ပြင်သစ်အသင်းမှ ကိုနာတေး နုတ်ထွက်ရမှုနှင့်အတူ ကြီးမားတဲ့ ထိုးနှက်ချက် ကြုံလာရတဲ့ လီဗာပူး

အောက်တိုဘာ ၁၂

ပရီးမီးယားလိဂ်ချန်ပီယံ လီဗာပူးဟာ ပြင်သစ်လက်ရွေးစင်အသင်းမှ အီဘရာဟမ်ကိုနာတေး နုတ်ထွက်ရမှုနှင့်အတူ ကြီးမားတဲ့ ထိုးနှက်ချက် ကြုံလာရပါတယ်။

ကိုနာတေးဟာ ပြီးခဲ့တဲ့အပတ်တုန်းက ချဲလ်ဆီးအား ၂-၁ ဂိုးဖြင့် ရှုံးနိမ့်တဲ့ပွဲစဉ်တွင် ဒဏ်ရာရရှိကာ ပွဲချိန် ၅၆ မိနစ်မှာ လူစားလဲခဲ့ရပေမယ့်လည်း ပြင်သစ်အသင်းမှာ ရွေးချယ်ခြင်းခံခဲ့ရပါတယ်။

သူဟာ အဇာဘိုင်ဂျန်အား အနိုင်ရတဲ့ပွဲမှာ ပြင်သစ်အသင်းအရန်ခုံမှာ ထိုင်နေခဲ့ရပါတယ်။

ဒါပေမယ့် သူဟာ ဒဏ်ရာအခြေအနေ တိုးတက်လာခြင်း မရှိမှုနှင့်အတူ အိမ်ပြန်ပို့ခံလာရပြီလည်း ဖြစ်ပါတယ်။ သူဟာ လာမယ့်အပတ်တွင် အိုက်စလန်အား အဝေးကွင်းသို့ သွားရောက် ရင်ဆိုင်ရမယ့်ပွဲစဉ်တွင် ပါဝင်လာမှာ မဟုတ်ပါဘူး။

လီဗာပူးဟာ ချဲလ်ဆီးနှင့်ပွဲ ဒုတိယပိုင်းတွင် လူစားလဲလှယ်ခံရပြီးနောက် ဥမင်လှိုဏ်ခေါင်းသို့ တန်းဆင်းသွားခဲ့တဲ့ ကိုနာတေးအခြေအနေအပေါ် အစောပိုင်းကတည်းက စိုးရိမ်နေခဲ့တာပါ။

လီဗာပူးဟာ ဂျီယိုဗန်နီလီယွန်နီ ကာလရှည်ကြာ အနားယူရမှုနှင့်အတူ ခံစစ်ပြဿနာကြုံနေရပါတယ်။

ကိုနာတေးဟာ ပြင်သစ်အသင်းမှ နုတ်ထွက်ကာ လီဗာပူးနှင့် စောစောစီးစီး ပူးပေါင်းလာပေမယ့်လည်း နိုင်ငံတကာပွဲများအပြီး ခါးသီးတဲ့ ပြိုင်ဘက် ယူနိုက်တက်နှင့်ပွဲမှာ ပါဝင်လာနိုင်မလားဆိုတာ အတိအကျ မသိရသေးပါဘူး။

#ဘောလုံးသတင်းစုံ

မီးအားမြှင့်စက်အသုံးပြုရာမှ စက်ချို့ယွင်း၍ မြင့်မိုရ်ဧည့်ရိပ်သာ မီးလောင်မှုဖြစ်ပွား

အောက်တိုဘာ ၁၂

ရန်ကုန်တိုင်းဒေသကြီး၊ အင်းစိန်မြို့နယ်၊ စော်ဘွားကြီးကုန်းရပ်ကွက်၊ လမ်းသစ်လမ်းရှိ မြင််မိုရ်တည်းခိုခန်းတွင် အောက်တိုဘာလ ၁၁ ရက် ည ၇ နာရီ မိနစ်၂၀ ခန့်ကမီးလောင်မှုဖြစ်ပွားခဲ့ရာ ဘုရားခန်းအတွင်း မီးအားမြှင့်စက် အသုံးပြုရာမှ စက်ချို့ယွင်း၍ Overload​ ဖြစ်ကာ မီးပွားထွက်၍ အနီးရှိ အဝတ်အထည်များပေါ်သို့ မီးကူးစက်ရာမှ မီးလောင်မှုဖြစ်ပွားခဲ့ကြောင်း သိရသည်။

မီးလောင်မှုကြောင့် အလျား ၂၆ ပေ၊ အနံ ၂၀၆ ပေရှိ သွပ်မိုး၊ အုတ်ညှပ် သုံးထပ်တည်းခိုခန်းရှိ ဒုတိယထပ်နှင့်တတိယထပ်မှ အခန်း ၉ ခန်းနှင့် အတွင်းပစ္စည်းများ မီးလောင်ဆုံးရှုံးခဲ့ကြောင်း သိရသည်။

