ချွန်ဘူရီခရိုင်ရှိ ဆောက်လုပ်ရေး လုပ်ငန်းတစ်ခုတွင် လုပ်ကိုင်နေသည့်မြန်မာအလုပ်သမား ၃၁ ဦး
လုပ်ခ ဘတ်လေးသိန်းကျော် မရ

ထိုင်းနိုင်ငံ ချွန်ဘူရီခရိုင် ခေါင်နွဲ့မြို့ရှိ ဆောက် လုပ်ရေးလုပ်ငန်းတစ်ခုတွင် အလုပ်လုပ်နေကြသော မြန်မာအလုပ်သမား ၃၁ ဦးသည် လုပ်အားခ ဘတ်လေးသိန်းကျော် (၄၀၃၀၀၀) မရသည့်အတွက် ကူညီ ဆောင်ရွက်ပေးနေကြောင်း WAG အဖွဲ့မှ သိရသည်။
မြန်မာအလုပ်သမားများသည် ၎င်းစက်ရုံတွင် လုပ်သက် တစ်နှစ်မှ လေးနှစ်အထိ သက်တမ်းရှိကြပြီး လစဉ် ၅ ရက်နေ့တွင် လုပ်အားခရှင်းပေးမည်ဟု ပြောဆို ထားသော်လည်း ရရှိခြင်းမရှိကြောင်း သိရသည်။
အလုပ်သမား ၃၁ ဦး၏လုပ်အားခ တစ်လကျော်စာ ထိုင်း ဘတ် စုစုပေါင်း ၄၀၃၀၀၀ မရသည့် အတွက် နိုဝင်ဘာ ၂၅ ရက်တွင် အလုပ်သမားများနှင့် အတူ နယ်မြေခံ ဆဝါဒိကန်ရုံးတွင် သွား ရောက်တိုင်ကြားခဲ့ကြောင်း WAG အဖွဲ့မှ သိရသည်။

ကုလသမဂ္ဂအတွင်းရေးမှူးချုပ်သစ် ရွေးချယ်တင်မြှောက်ရေးလုပ်ငန်းစဉ် တရားဝင်စတင်

ကုလသမဂ္ဂ အတွင်းရေးမှူး ချုပ်သစ် ရွေးချယ်တင်မြှောက်ရေး လုပ်ငန်းစဉ်ကို ကုလသမဂ္ဂက နိုဝင် ဘာ ၂၅ ရက်တွင် စတင်လိုက်ပြီဖြစ် ကြောင်း သိရသည်။
ကုလ အကြီးအကဲသစ် ရွေးချယ်တင်မြှောက်ရေး လုပ်ငန်းစဉ် အရ ကုလသမဂ္ဂအဖွဲ့ဝင်နိုင်ငံများ အနေဖြင့် အတွင်းရေးမှူးချုပ်လောင်း များကို အမည်စာရင်း ပေးသွင်းကြရ မည်ဖြစ်သည်။
အဖွဲ့ဝင် ၁၅ နိုင်ငံပါ လုံခြုံရေး ကောင်စီနှင့် အဖွဲ့ဝင် ၁၉၃ နိုင်ငံပါ အထွေထွေညီလာခံ ဥက္ကဋ္ဌတို့၏ ပူးတွဲ ပေးစာ၌ အတွင်းရေးမှူးချုပ်လောင်း များကို အမည်စာရင်း ပေးသွင်းကြရန် ကုလသမဂ္ဂ အဖွဲ့ဝင်နိုင်ငံများအား တိုက်တွန်းထားသည်။
အဖွဲ့ဝင်နိုင်ငံများက တင်သွင်း သော အတွင်းရေးမှူးချုပ်လောင်းများ အမည်စာရင်းကို လုံခြုံရေးကောင်စီ က စိစစ်၍ ၂၀၂၆ ခုနှစ် နှစ်ကုန်ပိုင်း တွင် အတွင်းရေးမှူးချုပ်လောင်း တစ်ဦးကို ရွေးချယ်ပြီး အထွေထွေ ညီလာခံ၌ တရားဝင် တင်သွင်းမည် ဖြစ်သည်။
ကုလသမဂ္ဂ အတွင်းရေးမှူး ချုပ်သစ် ရာထူးအတွက် ပါဝင်ယှဉ် ပြိုင်ရန် တရားဝင်ကြေညာထားသူများ ထဲတွင် ချီလီသမ္မတဟောင်း ဘာချေး လက်၊ ကော်စတာရီကာ၊ ဒုတိယသမ္မ တ ဟောင်း ရီဘက်ကာဂရင်စပင်းနှင့် အာဂျင်တီးနားဝါရင့်သံတမန် ရာဖေး ဂရော့ဆီတို့လည်း ပါဝင်ကြောင်း သိရသည်။
ကုလအတွင်းရေးမှူးချုပ်သစ် ကို ခန့်အပ်နိုင်ရေးအတွက် လုံခြုံရေး ကောင်စီ အမြဲတမ်း အဖွဲ့ဝင်နိုင်ငံ ငါး နိုင်ငံတို့၏ သဘောတူညီချက်လိုအပ် မည်ဖြစ်သည်။
ရွေးကောက် တင်မြှောက်ခံ ရမည့် ကုလအတွင်းရေးမှူးချုပ် သစ်သည် လက်ရှိအတွင်းရေးမှူးချုပ် ဂူတာရက်စ်၏ နေရာတွင် ၂၀၂၇ ခုနှစ် ဇန်နဝါရီ ၁ ရက်မှစ၍ အစားထိုး ဝင်ရောက်ရမည်ဖြစ်သည်။

