ဗီလာရီးရဲလ်နှင့် ဘာစီလိုနာ၊ အေစီမီလန်နှင့် ကိုမိုပွဲတို့အား ပထမဆုံးနှင့် နောက်ဆုံးအဖြစ် နိုင်ငံခြားတွင် လိဂ်ပွဲ ကစားခွင့်ပေးလိုက်ပြီ ဖြစ်တဲ့ ယူအီးအက်ဖ်အေ
​
အောက်တိုဘာ ၇

ယူအီးအက်ဖ်အေဥက္ကဌအလက်ဇန္ဒားစီဖီရန်က ဥရောပလိဂ်ပွဲ ၂ ပွဲအား နောင်တများစွာဖြင့် ပထမဆုံးအကြိမ်အဖြစ် ပြည်ပတွင် ကစားခွင့်ပြုခဲ့ကြောင်း၊ ခြွင်းချက်အနေဖြင့် ခွင့်ပြုချက်ပေးခဲ့ခြင်းသာ ဖြစ်ကာ၊ နောင်တွင် ခွင့်ပြုသွားမှာ မဟုတ်ကြောင်း ပြောကြားလာပါတယ်။

ယူအီးအက်ဖ်အေရဲ့ ခွင့်ပြုချက် ရရှိလာမှုနှင့်အတူ ဗီလာရီးရဲလ်နှင့် ဘာစီလိုနာတို့ရဲ့ လာလီဂါပွဲစဉ်ကို လာမယ့် ဒီဇင်ဘာလတွင် မိုင်ယာမီမှာ ကစားလာတော့မှာ ဖြစ်ပြီး ယင်းပွဲမှာ ပြည်ပတွင် ပထမဆုံးကစားတဲ့ ဥရောပလိဂ်ပွဲ ဖြစ်လာပါမယ်။

ယင်းနောက်‌ ဖေဖော်ဝါရီလတွင် အေစီမီလန်နှင့်ကိုမိုတို့ရဲ့ စီးရီးအေပွဲစဉ်မှာလည်း ဩစတြေးလျနိုင်ငံ၊ ပတ်တွင် ကစားလာပါမယ်။

ယူအီးအက်ဖ်အေဟာ ပြည်တွင်းလိဂ်ပွဲများအား ပြည်ပတွင် ကစားမှုအား မထောက်ခံပေမယ့်လည်း ဥပဒေလမ်းကြောင်းပိုင်းအရ တားဆီးပိုင်ခွင့် မရှိမှုနှင့်အတူ မချင့်မရဲဖြင့် ခွင့်ပြုချက်ပေးလာရတာလည်း ဖြစ်ပါတယ်။

ယူအီးအက်ဖ်အေက ယခုကဲ့သို့ ဥရောပထိပ်သီး လိဂ်ကြီး ၂ ပွဲကို ပြည်ပတွင် ကစားရေး စီစဉ်လာမှုအား ဥပဒေကြောင်းအရ တားဆီးလာနိုင်ခြင်းမရှိပေမယ့်လည်း Football Supporters Europe (FSE) က နောင်တွင် ယင်းသို့ မဖြစ်လာစေရန်အတွက် စည်းမျဉ်းဥပဒေ အတိအကျ ထည့်သွင်းရေးဆွဲသင့်ကြောင်း ဆိုထားပါတယ်။

စီးရီးအေနှင့် လာလီဂါတို့ဟာ ဈေးကွက်ချဲ့ထွင့်တဲ့အနေဖြင့် ယင်း လိဂ်ပွဲ နှစ်ပွဲအား ပြည်ပတွင် ကစားရန် စီစဉ်လာခဲ့တာလည်း ဖြစ်ပါတယ်။

ယင်းသို့ နိုင်ငံခြားတွင် လိဂ်ပွဲများ ကစားရန် စီစဉ်မှုနှင့်အတူ ပရိသတ်များမှာ ခရီးစရိတ်များစွာ ကုန်ကျလာတော့မှာလည်း ဖြစ်ပါတယ်။

လာလီဂါဟာ ပြီးခဲ့တဲ့နှစ်ကတည်းက ဘာစီလိုနာနှင့် အက်သလက်တီကိုပွအား မိုင်ယာမီတွင် ကစားရေး ကြိုးပမ်းခဲ့ပေမယ့် မအောင်မြင်ခဲ့ပါဘူး။

ယင်းမတိုင်မီ ၂၀၁၉ ခုနှစ်တုန်းကလည်း ဘာစီလိုနာဟာ ဂီရိုနာနှင့် လိဂ်ပွဲစဉ်အား မိုင်ယာမီတွင် ကစားရန် ကြိုးပမ်းခဲ့ပါသေးတယ်။

တဖက်တွင် အီတာလီယာစူပါဖလားနှင့် စပိန်စူပါဖလားပွဲတို့အား နိုင်ငံခြားတွင် ကစားလာခဲ့တာ ကြာမြင့်လာပြီလည်း ဖြစ်ပါတယ်။

ပရီးမီးယားလိဂ်ဟာလည်း ၂၀၀၈ ခုနှစ်တုန်းက ပရီးမီးယားလိဂ်ပွဲများအား ပြည်ပတွင် ကစားရေး ကြိုးပမ်းခဲ့ပေမယ့် ပရိသတ်များရဲ့ ကန့်ကွက်မှုကြောင့် နောက်ဆုတ်ခဲ့ရပါတယ်။

Credit - Playmaker Journal

#ဘောလုံးသတင်းစုံ

သက်ကြီးပိုင်း အငှားယာဉ်မောင်းကို သတ်ဖြတ် လုယက်သွားပြီး ရဲတပ်ဖွဲ့က ကနဦးအနေနဲ့ ကျူးလွန်သူ သုံးဦးကို အချိန်တိုအတွင်း ဖမ်းဆီးရမိ

