ကမ္ဘာပျက်ငါး' ဆိုတာ တကယ်ပဲ ဘေးအန္တရာယ်ရဲ့ နိမိတ်လား။ သိပ္ပံပညာရှင်တွေ ဘာပြောလဲ ကြည့်ရအောင်
သမုဒ္ဒရာဆိုတာ ကျယ်ပြောနက်နဲလွန်းတော့ လူတွေကို အမြဲတမ်း စိတ်ဝင်စားမှုရော၊ စိုးရိမ်ပူပန်မှုပါ ဖြစ်စေခဲ့တာပေါ့။ အဲ့ဒီအထဲမှာ အထူးဆန်းဆုံး ငါးတစ်မျိုးရှိတယ်။ အဲ့ဒါကတော့ ဧရာမလှေသူကြီးငါး (Giant Oarfish) ပဲ။ သူက ပုံမှန်ဆို ရေနက်ပိုင်းမှာပဲနေပြီး ဖဲကြိုးလို ရှည်လျားတယ်။ အခုနောက်ပိုင်းမှ "ကမ္ဘာပျက်ငါး" ဆိုတဲ့ နာမည်နဲ့ လူမှုကွန်ရက်ပေါ်မှာ တအားနာမည်ကြီးလာတာပေါ့။
Oarfish ငါးကို တွေ့ရှိတဲ့ ပုံတွေ၊ ဗီဒီယိုတွေက ဆိုရှယ်မီဒီယာတွေမှာ ပြည့်နေပြီး အထူးသဖြင့် ငလျင်၊ ဆူနာမီလိုမျိုး ဘေးအန္တရာယ်ကြီးတွေ ဖြစ်တော့မယ်ဆိုတဲ့ အယူအဆတွေနဲ့ တွဲပြီး ပျံ့နေတာပဲ။ ဒီလို ကြောက်ရတာက အခုမှမဟုတ်ပါဘူး။ ရာစုနှစ်ပေါင်းများစွာကတည်းက ကမ်းရိုးတန်းက လူတွေဟာ ဒီငါးကို ဘေးဥပဒ်ရဲ့ ရှေ့ပြေးနိမိတ် လို့ ယူဆခဲ့ကြတာ။ ဒါပေမဲ့ ဒီအယူအဆတွေက တကယ်မှန်ရဲ့လား။ ဒါမှမဟုတ် ဒဏ္ဍာရီ၊ တိုက်ဆိုင်မှု၊ ဗိုင်းရယ်လ်ဖြစ်ပြီး လူတွေ လန့်နေကြတာသက်သက်ပဲလား။
ဘာကြောင့် 'ကမ္ဘာပျက်ငါး' ကို ဘေးအန္တရာယ်ရဲ့ နိမိတ်လို့ ထိတ်လန့်ကြတာလဲ
ဒီ "ကမ္ဘာပျက်ငါး" လို့ နာမည်တပ်ခံရတဲ့ ငါးရဲ့ တကယ့်နာမည်က Regalecus glesne လို့ ခေါ်တယ်။ သူက Regalecidae မျိုးရင်းထဲမှာ ပါပြီး၊ ကမ္ဘာပေါ်မှာ အရိုးအရှည်ဆုံး ငါးအဖြစ် စံချိန်တင်ထားတယ်။ အရှည်က ပေ ၃၆ ပေ (၁၁ မီတာ) ထိကို ရှည်နိုင်တယ်။
ဧရာမ Oarfish တွေဟာ ပုံမှန်အားဖြင့် ရေအောက် ပေ ၆၆၀ ကနေ ၃,၃၀၀ ပေ (မီတာ ၂၀၀ ကနေ ၁,၀၀၀) အကြား Mesopelagic Zone လို့ခေါ်တဲ့ ရေနက်ပိုင်းမှာ နေကြတာ။ အဲ့ဒီနေရာတွေမှာက အလင်းရောင် နည်းပြီး ရေကလည်း အေးစိမ့်နေတယ်။ ရေနက်ပိုင်းမှာ နေတဲ့အတွက် သူတို့ကို တွေ့ရခဲပါတယ်။ တွေ့ရတာများသောအားဖြင့် သူတို့ နေမကောင်းဖြစ်လို့၊ သေခါနီးလို့၊ ဒါမှမဟုတ် ရေတိမ်ပိုင်းကို ရောက်လာ တဲ့အချိန်မျိုးတွေမှာပဲ။
