တပ်မတော်က ပြန်လည်ထိန်းချုပ်ခဲ့ပြီးနောက် သီပေါမြို့တွင် အောက်တိုဘာ ၂၂ ရက်မှ ၃၀ ရက်အထိ အခြေခံပညာကျောင်း ၁၁ ဖွင့်လှစ်နိုင်ခဲ့ပြီး ကျောင်းသားကျောင်းသူ ၂၁၇၁ ဦး တက်ရောက်လျက်ရှိ

တပ်မတော်က ပြန်လည်ထိန်းချုပ်ခဲ့ပြီးနောက် သီပေါမြို့တွင် အောက်တိုဘာ ၂၂ ရက်မှ ၃၀ ရက်အထိ အခြေခံပညာကျောင်း ၁၁ ဖွင့်လှစ်နိုင်ခဲ့ပြီး ကျောင်းသားကျောင်းသူ ၂၁၇၁ ဦး တက်ရောက်လျက်ရှိကြောင်း သိရသည်။

ရှမ်းပြည်နယ် (မြောက်ပိုင်း)၊ သီပေါမြို့နှင့် အနီးတစ်ဝိုက်၌ အစိုးရ၏အုပ်ချုပ်မှုယန္တရား ပြန်လည်လည်ပတ်နိုင်ရေး၊ ကလေးသူငယ်များ ပညာသင်ကြားနိုင်ရေးနှင့် ဒေသခံပြည်သူလူထုအား ကျန်းမာရေးစောင့်ရှောက်မှုလုပ်ငန်းများ ပြန်လည်ဆောင်ရွက်နိုင်ရေးတို့အပြင် ပြန်လည်ထူထောင်ရေးလုပ်ငန်းများကို ဆောင်ရွက်ပေးလျက်ရှိရာ အောက်တိုဘာ ၃၀ ရက်တွင် အမှတ် (၄) အခြေခံပညာအလယ်တန်းကျောင်း(ခွဲ)၊ အမှတ် (၆) အခြေခံပညာအလယ်တန်းကျောင်း (ခွဲ) နှင့် အမှတ် (၃) အခြေခံပညာမူလတန်းကျောင်းတို့ကို ထပ်မံဖွင့်လှစ်နိုင်ခဲ့ကြောင်း သိရသည်။

သီပေါမြို့၌ အောက်တိုဘာ ၂၂ ရက်မှ ၂၉ ရက်အထိ အခြေခံပညာကျောင်း ရှစ်ကျောင်းဖွင့်လှစ်နိုင်ခဲ့ပြီး အောက်တိုဘာ ၃၀ ရက်က အခြေခံပညာကျောင်း သုံးကျောင်း ထပ်မံဖွင့်လှစ်နိုင်ခဲ့သဖြင့် စုစုပေါင်း အခြေခံပညာကျောင်း ၁၁ ကျောင်းဖွင့်လှစ်နိုင်ခဲ့ပြီးဖြစ်ကြောင်း သိရသည်။

ထို့ပြင် ကျောင်းနေအရွယ်ကလေးများအား တန်းစဉ်အလိုက် ကျောင်းအပ်လက်ခံလျက်ရှိရာ အောက်တိုဘာ ၃၀ ရက်က ကျောင်းသား၊ ကျောင်းသူ ၁၈၃ ဦး ထပ်မံလာရောက်ကျောင်းအပ်နှံခဲ့သဖြင့် စုစုပေါင်း ကျောင်းသား၊ ကျောင်းသူ ၂၁၇၁ ဦးအထိရှိပြီဖြစ်ပြီး အဆိုပါကျောင်းသား၊ ကျောင်းသူများအား ပညာရေးဝန်ကြီးဌာနမှအခမဲ့ ပေးအပ်သည့် ကျောင်းသုံးစာအုပ်များ၊ စာရေးကိရိယာများနှင့် ထောက်ပံ့ပစ္စည်းများကို တစ်ပါတည်း ပေးအပ်ကြကြောင်း၊ ထို့ပြင် တပ်မတော်သားများ၊ ဌာနဆိုင်ရာဝန်ထမ်းများနှင့် ဒေသခံပြည်သူများ စုပေါင်း၍ သီပေါမြို့ရှိ အခြေခံပညာမူလတန်းကျောင်း (စံဖိတ်) ၌ စုပေါင်းသန့်ရှင်းရေးလုပ်ငန်းများ ဆောင်ရွက်ပေးကြကြောင်း သိရသည်။

