ဗုဒ္ဓဘာသာဝင်များ အထွတ်အမြတ်ထားရာ ရွှေတိဂုံစေတီတော်ရင်ပြင်ပေါ် အပေါ့စွန့်ခဲ့သည့် ဝက်နီဆိုသူကို ဖမ်းဆီးရမိ

အောက်တိုဘာ ၄

ရန်ကုန်တိုင်းဒေသကြီး၊ ဒဂုံမြို့နယ်ရှိ ဗုဒ္ဓဘာသာဝင်များ အထွတ်အမြတ်ထားရာ ရွှေတိဂုံစေတီတော်ရင်ပြင်ပေါ်တွင် အပေါ့စွန့်ခဲ့သူ အမျိုးသားတစ်ဦးအား စစ်ဆေးဖော်ထုတ်ပြီးနောက် ဖမ်းဆီးအရေးယူထားကြောင်း သိရှိရသည်။

ဖြစ်စဉ်မှာ အောက်တိုဘာ ၁ ရက်က ရွှေတိဂုံစေတီတော်ရင်ပြင်ပေါ်ရှိ အင်္ဂါထောင့်မြေစိုက် စေတီအမှတ်-၄၈ နှင့် အုတ်ဂူစေတီအမှတ်-၁၁၈ ကြား၌ အမျိုးသားတစ်ဦး အပေါ့သွားနေသည့် ဗီဒီယိုအား လူမှုကွန်ရက်၌ ပျံ့နှံ့လာမှုနှင့်ပတ်သက်၍ ဒဂုံမြို့မရဲစခန်းမှ တပ်ဖွဲ့ဝင်များက သတင်းအတည်ပြုခဲ့ရာ ရန်ကုန်တိုင်းဒေသကြီး၊ မရမ်းကုန်းမြို့နယ်၊ အမှတ်(၇)ရပ်ကွက်နေ တင်မျိုးဝင်း(ခ) ဝက်နီ(၂၉)နှစ်သည် စက်တင်ဘာ ၂၁ ရက်တွင် ရွှေတိဂုံစေတီတော်မြတ်ကြီးအား သွားရောက်ဖူးမြော်ပြီး ဘုရားပေါ်မှ ပြန်ဆင်းစဉ် အင်္ဂါထောင့်မြေစိုက်စေတီအမှတ်-၄၈နှင့် အုတ်ဂူစေတီ အမှတ်-၁၁၈ ကြား၌ အပေါ့သွားခဲ့ခြင်းဖြစ်ကြောင်း စစ်ဆေးဖော်ထုတ် သိရှိရသည်။

ထိုသို့ ဗုဒ္ဓဘာသာဝင်များ အထွတ်အမြတ်ထားရာ ရွှေတိဂုံစေတီတော်ရင်ပြင်ပေါ်တွင် အပေါ့စွန့်ခဲ့သူ တင်မျိုးဝင်း(ခ)ဝက်နီ အား ဒဂုံမြို့မရဲစခန်း၌ ရဲရေးမပိုင်သောပြစ်မှုများ မှတ်ပုံတင် အမှတ်စဉ် (၄/၂၀၂၅)၊ ရာဇသတ်ကြီးပုဒ်မ ၂၉၅-က ဖြင့် သတင်းချက်ရေးဖွင့်ကာ ဥပဒေနှင့်အညီ ထိရောက်စွာ အမှုဖွင့်အရေးယူနိုင်ရေး ဆောင်ရွက်လျက်ရှိကြောင်း သတင်းရရှိသည်။

Credit - Myanmar Transprency News Agency

#centralnewsnaypyitaw

ကျောက်မဲမှာ ဆက်သွယ်ရေးလိုင်း ပြန်ရ၊ မြို့ပြင်က လက်နက်ကြီး ပစ်ခတ်မှုတွေရှိနေ

အောက်တိုဘာ ၄

နလအ တပ်ဖွဲ့ ပြည်လည်ထိန်းချုပ်ထားတဲ့ ကျောက်မဲမြို့မှာ တယ်လီဖုန်းဆက်သွယ်ရေးလိုင်းတွေ ပြန်ရနေပြီလို့ ဒေသခံတွေက ပြောပါတယ်။

လက်ရှိအခြေအနေမှာတော့ မြို့ထဲကို လက်နက်ကြီးနဲ့ ပစ်ခတ်မှုတွေ ရှိနေပြီး အောက်တိုဘာဘာ ၃ ရက်နေ့က လက်နက်ကျည် ကျတာရှိတယ်လို့ ဆိုပါတယ်။

"ကျောက်မဲ မြို့ထဲ လက်နက်ကျည်တွေ ကျတာ ဟုတ်တယ်။ မြို့ပြင် အပေါ်ကနေ လှမ်းပစ်ပုံရတယ်။" လို့ ဒေသခံ တယောက်က ပြောပါတယ်။

ကျောက်မဲ ဓမ္မမေဒနီ ရွှေကျင်ကျောင်းမှာ အောက်တိုဘာလ ၃ ရက်နေ့ မနက်အစောပိုင်း ၁ နာရီကျော်ခန့်က လက်နက်ကြီးကျည်တွေ ကျပြီး အဆောက်အဦးထိခိုက်မှုရှိပေမယ့် သံဃာတော်တွေအားလုံး ဘေးကင်းတယ်လို့ သိရပြီး အုတ်ကျင်း၊ ခဲအင်း၊ တိလင် တွေဘက်မှာလည်း ယမန်နေ့ အောက်တိုဘာလ ၃ ရက်နေ့က လက်နက်ကျည်တွေ ကျတာရှိတယ်လို့ ဆိုပါတယ်။

