Android 16 Stable Version ဒီနေ့ထွက်လာပါတယ်...
Google ဖုန်းတွေအပါအဝင် Update တင်လို့ရမယ့် အခြားဖုန်းမော်ဒယ် List လေးတွေကို Comment မှာ ဖော်ပြပေးထားပါတယ်။ ဒီနေ့မှ စထွက်တာဆိုတော့ Feature ဘာညာ Error ဘာညာက ဒီရက်ပိုင်းအတွင်း ထပ်သိရမှာပါ။
Android 16 မှာက UI ဒီဇိုင်းပိုင်းပြောင်းလဲမှုကို ပြီးခဲ့တဲ့မေလတုန်းက Beta Version ထွက်ခဲ့ကတည်းက တော်တော်လေး သဘောကျခဲ့ကြတာဆိုတော့ Update တင်ပြီးရင် သုံးရတဲ့ Experience လေးတွေ ပြန်ပြီး sharing လုပ်ပေးခဲ့ကြပါဦး ...

ဂျာမနီမှာ Hydrogen ရထားများအသုံးပြုမည်
ဂျာမနီနိုင်ငံရှိ ခရီးသည်တင်ရထားများကို ဟိုက်ဒရိုဂျင်ဖြင့် မောင်းနှင်အသုံးပြုနိုင်ပြီး သန့်ရှင်းသောပတ်ဝန်းကျင်နှင့်ဂေဟစနစ်ကိုစောင့်ရှောက်ရန်ရည်ရွယ်သည်ဟုသိရသည်။

ဂျာမနီနိုင်ငံတွင်လျှပ်စစ်မရှိသော ရထားလမ်းကြောင်းပေါ်မှာ ဒီဇယ်အင်ဂျင်များနေရာကို အပြည့်အဝ အစားထိုးနိုင်ရန် ဟိုက်ဒရိုဂျင်စွမ်းအင်သုံး ခရီးသည်တင်ရထားများကို မိတ်ဆက်ခဲ့သည်။

ခေတ်မီလောင်စာဆဲလ်များအဖြစ် ပြောင်းလဲထားသော ဟိုက်ဒရိုဂျင်နှင့်အောက်ဆီဂျင် ပါဝင်သည့်အဆိုပါရထားများသည် သန့်စင်သောရေခိုးရေငွေ့များကိုသာထုတ်လွှတ်ကာအန္တရာယ်ရှိပြီးညစ်ညမ်းစေသောဓာတ်ငွေ့များကိုလျော့ကျစေရန်တီထွင်ထားချင်းဖြစ်သည်ဟုသိရသည်။

ဤပြောင်းလဲမှုသည် ဂျာမနီ၏ ရည်မှန်းချက်ဖြစ်သည့်ရာသီဥတုနှင့်လိုက်လျောညီထွေရှိသော သယ်ယူပို့ဆောင်ရေးအစီအစဉ်၏ တစ်စိတ်တစ်ပိုင်းဖြစ်လည်းဖြစ်သည်။

ဂျာမနီ၏ ဟိုက်ဒရိုဂျင်ရထားများသည် ဂေဟစနစ်နှင့်လိုက်ဖက်ကာ မကြာမီ ရထားလမ်းခရီးတစ်လျှောက်တွင် တိတ်ဆိတ်ပြီးသာယာလှပသောရှုခင်းများကိုပိုမိုခံစားနိုင်စေမည်လို့လဲသိရသည်။

