီအတွက် ပြန်လည်စိုက်ပျိုးနိုင်ရန် အရင်းအနှီးရရှိစေမည်ဖြစ်ပါကြောင်း၊ သီးနှံအာမခံစနစ်ကို အကောင်အထည်ဖော်ရာတွင် အစိုးရနှင့် ပုဂ္ဂလိကကဏ္ဍ ပူးပေါင်းဆောင်ရွက်သွားရန်ဖြစ်ပြီး အစိုးရအနေဖြင့် လိုအပ်သည့် မူဝါဒ၊ ဥပဒေနှင့် လုပ်ထုံးလုပ်နည်းများကို ရေးဆွဲခြင်းနှင့် အာမခံပရီမီယံကြေး သတ်မှတ်ပေးနိုင်‌ရေးကိုလည်း စဉ်းစားဆောင်ရွက်သွားမည်ဖြစ်ပါကြောင်း ပြည်ထောင်စုဝန်ကြီးက ဆက်လက်ပြောကြားသည်။
ထို့နောက် စကားဝိုင်းဆွေးနွေးပွဲကို ဆက်လက်ကျင်းပရာ ရေဆင်းစိုက်ပျိုးရေးတက္ကသိုလ်၊ စိုက်ပျိုးရေးဦးစီးဌာန၊ စိုက်ပျိုးရေးသုတေသနဦးစီးဌာနတို့မှ ပညာရှင်များက ကဏ္ဍအလိုက် ရှင်းလင်းဆွေးနွေးကြပြီး စကားဝိုင်းဆွေးနွေးပွဲတက်ရောက်လာကြသူများ၊ အွန်လိုင်းဖြင့် ပါဝင်တက်ရောက်သည့် နေပြည်တော်ကောင်စီ၊ တိုင်းဒေသကြီးနှင့် ပြည်နယ်များမှ ကိုယ်စားလှယ်များက သိရှိလိုသည်များကို မေးမြန်းဆွေးနွေးခြင်း၊ အကြံပြုသုံးသပ်တင်ပြခြင်းများ ဆောင်ရွက်ခဲ့ကြောင်း သိရသည်။

မိမိတို့အနေဖြင့် နိုင်ငံတော်အားပါတီစုံဒီမိုကရေစီလမ်းကြောင်းပေါ်တွင် ဆက်လက်လျှောက်လှမ်းနိုင်ရေးဆောင်ရွက်သွားမည်ဟု နိုင်ငံတော် ယာယီသမ္မတပြော

မိမိတို့အနေဖြင့် နိုင်ငံတော်အားပါတီစုံဒီမိုကရေစီလမ်းကြောင်းပေါ်တွင် ဆက်လက်လျှောက်လှမ်းနိုင်ရေးဆောင်ရွက်သွားမည်ဟု နိုင်ငံတော် ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင် ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်မှ ယနေ့ ဇန်နဝါ ရီ ၈ ရက်နံနက်ပိုင်းက ပဲခူးတိုင်း၊ ပန်းတောင်းမြို့ရှိ မြို့နယ်အဆင့်ဌာနဆိုင်ရာတာဝန်ရှိသူများနှင့် ရပ်မိရပ်ဖများအားတွေ့ဆုံစဥ်ပြောကြားခဲ့ခြင်းဖြစ်သည်။
မိမိတို့အနေဖြင့် နိုင်ငံတော်အားစတင်တာဝန်ယူချိန်တွင် ဦးတည်ချက်များချမှတ်ဆောင်ရွက်ခဲ့ပြီး ယခုအခါ မိမိတို့အစိုးရ၏ အန္တိမရည်မှန်းချက်ဖြစ်သည့် ရွေးကောက်ပွဲအား ၂၀၂၅ ခုနှစ် ဒီဇင်ဘာ ၂၈ ရက်တွင်ကျင်းပခဲ့ပြီးဖြစ်ကာ ကျန်ရှိနေသည့် အပိုင်း(၂)နှင့်အပိုင်း(၃)ကိုလည်း ဆက်လက်ကျင်းပသွားမည်ဟု ပြောသည်။
