စစ်ရပ်စဲရေးကိစ္စ အမေရိကန်နှင့်ယူကရိန်း ဘုံနားလည်မှု ရရှိ
-----------------------

ရုရှားနဲ့ အပစ်အခတ်ရပ်စဲရေး သဘောတူညီချက်အတွက် အမေရိကန်နဲ့ နားလည်မှုတစ်ခု ဆွေးနွေးရယူနိုင်ခဲ့ တယ်လို့ ယူကရိန်းက ထုတ်ပြန်ခဲ့တာကို Reuters သတင်းမှာ ဖော်ပြထားပါတယ်။
ရုရှား-ယူကရိန်းစစ်ပွဲ ရပ်စဲစေဖို့ အမေရိကန်သမ္မတ ဒေါ်နယ်လ်ထရမ့်က ပေးပို့ခဲ့တဲ့ အဆိုပြုချက်၂၈ ချက်ကို ယူကရိန်းက ပြန်လည်ပြင်ဆင်ပြီး အမေရိကန်အစိုးရဆီ တင်ပြခဲ့တာပါ။ လူမှုကွန်ရက် မီဒီယာမှာလည်း ထရမ့်က သူ့ရဲ့ မူရင်းအဆိုပြုချက်တွေက ကောင်းမွန်ပြီးသား ဆိုပေမဲ့လည်း နှစ်ဖက်စလုံးက လိုလားချက်တွေကို ပြင်ဆင် ဖြည့်စွက်ဖို့ တောင်းဆိုတာတွေ ရှိခဲ့တယ်လို့ ရေးသားထားခဲ့ပါတယ်။
ယူကရိန်းဘက်က ဖြည့်စွက်တောင်းဆိုချက်တွေကို လက်ခံရရှိပြီးတဲ့နောက် သူ့ရဲ့ အထူးကိုယ်စားလှယ် စတိဗ်ဝစ် ကော့ဖ်ကို ရုရှားသမ္မတပူတင်နဲ့ တွေ့ဆုံစေဖို့ မော်စကိုမြို့ကို စေလွှတ်သွားမယ်လို့ ထရမ့်က ပြောဆိုခဲ့သလို တခြားတစ်ဖက်မှာလည်း အမေရိကန်ရဲ့ ကြည်းတပ်ရေးရာအတွင်းဝန် ဒန်ဒရစ္စကိုးလ်ဟာ အခုသီတင်းပတ်ထဲမှာပဲ ယူကရိန်းရဲ့မြို့တော် ကိယက်ဗ်ကို သွားရောက်မယ်လို့ ပြောပါတယ်။

လူစာရင်းအပြောင်းအလဲ လုပ်မှုအပေါ် ဂွါဒီယိုလာ ကာကွယ်
-------------------------

လေဗာကူဆင်ကို ရှုံးတဲ့ချန်ပီယံလိဂ်ပွဲမှာ အသင်းပွဲထွက်စာရင်းကို ၁၀ နေရာအထိ ပြောင်းလဲခဲ့ရတဲ့အကြောင်းကို မန်စီးတီးနည်းပြ ဂွါဒီယိုလာက ရှင်းလင်းခဲ့ပါတယ်။ မန်စီးတီးအသင်းဟာ ၂၀၁၈ နောက်ပိုင်း ချန်ပီယံလိဂ် အုပ်စု အဆင့်နဲ့ ပုံစံသစ်ချန်ပီယံလိဂ်ပြိုင်ပွဲ လိဂ်အဆင့် အိမ်ကွင်းပွဲမှာ ပထမဆုံးရှုံးနိမ့်မှုလည်း ဖြစ်ခဲ့ပါတယ်။ မန်စီးတီး အိမ်ကွင်းမှာ လေဗာကူဆင်အသင်းက ဂရီမယ်ဒို၊ ပက်ထရစ်ရှစ်ခ်တို့ရဲ့ ဂိုးတွေနဲ့ အနိုင်ရသွားခဲ့တာဖြစ်ပြီး မန်စီးတီး ဟာ အခုရာသီ ချန်ပီယံလိဂ် ရပ်တည်မှုမှာ အဆင့် ၆ နေရာအထိ ဆင်းပေးလိုက်ရပါတယ်။
နည်းပြ ဂွါဒီယိုလာက လေဗာကူဆင်အသင်းနဲ့ပွဲထွက်စာရင်းမှာ နယူးကာဆယ်နဲ့ပွဲက ပွဲထွက်စာရင်းကို ၁၀ နေရာ လောက်အထိ အပြောင်းအလဲ ပြုလုပ်ထားခဲ့တာဖြစ်ပြီး အခုပွဲရှုံးနိမ့်မှုက လူစာရင်းအပြောင်းအလဲကြောင့် ဖြစ် တယ်လို့ ဝေဖန်နေ ကြတာဖြစ်ပါတယ်။ ကစားသမားတွေကို ပွဲကစားခွင့်ရစေချင်တဲ့ အကြောင်းပြချက်နဲ့ အခုလို မျိုး ဆုံးဖြတ်ခဲ့တာ ဖြစ်ပြီး ၁၀ နေရာလောက်အထိ အပြောင်းအလဲက များလွန်းသလို သူ့ရဲ့နည်းပြဘဝ ပထမဆုံး အကြိမ် အခုလိုမျိုး ဆုံးဖြတ်ခဲ့တာဖြစ်တယ်လို့ ဂွါဒီယိုလာက ရှင်းလင်းသွားခဲ့ပါတယ်။
မန်စီးတီးအသင်း ဟာ ချန်ပီယံလိဂ် လိဂ်အဆင့် အုပ်စုလက်ကျန် ၃ ပွဲအဖြစ် ရီးရဲလ်၊ ဘိုဒို၊ ဂါလာတာစာရေး အသင်းတွေနဲ့ ကစားရဖို့ ကျန်နေပြီး လက်ကျန်ပွဲတွေ အတွက် သေချာအာရုံစိုက်ပြင်ဆင်ရတော့မှာဖြစ်တယ်လို့ ဂွါဒီယိုလာက ပြောပါတယ်။