ကျောက်မဲ - နောင်ချို ကားလမ်းမကြီးကိုတော့ ယမန်နေ့ အောက်တိုဘာလ ၃ ရက်နေ့ကစ ပုံမှန် သွားလာလို့ ရပြီ ဖြစ်ပြီး မိုင်းတင်း လမ်းဘက်ကနေတော့ ကျောက်မဲဘက် ဝင်လို့မရသေးဘူးလို့ ကြားသိရကာ ကျောက်မဲ - သီပေါ လမ်းမကြီးကို ကား အသွားအလာ ကန့်သတ်ထားတာရှိပြီး လားရှိုး ကနေ ကျောက်မဲကို ဗူးခါး - ခဲမွန် လမ်းကနေ လာလို့ ရကြောင်း ယာဉ်မောင်းတွေနဲ့ ဒေသခံတွေရဲ့ ပြောပြချက်အရ သိရပါတယ်။

"ကျောက်မဲမှာ မိုင်တဲ ဖုန်းလိုင်းပြန်ရပြီ။ နေရာတော့ ရွေးရမယ်တယ်။ တမြို့လုံးရမရ မသိသေးဘူး။ လိုင်းတော့ ထစ်တယ်" လို့ နောက်ထပ် ဒေသခံ တယောက်က ပြောပါတယ်။

မိုင်တဲ တာဝါတိုင် ၁ တိုင် ပြန်ဖွင့်နိုင်တာလို့ သိရပြီး MPT နဲ့ Mytel တို့ ဆက်သွယ်ရေးစနစ် ပြန်လည်ပြင်ဆင်နေ ဒီ သုံး‌၊ လေး ရက်အတွင်း ကျောက်မဲ မြို့နယ်အတွင်းရှိ ဖုန်း တာဝါတိုင်အားလုံး ပြန်ဖွင့်နိုင်မယ်လို့ ကြားသိရပြီး တယ်လီနော နဲ့ အော်ရီဒူး လိုင်းက ပြင်ဆင်မှု အခြေအနေ မသိရသေးဘူးလို့ ဆိုပါတယ်။

အထက ၁ ကျောင်းမှာ သန့်ရှင်းရေး တွေ လုပ်နေတာ တွေ့ရပြီး ဌာနဆိုင်ရာ ရုံးတွေ၊ ကျောင်းတွေ၊ ဆေးရုံတွေ ပြန်လည်ဖွင့်လှစ်ဖို့ ပြင်‌ဆင်နေတာတွေ့ တွေ့မြင်နေရပြီ ဖြစ်ပြီး စစ်ရှောင် ဒေသခံ တချို့လည်း ပြန်‌‌ပြီ ဖြစ်ကြောင်း ဒေသခံတွေက ပြောပါတယ်။

ကျောက်မဲမြို့ကို နလအ တပ်ဖွဲ့က အောက်တိုဘာလ ၁ ရက်နေ့က အလုံးစုံ ပြန်လည် သိမ်းယူခဲ့ပြီး အောက်တိုဘာလ ၂ ရက်နေ့မှာ ဌာနဆိုင်ရာ ဝန်ထမ်းတွေ ပြန်လည် ဝင်ရောက်လာတာ ဖြစ်ပါတယ်။

Photo crd# ဒေသခံ

Credit - Voice of Myanmar News Agency

#သတင်းဟင်းလေးအိုးကြီး

မြန်မာ့စီးပွားရေးဘဏ်များအတွက် ငွေကိုင်နှင့်အငယ်တန်းစာရေး ၁၇၀ ဦး ခန့်ထားရန် လျှောက်လွှာခေါ်ယူထား

#govjob

တမ်ဘားကို စာချုပ်သစ်ချုပ်ဆိုရန် အာဆင်နယ် ‌ဆွေးနွေးနေ

အောက်တိုဘာ ၄

အာဆင်နယ်ဟာ နောက်ခံလူဂျူရီယန်တမ်ဘားကို စာချုပ်သစ်ချုပ်ဆိုရန် ဆွေးနွေးမှု ပြုလုပ်နေပြီ ဖြစ်ပါတယ်။

အာဆင်နယ်ဟာ မီခေးလ်အာတီတာလက်အောက်တွင် အရေးပါတဲ့ နောက်ခံလူအဖြစ် ကစားနေတဲ့ နယ်သာလန်လက်ရွေးစင်ကစားသမားကို လုပ်ခတိုးမြှင့်ပြီး စာချုပ်သစ်ချုပ်ဆိုလိုနေတာလည်း ဖြစ်ပါတယ်။

အာဆင်နယ်နှင့် တမ်ဘားရဲ့အေးဂျင့်အကြား စာချုပ်သစ်ချုပ်ဆိုရေး ဆွေးနွေးမှုမှာ အစောပိုင်းအဆင့်တွင်သာ ရှိနေဆဲ ဖြစ်ပါတယ်။ ဒါပေမယ့် နှစ်ဖက်လုံးက စာချုပ်သက်တမ်းတိုးချုပ်ဆိုရေး ဆန္ဒပြင်းပြနေမှုနှင့်အတူ ၂၀၂၈ ခုနှစ်တွင် ကုန်ဆုံးမယ့် လက်ရှိ စာချုပ်အား သက်တမ်းတိုးလာဖို့ သေချာသလောက် ရှိနေပါတယ်။

