ယခုနှစ်အတွင်း စစ်တွေမြို့နယ်က လုပ်ငန်း (၁၁၀)၌ ကောက်ယူခဲ့သည့် စစ်တမ်းအရ ကလေးလုပ်သား(၁၆)ဦးတွေ့ရှိ

၂၀၂၅-၂၀၂၆ ရခိုင်ပြည်နယ် စစ်တွေမြို့တွင် လုပ်ငန်းကဏ္ဍ (၂) ခုနှင့် နမူနာလုပ်ငန်းပေါင်း (၁၁၀) ကို ကောက်ယူခဲ့သည် ကလေးလုပ်သားစစ်တမ်းအစီရင်ခံစာအရ ကလေးလုပ်သား (၁၆)ဦး တွေ့ရှိရပြီး (၃) ဦးသည် စားဝတ်နေရေး အခက်အခဲကြောင့် အန္တရာယ်ရှိသောလုပ်ငန်းခွင်တွင် လုပ်ကိုင်နေရသည်ကို တွေ့ရှိရကြောင်း ပြည်နယ်လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးကျော်သူရက ပြောသည်။
ယနေ့ ပြုလုပ်သည့် ရခိုင်ပြည်နယ် ကလေးအလုပ်သမားပပျောက်ရေးဆိုင်ရာ အလုပ်အကိုင်အခွင့်အလမ်းများ ဖန်တီးရေးလုပ်ငန်းကော်မတီမှ ကြီးမှူးဖွင့်လှစ်သည့် အခြေခံစက်ချုပ်သင်တန်းဖွင့်ပွဲ၌ ပြည်နယ်လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးကျော်သူရက အထက်ပါအတိုင်းပြောကြားခဲ့ခြင်းလည်း ဖြစ်သည်။
ယနေ့ကမ္ဘာတွင် ရာသီဉတုပြောင်းလဲမှုအကျိုးဆက်အဖြစ် ပေါ်ပေါက်လာသည့် သဘာဝဘေးအန္တရာယ်နှင့် ပြည်တွင်းပဋိပက္ခများကြောင့် စားရေရိက္ခာရှားပါးလာခြင်း၊ လူမှုစီးပွားဘဝ အကြပ်အတည်းများနှင့် ရင်ဆိုင်လာရခြင်းကြောင့် ကလေးများအတွက် ပညာသင်ကြားရေးကို အဟန့်အတား ဖြစ်စေပြီး ကလေးများကို အရွယ်မတိုင်ခင် လုပ်ငန်းခွင်သို့ ရောက်စေသည်ကိုတွေ့ရှိရမည် ဖြစ်ကြောင်း ရခိုင်ပြည်နယ်လုံခြုံရေးနှင့် နယ်စပ်ရေးရာဝန်ကြီးက ပြောကြားခဲ့သည်။
ထိုပြင် ကလေးအလုပ်သမားများ များပြားလာခြင်းသည် ကမ္ဘာတစ်ဝှမ်းလုံးတွင် ဖြစ်ပေါ်နေသည့် လူမှုရေးပြဿနာဖြစ်ပြီး ကမ္ဘာ့စစ်တမ်းများအရ ဆင်းရဲနွမ်းပါးမှု တစ်ရာခိုင်နှုန်းတိုးလာတိုင်း နိုင်ငံတိုင်းမှာ ကလေးအလုပ်သမားအနည်းဆုံး ၈ ဒသမ ၇ ရာခိုင်နှုန်းဖြစ်ပေါ်စေကြောင်းလည်း ပြည်နယ်လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးကျော်သူရက ပြောသည်။
မြန်မာနိုင်ငံတွင် အပြည်ပြည်ဆိုင်ရာအလုပ်သမားရေးရာအဖွဲ့ (ILO) ၏ ပြဌာန်းချက်တစ်ခုဖြစ်သည့် အလုပ်လုပ်နိုင်သည့် အနိမ့်ဆုံးအသက်အရွယ်သတ်မှတ်ချက်နှင့်စပ်လျဉ်း၍ တစ်စိုက်မတ်မတ် လုပ်ဆောင်ရေးကို ၂၀၂၀ ဇွန်လက သဘောတူလက်မှတ်ရေးထိုးထားခြင်းလည်း ဖြစ်သည်။
မြန်မာနိုင်ငံသည် အဆိုပါပြဋ္ဌာန်းချက်ကို သဘောတူလက်မှတ်ရေးထိုးသည့် ၁၇၈ မြောက်နိုင်ငံဖြစ်လာပြီး ၂၀၂၀ ခုနှစ်က UNICEF စာရင်းများအရ အသက် ၅ နှစ်မှ ၁၇ နှစ်အရွယ် ကလေးအလုပ်သမား ၉.၃ ရာခိုင်နှုန်းနှင့် ဘေးအန္တရာယ်ရှိသော လုပ်ငန်း်ခွင်တွင် လုပ်ကိုင်နေရသော ကလေးအလုပ်သမားပေါင်း (၆) သိန်းကျော်ရှိကြောင်း လည်း သိရသည်။