ရွှေဘိုပေါ်ဆန်း (ဟောင်း) တစ်အိတ် ကျပ် ၁၈၀၀၀၀ ဖြင့် အိမ်အရောက်ပို့‌ ရောင်းချပေးမည်
------------------------------------------------------------------------------

မြန်မာနိုင်ငံဆန်စပါးအသင်းချုပ်နဲ့ မြန်မာနိုင်ငံဆန်စပါးကုန်သည်များအသင်းတို့ ပူးပေါင်းပြီး အိမ်အ ရောက်စနစ်နဲ့ ပို့ဆောင်ရောင်းချပေးမဲ့ ပေါ်ဆန်းဆန်အပါအဝင် ဆန်အမျိုးအစား ၇ မျိုးအတွက် ဈေးနှုန်းတွေကို မြန်မာနိုင်ငံဆန်စပါးအသင်းချုပ်က ထုတ်ပြန်လိုက်ပါတယ်။
ဈေးနှုန်းသတ်မှတ်ချက်အရ ရွှေဘိုပေါ်ဆန်း (ဟောင်း) ၁၀၈ပေါင်/၂၄ ပြည်တစ်အိတ် ကျပ် ၁၈၀၀၀၀ ၊ ဧရာဝတီပေါ်ဆန်း (ကြားပျံ) ဟောင်း တစ်အိတ် ကျပ် ၁၅၀၀၀၀ ၊ ဧရာဝတီပေါ်ဆန်းကြားပျံအသစ် တစ်အိတ် ကျပ် ၁၃၀၀၀၀ ၊ ဧရာဝတီပေါ်ဆန်း(နယ်စုံ)ဟောင်းတစ်အိတ် ကျပ် ၁၂၅၀၀၀ ၊ ဧရာဝတီပေါ်ဆန်း(နယ်စုံ)အသစ် တစ်အိတ် ကျပ် ၁၁၅၀၀၀၊ ရက်၉၀ဆန် တစ်အိတ် ကျပ် ၇၅၀၀၀ ကျပ်နဲ့ ဧည့်မထ (၁၅ မှတ်) ဆန်တစ်အိတ် ကျပ် ၅၀၀၀၀နဲ့ ရောင်းချ‌ပေးမှာဖြစ်တယ်လို့ သိရပါတယ်။
စားသုံးသူတွေအနေနဲ့ မှာယူလိုတဲ့ ဆန်အမျိုးအစားနဲ့ နေရပ်လိပ်စာ ၊ ဆက်သွယ်ရမဲ့ဖုန်းနံပါတ်တွေကို မြန်မာနိုင်ငံဆန်စပါးအသင်းချုပ်ဖုန်း ၀၉၄၀၀၀၆၇၂၄၀၊ ၀၉၄၀၀၀၆၇၂၅၀ ၊ ၀၉၄၀၀၀၆၇၂၆၀တို့ကို SMS ဒါမှမဟုတ် Viber တို့ကနေ မှာယူရမှာဖြစ်ပါတယ်။
အဲဒီဖုန်းနံပါတ်တွေနေ မြန်မာနိုင်ငံဆန်စပါးအသင်းချုပ်ကို ငွေကြိုတင်ပေးသွင်းရမဲ့ KBZ Pay နံပါတ်ကို စားသုံးသူဆီ ပြန်ကြားပေးမှာဖြစ်ပြီး ငွေပေးသွင်းပြီးတဲ့နေ့ကစပြီး ၃ ရက်အတွင်း ဆန်တွေကို Delivery အခမဲ့နဲ့ အရောက်ပို့ဆောင်ပေးမှာဖြစ်ပါတယ်။
ဒါပေမဲ့အထပ်မြင့်ကိုပို့ရရင်တော့ ထိုက်သင့်တဲ့ဝန်ဆောင်ခ ထပ်မံပေးရမယ်လို့လည်း ဆိုပါတယ်။
ရန်ကုန်တိုင်းဒေသကြီးအတွင်း ပေါ်ဆန်းဆန်ဈေးနှုန်းတည်ငြိမ်မှန်ကန်စေဖို့အတွက် နိုဝင်ဘာ ၂၆ရက်က စပြီး ၁၀၈ပေါင် ၂၄ ပြည်အိတ်အကြီးတွေကို အိမ်အရောက်ပို့စနစ်နဲ့ရောင်းချမှာဖြစ်ပြီး ဆန်အိတ်အသေးတွေကို ရပ်ကွက်တွေ ဈေးတွေကို လှည့်လည်ရောင်းချတာကို မြန်မာနိုင်ငံဆန်စပါးအသင်းချုပ်နဲ့ မြန်မာနိုင်ငံဆန်စပါးကုန်သည်များအသင်းတို့ ပူးပေါင်းဆောင်ရွက်သွားမှာဖြစ်ပါတယ်။

ဩစတြေးလျအိုးပင်း အကြိုပြိုင်ပွဲ၌ ကာဂျီယော့စ်ဝင်ပြိုင်မည်
--------------------------