အသက် ၂၄ နှစ်ရှိ နောက်ခံလူဟာ ၂၀၂၃ ခုနှစ်နွေရာသီတွင် အေဂျက်စ်မှ ပေါင် ၃၄.၄ သန်းဖြင့် ပြောင်းလာပြီးနောက် ပထမရာသီ ပရီးမီးယားလိဂ်အဖွင့်ပွဲတွင် ဒူးအရွတ်ဒဏ်ရာရရှိကာ ကာလရှည်ကြာ အနားယူခဲ့ရကာ တစ်ရာသီလုံးတွင် တစ်ပွဲတည်းသာ ကစားနိုင်ခဲ့ပါတယ်။

ဒါပေမယ့် သူဟာ ၂၀၂၄-၂၅ ရာသီမှာတော့ ၅၁ ပွဲအထိ ကစားနိုင်ခဲ့သလို ယခုရာသီတွင်လည်း အဓိကညာနောက်ခံလူအဖြစ် ပုံမှန်ပွဲထွက်ကစားခွင့် ရနေပါတယ်။

အာဆင်နယ်ဟာ အဓိကနောက်ခံလူဝီလီယမ်ဆာလီဘာကို ၅ နှစ်စာချုပ်သစ်ချုပ်ဆိုထားပြီး ဖြစ်သလို ဘူကာယိုဆာကာကိုလည်း စာချုပ်သစ်ချုပ်ဆိုရေး ဆွေးနွေးနေပါတယ်။

#ဘောလုံးသတင်းစုံ

ထိုင်းနိုင်ငံ ပြည်ပခရီးသွားဝင်ရောက်မှု ၇ ဒသမ ၅ ရာခိုင်နှုန်း လျော့ကျ

ဘန်ကောက်၊ အောက်တိုဘာ ၄

ထိုင်းနိုင်ငံတွင် ၂၀၂၅ ခုနှစ်၊ ဇန်နဝါရီ ၁ ရက်မှ စက်တင်ဘာ ၃၀ ရက်အတွင်း ပြည်ပခရီးသွား ၂၄ ဒသမ ၁၁ သန်း ရောက်ရှိခဲ့ကြောင်း ထိုင်းခရီးသွားလာရေးနှင့် အားကစားရေးရာဝန်ကြီးဌာန၏ ထုတ်ပြန်ချက်၌ ဖော်ပြခဲ့သည်ဟု The Nation မှ ဖော်ပြခဲ့သည်။

ထိုပမာဏအရ ပြီးခဲ့သည့်နှစ် ကာလတူနှင့် နှိုင်းယှဉ်ပါက ပြည်ပခရီးသွား ဝင်ရောက်မှု ၇ ဒသမ ၅ ရာခိုင်နှုန်း လျော့ကျသွားခဲ့ခြင်းဖြစ်ပြီး ခရီးသွားလုပ်ငန်းမှ ဝင်ငွေ ဘတ် ၁ ဒသမ ၁၁ ထရီလျံ ရရှိခဲ့သည်ဟု ဆိုသည်။

ယခုနှစ် ပထမ ၉ လတာ ကာလဖြစ်သည့် ဇန်နဝါရီ ၁ ရက်မှ စက်တင်ဘာ ၃၀ ရက်အတွင်း ထိုင်းနိုင်ငံအတွင်းသို့ ပြည်ပခရီးသွား ၂၄,၁၁၅,၃၂၈ ဦး ရောက်ရှိခဲ့ပြီး ထိုအရေအတွက်သည် ပြီးခဲ့သည့်နှစ် ကာလတူနှင့် နှိုင်းယှဉ်ပါက ၇ ဒသမ ၅၆ ရာခိုင်နှုန်း လျော့ကျခဲ့သည်ဟု ထုတ်ပြန်ချက်တွင် ဖော်ပြခဲ့သည်။

ယခုနှစ်အတွင်း ထိုင်းတွင် ပြည်ပခရီးသွားများထံမှ ဘတ် ၁,၁၁၃,၇၅၅ သန်း ရရှိခဲ့သော်လည်း ယခင်နှစ်ကနှင့် နှိုင်းယှဉ်ပါက ၅ ဒသမ ၈၅ ရာခိုင်နှုန်း လျော့ကျခဲ့သည်။

ယခုနှစ် ပထမ ၉ လတာ ကာလအတွင်း ထိုင်းနိုင်ငံသို့ လာရောက်မှု အများဆုံး ထိပ်သီး ၁၀ နိုင်ငံမှ ပြည်ပခရီးသွား များမှာ မလေးရှား၊ တရုတ်၊ အိန္ဒိယ၊ ရုရှား၊ တောင်ကိုရီးယား၊ ဂျပန်၊ ဗြိတိန်၊ အမေရိကန်၊ ထိုင်ဝမ်နှင့် စင်္ကာပူနိုင်ငံ တို့မှ ဖြစ်သည်။

ကမ္ဘာလှည့် ခရီးသည် ဝင်ရောက်မှု ကျဆင်းသွားသော်လည်း ခရီးစဉ်တစ်ခုလျှင် ခရီးသွားများ၏ ပျမ်းမျှ အသုံးစရိတ်သည် တိုးလာခဲ့သည်။