နိုင်ငံခြားရေးပြည်ထောင်စုဝန်ကြီးနှင့် UNFPA ၏ မြန် မာနိုင်ငံဆိုင်ရာဌာနေကိုယ်စားလှယ်တို့တွေ့ဆုံ

နိုင်ငံခြားရေးဝန်ကြီးဌာန ပြည်ထောင်စုဝန်ကြီးဦးသန်းဆွေနှင့် ကုလသမဂ္ဂလူဦးရေရန်ပုံငွေအဖွဲ့(UNFPA)၏ မြန်မာနိုင်ငံဆိုင်ရာဌာနေကိုယ်စားလှယ် Mr. Jaime Nadal Roig တို့ ယနေ့ ဒီဇင်ဘာ ၁ ရက်နံနက်ပိုင်းကတွေ့ဆုံခဲ့ကြသည်။
တွေ့ဆုံစဉ် UNFPA ၏ မြန်မာနိုင်ငံတွင်ဆောင်ရွက်လျက်ရှိသော လုပ်ငန်းများနှင့် လုပ်ငန်းအစီအစဉ်များ အကောင်အထည်ဖော်ဆောင်ရွက်မည့်အခြေအနေတို့ကို ဆွေးနွေးခဲ့ကြသည်။

နိုင်ငံသားတိုင်း နိုင်ငံကိုကာကွယ်စောင့်ရှောက်ရန်တာဝန်ရှိ၍ အခြေခံစစ်ပညာရပ်များကိုသင်ကြားလေ့ကျင့်ပေးနေခြင်းဖြစ်

နိုင်ငံသားတိုင်း နိုင်ငံကိုကာကွယ်စောင့်ရှောက်ရန်တာဝန်ရှိ၍ အခြေခံစစ်ပညာရပ်များကိုသင်ကြားလေ့ကျင့်ပေးနေခြင်းဖြစ်သည်ဟု နိုင်ငံတော်ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီး မင်းအောင်လှိုင်မှ ယနေ့ ဒီဇင်ဘာ ၁ ရက်နံနက်ပိုင်းက မန္တလေးတိုင်း၊ ပြင်ဦးလွင်မြို့နယ်၊ ဇီးပင်ကြီးရှိ နိုင်ငံ့ဝန်ထမ်းတက္ကသိုလ်(အထက်မြန်မာပြည်)အားကြည့်ရှုစစ်ဆေးစဥ်ပြောကြားခဲ့ခြင်းဖြစ်သည်။
နိုင်ငံတော်ယာယီသမ္မတမှ ဝန်ကြီးဌာနအားလုံးရှိ နိုင်ငံ့ဝန်ထမ်းများအားလုံး ပုံစံတကျဖြစ်စေရန် နိုင်ငံ့ဝန် ထမ်းတက္ကသိုလ်များကိုဖွင့်လှစ်သင်ကြားလေ့ကျင့်ပေးနေမှု၊ နိုင်ငံသားတိုင်း နိုင်ငံကိုကာကွယ်စောင့်ရှောက်ရန် တာဝန်ရှိ၍ နိုင်ငံတော်ကာကွယ်ရေးအတွက် အထောက်အကူပြုနိုင်ရန် အခြေခံစစ်ပညာရပ်များကိုသင်ကြားလေ့ကျင့်ပေးနေမှုတို့ကို ပြောကြားခဲ့သည်။
" အခြေခံစစ်ပညာပညာရပ်တွေ ထည့်သွင်းသင်ကြားပေးတာကြောင့် နိုင်ငံ့ဝန်ထမ်းတွေအနေနဲ့ အမိန့်နာခံတတ်မှု၊ စည်းကမ်းစနစ်တကျ လုပ်ကိုင်ဆောင်ရွက်တတ်မှု၊ အစုအဖွဲ့စနစ်နဲ့ စုစည်းညီညွတ်တဲ့‌စိတ်ဓာတ်နဲ့ လုပ်ကိုင်ဆောင်ရွက်တတ်တဲ့ အလေ့အကျင့်ကောင်းတွေရှိလာမှာဖြစ်ပါတယ်"ဟု ယာယီသမ္မတက ပြော သည်။
နိုင်ငံ့ဝန်ထမ်းတက္ကသိုလ်များတွင် ရုံးလုပ်ငန်းစည်းမျဉ်း၊စည်းကမ်းများ အုပ်ချုပ်မှုလုပ်ငန်းလုပ်ငန်းများ စနစ်တကျဖြစ်စေရေးအတွက် အမှုထမ်းများ၊ အရာထမ်းများအား ဘာသာရပ်များအလိုက်သင်ကြားလေ့ကျင့်ပေးရာတွင် ထိရောက်သည့်သင်ကြားလေ့ကျင့်မှုများဖြစ်ရန်လိုပြီး ဝန်ထမ်းများစိတ်ဓာတ်စည်းကမ်း ကောင်းမွန်စေရေး၊ ပါတီနိုင်ငံရေးကင်းရှင်းသည့်ဝန်ထမ်းများ၊ နိုင်ငံကိုချစ်မြတ်နိုးသည့်စိတ်ရှိသည့် ဝန်ထမ်းကောင်းများဖြစ်အောင်လေ့ကျင့်ပေးရမည်ဟု ပြောသည်။
" သင်ကြားပေးတဲ့ဘာသာရပ်တွေ ထိရောက်အကျိုးရှိစေဖို့ဆောင်ရွက်ပေးရပါမယ်။ သင်ရိုးညွှန်းတမ်းတွေကလည်း မိမိတို့နိုင်ငံနဲ့ကိုက်ညီတဲ့ သင်ရိုးညွှန်းတမ်းတွေဖြစ်ဖို့လိုပါတယ်။ ဥပဒေနှင့်ပတ်သက်ရင် မိမိတို့ဟာ ဒီမိုကရေစီလမ်းကြောင်းပေါ်လျှောက်လှမ်းနေတာကြောင့် ဥပဒေကိုသိရှိနားလည်ဖို့ အသက်(၁၈)နှစ်ပြည့်ပြီးသူတိုင်းအားလုံး ဥပဒေကိုသိရှိနားလည်ကြဖို့လိုတာကြောင့် အခြေခံပညာအဆင့်ကစပြီး ဥပဒေအသိပညာတွေကို သင်ကြားပေးနေပါတယ်"ဟု နိုင်ငံတော် ယာယီသမ္မတက ပြောသည်။
နိုင်ငံ့ဝန်ထမ်းများအားလုံးသည် အသက်(၁၈)နှစ်ပြည့်ပြီးသူများဖြစ်၍ ဥပဒေကိုသိရှိနားလည်ရန်လိုအပ်ပြီး သင်တန်းများဖွင့်လှစ်သင်ကြားရာ၌ ဥပဒေပညာရပ်များကိုထည့်သွင်းသင်ကြားပေးရမည်ဖြစ်ကာ ဝန်ကြီးဌာနများအားလုံး၊ တိုင်းနှင့် ပြည်နယ်အားလုံးရှိ ရုံးလုပ်ငန်းစည်းမျဉ်းများ စနစ်တကျရှိစေရေးအတွက် နိုင်ငံ့ဝန်ထမ်းတက္ကသိုလ်မှစတင်ပြီး အခြေခံရရှိအောင် ဆောင်ရွက်ရမည်ဟု နိုင်ငံတော် ယာယီသမ္မတက ပြောကြားခဲ့သည်။
ထို့နောက် နိုင်ငံတော်ယာယီသမ္မတသည် နိုင်ငံ့ဝန်ထမ်းတက္ကသိုလ်အတွင်း၊ ငလျင်ဒ-ဏ်ကြောင့်ထိခို-က်ပျ-က်စီးမှုဖြစ်ပေါ်ခဲ့သည့် နီလာခန်းမနှင့် မဟောသဓခန်းမ၊ ခတ္တာဆောင်ရှိ သင်တန်းသူအိပ်ဆောင်များအား ကြည့်ရှုစစ်ဆေးခဲ့သည်။