အကြိမ်(၆၀)မြောက် ကျောက်မျက်ရတနာပြပွဲ ပြီးစီး

ပုလဲအတွဲ(၄၃၀)ကျော်၊ ကျောက်မျက်အတွဲ ၆၇ တွဲနှင့် ကျောက်စိမ်းအတွဲပေါင်း(၄၁၀၀)ကျော် ရောင်းချနိုင်ခဲ့
အကြိမ်(၆၀)မြောက် ကျောက်မျက်ရတနာပြပွဲကို နိုဝင်ဘာ(၁၇)ရက်မှ စတင်ကျင်းပခဲ့ပြီး ယမန်နေ့ နိုဝင်ဘာ(၂၆)ရက်နေ့က ပြီးစီးခဲ့ပြီဖြစ်ကြောင်း သိရသည်။
ပြပွဲအတွင်း ပုလဲအတွဲပေါင်း (၄၈၉)တွဲ အနက် (၄၄၃)တွဲရောင်းချနိုင်ခဲ့ပြီး ကျောက်မျက်အတွဲပေါင်း(၁၆၀) အနက် (၆၇)တွဲရောင်းချနိုင်ခဲ့ကြောင်း သိရသည်။
ထို့အတူ ကျောက်စိမ်းအတွဲပေါင်း အုပ်စု(အေနှင့်ဘီ)တို့မှာ အတွဲပေါင်း (၂၉၀၀)အနက် (၂၁၁၀)တွဲ ရောင်းချခဲ့ရပြီး အုပ်စီစီ မှ ကျောက်စိမ်းအတွဲ‌ပေါင်း (၂၁၈၅)တွဲ အနက် (၂၀၇၃) တွဲ၊စုစုပေါင်း ကျောက်စိမ်းအတွဲပေါင်း(၄၁၈၃)တွဲရောင်းချခဲ့ရကြောင်း သိရသည်။
အကြိမ်(၆၀)မြောက် မြန်မာ့ကျောက်မျက်ရတနာပြပွဲကို နိုင်ငံတော် အတွက် နိုင်ငံခြားဝင်ငွေရှာဖွေပေးနိုင်ရန် နှင့် နိုင်ငံသားများအတွက် စီးပွားရေးအကျိုးဖြစ်ထွန်းမှုများရရှိနိုင်စေရေး ကျင်းပခြင်းလည်း ဖြစ်သည်။
နိုင်ငံစီးပွားဖွံ့ဖြိုးတိုးတက်စေရန်အတွက် အထောက်အကူပြုနိုင်ရန် မြန်မာ့ကျောက်မျက်ရတနာပြပွဲ ဗဟိုကော်မတီ၏ စီစဉ်မှုဖြင့် နေပြည်တော်ရှိ မဏိရတနာ ကျောက်စိမ်းခန်းမ၌ ကျင်းပခဲ့ခြင်းလည်း ဖြစ်သည် ။

တီကျစ်ကျောက်မီးသွေးသုံး ရေနွေးငွေ့ဓာတ်အားပေးစက်ရုံ ဒုတိယအဆင့် အခြောက်ခံစက် တည်‌ဆောက်ပြီးစီး