ဩစတြေးလျတင်းနစ်သမား နစ် ကာဂျီယော့စ်ဟာ လာမယ့်နှစ် ဩစတြေးလျအိုးပင်းမှာ ဝင်ပြိုင်ဖို့အတွက် ပြင်ဆင်မှုအဖြစ် ပြိုင်ပွဲအကြိုကျင်းပမယ့် ကူယောင်း ကလပ်စစ် တင်းနစ်ပြိုင်ပွဲကိုဝင်ပြိုင်မှာ ဖြစ်တယ်လို့ သိရပါတယ်။ အသက် ၃၀ အရွယ် ကာဂျီယော့စ်ဟာ အခုနောက်ပိုင်းနှစ်တွေမှာ ဒဏ်ရာတွေရဲ့ နှိပ်စက်မှုဒဏ်ကို ခံစားခဲ့ရပြီး ၂၀၂၅ ခုနှစ်အတွင်း တစ်ဦးချင်းပွဲစဉ် ၅ ပွဲသာ ကစားထားနိုင်ခဲ့တာဖြစ်ပါတယ်။
လက်ရှိ ကမ္ဘာ့အဆင့် ၆၆၆ မှာရပ်တည်နေတဲ့ ကာဂျီယော့စ်အနေနဲ့ ဩစတြေးလျအိုးပင်းနဲ့ ဂရင်းစလမ်ပြိုင် ပွဲတွေမှာ ဝင်ခွင့်ရဖို့အတွက် အေတီပီတိုးပွဲစဉ်တွေမှာ ရလဒ်ကောင်းရယူနိုင်ဖို့ကို လိုအပ်နေတာဖြစ်ပါတယ်။ ဘရစ္စဘိန်းနိုင်ငံတကာပြိုင်ပွဲ ချန်ပီယံဟောင်းဖြစ်သလို ဩစတြေးလျအိုးပင်းကျင်းပရာ မဲလ်ဘုန်းပါ့ခ်မှာလည်း နာမည်ကျော်ကြားခဲ့ဖူးတဲ့ ကာဂျီယော့စ်ကို လာမယ့်နှစ် ဩစတြေးလျအိုးပင်းပြိုင်ပွဲမှာ အလိုအလျောက်ဝင်ခွင့် ပေးမယ်လို့လည်း သတင်းတွေ နေပါတယ်။
ကာဂျီယော့စ်ဟာ ဒီဇင်ဘာ ၂၈ ရက်နေ့မှာ ကျင်းပမယ့် တင်းနစ်ပွဲတစ်ခုကိုလည်း ဝင်ရောက်ယှဉ်ပြိုင်ဖို့ စီစဉ် ထားတယ်လို့ သိရပါတယ်။ ၂၀၂၆ နှစ်ဆန်းပိုင်းမှာ ကျင်းပမယ့် ကူယောင်းကလပ်စစ်ပြိုင်ပွဲကို အီတလီ နာမည် ကြီးတင်းနစ်သမားတွေဖြစ်တဲ့ ကိုဘိုလီ၊ဘာရက်တီနီနဲ့ ကမ္ဘာ့အဆင့် ၈ မူဆက်တီတို့လည်း ပါဝင်ယှဉ်ပြိုင်ဖို့ စာရင်း ပေးထားပါတယ်။

ပြည်ပသို့ ရော်ဘာတန်ချိန် ၁ သိန်းခွဲနီးပါး တင်ပို့ထား
--------------------------

အခု ၂၀၂၅ - ၂၀၂၆ ဘဏ္ဍာနှစ် ဧပြီလကနေ နိုဝင်ဘာလအထိ ပြည်ပကို ရော်ဘာတန်ချိန် ၁ သိန်းခွဲနီးပါး တင်ပို့ နိုင်ခဲ့တယ်လို့ မြန်မာနိုင်ငံ ရော်ဘာစိုက်ပျိုးထုတ်လုပ်သူများအသင်းကနေ သိရပါတယ်။ အခုဘဏ္ဍာနှစ်မှာ ရော်ဘာတန်ချိန် ၃ သိန်းခွဲလောက် တင်ပို့နိုင်ဖို့ လျာထားပြီး ပြီးခဲ့တဲ့ဘဏ္ဍာနှစ်ကတော့ ရော်ဘာတန်ချိန် ၃ သိန်းဝန်းကျင် တင်ပို့နိုင်ခဲ့ကာ ပို့ကုန်ဝင်ငွေ အမေရိကန်ဒေါ်လာ သန်း ၅၀၀ နီးပါး ရရှိခဲ့ပါတယ်။
ရာသီဥတုအခြေအနေနဲ့ ရော်ဘာအစေးလှီးလုပ်သားရှားပါးတာနဲ့ ရင်ဆိုင်နေရဆဲဖြစ်လို့ ရော်ဘာအထွက်နှုန်း မကောင်းနိုင်သေးဘူးလို့ မြန်မာနိုင်ငံရော်ဘာ စိုက်ပျိုးထုတ်လုပ်သူများအသင်း အထွေထွေ အတွင်းရေးမှူး ဦးခိုင်မြင့်က ပြောပါတယ်။ လက်ရှိမှာ ကမ္ဘာ့ရော်ဘာပေါက်ဈေးကျဆင်းနေသလို မြန်မာ့ ရော်ဘာပေါက်ဈေး လည်း ဈေးကောင်းရသင့်သလောက် မရဖြစ်နေတယ်လို့ ဆိုပါတယ်။
ပြည်တွင်းမှာ ရော်ဘာသုံးစွဲမှုက နှစ်စဉ် တန်ချိန် ၂ သောင်းကျော်ရှိပြီး ပြည်ပကို တန်ချိန် ၃ သိန်းဝန်းကျင် တင်ပို့ နေပါတယ်။ ပြည်ပတင်ပို့ရာမှာ တရုတ်ကို ၇၅ ရာခိုင်နှုန်းတင်ပို့နေပြီး မလေးရှား၊ အင်ဒိုနီးရှား၊ ဗီယက်နမ်၊ အိန္ဒိယ နဲ့ ဂျပန်နိုင်ငံတို့ကိုလည်း တင်ပို့နေတယ်လို့ သိရပါတယ်။ ၂၀၁၈- ၂၀၁၉ ဘဏ္ဍာရေးနှစ်ကနေ ၂၀၂၂ - ၂၀၂၃ ဘဏ္ဍာရေးနှစ်အတွင်းက ရော်ဘာတင်ပို့မှုကနေ တစ်နှစ်ကို ပျမ်းမျှ အမေရိကန် ဒေါ်လာ သန်း ၂၅၀ ကနေ သန်း ၄၅၀ အကြား ရရှိခဲ့တယ်လို့ သိရပါတယ်။