Google ဟာ သူ့ရဲ့ အဓိကဝင်ငွေရတဲ့ Search နဲ့ ကြော်ငြာ (Advertising) ဌာနတွေ အပါအဝင် US က ဝန်ထမ်းတချို့ကို "Voluntary Exit Program" လို့ခေါ်တဲ့ အလုပ်ထွက်ခွင့် အစီအစဉ်နဲ့ ထွက်ခွာဖို့ ကမ်းလှမ်းနေပါတယ်။ ဆိုလိုတာကတော့ ဝန်ထမ်းတွေကိုယ်တိုင် ဆန္ဒရှိရင် လျော်ကြေးကောင်းကောင်းနဲ့ အလုပ်ကထွက်ခွာခွင့်ပြုတာမျိုးပါ။
ဒါပေမဲ့ စိတ်ဝင်စားစရာကောင်းတာက တစ်ဖက်မှာ ဝန်ထမ်းလျှော့ချနေချိန်မှာပဲ Google ဟာ AI နည်းပညာအတွက် အလုံးအရင်းနဲ့ ရင်းနှီးမြှုပ်နှံနေတာပါပဲ။
လာမယ့် ၂၀၂၅ ခုနှစ် တစ်နှစ်တည်းမှာတင် AI နဲ့ Cloud အခြေခံအဆောက်အအုံတွေအတွက် အမေရိကန်ဒေါ်လာ ၇၅ ဘီလီယံ အထိ သုံးစွဲသွားမယ်လို့ ကြေညာထားပါတယ်။ ဒါဟာ အရင်နှစ်ကထက် အများကြီး ပိုများတဲ့ ပမာဏပါ။
ဒီအပြောင်းအလဲက Google ဟာ သူ့ရဲ့ Search Engine ထက် AI ကို အနာဂတ်အတွက် ပိုပြီး အလောင်းအစားလုပ်လာတာကို ရှင်းရှင်းလင်းလင်း ပြနေပါတယ်။ ChatGPT လို AI Chatbot တွေကြောင့် လူတွေရဲ့ အချက်အလက်ရှာဖွေပုံ ပြောင်းလဲလာတာနဲ့အမျှ Google ရဲ့ အဓိက ကြော်ငြာဝင်ငွေကဏ္ဍက စိန်ခေါ်မှုတွေနဲ့ ရင်ဆိုင်နေရတာပါ။
ဒီလို ဝန်ထမ်းဖွဲ့စည်းပုံကို ပြန်ပြင်ဆင်ပြီး AI မှာ အကြီးအကျယ် ရင်းနှီးမြှုပ်နှံတာဟာ နည်းပညာလောကရဲ့ ပြိုင်ဆိုင်မှုထဲမှာ ရှေ့ဆုံးကဆက်ရှိနေဖို့ ကြိုးစားနေတဲ့ Google ရဲ့ အရေးကြီးဆုံး ခြေလှမ်းတစ်ခုပါပဲ။

Dot-matrix Display နဲ့ Nothing Phone 3
ဒီပုံစံအတိုင်းသာဆို Nothing Phone 2 မှာတော့ Pixel ပုံစံ Dot-matrix ကျောဘက်ဒီဇိုင်းကို တကယ်မြင်တွေ့ရတော့မှာပါ။

မိတ်ဆက်ဖို့ တဖြည်းဖြည်းနီးကပ်လာပြီဖြစ်တဲ့ Nothing Phone 3 ကတော့ spec: တွေ ဒီဇိုင်းတွေ တစတစတွေ့လာရပါပြီ။ Nothing official ဘက်က တစ်ခုချင်းစီ ဖော်ပြနေပေမဲ့ အသေးစိတ်ကိုတော့ မတွေ့ရသေးပါဘူး။ မနေ့ကတော့ Tipster တစ်ဦးဖြစ်တဲ့ Max Jambor ဆိုသူက Nothing Phone 3 ပုံစံအပြည့်ကို ဖော်ပြလာပါတယ်။
ဓါတ်ပုံကိုကြည့်မယ်ဆိုရင် ကင်မရာဒီဇိုင်းက အရင်ထွက်ခဲ့တဲ့ Nothing Phone 3a / 3a Pro တို့နဲ့‌တော့ အနည်းငယ်ဆင်တယ်လို့ ဆိုရမှာပါ။ နောက်ပြီး Glyph Interface ကတော့ တကယ်မပါတော့မယ့်ပုံစံပါပဲ။ အဲ့ဒီအစား သူတို့ပြောထားတဲ့ Dot-matrix Display ကို တွေ့ရပါတယ်။ Pixel ပုံစံလေးတွေ စိတ်ကြိုက်ပဲ လုပ်လို့ရမလား မပြောတတ်။
Nothing Phone 3 ကို Snapdragon 8 Elite တပ်ဆင်ထားပြီး Premium Materials တွေ သုံးထားတဲ့ Flagship မော်ဒယ်လို့ ပြောထားပါတယ်။ နောက်ပြီး ဒေါ်လာ 800 ဝန်းကျင်လောက်နဲ့ လာနိုင်ခြေရှိတယ်လို့ သတင်းတွေထွက်ထားပါတယ်။