ယခင် လျှပ်စစ်ဓာတ်အား ၉၀ မဂ္ဂါဝပ်မှ ၁၂၀ မဂ္ဂါဝပ်အထိ တိုးမြှင့်ထုတ်လုပ်နိုင်မည်
ရှမ်းပြည်နယ်တောင်ပိုင်း ပင်လောင်းမြို့နယ်ရှိ တီကျစ်ကျောက်မီးသွေးသုံးရေနွေးငွေ့ ဓာတ်အားပေးစက်ရုံ၏ ဒုတိယအဆင့် ကျောက်မီးသွေးအခြောက်ခံစက် တည်ဆောက်ပြီးစီးပြီဖြစ်ပြီး ယမန်နေ့ နိုဝင်ဘာ ၂၆ ရက်နေ့က ဖွင့်လှစ်ခဲ့ကြောင်း သိရသည်။
ယခုဖွင့်လှစ်သည့် ကျောက်မီးသွေး အခြောက်ခံစက် တည်ဆောက်ခြင်းကြောင့် အသုံးပြုလျက်ရှိသော ဒေသထွက်ကျောက်မီးသွေး၏ စိုထိုင်းဆများပြားမှုကို လျှော့ချကာ အပူစွမ်းအင်ကို တိုးမြှင့်နိုင်ခဲ့သဖြင့် ယခင်လျှပ်စစ်ဓာတ်အား ၉၀ မဂ္ဂါဝပ်သာ ထုတ်လုပ်နိုင်ခဲ့ရာမှ ယခုအခါ စက်တပ်ဆင်အင်အားပြည့် ၁၂၀ မဂ္ဂါဝပ်အထိ ထုတ်လုပ်နိုင်ခဲ့ပြီဖြစ်၍ နိုင်ငံတော်၏ လျှပ်စစ်ဓာတ်အားလိုအပ်ချက်အတွက် ၃၀ မဂ္ဂါဝပ် ထပ်မံဖြည့်ဆည်းပေးနိုင်မည် ဖြစ်ကြောင်းသိရသည်။
လျှပ်စစ်နှင့် စွမ်းအင်ဖွံ့ဖြိုးရေးကော်မရှင်ဥက္ကဋ္ဌ နိုင်ငံတော်သမ္မတရုံးဝန်ကြီးဌာန (၁) ပြည်ထောင်စုဝန်ကြီး ဦးတင်အောင်စန်းက “ နိုင်ငံတော်အတွင်း လျှပ်စစ်ဓာတ်အားလိုအပ်ချက်များကို ဖြည့်ဆည်းပေးနိုင်ရန်အတွက် ဓာတ်အားပေးစက်ရုံ စီမံကိန်းများကို ကာလတို/ ကာလလတ်/ ကာလရှည်အစီအမံများချမှတ်ပြီး ဆောင်ရွက်လျက်ရှိသည့်အပြင် ပြည်တွင်း/ပြည်ပ ရင်းနှီးမြှုပ်နှံမှုများကိုလည်း ဖိတ်ခေါ်ဆောင်ရွက်လျက်ရှိတယ်” ဟု ဖွင့်ပွဲတွင် ပြောကြားခဲ့ကြောင်း သိရသည်။
ထိုပြင် ကျောက်မီးသွေးလောင်စာအသုံးပြု၍ ဓာတ်အားထုတ်လုပ်ခြင်းသည် နိုင်ငံတော်ဓာတ်အားစနစ်အတွက် တည်ငြိမ်သော လျှပ်စစ်ဓာတ်အားကို ထုတ်လုပ်ပေးနိုင်သော်လည်း လက်ရှိမြန်မာနိုင်ငံတွင် ကျောက်မီးသွေးအသုံးပြုပြီး ဓာတ်အားထုတ်လုပ်လျက်ရှိသည့် ပမာဏသည် အိမ်နီးချင်းနိုင်ငံများနှင့် အာဆီယံဒေသတွင်း နိုင်ငံတို့ နှင့် နှိုင်းယှဉ်ပါက နည်းပါးလျက်ရှိကြောင်းလည်း ပြည်ထောင်စုဝန်ကြီးက ပြောသည်။
မြန်မာနိုင်ငံတွင် ကျောက်မီးသွေး သယံဇာတများစွာရှိသည့်အနက် ဆပ်ဘစ်တူးမင်းနပ်စ် (Sub-bituminous) အမျိုး အစားကျောက်မီးသွေးများအား အများဆုံးတွေ့ရှိရကြောင်း၊ နိုင်ငံတော်၏ လျှပ်စစ်နှင့် စွမ်းအင်လိုအပ်ချက်ကို ပြည့်မှီစွာ ဖြည့်ဆည်းပေးနိုင်ရေးအတွက် ကျောက် မီးသွေးသုံး ဓာတ်အားပေးစက်ရုံများကို တိုးမြှင့်ဆောင်ရွက်သွားရမည်ဖြစ်ကြောင်းလည်း သိရသည်။