မိနစ် ၅၀ ကျော်ကြာလောင်ကျွမ်းခဲ့သော မီးလောင်မှုကို မီးငြှိမ်းသတ်ယာဥ် ၁၇ စီး၊ ရေသယ်ယာဥ် ၈ စီး၊ အထောက်အကူပြုယာဥ် ၂ စီး၊ ကွပ်ကဲမှုယာဥ် ၁ စီးနှင့် သန္ဓေ အရန်မီးသတ်တပ်ဖွဲ့ဝင် ၂၀၀ ခန့်ဖြင့် ငြှိမ်းသတ်ခဲ့ရာ ည ၈ နာရီ ၁၁ မိနစ်ခန့်တွင် မီးငြိမ်းခဲ့ကြောင်း သိရသည်။

တည်းခိုခန်းမီးလောင်မှုကြောင့် အသက် ၃၆ နှစ်အရွယ် မန်နေဂျာအမျိုးသားကို ရာဇသတ်ကြီးပုဒ်မ ၂၈၅ ဖြင့် အင်းစိန်မြို့မရဲစခန်းက အမှုဖွင့်အရေးယူထားကြောင်း သိရသည်။

Credit - MT News Agency

#centralnewsnaypyitaw

အွန်လိုင်းဆယ်လီ သမီးဆိုး ရန်ကုန်လေဆိပ်မှာ ဖမ်းဆီးထိန်းသိမ်းခံရ

အောက်တိုဘာ ၁၂ - ၂၀၂၅
SS (VOM)

အွန်လိုင်းဆယ်လီ သမီးဆိုး (ခ) သက်ကိုကို ကို သက်ဆိုင်ရာ လုံခြုံရေးအဖွဲ့က ရန်ကုန်အပြည်ပြည်ဆိုင်ရာ လေဆိပ်မှာ ဒီကနေ့ အောက်တိုဘာ ၁၂ ရက်၊ မနက်ပိုင်းက ဖမ်းဆီး ထိန်းသိမ်းလိုက်ပြီ ဖြစ်တယ်လို့ စုံစမ်း သိရှိရပါတယ်။

ရန်ကုန် အပြည်ပြည်ဆိုင်ရာ လေဆိပ်ကနေ စင်္ကာပူနိုင်ငံကို ထွက်ခွာဖို့ ပြင်ဆင်နေချိန် ဒီကနေ့ မနက် ၇ နာရီခွဲမှာ ဖမ်းဆီး ထိန်းသိမ်းခံလိုက်ရတာ ဖြစ်တယ်လို့ ဒီဖြစ်စဉ်ကို သိရှိသူတယောက်က ပြောပါတယ်။

“သူက လေယာဉ်ပေါ်ရောက်မှ ဖမ်းခံရတာ မဟုတ်ပါဘူး။ ဘိုရင်းခေါ်နေတဲ့ အချိန်မှာပဲ မိတာပါ။ လေယာဉ်ပေါ်ကို မရောက်သေးပါဘူး။ ပြီးတော့ သူက ရုပ်လည်း မဖျက်ထားပါဘူး။ ကွာတားဘောင်းဘီနဲ့ ဦးထုပ်ပဲ ဆောင်းထားတာ။ လက်ရှိကတော့ မင်္ဂလာဒုံရဲစခန်းမှာ ထိန်းသိမ်းခံထားရပါတယ်။ အမှု အခြေအနေကိုတော့ မသိရသေးပါဘူး” လို့ သူက ပြောပါတယ်။

သမီးဆိုး (ခ) သက်ကိုကိုဟာ နာမည်ကျော် အနုပညာရှင်တွေရဲ့ ပုဂ္ဂိုလ်ရေးဆိုင်ရာ အတွင်းရေးတွေကို လူမှုကွန်ရက်မှာ ဝေဖန် ပြောဆိုခဲ့ရာက လူသိများလာသူ ဖြစ်ပါတယ်။

လက်ရှိ ထွက်ပေါ်နေတဲ့ သတင်းတွေအရ သမီးဆိုး (ခ) သက်ကိုကို ဆိုသူ အမျိုးသမီးကို တိုင်ကြားခဲ့သူမှာ ဒေါ်အေသင်ကို ဆိုသူ အမျိုးသမီး ဖြစ်တယ်လို့ သိရပြီး အောက်တိုဘာ ၆ ရက်နေ့က ပြင်ဦးလွင် မြို့မရဲစခန်းမှာ (ပ)၂၁၅/၂၀၂၅၊ ဆက်သွယ်ရေး ဥပဒေပုဒ်မ ၆၆ (ဃ) နဲ့ အမှုဖွင့် တိုင်ကြားထားတာ ဖြစ်တယ်လို့ သိရပါတယ်။

ဒါအပြင် ဒေါ်အေသင်ကိုရဲ့ လူမှုကွန်ရက် စာမျက်နှာမှာလည်း “၅-၁၀-၂၀၂၅ နေ့တွင် မြန်မာနိုင်ငံ တည်ဆဲ ဥပဒေနှင့်အညီ တရားဝင် အမှုတစ်ခု ဖွင့်ခဲ့ပြီး လုပ်ငန်းစဉ် အားလုံးကို ဥပဒေနှင့်အညီ တရားဝင်သာ အဆင့်ဆင့် လုပ်ဆောင်ထားသည့် အတွက် သက်ဆိုင်သည့် ဌာနများမှ ဥပဒေနှင့်အညီ ကူညီဆောင်ရွက်ပေးသည့် သက်ဆိုင်ရာဌာန အားလုံးအား ကျေးဇူးတင်ပါတယ်ရှင်” လို့ ရေးသားထားတာ တွေ့ရပါတယ်။

