ညောင်ခါးရှည် X-ray ဂိတ်မှာ စစ်ဆေးချိန်ကြာလို့ ကားတွေ အချိန်ကြာပိတ်မိပြန်

ပဲခူးတိုင်း ၊ ဝေါမြို့နယ် ၊ ရန်ကုန် - မော်လမြိုင် ကားလမ်းပေါ်မှာရှိတဲ့ ညောင်ခါးရှည် X-ray ဂိတ်မှာ စစ်ဆေးမှု တင်းကြပ်နေတဲ့အတွက် ကားတွေ အချိန်ကြာမြင့်စွာ ပိတ်မိမှု ကြုံတွေ့နေကြ ရပြန်တယ်လို့ ခရီးသွားလာ သူတွေဆီမှ သိရပါတယ်။
ညောင်ခါးရှည် X- ray ဂိတ်မှာ အရင်က ကုန်ကားတွေလောက်ကိုသာ အဓိကထား စစ်ဆေးမှုရှိခဲ့ပြီး လက်ရှိမှာတော့ ကားကြီး ၊ ကားငယ် ၊ အိမ်စီးကား အပါအားလုံးကို တင်းတင်းကြပ်ကြပ် စစ်ဆေးနေတာဖြစ်တယ်လို့ သိရပါတယ်။
ကားတွေကို စစ်ဆေးမှု အချိန်ကြာမြင့်တဲ့အတွက် အချိန်ကြာပြီး ကားတွေ ပိတ်မိသလိုဖြစ်ကာ တန်းစီ စောင့်နေရတာ ဖြစ်တယ်လို့ သိရပါတယ် ။
" အခုဆို ညောင်ခါးရှည် ဂိတ်ဖြတ်မယ့် ကားအားလုံး အကုန်လုံးကို သေချာကို စစ်ဆေးပါတယ်။ ဘားအံ ဘက်သွားမယ့်ကားဆို ပိုသေချာစစ်ပါတယ်။ ရန်ကုန်အတက်ကားလည်း စစ်ပါတယ်။ အရင်ကဆို အိမ်စီး ကားငယ်ဆိုရင် တော်ယုံ သိပ်ပြီး မစစ်ဘူး ။ အခုရက်ပိုင်းတော့ မရဘူး ။ အထုတ်အပိုး ပါလာတဲ့ ကားဆို သေချာကို အိတ်တွေ ဖွင့်စစ်ဆေးပါတယ် ။ စောင့်ရတာလည်း အရမ်းကြာပါတယ် ။စစ်တာ လက်ခံပါတယ် ။ အရမ်းကြာတာက အဆင်မပြေဘူး ။ " လို့ ခရီးသွားလာသူ တယောက်ကပြောပါတယ်။
နိုဝင်ဘာ ဒုတိယပတ်လောက်တုန်းက ညောင်ခါးရှည် X-ray ဂိတ်ကနေ ငွေကျပ် ၇ ဘီလီယံကျော်တန်ဖိုးရှိတဲ့ စိတ်ကြွဆေးပြား ၅သန်းဝန်းကျင် ဖမ်းဆီးရမိခဲ့ပြီး နောက်ပိုင်းကစလို့ စစ်ဆေးမှုကို ပိုတင်းကြပ် လာတာဖြစ်တယ်လို့ သိရပါတယ်။
ဖမ်းဆီးရမိခဲ့တဲ့ မူးယစ်ဆေးဝါးတွေဟာ မန္တလေးကနေ ဘားအံကို သယ်ဆောင်ကာ ရောင်းဝယ်ခြင်း ဖြစ်ကြောင်း အစိုးရက သတင်းထုတ်ပြန်ထား ပါတယ်။
" မူးယစ်ဆေး ဆယ်ဘီကားနဲ့မိပြီးကတည်းက စစ်ဆေးကြမ်းလာတာ ခုထိပဲ ။ ကားတွေစစ်တာ ကြာတော့ စောင့်ရတာ တော်တော်ကြာတယ် ။ ပုံမှန်သွားလာရတာထက် အချိန် နှစ်နာရီလောက်ပုတ်သွားတယ်။ ကားပိတ်တာက ရန်ကုန်သွားမယ်ဆိုရင် စစ်တောင်းတံတား မုပ္ပလင် ဘက်ခြမ်းအထိကို ပိတ်တာ ။ အဲဒီကနေမှ တစီးချင်းလှိမ့်ခဲ့ရတာ ။မူးယစ်ဆေးမိတာက ဘားအံဆိုတော့ အခုဘားအံကားဆို ပိုစစ်တယ် ။ " လို့ ညောင်ခါးရှည် ဂိတ်ကို ဖြတ်သန်းပြီး ခရီးသွားခဲ့သူ တယောက်က ပြောပါတယ်။
ညောင်ခါးရှည် X-ray ဂိတ်မှာ အရင်ကလည်း မူးယစ်ဆေးဝါးအများအပြား ဖမ်းဆီးရမိခြင်း ရှိခဲ့သလို လက်နက် ၊ ခဲယမ်း တွေလည်း ဖမ်းဆီးရမိ မှုရှိခဲ့တယ်လို့ သိရပါတယ်။
ဒါအပြင် ညောင်ခါးရှည်ဂိတ်ကို ဒေသတွင်း လက်နက်ကိုင်အဖွဲ့တွေက မကြာခဏ ပစ်ခတ် တိုက်ခိုက်မှူ ရှိခဲ့တယ်လို့ သိရပါတယ် ။
ညောင်ခါးရှည် X-ray ဂိတ်မှာ အရင်ကလည်း စစ်ဆေးမှုကြာမြင့်တဲ့အတွက် ခရီးသွား ကားတွေ အများအပြား မကြာခဏ ပိတ်မိပြီး အချိန်ကြာမြင့်စောင့်ဆိုင်းခဲ့ရတာမျိုး ရှိခဲ့တယ်လို့ ခရီးသွားတွေဆီကသိရ ပါတယ်။