အမေရိကန်အစိုးရ၏ ရန်ပုံငွေထောက်ပံ့မှုရပ်ဆိုင်းခဲ့ပြီးနောက် သတင်းထုတ်လုပ်မှုများကို ရပ်တန့်တော့မည်ဟု RFA ပြောကြား

အမေရိကန်အစိုးရ၏ ရန်ပုံငွေထောက်ပံ့မှုရပ်ဆိုင်းခဲ့ပြီးနောက် သတင်းထုတ်လုပ်မှုများကို ရပ်တန့်တော့မည်ဟု RFA သတင်းဌာနက အောက်တိုဘာ ၃၀ ရက်တွင် ပြောကြားခဲ့သည်။

မတ်လအတွင်းက အမေရိကန်သမ္မတ ဒေါ်နယ်ထရန့်၏ အစိုးရအဖွဲ့သည် အမေရိကန်အစိုးရက ရန်ပုံငွေပေးထားသည့် မီဒီယာများအတွက် ငွေကြေးအများစုကို လျှော့ချဖြတ်တောက်ခဲ့ပြီးကတည်းက RFA သည် ဝန်ထမ်း ၉၀ ရာခိုင်နှုန်းကျော်ကို အလုပ်ဖြုတ်ခြင်း သို့မဟုတ် ခွင့်ပေးခြင်း၊ သတင်းထုတ်လုပ်မှုများကို လျှော့ချခြင်းတို့ ပြုလုပ်ခဲ့သည်။

ထရန့်၏ ရန်ပုံငွေလျှော့ချဖြတ်တောက်မှုများကို တရားရုံးများက ဟန့်တားနိုင်ခဲ့သော်လည်း လက်ရှိတွင်အမေရိကန်ဖက်ဒရယ်အစိုးရယန္တရားရပ်ဆိုင်းနေသဖြင့် RFA သည် ရန်ပုံငွေများကို ရရှိခြင်းမရှိပေ။

အမေရိကန်တွင် လွှတ်တော်က ဘတ်ဂျက်ကို အတည်ပြုနိုင်ခြင်းမရှိသဖြင့် အစိုးရအဖွဲ့ယန္တရားရပ်ဆိုင်းနေသည်မှာ တစ်လနီးပါး ကြာမြင့်ပြီဖြစ်သည်။

ကံမမြို့နယ်တွင် ရပ်ကျေးအုပ်ချုပ်ရေးမှူး အမျိုးသမီးတစ်ဦးနှင့် အရပ်သားနှစ်ဦးကို ဒလန်စွပ်စွဲချက်ဖြင့် PDF များက သေနတ်ဖြင့်ပစ်သတ်

မကွေးတိုင်းဒေသကြီး ကံမမြို့နယ်တွင် ရပ်ကျေးအုပ်ချုပ်ရေးမှူး အမျိုးသမီးတစ်ဦးနှင့် အရပ်သားနှစ်ဦးကို ဒလန်စွပ်စွဲချက်ဖြင့် PDF များက သေနတ်ဖြင့်ပစ်သတ်ခဲ့ကြောင်း သတင်းရရှိသည်။

ကံမမြို့နယ်၊ ကျီးမီးကျေးရွာအုပ်စုအုပ်ချုပ်ရေးမှူး ဒေါ်သင်းသင်းနွယ်သည် ၎င်း၏နေအိမ်၌ရှိနေစဉ် အောက်တိုဘာ ၂၉ ရက် နံနက် ၆ နာရီခန့်တွင် PDF များက ဆိုင်ကယ်များဖြင့် ရောက်ရှိလာပြီး ဒေါ်သင်းသင်းနွယ်အား ဖမ်းဆီးခေါ်ဆောင်သွားကာ ကျီးမီးကျေးရွာတောင်ဘက်ရှိ ရေနံ့သာ-ကျီးမီး-ကျောက်ပဒေါင်း ကျေးရွာသွားလမ်းဘေး၌ သေနတ်ဖြင့် ပစ်ခတ်သတ်ဖြတ်ခဲ့သဖြင့် ဒေါ်သင်းသင်းနွယ်တွင် ကျည်ထိမှန် ဒဏ်ရာများရရှိကာ သေဆုံးခဲ့ကြောင်း သိရသည်။