သူတို့ရဲ့ မြွေလို ခန္ဓာကိုယ်၊ တောက်ပတဲ့ ငွေရောင် အရေပြား၊ ခန္ဓာကိုယ် အရှည်လိုက်ပါတဲ့ အနီရောင် ဆူးတောင်တွေက သူတို့ကို ကြည့်ရတာ ထူးဆန်းပြီး ကြောက်စရာ ကောင်းနေစေတယ်။ ဒီလို ထူးခြားတဲ့ ပုံစံကြောင့်ပဲ ဘေးဥပဒ်နဲ့ ဆက်စပ်ပြီး အယူအဆတွေ ပေါ်လာတာ ဖြစ်နိုင်ပါတယ်။
ဒဏ္ဍာရီလာ ဇစ်မြစ်များ- ဘာလို့ 'ကမ္ဘာပျက်ငါး' လို့ ခေါ်တာလဲ
ဂျပန်ရိုးရာ ပုံပြင်တွေမှာ ဒီ Oarfish ကို “Ryugu no tsukai” လို့ ခေါ်ကြတယ်။ မြန်မာလို အဓိပ္ပာယ်ကတော့ “ပင်လယ်နတ်ဘုရား နန်းတော်က သံတမန်” ပေါ့။ ရှေးတုန်းက ဒီငါးကို တွေ့လိုက်ရင် ရေနက်ပိုင်းက နတ်ဘုရားတွေဆီက ငလျင် ဒါမှမဟုတ် ဆူနာမီ လာတော့မယ်ဆိုတဲ့ သတိပေးစကား လို့ အဓိပ္ပာယ်ကောက်ယူကြတယ်။
ပစိဖိတ်နဲ့ အာရှတစ်ဝိုက်က တခြား ကမ်းရိုးတန်း လူ့အဖွဲ့အစည်းတွေမှာလည်း အလားတူ ယုံကြည်မှုတွေ ရှိကြတယ်။ ဒီငါးကို တွေ့ရင် ကံဆိုးခြင်း၊ သေခြင်း၊ သဘာဝဘေးအန္တရာယ်တွေရဲ့ နိမိတ်အဖြစ် ရှုမြင်ကြတယ်။ ဒီယုံကြည်မှုတွေက ပင်လယ်ရေပြင်ပေါ်မှာ အသက်မွေးရတဲ့ တံငါသည်တွေနဲ့ သင်္ဘောသားတွေရဲ့ ပါးစပ်ပြော ဓလေ့တွေကနေ ဆင်းသက်လာတာပါ။
၂၀၁၁ ဆူနာမီကို Oarfish က တကယ်ပဲ ကြိုပြောခဲ့တာလား။
အခုခေတ် Doomsday Theory (ကမ္ဘာပျက်သီအိုရီ) ကို အားအပေးနိုင်ဆုံး ဖြစ်ရပ်က ၂၀၁၀ ခုနှစ်မှာ ဖြစ်ခဲ့တယ်။ အဲ့ဒီတုန်းက ဂျပန်ကမ်းရိုးတန်းတစ်လျှောက်မှာ သေနေတဲ့ Oarfish အများအပြား ကို တွေ့ခဲ့ရတယ်။ လအနည်းငယ်ကြာပြီးနောက် ၂၀၁၁ ခုနှစ် မတ်လမှာ အင်အားပြင်းထန်တဲ့ တိုဟိုကူး ငလျင်နဲ့ ဆူနာမီ ဝင်ပြီး လူပေါင်း ၁၅,၀၀၀ ကျော် သေဆုံးကာ ဖူကူရှီးမား နျူကလီးယားဘေးအန္တရာယ် ဖြစ်ခဲ့တယ်။
သိပ္ပံပညာရှင်တွေကတော့ တိုက်ရိုက်ဆက်စပ်မှု မရှိ ဘူးလို့ ငြင်းဆိုခဲ့ပေမဲ့ ဒီဖြစ်ရပ်တွေ တိုက်ဆိုင်သွားတာက ရှေးဟောင်းအယူအဆတွေကို ပြန်လည်အသက်ဝင်စေပြီး ဒီငါးကို ခေတ်ပေါ် ယဉ်ကျေးမှုမှာ "ကပ်ဆိုးကြီးရဲ့ သင်္ကေတ" အဖြစ် ခိုင်မြဲစေခဲ့တယ်။