မောတောင် စစ်ရှောင်တွေကို ထိုင်းအာဏာပိုင်​တွေက နယ်စပ် အလယ်ဂိတ်မှာ နေခွင့်မပြုတော့လို့ စစ်ရှောင်တွေ နေရပ်ပြန်နေကြရ

ထိုင်း-မြန်မာနယ်စပ်မြို့ဖြစ်တဲ့ တနင်္သာရီတိုင်း၊ မောတောင်မြို့နယ်က စစ်ဘေးရှောင်ပြည်သူတွေကို ထိုင်းအာဏာပိုင်တွေက နယ်စပ်ဂိတ်ဖြစ်တဲ့ အလယ်ဂိတ်မှာ နေခွင့်မပြုတော့ဘဲ နေရပ်ပြန်နေထိုင်ကြဖို့ အသိပေးလာတာကြောင့် ဒေသခံတွေ နေရပ်ပြန်နေကြရတယ် လို့သိရပါတယ် ။
ဒါကြောင့် ဒီနေ့ နိုဝင်ဘာ ၂၄ ရက်ကစပြီး အလယ်ဂိတ်မှာ ရောက်နေတဲ့ စစ်ရှောင်ပြည်သူတွေထဲက လူဦးရေ ၁၀၀၀ လောက်ဟာ နေရပ်ကို ပြန်သွားကြပြီး လက်ရှိမှာ လူ ၅၀၀ လောက်သာ အလယ်ဂိတ်မှာ ကျန်ရှိတော့တယ်လို့ သိရပါတယ်။
မောတောင်မြို့နယ်ထဲမှာ အစိုးရတပ် နဲ့ ဒေသတွင်းလက်နက်ကိုင် တပ်တွေအကြား တိုက်ပွဲပြင်းထန်နေတဲ့အတွက် စစ်ရှောင်တွေအနေနဲ့ နေရပ် မပြန်လိုပေမယ့်လည်း ထိုင်းအာဏာပိုင်တွေက နေခွင့်မပြုတော့တာကြောင့် နေရပ်ပြန် ကြရတာဖြစ်တယ်လို့ စစ်ရှောင်အရေး ကူညီနေသူတွေက ပြောပါတယ်။
" စစ်ရှောင်တွေ​က နေရပ်မပြန်ချင်ကြဘူး ။ ဒါပေမယ့်လည်း နေခွင့်မပြုတော့ ပြန်ကြရတာပါ။ မောတောင်မှာကလည်း ပစ်ခတ်မှုတွေက ရှိနေတယ်လေ ။ လေကြောင်းရန်ကလည်း ကြောက်ရတော့ မပြန်ချင်ကြဘူး ။ ထိုင်းအာဏာပိုင်တွေက ဘာကြောင့် ပြန်လွှတ်တယ်ဆိုတာတော့ သေချာမသိရသေးဘူး ။ စစ်ရှောင်တွေမှာ အကူအညီ လိုအပ်ချက်တွေ များတော့ ရွာဘက်ရောက်သွားရင် ကူညီဖို့က ခက်ခဲသွားနိုင်တယ် ။ " လို့ မောတောင် စစ်ရှောင်တွေကို ကူညီနေသူက ပြောပါတယ် ။
လက်ရှိမှာ မောတောင်စစ်ရှောင်တွေက နယ်စပ်အလယ်ဂိတ်မှာ လူဦးရေ ၅၀၀ လောက်ရှိနေပြီး မောတောင် တောင်ဘက်ခြမ်း တောထဲမှာလည်း စစ်ရှောင်နေကြသူတွေရှိသေးကြောင်း ၊ နယ်စပ်ဂိတ်အနီး စစ်ရှောင်သူ အားလုံး နေရပ်ပြန်ရမှာ ဖြစ်တယ်လို့ ကနဦးသိရပါတယ်။
လက်ရှိ အစိုးရတပ်က မောတောင်မြို့ကို ပြန်လည်သိမ်းပိုက်နိုင်ဖို့အတွက် လေကြောင်းကနေ အင်အားတိုးမြှင့်ချပေးထားတဲ့အပြင် လေကြောင်း တိုက်ခိုက်မှု ၊ လက်နက်ကြီး လက်နက်ငယ် ပစ်ခတ်တိုက်ခိုက် မှုတွေကြောင့် သိမ်ခွန်းရွာ နဲ့ သဲဖြူရွာဘက်မှာ ဒေသတွင်းလက်နက်ကိုင် တပ်တွေနဲ့ တိုက်ပွဲ ပြင်းထန်ဖြစ်ပွား နေတယ်လို့ သိရပါတယ်။
" သိမ်ခွန်း နဲ့ သံဖြူက မောတောင်နဲ့ဆိုရင် နည်းနည်းလှမ်းပေမယ့် အဲဒါတွေ ကျော်လာနိုင်ရင်လည်း မြို့နဲက နီးစပ်နေပြီ ပြောရမယ် ။ တိုက်ပွဲကတော့ ပြင်းထန်နေတယ် သိရတယ် ။ စစ်တပ်က မောတောင် ပြန်ရအောင်တိုက်မယ့် အခြေအနေရှိတယ် ။ " လို့ စစ်ရှောင်ကူနေသူ နောက်တယောက်က ပြောပါတယ် ။
မောတောင် ဒေသခံတွေမှာ စစ်ပွဲကြောင့် နေအိမ်ကိုစွန့်ခွာကာ အရေးပေါ်တိမ်းရှောင်ခဲ့ကြရချိန်
စစ်ရှောင် ပြည်သူတွေရဲ့ နေအိမ်အချို့မှာ ဖောက်ထွင်းခံရပြီး တန်ဖိုးရှိ ပစ္စည်းတွေ ခိုးယူခံရမှုတွေလည်း ရှိနေတယ်လို့ သိရပါတယ်။
မောတောင်မြို့ကိုတော့ နိုဝင်ဘာလ ၁၄ ရက်နေ့မှာ ဒေသတွင်းလက်နက်ကိုင် တပ်တွေက ထိန်းချုပ်ခဲ့တာဖြစ်ကြောင်း လက်ရှိမှာ နယ်စပ်ကုန်သွယ်ရေး ၊ ဒေသတွင်းကုန်သွယ်ရေး အားလုံးပြတ်တောက်နေတယ်လို့သိရပါတယ်။
မောတောင်မြို့က ထိုင်း - မြန်မာနယ်စပ်မြို့ ဖြစ်ပြီး နယ်စပ်ကုန်သွယ်ရေးအတွက် အရေးပါတဲ့ မြို့တမြို့ ဖြစ်ပါတယ် ။