အလားတူ ကံမမြို့နယ် သရက်ချောင်းကျေးရွာနေသူများဖြစ်သည့် ဦးတင်ဦးနှင့် ၎င်း၏ယောက်ဖဖြစ်သူ ဦးတင်ဌေးတို့သည် ၎င်းတို့၏ နေအိမ်အသီးသီး၌ရှိနေစဉ် အောက်တိုဘာ ၂၇ ရက် ည ၁၁ နာရီခန့်တွင် PDF ၁၅ ဦးခန့်ရောက်ရှိလာပြီး ဒလန်များဟုပြောဆို၍ ဖမ်းဆီးခေါ်ဆောင်ကာ သရက်ချောင်းကျေးရွာအနောက်ဘက် သုံးဖာလုံခန့်အကွာ ဒေသအခေါ် ကုန်ထုတ်လမ်းဘေး၌ သေနတ်ဖြင့် ပစ်ခတ်သတ်ဖြတ်သွားခဲ့သဖြင့် ကျည်ထိမှန် ဒဏ်ရာများရရှိကာ သေဆုံးခဲ့ကြောင်း သိရသည်။

ထိုသို့ အုပ်ချုပ်ရေးပိုင်းဆိုင်ရာ တာဝန်ရှိသူတစ်ဦးနှင့် အရပ်သားတစ်ဦးကို သေနတ်ဖြင့် ပစ်ခတ်သတ်ဖြတ်မှု ကျူးလွန်ခဲ့သူများကို ဖော်ထုတ်ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း သိရသည်။

အင်ဒရူးရဲ့ တော်ဝင်မင်းသားဘွဲ့ ချားလ်ဘုရင် ရုပ်သိမ်းလိုက်ပြီး အိမ်တော်ကနေဆင်းဖို့ကိုလည်း ညွှန်ကြား

ဗြိတိန် ချားလ်စ်ဘူရင်က ညီတော်ဖြစ်သူ မင်းသားကြီး အင်ဒရူးရဲ့ တော်ဝင်မင်းသားဘွဲ့ကို ရုပ်သိမ်းလိုက်ပြီး လက်ရှိနေထိုင်နေတဲ့ အိမ်တော်ကလည်း ရွှေ့ပြောင်းခိုင်းလိုက်တယ်လို့ ဘက်ကင်ဟမ်နန်းတော်က ထုတ်ပြန်ကြေညာလိုက်ပါတယ်။

လိင်ပိုင်းဆိုင်ရာ စွပ်စွဲချက်တွေနဲ့ တရားရင်ဆိုင်ပြီး ထောင်ထဲမှာ သေဆုံးသွားတဲ့ အမေရိကန်နိုင်ငံသား ဂျက်ဖရီအပ်စတိုင်းအမှုမှာ မင်းသားကြီးအင်ဒရူးဟာလည်း အရွယ်မရောက်သေးသူတွေကို လိင်ပိုင်းဆိုင်ရာ ကျူးလွန်ခဲ့တယ်လိုတဲ့ စွပ်စွဲချက်တွေက ကျယ်ကျယ်ပြန့်ပြန့် ထွက်ပေါ်ခဲ့ပါတယ်။

ဘက်ကင်ဟမ်နန်းတော်ရဲ့ ထုတ်ပြန်ချက်မှာတော့ အင်ဒရူးရဲ့ မင်းသားဘွဲကို ရုပ်သိမ်းလိုက်ပြီး သူ့ကို အင်ဒရူးမောင့်ဘက်တန်ဝင်ဆာအဖြစ်သာ ခေါ်ဝေါ်သုံးစွဲရတော့မှာဖြစ်ပါတယ်။ အသက် ၆၅ နှစ်အရွယ် မင်းသားကြီးအင်ဒရူးကတော့ ဒီကိစ္စတွေကြောင့် ယောက်မြို့စားအပါအဝင် တော်ဝင်ဘွဲ့အချို့ကို ယခုလအစောပိုင်းမှာ စွန့်လွှတ်ကြောင်း ကြေညာခဲ့ပါတယ်။

လက်ရှိမှာတော့ မင်းသားအင်ဒရူးရဲ့ အဆောင်အယောင်တွေ၊ ဘွဲ့တွေနဲ့ ဂုဏ်ထူးဆောင်တွေကို ဖယ်ရှားဖို့ တရားဝင်လုပ်ငန်းစဉ်တခုကို စတင်နေပြီလို့ ကြေညာခဲ့ပြီး ဝင်ဆာအိမ်တော်မှာ နေထိုင်ခွင့်ကိုလည်း စွန့်လွှတ်ဖို့ တရားဝင် အကြောင်းကြားစာ ပေးပို့ထားတယ်လို့ ဆိုပါတယ်။

