မင်းဘူး မန်းချောင်းရေလျှံပြီး အောက်စက်တော်ရာဘုရား ရေဝင်
ဧရာဝတီ၊ စက်တင်ဘာ ၂၅၊ ၂၀၂၅
မကွေးတိုင်း၊ မင်းဘူးမြို့နယ်ရှိ မန်းချောင်းရေလျှံပြီး အောက်စက်တော်ရာဘုရားအတွင်း ယနေ့ နံနက် ၇ နာရီခွဲတွင် ရေဝင် နစ်မြုပ်မှုဖြစ်ပွားခဲ့ပြီး မန်းချောင်းတလျောက်ရှိ နေအိမ်များလည်း ရေဝင်ရောက်မှုများကြောင့် ပြောင်းရွှေ့ခဲ့ရကြောင်း မြန်မာနိုင်ငံမီးသတ်တပ်ဖွဲ့က ထုတ်ပြန်သည်။
ထို့ပြင် မိုးသည်းထန်စွာရွာသွန်းမှုကြောင့် ယနေ့ နံနက်ပိုင်းတွင်လည်း မင်းဘူး-စကုကားလမ်းပေါ် ရေကျော်၍ လမ်းပိတ်မှု ဖြစ်ပေါ်ခဲ့ကြောင်း မီးသတ်တပ်ဖွဲ့က ဖော်ပြထားသည်။
တရုတ်နိုင်ငံတောင်ပိုင်းကို ဖြတ်သန်းခဲ့သော အားကောင်းသည့် အပူပိုင်းမုန်တိုင်း “ရာဂါဆာ” သည် လာမည့် ၆ နာရီအတွင်း အပူပိုင်းမုန်တိုင်းအဖြစ်ဖြင့် ကွမ်ရှီးပြည်နယ် တောင်ပိုင်းဒေသများကို ဆက်လက်ဖြတ်ကျော်နိုင်ကာ ထိုမှတဆင့် အနောက် ဘက်သို့ ဆက်လက်ရွေ့လျားနိုင်ပြီး လာမည့် ၂၄ နာရီအတွင်း အပူပိုင်းမုန်တိုင်းငယ်အဖြစ်နှင့် ဗီယက်နမ်နိုင်ငံ မြောက်ပိုင်း ဒေသများကို ဆက်လက်ဖြတ်ကျော်နိုင်သည်ဟု စစ်ကော်မရှင် လက်အောက်ခံ မိုးလေဝသနှင့် ဇလဗေဒညွှန်ကြားမှုဦးစီး ဌာနက ထုတ်ပြန်ထားသည်။
ထို့ကြောင့် စစ်ကိုင်းတိုင်းအောက်ပိုင်း၊ ကချင်၊ ကရင်နီနှင့် ရှမ်းပြည်နယ်(မြောက်ပိုင်း) တို့တွင် နေရာကျဲကျဲ၊ စစ်ကိုင်း အထက်ပိုင်း၊ ချင်း၊ ရခိုင်နှင့် ရှမ်းပြည်နယ်(အရှေ့ပိုင်း)တို့၌ နေရာ စိပ်စိပ်နှင့် ကျန်တိုင်းနှင့် ပြည်နယ်တို့တွင် နေရာအနှံ့အပြား မိုးထစ်ချုန်းရွာပြီး နေပြည်တော်၊ ရန်ကုန်၊ မန္တလေး၊ မကွေး၊ ဧရာဝတီ၊ တနင်္သာရီတိုင်း၊ ကရင်ပြည်နယ်နှင့် မွန်ပြည်နယ်တို့၌ နေရာကွက်၍ မိုးကြီးနိုင်ကြောင်း ဖော်ပြထားသည်။