ရှီကျင်းပင်ရဲ့ ဖိတ်ကြားချက်အရ ဒေါ်နယ်ထရန့် တရုတ်သွာမယ်

အမေရိကန်သမ္မတ‌ ဒေါ်နယ်ထရန့်ဟာ တရုတ်သမ္မတ ရှီကျင်းပင်နဲ့ တယ်လီဖုန်းဆက်သွယ် ဆွေးနွေးခဲ့ပြီး လာမယ့် ဧပြီလမှာ တရုတ်နိုင်ငံကို သွားရောက်ဖို့ သဘောတူခဲ့ကာ ရှီကျင်းပင်က သူ့ကို နိုင်ငံတော်ခရီးစဉ် ဖိတ်ကြားခဲ့တယ်လို့ ပြောပါတယ်။
ပြီးခဲ့တဲ့ တလနီးပါးက တောင်ကိုရီးယားမှာ တွေ့ဆုံခဲ့တဲ့ ထရန့်နဲ့ ရှီကျင်ပင်တို့ဟာ ကုန်သွယ်ရေး၊ ရုရှားရဲ့ ယူကရိန်းကျူးကျော်မှု၊ ဖန်တနိုင်းမူးယစ်းဆေး အမေရိကန်ကို ဝင်ရောက်မှုနဲ့ ထိုင်ဝမ်အရေး အပါအဝင် ကိစ္စရပ်တွေကို ဆွေးနွေးခဲ့ကြပါတယ်။
"တရုတ်နဲ့ အမေရိကန် ဆက်ဆံရေးဟာ အလွန်ခိုင်မာတယ် " လို့ ထရန့်က သူ့ရဲ့ လူမှုကွန်ရက်မှာ ဆိုပါတယ်။ နှစ်နိုင်ငံစလုံးဟာ တန်းတူညီမျှမှု၊ လေးစားမှုနဲ့ အပြန်အလှန်အကျိုးရှိမှုအပေါ် အခြေခံပြီး ဒီအခြေအနေကို ဆက်လက်ထိန်းသိမ်းထားသင့်တယ်လို့ တရုတ်နိုင်ငံပိုင် သတင်းဌာနက ဖော်ပြပါတယ်။
အောက်တိုဘာလအတွင်း တောင်ကိုရီးယားနိုင်ငံ၊ ဘူဆန်မှာ တွေ့ဆုံခဲ့ပြီးနောက် အခွန်ကောက်ခံမှုတွေ လျှော့ချဖို့နဲ့ ရပ်ဆိုင်းဖို့တွေ သဘောတူခဲ့ပြီး တရုတ်ကုန်ပစ္စည်းတွေအပေါ် အမေရိကန်ရဲ့ အခွန်ကောက်ခံမှုတွေဟာလည်း ပျမ်းမျှအားဖြင့် ၅၀ ရာခိုင်နှုန်းအောက်သာရှိတော့ပါတယ်။
"အဲဒီအချိန်ကစပြီး တရုတ်-အမေရိကန် ဆက်ဆံရေးဟာ ယေဘုယျအားဖြင့် တည်ငြိမ်ပြီး အပြုသဘောဆောင်တဲ့ လမ်းကြောင်းကို ထိန်းသိမ်းထားခဲ့ကာ နိုင်ငံတကာအသိုင်းအဝိုင်းကလည်း ဒါကို ကြိုဆိုကြတယ်" လို့ တရုတ်ရဲ့ ကြေညာချက်မှာ ဖော်ပြထားပါတယ်။
အမေရိကန်က တရုတ်ကုန်ပစ္စည်းတွေအပေါ် ၁၀၀ ရခိုင်နှုန်း ထပ်ဆောင်းအခွန်ကောက်ခံမယ့် ခြိမ်းခြောက်မှုကို ရုပ်သိမ်းလိုက်ပြီး တရုတ်နိုင်ငံကလည်း သူ့ရဲ့ နောက်ဆုံးအကြိမ် ရှားပါးမြေတင်ပို့မှု ထိန်းချုပ်ရေးအစီအစဉ်ကို အစီအစဉ်ကို ရွှေ့ဆိုင်းလိုက်ပါတယ်။
တနင်္လာနေ့က ရှီနဲ့ တနာရီလောက်ကြာတဲ့ ဖုန်းခေါ်ဆိုမှုဟာ ကုန်သွယ်ရေးကို အဓိကထားခဲ့တယ်လို့ အိမ်ဖြူတော် ပြောရေးဆိုခွင့်ရှိသူ ကာရိုလင်းလီဗစ်က ပြောပါတယ်။ ကုန်သွယ်ရေးဆွေးနွေးခြင်းအပြင် ရုရှားရဲ့ ယူကရိန်းပြဿနာ၊ ထိုင်ဝမ်ကို ကျူးကျော်မှုဆိုင်ရာ အကြောင်းအရာတွေကိုလည်း ဆွေးနွေးခဲ့တယ်လို့ ဆိုပါတယ်။
ကိုယ်ပိုင်အုပ်ချုပ်ခွင့်ရ ထိုင်ဝမ်ရဲ့ အချုပ်အခြာအာဏာနဲ့ ပတ်သက်ပြီး အမေရိကန်ရဲ့ မဟာမိတ်ဖြစ်တဲ့ ဂျပန်နဲ့ တရုတ်နိုင်ငံတို့အကြား သံတမန်ရေးရာ တင်းမာမှုတွေ မြင့်တက်နေပါတယ်။ ထိုင်ဝမ်အပေါ် တရုတ်ရဲ့ တိုက်ခိုက်မှုတိုင်းသည် ဂျပန်ရဲ့ စစ်ရေးတုံ့ပြန်မှုကို ဖြစ်ပေါ်စေနိုင်ကြောင်း ဂျပန်ဝန်ကြီးချုပ် ဆာနေတာကာအိချိက ယခုလအစောပိုင်းမှာ ပြောဆိုခဲ့ပါတယ်။