သူ့ကို ပုဂ္ဂလိက နေအိမ်တခုကို ပြောင်းရွှေ့စေမယ်လို့ ပြောပါတယ်။ သူ့အပေါ် စွပ်စွဲချက်တွေကို ငြင်းဆိုနေပေမယ့် ဒီကိစ္စနဲ့ပတ်သက်ပြီး အရေးယူမှုတခု လုပ်ဆောင်ဖို့လိုအပ်ပြီး ကျူးလွန်ခံရသူတွေနဲ့ အတူရပ်တည်ကြောင်း နန်းတော်ရဲ့ ထုတ်ပြန်ချက်မှာ ဖော်ပြထားပါတယ်။

အင်ဒရူးရဲ့ အရွယ်ရောက်ပြီးသား သမီးနှစ်ယောက်ဖြစ်တဲ့ ယူဂျီနီနဲ့ ဘီထရစ်တို့ကတော့ သူတို့ရဲ့ မင်းသမီးဘွဲတွေ ဆက်လက်တည်ရှိနေမှာဖြစ်ပြီး အင်ဒရူးဟာ ရှစ်ယောက်မြောက် ဗြိတိန်ထီးနန်းဆက်ခံမယ့်သူအဖြစ်တော့ ဆက်ရှိနေမှာဖြစ်ပါတယ်။

အင်ဒရူးရဲ့ မင်းသားဘွဲ့ရုပ်သိမ်းမှုနဲ့ပတ်သက်ပြီး ဗြိတိန်အစိုးရကို ဘက်ကင်ဟမ်နန်းတော်က တိုင်ပင်ဆွေးနွေးခဲ့ပြီး အစိုးရကလည်း ထောက်ခံခဲ့ပုံရပါတယ်။ ဒါဟာ လိင်ပိုင်းဆိုင်ရာ စော်ကားကျူးလွန်မှုတွေအတွက် အလွန်အစွမ်းထက်တဲ့ သတင်းစကားဖြစ်ပြီး ဘုရင်အတွက်လည်း ကြီးမားတဲ့ ခြေလှမ်းတရပ်ဖြစ်ကာ ဒီကိစ္စကို ထောက်ခံတယ်လို့ ဗြိတိန်ယဉ်ကျေးမှုဝန်ကြီး လီဆာနန်ဒီက ပြောပါတယ်။

စပယ်လက်တီကို နည်းပြသစ်အဖြစ် ဂျူဗင်တပ်စ်အသင်း ခန့်အပ်

ဂျူဗင်တပ်စ်အသင်းဟာ အီတလီလက်ရွေးစင်နည်းပြဟောင်း စပယ်လက်တီကို နည်းပြသစ်အဖြစ် ခန့်အပ်လိုက်ကြောင်း သိရပါတယ်။

ဂျူဗင်တပ်စ်အသင်းဟာ ပြီးခဲ့တဲ့ရက်ပိုင်းအတွင်း ခရိုအေးရှားနည်းပြ တူဒေါကို ရာထူးက ထုတ်ပယ်ခဲ့ပြီး အီတလီနည်းပြ စပယ်လက်တီကို ပြန်လည်အစားထိုးခန့်အပ်ခဲ့တာပါ။

အသက်(၆၆)နှစ်ရှိပြီဖြစ်တဲ့ စပယ်လက်တီဟာ အီတလီလက်ရွေးစင်အသင်းနဲ့အတူ အီတလီကလပ်အသင်းများစွာနဲ့ ရုရှားကလပ် ဇင်းနစ်အသင်းကို ကိုင်တွယ်ခဲ့ဖူးသူဖြစ်ပြီး နောက်ဆုံးကိုင်တွယ်ခဲ့တဲ့ ကလပ်ကတော့ နာပိုလီပါ။

နာပိုလီအသင်းကို ကိုင်တွယ်ချိန်က စီးရီးအေချန်ပီယံဆု ရယူနိုင်ခဲ့သလို၊ နာပိုလီဟာ သူ့ရဲ့နောက်ဆုံးကလပ်အသင်းဖြစ်ကြောင်းနဲ့ အီတလီမှာ တခြားကလပ်အသင်းကို ကိုင်တွယ်ဖွယ်မရှိတော့ကြောင်း ပြောကြားခဲ့ဖူးပေမဲ့ အခု ဂျူဗင်တပ်စ်အသင်းနဲ့ စာချုပ်ချုပ်ဆိုခဲ့ခြင်း ဖြစ်ပါတယ်။