ယာယီနေရပ်စွန့်ခွာသူများ ကြိုတင်ဆန္ဒမဲပေးနိုင်ကြောင်း UEC ထပ်မံအသိပေး

ပြည်တွင်းရှိ မဲစာရင်းပါရှိသည့် သက်ဆိုင်ရာမြို့နယ် ပြင်ပရောက် ယာယီနေရပ်စွန့်ခွာနေရသူများအနေဖြင့် ပုံစံ(၁၅)ဖြင့် ရောက်ရှိရာဒေသ၊ မြို့နယ်၊ ကော်မရှင်အဖွဲ့ခွဲ့၌ ကြိုတင်ဆန္ဒမဲပေးနိုင်ကြောင်း ပြည်ထောင်စုရွေးကောက်ပွဲကော်မရှင်က ယနေ့ နိုဝင်ဘာ(၂၇)ရက်နေ့၌ ထပ်မံအသိပေးထုတ်ပြန်ထားသည်။
လာမည် ဒီဇင်ဘာ(၂၈)ရက်နေ့ စတင်ကျင်းပမည် ရွေးကောက်ပွဲအတွက် ကြိုတင်မဲများကို နိုဝင်ဘာ(၂၅)ရက်ကစတင်ပြီး နိုဝင်ဘာ(၂၉)ရက်နေ့အထိ ကြိုတင်မဲပေးနိုင်ကြောင်း သိရသည်။
ဆန္ဒမဲပေးပိုင်ခွင့်ရှိသူများ မဲပေးခွင့်မဆုံးရှုံးစေရေး အလေးထားဆောင်ရွက်လျက်ရှိရာ မဲစာရင်းပါရှိသည့် သက်ဆိုင်ရာမြို့နယ်ပြင်ပတွင် ရောက်ရှိနေသော ယာယီနေရပ်စွန့်ခွာနေရသူများအနေဖြင့် ကြိုတင်မဲပေးနိုင်ကြောင်း အသိပေးထားခြင်းလည််း ဖြစ်သည်။
လာမည်ရွေးကောက်ပွဲ အပိုင်း(၁)ကို ဒီဇင်ဘာ(၂၈)ရက်နေ့ ၌ စတင်ကျင်းပမည်ဖြစ်ပြီး အပိုင်း(၂)ကို ၂၀၂၆ ခုနှစ် ဇန်နဝါရီ ၁၁ ရက်နေ့၌ ကျင်းပမည်ဖြစ်ကြောင်း ရွေးကောက်ပွဲကော်မရှင်က အသိပေးထုတ်ပြန်ထားသည်။

မြန်မာ-တရုတ် နှစ်နိုင်ငံပူးပေါင်းဆောင်ရွက်မှု အားဖြည့်မည်
‎------------------------

