MySPACE

3 w - Translate

ရင်ထဲမှာ သောကလေးတွေရောက်လာပြီဆိုရင်..ဆန်းစစ်ကြည့်လိုက်ပါ..။ နှလုံးသွင်းမမှန်တာကြောင့် သောကဖြစ်ရတာများပါတယ်..။ လူတစ်ယောက်က ကိုယ့်ကိုပြောလိုက်တဲ့ စကားတစ်ခွန်းအပေါ် ကိုယ်လက်ခံလိုက်တဲ့စိတ်..ကိုယ်မနှစ်သက်တဲ့အပြုအမူတစ်ခုကို တခြားသူတစ်ယောက်က လုပ်လိုက်တဲ့အခါ..စိတ်ထဲမှာ မကျေနပ်မပျော်ရွှင်နိုင်တဲ့စိတ်ကြောင့်..သောကဖိစီးရတာဖြစ်ပါတယ်..။
တကယ်တော့ကိုယ့်ကို အနှိပ်စက်နိုင်ဆုံးက ကိုယ်နှလုံးသွင်းခံယူလိုက်တဲ့ ကိုယ့်ရဲ့အတွေးတွေပဲဖြစ်ပါတယ်…။ ကိုယ့်စိတ်ကို သောကဖြစ်စေတဲ့အတွေးတွေကို ထိန်းချုပ်နိုင်ခြင်းဟာ..သောကဖြေဆေးပါပဲ…။ ပါမောက္ခချုပ်ဆရာတော်ဘုရားကြီးရဲ့ တရားတွေထဲက အတွေးကိုထိန်းချုပ်နည်းလေးတွေ မျှဝေပေးချင်ပါတယ်..။
အတွေးတွေကို ထိန်းချုပ်ဖို့ ပထမနည်းက အာရုံပြောင်းတဲ့နည်းဖြစ်ပါတယ်..။ ကိုယ့်ကိုလူတစ်ယောက်က မလိုမုန်းထားစကားတွေနဲ့ ထိုးနှက်တိုက်ခိုက်လာတယ် ဆိုပါတော့..။ ပထမဆုံး ကိုယ်တုံ့ပြန်မိတာက မကျေနပ်တဲ့အတွေးတွေ..ခံပြင်းမုန်းတီးတဲ့အတွေးတွေ..မခံချင်စိတ်ဒေါသအတွေးတွေ ဖြစ်ပါတယ်..။ သူ့ကို ဘယ်လိုဘယ်ပုံမျိုးနဲ့ ပြန်လည်တုံ့ပြန်တိုက်ခိုက်ရမလဲဆိုတာကို အပြန်ပြန်အလှန်လှန်တွေးနေမိပါလိမ့်မယ်..။ အဲ့ဒီအတွေးတွေကို ရုတ်တရက် ရပ်တန့်ပစ်လိုက်ဖို့ဆိုတာလည်း မဖြစ်နိုင်ပါဘူး..။ ဒီအတွေးတွေကို ဆက်မတွေးမိအောင် အာရုံပြောင်းကြည့်ဖို့လိုပါတယ်..။ သူကိုယ့်ကို စော်ကားတိုက်ခိုက်လိုက်တဲ့စကားတွေကို ထပ်တလဲလဲပြန်မတွေးပါနဲ့..။ ကိုယ်ဒေါသဖြစ်နေတာ.. စိတ်ဆိုးနေတာကို သိနေဖို့လိုက်ပါ..။
ဟုတ်တယ်..သူ့ကြောင့် ငါဒေါသထွက်နေတယ်..။ ဘာကြောင့်ပဲဖြစ်ဖြစ်..ဒေါသဆိုတာ အကုသိုလ်ပဲ..ငါ အကုသိုလ်ဖြစ်နေပြီ..အဲ့ဒီတော့ ငါ အကုသိုလ်တွေဆက်မဖြစ်အောင်..ကုသိုလ်အာရုံလေးနဲ့ ပြောင်းကြည့်မယ်..လို့ တွေးလိုက်ပြီး..ကိုယ့်စိတ်ကို သက်သာအေးချမ်းစေမယ့်နေရာလေးတစ်ခုကို ရွေးလိုက်ပါ..။ ကျွန်မကတော့ ဘုရားခန်းကိုပဲ ရွေးခြယ်ပါတယ်..။ ပြီးရင် ကိုယ်ရွတ်ဆိုနေကျ..မြတ်စွာဘုရားရှင်ရဲ့ ဂုဏ်တော်တစ်မျိုးမျိုးကို အခေါက်ပေါင်းများစွာ ထပ်တလဲလဲ ရွတ်ဆိုပူဇော်နေလိုက်ပါတယ်...။ ကျွန်မရဲ့ ကိုယ်တွေ့ကတော့..ချက်ချင်းလက်ငင်းကို စိတ်ကလေး တည်ငြိမ်အေးချမ်းလာပြီး…စိတ်တိုနေတာတွေ..ဒေါသထွက်နေတာတွေ အားလုံးမဟုတ်တောင် အတော်အသင့် လျော့ပါးကင်းစင်သွားစေပါတယ်..။🍀
#လွန်းထားထား
#သောကဖြေဆေး

Credit to owner