မြဝတီတွင်ရေဆင်းကူး၍ ပျောက်ဆုံးလေးဦးထဲမှ နှစ်ဦးရုပ်အလောင်းပြန်တွေ့

ကရင်ပြည်နယ်၊ မြဝတီမြို့နယ်တွင် ရေဆင်းကူးရာမှ ပျောက်ဆုံးနေသည့်အမျိုးသားလေးဦးထဲမှနှစ်ဦး၏ရုပ်အလောင်းကို ယနေ့(နိုဝင်ဘာ ၂၅ ရက်) နံနက် ၉ နာရီတွင်ရှာဖွေတွေ့ရှိကြောင်း မြန်မာနိုင်ငံလူမှုကယ်ဆယ်ရေးအဖွဲ့ချုပ်ရုံး(ဗဟို)ထံမှသိရသည်။
“ဒီနေ့ကိုးရက်မြောက်နေ့ပေါ့။ ကျွန်တော်တို့ပြောတဲ့ ထင်နေတဲ့နေရာပေါ့။ ကျွန်တော်အရင်ခန့်မှန်းတဲ့ နေရာရဲ့ဝါးနှစ်ပြန်လောက်ရှိတဲ့နေရာမှာ သဲဖုံးသွားတာ။ သူတို့က သဲစုပ်စက်အောက်မှာနစ်မြုပ်နေတာဖြစ်မယ်။ မနက်ပိုင်းစက်နှိုးလိုက်တဲ့အချိန်မှာ သဲစုပ်တဲ့အချိန်ပေါ်လာတာ။ ပုပ်ပွလာတဲ့အခါ အခုနှစ်ယောက်တော့ပေါ်လာပြီ။ တွေ့တဲ့အလောင်းနှစ်လောင်းကလည်း တစ်လောင်းနဲ့ တစ်လောင်းနီးနီးနားနားမှာပဲ။ အလောင်းမှာနီမြန်းနေတာတွေကတော့ အောက်မှာသဲတိုက်စားထားတာတွေကြောင့် ဖြစ်မှာပေါ့။ ကျန်တဲ့နှစ်ယောက်ကိုလည်း အဲဒီနေရာမှာပဲ ပြန်လည်ရှာဖွေနေပါတယ်” ဟု အဆိုပါလူမှုကယ်ဆယ်ရေးအဖွဲ့ချုပ်ရုံးမှတာဝန်ရှိသူတစ်ဦးက စံတော်ချိန်ဒစ်ဂျစ်တယ်သို့ပြောသည်။
ရှာဖွေတွေ့ရှိသည့်ရုပ်အလောင်းများကို မြဝတီမြို့ရှိပြည်သူ့ဆေးရုံကြီးသို့ပို့ဆောင်ထားပြီး ရုပ်အလောင်းများမှာ မည်သူမည်ဝါဖြစ်ကြောင်း ၎င်းတို့၏ မိသားစုဝင်များထံမှ အတည်ပြုချက်မရရှိသေးသောကြောင့် အတိအကျမသိရသေးကြောင်း မြန်မာနိုင်ငံလူမှုကယ်ဆယ်ရေးအဖွဲ့ချုပ်ရုံး (ဗဟို) ထံမှသိရသည်။
ရေနစ်သေဆုံးခဲ့သူများမှာ အသက်(၃၀) ဝန်းကျင်ရှိအမျိုးသားလေးဦးသည် မြဝတီမြို့သို့လာရောက် အလုပ်လုပ်ကိုင်နေသူများဖြစ်ပြီး ၎င်းတို့သည် ပြီးခဲ့သည့် နိုဝင်ဘာ ၁၇ ရက်တွင် မြဝတီမြို့၊ အမှတ် (၅) ရပ်ကွက်၊ ချောင်းဆုံတံတားအနီးရေဆင်းကူးပြီး အချင်းချင်းရေကူးပြိုင်ရာမှ တစ်ဦးရေနစ်ခဲ့ပြီး ကျန်သုံးဦးပါပျောက်ဆုံးခဲ့ခြင်းဖြစ်သည်။