‎မြန်မာ-တရုတ်နှစ်နိုင်ငံအနေနဲ့ ပူးပေါင်းဆောင်ရွက်မှုတွေကိုအားဖြည့်ပြီး ခေတ်မီဖွံဖြိုးတိုးတတ်တဲ့ လမ်းကြောင်း ပေါ်ကို လက်တွဲလုပ်ဆောင်သွားမှာ ဖြစ်တယ်လို့ မြန်မာနိုင်ငံဆိုင်ရာ တရုတ်နိုင်ငံသံရုံးက အတိုင်ပင်ခံပုဂ္ဂိုလ် မစ္စချောင်ကျင်းက ပြောပါတယ်။
‎နိုဝင်ဘာလ ၂၆ ရက် မနက်ပိုင်းက ရန်ကုန်မြို့ရှိ မြန်မာနိုင်ငံမဟာဗျူဟာနှင့် နိုင်ငံတကာလေ့လာရေးအဖွဲ့ (Myanmar ISIS) ရုံးမှာ ကျင်းပတဲ့ “(၁၅)ကြိမ်မြောက် ငါးနှစ်စီမံကိန်းနှင့် လာမည့်ငါးနှစ်အတွင်း မြန်မာ-တရုတ် ပူးပေါင်းဆောင်ရွက်မှု အခွင့်အလမ်းများ” ဆွေးနွေးပွဲမှာ အခုလို ပြောကြားခဲ့တာ ဖြစ်ပါတယ်။
‎မစ္စချောင်ကျင်းက တရုတ်နိုင်ငံရဲ့ လာမဲ့ (၁၅)ကြိမ်မြောက် ငါးနှစ်စီမံကိန်းဟာ ကမ္ဘာနဲ့ မြန်မာနိုင်ငံအတွက် အရေး ပါမှုကို အလေးပေးဖော်ပြပြီး တရုတ်နိုင်ငံရဲ့ ကြီးမားကျယ်ပြန့်တဲ့ ဈေးကွက်ရရှိရေး၊ အရည်အသွေးမြင့် ဖွံ့ဖြိုးတိုး တက်ရေး၊ လုံခြုံရေးပူးပေါင်းဆောင်ရွက်မှုနဲ့ ငြိမ်းချမ်းရေးနဲ့ တည်ငြိမ်မှု မြှင့်တင်ရေး စတဲ့ ကဏ္ဍတွေမှာ မြန်မာ-တရုတ် ပူးပေါင်းဆောင်ရွက်မှုအတွက် အဓိက အခွင့်အလမ်းတွေ ရှာဖွေပေးနိုင်မှာ ဖြစ်တယ်လို့ ဆိုပါတယ်။
‎ဒါ့အပြင် မြန်မာ-တရုတ် နှစ်နိုင်ငံကြား ချစ်ကြည်ရင်းနှီးမှုဟာ ခိုင်မာတဲ့အခြေခံအုတ်မြစ်ဖြစ်ပြီး ခေတ်မီတိုးတက် ရေး လုပ်ငန်းစဉ်မှာ တရုတ်နိုင်ငံရဲ့ အောင်မြင်မှုတွေနဲ့ အတွေ့အကြုံတွေက နှစ်နိုင်ငံပြည်သူတွေအကျိုးအတွက် လာမဲ့ငါးနှစ်အတွင်း ကူးလူးဖလှယ်မှုနဲ့ ပူးပေါင်းဆောင်ရွက်မှုတွေ ပိုမိုအားကောင်းလာဖို့ မျှော်လင့်တယ်လို့လည်း MISIS ဥက္ကဋ္ဌ ဦးသန့်ကျော်က ပြောကြားခဲ့ပါတယ်။
‎ဒီဆွေးနွေးပွဲကို မြန်မာနိုင်ငံ ငြိမ်းချမ်းရေးနှင့်ဖွံ့ဖြိုးတိုးတက်ရေးဖောင်ဒေးရှင်း (CFPD)နဲ့ တရုတ်-မြန်မာ စီးပွားရေး ပူးပေါင်းဆောင်ရွက်မှုနှင့် ဖွံ့ဖြိုးတိုးတက်ရေးမြှင့်တင်ရေးအသင်းတို့ရဲ့ ပံ့ပိုးကူညီမှုနဲ့ ပူးပေါင်းကျင်းပတာဖြစ်ပြီး မြန်မာနိုင်ငံဆိုင်ရာ တရုတ်နိုင်ငံသံရုံးက အတိုင်ပင်ခံပုဂ္ဂိုလ် မစ္စချောင်ကျင်းနဲ့ MISIS ဥက္ကဋ္ဌ ဦးသန့်ကျော် အပါ အဝင် ကိုယ်စားလှယ်တွေ၊ နှစ်နိုင်ငံအစိုးရတွေ၊ လူမှုရေးအဖွဲ့အစည်းတွေ၊ တတ်သိပညာရှင်တွေ၊ မီဒီယာတွေနဲ့ စီးပွားရေးအသိုက်အဝန်းတွေက ကိုယ်စားလှယ်တွေ တက်ရောက်ဆွေးနွေးခဲ့ကြပါတယ်။
‎ဆွေးနွေးပွဲမှာ တရုတ်နိုင်ငံရဲ့ (၁၅)ကြိမ်မြောက် ငါးနှစ်စီမံကိန်းကိုအခြေခံပြီး နောက်ငါးနှစ်အတွင်း မြန်မာ-တရုတ် ပူးပေါင်းဆောင်ရွက်မှုအတွက် အခွင့်အလမ်းအသစ်တွေကို ဆွေးနွေးပွဲ တက်ရောက်လာသူတွေက တစ်ဦးချင်း အလိုက် ဆွေးနွေးခဲ့ကြပါတယ်။