ယခုနှစ်အတွင်း ခရီးစဉ် တစ်ခုချင်းစီတွင် လူတစ်ဦးအလိုက် ပျမ်းမျှ အသုံးစရိတ်မှာ ဘတ်ငွေ ၄၆,၀၀၀ ရှိပြီး ခန့်မှန်းခြေအားဖြင့် ၁ ဒသမ ၇၄ ရာခိုင်နှုန်း မြင့်တက်လာသည်။

ပြည်ပခရီးသွား လုပ်ငန်းအပြင် ပြည်တွင်းခရီးသွား လုပ်ငန်းမှာမူ တိုးတက်လာခဲ့ပြီး ၂၀၂၅ ခုနှစ် ပထမ ၉ လ အတွင်း ပြည်တွင်းခရီးသွား ၁၄၈ ဒသမ ၇ သန်း ရှိခဲ့ကာ ပြီးခဲ့သည့်နှစ် ကာလတူက ပြည်တွင်းခရီးသွား အရေအတွက်နှင့် နှိုင်းယှဉ်ပါက ၂ ဒသမ ၈၉ ရာခိုင်နှုန်း မြင့်တက်ခဲ့သည်။

ထို့ကြောင့် ပြည်တွင်းခရီးသွားလုပ်ငန်းမှ ရရှိသည့် ဝင်ငွေသည် ဘတ် ၈၅၄,၃၅၁ သန်းရှိခဲ့ပြီး ပြီးခဲ့သည့်နှစ်ကထက် ၄ ဒသမ ၃၃ ရာခိုင်နှုန်း တိုးလာခဲ့သည်ဟု ထုတ်ပြန်ချက်တွင် ဖော်ပြခဲ့သည်။

Source: The Nation

ပုံ - ထိုင်းနိုင်ငံအတွင်း ခရီးသွားများကို တွေ့ရစဉ်

#centralnewsnaypyitaw

နမ့်တစ်မြို့က ရွှေဆိုင်ကို မြေအောက်လှိုဏ်ခေါင်းတူးပြီး ဖောက်ထွင်းသွားတဲ့ တရားခံ ဖမ်းမိ

အောက်တိုဘာ ၄

နမ့်တစ်မြို့ရှိ တရုတ်ရွှေဆိုင် တဆိုင်ကို မြေအောက်ကနေ ၉ ရက်ကြာ ဥမင်လှိုဏ်ခေါင်းတူးပြီး ဖောက်ထွင်းသွားတဲ့ တရားခံကို အောက်တိုဘာလ ၁ ရက်နေ့က UWSA ရဲ တပ်ဖွဲ့က ဖမ်းမိပြီ ဖြစ်ကြောင်း ဒေသခံတွေဆီက သိရပါတယ်။

"ဖောက်ထွင်း ခိုးယူသူက ကိုးကန့်နယ်ခံပါ။ အောက်တိုဘာလ ၁ ရက်နေ့က ဝ အဖွဲ့ ဖမ်းမိတာပါ။ တည်းခိုခန်းမှာ မိတာပါ" လို့ ဒေသခံ အမျိုးသား တယောက်က ပြောပါတယ်။

ဖောက်ထွင်းခိုးယူမှု ကျူးလွန်သူက အသက် ၂၇ နှစ် အရွယ် အားချိန်း ဆိုသူ ဖြစ်တယ်လို့ သူက ပြောပါတယ်။

"ရွှေဈေးတက်လာတာကို တွေ့ခဲ့ရပြီး အိမ်ဆောက်ချင်တာကြောင့် ရွှေခိုးခဲ့တာ" လို့ ဖောက်ထွင်း ခိုးယူခဲ့သူ တရားခံကို စစ်ဆေးမှု မှတ်တမ်း အရ သိရပါတယ်။

‌ဆိုင်အနီး လူသွား စင်္ကြံအောက်ကနေ ဥမင်လှိုဏ်ခေါင်း တူးဖို့အကြံရခဲ့ပြီး လိုအပ်တဲ့ ကိရိယာတွေကို အွန်လိုင်းကနေ မှာယူခဲ့ကာ ဥမင်လှိုဏ်ခေါင်း တူးချိန် ၉ ရက်ကြာခဲ့တယ်လို့လည်း မှတ်တမ်းအရ သိရပါတယ်။

ခိုးယူခဲ့တဲ့ ရွှေ အချိန်အဆ မသိရှိပေမယ့် မိုင်းလားမှာ တရုတ် Kuaishou App ကနေ ရွှေဝယ်သူ တယောက်ကို ဆက်သွယ်ပြီး ရွှေ ၅၅၁ ဂရမ်ကို တစ်ဂရမ် ယွမ် ၈၄၀ နှုန်း၊ ယွမ် ၄၆၃,၀၀၀ (သိန်း ၂၇၀၀ ကျပ် ဝန်းကျင်ခန့်) နဲ့ ရောင်းချခဲ့ပြီး ရွှေတချို့ ချန်ထားခဲ့ကာ ဖုန်း ယွမ် ၂၀၀၀ တန် တလုံးဝယ်ခဲ့တယ်လို့ ထွက်ဆိုထားတာ တွေ့ရပါတယ်။

ပြီးခဲ့တဲ့အောက်တိုဘာလ ၁ ရက်နေ့ တရုတ်စံတော်ချိန် မနက် ၉ နာရီခွဲလောက်မှာ တရားခံ အိမ်ပြန်ဖို့ ပြန်လာချိန် ဟိုပန် တံတားကို ဟိုပန်က UWSA ရဲ တွေဖမ်းဆီးခဲ့တာလို့ ဆိုပါတယ်။