အောက်တိုဘာ ၇

အငှားယာဉ်‌မောင်းကို သတ်ပြီး လုယက်တဲ့ ဖြစ်စဉ် အောက်တိုဘာ ၅ ရက်နေ့ညက ရန်ကုန်တိုင်း၊ သန်လျင်မြို့နယ်၊ သန်လျင် ခြောက်လမ်းသွားလမ်းမပေါ်မှာ ဖြစ်ပွားခဲ့တယ်လို့ သိရှိရပြီး ပြစ်မှုကျူးလွန်သူ သုံးဦးကို ဖမ်းဆီးရမိထားပြီဖြစ်တယ်လို့ ရဲတပ်ဖွဲ့နဲ့ နီးစပ်သူထံကနေ သိရပါတယ်။

အသတ်ခံရသူက အသက် ၆၅ နှစ်အရွယ် ဦးစံသိန်းလို့ သိရှိရပြီး ရန်ကုန်မြို့၊ သာကေတ {၃) ရပ်ကွက် ၊ ရန်ပြေ (၁၈) လမ်းအနောက်မှာ နေထိုင်သူလို့ သိရပါတယ်။ အခင်းဖြစ်တဲ့‌ အောက်တိုဘာ ၅ ရက်နေ့က ည ၉ နာရီ နောက်ပိုင်းကတည်းက ဆက်သွယ်လို့ မရဘဲ ကားရော လူပါ ပျောက်ဆုံးနေတာကြောင့် အောက်တိုဘာ ၆ ရက်နေ့ မနက်ပိုင်းမှာ လူမှုကွန်ရက်ကနေတစ်ဆင့် လူပုံရော ကားကိုပါ ပို့စ်တင်ကာ အသိပေးကြေညာခဲ့သလို သက်ဆိုင်ရာကို လူပျောက်တိုင်ကြားခဲ့တယ်လို့ သိရပါတယ်။

အောက်တိုဘာ ၆ ရက်နေ့ ညနေ ၃ နာရီခန့်အချိန်မှာ‌တော့ သန်လျင် ခြောက်လမ်းသွားလမ်းမပေါ်မှာ Taxi သမားတစ်ဦး အသတ်ခံရပြီးသေဆုံးနေတာကို တွေရှိကြောင်း ကနဦး သိရှိရပြီး၊ ရဲတပ်ဖွဲ့က ဆက်လက် စစ်ဆေးအတည်ပြုချက်အရ သေဆုံးသူမှာ ဦးစံသိန်း ဖြစ်ကြောင်း အတည်ပြုနိုင်ခဲ့ကာ ပြစ်မှုကျူးလွန်သူတွေကို အမြန်ဆုံး ဖမ်းဆီးရမိနိုင်ရေး လက်ဦးမှုရရှိနိုင်အောင် သတိကြီးစွာနဲ့ ဆောင်ရွက်ခဲ့ရတယ်လို့ ရဲတပ်ဖွဲ့နဲ့ နီးစပ်သူက ဆိုပါတယ်။

ကျူးလွန်သူလို့ ယူဆရသူ သုံးဦးကို အချိန်တိုတွင်း ပူးပေါင်းဖမ်းဆီးနိုင်ခဲ့ပြီး၊ လက်ရှိမှာဖမ်းဆီးရမိထားတဲ့ ပြစ်မှုကျူးလွန်သူ သုံးဦးကို ရဲလုပ်ငန်းစဉ်တွေဆက်လက်ဆောင်ရွက်လျက် အမှုတည်ဆောက်နိုင်ရေး စုံစမ်းစစ်ဆေးနေတယ်လို့လည်း သိရပါတယ်။

Credit - Myanmar Transparency News Agency

#centralnewsnaypyitaw

မြင်းခြံတွင် အကျဉ်းဦးစီးအရာရှိ၏ မိသားစုဝင်များကို အကြမ်းဖက်အဖွဲ့က ဖမ်းဆီးသွား

အောက်တိုဘာ ၇

မြင်းခြံတွင်အကျဉ်းဦးစီးအရာရှိ၏ မိသားစုဝင်များကို အကြမ်းဖက်အဖွဲ့က ဖမ်းဆီးသွားခဲ့ကြောင်း ပြည်ထဲရေးဝန်ကြီးဌာနက သတင်းထုတ်ပြန်ထားသည်။

ဖြစ်စဉ်မှာ ပြီးခဲ့သည့် အောက်တိုဘာ ၅ ရက် နံနက် ၉ နာရီက မန္တလေးတိုင်းဒေသကြီး၊ မြင်းခြံမြို့နယ်၊ နွားကူးအိုင်ကျေးရွာအနီးတွင် ဖြစ်ပွားခဲ့ခြင်းဖြစ်သည်။

မြင်းခြံမြို့နယ်၊ အကျဉ်းဦးစီးဌာနမှ ဦးစီးအရာရှိ ဦးဝင်းနိုင်စိုး ၏ ဇနီးဖြစ်သူ ဒေါ်နီနီဝင်း(၄၈)နှစ်သည် မြေးဖြစ်သူ မရွန်းချယ်ရီဟိန်း(၃)နှစ်တို့သည် မြင်းခြံမြို့၊ အမှတ်(၁၃)ရပ်ကွက်နေ ဦးမင်းခန့်(၄၃)နှစ်မောင်းနှင်သည့် အငှားမော်တော်ယာဉ်ဖြင့် စဥ့်ကိုင်မြို့နယ်၊ ဘယ်လင်းကျေးရွာရှိ မိဘများထံသို့ မြင်းခြံ-မြို့သာ-တံတားဦး-မန္တလေးလမ်းအတိုင်း ထွက်ခွာလာခဲ့ကြောင်း သိရသည်။