မကြာသေးမီက Oarfish ဗီဒီယိုတွေကြောင့် ငလျင်ကြောက်စိတ်တွေ ပိုပျံ့လာ
ဒီဆယ်စုနှစ်အတွင်း Oarfish ငါး တွေ့ရှိမှုတွေဟာ ပိုများလာတယ်။ တစ်စိတ်တစ်ပိုင်းက ရာသီဥတုပြောင်းလဲမှု ကြောင့် ဖြစ်နိုင်သလို၊ နောက်တစ်စိတ်ပိုင်းက လူတွေက ပင်လယ်နဲ့ပတ်သက်တဲ့ အကြောင်းအရာတွေကို ပိုရိုက်ပြီး ပိုမျှဝေလာလို့ပဲ။ ဗိုင်းရယ်ဖြစ်နေတဲ့ TikTok နဲ့ Instagram ဗီဒီယိုတွေမှာ ဒီငါးတွေကို ကမ်းခြေနားမှာ ဒါမှမဟုတ် ငါးဖမ်းပိုက်ထဲမှာ တွေ့ရပြီး ငလျင်လာတော့မယ်ဆိုတဲ့ စိုးရိမ်တကြီး စာသားတွေနဲ့ တင်ထားကြတယ်။
မကြာသေးမီက ထင်ရှားတဲ့ တွေ့ရှိမှုတွေအနေနဲ့-
* ၂၀၂၂: ထိုင်ဝမ်အနီးမှာ ၁၃ ပေရှည်တဲ့ Oarfish ကို တွေ့လိုက်ရလို့ ငလျင်လာတော့မယ်ဆိုတဲ့ ကောလာဟလတွေ ကြီးမားစွာ ထွက်ပေါ်ခဲ့တယ်။
* ၂၀၂၃: ဖိလစ်ပိုင်မှာ သေခါနီး Oarfish တစ်ကောင်ကို မျက်နှာပြင်ပေါ် တွေ့ရှိပြီး ရက်အနည်းငယ်အကြာမှာ Luzon ကို ၆.၁ ပမာဏရှိတဲ့ ငလျင် လှုပ်ခတ်ခဲ့တယ်။
* ၂၀၂၅: မက္ကဆီကိုနိုင်ငံ၊ Baja California ကမ်းလွန်မှာ အရှင်လတ်လတ် Oarfish ငါးကို ရိုက်ထားတဲ့ ဗီဒီယိုဟာ လူကြည့် သန်းပေါင်းများစွာ ရခဲ့ပြီး ကမ္ဘာပျက်တော့မယ်ဆိုတဲ့ ပျံ့လွင့်မှုကို ပြန်လည်ဖြစ်ပေါ်စေခဲ့တယ်။
အချက်အလက် စစ်ဆေးခြင်း- Oarfish တွေ့တာက ငလျင်လာမယ်လို့ မဆိုလိုပါဘူး
ဒီလို အယူသီးမှုတွေ ရှိနေပေမဲ့ သိပ္ပံနည်းကျ သုတေသနတွေအရ Oarfish ငါး တွေ့ရှိမှုနဲ့ ငလျင်လှုပ်ရှားမှုကြားမှာ ခိုင်မာတဲ့ ဆက်စပ်မှု ဘာမှ မတွေ့ရပါဘူး။ ၂၀၁၉ ခုနှစ်က Bulletin of the Seismological Society of America မှာ ထုတ်ဝေခဲ့တဲ့ စာတမ်းတစ်ခုမှာ သုတေသီတွေဟာ အစီရင်ခံထားတဲ့ Oarfish တွေ့ရှိမှု ဒါဇင်ပေါင်းများစွာကို ပြန်လည်သုံးသပ်ခဲ့ရာမှာ ငလျင်ဖြစ်ရပ်တွေနဲ့ စာရင်းအင်းအရ သိသာထင်ရှားတဲ့ ဆက်စပ်မှု မရှိ ဘူးဆိုတာ တွေ့ရှိခဲ့ရတယ်။
Oarfish ငါးတွေ မျက်နှာပြင်အနီးကို ဘာကြောင့် ရောက်လာရလဲဆိုတဲ့ ဇီဝဗေဒဆိုင်ရာ ရှင်းလင်းချက် တွေတော့ အများကြီးရှိပါတယ်။