ယခုဘဏ္ဍာနှစ် ခုနစ်လတာအတွင်း ပြည်ပသို့ငါး မက်ထရစ်တန် ၁၆၀၀၀၀ ကျော် တင်ပို့

ပြည်ပနိုင်ငံများသို့ ရေထွက်ကုန်ပစ္စည်းများ တင်ပို့လျက်ရှိရာတွင် ယခုဘဏ္ဍာနှစ် ဧပြီ ၁ ရက်မှ အောက်တိုဘာ၃၁ ရက်အထိ ခုနစ်လတာကာအတွင်းg;မက်ထရစ်တန် ၁၆၀၀၀၀ ကျော် တင်ပို့ထားပြီး ဖြစ်ကြောင်း ငါးလုပ်ငန်းဦးစီးဌာနထံမှ သိရသည်။
ယခုဘဏ္ဍာနှစ်အတွင်း ပုံမှန်ကုန်သွယ်မှု ပင်လယ်ရေကြောင်းမှ ငါးမက်ထရစ်တန် ၈၅၇၅၆ ဒသမ ၉၁ တန်တင်ပို့ခဲ့ပြီး အမေရိကန်ဒေါ်လာ ၁၃၁ ဒသမ ၈၄၆ သန်း၊နယ်စပ်ကုန်သွယ်ရေးမှ ငါးမက်ထရစ်တန် ၇၉၃၅၂ ဒသမ၄၇၇ တန်တင်ပို့ခဲ့ကာ အမေရိကန်ဒေါ်လာ ၆၉ ဒသမ ၂၅၁သန်း ရရှိခဲ့ခြင်းဖြစ်သည်။
မြန်မာနိုင်ငံအနေဖြင့် ငါးအပါအဝင် အခြားရေထွက်ကုန်ပစ္စည်းများကို ပြည်ပနိုင်ငံများသို့ တင်ပို့လျက်ရှိရာ ယခုဘဏ္ဍာနှစ် ခုနစ်လတာကာလအတွင်း ရေထွက်ကုန် စုစုပေါင်း မက်ထရစ်တန် ၂၃၄၁၀၇ ဒသမ ၀၈၆ တန်တင်ပို့ထားကြောင်း ငါးလုပ်ငန်းဦးစီးဌာန၏ စာရင်းများအရ သိရသည်။
လက်ရှိတွင် ပြည်တွင်းမှ ထွက်ရှိသည့် ငါး၊ ပုစွန်စသည့် ရေထွက်ကုန် ပစ္စည်းများကို တရုတ်၊ ထိုင်း၊ ဘင်္ဂလားဒေ့ရှ် ၊ ဂျပန် စသည့် ပြည်ပနိုင်ငံပေါင်း ၄၀ ကျော်သို့ တင်ပို့နေခြင်းဖြစ်ကြောင်း သိရသည်။

ထိုင်းနိုင်ငံနှင့် နယ်နိမိတ်တိုင်းတာခြင်းအပါအဝင် မြစ်ချောင်းများအတွင်း သွားလာရေး၊ မြစ်ချောင်းရေအသုံးချခြင်းများအတွက် မြန်မာ-ထိုင်း ပူးတွဲနယ်နိမိတ်ကော်မတီဖွဲ့စည်း

ထိုင်းနိုင်ငံနှင့် နယ်နိမိတ်တိုင်းတာခြင်းအပါအဝင် မြစ်ချောင်းများအတွင်း သွားလာရေး၊ မြစ်ချောင်းရေအသုံးချခြင်းများအတွက် မြန်မာ-ထိုင်း ပူးတွဲနယ်နိမိတ်ကော်မတီဖွဲ့စည်းလိုက်သည်ဟု မြန်မာနိုင်ငံပြန်တမ်းတွင် ဖော်ပြထားသည်။
အဆိုပါကော်မတီတွင် နိုင်ငံခြားရေးဝန်ကြီးဌာန ဒုဝန်ကြီးက ဥက္ကဌအဖြစ် တာဝန်ယူမည်ဖြစ်ပြီး အတွင်းရေးမှူးအဖြစ် နိုင်ငံခြားရေးဝန်ကြီးဌာန ကောင်စစ်ရေးရာနှင့် ဥပဒေရေးရာဦးစီးဌာန နယ်နိမိတ်ဌာနကမှ ညွန်ကြားရေးမှူးက တာဝန်ယူမည်ဖြစ်သည်။
အဖွဲ့ဝင်များအဖြစ် ထိုင်းနိုင်ငံရှိ မြန်မာသံအမတ်၊ ကာကွယ်ရေးဝန်ကြီးဌာန ကာကွယ်ရေးဦးစီးချုပ်ရုံး (ရေ) ရေတပ်ပင်မတိုင်းတာရေးတပ်မှ တပ်မှူး၊ ပြည်ထဲရေးဝန်ကြီးဌာနအထွေထွေအုပ်ချုပ်ရေးဦးစီးဌာနမှ ညွန်ကြားရေးမှူးချုပ် အပါအဝင် အဖွဲ့ဝင် ၁၇ ဦးဖြင့် ဖွဲ့စည်းမည်ဖြစ်ကြောင်း သိရသည်။
မြန်မာ-ထိုင်း ပူးတွဲနယ်နိမိတ်ကော်မတီမှာ မြန်မာ- ထိုင်းနယ်နိမိတ်တိုင်းတာသတ်မှတ်ရေး၊ မြစ်ချောင်းရေ အသုံးချရေး၊ မြစ်ချောင်းအတွင်း သွားလာရေးတို့နှင့် ပတ်သက်ပြီး နှစ်နိုင်ငံအခြေခံသဘောတူညီချက်များ ရရှိရေးအတွက် နည်းလမ်းရှာဖွေရေးကိစ္စတို့ကို တာဝန်ယူဆောင်ရွက်ရန်၊ ထိုင်းအစိုးရကိုယ်စားလှယ်အဖွဲ့နှင့် ညှိနှိုင်းရရှိမှုကို အခြေပြု၍ နယ်နိမိတ်သတ်မှတ်ခြင်း၊ မြစ်ချောင်းရေအသုံးချခြင်း၊ မြစ်ချောင်းအတွင်း သွားလာခြင်းတို့နှင့် ပတ်သက်၍နှစ်နိုင်ငံအခြေခံသဘောတူညီချက်များရရှိရေးအတွက် နည်းလမ်းများရှာဖွေရာတွင် လိုက်နာရမည့်လုပ်ထုံးလုပ်နည်းများ ချမှတ်ရန်၊ နယ်နိမိတ်များ တိုင်းတာသတ်မှတ်ရေးနှင့် ပတ်သက်၍ နယ်နိမိတ်စာချုပ်များ ရေးဆွဲချုပ်ဆိုနိုင်သည်အထိ လုပ်ငန်းကိစ္စအဝဝကို တာဝန်ယူဆောင်ရွက်ရန် အစရှိသည်တို့ ပါဝင်သည်။