ပြင်သစ်နိုင်ငံမှာ မကြာသေးမီက ဖြစ်ပွားခဲ့တဲ့ ကြေကွဲစရာကောင်းတဲ့ ကျောင်းတွင်းဓားထိုးမှု ဖြစ်စဉ်တစ်ခုကြောင့် သမ္မတ အီမန်နျူရယ် မက်ခရွန်က အသက် ၁၅ နှစ်အောက် ကလေးငယ်များအတွက် ဆိုရှယ်မီဒီယာ အသုံးပြုခြင်းကို တားမြစ်ဖို့ ပြင်းပြင်းထန်ထန် တိုက်တွန်းလိုက်ပါတယ်။

ကြေကွဲဖွယ်ရာ ဖြစ်ရပ်

ဇွန်လ ၁၀ ရက်နေ့က ပြင်သစ်နိုင်ငံအရှေ့မြောက်ပိုင်း၊ Nogent မြို့ရှိ ကျောင်းတစ်ကျောင်းမှာ အသက် ၁၄ နှစ်အရွယ် ကျောင်းသားတစ်ဦးရဲ့ ဓားဖြင့်ထိုးနှက်မှုကြောင့် အသက် ၃၁ နှစ်အရွယ် ကျောင်းအကူ ဆရာမတစ်ဦး သေဆုံးခဲ့ပါတယ်။ ကျောင်းတွင်းအကြမ်းဖက်မှုတွေ လျှော့ချဖို့အတွက် ကျောင်းအိတ်စစ်ဆေးနေစဉ်မှာ ဒီဖြစ်ရပ် ဖြစ်ပွားခဲ့တာပါ။ သေဆုံးသွားတဲ့ ဆရာမဟာ ကလေးတစ်ဦးရဲ့ မိခင်ဖြစ်ပြီး ဒေသခံကောင်စီဝင်တစ်ဦးလည်း ဖြစ်ပါတယ်။

ဒီဖြစ်ရပ်အပေါ် သမ္မတမက်ခရွန်က “အဓိပ္ပာယ်မဲ့တဲ့ အကြမ်းဖက်မှု” လို့ ရှုတ်ချခဲ့ပြီး ပြင်သစ်တစ်နိုင်ငံလုံး ဝမ်းနည်းကြေကွဲရကြောင်း ပြောကြားခဲ့ပါတယ်။

ပြင်သစ်အစိုးရ၏ တုံ့ပြန်မှုနှင့် နည်းပညာဆိုင်ရာ အကောင်အထည်ဖော်မှု
ဒီဖြစ်ရပ်ကို တုံ့ပြန်တဲ့အနေနဲ့ ပြင်သစ်အစိုးရဟာ အဓိကမူဝါဒ နှစ်ခုကို ချမှတ်ဖို့ ကြိုးပမ်းနေပါတယ်။

1. ဓားရောင်းချမှု တားမြစ်ခြင်း - အရွယ်မရောက်သေးသူများကို ဓားရောင်းချခြင်းအား တားမြစ်သွားမှာ ဖြစ်ပါတယ်။

2. ဆိုရှယ်မီဒီယာ ကန့်သတ်ခြင်း - အသက် ၁၅ နှစ်အောက် ကလေးများ ဆိုရှယ်မီဒီယာသုံးစွဲခွင့်ကို ပိတ်ပင်သွားမှာ ဖြစ်ပါတယ်။

ဒီပိတ်ပင်မှုကို အကောင်အထည်ဖော်ဖို့အတွက် ပြင်သစ်မှာ “SREN Act” လို့ခေါ်တဲ့ ဥပဒေတစ်ရပ် ပြဋ္ဌာန်းထားပြီးသားပါ။ ဒီဥပဒေအရ အသက်အရွယ်စစ်ဆေးဖို့အတွက် “double-blind” လို့ခေါ်တဲ့ နည်းပညာကို အသုံးပြုရမှာ ဖြစ်ပါတယ်။

Double-Blind နည်းပညာဆိုတာဘာလဲ?
�ဒါဟာ သုံးစွဲသူရဲ့ ကိုယ်ရေးကိုယ်တာ အချက်အလက်ကို အပြည့်အဝကာကွယ်ပေးတဲ့ စနစ်တစ်ခုပါ။

ဆိုလိုတာက

- သင်ဝင်ကြည့်တဲ့ ဆိုရှယ်မီဒီယာ (သို့) ဝက်ဘ်ဆိုဒ်က သင့်ရဲ့ အထောက်အထားကို မသိနိုင်ပါဘူး။