" မိမိတို့အနေနဲ့ နိုင်ငံတော်ကို ပါတီစုံဒီမိုကရေစီလမ်း ကြောင်းပေါ်ဆက်လက်လျှောက်လှမ်းနိုင်ဖို့ ဆောင်ရွက်သွားမှာပါ။ ရွေးကောက်ပွဲအပိုင်း(၁)မှာ ဆန္ဒမဲပေးတာများပြားပြီး ပြည်သူတွေအနေနဲ့ ဒီမိုကရေစီလမ်းကြောင်းပေါ်မှာပါဝင်လျှောက်လှမ်းလိုတဲ့ ဆန္ဒတွေရှိတာကိုတွေ့ရှိရတာကြောင့် အောင်မြင်တဲ့ရွေးကောက်ပွဲဖြစ်ပါတယ်"ဟု နိုင်ငံတော် ယာယီသမ္မတက ပြော သည်။
ထို့ကြောင့် ပန်းတောင်းဒေသတွင်လည်း ရွေးကောက်ပွဲ ကျင်းပချိန်တွင်ဆန္ဒမဲပေးချိန်၌ ရာခိုင်နှုန်းများပြားစွာ ပိုမိုပေးအပ်နိုင်ရေး ဝိုင်းဝန်းကြိုးပမ်းဆောင်ရွက်စေလိုကာ ဆန္ဒမဲပေးရာတွင်လည်း နိုင်ငံတော်နှင့် ဒေသအကျိုးကို ဆောင်ရွက်ပေးနိုင်သည့်သူ၊ အမျိုးဘာသာသနာအကျိုးကို သယ်ပိုးထမ်းရွက်နိုင်မည့်သူ၊ နိုင်ငံတည်ရှိနေသရွေ့တည်တံ့ခိုင်မြဲစွာတည်ရှိနေမည့် တပ်မတော်နှင့် လက်တွဲဆောင်ရွက်နိုင်မည့် ကိုယ်စားလှယ်လောင်းများကိုရွေးချယ်၍ ဆန္ဒမဲပေးနိုင်ရန်လိုသည်ဟု ပြောသည်။
ထို့အတူ ဥပဒေပြုရေးလုပ်ငန်းများကိုဆောင်ရွက်မည့်သူများဖြစ်၍ ဥပဒေကိုသိရှိနားလည်ကြသူများဖြစ်ရန်လိုကာ အထူးသဖြင့် ပညာတတ်ကိုယ်စားလှယ်လောင်းများကို ရွေးချယ်နိုင်မှသာ ပန်းတောင်းမြို့နယ်အတွက် ကိုယ်စားလှယ်ကောင်းများရရှိမည်ဖြစ်၍ ပန်းတောင်းမြို့နယ်အတွင်းကျင်းပမည့် ရွေးကောက်ပွဲအောင်မြင်စွာကျင်းပနိုင်ရေးအတွက် ဝိုင်းဝန်းဆောင်ရွက်ကြရန် နိုင်ငံတော် ယာယီသမ္မတက တိုက်တွန်းပြောကြားခဲ့သည်။
ထို့နောက် နိုင်ငံတော်ယာယီသမ္မတမှ ခင်းကျင်းပြသထားသည့် ပန်းတောင်းမြို့နယ်အတွင်းရှိအငယ်စားနှင့် အလတ်စားစီးပွားရေး(MSME)လုပ်ငန်းများမှထွက်ရှိသည့် ထုတ်ကုန်ပစ္စည်းများအားကြည့်ရှုခဲ့သည်။