ဆေးဝါးဈေးနှုန်းများ ဈေးကွက်အတွင်း ကျဆင်းလာခြင်းမရှိသေးဘဲ ကုမ္ပဏီအချို့၏ ဈေးနှုန်းကစားလိုမှု၊ ထိန်းကျောင်းဖြန့်ဖြူးမှုတို့ကြောင့် ခွင့်ပြုသည့်ဆေးဝါးများ ဈေးကွက်အတွင်း ဝင်ရောက်လာမှု လျော့နည်းရခြင်းဖြစ်ကြောင်း စီးပွား/ကူးသန်းဝန်ကြီး ပြောကြား

ဆေးဝါးဈေးနှုန်းများ ဈေးကွက်အတွင်း ကျဆင်းလာခြင်းမရှိသေးဘဲ ကုမ္ပဏီအချို့၏ ဈေးနှုန်းကစားလိုမှု၊ ထိန်းကျောင်းဖြန့်ဖြူးမှုတို့ကြောင့် ခွင့်ပြုသည့်ဆေးဝါးများ ဈေးကွက်အတွင်း ဝင်ရောက်လာမှု လျော့နည်းရခြင်းဖြစ်ကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဦးချစ်ဆွေက ပြောကြားသည်။
နိုဝင်ဘာ ၂၄ ရက်က နေပြည်တော်ရှိ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန အစည်းအဝေးခန်းမ၌ ကျင်းပသည့် မြန်မာနိုင်ငံ ဆေးဝါးနှင့် ဆေးအထောက်အကူပြုပစ္စည်းများ တင်သွင်းမှုမှသည် ထုတ်လုပ်မှုဆီသို့ ညှိနှိုင်းအစည်းအဝေးပွဲတွင် ၎င်းက ထိုသို့ပြောကြားခဲ့ခြင်းဖြစ်သည်။
ပြည်ထောင်စုဝန်ကြီးက စာရင်းများအရ ဆေးဝါးကုမ္ပဏီ ၇၉၆ ခု၊ ဆေးပစ္စည်း ကုမ္ပဏီ ၆၄၆ ခုရှိပြီး ကုမ္ပဏီများ၏ လျှောက်ထားပစ္စည်းများကို ဆေးရုံများနှင့် ဈေးကွက်လိုအပ်ချက်အပေါ်မူတည်၍ ဦးစားပေးအနေဖြင့် ခွင့်ပြုပေးနေသော်လည်း ဈေးကွက်အတွင်း၌ ဆေးဝါးဈေးနှုန်းများ ကျဆင်းလာခြင်းမရှိသေးသကဲ့သို့ ဆေးပစ္စည်းလိုအပ်ချက်များကိုလည်း ကြားသိနေရကြောင်း၊ ပုံမှန်လိုင်စင်ခွင့်ပြုပေးနေသည့်တိုင် ကုမ္ပဏီအချို့၏ သွင်းကုန်ပစ္စည်းကို ထိန်းပြီး ဈေးနှုန်းကစားလိုမှု၊ ရောက်ရှိပစ္စည်းကို ဈေးကွက်အတွင်း ထိန်းကျောင်းဖြန့်ဖြူးမှုတို့ကြောင့် ခွင့်ပြုသည့်ဆေးဝါးများ ဈေးကွက်အတွင်းသို့ ဝင်ရောက်လာမှု လျော့နည်းရခြင်းဖြစ်သည်ကို တွေ့ရှိရကြောင်း၊ ဈေးကွက်သဘောတရားအရ အရင်းအနှီးနှင့် စွမ်းဆောင်ရည်မြင့်မားသည့် ကုမ္ပဏီကြီးများအနေဖြင့် ဈေးကွက်ကို လွှမ်းမိုးသည့်အခြေအနေ (Dominant Postion) ကို ပိုင်ဆိုင်နိုင်ကြကြောင်း ပြောကြားသည်။
သို့ရာတွင် ဈေးကွက်လွှမ်းမိုးထားသည့်အခြေအနေကို အသာစီးရယူပြီး ဆေးပစ္စည်းများ သိုလှောင်ထိန်းသိမ်းကာ ဈေးကွက်ကို မကစားကြရန်၊ ဈေးနှုန်းထိန်းချုပ်ခြင်း မပြုလုပ်ကြရန်၊ အခြားပြိုင်ဘက် ကုမ္ပဏီများအား လုပ်ကိုင်နိုင်စွမ်းမရှိအောင် မပြုလုပ်ကြရန် အသိပေးပြောကြားလိုကြောင်း၊ ဆေးပစ္စည်းရောင်းချခြင်းသည် ပရဟိတဆန်သော စီးပွားရေးလုပ်ငန်းတစ်ခုဖြစ်သောကြောင့် ကုမ္ပဏီတစ်ခုနှင့်တစ်ခု ထိန်းကျောင်းပြီး ပြည်သူ့လူမှုဘဝ တိုးတက်စေရေးကို မေတ္တာထားကာ ကုမ္ပဏီအချင်းချင်း ပူးပေါင်းဆောင်ရွက်ကြစေလိုကြောင်း၊ ပြည်တွင်းဆေးဝါးစက်ရုံများအနေဖြင့် ပြည်တွင်း၌ ဆေးအမျိုးအစား ယခုထက်ပိုမို၍ စုံလင်ပြီး ထုတ်လုပ်နိုင်မည်ဆိုပါက နိုင်ငံတော်အတွက် နိုင်ငံခြားငွေ အသုံးပြုမှု လျော့ကျသွားမည်ဖြစ်သကဲ့သို့ အလုပ်အကိုင်အခွင့်အလမ်းများလည်း ပိုမိုလာမည်ဖြစ်ကြောင်း ၎င်းက ပြောကြားသည်။
ထို့နောက် ဒုတိယဝန်ကြီး ဒေါက်တာအေးထွန်းနှင့် ဒုတိယဝန်ကြီး ဦးမင်းမင်းတို့က ပြည်သူများသို့ ဝန်ဆောင်မှုပေးနေမှု၊ ဆေးဝါးထောက်ပံ့ပေးနိုင်မှုနှင့် ဆေးဝါးပစ္စည်းများ တင်သွင်းပေးနိုင်မှုအခြေအနေများကို ရှင်းလင်းဆွေးနွေးကြပြီး တက်ရောက်လာသူများက ကဏ္ဍအလိုက်လုပ်ငန်းဆောင်ရွက်မှုအခြေအနေများကို ဆွေးနွေးတင်ပြကြရာ ပြည်ထောင်စုဝန်ကြီးက ပြန်လည်ဆွေးနွေးပြီး လိုအပ်သည်များကို ပေါင်းစပ်ညှိနှိုင်းဆောင်ရွက်ပေးခဲ့ကြောင်း သိရသည်။
အဆိုပါအစည်းအဝေးသို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဦးချစ်ဆွေ၊ ဒုတိယဝန်ကြီးများ၊ အမြဲတမ်းအတွင်းဝန်များ၊ ဌာနဆိုင်ရာတာဝန်ရှိသူများ၊ မြန်မာနိုင်ငံဆေးနှင့်ဆေးပစ္စည်းလုပ်ငန်းရှင်များအသင်းနှင့် မြန်မာနိုင်ငံဆေးနှင့်ဆေးပစ္စည်း ထုတ်လုပ်သူများအသင်းတို့မှ တာဝန်ရှိသူများ တက်ရောက်ကြကြောင်း သိရသည်။