လားရှိုးကို အစိုးရက ပြန်ထိန်းချုပ်ပြီး​နောက် ပထမဆုံးအကြိမ် အမျိုးသမီးတဦး သေနတ်ပစ်ခတ်ခံရပြီး ဒဏ်ရာရ

ရှမ်းပြည်မြောက်ပိုင်းလားရှိုးမြို့ သိန္နီလမ်းပေါ်မှာ နိုဝင်ဘာလ ၂၅ ရက်နေ့ ညနေပိုင်းအချိန်က အမျိုးသမီးတဦး သေနတ်နဲ့ ပစ်ခတ်ခံရပြီး ဒဏ်ရာရသွား တယ်လို့ လားရှိုးမြို့ခံတွေဆီကနေ သိရပါတယ်။
ဆိုင်ကယ်မောင်းနေတဲ့ အမျိုးသမီးကို သေနတ်နဲ့ သုံးချက် ပစ်ခတ်သွား တာဖြစ်ပြီး လက်မှာ ထိခိုက်သွားတယ်လို့ လားရှိုးမြို့ခံတယောက်က ပြောပါတယ်။
“ငါးနာရီလောက်က ဖြစ်တာ၊ ညနေပိုင်း မိုးတအားမချုပ်ခင် ဖြစ်တာ။ ငွေကြေးကိစ္စနဲ့ ဆက်စပ်တယ်လို့ ပြောတာပဲ။ သူ့ကိုပဲ ရွေးပစ်သွားတာ”
သေနတ်ပစ်ခတ်ခံရတဲ့ အမျိုးသမီးကို ပရဟိတအဖွဲ့အကူအညီနဲ့ လားရှိုးဆေးရုံကို ပို့ပေးခဲ့တယ်လို့ အခင်းဖြစ်နေရာအနီးမှာရှိခဲ့တဲ့ လားရှိုးမြို့ခံ တွေဆီကနေ သိရပါတယ်။
“ရဲတွေ ရောက်လာပြီး စစ်ဆေးတာတော့ တွေ့ရတယ်။ အန်တီကြီးက အသက် ၅၀ ကျော်လောက် ရှိပြီ” လို့ လားရှိုးမြို့ခံတယောက်က ပြောပါ တယ်။
အခုလ ၂၄ ရက်နေ့ ညပိုင်းကလည်း လားရှိုးမြို့ ရပ်ကွက် (၁) ထင်းရှုးတောင် မှာ သေနတ်ပစ်ခတ်သံတွေ ကြားရလို့ ထိတ်လန့်ခဲ့ရတယ်လို့ မြို့ခံတွေက ပြောပါတယ်။
လားရှိုးမြို့ကို အစိုးရက ပြန်အုပ်ချုပ်ပြီးနောက်ပိုင်း မြို့တွင်းမှာ ပစ်ခတ်မှုတွေ ဖြစ်တာ ပထမဆုံးဖြစ်တယ်လို့ ဆိုပါတယ်။
ပစ်ခတ်မှုတွေ ဖြစ်ခဲ့ပေမယ့် လားရှိုးမြို့ပေါ်မှာတော့ ပုံမှန်အတိုင်း ရောင်းဝယ်၊ သွားလာမှုတွေ ရှိနေတယ်လို့ မြို့ခံတွေဆီက သိရပါတယ်။

ပုသိမ် - မုံရွာ ကားလမ်းပေါ်မှာ ကုန်တင်ကားသမား ၄ ယောက်ကို ကားတွေနဲ့အတူ လက်နက်ကိုင်အဖွဲ့ကဖမ်းဆီး