အမေရိကန်ရောက် မြန်မာတွေ ယာယီခိုလှုံခွင့် (TPS ) အဆုံးသတ်တော့မယ်

အမေရိကန်ပြည်ထောင်စုရှိ မြန်မာနိုင်ငံသားတွေအတွက် ယာယီနေထိုင် ခိုလှုံခွင့် (TPS )ကို အဆုံးသတ်တော့မယ်လို့ တာဝန်ရှိသူတွေက အတည်ပြု ပြောကြားပါတယ်။
ဒီကိစ္စနဲ့ပတ်သက်ပြီး အမိမြေလုံခြုံရေးဌာနဟာ အမေရိကန်အစိုးရအေဂျင်စီတွေနဲ့ ဆွေးနွေးခဲ့ပြီး မြန်မာနိုင်ငံသားတွေအတွက် ယာယီအကာအကွယ်နဲ့ နေထိုင်ခွင့်ကို မလိုအပ်တော့ကြောင်း အမိမြေလုံခြုံရေးဝန်ကြီး ခရစ္စတီနိုအမ်က ပြောပါတယ်။
“မြန်မာနိုင်ငံရဲ့ အခြေအနေဟာ မြန်မာနိုင်ငံသားတွေ နေရပ်ပြန်ဖို့ ဘေးကင်းလုံခြုံလောက်အောင် တိုးတက်လာတာကြောင့် ယာယီကာကွယ်စောင့်ရှောက်ရေးအဆင့်အတန်းကို ရပ်ဆိုင်းလိုက်ပါတယ်။ အရေးပေါ်အခြေအနေ အဆုံးသတ်မှု၊ ရွေးကောက်ပွဲတွေအတွက် အစီအစဉ်တွေ၊ အောင်မြင်တဲ့ အပစ်အခတ်ရပ်စဲရေး သဘောတူညီချက်တွေနဲ့ ပိုမိုကောင်းမွန်လာတဲ့ ဒေသန္တရအုပ်ချုပ်ရေးတွေ အပါအဝင် မြန်မာနိုင်ငံဟာ အုပ်ချုပ်ရေးနဲ့ တည်ငြိမ်ရေးမှာ သိသာထင်ရှားတဲ့ တိုးတက်မှုတွေ ရရှိခဲ့ပါတယ်။” လို့ ခရစ္စတီနိုအမ်က ပြောပါတယ်။
ဇန်နဝါရီလ ၂၆ ရက်နေ့မှာ ဒီယာယီနေထိုင်ခွင့် (TPS ) နဲ့ နေထိုင်တဲ့ မြန်မာနိုင်ငံသား ၄၀၀၀ လောက်အတွက် ဒီအဆင့်အတန်းဟာ သက်တမ်းကုန်ဆုံးတော့မယ်လို့ အေဂျင်စီက ပြောပါတယ်။ ကုလသမဂ္ဂ အပါအဝင် နိုင်ငံတကာလူ့အခွင့်အရေးအဖွဲ့တွေကတော့ ဒီဇင်ဘာလနဲ့ ဇန်နဝါရီလမှာ ကျင်းပမယ့် ရွေးကောက်ပွဲတွေဟာ လွတ်လပ်ပြီး တရားမျှတမှာ မဟုတ်ဘူးလို့ ပြောကြားထားပါတယ်။
“အမေရိကန်ရဲံ့ အချက်အလက်ဆိုင်ရာ ခွဲခြမ်းစိတ်ဖြာမှုက စိတ်ကူးယဉ်ဆန်တယ်” လို့ Human Rights Watch ရဲ့ အာရှရေးရာ ဒါရိုက်တာ မစ္စတာ ဂျွန် ဆစ်ဖ်တန်က ပြောပါတယ်။ အုပ်ချုပ်မှု သို့မဟုတ် တည်ငြိမ်မှုမှာ တိုးတက်မှုမရှိသေးဘူးလို့ ဆိုပါတယ်။
မြန်မာ့နိုင်ငံရေးအပြောင်းအလဲဖြစ်ခဲ့တဲ့အချိန် ၂၀၂၁ ခုနှစ်မှာ သမ္မတ ဂျိုးဘိုင်ဒင်လက်ထက်မှာ ပေးခဲ့ပြီး အကြိမ်ကြိမ် သက်တမ်းတိုးပေးခဲ့တဲ့ TPS ကို ရုပ်သိမ်းမှုဟာ ဇန်နဝါရီ ၂၆ ရက်မှာ စတင်သက်ဝင်မှာလို့ ဆိုပါတယ်။
နိုင်ငံခြားရေးဝန်ကြီးဌာနကတော့ မြန်မာနိုင်ံမှာ ပြည်တွင်းမငြိမ်မသက်မှု၊ လက်နက်ကိုင်ပဋိပက္ခနဲ့ အခြားအခြေအနေတွေကြောင့် အမေရိကန်နိုင်ငံသားတွေအနေနဲ့ မြန်မာနိုင်ငံက မသွားဖို့ ညွှန်ကြားထားဆဲဖြစ်ပါတယ်။
Ref:Reuters