ထိုသို့ထွက်ခွာလာစဉ် မြင်းခြံမြို့နယ်၊ နွားကူးအိုင်ကျေးရွာအနီးအရောက် PDF အဖွဲ့ဝင်များက မော်တော်ယာဉ်အား တားဆီး၍ ၎င်းတို့သုံးဦးအား မော်တော်ယာဉ်နှင့်အတူ ဖမ်းဆီးခေါ်ဆောင်သွားခဲ့ကြောင်း သိရသည်။

အထက်ပါဖြစ်စဉ်မှ အကြမ်းဖက်သမားများအား ဖော်ထုတ်ဖမ်းဆီး အရေးယူနိုင်ရေးနှင့် ဖမ်းဆီးခံထားရသူအား ပြန်လည်ကယ်တင်နိုင်ရေး လုံခြုံရေး တပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း သိရသည်။

Credit - NP News Agency

#သတင်းဟင်းလေးအိုးကြီး

ပဲလေ့စ်နောက်ခံလူဂူဟီကို အလွတ်ပြောင်းရွှေ့ကြေးဖြင့် ခေါ်ယူရေး ဘိုင်ယန်ကြိုးပမ်းလာ

အောက်တိုဘာ ၇

ဂျာမန်ထိပ်သီး ဘိုင်ယန်မြူးနစ်ဟာ ခရစ္စတယ်ပဲလေ့စ်အသင်းခေါင်းဆောင်မာ့ခ်ဂူဟီကို အလွတ်ပြောင်းရွှေ့ကြေးဖြင့် ခေါ်ယူရေး ကြိုးပမ်းလာပါတယ်။

အသက် ၂၅ နှစ်ရှိ ဂူဟီဟာ ပြီးခဲ့တဲ့ရာသီတုန်းက ပဲလေ့စ်အား ကလပ်သမိုင်းတွင် ပထမဆုံး ဆုဖလားအဖြစ် အက်ဖ်အေဖလား ရရှိအောင် ဦးဆောင်ပေးခဲ့သလို ရာသီအစတုန်းကလည်း ကွန်မြူနတီဒိုင်းရယူပေးထားသူ ဖြစ်ပါတယ်။

သူဟာ ကလပ်နှင့် အင်္ဂလန်အသင်းတို့တွင် ခြေစွမ်းပြကစားနိုင်မှုနှင့်အတူ ကလပ်အမြောက်အမြားရဲ့ စိတ်ဝင်စားခြင်းခံနေရပါတယ်။

Sky Sports ရဲ့ ဖော်ပြလာမှုအရ ဂူဟီအား ခေါ်ယူရေး ကြိုးပမ်းလာတဲ့အသင်းများတွင် အသင်းသစ်အဖြစ် ဘိုင်ယန်မြူးနစ်လည်း ပါဝင်လာကြောင်း သိရပါတယ်။

ဂူဟီဟာ ယခုရာသီအကုန်တွင် ပဲလေ့စ်နှင့် စာချုပ်သက်တမ်းကုန်ဆုံးမှာ ဖြစ်ပြီး လာမယ့် ဇန်နဝါရီလမှ စတင်ကာ နိုင်ငံခြားကလပ်များနှင့်လွတ်လပ်စွာ ဆွေးနွေးခွင့် ရှိနေသူ ဖြစ်ပါတယ်။

သူဟာ နွေရာသီအပြောင်းအရွှေ့ဈေးကွက် နောက်ဆုံးနေ့တုန်းက လီဗာပူးသို့ ပြောင်းလုနီးပါး ဖြစ်ခဲ့ပေမယ့်လည်း ပဲလေ့စ်ဘက်က အစားထိုးနိုင်မယ့် ကစားသမားရှာမရလို့ အပြောင်းအရှေ့ပျက်ပြယ်ခဲ့ရသူလည်း ဖြစ်ပါတယ်။

အစောပိုင်းတုန်းက ထွက်ပေါ်နေတဲ့သတင်းများအရ ဂူဟီဟာ လာမယ့် နွေရာသီတွင် ရီးရဲလ်မက်ဒရစ်သို့သာ ပြောင်းရွှေ့လိုနေကြောင်း သိရပါတယ်။

ရီးရဲလ်မက်ဒရစ်ကလည်း လာမယ့်နွေရာသီတွင် ခံစစ်ကို ပြန်လည်တည်ဆောက်ရန် စီစဉ်ထားပြီး ၎င်းတို့ ခေါ်ယူမယ့် စာရင်းထဲတွင် ဂူဟီက ထိပ်ဆုံးက ပါဝင်နေတယ်လို့ ယုံကြည်ရပါတယ်။

Credit - Playmaker Journal

#ဘောလုံးသတင်းစုံ

ယနေ့ ရွှေဈေးနဲ့ နိုင်ငံခြားငွေလဲနှုန်းများ

အောက်တိုဘာ ၇

#ရွှေဈေး

-ကမ္ဘာ့ရွှေဈေး
တအောင်စ ၃၉၆၅ ဒေါ်လာ

ရန်ကုန်တိုင်းရွှေလုပ်ငန်းရှင်များအသင်း (YGEA) ရဲ့ရွှေစျေးကွက် အဖွင့်ဈေးနှုန်း

- အကယ်ဒမီ မီးလင်းရွှေ တကျပ်သား
၅၉၉၀၀၀၀ ကျပ်

ပြင်ပ အရောင်းအဝယ်ဖြစ်တဲ့ ရွှေဈေးနှုန်း

* စနစ်ဟောင်း
(၁ိ - ၁၆.၆၀၆ ဂရမ် = ၁၂၈ ရွေး)