ဧရာဝတီတိုင်း ၊ ပုသိမ် - မုံရွာ ကားလမ်းပေါ်မှာကုန်တင် ကားသမား ၄ ယောက်ကို ဒေသတွင်းလက်နက်ကိုင်အဖွဲ့ တခုက ဖမ်းဆီးထားတယ်လို့ အဖမ်းခံရသူတွေနဲ့ နီးစပ်သူတွေဆီက သိရပါတယ်။
အဲ့ဒီကုန်တင်ကားသမား ၄ ယောက်ကို ပုသိမ် - မုံရွာ ကားလမ်းပေါ်လေးမျက်နှာမြို့နယ်၊ စက်စက်ယိုကျေးရွာ အနီးမှာ မနေ့ နိုဝင်ဘာလ ၂၅ ရက်ညနေပိုင်းက အသင့်စောင့်နေတဲ့ လက်နက်ကိုင်အဖွဲ့တခုက ဖမ်းဆီးသွားတာလို့ သိရပါတယ်။
''ဘာလို့ ဖမ်းတာလည်းတော့ မသိဘူး ဖမ်းဆီးခေါ်ခံရတာ မှန်တယ်။ အဖမ်းခံရတဲ့ကားတွေကရန်ကုန်ကနေလာတဲ့ ကုန်ကားတွေလို့သိရပါတယ်။ ဘယ်ကိုဖမ်းခေါ်သွားတယ် ဆိုတာမသိသေးဘူး။ လက်နက်ကိုင်အဖွဲ့တခုကဖမ်း တာ။''လို့ အဖမ်းခံရတဲ့သူတွေနဲ့နီးစပ်သူ တယောက်ကပြောပါတယ်။
အဲ့ဒီ ဖမ်းဆီးခေါ်ဆောင်ခံရတဲ့ ကားသမားတွေဟာ လေးမျက်နှာနဲ့ ပုသိမ်-မုံရွာလမ်းပေါ်က ဈေးဆိုင်တွေက မှာယူထားတဲ့အိမ်သုံးစပ္စည်းတွေဆန်တွေ၊ စားသုံးဆီတွေ၊ စက်သုံးဆီတွေနဲ့အဝတ်အထည်တွေ တင်မောင်းလာတဲ့ ကားသမား တွေဖြစ်တယ်လို့သိရပါတယ်။
''အဲ့ဒီ ဖမ်းဆီးခံရတဲ့သူတွေက ကုန်တင်ကား ၂ စီးကို မောင်းတဲ့ယာဉ်မောင်း အမျိုးသား ၄ ယောက်ကိုပါ။ ကားတွေပါ သိမ်းယူထားတယ်လို့ သိရတယ်။ မိသားစုက မနေ့ကနေ့လယ်ပိုင်းအထိ ဖုန်းအဆက်အသွယ်ရသေးတယ်။ ညပိုင်းကျတော့ဖုန်းမရတော့။''လို့ ဖြစ်စဉ်ကိုသိရှိတဲ့သူတယောက်က ပြောပါတယ်။
အခုလို ကုန်တင်ကားသမားတွေ ဖမ်းဆီးခံရတဲ့ လေးမျက်နှာအပိုင်ထဲက စက်စက်ယိုကျေးရွာအပါအဝင် ဒေသအချို့ မှာ အစိုးရတပ်နဲ့ ဒေသတွင်း လက်နက်ကိုင်အဖွဲ့တွေရက် ဆက်တိုက်ပွဲဖြစ်ပွားမှုတွေရှိတယ်လို့ ဒေသခံတွေဆီက သိရပါတယ်။
ဖမ်းဆီးခေါ်ခံရတဲ့ဒီဖြစ်စဉ်တွေနဲ့ ပတ်သက်လို့ ဒေသတွင်း လက်နက်ကိုင် အဖွဲ့အသီးသီးဘက်ကတော့ မှတ်ချက် တစုံတရာပေး သတင်းထုတ်ပြန်တာမရှိသေးတာတွေ့ ရပါတယ်။
အဲ့ဒီ လက်နက်ကိုင်အဖွဲ့တွေဖမ်းဆီးတဲ့ကုန်စည် ပစ္စည်းတွေအများစုဟာ အရပ်သားတွေ ပိုင်ဆိုင်တဲ့ကုန် ပစ္စည်းတွေဖြစ်သလို ကုန်ကားသမားတွေဟာလည်း ပုံမှန်ကုန်စည် သယ်ယူရေးလုပ်ငန်းလုပ်ဆောင်နေသူတွေဖြစ်တယ် လို့ ဒေသခံတွေဆီကသိရပါတယ်။
ပြီးခဲ့တဲ့ အောက်တိုဘာလ ၁၉ ရက်ကလည်း အသက် ၇၀ ကျော်အရွယ် ဧရာဝတီတိုင်း၊ ကြံခင်းမြို့နယ်ထဲက ကျေးရွာ အုပ်ချုပ်ရေးမှူးဦးတင်လှဟာ မန္တလေးတိုင်းကို ခရီးသွားစဉ် ကျောက်ပန်းတောင်းမြို့နယ် ဆိတ္တိန်းကျေးရွာအနီးအရောက်မှာ လက်နက်ကိုင်အဖွဲ့တခုကဖမ်းဆီးသွားသေးတယ်လို့ သိရပါတယ်။
ဒါ့အပြင် ပြီးခဲ့တဲ့ အောက်တိုဘာ ၃ ရက်ကလည်း မကွေးတိုင်း ချောက်မြို့နယ်၊ သွေးနက်ကျေးရွာမှာ နေထိုင်တဲ့ အသက် (၃၅)နှစ်အရွယ် ထွေအုပ်စာရေး ကိုနေမျိုးထွဋ်ဆို သူကို အမည်မသိသေနတ်သမားတွေက နေအိမ်အထိ လာဖမ်း ခေါ်ပြီးနောက် ချောက်မြို့နယ်၊သွေးနက်ကျေး ရွာနဲ့ ကြီးနီ ကျေးရွာလမ်းဆုံမှာပစ်သတ်ခဲ့တယ်လို့ သိရပါတယ်။

ယူကရိန်းစစ်ပွဲ အဆုံးသတ်ရေး ကွဲလွဲမှု အနည်းငယ်သာရှိတော့တယ်လို့ ထရန့်ပြော

ရုရှားက ယူကရိန်းကို ကျူးကျော်မှုကို အဆုံးသတ်ဖို့ ရည်ရွယ်တဲ့ ရုရှားနဲ့ ဆွေးနွေးပွဲတွေမှာ သဘောထားကွဲလွဲမှု အနည်းငယ်သာ ကျန်ရှိတော့တယ်လို့ အမေရိကန်သမ္မတ ဒေါ်နယ်ထရန့်က ပြောပါတယ်။
ငြိမ်းချမ်းရေးအစီအစဉ်ကို အပြီးသတ်နိုင်ဖို့ အတွက် ထရန့်ရဲ့ အထူးသံတမန် စတိဗ်ဝှစ်အော့ဖ်ကို ရုရှားမှာ ရသမ္မတ ဗလာဒီမာပူတင်နဲ့ တွေ့ဆုံဆွေးနွေးဖို့ ညွှန်ကြားထားတယ်လို့ သမ္မတထရန့်ကဆိုပါတယ်။ ဝှစ်အော့ဖ်ဟာ လာမယ့်အပတ်မှာ ရုရှားသွားဖွယ်ရှိတယ်လို့ သူကဆိုပါတယ်။
ဒါပေမယ့် ရုရှားနိုင်ငံခြားရေးဝန်ကြီး ဆာဂေး လပ်ဗ်ရော့ကတော့ အမေရိကန်ရဲ့ အစီအစဉ်ဟာ ရုရှားရဲ့ တောင်းဆိုချက်တွေကို မထင်ဟပ်တဲ့ပုံစံမျိုးတွေနဲ့ ပြင်ဆင်လာမယ်ဆိုရင် အခြေခံအားဖြင့်ကို ကွဲလွဲနေလိမ့်နေမယ်လို့ သတိပေးပါတယ်။
အမေရိကန်ပြည်ထောင်စုသည် ယူကရိန်းအရှေ့ပိုင်း ဒွန်နက်စ်လို ဒေသတွေ ရုရှားပိုင်နက်အဖြစ် အသိအမှတ်ပြုတဲ့ ငြိမ်းချမ်းရေးအစီအစဉ်ကို ကနဦးမှာ တင်ပြခဲ့‌ပြီး ယူကရိန်းအနေနဲ့ သိသာထင်ရှားတဲ့ လိုက်လျောမှုများ ပြုလုပ်ဖို့ တိုက်တွန်းထားပါတယ်။
ဒါပေမယ့်လည်း အဲဒီငြိမ်းချမ်းရေး အစီအစဉ်အပေါ် ယူကရိန်းနဲ့ ဥရောပနိုင်ငံတွေ အမေရိကန်ရဲ့ အစီအစဉ်ကို ပြင်ဆင်ဖို့ တောင်းဆိုခဲ့တယ်လို့ ယုံကြည်ရပါတယ်။ ဂျီနီဗာမှာ အမေရိကန်နဲ့ ဆွေးနွေးခဲ့ပြီး အချက် ၂၈ ချက်ပါ အဆိုပြုချက်ကို ပြန်လည်ပြင်ဆင်ခဲ့တယ်လို့ ယူကရိန်းသမ္မတ ဇီလန်စကီးက ပြောပါတယ်။
ယူကရိန်းရဲ့ ဥရောပ မဟာမိတ်တွေဟာ ရုရှားရဲ့ စစ်ရည်မှန်းချက်တွေအတွက် ဦးစားပေးအချက်တွေကို ပယ်ချပြီးနောက် အစီအစဉ်ကို ပြင်ဆင်ခဲ့ပုံရတယ်လို့ စောင့်ကြည့်လေ့လာသူတွေက သုံးသပ်ထားပါတယ်။