ယနေ့ ရွှေဈေးနဲ့ နိုင်ငံခြားငွေလဲနှုန်းများ
(နိုဝင်ဘာ - ၂၅ ရက်၊ နံနက် ၁၀ နာရီ)

#ရွှေဈေး
-ကမ္ဘာ့ရွှေဈေး
တအောင်စ ၄၁၄၇ ဒေါ်လာ
ရန်ကုန်တိုင်းရွှေလုပ်ငန်းရှင်များအသင်း (YGEA) ရဲ့ရွှေစျေးကွက် အဖွင့်ဈေးနှုန်း
- အကယ်ဒမီ မီးလင်းရွှေ တကျပ်သား
၅၉၇၀၀၀၀ ကျပ်
ပြင်ပ အရောင်းအဝယ်ဖြစ်တဲ့ ရွှေဈေးနှုန်း
-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၈၇၅၀၀၀၀ ကျပ်
ဝယ်ဈေး ၈၇၁၀၀၀၀ ကျပ်
-၁၅ ပဲရည် တကျပ်သား
ရောင်းဈေး ၈၃၅၀၀၀၀ ကျပ်
ဝယ်ဈေး ၈၃၁၀၀၀၀ ကျပ်
* စနစ်သစ်
(၁ိ - ၁၆.၃၂၉၃၂၅ ဂရမ် = ၁၂၀ ရွေး)
-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၈၆၃၀၀၀၀ ကျပ်
ဝယ်ဈေး ၈၅၉၀၀၀၀ ကျပ်
-၁၅ ပဲရည် တကျပ်သား
ရောင်းဈေး ၈၂၃၀၀၀၀ ကျပ်
ဝယ်ဈေး ၈၁၉၀၀၀၀ ကျပ်
“လက်ရှိ ရွှေဈေးကွက်အတွင်း ဈေးနှုန်းအတက်အကျ မငြိမ်သေးတဲ့အတွက် ရောင်းမှား၊ ဝယ်မှား မဖြစ်ဖို့ သတိပြုစေလိုပါတယ်။”
(ရွှေဈေးနှုန်းများ အချိန်နှင့်အမျှ ပြောင်းလဲနိုင်သည်။)

#နိုင်ငံခြားငွေလဲလှယ်နှုန်း
-မြန်မာနိုင်ငံတော်ဗဟိုဘဏ် ရည်ညွှန်းငွေလဲနှုန်း
အမေရိကန် တဒေါ်လာ - ၃၆၄၅ ကျပ်
ပြင်ပပေါက်စျေး
-အမေရိကန်ဒေါ်လာ‌
ရောင်းဈေး - ၄၀၄၅ ကျပ်
ဝယ်ဈေး - ၃၉၄၅ ကျပ်
-စင်္ကာပူဒေါ်လာ
ရောင်းဈေး - ၃၁၀၀ ကျပ်
ဝယ်ဈေး - ၃၀၂၀ ကျပ်
-ယူရို
ရောင်းဈေး - ၄၆၆၀ ကျပ်
ဝယ်ဈေး - ၄၅၄၅ ကျပ်
-ထိုင်းဘတ်
ရောင်းဈေး - ၁၂၅ ကျပ်
ဝယ်ဈေး - ၁၂၁.၉၅ ကျပ်
-မလေးရှားရင်းဂစ်
ရောင်းဈေး - ၉၇၈ ကျပ်
ဝယ်ဈေး - ၉၅၄ ကျပ်
-တရုတ်ယွမ်
ရောင်းဈေး - ၅၇၀ ကျပ်
ဝယ်ဈေး - ၅၅၆ ကျပ်
-ဂျပန်ယန်း
ရောင်းဈေး - ၂၅.၈ ကျပ်
ဝယ်ဈေး - ၂၅.၁၇ ကျပ်
-အိန္ဒိယရူပီး
ရောင်းဈေး - ၄၅.၃၉ ကျပ်
ဝယ်ဈေး - ၄၄.၂၈ ကျပ်
-ကိုရီးယားဝမ်
ရောင်းဈေး - ၂.၇၅ ကျပ်
ဝယ်ဈေး - ၂.၆၈ ကျပ်
-စတာလင်ပေါင်
ရောင်းဈေး - ၅၃၀၀ ကျပ်
ဝယ်ဈေး - ၅၁၇၀ ကျပ်
-ဩစတြေးလျဒေါ်လာ
ရောင်းဈေး - ၂၆၁၅ ကျပ်
ဝယ်ဈေး - ၂၅၅၀ ကျပ်
-ကနေဒါဒေါ်လာ
ရောင်းဈေး - ၂၈၆၅ ကျပ်
ဝယ်ဈေး - ၂၇၉၅ ကျပ်
-ဟောင်ကောင်ဒေါ်လာ
ရောင်းဈေး - ၅၂၀ ကျပ်
ဝယ်ဈေး - ၅၀၇ ကျပ်
-ယူအေအီး
ရောင်းဈေး - ၁၁၀၁ ကျပ်
ဝယ်ဈေး - ၁၀၇၄ ကျပ်
ငွေလဲနှုန်းများ အချိန်နှင့်အမျှ ပြောင်းလဲနိုင်သည်။
***သတ်မှတ်ဈေးအတိုင်း အရောင်းအဝယ်မလုပ်ပါက အရေးယူခံရနိုင်သည်။