နေပြည်တော်၌ သိပ္ပံပွဲတော် ၂၀၂၅ နှစ်ရက်တာ ကျင်းပခဲ့
----------------------

သိပ္ပံပွဲတော်၂၀၂၅ (Science Festival 2025)ကို နေပြည်တော်ရှိ Naypyitaw State Polytechnic University (NSPU)မှာ နိုဝင်ဘာ(၂၄) ရက်နဲ့(၂၅)ရက် နှစ်ရက်တာ ကျင်းပခဲ့တယ်လို့ သိပ္ပံနှင့်နည်းပညာဝန်ကြီးဌာနကနေ သိရပါတယ်။ ပွဲတော်ကို သိပ္ပံနှင့်နည်းပညာဝန်ကြီးဌာနနဲ့ ရုရှားဖက်ဒရေးရှင်းနိုင်ငံ နိုင်ငံပိုင်အဏုမြူစွမ်းအင်ကော်ပိုရေးရှင်း “ROSATOM” တို့ ပူးပေါင်းကျင်းပခဲ့တာ ဖြစ်ပါတယ်။
ပွဲတော်နှစ်ရက်တာအတွင်း အခြေခံပညာ ကျောင်းသား/ကျောင်းသူတွေအတွက် နျူကလီးယားဆိုင်ရာ ဉာဏ်စမ်း ဂိမ်း ယှဉ်ပြိုင်မှုတွေ ပြုလုပ်ပြီး Oliver Stone “Nuclear Now” ၊ “ATOM Egypt ENG Master” နဲ့ “The City Falls Asleep” အစရှိတဲ့ မှတ်တမ်းရုပ်ရှင်တိုတွေပြသတာ၊ “Nuclear Technology in Everyday Life5” ခေါင်းစဉ်နဲ့ ဟောပြောဆွေးနွေးတာ၊ နျူကလီးယားဆိုင်ရာ အသိပညာတွေမျှဝေပေးတာတွေ ပြုလုပ်ခဲ့တယ်လို့ သိရပါတယ်။
အခုလို သိပ္ပံပွဲတော်ကျင်းပတဲ့အတွက် အခြေခံပညာအဆင့်ကနေ တက္ကသိုလ်ကျောင်းသား၊ကျောင်းသူတွေနဲ့ ကဏ္ဍအသီးသီးမှာ တာဝန်ထမ်းဆောင်နေတဲ့လူငယ်ပညာရှင်တွေအထိ နျူကလီးယားပညာရပ် အပါအဝင် သိပ္ပံ ဆိုင်ရာ အသိအမြင်တွေ၊ အတွေ့အကြုံဗဟုသုတတွေ တိုးပွားလာစေမှာ ဖြစ်ပါတယ်။
ဒါ့အပြင် လူငယ်ထုအတွင်း သိပ္ပံပညာကို ပိုမိုစိတ်ဝင်စားစေပြီး သိပ္ပံပညာဆိုင်ရာ အသစ်အဆန်းတွေ လေ့လာစူး စမ်းလိုစိတ် ဖြစ်ပေါ်လာ စေတာ၊ ပညာရေးကဏ္ဍမှာ လူငယ်တွေရဲ့ စိတ်ဓာတ်ခွန်အားကို မြှင့်တင်ပေးနိုင်တာ၊ နိုင်ငံအတွင်း နျူကလီးယား စွမ်းအင်ဆိုင်ရာ အသိပညာတွေ ပြန့်ပွားလာမှာ ဖြစ်တဲ့အတွက် နိုင်ငံတော်ရဲ့ သိပ္ပံနဲ့ နျူကလီးယားစွမ်းအင်ကဏ္ဍ ဖွံ့ဖြိုးတိုးတက်ရေးဆောင်ရွက်ရာမှာ များစွာအထောက်အကူပြုနိုင်တဲ့ အကျိုးကျေးဇူးတွေ ရရှိနိုင်မှာ ဖြစ်တယ်လို့ ဆိုပါတယ်။
အဲဒီသိပ္ပံပွဲတော်ကို ရန်ကုန်မြို့ နည်းပညာတက္ကသိုလ်နဲ့ နျုကလီးယားနည်းပညာသတင်းအချက်အလက်စင်တာ တွေမှာလည်း နိုဝင်ဘာ(၂၇)ရက်ကနေ (၂၈)ရက်အထိ ကျင်းပသွားမှာ ဖြစ်တယ်လို့ သိရပါတယ်။

အမျိုးသမီးများပေါ်အကြမ်းဖက်မှု လူအဖွဲ့အစည်းကိုပါ နစ်နာစေဟုဆို
-----------------------