ဂျူဗင်တပ်စ်အသင်းက စပယ်လက်တီကို ရာသီကုန်အထိသာ စာချုပ်ချုပ်ဆိုခဲ့ပေမဲ့ ချန်ပီယံလိဂ်ဝင်ခွင့်ရယူနိုင်ခဲ့ရင် ဆက်ပြီးစာချုပ်ချုပ်ဆိုမယ့် သဘောတူညီချက်ပါဝင်ကြောင်း သိရပါတယ်။

အောက်တိုဘာလ ပရီးမီးယားလိဂ်အကောင်းဆုံးဆုအတွက် ဆန်ခါတင်စာရင်း ထုတ်ပြန်

ပရီးမီးယားလိဂ်အဖွဲ့ချုပ်ဟာ အောက်တိုဘာလ ပရီးမီးယားလိဂ်အကောင်းဆုံးဆုအတွက် ဆန်ခါတင်စာရင်း ထုတ်ပြန်ခဲ့ပါတယ်။

အကောင်းဆုံးကစားသမားဆုအတွက် ဆန်ခါတင်စာရင်းမှာ မက်တီကတ်ရှ်(အက်စတွန်ဗီလာ)၊ ဂီမာရေ့စ်(နယူးကာဆယ်)၊ ဟာလန်း(မန်စီးတီး)၊ ခရူပီ(ဘုန်းမောက်)၊ အမ်ဘူမို(မန်ယူ)၊ မူကီလီ(ဆန်းဒါးလန်း)၊ သီယာဂို(ဘရန့်ဖို့ဒ်)နဲ့ တင်ဘာ(အာဆင်နယ်)တို့ ပါဝင်ခဲ့ပြီး ဟာလန်းကလွဲရင် ကျန်တဲ့ကစားသမားတွေက ဒီရာသီမှာ လအလိုက်အကောင်းဆုံးဆု ရရှိဖူးခြင်း မရှိသေးပါဘူး။
အကောင်းဆုံးနည်းပြဆုအတွက် ဆန်ခါတင်စာရင်းမှာတော့ အောက်တိုဘာလအတွင်း ပရီးမီးယားလိဂ်သုံးပွဲစလုံး အနိုင်ရခဲ့ကြတဲ့ အာမိုရင်မ်(မန်ယူ)၊ အာတေတာ(အာဆင်နယ်)၊ အူနိုင်းအမ်မရီ(အက်စတွန်ဗီလာ)တို့နဲ့အတူ အိုင်ရာအိုလာ(ဘုန်းမောက်)တို့ ပါဝင်ခဲ့ပြီး (၄)ဦးစလုံး ဒီရာသီမှာ လအလိုက်အကောင်းဆုံးနည်းပြဆု မရဖူးသေးပါဘူး။

အကောင်းဆုံးသွင်းဂိုးဆုအတွက် ဆန်ခါတင်စာရင်းမှာတော့ ဆယ်မင်ညို၊ ဂျပ်စတင်ကလွိုက်ဗတ်(ဘုန်းမောက် ၃-၁ ဖူလ်ဟမ်ပွဲ)၊ ကိုင်စီဒို(ချယ်လ်ဆီး ၂-၁ လီဗာပူးလ်ပွဲ)၊ ချာအူနာ(ဘန်လေ ၂-၀ လိဒ်စ်ပွဲ)၊ ဗော်တာမယ်ဒီ(ဘရိုက်တန် ၂-၁ နယူးကာဆယ်ပွဲ)၊ ဘူအန်ဒီယာ(စပါး ၁-၂ အက်စတွန်ဗီလာပွဲ)၊ ဆာလာ(ဘရန့်ဖို့ဒ် ၃-၂ လီဗာပူးလ်ပွဲ)၊ ဖလမ်းမင်း(ဝုလ်ဗ် ၂-၃ ဘန်လေပွဲ) တို့ ပါဝင်ခဲ့ပါတယ်။