ဒုတိယအကြိမ် ကြေညာထားသည့် မဲစာရင်းများ သွားရောက်စစ်ဆေးကြရန် UEC တိုက်တွန်း

ဒီဇင်ဘာလအတွင်း ကျင်းပတော့မည့် အထွေထွေရွေး‌ကောက်ပွဲတွင် မဲပေးနိုင်ရန်အတွက် ဒုတိယအကြိမ် ကြေညာထားသည့် မဲစာရင်းများကို သွားရောက်ကြည့်ရှူကြရန် ပြည်ထောင်စုရွေးကောက်ပွဲကော်မရှင်က အသိပေး တိုက်တွန်းထားသည်။
ဒုတိယအကြိမ် မဲစာရင်းများကို နို၀င်ဘာ (၂၁) ရက်မှစတင်ကာ ဒီဇင်ဘာလ (၄) ရက်အထိ ရပ်ကွက်၊ ကျေးရွာအုပ်စုကော်မရှင်အဖွဲ့ခွဲရုံးများတွင် ကပ်ထားခြင်းဖြစ်သည်။
မဲစာရင်းများ သွားရောက်ကြည့်ရှုကာ မိမိ၏ အမည်မပါရှိပါက ပုံစံ(၃)ဖြင့် တောင်းဆိုရမည်ဖြစ်သည်ဟုလည်း UEC က ဆိုသည်။
ယင်းနည်းတူ အမည်နှင့် အချက်အလက်များကို ကန့်ကွက်ရန်ရှိပါက ပုံစံ(၄) ဖြင့် ကန့်ကွက်ရမည်ဖြစ်ကာ အချက်အလက်များ ပြင်ဆင်ရန်ရှိပါက ပုံစံ(၄-ဂ)ဖြင့် လျှောက်ထားရမည်ဖြစ်သည်ဟုလည်း ဆိုသည်။
ယင်းပုံစံများကို သက်ဆိုင်ရာကော်မရှင်အဖွဲ့ခွဲရုံးများတွင် အခမဲ့ရယူကာ လျှောက်ထားရမည်ဖြစ်ကြောင်းလည်း ပြည်ထောင်စုရွေးကောက်ပွဲကော်မရှင်က အသိပေးထားသည်။

