ဒေလီမြို့တော်၏လေထုအရည်အသွေးအလွန်နိမ့်ကျ
နူးဒေလီ--အောက်တိုဘာလ ၂၂ ရက် ဗုဒ္ဓဟူးနေ့က အိန္ဒိယနိုင်ငံ နူးဒေလီမြို့တော်ရှိ လေထုအရည်အသွေးသည် အလွန်ညံ့ဖျင်းသော အမျိုးအစားတွင် ဆက်လက်ရှိနေကြောင်း ဗဟိုလေထုညစ်ညမ်းမှု ထိန်းချုပ်ရေးအဖွဲ့က ပြောကြားခဲ့သည်။
ဒေသစံတော်ချိန် နံနက် ၇ နာရီတွင် ရှိသော အစိုးရအချက်အလက်များအရ နူးဒေလီမြို့တော် အာရ်ကေပိုရမ်ရှိ လေအရည်အသွေးညွှန်းကိန်းမှာ ၃၈၀ ရှိ ခဲ့ပြီး အာနန်ဗီဟာ နှင့် အာရှော့ဗီဟာ နှစ်ခုစလုံးမှာ ၃၅၅ တွင် ရပ်တည်လျက်ရှိ နေပါသည်။
ဗုဒ္ဓဟူးနေ့သည် ဒေလီမြို့ခံများအတွက် မြူခိုးထူထပ်ပြီး အုံ့ဆိုင်းနေသည့် ဒုတိယမြောက်နေ့ဖြစ်သည်။ လွန်ခဲ့သည့် နှစ်ရက်က တရားရုံးချုပ်က သတ်မှတ်ထားသော နှစ်နာရီကြာ ကန့်သတ်ချက်ထက်ကျော်လွန်၍ ဒီဝါလီနေ့ဟိန္ဒူမီးထွန်းပွဲတော်ကိုဆင်နွှဲရန် ဒေသခံများက မီးရှူးမီးပန်းများပ-စ်လွှတ်သည်ကို မြင်တွေ့ခဲ့ရသည်။
စောင့်ကြည့် ထိန်းချုပ်ရေးစခန်း စုစုပေါင်း ၃၈ ခုအနက် ၃၄ ခုသည် အနီရောင်ဇုန်တွင် ရှိနေပြီး လေထုအရည်အသွေး အလွန်ညံ့ဖျင်းခြင်းကြောင်း ညွှန်ပြနေသည်။
လက်ရှိတွင် အာဏာပိုင်များသည် ဒေလီအမျိုးသား မြို့တော်နယ်မြေရှိ အဆင့်အလိုက် တုန့်ပြန်သည့် စီမံချက် အဆင့်၌ ကန့်သတ်ချက်များ ချမှတ်ထားသည်။
စက်မှုလုပ်ငန်းများနှင့် ယာဉ်အသွားအလာများသည် မြို့တွင်း လေထုညစ်ညမ်းမှုကို သိသိသာသာ ပိုမိုဆိုးရွားစေသည့်အပြင် များပြားလှသော ဆောက်လုပ်ရေးလုပ်ငန်းများကလည်း လေထုညစ်ညမ်းမှုကိုထပ်လောင်း၍ ပိုမိုဆိုးရွားစေကြောင်း သိရသည်။