-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၈၀၂၀၀၀၀ ကျပ်
ဝယ်ဈေး ၇၉၈၀၀၀၀ ကျပ်

-၁၅ ပဲရည် တကျပ်သား
ရောင်းဈေး ၇၆၂၀၀၀၀ ကျပ်
ဝယ်ဈေး ၇၅၈၀၀၀၀ ကျပ်

* စနစ်သစ်
(၁ိ - ၁၆.၃၂၉၃၂၅ ဂရမ် = ၁၂၀ ရွေး)

-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၇၉၀၀၀၀၀ ကျပ်
ဝယ်ဈေး ၇၈၆၀၀၀၀ ကျပ်

-၁၅ ပဲရည် တကျပ်သား
ရောင်းဈေး ၇၅၀၀၀၀၀ ကျပ်
ဝယ်ဈေး ၇၄၆၀၀၀၀ ကျပ်

“လက်ရှိ ရွှေဈေးကွက်အတွင်း ဈေးနှုန်းအတက်အကျ မငြိမ်သေးတဲ့အတွက် ရောင်းမှား၊ ဝယ်မှား မဖြစ်ဖို့ သတိပြုစေလိုပါတယ်။”

(ရွှေဈေးနှုန်းများ အချိန်နှင့်အမျှ ပြောင်းလဲနိုင်သည်။)

#နိုင်ငံခြားငွေလဲလှယ်နှုန်း

-မြန်မာနိုင်ငံတော်ဗဟိုဘဏ် ရည်ညွှန်းငွေလဲနှုန်း
အမေရိကန် တဒေါ်လာ - ၃၅၉၉ ကျပ်

ပြင်ပပေါက်စျေး

-အမေရိကန်ဒေါ်လာ‌
ရောင်းဈေး - ၄၀၈၅ ကျပ်
ဝယ်ဈေး - ၃၉၈၅ ကျပ်

-စင်္ကာပူဒေါ်လာ
ရောင်းဈေး - ၃၁၆၅ ကျပ်
ဝယ်ဈေး - ၃၀၈၅ ကျပ်

-ယူရို
ရောင်းဈေး - ၄၇၈၅ ကျပ်
ဝယ်ဈေး - ၄၆၆၅ ကျပ်

-ထိုင်းဘတ်
ရောင်းဈေး - ၁၂၅.၇၉ ကျပ်
ဝယ်ဈေး - ၁၂၂.၇ ကျပ်

-မလေးရှားရင်းဂစ်
ရောင်းဈေး - ၉၆၉ ကျပ်
ဝယ်ဈေး - ၉၄၅ ကျပ်

-တရုတ်ယွမ်
ရောင်းဈေး - ၅၇၄ ကျပ်
ဝယ်ဈေး - ၅၆၀ ကျပ်

-ဂျပန်ယန်း
ရောင်းဈေး - ၂၇.၁၇ ကျပ်
ဝယ်ဈေး - ၂၆.၅ ကျပ်

-အိန္ဒိယရူပီး
ရောင်းဈေး - ၄၆.၀၆ ကျပ်
ဝယ်ဈေး - ၄၄.၉၃ ကျပ်

-ကိုရီးယားဝမ်
ရောင်းဈေး - ၂.၉ ကျပ်
ဝယ်ဈေး - ၂.၈၂ ကျပ်

-စတာလင်ပေါင်
ရောင်းဈေး - ၅၅၁၀ ကျပ်
ဝယ်ဈေး - ၅၃၇၅ ကျပ်

-ဩစတြေးလျဒေါ်လာ
ရောင်းဈေး - ၂၇၀၅ ကျပ်
ဝယ်ဈေး - ၂၆၄၀ ကျပ်

-ကနေဒါဒေါ်လာ
ရောင်းဈေး - ၂၉၃၀ ကျပ်
ဝယ်ဈေး - ၂၈၆၀ ကျပ်

-ဟောင်ကောင်ဒေါ်လာ
ရောင်းဈေး - ၅၂၅ ကျပ်
ဝယ်ဈေး - ၅၁၂ ကျပ်

-ယူအေအီး
ရောင်းဈေး - ၁၁၁၃ ကျပ်
ဝယ်ဈေး - ၁၀၈၆ ကျပ်

ငွေလဲနှုန်းများ အချိန်နှင့်အမျှ ပြောင်းလဲနိုင်သည်။

***သတ်မှတ်ဈေးအတိုင်း အရောင်းအဝယ်မလုပ်ပါက အရေးယူခံရနိုင်သည်။

Credit - Voice of Myanmar News Agency

#သတင်းဟင်းလေးအိုးကြီး

မြန်မာ-ဘယ်လာရုစ်(၂)နိုင်ငံ နိုင်ငံခြားရေးဝန်ကြီးဌာနများအကြား ဒုတိယအကြိမ် ညှိနှိုင်းဆွေးနွေးပွဲတွင် အထွေထွေရွေးကောက်ပွဲကျင်းပရန် ပြင်ဆင်နေမှု အပါအဝင် ကဏ္ဍများစွာဆွေးနွေးခဲ့

အောက်တိုဘာ ၅

မြန်မာ-ဘယ်လာရုစ်(၂)နိုင်ငံ နိုင်ငံခြားရေးဝန်ကြီးဌာနများအကြား ဒုတိယအကြိမ်ညှိနှိုင်းဆွေးနွေးပွဲတွင် မြန်မာနိုင်ငံ၏ အထွေထွေရွေးကောက်ပွဲ ကျင်းပရန်ပြင်ဆင်နေမှုအပါအဝင် ကဏ္ဍများစွာဆွေးနွေးခဲ့ကြောင်း နိုင်ငံတော်လုံခြုံရေးနှင့်အေးချမ်းသာယာရေးကော်မရှင်၏ ထုတ်ပြန်ချက်အရ သိရသည်။