ယနေ့ ဖူးတွေ့ရသည့် ပါမောက္ခချုပ်ဆရာတော်ဘုရားကြီး

ရန်ကုန်မြို့၊ အင်းလျားရိပ်သာလမ်းရှိ ပညာဘူမိတက္ကသိုလ်၌ ယနေ့ နိုဝင်ဘာလ (၂၆) ရက်တွင် ပါမောက္ခချုပ်ဆရာတော် ဒေါက်တာနန္ဒမာလာဘိဝံက (၇) ရက်သားသမီးများ၏ ‌ဓမ္မဒါနကောင်းမှုများအတွက် အပူဇော်ခံခဲ့ကြောင်း သိရသည်။
ပါမောက္ခချုပ်ဆရာတော် ဒေါက်တာနန္ဒမာလာဘိဝံသအား ဖူးမြှော်ရန် ရပ်နီးရပ်ဝေးမှ လာရောက်စောင့်ဆိုင်းဖူးမြှော်သူများပြားခဲ့ကြောင်း သိရသည်။
ဓာတ်ပုံကို Zaw Win Hlaing FB မှ ကူးယူဖော်ပြပါသည်။

ယာဉ်များ၌ အခြားနံပါတ်ပြားနှင့်ဆူညံကိရိယာတပ်လျှင် အရေးယူမည်
-----------------------

မော်တော်ယာဉ်တွေမှာ ကုန်လမ်းပို့ဆောင်ရေးညွှန်ကြားမှုဦးစီးဌာနက ထုတ်ပေးထားတဲ့ မော်တော်ယာဉ်နံပါတ် ပြားမဟုတ်ဘဲ တခြားနံပါတ်ပြားတွေ တပ်ဆင်တာနဲ့ ဆူညံသံဖြစ်ပေါ်စေတဲ့ ကိရိယာတွေ တပ်ဆင်အသုံးပြုတဲ့ မော်တော်ယာဉ်၊ မော်တော်ဆိုင်ကယ်နဲ့ သုံးဘီးယာဉ်တွေကို ၂၀၂၀ ပြည့်နှစ် ယာဉ်အန္တရာယ်ကင်းရှင်းရေးနှင့် မော်တော်ယာဉ်စီမံခန့်ခွဲမှုဥပဒေအရ အရေးယူသွားမှာ ဖြစ်တယ်လို့ ယာဉ်ထိန်းရဲတပ်ဖွဲ့က အသိပေးကြေညာ ထားပါတယ်။
ဒါ့အပြင် မူလနံပါတ်ပြားကို အလှဆင်ပြုပြင်ထားတဲ့ နံပါတ်ပြားတွေ တပ်ဆင်တာ၊ အလှဆင်နံပါတ်ပြားတွေ တပ်ဆင်တာတွေကိုလည်း မပြုလုပ်ဖို့ အသိပေးထားပါတယ်။
အလားတူ မော်တော်ယာဉ်၊ မော်တော်ဆိုင်ကယ်တွေနဲ့ သုံးဘီးတပ်ယာဉ်တွေမှာ အသံပိုမိုကျယ်လောင်စေဖို့ အသံထိန်းကိရိယာတွေ ပြောင်းလဲတပ်ဆင်တာ၊ အသံထိန်းကိရိယာတွေဖြုတ်ပြီး မောင်းနှင်တာ၊ ဆူညံသံ ဖြစ်ပေါ်စေတဲ့ ကိရိယာတပ်ဆင် အသုံးမပြုကြဖို့နဲ့ တပ်ဆင်အသုံးပြုတဲ့ မော်တော်ယာဉ်တွေကို ထိရောက်စွာ အရေးယူသွားမယ်လို့လည်း ကြေညာထားပါတယ်။

မုန်တိုင်းငယ် မြန်မာဘက် ဦးမတည်နိုင်ဟု ထုတ်ပြန်
-------------------------

ကပ္ပလီပင်လယ်ပြင်တောင်ပိုင်းနဲ့ ဆက်စပ်နေတဲ့ မလက္ကာရေလက်ကြားအနီးမှာဖြစ်ပေါ်နေတဲ့ အားကောင်းတဲ့ လေဖိအားနည်းရပ်ဝန်းဟာ ပိုမိုအားကောင်းလာပြီး မုန်တိုင်းငယ်အဖြစ်ကို ရောက်ရှိခဲ့ပေမဲ့ မြန်မာနိုင်ငံဘက်ကို ဦးတည်ရွေ့လျားမဲ့ အခြေအနေ မရှိတာကြောင့် အဝါရောင်အဆင့် သတ်မှတ်ထားတယ်လို့ မိုးလေဝသနှင့် ဇလဗေဒညွှန်ကြားမှုဦးစီးဌာနက နိုဝင်ဘာ(၂၆)ရက် မနက်ပိုင်းမှာ ထုတ်ပြန်ပါတယ်။
မုန်တိုင်းငယ်ဟာ လက်ရှိအချိန်မှာ မြန်မာနိုင်ငံ ကော့သောင်းမြို့ရဲ့တောင်-အရှေ့တောင်ဘက် ရေမိုင်-၂၈၅ မိုင်ခန့် အကွာ ပင်လယ်ပြင်ကို ဗဟိုပြုနေပြီး အနောက်-အနောက်မြောက်ဘက်ကို ရွေ့လျားနိုင်ကာ နောက် ၄၈ နာရီ အတွင်း ပိုမိုအားကောင်းလာနိုင်တယ်လို့ ဆိုပါတယ်။
အဲဒီမုန်တိုင်းငယ်ရဲ့အရှိန်ကြောင့် မုတ္တမကွေ့ မွန်-တနင်္သာရီကမ်းရိုးတန်းတစ်လျှောက်နဲ့ ကမ်းလွန်ပင်လယ်ပြင် တွေမှာ ရံဖန်ရံခါ မိုးသက်လေပြင်းတွေ ကျရောက်ပြီး လှိုင်းကြီးနိုင်တာကြောင့် ပြည်တွင်းလေကြောင်းပျံသန်းရေးနဲ့ မြန်မာ့ကမ်းရိုးတန်းတစ်လျှောက် ကမ်းလွန်ပင်လယ်ပြင်တို့ရှိ ကမ်းနီး၊ ကမ်းဝေးငါးဖမ်းရေယာဉ်တွေ၊ သင်္ဘောတွေ အနေနဲ့ ကြိုတင်သတိပြုသွားလာနိုင်ဖို့ကိုလည်း အသိပေးနှိုးဆော်ထားပါတယ်။