ပုသိမ် နည်းပညာအထက်တန်း ကျောင်းသားဟောင်း သေဆုံးမှုမှ ကျူးလွန်သူတွေ လွတ်မြောက်နေ

ဧရာဝတီတိုင်း၊ ပုသိမ်မြို့ရှိ အစိုးရ နည်းပညာ အထက်တန်းကျောင်းမှာ အုပ်စုဖွဲ့ ရိုက်နှက်ခံရလို့ သေဆုံးခဲ့ရတဲ့ ကျောင်းသားဟောင်းအမှုမှ ရိုက်နှက်မှု ကျူးလွန်သူတွေဟာ လက်ရှိမှာ တိမ်းရှောင် လွတ်မြောက်နေတယ်လို့ ဒီဖြစ်စဉ်ကို သိရှိသူတယောက်က ပြောပါတယ်။
အဲဒီဖြစ်စဉ်ဟာ ပြီးခဲ့တဲ့ နိုဝင်ဘာ ၁၉ ရက်နေ့က ဖြစ်ပွားခဲ့တာလို့ သိရပြီး သေဆုံးသူဟာ အစိုးရ နည်းပညာ အထက်တန်းကျောင်း၊ စက်ပြင်ဌာနက ကျောင်းသားဟောင်း ကိုခန့်ကျော်သူထွန်းဖြစ်ကာ ရိုက်နှက်မှု ကျူးလွန်သူတွေကတော့ အဲဒီကျောင်းက တတိယနှစ်ကျောင်းသား မင်းပြည့်စုံအပါအဝင် ကျောင်းသား သုံးယောက် ဖြစ်တယ်လို့ သိရပါတယ်။
အုပ်စုဖွဲ့ ရိုက်နှက်ခံရမှုကြောင့် ကိုခန့်ကျော်သူထွန်းဟာ ပြင်းထန် ဒဏ်ရာတွေ ရရှိခဲ့တဲ့အတွက် ပုသိမ်ဆေးရုံကို ကနဦး ပို့ဆောင်ခဲ့ပေမယ့် ဒဏ်ရာအခြေအနေ စိုးရိမ်ရတာကြောင့် နိုဝင်ဘာ ၂၀ ရက်နေ့မှာ ရန်ကုန် ပြည်သူ့ဆေးရုံကြီးကို ထပ်မံ ပို့ဆောင်ကာ ဆက်လက် ဆေးကုသမှု ခံယူခဲ့ရတယ်လို့ ဒီဖြစ်စဉ်ကို သိရှိသူက ပြောပါတယ်။
“ကလေးက လုံးဝကို သတိမရတော့ဘူး။ စတွေ့ပါပြီ ဆိုကတည်းက သတိမေ့နေတာ ခြောက်ရက်ကြာတယ်။ အကြောတွေလည်း ဆွဲတယ်၊ ခေါင်းဆိုလည်း ငြိမ်ငြိမ် မနေတော့ဘူး။ အဖျားတွေတက်တယ်၊ အပူတွေကြီးတယ်၊ ခြေထောက်တွေ အေးလာတယ်၊ ပြောရရင် အကုန်ကိုဆိုးတယ်။ အဲဒါ ၂၄ နာရီလုံးလုံး ဖြစ်နေတာ။ အောက်ဆီဂျင်တွေဆိုလည်း ပါးစပ် တပိုက်၊ နှာခေါင်း တပိုက် တပ်ထားခဲ့ရတာ” လို့ သူက ပြောပါတယ်။
ရိုက်နှက်ခံရမှုကြောင့် ကိုခန့်ကျော်သူထွန်းဟာ ဦးနှောက်သွေးယိုမှု၊ နှာခေါင်းရိုးကျိုး၊ လည်ပင်းရိုးကျိုး စတဲ့ ပြင်းထန်ဒဏ်ရာတွေ ရရှိခဲ့တဲ့အတွက် အရေးပေါ် လူနာအဖြစ် ဆေးကုသမှု ခံယူခဲ့ရတာ ဖြစ်တယ်လို့ သိရပါတယ်။
“ရန်ကုန် ရောက်ရောက်ချင်းမှာတောင် ဆရာဝန်ကြီးက တရက်လောက်ပဲ ခံမယ်၊ နေ့လား၊ ညလားမသိလို့ ပြောပေမယ့် သူက ခြောက်ရက်အထိ ကြာလာတော့ ကိုမာသဘောမျိုးများ ဖြစ်သွားမလား ဆိုပြီး ဆရာဝန်ကြီးက ထပ်ပြောလာတယ်။ ဘာပဲဖြစ်ဖြစ် ‌အသက်ဘေးက လွတ်တယ်ရင်တော့ မျှော်လင့်ချက်လေးတော့ ရှိနိုင်မယ်လို့ ထင်လိုက်သေးတယ်။ ဒါပေမယ့် အဲဒီ ခြောက်ရက်မြောက်နေ့မှာပဲ သူဆုံးသွားတယ်” လို့ သူက ပြောပါတယ်။
ဒါကြောင့် ကိုယ်ထိလက်ရောက် ကျူးလွန်ခဲ့သူ တတိယနှစ် ကျောင်းသား မင်းပြည့်စုံကို အခင်းဖြစ်ပွားပြီး နောက်တရက်ဖြစ်တဲ့ နိုဝင်ဘာ ၂၀ ရက်နေ့မှာ ပုသိမ်မြို့မရဲစခန်းက ဖမ်းဆီးခဲ့သလို ကျောင်းဘက်ကလည်း ကျောင်း နှစ်နှစ်နားခိုင်းကာ အပြစ်ပေး အရေးယူထားတယ်လို့ သိရပါတယ်။
ဒီဖြစ်စဉ်နဲ့ ပတ်သက်လို့ မင်းပြည့်စုံက ရိုက်နှက်မှုကို ၎င်းတယောက်တည်း ပြုလုပ်ခဲ့တာ ဖြစ်တယ်လို့ ဝန်ခံခဲ့တဲ့အတွက် အခင်း ဖြစ်ပွားရာမှာ ပါဝင်တဲ့ နောက်ထပ် နှစ်ယောက်ကိုတော့ ပုသိမ်မြို့မရဲစခန်းက အာမခံနဲ့ ပြန်လွှတ်ပေးခဲ့တယ်လို့ သိရပါတယ်။