ဒါနဲ့ ပတ်သက်လို့ ဒေါ်အေသင်ကိုက ရှေ့နေနဲ့တကွ အများသိစေရန် ကြေညာထားတဲ့ ကြေညာချက် တစောင်မှာပါရှိတဲ့ ဖုန်းနံပါတ်တွေကို VOM က ဆက်သွယ်ကြည့်ရာမှာတော့ ဒေါ်အေသင်ကို ခရီးသွားနေပါတယ်လို့ သူမရဲ့ ဝန်ထမ်းအမျိုးသမီး တယောက်က ပြန်လည် ဖြေကြားခဲ့ပါတယ်။

သမီးဆိုး (ခ) သက်ကိုကိုဟာ အမေရိကန်နိုင်ငံမှာ နေထိုင်သူဖြစ်ပြီး ပြီးခဲ့တဲ့ စက်တင်ဘာလအတွင်း မြန်မာနိုင်ငံကို ရောက်ရှိနေရာမှ ဒေါ်အေသင်ကိုက လူမှုကွန်ရက်ပေါ်မှာ သမီးဆိုး (ခ) သက်ကိုကိုက သူမ မိသားစုအပေါ် ပြောဆိုခဲ့တာ တွေအတွက် တွေ့ဆုံ ဖြေရှင်းဖို့ ပြောကြားခဲ့တာ တွေ့ရပါတယ်။

အဲဒီလို အမှုဖွင့်လိုက်ပြီး နောက်ပိုင်း ပြည်ပကို ပြန်လည် ထွက်ခွာဖို့ ရန်ကုန်လေဆိပ်ကို ရောက်လာချိန်မှာ ထိန်းသိမ်းလိုက်ရတာ ဖြစ်တယ်လို့ သိရပါတယ်။

ဒီဖြစ်စဉ်နဲ့ ပတ်သက်လို့ သက်ဆိုင်ရာ တာဝန်ရှိသူတွေက လက်ရှိအချိန်အထိ တစုံတရာ သတင်း ထုတ်ပြန်ထားခြင်း မရှိသေးပါဘူး။

Photo - Shwe Thet (F

Credit - Voice of Myanmar

#သတင်းဟင်းလေးအိုးကြီး

ရီးရဲလ်မက်ဒရစ်ရဲ့ ၂၀၂၆ ပြက္ခဒိန်တွင် ဘယ်လင်ဂမ်နှင့် အလက်ဇန္ဒားအာနိုးတို့ ချန်လှပ်ခံရ

အောက်တိုဘာ ၁၂

အင်္ဂလန်စတားများဖြစ်ကြတဲ့ ဂျူ့ဘယ်လင်ဂမ်နှင့် ထရန်းအလက်ဇန္ဒားအာနိုးတို့ဟာ ရီးရဲလ်မက်ဒရစ်ရဲ့ ၂၀၂၆ ခုနှစ်အတွက် ပြက္ခဒိန်ထုတ်လုပ်ရောင်းချတွင် ပါဝင်ခွင့် မရရှိလာကြပါဘူး။

ရီးရဲလ်မက်ဒရစ်ဟာ ၂၀၂၆ ခုနှစ်အတွက် ထုတ်လုပ်ထားတဲ့ ပြက္ခဒိန်ဓာတ်ပုံတွင် ထရန်းအလက်ဇန္ဒားအာနိုးနှင့် ဂျူ့ဘယ်လင်ဂမ်တို့ကို ချန်လှပ်ပြီး အာဒါဂူလာ၊ ဒိန်းဟူဆင်၊ ကိုင်လီယန်ဘက်ပေး၊ ဗီနီရှပ်စ်ဂျူနီယာ၊ ဗယ်ဗာဒီ၊ ကော့တွိုက်စ်တို့ ၆ ဦးကိုသာ ထည့်သွင်းထားပါတယ်။

ဒါ့အပြင် ရီးရဲလ်မက်ဒရစ်ရဲ့ စီနီယာကစားသမားများဖြစ်ကြတဲ့ အသင်းခေါင်းဆောင်ဒါနီကာဗာဂျယ်၊ အီဒါမီလီတာအိုနှင့် အန်တိုနီယိုရူဒီဂါတို့လည်း ၂၀၂၆ ခုနှစ် ပြက္ခဒိန်တွင် ပါဝင်ခွင့် မရရှိကြပါဘူး။

ဘယ်လင်ဂမ်ဟာ ၂၀၂၆ ခုနှစ် ပြက္ခဒိန်ဓာတ်ပုံတွင် ချန်လှပ်ခံခဲ့ရပေမယ့်လည်း ၂၀၂၅ ခုနှစ် ပြက္ခဒိန်မှာတော့ ပါဝင်ခဲ့ပါတယ်။