ထုတ်လုပ်လိုက်သည့် စက်ပစ္စည်းများအရည်အသွေး ပြည့်မီစေရေးအတွက် စနစ်တကျသုတေသနပြု ထုတ်လုပ်ရန် ဗိုလ်ချုပ်မှူးကြီးမင်းအောင်လှိုင်မှာကြား

နိုင်ငံတော် ယာယီသမ္မတ၊ နိုင်ငံတော်လုံခြုံရေးနှင့် အေး ချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်မှ ယနေ့ ဇန်နဝါရီ ၈ ရက်က ပဲခူးတိုင်း၊ ဆင်တဲနှင့် ထုံးဘိုတို့ရှိ နယ်မြေခံတပ်မတော်အကြီးစားစက် ရုံများ၌ လယ်ယာသုံးစက်ကိရိယာများ၊ မော်တော်ယာဉ်များထုတ်လုပ်နေမှုအခြေအနေတို့ကိုကြည့်ရှုစစ်ဆေးစဥ် ထုတ်လုပ်လိုက်သည့် စက်ပစ္စည်းများအရည်အသွေး ပြည့်မီစေရေးအတွက် စနစ်တကျသုတေသနပြုထုတ် လုပ်ရန် မှာကြားခဲ့သည်။
မြန်မာနိုင်ငံသည် စိုက်ပျိုးရေးလုပ်ငန်းကို အဓိကစီးပွား ရေးအဖြစ်ဆောင်ရွက်သည့်နိုင်ငံဖြစ်၍ နိုင်ငံတော်၏ လယ်ယာစိုက်ပျိုးရေးကဏ္ဍတိုးတက်စေရေးအတွက် လိုအပ်သည့် လယ်ထွန်စက်များနှင့် စက်ကိရိယာများအား ပိုမိုတိုးတက်ထုတ်လုပ်နိုင်ရေးဆောင်ရွက်ရမည်ဖြစ်ကာ စက်ရုံ၏ကုန်ထုတ်လုပ်ငန်းများအတွက် လိုအပ်သောကျွမ်းကျင်လုပ်သားများရရှိစေရေးဆောင် ရွက်ရမည်ဟု မှာကြားသည်။
" ထုတ်လုပ်လိုက်တဲ့ စက်ပစ္စည်းတွေ အရည်အသွေး ပြည့်မီစေဖို့အတွက် စနစ်တကျသုတေသနပြုထုတ် လုပ်သွားဖို့လိုပါတယ်။ ဝန်ထမ်းတွေရဲ့လုပ်ငန်းခွင်ကျွမ်းကျင်မှုအလိုက် ချီးမြှင့်မှုတွေဆောင်ရွက်ပေးဖို့လိုပါတယ်"ဟု ဗိုလ်ချုပ်မှူးကြီးမင်းအောင်လှိုင်က မှာကြားသည်။
ထို့ပြင် မော်တော်ယာဉ်များထုတ်လုပ်ရာတွင် အစိတ်အ ပိုင်းများအားလုံးကို မိမိတို့ကိုယ်တိုင်ထုတ်လုပ်အသုံး ပြုနိုင်ရန်လိုပြီး အစိတ်အပိုင်းများအား ပိုမိုတိုးမြှင်ေထုတ်လုပ်နိုင်ရေး စဉ်ဆက်မပြတ်ကြိုးပမ်းဆောင်ရွက်ရန်လိုကာ ထုတ်လုပ်ပြီးစက်ပစ္စည်းအစိတ်အပိုင်းများအား တစ်ခုချင်းစီအလိုက် အရည်အသွေးစမ်းသပ်ခြင်းများဆောင်ရွက်ပြီးမှသာ တပ်ဆင်အသုံးပြုရမည်ဖြစ်ပြီး မော်တော်ယာဉ်အရည်အသွေးစစ်ဆေးခြင်း၊ စမ်းသပ်မောင်းနှင်ခြင်းများကို စနစ်တကျဆောင်ရွက်၍ အ ရေအတွက်ပိုမိုတိုးမြှင့်ထုတ်လုပ်နိုင်ရေးနှင့် အရည်အ သွေးပိုမိုကောင်းမွန်လာရေးတို့ကို ဆက်လက်ကြိုးပမ်းဆောင်ရွက်ရမည်ဟု ဗိုလ်ချုပ်မှူးကြီးမင်းအောင်လှိုင်က မှာကြားခဲ့သည်။