UWSA ထိန်းချုပ်နယ်မြေ ဟိုပန်ခရိုင်၊ နမ့်တစ်မြို့ရှိ တရုတ်လူမျိုးပိုင် "ဟောင်ကောင်" အမည်ရှိ ရွှေဆိုင်တဆိုင်မှာ ပြီးခဲ့တဲ့စက်တင်ဘာ ၂၈ ရက် နေ့ တရုတ်စံတော်ချိန် မနက် ၅ နာရီ ခန့်က တိုက်အောက်ကနေ လှိုဏ်ခေါင်း ဖောက်ပြီး ဆိုင်ထဲကရွှေတွေ ခိုးယူမှု ဖြစ်ပွားခဲ့တာ ဖြစ်ပါတယ်။

Credit - VOM News Agency

#သတင်းဟင်းလေးအိုးကြီး

ဆာဗင်ဟိုကို ၂၀၃၁ ခုနှစ်အထိ မန်စီးတီး စာချုပ်သစ်ချုပ်ဆိုလာ

အောက်တိုဘာ ၄

မန်စီးတီးဟာ တောင်ပံကစားသမားဆာဗင်ဟိုကို ကလပ်တွင် ၂၀၃၁ ခုနှစ်အထိ ထိန်းထားနိုင်မယ့် ၂ နှစ်သက်တမ်းတိုးစာချုပ်ချုပ်ဆိုလာပါတယ်။

အသက် ၂၁ နှစ်ရှိ ဘရာဇီးတောင်ပံကစားသမားဟာ ၂၀၂၄ ခုနှစ် နွေရာသီတွင် ထရိုယက်စ်မှ ပေါင် ၃၀.၈ သန်းဖြင့် ပြောင်းရွှေ့လာခဲ့သူ ဖြစ်ပြီး မန်စီးတီးတွင် ဒုတိယမြောက် ရာသီ ကစားနေတာပါ။

သူဟာ ဂွါဒီယိုလာရဲ့ မန်စီးတီးအတွက် ၅၄ ပွဲကစားထားရာမှာ ၄ ဂိုးသွင်းကာ ၁၂ ကြိမ် ဖန်တီးမှု ပြုလုပ်ပေးထားပါတယ်။

သူဟာ နွေရာသီတုန်းက စပါးစ်ရဲ့ ခေါ်ယူရေး ကြိုးပမ်းခြင်းခံခဲ့ရပေမယ့် မန်စီးတီးဘက်က ရောင်းချရန် ပယ်ချခဲ့ပါတယ်။

မန်စီးတီးဟာ အလယ်တန်းကစားသမားနီကိုအိုရိုင်လီနှင့် နောက်တန်းအစွန်လူရီကိုလီဝစ်တို့အား စာချုပ်သစ်ချုပ်ဆိုနိုင်ခဲ့ပြီးတဲ့နောက် ဆာဗင်ဟိုအား စာချုပ်သစ်ချုပ်ဆိုလာတာလည်း ဖြစ်ပါတယ်။

#ဘောလုံးသတင်းစုံ

ရွှေ၊ ငွေဈေး ကျနေပေမယ့် ပြည်ပအဝင် ပိတ်ထားလို့ သွင်းကုန်ပစ္စည်းတွေ ဈေးမကျပြန်

အောက်တိုဘာ ၄

လက်ရှိ ပြည်တွင်းမှာ ရွှေဈေးနဲ့ နိုင်ငံခြား ငွေလဲနှုန်းတွေ ကျဆင်း‌နေပေမယ့် ပြည်ပအဝင် ပိတ်ထားတာကြောင့် သွင်းကုန်ပစ္စည်း ရှားပါးနေပြီး ဈေးနှုန်းကျဆင်းခြင်း မရှိသေးဘူးလို့ စီးပွားရေး လေ့လာ စောင့်ကြည့်သူတွေနဲ့ ပြည်သူတွေက ပြောပါတယ်။

လက်ရှိ ရွှေဈေးကွက်အတွင်း အခေါက်ရွှေ တကျပ်သား ၇၉ သိန်းကျော် ဝန်းကျင်မှာ ရောက်ရှိနေသလို အမေရိကန် ဒေါ်လာဈေးကလည်း ၄၀၀၀ ကျော်ဝန်းကျင်မှာ ကျဆင်း ရောက်ရှိနေတာ ဖြစ်ပါတယ်။

အခေါက်ရွှေ ဈေးနှုန်းဟာ စက်တင်ဘာ ၃၀ ရက်က တကျပ်သား သိန်း ရှစ်ဆယ် ရှစ်သောင်းဝန်းကျင်မှာ ရှိခဲ့သလို အမေရိကန်ဒေါ်လာ ငွေလဲလှယ်နှုန်းကလည်း ရောင်းဈေး ကျပ် ၄၁၇၀ ဝန်းကျင်မှာ ရှိခဲ့ရာကနေ လက်ရှိမှာတော့ ဆက်တိုက် ဈေးပြန်လည် ကျဆင်းနေတာပါ။