ရေဘေးသင့်များကိုကူညီရန် လေယာဉ်တင်သင်္ဘော ထိုင်း စေလွှတ်မည်
--------------------

ရေဘေးသင့် ကယ်ဆယ်ရေးလုပ်ငန်းတွေ ဆောင်ရွက်ဖို့အတွက် လေယာဉ်တင်သင်္ဘော စေလွှတ်ပေးဖို့ ထိုင်း ရေတပ်က စီစဉ်နေတယ်လို့ The Nation Thailand သတင်းမှာ ဖော်ပြထားပါတယ်။
ထိုင်းနိုင်ငံတောင်ပိုင်းက ဒေသတချို့ဟာ နှစ်အတော်များများအတွင်း အဆိုးရွားဆုံး ရေဘေးသင့်နေပြီး နိုဝင်ဘာ ၂၅ ရက်အထိ အခြေအနေအရ သေဆုံးသူ ၁၃ ယောက်လောက် ရှိလာခဲ့ပါတယ်။
ကမ်းရိုးတန်း ဧရိယာတွေ အပါအဝင် မလေးရှားနဲ့ နယ်စပ်ထိစပ်ရာ ပြည်နယ် ၈ ခုလောက်မှာ ရေဘေးသင့်တဲ့ အခြေအနေတွေ ကြုံနေတာဖြစ်ပြီး တချို့နေရာတွေမှာ မိုးရေချိန် ၂ မီတာလောက်ထိ လွန်လွန်ကဲကဲ ရွာသွန်းခဲ့ ပါတယ်။ ရေဘေးသင့်ဒေသတွေအတွက် လိုအပ်တဲ့ ကယ်ဆယ်ရေးပစ္စည်းတွေ၊ ဝန်ထမ်းတွေ ပါရှိမဲ့ လှေ ၁၂ စင်းပါ ရေယာဉ် အုပ်ကို စေလွှတ်ပေးမယ်လို့ ထိုင်းရေတပ်က နိုဝင်ဘာ ၂၅ ရက်မှာ ကြေညာခဲ့ပါတယ်။
ဒါ့အပြင် အဲဒီခရီးစဉ်မှာ ရေတပ်ရဲ့ တစ်စင်းတည်းသော လေယာဉ်တင်သင်္ဘော ချာကရီ နာရူဘတ်လည်း လိုက်ပါသွားမှာပါ။ အဲဒီ လေယာဉ်တင်သင်္ဘောပေါ်မှာ ရဟတ်ယာဉ်တွေ၊ ဆရာဝန်တွေအပြင် နေ့စဉ် လူပေါင်း ၃၀၀၀ ကျော်အတွက် အစားအစာ ချက်ပြုတ်ကျွေးမွေးနိုင်မဲ့ ရွေ့လျားမီးဖိုတွေကိုပါ တင်ဆောင်သွားမယ်လို့ သိရပါတယ်။