- သင့်အသက်ကို စစ်ဆေးပေးတဲ့ ကြားခံဝန်ဆောင်မှုကလည်း သင်ဘယ်ဆိုဒ်ကို ဝင်ကြည့်နေလဲဆိုတာ မသိနိုင်ပါဘူး။

ဒီနည်းပညာဟာ privacy ကို အလေးထားပြီး အသက်အရွယ်ကို တိတိကျကျ စစ်ဆေးနိုင်မှာ ဖြစ်ပါတယ်။

ဥရောပသမဂ္ဂ (EU) တစ်ဝန်း ကြိုးပမ်းမှုများ

ဒီကိစ္စဟာ ပြင်သစ်တစ်နိုင်ငံတည်းရဲ့ လှုပ်ရှားမှုတော့ မဟုတ်ပါဘူး။ ဥရောပသမဂ္ဂ (EU) ရဲ့ တခြားအဖွဲ့ဝင်နိုင်ငံတွေဖြစ်တဲ့ စပိန်၊ ဂရိ၊ ဒိန်းမတ်တို့ကလည်း ကလေးငယ်တွေရဲ့ ဆိုရှယ်မီဒီယာသုံးစွဲမှုကို ထိန်းချုပ်ဖို့ အလားတူကြိုးပမ်းနေကြပါတယ်။

- စပိန်: ဆိုရှယ်မီဒီယာသုံးစွဲခွင့် အနိမ့်ဆုံးအသက်ကို ၁၆ နှစ်အထိ တိုးမြှင့်ဖို့ အဆိုပြုထားပါတယ်။

- EU Commission: သုံးစွဲသူရဲ့ အသက်အတိအကျကို မဖော်ပြဘဲ အသက်အရွယ်စစ်ဆေးနိုင်မယ့် မိုဘိုင်း App တစ်ခုကို ၂၀၂၅ ခုနှစ်၊ ဇူလိုင်လမှာ မိတ်ဆက်ဖို့ စီစဉ်နေပါတယ်။

ဒီလိုကြိုးပမ်းမှုတွေဟာ လူငယ်တွေအပေါ် ဆိုရှယ်မီဒီယာရဲ့ သက်ရောက်မှုတွေကို အစိုးရတွေက ဘယ်လောက်အလေးထားလာလဲဆိုတာကို ပြသနေပါတယ်။