အကောင်းဆုံးကာကွယ်မှုဆုအတွက် ဆန်ခါတင်စာရင်းမှာတော့ ရိုအက်ဖ်စ်(မန်ယူ ၂-၀ ဆန်းဒါးလန်းပွဲ)၊ မက်ဇ်ဆဲလ်စ်(နယူးကာဆယ် ၂-၀ နော်တင်ဟမ်ဖောရက်စ်ပွဲ)၊ ဆမ်ဂျွန်စတုန်း(ဝုလ်ဗ် ၁-၁ ဘရိုက်တန်ပွဲ)၊ ဒင်းန်ဟန်ဒါဆန်(အာဆင်နယ် ၁-၀ ခရစ္စတယ်ပဲလေ့စ်ပွဲ)၊ ဒူဘရေကာ(ဝုလ်ဗ် ၂-၃ ဘန်လေပွဲ)၊ ဗစ်ကာရီယို(အဲဗာတန် ၀-၃ စပါးပွဲ)တို့ ပါဝင်ခဲ့ပါတယ်။
ပရိသတ်တွေအနေနဲ့ ဒီဆုတွေအတွက် မဲပေးမှုကို ပရီးမီးယားလိဂ်ဝက်ဘ်ဆိုက်မှာ နိုဝင်ဘာ(၃)ရက်နေ့အထိ ပြုလုပ်နိုင်မှာဖြစ်ကြောင်း သိရပါတယ်။

လိုအပ်တဲ့ ကစားသမားခေါ်ယူမှုတွေ ဆက်လက်လုပ်ဆောင်ပေးသွားမယ်လို့ မန်ယူအသင်းရဲ့ ဘောလုံးဒါရိုက်တာ ပြောကြား

မန်ယူအသင်းရဲ့ ဘောလုံးဒါရိုက်တာ ဂျေဆင်ဝီလ်ကော့စ်က အသင်းရဲ့ ရေရှည်စီမံကိန်းအတွက် ကစားသမားခေါ်ယူမှုတွေ ဆက်လက်လုပ်ဆောင်ပေးသွားမယ်လို့ ပြောကြားခဲ့ပါတယ်။

မန်ယူအသင်းဟာ ပြီးခဲ့တဲ့နွေရာသီအပြောင်းအရွှေ့စျေးကွက်မှာ ကွန်ညာ၊ အမ်ဘူမို၊ ရှက်ရှကို၊ လမ်မန်းစ်၊ ဒီယေဂိုလီယွန် စတဲ့ကစားသမားသစ်တွေ ခေါ်ယူခဲ့သလို၊ လာမယ့် ဇန်နဝါရီမှာလည်း ထပ်မံအားဖြည့်ဖို့ စီစဉ်နေပြီး ဝီလ်ကော့စ်ရဲ့စကားက ဇန်နဝါရီစျေးကွက်မှာ ကစားသမားသစ်တွေ ထပ်ခေါ်ပေးမယ်ဆိုတဲ့ အဓိပ္ပာယ်ဖြစ်ကြောင်းလည်း ဗြိတိန်မီဒီယာတချို့က သုံးသပ်ခဲ့ပါတယ်။

မန်ယူအသင်းဟာ ၂၀၂၄ နိုဝင်ဘာမှာ အသင်းကို စတင်ကိုင်တွယ်ခဲ့တဲ့ လက်ရှိနည်းပြ အာမိုရင်မ်လက်ထက်မှာ ကစားသမားသစ်ခေါ်ယူမှုအတွက် ပေါင်သန်း(၂၅၀)နီးပါး သုံးစွဲထားပြီးဖြစ်ပေမဲ့ လိုအပ်တဲ့ခေါ်ယူမှုတွေ ထပ်မံပြုလုပ်ပေးဖို့ ရည်ရွယ်ထားတာဖြစ်ပါတယ်။

မန်ယူအသင်းဟာ လက်ရှိအချိန်မှာ ပရီးမီးယားလိဂ်သုံးပွဲဆက် အနိုင်ရလဒ်နဲ့အတူ လမ်းကြောင်းမှန်ပေါ် ပြန်ရောက်လာတာကြောင့်လည်း ဝီလ်ကော့စ်က အခုလိုပြောကြားခဲ့တာဖြစ်နိုင်ပါတယ်။

''ကျွန်တော်တို့မှာ ရှင်းလင်းပြတ်သားတဲ့ အစီအစဉ် ရှိပါတယ်။ ကျွန်တော်တို့ ဘာလုပ်ရမယ်ဆိုတာ၊ အသင်းမှာ ဘယ်နေရာတွေကို တိုးတက်အောင် လုပ်ရမယ်ဆိုတာ ကျွန်တော်တို့ သိပါတယ်။ ထိပ်ဆုံး(၄)သင်းစာရင်းဝင်ပြီး ချန်ပီယံလိဂ်ဝင်ခွင့်နေရာအတွက် စဉ်ဆက်မပြတ် စိန်ခေါ်နိုင်ဖို့၊ ချန်ပီယံလိဂ်နဲ့ ပရီးမီးယားလိဂ်ချန်ပီယံဆုတွေ ရယူနိုင်ဖို့ ရင်းနှီးမြှုပ်နှံမှုတွေ ပြုလုပ်သွားမှာပါ။ အသင်းအတွက် သင့်လျော်တဲ့ကစားသမားတွေကို ခေါ်ယူသွားမှာပါ'' လို့ ဝီလ်ကော့စ်က ပြောကြားခဲ့ပါတယ်။

