သက်သာတဲ့နောက်ကို မလိုက်ပါနဲ့
-------------------------------------
တခါတုန်းက လယ်တဲတစ်ခုမှာ အလွန်ပျင်းတဲ့ နွားလေးတစ်ကောင်ရှိသတဲ့။ အဲဒီနွားလေးဟာ သူ့သခင် ဖြစ်တဲ့ လယ်ပိုင်ရှင် ရှာဖွေကျွေးတဲ့ မြက်နုတွေကိုသာ စား သောက်နေတာပေါ့။
ဒါကြောင့် အခြားကြ,မ်းတမ်းတဲ့ ကောက်ရိုးနဲ့ မြက်ခြောက်တွေကို မစားတတ်ပဲ ဖြစ်နေ တာပေါ့ကွယ်။ တစ်နေ့ မှာ သူ့သခင်လယ်ပိုင်ရှင်ဟာ ခရီးသွားဖို့ ကြုံလာတော့ နွားလေးကို ပြောသတဲ့။
"နွားလေးရေ ငါ ခရီးထွက်ရမှာ အချိန်လည်း ကြာမြင့်မှာဖြစ်တယ်။ ဒီတော့ မင်းကိုယ်တိုင် မြက်နုတွေကို ရှာဖွေပြီး စားသောက်ပါ၊"
နွားလေးလည်း သူ့သခင်လယ်ပိုင်ရှင် ခရီးထွက်သွားတာကြောင့် အစာရှာဖို့ လယ်ကွင်းထဲကို ထွက်လာခဲ့တာပေါ့။ နွားလေးဟာ သူ့သခင်ရှာကျွေးတဲ့ မြက်နုတွေကို စားနေရတော့ မြက်နုတွေဘယ်မှာရှိတယ်ဆိုတာကို မသိပဲ ဖြစ်နေသတဲ့။
နွားလေးဟာ ဗိုက်ပြည့်အောင်စားဖို့ သူကြိုက်တဲ့ မြက်နုတွေကို ဘယ်လိုရှာရှာ မတွေ့ပဲ ဖြစ်နေလို့ စိတ်ပျက် နေရှာသတဲ့။ အဲဒီအချိန်မှာ မြက်စားနေတဲ့ နွားကြီး တစ်ကောင်ကို တွေ့တော့....
"ဒီနွားကြီးက မြက်တွေကို အားရပါးရ စားနေပါလား။ငါစားချင်တဲ့မြက်နုတွေ ဘယ်မှာရှိတယ်ဆိုတာသိရ အောင် မေးမြန်းမှဖြစ်မယ်"
နွားလေးဟာ အဲဒီလိုတွေးပြီး အစာစားနေတဲ့ နွားကြီးကို...“အသင်နွားကြီး ကျွန်ုပ်ကိုလည်း စားစရာမြက် ကောင်းများရှိရင် ညွှန်ပြပေးပါ"
နွားလေးရဲ့ အမေးစကားကိုကြားတော့ နွားကြီး က အထူးအဆန်းဖြစ်ပြီး ပြောဆိုလိုက်သတဲ့... "အသင်နွားလေး ကျွန်ုပ်စားနေတာ မြက်ကောင်းတွေ မဟုတ်လား၊ အသင်နွားလေးလည်း စားနိုင်ပါတယ်"
နွားလေးဟာ နွားကြီးစကားကိုကြားပြီး မြက်ပင်တွေကို ကြည့်လိုက်တာပေါ့။ ဒါပေမယ့် နွားလေးဟာ သူစားနေကျ မြက်နုတွေ မဟုတ်ပဲ မြက်ကြမ်းတွေ ဖြစ်နေလို့ မစားနိုင်ပဲ ဖြစ်နေသတဲ့။
"အသင်နွားကြီး ကျွန်ုပ် နေ့စဉ်စားနေကျ မြက်ဟာ အလွန်အရသာရှိတဲ့ မြက်နုတွေ ဖြစ်ပါတယ်။ ယခုတွေ့ရတဲ့ မြက်တွေဟာ မြက်ကြမ်းတွေဖြစ်လို့ မစားနိုင်ပါ” လို့ ပြောပြလိုက်တာပေါ့။