အဆိုပါ ဆွေးနွေးပွဲကို ပြီးခဲ့သည့် အောက်တိုဘာ ၃ ရက်၊ နံနက်ပိုင်းက ဘယ်လာရုစ်နိုင်ငံခြားရေးဝန်ကြီးဌာန၌ ကျင်းပခဲ့ခြင်းဖြစ်ပြီး နိုင်ငံခြားရေးဝန်ကြီးဌာန ဒုတိယဝန်ကြီးဦးကိုကိုကျော်နှင့် ဘယ်လာရုစ်သမ္မတနိုင်ငံ နိုင်ငံခြားရေးဝန်ကြီးဌာန ဒုတိယဝန်ကြီး(၁) မစ္စတာဆာဂေး လူကာရှယ်ဗစ်ချ်တို့ တက်ရောက်ဆွေးနွေးခဲ့ကြောင်း သိရသည်။
မြန်မာနိုင်ငံ၏ အထွေထွေရွေးကောက်ပွဲကျင်းပရန်ပြင်ဆင်နေမှု၊ နှစ်နိုင်ငံနိုင်ငံခြားရေးဝန်ကြီးဌာနများအကြား ပိုမိုနီးကပ်စွာပူး ပေါင်း ဆောင်ရွက်ရေး၊ ကာကွယ်ရေးနှင့် လုံခြုံရေး၊ ပညာရေး၊ သိပ္ပံနှင့်နည်းပညာ၊ ယဉ်ကျေးမှု၊ အားကစားနှင့်ခရီးသွားလာရေးစသည့် ကဏ္ဍ များအပါအဝင် နှစ်နိုင်ငံအကြား အပြန်အလှန်အကျိုးဖြစ်ထွန်းစေမည့် ပူးပေါင်းဆောင်ရွက်မှုများ မြှင့်တင်ရေးတို့ကို ဆွေးနွေးခဲ့ကြောင်း သိရသည်။

ထို့ပြင် ဒေသတွင်းနှင့် နိုင်ငံတကာရေးရာကိစ္စရပ်များနှင့်ပတ်သက်၍ အာဆီယံ၊ ဥရောပ-အာရှစီးပွားရေးသမဂ္ဂ၊ ရှန်ဟိုင်းပူးပေါင်းဆောင်ရွက်ရေးအဖွဲ့၊ BRICS အဖွဲ့တို့နှင့်ပတ်သက်သည့် ဖြစ်ပေါ်တိုးတက်မှုများနှင့် ယင်းအဖွဲ့များအတွင်း ပူးပေါင်းဆောင်ရွက်မှု ကိစ္စရပ်များတွင် ရင်းနှီးပွင့်လင်းစွာ ဆွေးနွေးခဲ့ကြောင်း သိရသည်။

Credit - NP News Agency

#centralnewsnaypyitaw

ယခုနှစ်တွင် ယူနိုက်တက်အတွက် ပြန်ကစားလာနိုင်ဖို့ ရှိနေတဲ့ အမေ့ခံ စတား

အောက်တိုဘာ ၇

ယူနိုက်တက်ဗဟိုနောက်ခံလူလီဆန်ဒရိုမာတီနက်ဇ်ဟာ ယခုနှစ်အတွင်းတွင် ယူနိုက်တက်အတွက် ပြန်လည် ကစားလာနိုင်ဖို့ ရှိနေပြီ ဖြစ်ပါတယ်။

အသက် ၂၇ နှစ်ရှိ မာတီနက်ဇ်ဟာ ဒူးအရွတ်ဒဏ်ရာကြောင့် ၈ လကျော်ကြာ အနားယူလာခဲ့ရသူ ဖြစ်ပါတယ်။

ဒါပေမယ့် အာဂျင်တီးနားနောက်ခံလူဟာ ဇူလိုင်လနှောင်းပိုင်းမှ စတင်ကာ Outdoor လေ့ကျင့်ခန်းဆင်းများ စတင်ပြုလုပ်လာနိုင်ခဲ့ပြီ ဖြစ်ပြီး တကိုယ်တည်းလေ့ကျင့်ခန်းဆင်းမှုများ ပြုလုပ်နေပြီ ဖြစ်ပါတယ်။

သူဟာ နိုဝင်ဘာလ နိုင်ငံတကာပွဲစဉ်များအပြီးတွင် ယူနိုက်တက်ကစားဖော်များနှင့်အတူ ပြန်လည်လေ့ကျင့်ခန်းဆင်းလာနိုင်မယ်လို့ ယူဆရပါတယ်။

မာတီနက်ဇ်ဟာ နွေရာသီတုန်းက ယူနိုက်တက်ခေါင်းဆောင်အုပ်စုတွင် ထည့်သွင်းခြင်းခံခဲ့ရသူ ဖြစ်ပြီး ပြီးခဲ့တဲ့လတုန်းက အီတီဟတ်တွင် မန်စီးတီးအား ရှုံးနိမ့်တဲ့ပွဲကို လိုက်ပါခဲ့သူလည်း ဖြစ်ပါတယ်။

သူဟာ ယူနိုက်တက်အတွက် ကစားနိုင်ခြင်း မရှိပေမယ့်လည်း ကာရင်တန်လေ့ကျင့်ရေးကွင်းတွင် ပြုလုပ်တဲ့ ကလပ်ရဲ့ တွေ့ဆုံဆွေးနွေးပွဲသို့ ပုံမှန်တက်ရောက်နေသူလည်း ဖြစ်ပါတယ်။