ရီးရဲလ်မက်ဒရစ်ဟာ ၂၀၂၆ ခုနှစ် ပြက္ခဒိန်အား ပေါင် ၁၀.၉၉ ဖြင့် ရောင်းချနေပါတယ်။

ရီးရဲလ်မက်ဒရစ်ဟာ ရုပ်ပုံလွှာအသုံးခနှင့်ပတ်သက်ပြီး သဘောတူညီမှု မရရှိမှုနှင့်အတူ ဘယ်လင်ဂမ်နှင့် ထရန်းအလက်ဇန္ဒားအာနိုးတို့ကို ချန်လှပ်ခဲ့သလားဆိုတာ အတိအကျ မသိရပါဘူး။

#ဘောလုံးသတင်းစုံ

ဆက်သွယ်ရေးဥပဒေပုဒ်မ ၆၆(ဃ)ဖြင့် အမှုဖွင့်တိုင်ကြားခံထားရသည့် သမီးဆိုး(ခ)သက်ကိုကို ကို သက်ဆိုင်ရာက ဖမ်းဆီးထိန်းသိမ်း

အောက်တိုဘာ ၁၂

ဆက်သွယ်ရေးဥပဒေပုဒ်မ ၆၆(ဃ)ဖြင့် အမှုဖွင့်တိုင်ကြားခံထားရသည့် သမီးဆိုး(ခ)သက်ကိုကို ကို သက်ဆိုင်ရာက ဖမ်းဆီးထိန်းသိမ်းလိုက်ကြောင်း လုံခြုံရေးတပ်ဖွဲ့ဝင်များနှင့် နီးစပ်သူတစ်ဦးက ပြောသည်။

မန္တလေးတိုင်းဒေသကြီး၊ ပြင်ဦးလွင်မြို့နေ ဒေါ်အေသင်ကိုမှ ၎င်း၏ မိသားစုအသိုင်းအဝိုင်းများ၊ လုပ်ငန်းများ၊ လူမှုရေးများပျက်စီးစေရန် လည်းကောင်း၊ စွပ်စွဲ ပြောဆိုခြင်း၊ ထောင်ကျပြစ်ဒဏ်ရရှိစေလိုကြောင်း နှုတ်မှ ထုတ်ဖော်၍လည်းကောင်း ပြောဆိုခဲ့ သည့် သမီးဆိုး(ခ)သက်ကိုကိုကို ပြီးခဲ့သည့် အောက်တိုဘာ (၆)ရက်က ပြင်ဦးလွင်မြို့မရဲစခန်း၌ (ပ)၂၁၅/၂၀၂၅၊ ဆက်သွယ်ရေးဥပဒေပုဒ်မ ၆၆(ဃ)ဖြင့် အမှုဖွင့်တိုင်ကြားခဲ့ကြောင်း သိရသည်။

“ကျွန်မအနေနဲ့ ကျွန်မအပါ ကျွန်မပတ်ဝန်းကျင် ကျွန်မမိသားစု အားလုံး ထိခိုက်နစ်နာမှုအတွက် ရည်ရွယ်ကြံစည်ပြောဆိုခဲ့သော သူအားကျွန်မ စွမ်းနိုင်သလောက် ဥပဒေနဲ့အညီ တရားဝင်လုပ်သင့်လုပ်ထိုက်တာ ကို လုပ်ပြီးသားမလို့ တဖက်သူဖမ်းစီးရမိရေးနဲ့အတွက်တော့ သက်ဆိုင်ရာဌာနက လုပ်ပါလိမ့်မယ် ။ ကျွန်မအနေနဲ့သက်ဆိုင်ရာဌာနကို ကိုယ်ဖြစ်ချင်တာကို ခိုင်းပိုင်ခွင် အခွင့်အာဏ ကျွန်မမှာ ရှိမနေပါဘူးရှင် ။ကိစ္စရပ်တိုင်းအားမြန်မာနိုင်ငံတည်ဆဲ ဥပဒေများနှင့်အညီ တရားဝင်အတိုင်းသာ ဆောင်ရွက်ထားပါသည်” ဟု အေသင်ကိုက ၎င်း၏ ဖေ့ဘုတ်ခ်လူမှုကွန်ရက်စာမျက်နှာတွင် ယခုရက်ပိုင်းအတွင်း ရေးသားဖြန့်ဝေထားသည်။
ထိုသို့ အမှုဖွင့်တိုင်ကြားထားဖြင့် ယနေ့ အောက်တိုဘာလ (၁၂) ရက်နေ့တွင် ရန်ကုန်အပြည်ပြည်ဆိုင်ရာလေဆိပ်၌ သက်ဆိုင်ရာက ဖမ်းဆီးထိန်းသိမ်းခဲ့ ကြောင်း သိရသည်။