“ရွှေဈေး၊ ဒေါ်လာဈေးတွေက ဆက်တိုက် ပြန်ဆင်းနေတယ်။ ဒါပေမယ့် ပြည်ပသွင်းကုန်တွေကတော့ ဈေးမကျတဲ့အပြင် ထပ်တက်လာတယ်။ ဘာကြောင့်လဲဆို နိုင်ငံခြားငွေ၊ ငွေဈေးက ကျတယ် ဆိုပေမယ့် ပစ္စည်းက သွင်းလို့မရဘူးလေ။ ဘယ်လိုလုပ် ဈေးကျပါ့မလဲ။ ပြည်တွင်း လိုအပ်ချက် ပမာဏကို ပြည့်မီအောင် ပေးမသွင်းမချင်း၊ ဖြည့်ဆည်း မပေးမချင်း၊ မရှိမဖြစ် ပစ္စည်းတွေကတော့ ငွေဈေး ဘယ်လောက်ပဲကျကျ ထပ်ကို တက်နေဦးမှာပဲ” လို့ စီးပွားရေး လေ့လာစောင့်ကြည့်သူ တယောက်က ပြောပါတယ်။

လက်ရှိအချိန်မှာ ဒေါ်လာနဲ့ ယှဉ်ပါက ကျပ်ငွေတန်ဖိုး မာတယ်လို့ ပြောလို့ရပေမယ့် စားဝတ်နေရေး ဖြေရှင်းဖို့အတွက် အဲဒီ ကျပ်ငွေကို အရင်ကထက် ပိုမို အသုံးပြုနေရတာ ဖြစ်တဲ့အတွက် ကျပ်ငွေဟာ ကုန်စည်၊ ဝန်ဆောင်မှုတွေနဲ့ ယှဉ်ပါက အတော့်ကို ပျော့သွားတဲ့ အနေအထားမှာ ရှိနေတယ်လို့ ဆိုပါတယ်။

“သွင်းကုန်ပိတ်တယ် ဆိုရင်လည်း ပြည်တွင်းထုတ်ကုန်ကို Supply - Demand မျှအောင် ထုတ်ပေးကြဖို့ လိုပါတယ်။ သူများနိုင်ငံဆီက ဘာလို့ ဝယ်ရလည်းဆိုတော့ ပြည်တွင်းထုတ်တွေက ဒီက စားသုံးသူ လိုအပ်ချက်တောင် ပြည့်မီအောင် မထုတ်ပေးနိုင်တဲ့အပြင် Quality က တခါဝယ်ရင် တမျိုးစီ ဖြစ်နေတော့ ပြည်ပက Quality ပုံမှန်ပစ္စည်းပဲ ဝယ်သုံးချင်ကြတယ်။ FDA တို့ ဘာတို့ ဆိုတာ နောက်မှာထားဦး၊ တကယ် စားသုံးနေသူတောင် အရင်တခါဝယ်တဲ့ Quality နဲ့ နောက်တခါဝယ်တဲ့ Quality က တူအောင်မရဘူး” လို့ ပြည်သူတယောက်က ပြောပါတယ်။

လက်ရှိ ပြည်တွင်းမှာ ဆေးဝါးနဲ့ အခြေခံ စားသောက်ကုန်တွေ အပါအဝင် ကုန်ပစ္စည်း ဈေးနှုန်းတွေဟာ အနည်းဆုံး သုံးဆကနေ ခြောက်ဆ ဝန်းကျင်အထိ အမျိုးအစားပေါ် မူတည်ပြီး ဈေးမြင့်တက်နေတယ်လို့ သိရပါတယ်။

ဈေးကွက်ထဲက လူသုံးများတဲ့ ကုန်ပစ္စည်းတွေဖြစ်တဲ့ ဆပ်ပြာမှုန့်၊ အချိုမှုန့်နဲ့ ပြည်ပက တင်သွင်းလာတဲ့ ဟင်းခတ်ပစ္စည်း တချို့ကတော့ လက်ရှိမှာ ပစ္စည်း ပြတ်လပ်နေပြီဖြစ်သလို ပြည်တွင်း ထုတ်ကုန်တွေ အစားထိုး သုံးစွဲရာမှာလည်း အရည်အသွေး မမီတဲ့အတွက် အဆင်မပြေမှုတွေ ဖြစ်ပေါ်နေတယ်လို့ သိရပါတယ်။

သွင်းကုန်တွေကို ကန့်သတ်ထားတာကြောင့် လက်ရှိမှာ ပြည်ပကသွင်းတဲ့ ကုန်ပစ္စည်း အမျိုးအစားတွေ ဈေးကွက်မှာ ရှာရခက်နေပြီး ဈေးဆက်တက်နေတဲ့အပြင် ပြည်တွင်းရှိ ထုတ်ကုန်တွေဟာလည်း လျှပ်စစ်မီး အပြည့်အဝ မရရှိတာအပြင် ကုန်ကြမ်း ရှားပါးမှုနဲ့ သယ်ယူ ပို့ဆောင်ရေး အခက်အခဲတွေကြောင့် စျေးမြင့်တက်နေဆဲ ဖြစ်ပါတယ်။

Photo - CJ

Credit - Voice of Myanmar News Agency

#သတင်းဟင်းလေးအိုးကြီး

အောင်လအန်ဆန်ရဲ့ နောက်ဆုံးပွဲမှာ ဆွီဒင်ဖိုက်တာ ကာဒက်စ်တမ်ကို ဒိုင်ပွဲရပ်နဲ့ အလဲထိုးအနိုင်ရ