မက်ဆီကို ခေါ်ယူဖို့ အခွင့်အရေးရခဲ့ပေမဲ့ ငြင်းပယ်ခဲ့ကြောင်း ဆော်ဒီအားကစားအကယ်ဒမီ အမှုဆောင်ချုပ် ဆို

ဆော်ဒီအားကစားအကယ်ဒမီရဲ့ အမှုဆောင်ချုပ်ဖြစ်သူ အက်ဘ်ဒူလာဟမ်းမက်က အာဂျင်တီးနားတိုက်စစ်မှူး မက်ဆီကို ကာလတိုခေါ်ယူဖို့ အခွင့်အရေးရခဲ့ပေမဲ့ ငြင်းပယ်ခဲ့ကြောင်း ပြောကြားခဲ့ပါတယ်။

အင်တာမိုင်ယာမီအသင်းက ဒီဇင်ဘာလအစောပိုင်းမှာ ရာသီအဆုံးသတ်မှာဖြစ်ပြီး ၂၀၂၆ ဖေဖော်ဝါရီမှ ရာသီသစ်ပြန်စမှာဖြစ်တာကြောင့် ၂၀၂၆ ကမ္ဘာ့ဖလားပြိုင်ပွဲမတိုင်ခင် ပွဲမပြတ်အောင် မက်ဆီက ဆော်ဒီလိဂ်မှာ ကာလတိုပြောင်းရွှေ့ကစားဖို့ စီစဉ်ခဲ့ခြင်းဖြစ်ကြောင်း သိရပါတယ်။

ဒီအတွက် ပြီးခဲ့တဲ့ ကလပ်ကမ္ဘာ့ဖလားပြိုင်ပွဲကာလအတွင်း မက်ဆီရဲ့ အေးဂျင့်တွေက ဆော်ဒီမှာ ပြောင်းရွှေ့ကစားဖို့ ဆက်သွယ်ကမ်းလှမ်းခဲ့ခြင်းဖြစ်ကြောင်း ဟမ်းမက်က ပြောကြားခဲ့ပါတယ်။

''ပြီးခဲ့တဲ့ ကလပ်ကမ္ဘာ့ဖလားကာလအတွင်းမှာ မက်ဆီရဲ့အဖွဲ့က ကျွန်တော့်ဆီ ဆက်သွယ်ပြီး ဆော်ဒီမှာကစားဖို့ ကမ်းလှမ်းခဲ့ပါတယ်။ ဘာကြောင့်လဲဆိုတော့ မေဂျာလိဂ်က (၄)လနီးပါး ရပ်နားထားမှာဖြစ်ပြီး မက်ဆီက ၂၀၂၆ ကမ္ဘာ့ဖလားပြိုင်ပွဲအတွက် ခြေစွမ်းကို ထိန်းထားချင်တာကြောင့်ပါ။ ဒါပေမဲ့ ကျွန်တော်တို့ရဲ့ အားကစားဝန်ကြီးက ငြင်းပယ်ခဲ့ပါတယ်။ အကြောင်းကတော့ ဆော်ဒီလိဂ်က တခြားပြိုင်ပွဲတွေအတွက် ပြင်ဆင်ဖို့ ပလက်ဖောင်းတစ်ခု မဟုတ်တာကြောင့်ပါပဲ။ ဒါ အမှန်တရားပါ'' လို့ ဟမ်းမက်က ပြောကြားခဲ့ပါတယ်။

ကမ္ဘာ့အကောင်းဆုံးကစားသမားတစ်ဦးဖြစ်တဲ့ စီရော်နယ်လ်ဒိုကို ပိုင်ဆိုင်ထားတဲ့ ဆော်ဒီလိဂ်ဟာ မက်ဆီကိုလည်း ခေါ်ယူဖို့ ကြိုးပမ်းခဲ့ဖူးပေမဲ့ ကာလတိုသာ ပိုင်ဆိုင်နိုင်မယ့် အခွင့်အရေးဖြစ်တာကြောင့် ငြင်းပယ်ခဲ့ခြင်းဖြစ်ကြောင်း သိရပါတယ်။