ဒီတော့ နွားကြီးက... “ အသင်နွားလေး အသင့်စကားအတိုင်း အသင်ဟာ သခင်ဖြစ်သူ ရှာဖွေကျွေးမွေးတဲ့မြက်နုကိုသာ စားနေကျဖြစ်နိုင်တယ်။ အသင်ဗိုက်ဝဖို့အတွက်သာ အရေးကြီးလို့ မြက်နုမြက်ကြမ်း မရွေးသင့်ပါ” လို့ပြောဆိုတာပေါ့ကွယ်။
ဒီတော့ နွားလေးက... "အသင်နွားကြီး ကျွန်ုပ်စားနေကျမြက်နုမဟုတ်လို့ မစားလိုပါ” ဟုပြောဆိုကာမြက်နုများကို စားသောက်ဖို့ ဆက်ပြီးရှာဖွေတာပေါ့ကွယ်။
နွားလေးဟာ မြက်နုတွေကို ရှာဖွေရင်း ချောင်းစပ်ကို ရောက်ရှိသွားသတဲ့။ ချောင်းစပ်မှာ ပေါက်နေတဲ့ မြက်တွေကို တွေ့ရလို့ဝမ်းသာအားရနဲ့ သွားကြည့်တာပေါ့။ ဒါပေမယ့် နွားလေးဟာ သူကြိုက်တဲ့ မြက်နုတွေ မဟုတ်လို့ စားဖို့ ခက်သွားသတဲ့။
အဲဒီအချိန်မှာ ချောင်းစပ်မှာရှိတဲ့ သစ်ပင်ကြီးပေါ် မှာ နေထိုင်တဲ့ ဗျိုင်းတစ်ကောင်ဟာ နွားလေးမြက်တွေကို တွေ့ပြီး မစားပဲနေတာကို တွေ့ရှိလို့ အံ့ဩနေတာပေါ့။ အဲဒါကြောင့် နွားလေးကို မေးမြန်းလိုက်သတဲ့။
“အသင်နွားလေး မြက်တွေကို တွေ့ရှိပါလျက်နဲ့ အဘယ့်ကြောင့် မစားပဲ ကြည့်ရှုနေပါသလဲ။ အခြားနွားတွေကအသင့်လို မဟုတ်ပါ။ ချောင်းစပ်နားက မြက်တွေကို တွေ့ရှိလျှင် ပျော်ရွှင်စွာ စားသောက်နေတာကို တွေ့ရပါ တယ်"
ဗျိုင်းရဲ့စကားကို ကြားတော့ နွားလေးက..."အသင်ဗျိုင်းပြောသလို ကျွန်ုပ် ဒီလို ကြမ်းတမ်းတဲ့ မြက်တွေကို မစားနိုင်ပါ။ ကျွန်ုပ်ရဲ့ သခင်ရှာဖွေကျွေးတဲ့ မြက်နုတွေကိုသာ စားသောက်နေကျ ဖြစ်ပါတယ်" လို့ ပြောဆိုလိုက်သတဲ့။
နွားလေးစကားကို ကြားတော့ ဗျိုင်းက..."အသင်နွားလေး အသင့်သခင် ရှာဖွေကျွေးမွေးတဲ့ မြက်နုတွေကိုသာ တောင့်တမနေပါနဲ့။ အသင်နွားလေး ကိုယ်တိုင် မြက်အကြောင်းကို သိရအောင် ဇွဲလုံ့လထားပြီး ရှာဖွေစားသောက်သင့်ပါတယ်” လို့ ပြောဆိုတာပေါ့။
နွားလေးလည်းဗျိုင်းစကားကို ကြားပြီး မြက်နုတွေ စားဖို့ ရှာဖွေသတဲ့။ ဒါပေမယ့် သူကြိုက်တဲ့ မြက်နုတွေ ရှာမတွေ့လို့ မြက်ကြမ်းတွေကိုပဲ ဗိုက်ပြည့်အောင် စားလိုက်ရတော့တာပေါ့။
အဲဒီလိုနဲ့ နွားလေးဟာ သူ့သခင်ပြန်မရောက်ခင် ချောင်းစပ်မှာရှိတဲ့ မြက်တွေကို စားနေရတာပေါ့ကွယ်။ တစ်နေ့ သူ့သခင်ပြန်လာပြီး နွားလေးကို ကြည့်လိုက်တော့ အလွန်ဝဖြိုးနေတာကို တွေ့လိုက်ရသတဲ့။
"နွားလေးဟာငါမရှိတုန်း မြက်နုတွေ မစားရပေမယ့် အခြားမြက်တွေကို ရှာဖွေစားတတ်နေပါလား"...