ကမ္ဘောဒီးယားခွန်ခမာပြိုင်ပွဲဝင် မြန်မာဖိုက်တာ (၃) ဦးထဲမှာ ရဲလင်းဦး အနိုင်ရ

ကမ္ဘောဒီးယားခွန်ခမာပြိုင်ပွဲကို ဝင်ရောက်ယှဉ်ပြိုင်ထိုးသတ်ခဲ့ မြန်မာဖိုက်တာ သုံးဦးထဲမှာ ရဲလင်းဦးအနိုင်ရရှိပြီး စည်သူဖြိုးနဲ့ အောင်ဟိန်းစွမ်းတို့ ရှုံးနိမ့်ခဲ့ကြောင်း သိရပါတယ်။
Cambodia Mas Fight လို့ အမည်ပေးထားတဲ့ ကမ္ဘောဒီးယားခွန်ခမာပြိုင်ပွဲကို ပြီးခဲ့တဲ့ နိုဝင်ဘာ ၂၃ ရက်က ဖနွမ်းပင်မြို့မှာ ကျင်းပပြုလုပ် ခဲ့ပြီး မြန်မာဖိုက်တာ သုံးဦး ဝင်ရောက်ယှဉ်ပြိုင်ခဲ့ကြခြင်းဖြစ်ပါတယ်။
မြန်မာဖိုက်တာ သုံးဦးစလုံးဟာ ခွန်ခမာစည်းမျဉ်းဖြစ်တဲ့ ၉ မိနစ် တစ်ချီပုံစံ ယှဉ်ပြိုင်ထိုးသတ်ခဲ့ကြပါတယ်။
မြန်မာဖိုက်တာ ရဲမင်းဦးဟာ ခွန်ခမာ (၆၃.၅) ကီလိုတန်းမှာ အိမ်ရှင်ကမ္ဘောဒီးယားဖိုက်တာ သာဗာရစ်နဲ့ ယှဉ်ပြိုင်ထိုးသတ်ခဲ့ပြီး တစ်မိနစ်အတွင်းမှာပဲ ပြိုင်ဘက်ကို အလဲထိုးကာ အနိုင်ရခဲ့ပါတယ်။
မြန်မာဖိုက်တာ အောင်ဟိန်းစွမ်းဟာ ခွန်ခမာ (၆၅) ကီလိုတန်းမှာ အိမ်ရှင်ကမ္ဘောဒီးယားဖိုက်တာ ဆော့ဟု့နဲ့ ယှဉ်ပြိုင်ထိုးသတ်ခဲ့ပြီး နောက်ဆုံးမိနစ်မှာ အလဲထိုးခံရကာ ရှုံးနိမ့်ခဲ့ခြင်းဖြစ်ပါတယ်။
မြန်မာဖိုက်တာ စည်သူဖြိုးဟာ ခွန်ခမာ (၅၁) ကီလိုတန်းမှာ အိမ်ရှင်ကမ္ဘောဒီးယးဖိုက်တာ ဘန်ဒေါင်းနဲ့ ယှဉ်ပြိုင်ထိုးသတ်ခဲ့ပြီး အမှတ်နဲ့ ရှုံးနိမ့်ခဲ့ခြင်းဖြစ်ပါတယ်။
အဲဒီပွဲဟာ ဖိုက်တာနှစ်ဦးစလုံး လက်ရည်တူညီစွာနဲ့ အကြိတ်အနယ်ထိုးသတ်ခဲ့ကြတာကြောင့် ပွဲကောင်းတစ်ပွဲဖြစ်ခဲ့ပါတယ်။

ဗင်နီစီယပ်စ်ကို သက်တမ်းတိုးစာချုပ်ချုပ်ဆိုဖို့ ရီးယဲလ်အသင်း သဘောတူညီမှုရရှိထားကြောင်း သတင်းထွက်

ရီးယဲလ်မက်ဒရစ်အသင်းဟာ ဘရာဇီးလ်တိုက်စစ်ကစားသမား ဗင်နီစီယပ်စ်ကို သက်တမ်းတိုးစာချုပ်ချုပ်ဆိုဖို့ သဘောတူညီမှုရရှိထားကြောင်း စပိန်သတင်းစာ AS က ဖော်ပြခဲ့ပါတယ်။
ဗင်နီစီယပ်စ်(၂၅ နှစ်)ဟာ ရီးယဲလ်အသင်းရဲ့ အဓိကကစားသမားတစ်ဦးအဖြစ် ရပ်တည်နေသူဖြစ်ပေမဲ့ အပြောင်းအရွှေ့သတင်းတွေ မကြာခဏထွက်ပေါ်လေ့ရှိပြီး ဆော်ဒီလိဂ်က မြင့်မားတဲ့ပြောင်းရွှေ့ကြေးပေးပြီး ခေါ်ယူဖို့ အသင့်ရှိနေကြောင်းလည်း သိရပါတယ်။
ရီးယဲလ်အသင်းနဲ့ ၂၀၂၇ ခုနှစ်အထိ စာချုပ်ချုပ်ဆိုထားတဲ့ ဗင်နီစီယပ်စ်က ရီးယဲလ်အသင်းမှာ ဆက်ရှိလိုပေမဲ့ အသင်းရဲ့လစာအများဆုံးကစားသမား ဖြစ်လာစေမယ့် လစာနှုန်းထားမျိုး အလိုရှိနေကြောင်း သိရပါတယ်။
ဒါကြောင့် ရီးယဲလ်အသင်းက ဗင်နီစီယပ်စ်ကို ရောင်းထုတ်ဖို့ အလားအလာများနေတယ်လို့ ထင်ကြေးပေးမှုတွေ ထွက်ပေါ်ခဲ့ပေမဲ့ AS ကတော့ စာချုပ်သစ်အတွက် သဘောတူညီမှုရရှိထားပြီလို့ ဖော်ပြခဲ့ခြင်းဖြစ်ပါတယ်။
ဗင်နီစီယပ်စ်ကို ဆော်ဒီကလပ်အသင်းတွေအပြင် PSG နဲ့ ဘိုင်ယန်မြူးနစ်တို့ကလည်း ခေါ်ယူဖို့ စိတ်ဝင်စားနေကြပြီး အခြေအနေကို စောင့်ကြည့်နေကြောင်း သိရပါတယ်။

ဒီရာသီမှာ အာဆင်နယ်အသင်းကို ချန်ပီယံမဖြစ်အောင် တားဆီးနိုင်မှာ အာဆင်နယ်တစ်သင်းသာ ရှိတော့တယ်လို့ ကာရေဂါ သုံးသပ်