ဒီလို စည်းမျဉ်းတွေအပေါ် ဘယ်လိုမြင်ကြပါသလဲ။

မြန်မာနိုင်ငံမှာရော ဒီလိုကန့်သတ်မှုမျိုးတွေ လိုအပ်တယ်လို့ ထင်ပါသလား။

Nintendo ရဲ့ ဂိမ်းစက်အသစ်စက်စက် Switch 2 ဟာ ဈေးကွက်ထဲရောက်ပြီး ရက်ပိုင်းအတွင်းမှာပဲ ကုမ္ပဏီရဲ့အရောင်းစံချိန်တွေကို ရိုက်ချိုးလိုက်ပါပြီ။
စတင်ရောင်းချခဲ့တဲ့ ပထမ ၄ ရက်အတွင်းမှာပဲ ကမ္ဘာတစ်ဝန်း အလုံးရေ ၃.၅ သန်းကျော် ရောင်းချနိုင်ခဲ့ပြီး Nintendo သမိုင်းမှာ အရောင်းအမြန်ဆုံး ဂိမ်းစက်ဖြစ်လာခဲ့ပါတယ်။
အရင် မူလ Switch တုန်းက အလုံးရေ ၂.၇ သန်းရောင်းရဖို့ တစ်လနီးပါး အချိန်ယူခဲ့ရတာနဲ့ ယှဉ်ရင် အခုအောင်မြင်မှုက အလွန်ကြီးမားပါတယ်။
အောင်မြင်မှုရဲ့ လျှို့ဝှက်ချက် Mario Kart World Bundle
ဒီလိုစံချိန်တင်ရောင်းအားရဲ့ နောက်ကွယ်က အဓိကတွန်းအားတစ်ခုကတော့ Mario Kart World Bundle ပါပဲ။ ဒီ Bundle မှာ ဂိမ်းစက်အပြင် Mario Kart World ဂိမ်းကိုပါ တစ်ခါတည်းထည့်ပေးထားပြီး သီးခြားစီဝယ်တာထက် ဒေါ်လာ ၄၀ လောက် သက်သာစေပါတယ်။ Nintendo က ဒီ Bundle ကို အကန့်အသတ်နဲ့သာ ထုတ်လုပ်သွားမယ်လို့ ဆိုထားတာကြောင့် ဝယ်လိုအားကို ပိုတိုးစေခဲ့ပါတယ်။
အခွန်ပြဿနာတွေကြားက ပရိသတ်တွေရဲ့ စိုးရိမ်မှု
ဒါပေမဲ့ ဒီလိုမရောင်းခင်ကတော့ အမေရိကန်ရဲ့ သွင်းကုန်ခွန် (Tariff) ပြဿနာတွေကြောင့် ပရိသတ်တွေကြား စိုးရိမ်မှုတွေ ရှိခဲ့ပါတယ်။ သမ္မတ Trump က Nintendo စက်ရုံရှိရာ ဗီယက်နမ်အပေါ် အခွန် ၄၆% တိုးမြှင့်ကောက်ခံမယ်လို့ ကြေညာခဲ့တာကြောင့် Nintendo ဟာ Pre-order လက်ခံမယ့်ရက်ကို ရွှေ့ဆိုင်းခဲ့ရပါတယ်။
ဒီအခြေအနေကြောင့် ဂိမ်းစက်ရဲ့ဈေးနှုန်း $449.99 ထက် အများကြီး ပိုတက်သွားမလားဆိုတဲ့ စိုးရိမ်စိတ်နဲ့ Pre-order ပြန်ဖွင့်ချိန်မှာ အလုအယက် ဝယ်ယူခဲ့ကျတဲ့အထိ ဖြစ်ခဲ့ပါတယ်။
သူငယ်ချင်းတို့ထဲမှာရော Switch 2 ကို စောင့်နေတဲ့သူတွေ ရှိလား?
မြန်မာပြည်ရောက်ရင် ဘယ်လောက်ဈေးလောက်ရှိမယ်လို့ ထင်ကြလဲ?

ဗီဇာရက်ကျော်မှုနဲ့ အမေရိကန်မှာ အထိန်းသိမ်းခံခဲ့ရတဲ့ ခါဘီလိန်း


TikTok မှာ follower အများဆုံး creator ခါဘီလိန်းတစ်ယောက် အမေရိကန်က လေဆိပ်တစ်ခုမှာ အထိန်းသိမ်းခံခဲ့ရပါတယ်။

Met Gala ဖက်ရှင်ပွဲတက်ပြီး ဗီဇာရက်ကျော်နေထိုင်မှုနဲ့ ဇွန်လ ၆ ရက်နေ့မှာ သူ့ကို Harry Reid နိုင်ငံတကာလေဆိပ်မှာ လူဝင်မှုကြီးကြပ်ရေးနဲ့ အကောက်ခွန်ဌာန ICE က ဖမ်းဆီးလိုက်တာပါ။

လူဝင်မှုကြီးကြပ်ရေးစည်းကမ်းဖောက်မှုနဲ့ ချုပ်ထားပေမယ့် အဲ့ဒီနေ့မှာပဲ လွှတ်ပေးလိုက်ပြီး အမေရိကန်က ထွက်ခွာခိုင်းလိုက်တယ်လို့ ဆိုပါတယ်။ ခါဘီလိန်းက ဆီနီဂေါဖွား အီတလီနိုင်ငံသား ခံယူထားသူပါ။

Covid-19 ကပ်ဘေးမှာ စက်ရုံအလုပ်က ပြုတ်ပြီးနောက် သူ့ရဲ့ စကားမပြောဘဲ လက်ဟန်ခြေဟန်လုပ်ပြတဲ့ ဟာသဗွီဒီယိုတွေကနေ Social Media မှာ ကမ္ဘာကျော် ဖြစ်လာသူပါ။ ခါဘီလန်းက TikTok မှာ Follower ၁၆၂ သန်းကျော် နဲ့ likes ၂.၅ ဘီလျံ ရထားသူပါ။

အသက် ၂၅ နှစ်အရွယ် ခါဘီလိန်းက post တစ်ခုကို ဒေါ်လာ ၇ သိန်းခွဲဝန်းကျင် ပိုက်ဆံရနေတဲ့ TikTok ရဲ့ ဝင်ငွေအကြမ်းဆုံး content creator တစ်ဦးဖြစ်ပြီး TikTok က သူ့ကို ၂၀၂၄ မှာ ဒေါ်လာသန်း ၂၀ ပေးခဲ့ရတယ်လို့ ဆိုပါတယ်။