နွားလေးရဲ့သခင်က အဲဒီလိုတွေးပြီး နွားလေး စားဖို့ မြက်နုတွေကို ရှာဖွေပြီး ကျွေးမွေးတာပေါ့ကွယ်။ နွားလေးလည်းသူ့သခင်ရှာဖွေကျွေးမွေးတဲ့ မြက်နုတွေကို မစားပဲနေတာပေါ့။
နွားလေးရဲ့ အခြေအနေကို ရိပ်စားမိတဲ့ သူ့သခင်က နွားလေးကို အစာရှာဖွေစားဖို့ လယ်ကွင်းထဲကို လွှတ်လိုက်သတဲ့။ နွားလေးလည်း မြက်တွေရှိရာကို အပြေးသွားပြီး ရှာဖွေစားသောက်နေတာပေါ့။ နွားလေးရဲ့ ပြောင်းလဲသွား တဲ့အဖြစ်ကို တွေ့လိုက်ရတဲ့ ဗျိုင်းက မေးမြန်းလိုက်သတဲ့။
"အသင်နွားလေး အသင်ရဲ့သခင် ပြန်လာပြီ မဟုတ်လား၊ အသင့်ရဲ့သခင်ကအသင်ကြိုက်တဲ့မြက်နုတွေကို ရှာဖွေမကျွေးလို့ တခြားမြက်တွေကို လာစားနေတာလား။
ဗျိုင်းလေးရဲ့စကားကို ကြားတော့ နွားလေးက တုံ့ပြန်ပြောဆိုတာပေါ့ကွယ်...“အသင်ဗျိုင်း ကျွန်ုပ်သခင်က ကျွန်ုပ်စားဖို့အတွက် မြက်နုမြက်ကောင်းတွေကို ရှာဖွေကျွေးမွေးပါတယ်။
ဒါပေမယ့် အသင်ဗျိုင်းရဲ့ စကားအတိုင်းကျွန်ုပ်ကိုယ်တိုင် ဇွဲလုံ့လထား ပြီး ရှာဖွေမစားခဲ့ခြင်းကို တွေးမိပြီး အလိုလို ရှက်ရွံ့လာမိပါတယ်။ယခုအချိန်ကစပြီး ကျွန်ုပ်ကိုယ်တိုင် မြက်များကို ရှာဖွေစားသောက်တော့မှာ ဖြစ်ပါတယ်"
နွားလေးစကားကိုကြားလျှင် ဗျိုင်းက...."နွားလေးဟာ ငါရဲ့ စေတနာစကားကို လိုက်နာတာကြောင့် ငါ့ရဲ့ မိတ်ဆွေဖြစ်ချေပြီ” လို့တွေးကာ နွားလေး အစာရှာဖွေတိုင်း နွားလေးကျောပေါ်မှာ လိုက်ပါတာပေါ့ ကွယ်။
နွားလေးလည်း မိတ်ဆွေစစ်ဖြစ်တဲ့ ဗျိုင်းလေးနဲ့အတူ လယ်ကွင်းထဲမှာ ပျော်ရွှင်စွာ အစာရှာဖွေ စားသောက်နေ တာပေါ့ကွယ်.............။
ဒီပုံပြင်လေးကနေ အတွေးတစ်ခုခု ရနိုင်မယ်လို့ မျှော်လင့်ပါတယ်။
with respect - credit - မူရင်းရေးသားသူ
.