ဘောလုံးသုံးသပ်သူအဖြစ် ဆောင်ရွက်နေတဲ့ လီဗာပူးလ်နောက်ခံလူဟောင်း ကာရေဂါက ဒီရာသီ ပရီးမီးယားလိဂ်ပြိုင်ပွဲမှာ အာဆင်နယ်အသင်းကို ချန်ပီယံမဖြစ်အောင် တားဆီးနိုင်မှာ အာဆင်နယ်တစ်သင်းသာ ရှိတော့တယ်လို့ သုံးသပ်ပြောကြားခဲ့ပါတယ်။
အာဆင်နယ်အသင်းဟာ ဒီရာသီ ပရီးမီးယားလိဂ်ပြိုင်ပွဲမှာ ပုံစံကောင်းပြသနေပြီး ပွဲစဉ်(၇)ကတည်းက အမှတ်ပေးဇယားထိပ်ဆုံးမှာ တောက်လျှောက်ရပ်တည်နေခဲ့ပါတယ်။
အခုတစ်ပတ် ပွဲစဉ်(၁၂)မှာတော့ ဒုတိယနေရာက အနီးဆုံးပြိုင်ဘက် ချယ်လ်ဆီးကို (၆)မှတ်ဖြတ်နိုင်ခဲ့သလို၊ ရှုံးပွဲတွေ့ခဲ့ကြတဲ့ မန်စီးတီး၊ လီဗာပူးလ်တို့နဲ့လည်း အမှတ်ပိုကွာသွားခဲ့ပါတယ်။
ဒါကြောင့် ကာရေဂါက လက်ရှိအချိန်မှာ အာဆင်နယ်အသင်းဟာ ပရီးမီးယားလိဂ်ရဲ့အကောင်းဆုံးအသင်းဖြစ်နေပြီး သူတို့ကို တားဆီးနိုင်မယ့်အသင်းက သူတို့ကိုယ်တိုင်သာဖြစ်လိမ့်မယ်လို့ သုံးသပ်ခဲ့တာပါ။
''အာဆင်နယ်အသင်း ချန်ပီယံမဖြစ်အောင် တားဆီးနိုင်မယ့် တစ်သင်းတည်းသောအသင်းက အာဆင်နယ်ပါပဲ။ သူတို့က အကောင်းဆုံးအသင်းပါ။ သူတို့က အကောင်းဆုံးလူစာရင်းရှိနေတာပါ။ သူတို့ကို ရပ်တန့်နိုင်မယ့် တစ်ခုတည်းသောအရာက သူတို့ရဲ့ ဦးခေါင်းတွေ၊ သူတို့ရဲ့စိတ်ပိုင်းဆိုင်ရာတွေပါပဲ။ မတ်၊ ဧပြီလမှာ တခြားအသင်းတွေအတွက် အခွင့်အရေးရှိနေဦးမယ်ဆိုရင် ပရိသတ်တွေက စိုးရိမ်လာနိုင်ပါတယ်။ ဒီတစ်ခုပဲ ဖြစ်နိုင်ပါတယ်။ သူတို့ ချန်ပီယံမဖြစ်ဘူးဆိုရင် ကျွန်တော်တို့အားလုံး ဒီအချက်ကိုပဲ လက်ညှိုးထိုးပြရမယ်လို့ ထင်ပါတယ်'' လို့ ကာရေဂါက ပြောကြားခဲ့ပါတယ်။
ကာရေဂါက အက်ဇေးဟာ အာဆင်နယ်အသင်းကို တိုးတက်ပြောင်းလဲစေမယ့်သူမဟုတ်ဘူးလို့ အကဲဖြတ်ခဲ့မိခြင်းအတွက် မှားယွင်းကြောင်းလည်း တောင်းပန်စကားဆိုခဲ့ပါတယ်။

ဂျိုရှူအာဗန်နဲ့ ထိုးသတ်ရမယ့်ပွဲဟာ ကစားသမားဘဝ အကြီးမားဆုံးစိန်ခေါ်မှုဖြစ်လာမယ်လို့ ပန်တိုဂျာ ဆို