120Hz display နဲ့ Helio G81 Ultra သုံး ဒေါ်လာ ၁၄၀ တန် Honor ဖုန်း

AI Button ပါပြီး ဈေးသက်သာတဲ့ Honor X6c ဖုန်း global ဝင်လာပါတယ်။

Honor X6b ရဲ့ နောက်မျိုးဆက်ဖြစ်တဲ့ ဒီမော်ဒယ်က အရင်ထက်ဘက်ထရီ ပိုကြီးသလို ခေတ်မီ punch-hole ဒီဇိုင်းနဲ့ ပိုသေသပ်လာတဲ့ဖုန်းပါ။ Honor X6c ရဲ့ နောက်ထူးခြားချက်က AI features တွေ ခေါ်သုံးနိုင်မယ့် ခလုတ်သီးသန့် ပါလာတာပါ။

ဘတ်ဂျက်ဖုန်းတစ်လုံးဖြစ်လို့ TFT LCD panel သုံးပြီး resolution HD+ ပဲ ပါပေမယ့် 120Hz refresh rate သုံးတာနဲ့ peak brightness မှာ 1000 nits အထိ ထွက်တာက အတော်တာသွားပါတယ်။ Screen Size က ၆.၆၁ လက်မဖြစ်ပြီး လက်ဗွေကို ပါဝါခလုတ်ထဲ ထည့်ထားသလို Headphone Jack လည်း ပါလို့ ကြိုးနားကြပ်နဲ့ သီချင်းနားထောင်ချင်သူတွေအတွက် အဆင်ပြေမယ့်ဖုန်းပါ။

2GHz အထိ ထွက်တဲ့ MediaTek ထုတ် Helio G81 Ultra SoC ကို RAM 6/8GB နဲ့ 128/256GB storage တွေနဲ့ ထွက်ထားသလို microSD card ကနေလည်း 1TB အထိ ထပ်တိုးနိုင်ပါလိမ့်မယ်။ ကင်မရာတွေက အရင်မော်ဒယ်အတိုင်း အပြောင်းအလဲ မရှိပါဘူး။

ကျောဘက်မှာ 50MP Main sensor နဲ့ အကူ QVGA depth lens တစ်ခု ၊ ရှေ့ဘက် 5MP Selfie ကင်မရာတစ်ခုတို့ ပါပါမယ်။ ဘက်ထရီပါဝါ 5300mAH ကို သုံးပြီး 35W charging ပါပါတယ်။ ဆော့ဖ်ဝဲလ်ကိုတော့ Android 15 ကို အခြေခံထားတဲ့ Magic OS9 နဲ့ ထွက်ထားပါတယ်။

မလေးရှားဈေးကွက်ထဲမှာတော့ Honor X6c ကို Ocean Cyan , Moonlight White နဲ့ Midnight Black ကာလာတွေနဲ့ ထွက်ပြီး မလေးရင်းဂစ်ငွေ ၅၉၉ (မြန်မာငွေ ၆ သိန်း ၃ သောင်းဝန်းကျင်) ဈေးနဲ့ စတင်ရောင်းချနေပါတယ်။

ကိုယ်ဖန်တီးတဲ့ AI က ပြန်စွပ်စွဲတာ ခံလိုက်ရတဲ့ အီလွန်မတ်စ်

Grok လုပ်ပုံကတော့ အီလွန်မတ်စ်အတွက် မီးလောင်ရာ လေပင့်ပါပဲ။

အိမ်ဖြူတော်ကလူတွေနဲ့ အီလွန်မတ်စ် ရန်ဖြစ်နေချိန် X မှာ Screenshot တစ်ခု တက်လာပါတယ်။ SS က အိမ်ဖြူတော်ဝန်ထမ်းရေးရာလက်ထောက်အကြီးအကဲ စတီဖင်မီလာရဲ့ "အမေရိကကို ငါတို့ ပြန်ယူရမယ်" ဆိုတဲ့ ပို့စ်ကို အီလွန်မတ်စ်က reply ပြန်ထားတာပါ။