အမျိုးသမီးတွေအပေါ် အကြမ်းဖက်မှုတွေဟာ အကြမ်းဖက်ခံရတဲ့အမျိုးသမီးတစ်ယောက်ချင်းအပေါ်သာမက မိသားစုတွေ၊ လူမှုအသိုင်းအဝန်းနဲ့ လူ့အဖွဲ့အစည်းအတွက် ထိခိုက်မှု၊ နစ်နာဆုံးရှုံးမှုတွေကို ဖြစ်ပေါ်စေတယ်လို့ လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာစိုးဝင်းက ပြောပါတယ်။
နိုဝင်ဘာ(၂၅)ရက်က နေပြည်တော်ရုံးအမှတ်(၂၃) လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေး ဝန်ကြီးဌာ နစုပေါင်းအစည်းအဝေးခန်းမမှာ ပြုလုပ်တဲ့ ၂၀၂၅ ခုနှစ် အမျိုးသမီးများအပေါ် အကြမ်းဖက်မှု ပပျောက် ရေး ၁၆ ရက်တာလှုပ်ရှားမှု အခမ်းအနားမှာ အခုလို ထည့်သွင်းပြောကြားခဲ့တာပါ။
ဒါ့အပြင် ကမ္ဘာလုံးဆိုင်ရာအကျပ်အတည်းတွေ၊ ပဋိပက္ခတွေနဲ့ ရာသီဥတုပြောင်းလဲမှုတွေဟာ အမျိုးသမီးတွေနဲ့ မိန်းကလေးငယ်တွေအပေါ် ထိခိုက်နစ်နာမှုကို ဖြစ်စေသလို အမျိုးသမီးတွေအပေါ် အကြမ်းဖက်မှုကိုလည်း ပိုမို မြင့်တက်စေတယ်လို့ ဆိုပါတယ်။
မြန်မာနိုင်ငံအနေနဲ့ ကုလသမဂ္ဂက ချမှတ်ထားတဲ့ စဉ်ဆက်မပြတ် ဖွံ့ဖြိုးတိုးတက်မှုရည်မှန်းချက်ပန်းတိုင်တွေ၊ ကမ္ဘာ့အမျိုးသမီးညီလာခံနဲ့ အမျိုးသမီးတွေကို နည်းမျိုးစုံနဲ့ခွဲခြားမှု ပပျောက်ရေးဆိုင်ရာ ကွန်ဗင်းရှင်းပါ ပြဋ္ဌာန်း ချက်တွေ၊ လုပ်ငန်းအစီအစဉ်တွေကို နိုင်ငံတော်ရဲ့မှုဝါဒနဲ့အညီ အကောင်အထည်ဖော် ဆောင်ရွက်ပေးနေပါတယ်။
ဒါ့အပြင် အခုနှစ်ဆောင်ပုဒ်က အမျိုးသမီးများအပေါ်ဒစ်ဂျစ်တယ်အကြမ်းဖက်မှုပပျောက်ရေး အားလုံးပူးပေါင်း ဆောင်ရွက်ပေး ဖြစ်ကြောင်းနဲ့ ဒစ်ဂျစ်တယ်အကြမ်းဖက်မှုဟာ ကမ္ဘာပေါ်ရှိ ဘယ်နေရာမှာမဆို လွယ်ကူလျင်မြန် စွာ ဆောင်ရွက်နိုင်တဲ့အတွက် ဥပဒေတွေပြဋ္ဌာန်းပြီး ထိရောက်စွာ အရေးယူဆောင်ရွက်ကြရမှာ ဖြစ်တယ်လို့လည်း ပြည်ထောင်စုဝန်ကြီးက ပြောကြားခဲ့ပါတယ်။