အောက်တိုဘာ ၄

ဒီမနက် ထိုင်းနိုင်ငံမှာ ကျင်းပနေတဲ့ ONE Fight Night 36 ပြိုင်ပွဲမှာ မြန်မာ့စပါးကြီးမြွေ Aung La N Sang ရဲ့ နောက်ဆုံးပွဲစဥ်အဖြစ် ဆွီဒင်ဖိုက်တာ Zebaztian Kadestam နဲ့ မစ်ဒယ်ဝိတ်တန်းမှာ ထိုးသတ်ကြရာမှာ မြန်မာ့အလံခြုံပြီး အမဲလိုက်အကနဲ့ ပွဲထွက်လာတဲ့အောင်လက ဆွီဒင်ဖိုက်တာ ကာဒက်စ်တမ်ကို ဒိုင်ပွဲရပ်နဲ့ အလဲထိုးအနိုင်ရခဲ့သလို အောင်လအန်ဆန်ကို အနိုင် ဆုကြေး ဒေါ်လာ ၅၀၀၀၀ ချီးမြှင့်မှုအပြင် One Championship ရဲ့ Hall of Fame အဖြစ် ဂုဏ်ပြုလိုက်ပါတယ်။

ဒီပွဲမှာ ရင်ခုန်စိတ်လှုပ်ရှားစရာအဖြစ်လည်း One Championship နဲ့ မြန်မာ့ဂန္တဝင် အောင်လရဲ့ နောက်ဆုံးပွဲကို လေးဖြူကိုယ်တိုင် အမဲလိုက်အကနဲ့ ပွဲထွက်ဖျော်ဖြေခဲ့လို့ မြန်မာပရိသတ်တွေအဖို့ လက်ဝှေ့ဂန္တဝင်နဲ့ ရော့ခ်ဂီတဂန္တဝင်နှစ်ဦးကို တွဲလျက် မြင်ခဲ့ရပါသေးတယ်။

ဒီပွဲမှာဆို One Championship ရဲ့ သက်ရှိဂန္တဝင်တစ်ဖြစ်လည်း မစ်ဒယ်ဝိတ်နဲ့ လိုက်ဟဲဗီးဝိတ်ချန်ပီယံဟောင်း မြန်မာ့စပါးကြီးမြွေဟာ ဒီပွဲအပြီးမှာ နည်းပြအဖြစ် ကူးပြောင်းတော့မှာဖြစ်သလို သူနဲ့ထိုးသတ်ရတဲ့ ကာဒက်စ်တမ်ကလည်း ဝယ်လ်တာဝိတ်ချန်ပီယံဟောင်းဖြစ်လို့ သူတို့နှစ်ဦးထိုးသတ်ပွဲက ကြည့်ကောင်းခဲ့သလို အောင်လကလည်း နောက်ဆုံးပွဲမှာ မရှုံးနိမ့်ဖို့ ပြင်ဆင်အားထုတ်မှု ကောင်းမွန်ခဲ့တာ တွေ့ရပါတယ်။

မစ်ဒယ်ဝိတ်တန်းမှာ ဝိတ်ပိုလေ့ရှိတဲ့ အောင်လကို ဝယ်လ်တာဝိတ်ကနေ မစ်ဒယ်ဝိတ်တန်း တက်ထိုးပြီး ပါဝါနဲ့ ဝိတ်တင်ထားတဲ့ ကာဒက်စ်တန်ဟာ One မှာ နောက်ဆုံး သုံးကြိမ်ဆက် အနိုင်ရထားတဲ့ တွန်းအားနဲ့ ဒီနေ့ပွဲမှာ အာဒိုဂန်ကိုချည်း နှစ်ပွဲဆက်ရှုံးထားတဲ့ အောင်လကို ဖိအားမပေးနိုင်ခဲ့သလို အောင်လကလည်း နောက်ဆုံးပွဲမှာ သိက္ခာရှိရှိနားချင်လို့ အနိုင်ရဖို့ အားထုတ်ခဲ့တာမြင်ရပါတယ်။

ကာဒက်စ်တမ် ဝိတ်တင်လာပေမဲ့ အောင်လထက်အရပ်ပုတာ၊ ဘော်ဒီဝိတ်သေးတာကြောင့် အောင်လက သိသိသာသာ ထွားကြိုင်းနေပြီး ပထမအချီ တစ်မိနစ်ကျော်က Stand Fight ပြိုင်ဖို့ အကဲစမ်း၊ အကွာအဝေးခန့်မှန်းနေတာ တွေ့ရပြီး အလှပြနေသလိုဖြစ်နေတာပါ။

သူငယ်ချင်းလည်းဖြစ်သလို အောင်လလို ချန်ပီယံနှစ်ဆုရှင်ဖြစ်ခဲ့သူကို ကာဒက်စ်တမ်က ညှာချင်ပုံမြင်ရပေမဲ့ နှစ်မိနစ်လောက်မှာပဲ အောင်လရဲ့ မတော်ရာတည့်တည့် ကာဒက်စ်တမ် ကန်ထည့်လိုက်တာ မြင်ရပါသေးတယ်။ အပြန်အလှန် သွေးတိုးစမ်းနေရင်း အောင်လရဲ့ကန်ချက်ကလည်း ကာဒက်စ်တမ်ရဲ့ မတော်ရာ ချော်ကန်မိလို့ ပထမအချီက မတော်ရာကန်တာလောက်ပဲ ထိမိတာမြင်ရသလိုပါပဲ။ နှစ်ယောက်စလုံးဟာ တကယ်မထိုးဘဲ ဆနေတာချည်းဖြစ်သလို အပိုင်ထိုးရမှာတွေလည်း မထိုးခဲ့တာမြင်ရလို့ ပထမအချီက ပွဲကောင်းမျှော်ပရိသတ်ကို ဒုခေါင်ပွဲဆိုတဲ့ လောက်လောက်လားလား အရှိန်အဝါမပေးခဲ့ပေမဲ့ အမှတ်အရတော့ အောင်လသာနိုင်တဲ့ ထိုးချက်တွဲလုံးတချို့ ရခဲ့ပါတယ်။