အေသင်ကိုအနေဖြင့် PDFကို ထောက်ပို့လုပ်ငန်းများလုပ်‌ဆောင်နေကြောင်း ၊ တပ်မှ အရာရှိကြီးများနှင့် လူမှုရေးအရှုပ်အရှင်းများရှိကြောင်းအပါအဝင် ပုဂ္ဂိုလ်ရေးရာများ ကို သမီးဆိုး(ခ)သက်ကိုကို က ၎င်း၏ ဖေ့ဘုတ်ခ်လူမှုကွန်ရက်စာမျက်နှာတွင် ရုပ်သံဖြင့် ပြောဆိုဖြန့်ဝေမှုများဆောင်ရွက်ခဲ့ဖူးကြောင်း သိရသည်။

Credit - NP News Agency

#centralnewsnaypyitaw

ကမ္ဘာ့ဖလားခြေစစ်ပွဲ အဆုံးအဖြတ်ပွဲမတိုင်မီ လေယာဉ်မှန်အက်ကွဲမှုကြောင့် အရေးပေါ် ဆင်းသက်ခဲ့ရတဲ့ နိုင်ဂျီးရီးယားအသင်း

အောက်တိုဘာ ၁၂

ကမ္ဘာ့လားခြေစစ်ပွဲ အဆုံးဖြတ်ပွဲကစားရမယ့် နိုင်ဂျီးရီးယားလက်ရွေးစင်အသင်းကို သယ်ဆောင်လာတဲ့ လေယာဉ်ဟာ မှန်အက်ကွဲနေမှုနှင့်အတူ အရေးပေါ် ဆင်းသက်မှု ပြုလုပ်ခဲ့ရပါတယ်။

နိုင်ဂျီးရီးယားအသင်းဟာ အင်္ဂါနေ့တွင် အူယိုတွင် ဘီနန်နှင့် မဖြစ်မနေ အနိုင်ရရှိရန် လိုအပ်နေတဲ့ ကမ္ဘာ့ဖလားခြေစစ်ပွဲကစားရပါမယ်။

ဒါပေမယ့် လီဆိုသိုအား အနိုင်ရတဲ့ပွဲအပြီး အိမ်အပြန် နိုင်ဂျီးရီးယားအသင်းကို သယ်ဆောင်လာတဲ့ လေယာဉ်ဟာ အရေးပေါ် ဆင်းသက်ခဲ့ရပါတယ်။

နိုင်ဂျီးရီးယားအသင်းကို သယ်ဆောင်လာတဲ့ လေယာဉ်ဟာ အန်ဂိုလာရှိ လူအန်ဒါတွင် လေယာဉ်ဆီဖြည့်ပြီး ထွက်ခွာလာပြီးနောက် ၂၅ မိနစ်အကြာတွင် လေယာဉ်မှန်အက်ကွဲနေကြောင်း တွေ့ရှိခဲ့တာလည်း ဖြစ်ပါတယ်။

ဒါကြောင့်လည်း နိုင်ဂျီးရီးယားအသင်း စီးနင်းလာတဲ့ ValueJet Airline လေယာဉ်ဟာ နီးစပ်ရာ လေဆိပ်သို့ အရေးပေါ် ဆင်းသက်မှု ပြုလုပ်ခဲ့ရပါတယ်။

လေယာဉ်ပေါ်တွင် ရှိတဲ့ ကစားသမားများ၊ နည်းပြအဖွဲ့ဝင်များနှင့် တာဝန်ရှိသူအားလုံး ဘေးကင်းကြပါတယ်။

ယင်းနောက် နိုင်ဂျီးရီးယားအသင်းသားတို့ဟာ လေယာဉ်ပြောင်းကာ လာဂို့စ်မှ ထွက်ခွာလာခဲ့ကြပါတယ်။

နိုင်ဂျီးရီးယားအသင်းတာဝန်ရှိသူများဟာ ယင်းလေယာဉ်ကိုပင် စီးနင်းကာ လီဆိုသိုနှင့်ပွဲမတိုင်မီ ခရီးသွားလာခဲ့ကြတာပါ။

နိုင်ဂျီးရီးယားဟာ ကမ္ဘာ့ဖလားခြေစစ်ပွဲ အုပ်စု(ဂ)တွင် တတိယနေရာမှာ ရပ်တည်နေပြီး ထိပ်ဆုံးနေရာတွင် ရပ်တည်နိုင်မှသာလျှင် ကမ္ဘာ့ဖလားခြေစစ်ပွဲ တိုက်ရိုက်အောင်မြင်ပါမယ်။

ဘီနန်က နိုင်ဂျီးရီးယားကို သုံးမှတ်ဖြတ်ကာ အုပ်စုကို ဦးဆောင်ထားရာ လာမယ့် အင်္ဂါနေ့ပွဲစဉ်မှာ နိင်ဂျီးရီးယားအတွက် ကမ္ဘာ့ဖလားခြေစစ်ပွဲအောင်မြင်ရေး အဆုံးအဖြတ်ပွဲ ဖြစ်နေပါတယ်။

နိုင်ဂျီးရီးယားဟာ ၂၀၂၂ ကမ္ဘာ့ဖလားခြေစစ်ပွဲတုန်းကလည်း ၂၀၀၆ နောက်ပိုင်း ပထမဆုံးအကြိမ် ခြေစစ်ပွဲကျခဲ့တဲ့အသင်းပါ။