အီလွန်မတ်စ်အကောင့်ပုံနဲ့ reply ထဲမှာ ရေးထားတာက "မင်းမိန်းမကို ငါယူလိုက်သလိုမျိုးပေါ့" ဆိုတဲ့ စာပါ။ စတီဖင်မီလာရဲ့ ဇနီးဆိုတာက အီလွန်မတ်စ် ဦးဆောင်ခဲ့တဲ့ DOGE ရဲ့ ပြောခွင့်ရပုဂ္ဂိုလ်ဖြစ်ခဲ့သူ ကတ်တီ မီလာကို ပြောတာ ဖြစ်ပါတယ်။

ထရမ့်နဲ့ အီလွန်မတ်စ် အကွဲအပြဲတွေ မဖြစ်ခင်ကတည်းက အီလွန်မတ်စ်နဲ့ စတီဖင်မီလာတို့က ရန်စောင်နေကြတာပါ။ အကွဲအပြဲဖြစ်ပြီးနောက်မှာ အီလွန်မတ်စ်က X မှာ စတီဖင်မီလာကို Unfollow လုပ်ခဲ့ပါတယ်။ အခုတော့ ပြန် Follow လုပ်ပြီလို့လည်း ပြောပါတယ်။

ကတ်တီကတော့ DOGE က အီလွန်မတ်စ် ထွက်သွားတဲ့နောက် သူလည်း လိုက်ထွက်သွားပြီး အီလွန်မတ်စ်ဆီမှာ အလုပ်လုပ်နေပါတယ်။ ဒီဖြစ်ရပ်ကြောင့် မီလာရဲ့ ဇနီးကတ်တီနဲ့ မတ်စ်တို့အနေအထား အွန်လိုင်းမှာ သို့လောသို့လော ကောလာဟလတွေ ထွက်နေချိန် ဒီ Screenshot ထွက်လာတာမို့ အတော်ပွက်လောရိုက်သွားပါတယ်။ ဒါကို ပိုပွဲဆူစေခဲ့တာက အီလွန်မတ်စ်ရဲ့ xAI ထုတ် Grok ပါ။

social media သုံးသူတစ်ယောက်က အဲ့ဒီ Screenshot အစစ်ဟုတ်မဟုတ် Grok ကို မေးပါပါတယ်။ Grok က အီလွန်မတ်စ်တင်ခဲ့ပြီးမှ ဖျက်ပစ်တာ ဖြစ်နိုင်တယ်ဆိုပြီး အဖြေပေးပါတယ်။ ဒီပို့စ်ကို အီလွန်မတ်စ်က "မဟုတ်ပါဘူးကွာ။ အတုကြီးပါ။ ဒါကို ငါ ဘယ်တုန်းကမှ မတင်ခဲ့ပါဘူး" လို့ ပြန်ဖြေရှင်းခဲ့ရပါတယ်။

အခုဖြစ်ရပ်က AI chatbot တွေရဲ့ အချက်အလက်ဆန်းစစ်ချက်တွေက စိတ်မချရသေးဘူးဆိုတာ မီးမောင်းထိုးပြနေပါတယ်။