“အမှုဖွင့်တယ်။ အဲဒီမှာ ရိုက်နှက်တဲ့ကောင်လေးက တယောက်ပဲ ဝန်ခံတယ်။ ဒါပေမယ့်လည်းလေ၊ ခံရတဲ့ကလေး ပုံစံကြည့်ရသလောက်က တယောက်တည်းလုပ်တာ ဘယ်လိုမှ မဖြစ်နိုင်ဘူး။ ဝေဒနာလည်း တော်တော် ဆိုးဆိုးရွားရွား ခံစားခဲ့ရတာ။ တကိုယ်လုံးလည်း အရှိုးရာတွေ၊ အညိုအမည်းတွေ စွဲနေတာ။ သူခံစားရတာ အများကြီးဆိုတော့ တယောက်တည်း လုပ်တာတော့ မဖြစ်နိုင်ဘူးဆိုတာ လူကြီးတွေက သိ‌တယ်” လို့ ဒီဖြစ်စဉ်ကို သိရှိသူက ပြောပါတယ်။
ဒါပေမယ့်လည်း ရိုက်နှက်မှု ကျူးလွန်ကြောင်း ဝန်ခံထားတဲ့ မင်းပြည့်စုံကို လက်ရှိမှာ ပုသိမ်မြို့မ ရဲစခန်းက အာမခံပေးပြီး အချုပ်ကနေ ပြန်လည် လွှတ်ပေးလိုက်တာကြောင့် လွတ်မြောက်နေပြီး ပြန်လည် ဖမ်းဆီးလို့ ရ၊ မရ မသိရသေးဘူးလို့ သူက ပြောပါတယ်။
“အခုထိလေ အဲဒီကလေးကို ပြန်ဖမ်းလို့ မိလား၊ မမိလား ဆိုတာကို အဲဒီဘက်ကလူတွေက ပြည့်ပြည့်စုံစုံကို မပြောနိုင်သေးဘူး။ ဒီဘက်မှာကလည်း ကာယကံရှင်တွေက ဆေးရုံမှာတုန်းကလည်း ကလေးအသက်လုနေရတာနဲ့၊ ဆုံးပြန်တော့လည်း နာရေးကိစ္စ စီစဉ်နေရတာနဲ့ အမှုကို သေသေချာချာ မလုပ်နိုင်သေးဘူး ဖြစ်နေတယ်” လို့ သူက ပြောပါတယ်။
ဒါကြောင့် ရိုက်နှက်မှု ကျူးလွန်သူဟာ လတ်တလော ကာလမှာ အာမခံ ဘယ်လိုရရှိသွားသလဲ ဆိုတာကို သေဆုံးသူရဲ့ ကာယကံရှင် မိသားစုဝင်တွေက စုံစမ်းနိုင်ခြင်း မရှိသေးဘူး ဖြစ်နေတယ်လို့ ဆိုပါတယ်။
“စခန်းမှူးကလည်း ပြီးခဲ့တဲ့ သုံးရက်က ဆေးရုံက ကလေးအခြေအနေကို ဖုန်းဆက်မေးတယ်။ မကောင်းသေးဘူးပဲ ဖြေနေရတယ်။ တကယ်ကလည်း ကောင်းမှ မကောင်းသေးတာကိုး။ အမှန်တကယ်ကတော့လေ သူတို့ အာမခံပေးချင်လို့ ဆက်တယ်လို့ ထင်တာပဲ။ ဒီဘက်က ဆုံးပြီလည်းဆိုရော ကျူးလွန်သူကို သူတို့
နိုဝင်ဘာ ၂၅ ရက်နေ့၊ မနက် ၁၀ နာရီကတည်းက လပွတ္တာကနေ ပြန်သွားခေါ်နေတယ်လို့ ပြောတယ်။ အခုထိတော့ ပြန်မရောက်သေးဘူး။ ဖုန်းဆက်တော့လည်း ဘာမှ အကျိုးအကြောင်း မသိရဘူး” လို့ သူက ပြောပါတယ်။
ကိုခန့်ကျော်သူထွန်းဟာ အခင်း ဖြစ်ပွားခဲ့တဲ့ နိုဝင်ဘာ ၁၉ ရက်နေ့က အမှတ်စာရင်း ယူဖို့အတွက် အစိုးရ နည်းပညာ အထက်တန်းကျောင်းကို သွားရောက်ခဲ့တာ ဖြစ်တယ်လို့ သိရပါတယ်။
သေဆုံးသူက ရိုက်နှက်မှု ကျူးလွန်ကြောင်း ဝန်ခံထားတဲ့ မင်းပြည့်စုံကို “မင်းကောင်မလေးက နောက်တယောက်နဲ့၊ မင်းတော့ ကျန်ခဲ့ပြီ” လို့ ပြောရာကနေ စကားများ၊ ရန်ဖြစ်ခဲ့တာလို့ ကျူးလွန်သူဘက်က ဝန်ခံ ထွက်ဆိုထားတယ်လို့ ဖြစ်စဉ် အသေးစိတ်ကို‌တော့ ကာယကံရှင် မိသားစုက မသိရှိရသေးဘူးလို့ သိရပါတယ်။
လက်ရှိမှာ သေဆုံးသူ အသက် (၂၁) နှစ်အရွယ် ကိုခန့်ကျော်သူထွန်းကို ဧရာဝတီတိုင်း၊ ကျောင်းကုန်းမြို့ရှိ သုသာန်မှာ မနေ့ နိုဝင်ဘာ ၂၆ ရက်၊ မနက် ၁၁ နာရီခွဲက မီးသင်္ဂြိုဟ်ခဲ့ပြီး ဖြစ်တယ်လို့ သိရပါတယ်။