အရှေ့ဒဂုံမှာ တက္ကစီယာဉ်မောင်း နှစ်ယောက် ဓားထောက်လုယက်ခံရ

ရန်ကုန်မြို့၊ အရှေ့ဒဂုံမြို့နယ်မှာ မနေ့ နိုဝင်ဘာ ၂၅ ရက်နေ့၊ တရက်တည်းမှာပဲ တက္ကစီယာဉ်မောင်း နှစ်ယောက် ဓားထောက် လုယက်ခံရမှု ဖြစ်ပွားခဲ့တယ်လို့ အဲဒီယာဉ်မောင်းတွေနဲ့ နီးစပ်သူတွေဆီက သိရပါတယ်။
မနေ့ မွန်းလွဲ ၃ နာရီဝန်းကျင်က ဖြစ်ပွားခဲ့တဲ့ လုယက်ခံရမှုမှာ လက်ကိုင်ဖုန်းနဲ့ ပိုက်ဆံတွေသာ ပါသွားခဲ့တာ ဖြစ်ပေမယ့် ည ၉ နာရီဝန်းကျင်က ဖြစ်ပွားခဲ့တဲ့ လုယက်မှု ဖြစ်စဉ်မှာတော့ လက်ကိုင်ဖုန်း၊ ပိုက်ဆံတွေအပြင် ကားနံပါတ် DD/8857၊ Probox အဖြူရောင်ကားပါ လုယက်ခံလိုက်ရတာ ဖြစ်တယ်လို့ သိရပါတယ်။
“ဒုတိယဖြစ်စဉ်ကတော့ အရှေ့ဒဂုံ၊ ၁၃၃ ရပ်ကွက်က မြို့နယ်ရုံးရှေ့မှာ ဓားထောက်ပြီူ လုသွားတာတဲ့။ အဲဒါ အထက်က အမိန့်ပေးလို့ ကျွန်တော်တို့ အုပ်ချုပ်ရေးမှူးပိုင်းက လိုက်ပြီးစုံစမ်းတာ။ အကြံတခုရတာနဲ့ တက္ကစီသမားတွေကို လှမ်းပြီး လူမှာကွန်ရက်ပေါ် တင်ပေးပါဆိုပြီး အကူအညီတောင်းတာ။ သူတို့က ကူညီကြလို့ ကျူးလွန်သူကို မိသွားတာ” လို့ ရပ်ကွက် အုပ်ချုပ်ရေးပိုင်းနဲ့ နီးစပ်သူက ပြောပါတယ်။
ကားအလုခံရတဲ့ ဖြစ်စဥ်အတွက် Kilo Taxi ယာဥ်မောင်းတွေဟာ မြို့နယ်အစုံ ချိတ်ဆက်ပြီး ကားကို ဝိုင်းရှာကြတာမှာ အလုခံရတဲ့ကားကို လှိုင်မြို့နယ်ထဲမှာ တွေ့ရှိခဲ့တဲ့အတွက် လှိုင်မြို့နယ်ရဲစခန်းကို သတင်းပို့ကာ လုယက်သူကို ဖမ်းဆီးနိုင်ဖို့ ဆောင်ရွက်ခဲ့ကြတာကြောင့် ညတွင်းချင်းပဲ ဖမ်းဆီးရမိခဲ့တယ်လို့ သိရပါတယ်။
“အင်းစိန်ဘက်မှာလည်း တက္ကစီသမားတွေက တယောက်နဲ့တယောက် ချိတ်ဆက်ပြီး လူမှုကွန်ရက်ပေါ် တင်လိုက်တော့ ဝိုင်းဖမ်းကြတာပေါ့။ သူက အဲဒီမှာ ထမင်းကြော် ဆင်းစားနေတာ။ တက္ကစီတွေ့တော့ ဓာတ်ပုံရိုက်ပြီး ဝိုင်းဖမ်းပြီး ရဲလက်အပ်လိုက်တယ်လို့ သိရပါတယ်” လို့ သူက ပြောပါတယ်။
အဲဒီ ကားလုယက်ခံရတဲ့ ဖြစ်စဉ်နဲ့ ပတ်သက်လို့ လက်ရှိမှာ လှိုင်နယ်မြေ ရဲစခန်းက ကျူးလွန်သူကို အရေးယူ ဆောင်ရွက်မှုတွေ ပြုလုပ်နေပြီး အခြေအနေ အသေးစိတ်ကို မသိရှိရသေးဘူးလို့ တက္ကစီယာဉ်မောင်း တယောက်က ပြောပါတယ်။
“ဒုတိယ case က ကားဆရာက ကျွန်တော်တို့ Kilo Taxi ယာဥ်မောင်းမဟုတ်ဘဲ လက်တား တက္ကစီ မောင်းတဲ့သူမို့ အခြေအနေကို မသိရ‌သေးတာပါ” လို့ သူက ပြောပါတယ်။
မွန်းလွဲ ၃ နာရီဝန်းကျင်မှာ ဖြစ်ပွားခဲ့တဲ့ ပထမလုယက်မှု ဖြစ်စဉ်ကတော့ လက်ရှိ အချိန်အထိ ယာဉ်မောင်းဘက်က အမှုဖွင့် တိုင်ကြားထားတာမျိုး မရှိသေးဘူးလို့ သူက ပြောပါတယ်။
“ဖုန်းနဲ့ ပိုက်ဆံအိတ် ဓားထောက် အလုခံရတဲ့ အလားတူ အမှုမျိုးတွေကတော့ ကျွန်တော်တို့ တက္ကစီသမား လောကမှာ တော်တော်များတယ်။ ယာဥ်မောင်းတွေကလည်း အလုပ်ရှုပ် မခံချင်တာရယ်၊ သက်ဆိုင်ရာကို တိုင်ပြန်ရင်လည်း ဒီလိုအမှုမျိုးက မပေါ်တာက များတာမို့ မတိုင်ကြတော့တာနဲ့ ခိုးဆိုးလုနှိုက်တွေက ပိုအတင့်ရဲလာကြတော့တာပါပဲ” လို့ သူက ပြောပါတယ်။