ဧပြီလတွင် ထရမ့် တရုတ်သို့ ချစ်ကြည်ရေးခရီး သွားရောက်မည်
---------------------

အမေရိကန်သမ္မတ ဒေါ်နယ်ထရမ့်ဟာ တရုတ်သမ္မတရှီနဲ့ ဖုန်းခေါ်ဆိုမှုအပြီးမှာ သံတမန်ဆက်ဆံရေး နက်ရှိုင်း စေဖို့အတွက် လာမဲ့ဧပြီလမှာ တရုတ်နိုင်ငံကို သွားရောက်လည်ပတ်မယ်လို့ ပြောဆိုလာတာကို Reuters သတင်း မှာ ဖော်ပြထားပါတယ်။
အဲဒီအပြင် လာမဲ့နှစ် နှောင်းပိုင်းမှာ တရုတ်သမ္မတရှီကို အမေရိကန်ကို လာရောက်ဖို့ ပြန်လည်ဖိတ်ကြားခဲ့တယ်လို့ ဆိုပါတယ်။ အိမ်ဖြူတော်နဲ့ တရုတ်နိုင်ငံခြားရေးဝန်ကြီးဌာနတိုကလည်း ခေါင်းဆောင်နှစ်ယောက်ဟာ ဖုန်းခေါ်ဆို မှုအတွင်း ကုန်သွယ်ရေး၊ ရုရှား-ယူကရိန်းစစ်၊ ဖန်တနိုင်း မူးယစ်ဆေးဝါးနဲ့ တရုတ်(တိုင်ပေ)အရေးတို့ ပါဝင် ပတ်သက်တဲ့ ဒေသတွင်းတင်းမာမှုတွေကို ဆွေးနွေးခဲ့ကြတယ်လို့ ထုတ်ပြန်ခဲ့ကြပြီး ထရမ့်ကလည်း Truth Social မှာ ရေးသားခဲ့ပါတယ်။
တရုတ်နိုင်ငံပိုင်သတင်းဌာနကလည်း နှစ်ဖက်စလုံးဟာ “အရှိန်အဟုန်”ကို ထိန်းသိမ်းပြီး “တန်းတူညီမျှမှု၊ လေးစား မှုနဲ့ အပြန်အလှန်အကျိုးရှိမှု”ကို အခြေခံကာ ပူးပေါင်းဆောင်ရွက်မှုဆီကို ဦးတည်လုပ်ဆောင်သင့်တယ်လို့ ရေးသားဖော်ပြခဲ့ပါတယ်။

ထိုင်းတွင် ဆိုးရွားသည့်ရေဘေးကြောင့် သေဆုံးသူ ၁၈ ဦးရှိလာ
------------------------

ထိုင်း-မလေးရှားနယ်စပ်က ဆုန်ခလာခရိုင်အပါအဝင် ထိုင်းနိုင်ငံတောင်ပိုင်းဒေသတွေမှာ အထပ်မြင့်အိမ်တွေ နစ်မြုပ်တဲ့အထိ ဆိုးရွားတဲ့ရေဘေးကြောင့် သေဆုံးသူ ၁၈ ယောက်ရှိလာပြီလို့ ထိုင်းအာဏာပိုင်တွေက ထုတ်ပြန် လိုက်တာကို Bangkok Post သတင်းမှာ ဖော်ပြထားပါတယ်။
ဒီရေဘေးဟာ ထိုင်းတောင်ပိုင်းမှာ နှစ် ၃၀၀ အတွင်း မိုးရေချိန်အများဆုံးဖြစ်တာကြောင့် အဆိုးရွားဆုံး ရေကြီးမှုနဲ့ ကြုံတွေ့နေရတာဖြစ်တယ်လို့ ထိုင်းတော်ဝင်ဆည်မြောင်းဌာက ပြောပါတယ်။ ရေဘေးကြုံနေရတဲ့ ခရိုင် ၉ ခုထဲက ၅ ခုမှာ လူသေဆုံးတာတွေ ရှိလာပြီး အခုရေဘေးကို အိမ်ထောင်စု ၉ သိန်း ၈ သောင်းကျော်၊ လူဦးရေ ၂ ဒသမ ၇ သန်းကျော် ရင်ဆိုင်နေရတာ ဖြစ်ပါတယ်။
ရေကြီးမှုအဆိုးဆုံးဖြစ်နေတဲ့ ကုန်သွယ်ရေးနဲ့သယ်ယူပို့ဆောင်ရေးအတွက် အဓိကကျတဲ့ ဟတ်ယိုင်ခရိုင်ခွဲကိုတော့ နိုဝင်ဘာ ၂၅ ရက်က အရေးပေါ်အခြေအနေ ကြေညာလိုက်ပါတယ်။ ဟတ်ယိုင်ထဲက စက်ရုံ၊အလုပ်ရုံနဲ့ စိုက်ပျိုး ရေးလုပ်ငန်းတွေမှာ ဝင်ရောက်လုပ်ကိုင်နေတဲ့ မြန်မာအလုပ်သမားတွေလည်း ရေဘေးကြုံနေရတာ ဖြစ်ပါတယ်။ ရေဘေးကြောင့် အင်တာနက်နဲ့ ဖုန်းလိုင်းအခက်အခဲရှိနေပြီး သောက်သုံးရေ အခက်ကြုံနေရသူတချို့လည်း ရှိနေတယ်လို့ အလုပ်သမားတွေက ပြောပါတယ်။