ဗိုလ်ချုပ်မှူးကြီးမင်းအောင်လှိုင်မှ တပ်မတော်အကြီးစားစက်ရုံ(ဆင်တဲ)မှထုတ်လုပ်သည့် လက်ဆွဲကောက် စိုက်စက်နှင့် Manual Drum Seeder များ၊ ဆက်စပ်ပစ္စည်းများထုတ်လုပ်နေမှု၊ သံရည်ကြိုအလုပ်ရုံအတွင်း စက်ပစ္စည်းအစိတ်အပိုင်းများသွန်းလောင်းထုတ်လုပ်နေမှု၊ သံဂဟေချောင်းအလုပ်ရုံအတွင်း သံဂဟေချောင်းများ အဆင့်ဆင့်ထုတ်လုပ်နေမှု၊ တပ်မတော် အကြီးစားစက်ရုံ(ထုံးဘို)တွင် အလုပ်ရုံများအတွင်း မော်တော်ယာဉ်များထုတ်လုပ်နေမှုလုပ်ငန်းစဉ်အဆင့်ဆင့်၊ ထုတ်လုပ်ပြီးမော်တော်ယာဉ်များအား စစ်ဆေးစမ်းသပ်နေမှုနှင့် ထုတ်လုပ်ထားရှိသည့် မော်တော်ယာဉ်များအားကြည့်ရှုစစ်ဆေးခဲ့သည်။

ဘာကီနာဖာဆို စစ်ခေါင်းဆောင်ကို လုပ်ကြုံသတ်ဖြတ်ဖို့ ကြိုးပမ်းမှု မအောင်မြင်

ဘာကီနာဖာဆို၏ စစ်ခေါင်းဆောင် ဗိုလ်မှူးကြီး အီဘရာဟင် ထရာအိုရေးကို လုပ်ကြံသတ်ဖြတ်ဖို့ ကြံစည်မှုကို ဟန့်တားနိုင်ခဲ့တာကြောင့် ပျက်ပြားသွားတယ်လို့ တာဝန်ရှိသူတွေက ပြောပါတယ်။
၂၀၂၂ ခုနှစ် စက်တင်ဘာလမှာ ထရာအိုရေး ရာထူးမှ ဖြုတ်ချခံခဲ့ရတဲ့ စစ်ဘက်အရာရှိ ဒုတိယဗိုလ်မှူးကြီး ပေါလ် ဟင်နရီ ဒါမီဘာက လုပ်ကြံသတ်ဖြတ်ဖို့ ကြံစည်ခဲ့တာဖြစ်ကြောင်း ပြည်ထဲရေးဝန်ကြီးက ပြောပါတယ်။
" ထောက်လှမ်းရေးဌာနတွေဟာ နောက်ဆုံးနာရီတွေအတွင်း ဒီစစ်ဆင်ရေးကို ကြားဖြတ်နိုင်ခဲ့ပါတယ်။ သူတို့ဟာ နိုင်ငံတော်အကြီးအကဲကို လုပ်ကြံပြီးနောက် အရပ်ဘက်ပုဂ္ဂိုလ်တွေအပါအဝင် အခြားအဓိက အဖွဲ့အစည်းတွေကိုပါ တိုက်ခိုက်ဖို့ စီစဉ်ခဲ့ပါတယ်။ "လို့ လုံခြုံရေးဝန်ကြီး မဟာမာဒူ ဆာနာက ပြောပါတယ်။