UFC ရဲ့ ဖလိုင်းဝိတ်တန်း လက်ရှိချန်ပီယံ အလက်ဇန္ဒားပန်တိုဂျာက မကြာမီထိုးသတ်ရမယ့် ချင်းတိုင်းရင်းသား မြန်မာဖိုက်တာ ဂျိုရှူအာဗန်နဲ့ ချန်ပီယံခါးပတ် ကာကွယ်ပွဲဟာ သူရဲ့ ကစားသမားဘ၀ အကြီးမားဆုံးစိန်ခေါ်မှုဖြစ်လာမယ်လို့ ထုတ် ဖော်ပြောကြားခဲ့ပါတယ်။
အလက်ဇန္ဒားပန်တိုဂျာဟာ ပြီးခဲ့တဲ့ ရက်ပိုင်းက အွန်လိုင်းရုပ်သံအင်တာဗျူးတစ်ခုကို လက်ခံဖြေကြားခဲ့ပြီး ဂျိုရှူအာဗန် နဲ့ ထိုးသတ်ရမယ့် ချန်ပီယံခါးပတ် ကာကွယ်ပွဲအပေါ် မှတ်ချက်ပေးစကား ပြောကြားခဲ့တာဖြစ်ပါတယ်။
ပန်တိုဂျာက "ဂျိုရှူအာဗန်က တကယ်တော်တဲ့ ဖိုက်တာလေးပါ။ တက်ကြွပြီး စိတ်အားထက်သန်ပါတယ်။ ကျွန်တော့်အတွက်တော့ သူနဲ့ထိုးသတ်ရမယ့် ပွဲက ကစားသမားဘ၀ အကြီးမားဆုံးစိန်ခေါ် မှုဖြစ်လာပါလိမ့်မယ်။ အရမ်းကောင်းတဲ့ပွဲတစ်ပွဲ ဖြစ်လာမှာပါ။ သူနဲ့ ထိုးသတ်ရမယ့်ပွဲအပေါ် စိတ်လှုပ်ရှားပါတယ်။ ကျွန်တော်က ချန်ပီယံခါးပတ်အတွက် စိန်ခေါ်ပွဲတွေကိုပဲ တောက်လျှောက်ထိုးသတ်လာသူပါ။ ကမ္ဘာ့အကောင်းဆုံးဖိုက်တာတွေနဲ့ချည်း ထိုးသတ်ထားတာပါ။ ကျွန်တော်နောက်ဆုံးထိုးသတ်ထားတဲ့ ငါးပွဲက ချန်ပီယံခါးပတ်ပွဲတွေချည်းပါပဲ။ ဂျိုရှူအာဗန်က အရမ်းငယ်ပြီး စိတ်အား အရမ်းထက်သန်သူပါ။ အကြောက်အလန့်လည်း မရှိဘူး။ သူ့ရဲ့ပုံစံကို ကျွန်တော်သဘောကျတယ်။ ကိုယ့်ကိုယ်ကို ယုံကြည်မှုအပြည့်ရှိတဲ့ လူငယ်ဖိုက်တာလေး။ အခုပွဲဖြစ်လာတာကို ကျွန်တော် သဘောကျတယ်။ သူနဲ့ ဘရန်ဒန် ရွိုင်ဗယ် ထိုးတဲ့ပွဲကို ကျွန်တော် အစအဆုံး မကြည့်လိုက်ရဘူး။ ဘာကြောင့်လဲဆိုတော့ ကျွန်တော်လည်း ပွဲထိုးရမှာကိုး။ ဒါပေမဲ့ နည်းနည်းတော့ ကြည့်လိုက်ရတယ်။ ကျွန်တော် ထင်လိုက်တာက ဘရန်ဒန်ရွိုင်ဗယ် နိုင်ပြီပဲ မှတ်လိုက်တာ။ ဒါပေမဲ့ နောက်ဆုံးမှာ ဂျိုရှူအာဗန်က အသာစီးနဲ့ ဆော်ပြသွားတယ်။ သိပ်တော်တဲ့ ချာတိတ်ပါဗျာ"လို့ ပြောကြားခဲ့တာဖြစ်ပါတယ်။
အလက်ဇန္ဒားပန်တိုဂျာနဲ့ ဂျိုရှူအာဗန်တို့ရဲ့ပွဲကို လာမယ့်ဒီဇင်ဘာ ၆ ရက်မှာ ကျင်းပမယ့် UFC- 323 ပြိုင်ပွဲမှာ ဒုခေါင်တွဲဆိုင်းအဖြစ် ထည့်သွင်းထားပါတယ်။

ဆာလာကို ပွဲထွက်လူစာရင်းမှာ အသုံးမပြုဘဲ ချန်လှပ်သင့်တယ်လို့ ရွန်နီ သုံးသပ်

မန်ယူအသင်းရဲ့ တိုက်စစ်မှူးဟောင်း ရွန်နီက လီဗာပူးလ်နည်းပြ အာနယ်ဆလော့အနေနဲ့ အီဂျစ်တိုက်စစ်ကစားသမား ဆာလာကို ပွဲထွက်လူစာရင်းမှာ အသုံးမပြုဘဲ ချန်လှပ်သင့်တယ်လို့ သုံးသပ်ပြောကြားခဲ့ပါတယ်။
လီဗာပူးလ်အသင်းဟာ အခုတစ်ပတ် ယှဉ်ပြိုင်ကစားတဲ့ ပရီးမီးယားလိဂ်ပွဲစဉ်မှာ နော်တင်ဟမ်ဖောရက်စ်ကို (၀-၃)ဂိုးနဲ့ ရှုံးနိမ့်ခဲ့ပြီး ဆာလာအနေနဲ့ ခြေစွမ်းပြနိုင်ခြင်းမရှိခဲ့တာကြောင့် ရွန်နီက အခုလိုပြောကြားခဲ့တာပါ။
''ကျွန်တော်သာ ဆလော့ဆိုရင် အသင်းအပေါ် သက်ရောက်မှုရှိစေမယ့် ကြီးမားတဲ့ဆုံးဖြတ်ချက်ကို ချမှတ်ခဲ့မှာပါ။ ဆာလာက သူတို့ရဲ့ ခံစစ်ပိုင်းကို အကူအညီမပေးနိုင်ခဲ့ပါဘူး'' လို့ ရွန်နီက ပြောကြားခဲ့ပါတယ်။
ဆာလာက ပြီးခဲ့တဲ့ရာသီမှာ ပရီးမီးယားလိဂ်ရဲ့ ဂိုးသွင်းအများဆုံးနဲ့ ဂိုးဖန်တီးမှုအများဆုံးကစားသမားဖြစ်ခဲ့ပေမဲ့ ဒီရာသီမှာတော့ (၄)ဂိုးသွင်းပြီး ဖန်တီးမှု(၂)ကြိမ်သာ ပြုလုပ်နိုင်ပါသေးတယ်။
လီဗာပူးလ်အသင်းအတွက် နောက်ဆုံး(၃)ပွဲဆက်တိုက် ဂိုးလည်းမသွင်း၊ ဖန်တီးမှုလည်း မပြုလုပ်နိုင်ခဲ့တာကြောင့် သူ့ရဲ့ စွမ်းဆောင်ရည်အပေါ် မေးခွန်းထုတ်မှုတွေလည်း ရှိနေပါတယ်။
ရွန်နီကတော့ ဆာလာကို ဒီရာသီမှာ ဦးဆောင်နိုင်စွမ်းနည်းပါးနေတယ်လို့လည်း ဝေဖန်ပြစ်တင်မှု ပြုလုပ်ခဲ့ဖူးပါတယ်။