အလဲထိုးပါဝါပိုကြီးတဲ့အောင်လကို ဒုတိယအချီအစမှာတော့ ကာဒက်စ်တမ် တိုက်စစ်ဖွင့်လာပါတယ်။ တိုက်စစ်ဖွင့်ပေမဲ့ အောင်လကို ကာဒက်စ်တမ် မယှဥ်နိုင်ဘဲ ဒုတိယအချီစပြီး တစ်မိနစ်နောက်ပိုင်းမှာ အောင်လရဲ့ လက်သီး၊ ဒူး၊ တံတောင် ၁၅ ချက်ထက်မနည်း ကာဒက်စ်တမ် စားခဲ့ရသလို ပြိုကျပြီထင်ပေမဲ့ ရုန်းထလာတဲ့ ကာဒက်စ်တမ်ကို အောင်လက ချောင်ပိတ်ပြီး လက်သီးတွေ၊ ဒူးတွေ ဆင့်ကာကျွေးသလို နှစ်မိနှစ်ကျော်အကြာ ကာဒက်စ်တမ် ကွဲပြဲ ဖင်ထိုင်ကျသွားချိန် ဆယ်ချက်ထက်မနည်း ဆင့်ထိုးချိန်မှာတော့ ဒိုင်ပွဲရပ်နဲ့ အနိုင်ရသွားခဲ့ပါတယ်။ ပွဲဟာ အေးဆေးတယ်လို့ ထင်ရပေမဲ့ ရှုံးနိမ့်သွားတဲ့ ကာဒက်စ်တမ်က ကွဲပြဲသွားသလို အောင်လကလည်း ညာမျက်လုံး ပိတ်လုနီးနီးပါ။

အလဲထိုးအနိုင်ရသွားချိန်မှာ အောင်လက သူ့ကိုအားပေးခဲ့တဲ့ မြန်မာပရိသတ်အားလုံး ကျေးဇူးတင်စကားပြောခဲ့သလို One Championship ကလည်း အလဲထိုးအနိုင်ဆုကြေး ဒေါ်လာ ၅၀၀၀၀ ချီးမြှင့်မှုအပြင် One Championship ရဲ့ Hall of Fame အဖြစ် ဂုဏ်ပြုခဲ့ပါတယ်။

Credit - Myanmar Transprency News Agency

#centralnewsnaypyitaw

❝ထိုင်းနိုင်ငံထဲဝင်လာတဲ့ အထောက်အထားမဲ့ မြန်မာနိုင်ငံသား ၄၀ ကျော် အဖမ်းခံရပြန်❞

အောက်တိုဘာ ၄

ထိုင်းနိုင်ငံထဲကို တရားမဝင်နည်းလမ်းနဲ့ ဝင်ရောက်လာတဲ့ အထောက်အထားမဲ့ မြန်မာနိုင်ငံသား ၄၀ ကျော်ကို ထိုင်းအာဏာပိုင်တွေက မဟာချိုင်မှာ ဖမ်းဆီးလိုက်ပြန်ပြီလို့ ထိုင်းသတင်းတွေက ဖော်ပြလာခဲ့ကြပါတယ်။

ကာချနဘူရီ အာဏာပိုင်တွေရဲ့ ညွှန်ကြားချက်အရ ဆိုင်းရိုးကျေးရွာ အမှတ် ၄ ဘန်ဖု ပူးပေါင်းစစ်ဆေးရေးဂိတ်မှာ အောက်တိုဘာ ၂ ရက်၊ ည ၈ နာရီခွဲအချိန်ခန့်က ပစ်ကပ်ထရပ်ကား ၄ စီးကို စစ်ဆေးခဲ့ရာကနေ ၎င်းမြန်မာနိုင်ငံသားတွေကို ဖမ်းဆီးရရှိခဲ့တာလို့ဆိုပါတယ်။

ဖမ်းဆီးရမိသူ မြန်မာနိုင်ငံသားတွေထဲမှာ အမျိုးသား ၃၆ ဦး၊ အမျိုးသမီး ၆ ဦးနဲ့ မြန်မာနိုင်ငံသား ယာဉ်မောင်း ၄ ဦးတို့ပါဝင်တယ်လို့ သိရပြီး သူတို့ဟာ မဟာချိုင်ကို လာရောက်ဖို့ ပွဲစားခ တစ်ဦး ဘတ် ၁၂,၀၀၀ ကနေ ၂၀,၀၀၀ အထိ ပေးဆောင်ခဲ့ရကြောင်း စစ်ဆေးသိရှိရတယ်လို့ ထိုင်းအာဏာပိုင်အဖွဲ့က အောက်တိုဘာ ၃ ရက်မှာ သတင်းထုတ်ပြန်ထားပါတယ်။

လက်ရှိမှာတော့ ဖမ်းဆီးမိသူတွေကို စိုင်းဆောင်ရဲစခန်း ခေါ်ဆောင်သွားပြီး ဥပဒေအရ ဆက်လက်ကိုင်တွယ်ဆောင်ရွက်သွားမှာဖြစ်တယ်လို့လည်း သိရပါတယ်။

#centralnewsnaypyitaw