ဒီကြံစည်မှုကို အိမ်နီးချင်း အိုင်ဗရီကို့စ်နိုင်ငံမှ ရန်ပုံငွေထောက်ပံ့ခဲ့တယ်လို့ စွပ်စွဲထားပါတယ်။ စွပ်စွဲချက်တွေကို ဗိုလ်မှူးကြီး ဒါမီဘာ သို့မဟုတ် အိုင်ဗရီကို့စ်နိုင်ငံမှ မှတ်ချက်တစုံတရာ မပေးပါဘူး။
အာဏာသိမ်းပြီးကတည်းက ဗိုလ်မှူးကြီး ထရာအိုရေးဟာ သူ့ကို အာဏာသိမ်းမှု နှစ်ကြိမ်နဲ့ ရင်ဆိုင်ခဲ့ရပြီး လူသန်းပေါင်းများစွာ နေရပ်စွန့်ခွာခဲ့ရတဲ့ အစ္စလာမ္မစ်အကြမ်းဖက်မှုတွေနဲ့လည်း ရင်ဆိုင်နေခဲ့ရပါတယ်။
လုံခြုံရေးဝန်ကြီး၏ အဆိုအရ ကြံစည်သူတွေ အစီအစဉ်များအကြောင်း ဆွေးနွေးနေတဲ့ ရုပ်သံမှတ်တမ်းတခုရရှိခဲ့ပြီး ဇန်နဝါရီလ ၃ ရက် စနေနေ့ ဒေသစံတော်ချိန် ည ၁၁ နာရီနောက်ပိုင်းမှာ သမ္မတကို အနီးကပ် သို့မဟုတ် သူ့နေအိမ်တွင် ဖောက်ခွဲရေးပစ္စည်းတွေကို ဖောက်ခွဲတိုက်ခိုက်ဖို့ တိုင်ပင်နေကြတယ်လို့ ဆိုပါတယ်။
ဗိုလ်မှူးကြီး ဒါမီဘာဟာ စစ်သားတွေနဲ့ အရပ်ဘက်ထောက်ခံသူတွေကို စည်းရုံးခဲ့ပြီး အထူးသဖြင့် အိုင်ဗရီကို့စ်မှ ပေးပို့တဲ့ နိုင်ငံခြားရန်ပုံငွေ ဒေါ်လာ တသိန်းနှစ်သောင်းကျော် ရရှိခဲ့ပြီး နိုင်ငံခြားတပ်ဖွဲ့တွေ ဝင်ရောက်စွက်ဖက်မှုမပြုမီ နိုင်ငံရဲ့ ဒရုန်းလွှတ်တင်ရေးစခန်းကို ဖျက်ဆီးဖို့ စီစဉ်ထားတယ်လို့ ပြောပါတယ်။
"ဒီကိစ္စနဲ့ပတ်သက်လို့ စုံစမ်းစစ်ဆေးမှုတွေကို ဆက်လက်လုပ်ဆောင်နေပြီး အများအပြားကို ဖမ်းဆီးခဲ့ပါတယ်။ ဒီလူတွေကို မကြာမီ တရားစီရင်ခံရမယ် "လို့ လုံခြုံရေးဝန်ကြီးက ပြောပါတယ်။ ဒါပေမယ့် လူဘယ်လောက် ဖမ်းဆီးထားတယ်ဆိုတာကို အသေးစိတ်မသိရသေးပါဘူး။

ရန်ကုန်- မော်လမြိုင်လမ်းမှာ ရပ်ထားတဲ့ကုန်ကားကို ပရိုဘောက်ဝင်တိုက်လို့ သုံးယောက်သေ

ပဲခူးတိုင်း ၊ ဝေါမြို့နယ်၊ ရန်ကုန်- မော်လမြိုင် လမ်းမကြီး၊ မိုင်တိုင်အမှတ် (၆/၄) ဖာလုံ မှာ ညက ယာဥ်တိုက် မှုဖြစ်ပွားပြီး သုံးယောက်သေဆုံးကာ ကလေးတယောက် ပြင်းထန် ဒဏ်ရာတွေ ရရှိခဲ့တယ်လို့ ဝေါမြို့နယ် မီးသတ်ဌာနက သိရပါတယ်။