#ဘောလုံးသတင်းစုံ

မန္တလေးမှာ ပေါက်ကွဲမှုဖြစ်လို့ တယောက်သေပြီး နှစ်ယောက် ဒဏ်ရာရ

အောက်တိုဘာ ၁၂

မန္တလေးမြို့၊ ပြည်ကြီးတံခွန်မြို့နယ်၊ (စ)ရပ်ကွက်၊ ၁၂၃ လမ်း ၁၂၄ လမ်းကြား ၅၄ (အေ) လမ်းက နေအိမ်တခုမှာ မနေ့ အောက်တိုဘာ ၁၁ ရက်နေ့ နေ့လယ်ပိုင်းက ပေါက်ကွဲမှုဖြစ်လို့ တယောက်သေပြီး နှစ်ယောက်က ဒဏ်ရာရရှိခဲ့တယ်လို့ သိရပါတယ်။

" သံတိုသံစဝယ်တဲ့သူဗျ သူဝယ်ထားတဲ့အထဲမှာ ဗုံးပါမှန်မသိတော့ သံအမှုန့်ထုတ်တဲ့အချိန် ရှူးခနဲမြည်လာတော့ လေထဲကို ပစ်လိုက်တာ သူကတော့ ဘာမှ မဖြစ်ပေမယ့် ကလေးတယောက်သေပြီး နှစ်ယောက်က ဒဏ်ရာရရှိခဲ့တယ် " လို့ ဒေသခံတဦးက VOM ကိုပြောပါတယ်။

ပေါက်ကွဲမှုဖြစ်စဥ်ကြောင့် အသက် ၃ နှစ်အရွယ် မိန်းက လေးတဦးက နေရာမှာတင် သေဆုံးခဲ့ပြီး အမျိုးသမီးတယောက်ကတော့ ဒဏ်ရာမပြင်းထန်ပေမယ့်လို့ ၅ နှစ်အရွယ် ကောင်လေးတယောက်က ၁၇ ချက် ချုပ်လိုက်ရတယ်လို့ ဒေသခံတွေဆီက သိရပါတယ်။

မန္တလေးမှာ ၂၀၂၁ ခုနှစ် ဇွန်လ ၁၂ ရက်နေ့က RTAD (Road Transport Office) ရုံးရှေ့ ဗုံးပေါက်မှုတခု၊ ၂၀၂၁ ခုနှစ် ဒီဇင်ဘာ ၂၅ ရက်နေ့က ၃၈ လမ်းထောင့်မှာ ရှိတဲ့ Yadanarbon Hall အနီးမှာ ဗုံးပေါက်ကွဲမှု တကြိမ်၊ ၂၀၂၄ ခုနှစ် အောက်တိုဘာလထဲမှာလည်း တရုတ်သံရုံးရှေ့မှာ ဗုံးပေါက်ကွဲမှုတွေ ဖြစ်ခဲ့ပါ​သေးတယ်။

Credit - Voice of Myanmar News Agency

#သတင်းဟင်းလေးအိုးကြီး

ရုရှား-မြန်မာ-ဘယ်လာရုစ် သုံးနိုင်ငံပူးပေါင်းဖျော်ဖြေတင်ဆက်ပွဲ ရန်ကုန်တွင် ကျင်းပ

အောက်တိုဘာ ၁၃

ရုရှား-မြန်မာ-ဘယ်လာရုစ် သုံးနိုင်ငံ ပူးပေါင်းဖျော်ဖြေတင်ဆက်ပွဲကို အောက်တိုဘာ ၁၁ ရက်နေ့ ညပိုင်းတွင် ရန်ကုန်မြို့ ဒဂုံမြို့နယ် မြို့မကျောင်းလမ်းရှိ အမျိုးသားဇာတ်ရုံ၌ ကျင်းပပြီး ရုရှားနှင့် ဘယ်လာရုစ် သွေးရင်းအစ်ကို ညီရင်းနှမ တေးသီချင်း၊ Belarus and Myanmar တေးသီချင်း၊ မြန်မာ့ရိုးရာ တေးသီချင်းနှင့် အကများ ဖျော်ဖြေတင်ဆက်ခဲ့ကြသည်။

အဆိုပါ ဖျော်ဖြေပွဲသို့ ပြန်ကြားရေးဝန်ကြီးဌာန ပြည်ထောင်စုဝန်ကြီးဦးမောင်မောင်အုန်း၊ ရန်ကုန်တိုင်းဒေသကြီး ဝန်ကြီးချုပ် ဦးစိုးသိန်း၊ တိုင်းဒေသကြီးဝန်ကြီးများ၊ ဌာနဆိုင်ရာ တာဝန်ရှိသူများ၊ ရုရှား-မြန်မာချစ်ကြည်ရေးအသင်း ဒုတိယဥက္ကဋ္ဌ Mr.Alexander Ostrovskiy နှင့် တာဝန်ရှိသူများ၊ အမျိုးသား ယဉ်ကျေးမှုနှင့် အနုပညာတက္ကသိုလ်(ရန်ကုန်)မှ အနုပညာရှင်များ၊ ဆရာ၊ ဆရာမများ၊ ကျောင်းသား၊ ကျောင်းသူများ၊ ဖိတ်ကြားထားသည့် ဧည့်သည်တော်များနှင့် အနုပညာဝါသနာရှင်များ တက်ရောက်ကြည့်ရှု အားပေး ကြသည်။