မာတီနက်ဇ်ဟာ ၂၀၂၂ ခုနှစ်တွင် ယူနိုက်တက်သို့ ပြောင်းလာပြီးနောက် အဓိကကစားသမားအဖြစ် ကစားခွင့်ရလာခဲ့ပေမယ့်လည်း ဒဏ်ရာပြဿနာများဖြင့် နပန်းလုံးလာခဲ့ရသူ ဖြစ်ပါတယ်။

သူဟာ အစီအစဉ်အတိုင်း နိုဝင်ဘာလတွင် လေ့ကျင့်ခန်းဆင်းနိုင်မည်ဆိုပါက နှစ်မကုန်မီ ယူနိုက်တက်အတွက် ပြန်ကစားလာနိုင်ဖို့ သေချာနေပါတယ်။

Credit - Playmaker Journal

#ဘောလုံးသတင်းစုံ

မီးပုံးပျံကျရာမှ နေအိမ်နှစ်လုံးမီးလောင်မှု ကျောက်တန်းတွင် ယနေ့ည ဖြစ်ပွား

အောက်တိုဘာ ၇

ရန်ကုန်တိုင်းဒေသကြီး၊ ကျောက်တန်းမြို့နယ်၊ စံချိန်မီရပ်ကွက် အ.မ.က. (၁၀)ကျောင်းလမ်းတွင် အောက်တိုဘာလ ၆ ရက် ည ၈ နာရီ ၂၇ မိနစ်ခန့်က မီးပုံးပျံကျရာမှ နေအိမ်နှစ်လုံး မီးလောင်ခဲ့ကြောင်း မီးငြှိမ်းသတ်သူများထံမှ သိရသည်။

မီးပုံပျံမှာ နေအိမ်၂လုံးကြားရှိ အရိပ်စင်ပြုလုပ်ထားသော တာလပတ်ပေါ်ကျရာမှ မီးစတင်လောင်ကျွမ်းခဲ့ခြင်းဖြစ်ပြီး မီးလောင်မှုကြောင့် အလျား ပေ ၂၀၊ အနံ ပေ ၄၀ရှိ သွပ်မိုး၊ ပျဥ်ကာ၊ပျဥ်ခင်း တစ်ထပ်နေအိမ်နှစ်လုံး၏ အမိုးထုပ်တန်းနှင့် ဘေးအကာများ မီးလောင်ဆုံးရှုံးခဲ့ကြောင်း သိရသည်။

မီးလောင်မှုကို မီးငြှိမ်းသတ်ယာဥ် ၂ စီး၊ ရေသယ်ယာဥ် ၁ စီးနှင့် သန္ဓေအရန်တပ်ဖွဲ့ဝင်များဖြင့် ငြှိမ်းသတ်ခဲ့ရာ ည ၈ နာရီ ၃၈ မိနစ်တွင် မီးငြိမ်းခဲ့ကြောင်း သိရသည်။

Credit - Myanmar Transprency News Agency

#centralnewsnaypyitaw

ရသေ့တောင်က ရွာပေါင်း ၂၀ ကျော် စစ်ဘေး တိမ်းရှောင်နေရ

အောက်တိုဘာ ၇

ရခိုင်ပြည်နယ်၊ ရသေ့တောင်မြို့နယ်မှာ လက်နက်ကြီးနဲ့ ဒရုန်း ကျရောက်မှုတွေ ရှိနေတာကြောင့် ကျေးရွာပေါင်း ၁၀ ကျော်က ဒေသခံတွေ ဘေးလွတ်ရာ တိမ်းရှောင်နေရတယ်လို့ စစ်ရှောင်အရေး ဆောင်ရွက်နေသူတွေက ပြောပါတယ်။

လက်ရှိမှာ ‌ရသေ့တောင်မြို့နယ်က ပန်ဇင်းမော်၊ ညောင်ပင်ကြီး၊ ကပ်ချောင်း၊ ကံပြင်၊ မင်းကန်းချောင်း၊ ဆားပြင်ကြီး၊ ဆားပြင်ချေ၊ အောက်ဇီးကိုင်း၊ လက်ပန်ပင်ရင်း၊ ဖြူချောင်း၊ ကျွန်းကြီး၊ ကြက်ရိုးဆိပ် အစရှိတဲ့ ကျေးရွာပေါင်း ၁၀ ရွာကျော် စစ်ရှောင်နေရတာ ဖြစ်တယ်လို့ သိရပါတယ်။

“ဒီမြို့နယ်က AA ထိန်းချုပ်ထားတဲ့ မြို့တွေထဲမှာ ပါတယ်။ စစ်တွေ အစပ်မှာရှိတယ်။ ဒီရက်ပိုင်းထဲမှာကို လက်နက်ကြီးတွေနဲ့ လှမ်းပစ်တာ ပိုစိပ်လာတယ် ပြောရမယ်။ ဒရုန်းတွေနဲ့လည်း နေ့တိုင်း တိုက်ခိုက်တာရှိတယ်။ ဒေသခံတွေက ကိုယ့်လယ်ယာကိုတောင် ကောင်းကောင်း မလုပ်နိုင်ကြတော့ဘူး။ သူတို့ မွေးထားတဲ့ ကြက်တွေ၊ ဝက်တွေအကုန် ရရာဈေးနဲ့ ရောင်း၊ လယ်တွေကိုတော့ ဒီအတိုင်း ပစ်ထားခဲ့၊ အဲဒီလိုလုပ်ပြီး နီးစပ်ရာ ဘေးလွတ်မယ်ထင်တဲ့ နေရာတွေကို ရှောင်ကြရတာ‌” လို့ ကူညီပေးနေသူက ပြောပါတယ်။