ဒေါ်လာ ၁၀ သန်းအကုန်ခံမယ့် ဘီဇော့စ်မင်္ဂလာဆောင် ကန့်ကွက်ခံနေရ
ဘီလျံနာကြီးဖြစ်လည်း သူများနိုင်ငံတွေမှာတော့ ထင်ရာလုပ်လို့မရပါဘူး။
ကမ္ဘာ့အချမ်းသာဆုံးတစ်ဦးဖြစ်တဲ့ Amazon သူဌေး ဂျက်ဖ်ဘီဇော့စ်ရဲ့အဖြစ်က သက်သေပါ။ ဘီလျံနာ ဘီဇော့စ်နဲ့ သူ့ချစ်သူ လော်ရန်ဆန်းချက်ဇ်တို့က ဗင်းနစ်မှာ မင်္ဂလာဆောင်ဖို့ စီစဉ်ထားပါတယ်။
ကမ္ဘာ့အချမ်းသာဆုံးသူဌေးတွေနဲ့ နာမည်ကျော်တွေ တက်ရောက်မယ့် ဒီမင်္ဂလာဆောင်က မြင်ဖူးသမျှထဲမှာ အခမ်းနားအကြီးကျယ်ဆုံး ဖြစ်လာနိုင်ပါတယ်။ ဘီဇော့စ်က ဗင်းနစ်မြို့က ဇီမ်ခံဟိုတယ်ကြီး နဲ့ ရေပေါ်တက်စီ water taxis တွေ အပြတ်ငှားထားပြီး တချို့နေရာနဲ့ လမ်းတွေကို မင်္ဂလာဆောင်အတွက် ယာယီပိတ်တာ ၊ လုံခြုံရေးတင်းကြပ်တာတွေ လုပ်ထားလို့ပါ။
မင်္ဂလာပွဲကိုလည်း သူဌေးတွေက ကိုယ်ပိုင်ဂျက်လေယာဉ်ကြီးတွေ ၊ ဇိမ်ခံသင်္ဘောတွေနဲ့ လာကြမှာပါ။ မင်္ဂလာပွဲက ဇွန်လ ၂၄ ရက် ဆန်ဂျော်ဂျီယိုမက်ဂီယားကျွန်းမှာ ကျင်းပမှာ ဖြစ်ပြီး သုံးရက်ကြာမယ်လို့ ဆိုပါတယ်။ မင်္ဂလာဆောင်စရိတ်ကိုတော့ ဒေါ်လာ ၁၀ သန်းဝန်းကျင် ကျသင့်မယ်လို့ တွက်ထားပါတယ်။
ဘီဇော့စ်ရဲ့ မင်္ဂလာဆောင်ကို ဗင်းနစ်မြို့ခံတွေကတော့ လက်မခံ ကန့်ကွက်ဆန္ဒပြဖို့ ပြင်နေပါတယ်။ ကမ္ဘာလှည့်ခရီးသွားအများဆုံး လာတဲ့ ရာသီမှာ အခုလို ကမ္ဘာ့အချမ်းသာဆုံးဘီလျံနာက မြို့ကို အပိုင်စီးသလို လုပ်တာကို မြို့ခံတွေက မကျေနပ်ကြတာပါ။ ပိုက်ဆံသုံးပြီး ဗင်းနစ်ကို "သူဌေးတွေရဲ့ ကစားကွင်း" လုပ်ပစ်တာလို့လည်း ပြောနေကြပါတယ်။
ဆန္ဒပြမယ့်သူတွေကတော့ အခုမင်္ဂလာပွဲကြောင့် ကာဗွန်ထုတ်လွှတ်မှု မြင့်တက်ပြီး ဗင်းနစ်ရဲ့ ဂေဟစနစ်ဝန်းကျင်ကို ထိခိုက်နိုင်မယ်လို့လည်း ဆိုပါတယ်။ အဓိကအချက်က နှစ် ၁၀၀၀ သမိုင်းရှိတဲ့ ကမ္ဘာ့အမွေအနှစ်စာရင်းဝင်မြို့မှာ အခုလို တခမ်းတနားပွဲကြီးတွေ ကျင်းခွင့်ပေးတာ မြို့သိက္ခာထိတယ်ဆိုပြီး ဝေဖန်ကြတာပါ။
အသက် ၆၁ နှစ်အရွယ် သူဌေးကြီး ဘီဇော့စ်ဟာ အရင်အိမ်ထောင် မက္ကင်ဇီစကော့နဲ့ လမ်းခွဲခဲ့ပြီးနောက် ကလေးနှစ်ယောက်အမေ ဟောလီဝုဒ်အေးဂျင့် ပက်ထရစ် ဝှိုက်ဆဲလ်ရဲ့ ဇနီးဟောင်း လော်ရန်ဆန်းချက် (၅၅နှစ်) နဲ့ လက်တွဲခဲ့ပြီး ၂၀၂၃ မေလထဲမှာ လက်ထပ်ခွင့်တောင်းခဲ့ပါတယ်။
သူဌေးကြီး ဘီဇော့စ်က ဆန်းချက်နဲ့ လက်မထပ်ခင် သူပိုင်ဆိုင်တဲ့ ဒေါ်လာ ၂၂ ဘီလျံ ကြွယ်ဝချမ်းသာမှုကို ကာကွယ်ဖို့ မင်္ဂလာမဆောင်ခင် ပိုင်ဆိုင်မှု ဘယ်လိုခွဲမယ် / အခန့်မသင့်လို့ ကွဲရင် အိမ်ထောင်စရိတ် ဘယ်လိုဘယ်လောက်ထောက်ပံ့မယ် စတာတွေ ပါတဲ့ တင်ကြိုသဘောတူညီချက် Prenup စာချုပ်ကို အပြီးသတ်နိုင်ဖို့လည်း လုပ်နေတယ်လို့လည်း ဆိုပါတယ်။