ဆယ်ကျော်သက်တုန်းက ပြန်ပေးဆွဲခံခဲ့ရဖူးကြောင်း ယူနိုက်တက်ဂန္ထဝင်ဘာဘာတော့ဗ်ဖွင့်ဟလာ
===================
ယူနိုက်တက်ဂန္ထဝင်တိုက်စစ်မှူးဒီမီထရီဘာဘာတော့ဗ်က ဆယ်ကျော်သက်တုန်းက ဘူလ်ဂေးရီးယားတွင် အခြားကလပ်တစ်ခုရဲ့ ခေါ်ယူရန် ကြိုးပမ်းခြင်းခံရပြီးနောက် ပြန်ပေးဆွဲခြင်းခံခဲ့ရကြောင်း ဖွင့်ဟ ပြောကြားလာပါတယ်။
ဘာဘာတော့ဗ်ဟာ အိုးထရက်ဖို့ဒ်တွင် ကစားစဉ်တုန်းက ညက်ညောတဲ့ ဘောလုံးထိတွေ့မှု၊ ငြိမ့်ညောင်းတဲ့ ဘောလုံးကျွမ်းကျင်မှု၊ တိကျတဲ့ အဆုံးသတ်တို့ဖြင့် ပရိသတ်အသည်းနှလုံးကို လှုပ်ကိုင်ခဲ့သူ ဖြစ်ပါတယ်။
ဘာဘာတော့ဗ်ဟာ အိုးထရက်ဖို့ဒ်တွင် ၄ နှစ်တာ ကစားစဉ်အတွင်း ၁၄၉ ပွဲကစားခဲ့ရာမှာ ၅၆ ဂိုးသွင်းခဲ့ပြီး ပရီးမီးယားလိဂ်ဖလား ၂ ကြိမ် ရရှိခဲ့ပါတယ်။
သူဟာ ပရီးမီးယားလိဂ်သို့ မရောက်မီ မွေးရပ်မြေဘူလ်ဂေးရီးယားတွင် ခက်ခဲတဲ့ ကာလများစွာနှင့် ကြုံခဲ့ရသူလည်း ဖြစ်ပါတယ်။
ယူနိုက်တက်ကစားဖော်ဟောင်းရီယိုဖာဒီနန်နှင့် စကားစမြည်ပြောဆိုတဲ့ အစီအစဉ်တွင် ဘာဘာတော့ဗ်က အသက် ၁၈ နှစ်အရွယ်တွင် စီအက်စ်ကေအေဆိုဖီယာမှာ ကစားနေစဉ် ပြန်ပေးဆွဲခြင်းခံခဲ့ရကြောင်း ဖွင့်ဟလာပါတယ်။
၎င်းက "အိမ်မှာတုန်းက အရမ်းအရမ်းကို ခက်ခဲတဲ့ ကာလတွေ ရှိခဲ့တယ်။ ကွဲပြားတဲ့ဂိုဏ်းတွေ ရှိတယ်။ ခင်ဗျားတို့ ကြားရတာ တချို့ဆိုရင် မယုံနိုင်အောင် ဖြစ်ရလိမ့်မယ်။ ကျွန်တော့်အတွက်တော့ မဖြစ်ချင်ဆုံးအရာပေါ့။ မနေ့တစ်နေ့ကလိုပဲ။ ကွင်းထဲမှာ ကျွန်တော်က လုပ်ပြသနိုင်သမျှ လုပ်ပြတယ်။ အဲဒီတုန်းက စီအက်စ်ကေအေဆိုဖီယာမှာ ကစားနေတာ။ ပြီးတော့ ကျန်တော့်အရည်အချင်းကို တဖြည်းဖြည်း ပိုပြလာနိုင်တယ်။ လေ့ကျင့်ရေးပြီးရင် ကျုပ်မှာ ကားမရှိဘူး။ ဒီတော့ ကစားဖော်တစ်ယောက်က သူနဲ့ လိုက်ခဲ့လို့ ဆိုပြီး ခေါ်တယ်။ ကိုယ့်ကို လိုက်ပို့ဖို့ သူငယ်ချင်းလိုအပ်ခဲ့တယ်။ အနည်းငယ် စိတ်လှုပ်ရှားနေခဲ့တယ်။ တစ်သင်းတည်းမှာ ကစားတော့ သူ့ကို ယုံကြည်နေခဲ့တာလည်း ပါတယ်။ အဲဒီမှာ သူ့ကားထဲ ဝင်လိုက်တယ်။ ကျွန်တော့်ကို နေရာတစ်ခုသို့ ခေါ်သွားတယ်။ စားသောက်ဆိုင်တစ်ဆိုင်ပါ။ စားသောက်ဆိုင်ထဲ ဝင်လိုက်ကြတယ်။ အစားအသောက်တွေက မှာထားပြီးသား။ စားပွဲတစ်ခုမှာ လူတစ်ယောက် ထိုင်နေတယ်။ အခြားစားပွဲဝိုင်း သုံးဝိုင်းလည်း ရှိတယ်။ အဲဒီမှာ တကယ့်လူကောင်းကြီးထွားတွေ ရှိနေတယ်။ တကယ့် ဗလအကြီးကြီး၊ ရေခဲသေတ္တာလို လူကြီးတွေ။ ဘယ်ကန်က ကောင်လို လူတွေလည်း သူ့နောက်မှာ ထိုင်နေတယ်။ ကြည့်လိုက်တဲ့ ကျောစိမ့်သွားတယ်။ သူတို့က ကိုယ့်ကို ဒီအတိုင်းပဲ ကြည့်နေတယ်။ အဲဒီလူက လာ ထိုင်လေ ဆိုတော့ ကျုပ်လည်း ထိုင်ချလိုက်တယ်။ ဘာဖြစ်နေလဲ ဘာတွေ ဖြစ်နေတာလဲဆိုပြီး တွေးနေမိတယ်။ အဖေ့ဖုန်းခေါ်ရမယ်ဆိုပြီး တွေးမိသွားတယ်။ အဖေ့ကို ဖုန်းခေါ်ရမယ်။ အဲဒီမှာ သူက မင်းအကြောင်း ငါတို့ သိတယ်လို့ ပြောလာတယ်။ ကျုပ်တို့ အသင်းပြောင်းရမယ်။ မင်းကို ငါတို့အသင်းမှာ လိုတယ်လို့ ပြောလာတယ်။ မင်းကို ရဖို့ လိုတယ်။ အဲဒီမှာ ကျုပ်ကလည်း ကျုပ်အခု စီအက်စ်ကေအေမှာ ကစားနေတယ်လို့။ သူက အဲဒါကို ငါရှင်းလင်းလိုက်မယ်၊ မပူနဲ့ လို့ ပြောလာပါတယ်"လို့ ပြောကြားသွားပါတယ်။
ထိုစဉ်တုန်းက အလွန်ကြောက်လန့်နေတဲ့ ဘာဘာတောဗ့်ဟာ သုံးနာရီကြာပြီးချိန်တွင်မှ ဖခင်ဖြစ်သူနဲ့ ဖုန်းပြောခွင့်ရခဲ့ပါတယ်။
ဆက်လက်ပြီး ၎င်းက "အဖေ့ကို ဖုန်းထဲကနေ သားဘယ်ရောက်နေလဲ မသိဘူးအဖေ၊ ဘေးနားမှာ လူတွေ ဝိုင်းနေတယ်။ တကယ့် လူကောင်ကြီးမားတွေ လို့ ပြောလိုက်တယ်။ ကျုပ်စကားပြောတာ အရမ်းမြန်နေတယ်။ ဒီတော့ ကျုပ်လည်း စိတ်လျှော့ စိတ်လျော့ အသက်မှန်မှန်လေးရှူ လို့ စိတ်ထဲ ပြောနေမိတယ်။ သူတို့ ငါ့ကို ပြန်ပေးဆွဲထားတာလားလို့ တွေးနေမိတယ်။ အိမ်ပြန်ချင်တာပဲ သိနေခဲ့တယ်။ သူက ကောင်းပြီလေ ကောင်းပြီ ငါဘာလုပ်နိုင်မလဲ ကြည့်မယ်။ ဒီကောင့်ကို ငါခေါ်လိုက်မယ်လို့ ပြောလာတယ်"လို့ ပြောကြားသွားပါတယ်။
ဘာဘာတော့ဗ်ဟာ ဆိုးရွားတဲ အခြေအနေနှင့် ရင်ဆိုင်ခဲ့ရပေမယ့်လည်း စီအက်စ်ကေအေဆိုဖီယာမှာဘဲ ဆက်လက်ကစားခွင့်ရခဲ့ပါတယ်။
ဘာဘာတော့ဗ်ဟာ လေဗာကူဆင်သို့ ပြောင်းခဲ့ပြီး ယင်းတွင် ၅ နှစ်ကြာ ကစားပြီးနောက် ၂၀၀၆ ခုနှစ်တွင် စပါးစ်သို့ ပြောင်းခဲ့ပါတယ်။ သူဟာ စပါးစ်အတွက် ၁၀၂ ပွဲကစားခဲ့ရာမှာ ၄၆ ဂိုးသွင်းယူခဲ့ပြီးနောက် ၂၀၀၈ ခုနှစ်တင် ယူနိုက်တက်သို့ ပေါင် ၃၀.၇၅ သန်းဖြင့် ပြောင်းခဲ့ပါတယ်။
ဘာဘာတော့ဗ်ဟာ ဖူလ်ဟမ်၊ မိုနာကို၊ ပီအေအိုကေ၊ ကီရာလာဘလစ်စတာတို့မှာလည်း ကစားခဲ့ပါတယ်။