လက်ရှိမှာ နလအ အနေနဲ့ စစ်တွေမြို့မှာ ရွေးကောက်ပွဲ ကျင်းပဖို့ စီစဉ်နေတာဖြစ်ပြီး တဖက်မှာလည်း စစ်အင်အား ဖြည့်တင်းကာ စစ်တွေမြို့အနီး AA မဝင်ရောက်လာစေရေး အတွက် နယ်စပ်နေရာတွေကို လက်နက်ကြီး၊ ဒရုန်းတွေနဲ့ နေ့စဉ် ပစ်ခတ် တိုက်ခိုက်လျက်ရှိတယ်လို့ သိရပါတယ်။

ပြီးခဲ့တဲ့ စက်တင်ဘာလ ၂၉ ရက်နေ့ကလည်း ရသေ့တောင်မြို့နယ်၊ မိုးစဲကျွန်းက ကြက်ရိုးဆပ်ကျေးရွာမှာ လက်နက်ကြီး ကျရောက်မှု ဖြစ်ပွားခဲ့ပြီး တယောက် သေဆုံးကာ နှစ်ယောက် ပြင်းထန်ဒဏ်ရာ ရရှိခဲ့တယ်လို့ သိရပါတယ်။

AA က စစ်တွေမြို့နယ်ကို ပြီးခဲ့တဲ့ ဇန်နဝါရီလ ၁၆ ရက်နေ့မှ စတင်ကာ ထိုးစစ်ဆင်နေခြင်းဖြစ်ပြီး လက်ရှိ အချိန်အထိ နှစ်ဖက်အပြန်အလှန် ပစ်ခတ်မှုတွေ ရှိနေတယ်လို့ သိရပါတယ်။

လက်ရှိမှာ စစ်တွေမြို့နယ်နဲ့ နယ်နိမိတ်ချင်း ထိစပ်နေတဲ့ ရသေ့တောင်မြို့နယ် အပါအဝင် ပုဏ္ဏားကျွန်း၊ ပေါက်တော စတဲ့ မြို့နယ်တွေမှာလည်း လက်နက်ကြီး ပစ်ခတ်မှုတွေ မကြာခဏ ဖြစ်ပွားနေတဲ့အတွက် ဒေသခံ ထောင်နဲ့ချီ ဘေးလွတ်ရာကို တိမ်းရှောင်နေကြရတယ်လို့ သိရပါတယ်။

“နလအ က ရခိုင်ပြည်နယ်ထဲက မြို့နယ် ခုနစ်မြို့နယ်မှာ ရွေးကောက်ပွဲ ကျင်းပနိုင်ခြေ ရှိနေတယ်။ ဒါပေမယ့် သူတို့ ထိန်းချုပ်ထားတဲ့ မြို့နယ်တွေက သုံးမြို့နယ်ပဲ ရှိတယ်။ ဆိုတော့ ကျန်တဲ့မြို့တွေမှာ ဖိအားပေးမှုတွေ ဆက်တိုက် လုပ်ဆောင်လာနိုင်တယ်။ လက်ရှိ လုပ်လည်း လုပ်နေတယ်ပေါ့။ ပြီးခဲ့တဲ့ စက်တင်ဘာလလောက်စပြီး AA ထိန်းချုပ်ထားတဲ့ မြို့တချို့မှာ လေကြောင်း တိုက်ခိုက်တာ၊ လက်နက်ကြီး ကျတာတွေ ခပ်စိပ်စိပ် ဖြစ်လာတာ တွေ့ရတယ်” လို့ စစ်ရေး လေ့လာသုံးသပ်သူ တယောက်က ပြောပါတယ်။

နလအ က လာမယ့် ဒီဇင်ဘာလမှာ ရခိုင်ပြည်နယ်အတွင်းရှိ စစ်တွေ၊ ကျောက်ဖြူနဲ့ မာန်အောင်မြို့နယ်တို့မှာ ရွေးကောက်ပွဲ ကျင်းပမယ်လို့ ကြေညာထားပြီး တောင်ကုတ်၊ သံတွဲ၊ အမ်းနဲ့ ဂွမြို့နယ်တို့ကိုလည်း ရွေးကောက်ပွဲအမီ ပြန်လည် ထိုးစစ်ဆင်ဖို့ ပြင်ဆင်နေတယ်လို့ သိရပါတယ်။

လက်ရှိ ရခိုင်ပြည်နယ်အတွင်းက မြို့နယ်တချို့မှာ လေကြောင်း တိုက်ခိုက်မှု၊ လက်နက်ကြီး ကျရောက်မှုတွေ မကြာခဏ ဆိုသလို ဖြစ်ပွားလျက်ရှိတာမှာ ပြီးခဲ့တဲ့ စက်တင်ဘာလ ၂၇ ရက်နေ့ကလည်း သံတွဲမြို့၊ အမှတ် (၄) ရပ်ကွက်နဲ့ ညောင်ပင်ဈေး ရပ်ကွက်မှာ လေကြောင်းတိုက်ခိုက်မှုတွေ ဖြစ်ပွားခဲ့တယ်လို့ သိရပါတယ်။

အဲဒီ လေကြောင်းတိုက်ခိုက်မှု ဖြစ်စဉ်အတွင်း တယောက် သေဆုံးခဲ့ကာ ငါးယောက် ဒဏ်ရာ ရရှိခဲ့ပြီး နေအိမ်တွေလည်း ပျက်စီးခဲ့တယ်လို့ သိရပါတယ်။