အဆိုပါ ဖျော်ဖြေတင်ဆက်ပွဲတွင် “ယဉ်ကျေးမှုဖလှယ်မှုမှသည် ချစ်ကြည်ရင်းနှီးမှုများဆီသို့" Video Clip ကို ဖွင့်လှစ်ပြသပြီး ရုရှား-မြန်မာချစ်ကြည်ရေးအသင်း ဒုတိယဥက္ကဋ္ဌက မိတ်ဆက်စကား ပြောကြားကာ ဘယ်လာရုစ်နိုင်ငံမှ အနုပညာရှင်များနှင့် မိတ်ဆက်ပေးခဲ့သည်။

ထို့နောက် ဘယ်လာရုစ်အနုပညာရှင်များက ရုရှားနှင့် ဘယ်လာရုစ်-သွေးရင်းအစ်ကို ညီရင်းနှမ တေးသီချင်း၊ Belarus and Myanmar တေးသီချင်း၊ အမျိုးသားယဉ်ကျေးမှုနှင့် အနုပညာ တက္ကသိုလ်(ရန်ကုန်)မှ “အရုပ်နဲ့လူ ကကြိုးတူ(သူငယ်တော်အက)” ရုပ်သေး၊ “ခေါင်းလောင်းသံ"တေးသီ ချင်း “ဘော်ဒကာတစ်ခွက်နဲ့ နှုတ်ဆက်မယ်” တေးသီချင်း၊ မြန်မာ့အသံနှင့် ရုပ်မြင်သံကြားမှ အဆိုရှင် စောဒယ်နီရယ်က “ပြုံးတုံ့လှယ်“တေးသီချင်း၊ “မျက်ဝန်း" တေးသီချင်း၊ ရုရှားသံရုံးမှ “လယ်ဘယ်ဒူးရှ်ကာ" အက၊ မြဝတီတေးဂီတအဖွဲ့က “မြန်မာ့ရှုခင်း မြန်မာ့စိတ်ရင်း” တေးသီချင်း၊ “ကျူးလစ်ပန်း” တေးသီချင်း၊ “တို့ရွာနီ”တေးသီချင်းတို့ဖြင့် ဖျော်ဖြေတင်ဆက် ကပြကြသည်။

ဆက်လက်ပြီး အမျိုးသားယဉ်ကျေးမှုနှင့် အနုပညာတက္ကသိုလ်(ရန်ကုန်)မှ ခေတ်(၆)ခေတ်အက၊ “ဩော်တံစဉ် ကျွန်တော်တံစဉ်” တေးသီချင်း၊ “ကာလင်ကာ”အက၊ မြန်မာ့ အသံနှင့် ရုပ်မြင်သံကြားမှ အဆိုရှင် လဝန်းမေက “မြစ်ရေသွင်သွင်”တေးသီချင်း၊ “မြန်မာ”တေးသီချင်း၊ “သင်္ကြန်” တေးသီချင်း၊ မြဝတီတေးဂီတအဖွဲ့က “ပြည်ထောင်စုကြီး ထာဝရတည့်တံ့စေသား” တေးသီချင်း၊ ရုရှားသံရုံးမှ “ရီဗာရောနော့ခ်” တေးသီချင်း၊ “ပုဂံ”တေးသီချင်း၊ “အတူရှိမယ် မြန်မာ" တေးသီ ချင်း၊ “ကျွန်ုပ်တို့ မြန်မာပြည်"တေးသီချင်း၊ “ကာကျူးရှာ"တေးသီချင်း၊ “အမိမြေ"တေးသီချင်း၊ “ပန်းရောင်စုံ" တေးသီချင်းနှင့် “တောင်းဆုခြွေ”တေးသီချင်းတို့ဖြင့် ဖျော်ဖြေတင်ဆက် ကပြကြသည်။

ယင်းနောက် ပြည်ထောင်စုဝန်ကြီး၊ တိုင်းဒေသကြီးဝန်ကြီးချုပ်တို့က ဖျော်ဖြေတင်ဆက်ခဲ့ကြသည့် အနုပညာရှင်များအား ဂုဏ်ပြုပန်းခြင်းပေးအပ်ပြီး ပြည်ထောင်စုဝန်ကြီး၊ တိုင်းဒေသကြီးဝန်ကြီးချုပ်နှင့် ရန်ကုန်မြို့တော်ဝန်တို့အား ဘယ်လာရုစ်တေးဂီတ အဖွဲ့ခေါင်းဆောင်က ဂုဏ်ပြု လက်ဆောင်ပေးအပ်ခဲ့ကြောင်း သိရသည်။