ဂီနီ-ဘစ်ဆောမှာ သမ္မတကိုဖမ်းပြီး စစ်တပ်အရာရှိတစုက အာဏာသိမ်း

ဂီနီ-ဘစ်ဆော သမ္မတ အူမာရိုဆစ်ဆိုကို အမ်ဘာလိုကို စစ်တပ်အရာရှိတစုက ဖမ်းဆီးပြီး နိုင်ငံကို ထိန်းချုပ်လိုက်တယ်လို့ ထုတ်ပြန်ကြေညာလိုက်ပါတယ်။
မြို့တော်ဘစ်ဆောမှာ သေနတ်သံတွေ ကြားနေရပြီး မကြာမီမှာ သမ္မတ ဖမ်းဆီးခံလိုက်ရတယ်လို့ အစိုးရသတင်းရင်းမြစ်တွေက ပြောပါတယ်။ နိုဝင်ဘာ ၂၃ ရက် ရွေးကောက်ပွဲ ရလဒ် လုပ်ငန်းစဉ်တွေကို ရပ်ဆိုင်းလိုက်တယ်လို့ စစ်တပ်တာဝန်ရှိသူတွေက နိုင်ငံပိုင်ရုပ်မြင်သံကြားကနေ ကြေညာပါတယ်။
ရွေးကောက်ပွဲရလဒ်တွေကို နိုဝင်ဘာ ၂၇ရက်မှာ ထုတ်ပြန်ကြေညာဖို့ စီစဉ်ထားခဲ့ပြီး သမ္မတ အမ်ဘာလိုနဲ့ သူ့ရဲ့ အနီးဆုံးပြိုင်ဘက် ဖာနန်ဒိုဒီရက်စ်တို့နှစ်ဦးစလုံးက အနိုင်ရကြောင်း အခိုင်အမာပြောဆိုထားကြပါတယ်။
အာဏာသိမ်းအဖွဲ့ဟာ ဖာနန်ဒိုဒီရက်စ် ၊ ပြည်ထဲရေးဝန်ကြီး ၊ စစ်တပ်အကြီးအကဲ ဗိုလ်ချုပ်ကြီး နာအန်တန်နဲ့ သူ့ရဲ့ လက်ထောက် မာမာဒူတိုရေးတို့ကိုလည်း ဖမ်းဆီးထိန်းသိမ်းထားကြောင်း သတင်းရင်းမြစ်တွေက ပြောပါတယ်။
နိုင်ငံကို မတည်မငြိမ်ဖြစ်စေဖို့အတွက် မူးယစ်ဆေးဝါးဂိုဏ်းခေါင်းဆောင်တယောက်က ထောက်ခံမှု ရရှိထားတဲ့ နိုင်ငံရေးသမားတွေရဲ့ ကြံစည်မှုကို ဟန့်တားဖို့ လုပ်ဆောင်နေတာလို့ အာဏာသိမ်းအဖွဲ့က ဆိုပါတယ်။ နယ်စပ်တွေကို ပိတ်ပစ်ပြီး ညမထွက်ရအမိန့် ကိုလည်း ထုတ်ပြန်ထားပါတယ်။
ဆီနီဂေါနဲ့ ဂီနီကြားမှာ တည်ရှိပြီး ၁၉၇၄ ခုနှစ်မှာ ပေါ်တူဂီထံမှ လွတ်လပ်ရေးရပြီးကတည်းက စစ်တပ်ဩဇာလွှမ်းမိုးမှုနဲ့ အာဏာသိမ်းမှုဖြစ်ပွားလေ့ရှိတဲ့ ဂီနီ-ဘစ်ဆောနိုင်ငံဟာ မူးယစ်ဆေးဝါးရောင်းဝယ်မှုဗဟိုချက်ဖြစ်ပါတယ်။ နှစ်ပေါင်း ၅၀ ကာလအတွင်း အာဏာသိမ်းမှု ကိုးကြိမ် နဲ့ အာဏာသိမ်းဖို့ ကြံစည်မှုတွေ မကြာခဏ ဖြစ်ပွားခဲ့ပါတယ်။