ဒါအပြင် စက်တင်ဘာလ ၁၇ ရက်နေ့ကလည်း ပေါက်တောမြို့နယ်၊ မင်းတဲကျေးရွာမှာ လက်နက်ကြီး ကျရောက်မှုကြောင့် တယောက် ထိခိုက်ဒဏ်ရာ ရရှိခဲ့တယ်လို့ သိရပါတယ်။

Photo - CJ

Credit - Voice of Myanmar News Agency

#သတင်းဟင်းလေးအိုးကြီး

ဘိုင်ယန်မြူးနစ်နှင့် စာချုပ်သစ်ချုပ်ဆိုရန် တံခါးဖွင့်ပေးလာတဲ့ ဟယ်ရီကိန်း

အောက်တိုဘာ ၇

အင်္ဂလန်အသင်းခေါင်းဆောင်ဟယ်ရီကိန်းက ပရီးမီးယားလိဂ်သို့ ပြန်လာရေး စိတ်ဝင်စားမှု အေးခဲနေပြီး ဘိုင်ယန်မြူးနစ်နှင့် စာချုပ်သစ်ချုပ်ဆိုရန် တံခါးဖွင့်ထားကြောင်း ပြောကြားလာပါတယ်။

ဟယ်ရီကိန်းဟာ ၂၀၂၃ ခုနှစ် နွေရာသီတွင် စပါးစ်မှ ပေါင် ၈၆.၄ သန်းဖြင့် ပြောင်းလာပြီးနောက် တစ်နှစ်ကျော်စာချုပ်သက်တမ်းသာ ကျန်တော့သူ ဖြစ်ပါတယ်။

အသက် ၃၂ နှစ်ရှိ စပါးစ်တိုက်စစ်မှူးဟောင်းဟာ ဘိုင်ယန်မြူးနစ်အတွက် ၁၀၆ ပွဲကစားထားရာမှာ ၁၀၃ ဂိုးအထိ သွင်းထားနိုင်ပြီး ၂၀၂၄-၂၅ ဘွန်ဒက်စ်လီဂါဖလား ဆွတ်ခူးနိုင်အောင် အဓိကနေရာမှ ကူညီထားပါတယ်။

အင်္ဂလန်နည်းပြသောမတ်စ်တူချယ်က အင်္ဂလန်အသင်းခေါင်းဆောင်ကိန်းအား အင်္ဂလန်သို့ ပြန်လာစေလိုကြောင်း ပြောကြားထားပါတယ်။

ဟယ်ရီကိန်းဟာ အလန်ရှီးယားရဲ့ ပရီးမီးယားလိဂ်ဂိုးအများဆုံးသွင်းယူထားသူ စံချိန် ၂၆၀ ဂိုးအား လိုက်မီရန် ၄၈ ဂိုးတည်းသာ လိုတော့သူလည်း ဖြစ်ပါတယ်။

ဒါပေမယ့် အင်္ဂလန်အသင်းခေါင်းဆောင်ကတော့ "ဒီမှာပဲ ပိုပြီးတော့ ရှည်ကြာနေချင်တယ်။ ဘိုင်ယန်နဲ့ စကားမပြောရသေးတာ လွန်ခဲ့တဲ့ရက်သတ္တပတ်အနည်းငယ်တုန်းက ပြောဆိုခဲ့ပြီးပါပြီ။ ဒါပေမယ့် သူတို့ဘက်က ပြောဆိုလာမယ်ဆိုရင်တော့ ကျွန်တော့်ဘက်ကလည်း ဆွေးနွေးဖို့ အဆင်သင့်ပါပဲ။ တကယ်တော့ ဒါက လာမယ့် နှစ်မှာ ဘာလုပ်မယ်ဆိုတဲ့အရာအပေါ် မူတည်နေတာပါ။ ဘာတွေ အောင်မြင်နိုင်သလဲဆိုတဲ့အချက်အပေါ် မူတည်တယ်။ အခုလောလောဆယ်တော့ ကျွန်တော်တို့ဟာ အရမ်းကောင်းတဲ့ အခိုက်အတန့် ရနေတယ်။ အခြားအရာတွေနဲ့ပတ်သက်ပြီး မတွေးဘူး။ အခု စာချုပ်ကလည်း နှစ်အနည်းငယ်ကျန်သေးတယ်။ မပြန်ဘူးလို့တော့ ရတိပြတ်မပြောလိုပါဘူး။ ကစားသမားဘဝအတွင်း ကွဲပြားတဲ့ အခွင့်အရေးတွေ၊ ကွဲပြားတဲ့အရာတွေ၊ ကွဲပြားတဲ့နေရာတွေကနေ သင်ယူခဲ့တယ်။ အခု ဘိုင်ယန်မြူးနစ်အပေါ်မှာပဲ အပြည့်အဝ အာရုံစိုက်နေပါတယ်"လို့ ပြောကြားသွားပါတယ်။

ဟယ်ရီကိန်းဟာ စပါးစ်နှင့် အင်္ဂလန်တို့အတွက် ဂိုးအများဆုံးသွင်းယူထားသူအဖြစ် ရပ်တည်နေသူ ဖြစ်ပြီး မကြာသေးမီတုန်းက ဥရောပထိပ်သီးလိဂ်ကြီး ၅ ခုတွင် ကလပ်တစ်ခုအတွက် ဂိုး ၁၀၀ အမြန်ဆုံးပြည့်သူအဖြစ် ၁၀၄ ပွဲဖြင့် သမိုင်းမှတ်တိုင်သစ်စိုက်ထူခဲ့သူလည်း ဖြစ်ပါတယ်။

Credit - Playmaker Journal

#ဘောလုံးသတင်းစုံ