မိုးညှင်းရောက် ကသာစစ်ရှောင်တွေ အရေးပေါ် အကူအညီတွေ လိုအပ်နေ
ကချင်ပြည်နယ် ၊ မိုးညှင်းမြို့ကို ရောက်ရှိနေတဲ့ ကသာမြို့ စစ်ဘေးရှောင် ပြည်သူ ၁၀၀၀ ကျော် အတွက် အရေးပေါ် အကူအညီတွေ လိုအပ်နေတယ်လို့ စစ်ရှောင်တွေကို ကူညီဖို့ လုပ်ကိုင်နေသူတွေ ဆီကသိရပါတယ်။
အဓိက အကူအညီ လိုအပ်နေတဲ့ စစ်ရှောင်တွေကတော့ ကသာ မိုးညှင်းမြို့နယ်မှာ အိမ်ခန်းငှား ရမ်းနိုင်ခြင်းမရှိဘဲ ဘုန်းကြီးကျောင်းတွေနဲ့ မိတ်ဆွေအိမ်တွေမှာ စုပေါင်းနေထိုင်ကြရသူတွေဖြစ်တယ်လို့ သိရပါတယ်။
အဆိုပါ စစ်ရှောင်တွေအတွက် အဝတ်အစား ၊ စောင် ၊ ခြင်ထောင် ၊ အစားအစာ ၊ ဆေးဝါး အကူ အညီတွေ လိုအပ်နေတယ်လို့ သိရပါတယ်။
" အရေးပေါ် ထွက်လာရတော့ အကူအညီတွေ လိုအပ်မှု ရှိနေတာပါ ။ အခုလည်း မိုးညှင်းမြို့ခံတွေက လှူနေကြတာတွေလည်း ရှိပါတယ်။ ချက်ပြုတ် စားသောက်ဖို့ ဟင်းသီး ဟင်းရွက်တွေ လှူကြတာ ရှိပါတယ်။ အဓိကတော့ မိုးညှင်းမှာ ဆွေမျိုးမရှိဘဲ ရှောင်လာကြ သူတွေပေါ့ ။ စစ်ဖြစ်လို့သာ ပြေးလာရတာ ဘာမှ မသယ်နိုင် မပါတော့ အကူအညီ လိုအပ်နေကြတာပါ ။ တချို့ဆို့ သက်ကြီး ရွယ်အိုတွေပါတယ်။လေဖြတ်သူ တောင်ပါတယ် ဆိုတော့ ဆေးကုသဖို့ ၊ ဆေးဝါး လိုအပ်မှု ရှိပါတယ်။ " လို့ မိုးညှင်း ဒေသခံက ပြောပါတယ်။
လက်ရှိမှာ စစ်ရှောင်တွေဟာ ပင်ရဲလှ ရွာ ဘုန်းကြီးကျောင်း မှာ လူဦးရေ ၂၀၀ ကျော် ရှိပြီး
နန့်ပုတ် ကွက်သစ် ရှိ ဓမ္မဥယျာဉ် ဘုန်းကြီးကျောင်းမှာ စစ်ဘေးရှောင် လူဦးရေ ၂၀၀ ဝန်းကျင် ၊ အောင်သပြေ ဆရာတော် ဦးဉာဏ်တော ကျောင်းမှာ စစ်ရှောင် လူဦးရေ ၁၂၀ ဝန်းကျင် ၊ထီးလင်းကျောင်းမှာ လူဦးရေ ၁၀၀ ကျော် ၊ နတ်ကြီးကုန်း ကျောင်းမှာ လူဦးရေ ၂၀၀ ကျော် ၊ သိမ်အင်း ဘုန်တော်ကြီးကျောင်းမှာ စစ်ရှောင်လူဦးရေ ၂၀၀ ကျော် အထိရှိနေတယ်လို့ ကနဦး သိရပါတယ်။
" ပိုက်ဆံရှိတဲ့သူတွေကတော့ အိမ်ငှား နေကြတာပေါ့။ မပြည့်စုံတဲ့သူနဲ့ ဘာမှ မသယ်နိုင်ခဲ့တဲ့ လူတွေကျတော့ အကူအညီလိုအပ်နေတာပါ။ အသိ မိတ်ဆွေက မရှိ နဲ့ ဘုန်းကြီး ကျောင်းမှာ ချက်ပြုတ် စားသောက်ဖို့ ကလည်း ရေရှည်ကျ မလွယ်ဘူး ။ ချက်ပြုတ်ဖို့ ဆိုရင် အိုးခွက်က လိုသေးတယ်။ ထင်းကလည်းလိုတယ် ။အဲဒီတော့ အကုန် အကူအညီ လိုအပ် နေတဲ့ အခြေအနေပါ ။ " လို့ စစ်ရှောင် ကူညီဖို့ လုပ်နေသူက ပြောပါတယ်။
ကသာမြို့မှာ ၂၀၂၅ ခုနှစ် ၊ ဒီဇင်ဘာ ၂၇ ရက်နေ့ ညပိုင်းက စပြီး တိုက်ပွဲစတင် ဖြစ်ပွား ခဲ့တာဖြစ်ပြီး အဲဒီနောက် ဒီဇင်ဘာ ၂၈ ၊ ၂၉ ၊ ၃၀ ၊ ၃၁ ရက် နဲ့ ၂၀၂၆ ခုနှစ် ဇန်နဝါရီ ၁ ၊ ၂ ရက်နေ့အထိ ဆက်တိုက် တိုက်ပွဲတွေ ဖြစ်ပွားခဲ့တာ ဖြစ်တယ် လို့သိရပါတယ်။
အဆိုပါ တိုက်ပွဲကြောင့် ကသာမြို့ခံ အများစုဟာ နေရပ်စွန့်ခွာပြီး မိုးညှင်း ၊ မြစ်ကြီးနား ၊ မော်လူး ၊ နဘား ၊မဲဇာ ၊ ရွှေကူ ၊ အင်းတော် မြို့တို့ကို စစ်ဘေးရှောင်ခဲ့ကြရပြီး ငွေကြေး ပြည့်စုံပြီး မြို့ကနေ အစောဆုံး ထွက်ခွာနိုင်ခဲ့သူကတော့ ရန်ကုန် နဲ့ မန္တလေးကို စစ်ရှောင်မှု ရှိနေတယ်လို့ သိရပါတယ်။
လက်ရှိ ကသာမှာတော့ အစိုးရတပ်နဲ့ KIA ပူးပေါင်းတပ်တွေအကြား အပစ်အခတ် ရပ်ပြီး တိုက်ပွဲ ငြိမ်နေတယ်လို့ သိရပါတယ်။