အဲဒီလို လုယက်မှုတွေဟာ လှိုင်သာယာ မြို့နယ်ဘက်မှာဆို တလကို ပျမ်းမျှ ဆယ်မှုလောက် ဖြစ်ပွားနေပြီး တခြား ဆင်ခြေဖုံး မြို့နယ်တွေ ဆိုရင်လည်း အခုနောက်ပိုင်းမှာ တက္ကစီ ယာဥ်မောင်းတွေကို ပစ်မှတ်ထားကာ ခရီးသည်ယောင်ဆောင် လုယက်တဲ့ ဖြစ်စဥ်မျိုးတွေ မကြာခဏ ဖြစ်ပွားနေတယ်လို့ သူက ပြောပါတယ်။
“ကျွန်တော်ဆိုရင်လည်း လွန်ခဲ့တဲ့ နှစ်လလောက်က လှိုင်သာယာ မီးသတ်အဝိုင်းနားမှာ ဖုန်းနဲ့ ပိုက်ဆံ အလုခံရဖူးပါတယ်။ ရွှေပြည်သာ တံတားအဆင်း ငွေပင်လယ် စက်မှုဇုန်ရှေ့ကနေ ရွှေလင်ဗန်း ငါးမန်းတံတားနားကို ကားငှားတာ ၁၈၊ ၁၉ အရွယ် လူငယ်သုံးယောက်၊ ရုပ်ရည်လေးတွေက သနားကမား၊ ဖြူဖြူသန့်သန့်လေးတွေမို့ ကျွန်တော်ကလည်း တော်ဝင်နှင်းဆီ အိမ်ရာကို ပြန်ရမှာဆိုတော့ လမ်းကြောသင့်လို့ တင်မိရာကနေ မီးသတ်အဝိုင်းနား ရောက်ရော ဓားထောက်ပြီး အလုခံရတော့တာပါပဲ” လို့ သူက ပြောပါတယ်။
အခုလို တက္ကစီယာဉ်မောင်းတွေ လုယက်ခံရတဲ့ ဖြစ်စဉ်တွေဟာ ရန်ကုန်မြို့မှာ မကြာခဏဆိုသလို ဖြစ်ပွားနေတာဖြစ်ပြီး တချို့ လုယက်သူတွေကတော့ ယာဉ်မောင်းတွေရဲ့ အသက်ကို ရန်ရှာတဲ့အထိ ပြစ်မှု ကျူးလွန်နေကြတာ ဖြစ်ပါတယ်။
ဒီဖြစ်စဉ်တွေနဲ့ ပတ်သက်လို့လည်း သူက “ဥစ္စာကို ကံစောင့်၊ အသက်ကို ဉာဏ်စောင့် ဆိုတဲ့ စကားအတိုင်းပေါ့။ လက်တား လိုက်တော့မယ်ဆို ခရီးသည် အရိပ်အခြေကို အရင်ဆုံး လေ့လာ (အခုလိုခေတ်ကြီးထဲမှာ ဘယ်ဒုစရိုက်သမားကမှ နဖူးမှာ စာမကပ်ထားတော့လေ)။ အခြေအနေ မဟန်ဘူးဆို မဖြစ်နိုင်တဲ့စျေး တောင်းကြည့်၊ တောင်းတဲ့စျေး ပေးတယ်ဆိုတာနဲ့ သေချာပြီ ၇၅ ရာခိုင်နှုန်းက ကိုယ့်ကို ဒုက္ခပေးတော့မယ် ဆိုတာပါပဲ။ ဘဝတူ ယာဥ်မောင်းတွေကို မှာချင်တာက လောဘနောက် မလိုက်ကြပါနဲ့၊ စျေးရတယ်ဆိုတိုင်းလည်း မလိုက်ကြပါနဲ့။ ကိုယ်သွားမယ့် ခရီးလမ်းကြောင်း အခြေအနေကို အရင်ကြည့်ပါ။ ခရီးသည်ရဲ့ ပုံစံကိုလည်း မပြတ် အကဲခတ်ပါ။ ဘာမှ မဖြစ်ရင်တော့ ကောင်းပေမယ့် ဖြစ်သွားခဲ့ရင်တော့ ကိုယ်ပင်ပင်ပန်းပန်း ရှာထားတဲ့ ပိုက်ဆံတွေ၊ ဖုန်းတွေ ပါသွားခဲ့ရင် ပြန်ရနိုင်ခြေက ၅ ရာခိုင်နှုန်းထက် မပိုပါဘူး” လို့ ပြောပါတယ်။
ပြီးခဲ့တဲ့ အောက်တိုဘာလ ၅ ရက်နေ့ကလည်း သန်လျင်မြို့ရဲ့ ခြောက်လမ်းသွား လမ်းမမှာ တက္ကစီယာဉ်မောင်း တယောက် ကားလုယက်ခံရပြီး အသတ်ခံရမှု ဖြစ်ပွားခဲ့ပါသေးတယ်။
ဒါအပြင် ပြီးခဲ့တဲ့ ဇူလိုင်လ ၁၃ ရက်နေ့ကလည်း အင်းစိန်မြို့နယ်၊ မင်းဓမ္မလမ်းပေါ်မှာ တက္ကစီ ယာဉ်မောင်းဖြစ်သူကို ချွန်ထက်တဲ့အရာနဲ့ တိုက်ခိုက်ပြီး ကား၊ ဖုန်းနဲ့ ငွေကြေး စတာတွေ လုယက်မှု ဖြစ်ပွားခဲ့ပါတယ်။
ဒါအပြင် ဖေဖော်ဝါရီလ ၁၁ ရက်နေ့ကလည်း တာမွေမြို့နယ်၊ ယုဇနပလာဇာရှေ့မှာ တက္ကစီယာဉ်မောင်းကို ဓားနဲ့ထိုးကာ ကားလုယက် ယူဆောင်ပြီးနောက် ရပ်ထားတဲ့ ကား ၁၀ စီးကို ဝင်တိုက်မှု ဖြစ်ပွားခဲ့သလို ဇန်နဝါရီလ ၁၅ ရက်နေ့ကလည်း ဒေါပုံမြို့နယ်မှာ နေထိုင်တဲ့ အငှားယာဉ်မောင်း တယောက် အသတ်ခံရမှု ဖြစ်ပွားခဲ့ပါတယ်။