ဖြစ်စဥ်မှာ ဒီကနေ့ ဇန်နဝါရီ ၈ ရက်နေ့ ၊ မနက်အစောပိုင်း ၁ နာရီ မထိုးခင် လောက်မှာ ရန်ကုန်- မော်လမြိုင်လမ်းပေါ် ရပ်ထားတဲ့ ၂၂ ဘီး ကုန်ကားကို ပရိုဘောက်က နောက်ကနေ ဝင်တိုက်မိပြီး ကားပေါ်ပါသူထဲက အမျိုးသားနှစ်ယောက် နဲ့ အမျိုးသမီးတယောက် သေဆုံးကာ ကလေးငယ် တယောက် ထိခိုက်ဒဏ်ရာ ရရှိခဲ့တာ ဖြစ်တယ်လို့ သိရပါတယ် ။
သေဆုံးသူတွေက ရန်ကုန် မြောက်ဒဂုံမြို့နယ်မှာ နေထိုင်တဲ့ ဒေါ်တင်တင်လှိုင် နဲ့ ဦးဇေယျာလင်း တို့နဲ့ နောက်ထပ်အမျိုးသား တ​ယောက်တို့ ဖြစ်ကြောင်း သိရပြီး ၊ ထိခိုက် ဒဏ်ရာရရှိခဲ့တဲ့ ကလေးငယ်ကတော့ ဦးဇေယျာလင်း နဲ့ ဒေါ်တင်တင်လှိုင်တို့ရဲ့ အသက် ၁၀ နှစ်အရွယ် သမီးဖြစ်သူ ဖြစ်ပါတယ်။
ယာဥ်တိုက်မှုကြောင့် ကလေးငယ်မှာ ဘယ်ဘက် နားထင် ပေါက်ပြဲ သွေးထွက်ဒဏ်ရာ နဲ့ ရင်ဘတ်အောင့်ဒဏ်ရာတွေ ရရှိခဲ့ပြီး စိုးရိမ်ရတဲ့ အခြေအနေရှိတာကြောင့် အတွင်းလူနာအဖြစ် ဆေးကုသမှု ခံယူနေရတယ်လို့ သိရပါတယ်။
"ညက ၁၂ နာရီ ခွဲလောက်မှာ ဖြစ်တာ ။ စက်ချို့ယွင်းလို့ ရပ်ထားတဲ့ ကုန်ကားကို ပရိုဘောက်က နောက်ကနေ ဝင်တိုက်တာပါ။ ပရိုဘောက်က ရန်ကုန် ဘက်နေ လာတာ ။ သုံးယောက်က နေရာမှာ ပွဲချင်းပြီးဆုံးပါတယ်။ကလေး တယောက်ကတော့ ဒဏ်ရာပြင်းထန်တယ် ။ " လို့ ဝေါမြို့နယ် မီးသတ်ဌာနမှ တာဝန်ကျ တပ်ဖွဲ့ဝင် တ​ယောက်က ပြောပါတယ်။
လက်ရှိမှာတော့ အဆိုပါ ယာဥ်တိုက်မှု နဲ့ ပတ်သက်ပြီး ရပ်တန့်ထား ၂၂ ဘီး ကုန်တင်ကား ယာဥ်မောင်းကို လိုက်နာရမယ့် စည်းမျဥ်း စည်းကမ်းကို မလိုက်တာတဲ့အတွက် လူသေဆုံးတဲ့အထိ ဖြစ်စေခဲ့တယ်ဆိုပြီး ဝေါမြို့မရဲစခန်းက ရာဇသတ်ကြီးပုဒ်မ ၃၀၄-က/၃၃၈/၂၇၉ နဲ့ အမှုဖွင့်အရေးယူထား တယ်လို့ သိရပါတယ်။
ဇန်နဝါရီ ၁ ရက်နေ့ မနက်အစော ၄ နာရီ ကျော်လောက်ကလည်း ရန်ကုန်- ပုသိမ်လမ်းမပေါ်၊ ငွေဗျိုင်းဖြူဆီဆိုင်အနီးမှာ ရပ်ထားတဲ့ ဆန်ကားကို အိမ်စီးကားက နောက်ကနေ ဝင်တိုက်မိပြီး အမျိုးသား တယောက်နဲ့ အမျိုးသမီးတယောက်တို့ သေဆုံးကာ နောက်ထပ် နှစ်ယောက် ပြင်းထန် ဒဏ်ရာ ရရှိခဲ့တယ်လို့ သိရပါတယ် ။