Credit - MT News Agency

#သတင်းဟင်းလေးအိုးကြီး

ဆာလက် နေရာအစားထိုးဖို့ ဆီမန်ညိုနဲ့အိုလီဆီကို ပစ်မှတ်ထား

အောက်တိုဘာ ၁၂

လီဗာပူးလ်အသင်းဟာ တောင်ပံကစားသမား ဆာလက်ရဲ့ နေရာမှာ အစားထိုးဖို့အတွက် ဘုန်းမောက်အသင်းက ဆီမန်ညိုနဲ့ ဘိုင်ယန်မြူးနစ်အသင်းက အိုလီဆီတို့ကို ပစ်မှတ်ထားနေတယ်လို့ Daily Mail က ဖော်ပြထားပါတယ်။

ပြီးခဲ့တဲ့နွေရာသီမှာ ပေါင်သန်း ၄၂၀ အသုံးပြုပြီး ကစားသမားသစ်တွေ အားဖြည့်ခဲ့တဲ့ လီဗာပူးလ်အသင်းဟာ ရာသီအစမှာ ရလဒ်တွေ ကောင်းမွန်ခဲ့ပေမယ့် နောက်ဆုံးကစားခဲ့တဲ့ ၃ ပွဲစလုံး အရေးနိမ့်ထားခဲ့တာပါ။

လီဗာပူးလ်အသင်း ရလဒ်တွေ မကောင်းဖြစ်နေချိန်မှာ ကစားသမား အများအပြားဟာ ဝေဖန်မှုတွေ ခံနေရပြီး ဒီအထဲမှာ ဆာလက်လည်း ပါဝင်တာဖြစ်ပါတယ်။

ဆာလက်ဟာ လီဗာပူးလ်အသင်း သမိုင်းမှာ အကောင်းဆုံး ကစားသမားတွေထဲက တစ်ဦးအဖြစ် သတ်မှတ်ခံ ထားရပြီး သူ့ရဲ့စာချုပ်ဟာ ၂၀၂၇ ရာသီကုန်အထိ ရှိနေတာပါ။

လီဗာပူးလ်အသင်းဟာ ဆာလက်ရဲ့ နေရာကို ဆက်ခံနိုင်တဲ့ ကစားသမားတစ်ဦးကို ရှာဖွေနေပြီး သူတို့ရဲ့စာရင်း ထဲမှာ ဆီမန်ညိုနဲ့အိုလီဆီတို့ ပါဝင်နေတာ ဖြစ်ပါတယ်။

ဆီမန်ညိုဟာ ဒီရာသီ ပရီးမီးယားလိဂ် ပြိုင်ပွဲမှာ ခြေစွမ်းပြသနေတဲ့ ကစားသမားတွေထဲက တစ်ဦးဖြစ်ပြီး လိဂ်ပွဲစဉ် ၇ ပွဲမှာ ၆ ဂိုးသွင်းပြီး ဂိုးဖန်တီးမှု ၃ ကြိမ် ပြုလုပ်ထားတာပါ။

ယူနိုက်တက်နဲ့ စပါးအသင်းတို့ရဲ့ စိတ်ဝင်စားမှုကို ခံနေရတဲ့ ဆီမန်ညိုကို ဘုန်းမောက်အသင်းက ပေါင် ၇၅ သန်း တန်ကြေး သတ်မှတ်ထားတာ ဖြစ်ပါတယ်။

အိုလီဆီဟာ ခရစ္စတယ်ပဲလေ့စ်အသင်းကနေ ဘိုင်ယန်မြူးနစ်အသင်းထံ ပြောင်းရွှေ့ပြီးကတည်းက အကောင်းဆုံး စွမ်းဆောင်ရည်တွေကို ပြသနေတာပါ။

အိုလီဆီဟာ ဒီရာသီ ဘိုင်ယန်မြူးနစ်အသင်းအတွက် ကစားထားတဲ့ ၁၀ ပွဲမှာ ဂိုးပါဝင် ပတ်သက်မှု ၁၁ ဂိုးအထိ ရှိနေပြီး ဟာရီကိန်း၊ ဒီယက်ဇ်တို့နဲ့အတူ တိုက်စစ်မှာ အတွဲညီနေတာ ဖြစ်ပါတယ်။

အာဆင်နယ်၊ ချယ်လ်ဆီးနဲ့ မန်စီးတီး အကယ်ဒမီတွေမှာ ဖြတ်သန်းခဲ့ဖူးတဲ့ အိုလီဆီဟာ ၂၀၂၃ ခုနှစ်က ချယ်လ်ဆီး အသင်းထံ ပြန်လည်ပြောင်းရွှေ့ဖို့ နီးစပ်ခဲ့တာပါ။

ဘိုင်ယန်မြူးနစ်အသင်းဟာ ၂၀၂၉ ခုနှစ်အထိ စာချုပ်ရှိနေတဲ့ အိုလီဆီကို လာမယ့် နွေရာသီမှာ ထွက်ခွာခွင့်ပေးမှာ မဟုတ်ဘဲ သူဟာ အသင်းမှာ နောက်ထပ် ၉ နှစ်ကြာအထိ ကစားနိုင်တယ်လို့ ပြောထားတာ ဖြစ်ပါတယ်။

Source: metro

ပုံ - ဆာလက်ကို တွေ့ရစဉ်

#ဘောလုံးသတင်းစုံ