ပြင်ဦးလွင်၌ လျှပ်စစ်ဝန်ထမ်း ဓာတ်လိုက်ခံရ

မန္တလေးတိုင်းဒေသကြီး၊ ပြင်ဦးလွင်မြို့၊ ရပ်ကွက်ကြီး(၂)မှာ အောက်တိုဘာ ၃၁ ရက်၊ နေ့လယ်ပိုင်းက လျှပ်စစ် ဝန်ထမ်းတစ်ယောက် ဓာတ်တိုင်ပေါ်မှာ ဓာတ်လိုက်ပြီး မီးလောင်ခဲ့တယ်လို့ မြန်မာနိုင်ငံ မီးသတ်တပ်ဖွဲ့က ထုတ် ပြန်ပါတယ်။

အဲဒီလျှပ်စစ်ဝန်ထမ်းဟာ ဓာတ်တိုင်ပေါ်တက်ပြီး ဓာတ်ကြိုးတွေကို ပြုပြင်ရာမှာ ခြေထောက်တစ်ဖက် ဓာတ် လိုက်ပြီး မီးလောင်နေခဲ့တာ ဖြစ်တယ်လို့ ဆိုပါတယ်။

အခင်းဖြစ်နေရာကို ပြင်ဦးလွင်မြို့နယ်မီးသတ်စခန်း ရှာဖွေကယ်ဆယ်ရေးတပ်ဖွဲ့ဝင်တွေက ကယ်ဆယ်ရေး လုပ်ငန်းတွေ သွားရောက်ဆောင်ရွက်ခဲ့ရာ နေ့လယ် ၁၂ နာရီခွဲလောက်မှာ ဓာတ်လိုက်ခံရသူကို ကယ်ဆယ် နိုင်ခဲ့ပါတယ်။ ဓာတ်လိုက်ခံရတဲ့ လျှပ်စစ်ဝန်ထမ်းဟာ အသက်အန္တရာယ် ထိခိုက်မှုမရှိဘဲ ပြင်ဦးလွင် လူမှု ကူညီရေး အသင်းယာဉ်နဲ့ ပြင်ဦးလွင်မြို့နယ် ပြည်သူ့ဆေးရုံကို ပို့ဆောင်ပေးခဲ့တယ်လို့ သိရပါတယ်။

ပြင်ဦးလွင်၌ လျှပ်စစ်ဝန်ထမ်း ဓာတ်လိုက်ခံရ

မန္တလေးတိုင်းဒေသကြီး၊ ပြင်ဦးလွင်မြို့၊ ရပ်ကွက်ကြီး(၂)မှာ အောက်တိုဘာ ၃၁ ရက်၊ နေ့လယ်ပိုင်းက လျှပ်စစ် ဝန်ထမ်းတစ်ယောက် ဓာတ်တိုင်ပေါ်မှာ ဓာတ်လိုက်ပြီး မီးလောင်ခဲ့တယ်လို့ မြန်မာနိုင်ငံ မီးသတ်တပ်ဖွဲ့က ထုတ် ပြန်ပါတယ်။

အဲဒီလျှပ်စစ်ဝန်ထမ်းဟာ ဓာတ်တိုင်ပေါ်တက်ပြီး ဓာတ်ကြိုးတွေကို ပြုပြင်ရာမှာ ခြေထောက်တစ်ဖက် ဓာတ် လိုက်ပြီး မီးလောင်နေခဲ့တာ ဖြစ်တယ်လို့ ဆိုပါတယ်။

အခင်းဖြစ်နေရာကို ပြင်ဦးလွင်မြို့နယ်မီးသတ်စခန်း ရှာဖွေကယ်ဆယ်ရေးတပ်ဖွဲ့ဝင်တွေက ကယ်ဆယ်ရေး လုပ်ငန်းတွေ သွားရောက်ဆောင်ရွက်ခဲ့ရာ နေ့လယ် ၁၂ နာရီခွဲလောက်မှာ ဓာတ်လိုက်ခံရသူကို ကယ်ဆယ် နိုင်ခဲ့ပါတယ်။ ဓာတ်လိုက်ခံရတဲ့ လျှပ်စစ်ဝန်ထမ်းဟာ အသက်အန္တရာယ် ထိခိုက်မှုမရှိဘဲ ပြင်ဦးလွင် လူမှု ကူညီရေး အသင်းယာဉ်နဲ့ ပြင်ဦးလွင်မြို့နယ် ပြည်သူ့ဆေးရုံကို ပို့ဆောင်ပေးခဲ့တယ်လို့ သိရပါတယ်။