ရဲတပ်ဖွဲ့ဝင်များနှင့် မီးသတ်တပ်ဖွဲ့ဝင်များသည် ပြည်သူများနှင့် တို-က်ရို-က်ထိတွေ့ရသည့်အဖွဲ့အစည်းများဖြစ်၍ ပြည်သူ့ဆက်ဆံရေးကောင်းမွန်ရန်လို

ပြည်သူ့ဆက်ဆံရေးကောင်းမွန်၍အလေ့အကျင့်ကောင်းရှိသောတပ်ဖွဲ့ဝင်များဖြစ်စေရေးနှင့်ပတ်သက်၍ ရဲအရာရှိလေ့ကျင့်ရေးကျောင်း(ဇီးပင်ကြီး)နှင့် ဗဟိုမီးသတ်သင်တန်းကျောင်း(ပြင်ဦးလွင်)တို့ကို နိုင်ငံတော်ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီး မင်းအောင် လှိုင်မှ ယနေ့ ဒီဇင်ဘာ ၁ ရက်နံနက်ပိုင်းက ကြည့်ရှုစစ်ဆေးစဥ် အထက်ပါအတိုင်းပြောကြားခဲ့ခြင်းဖြစ်သည်။
ရဲတပ်ဖွဲ့ဝင်များနှင့် မီးသတ်တပ်ဖွဲ့ဝင်များသည် ပြည်သူများနှင့် တို-က်ရို-က်ထိတွေ့ရသည့်အဖွဲ့အစည်းများဖြစ်ပြီး တရားဥပဒေစိုးမိုးရေးနှင့် လုံခြုံရေးဆိုင်ရာများကို ဆောင်ရွက်ရခြင်းဖြစ်၍ ပြည်သူ့ဆက်ဆံရေးကောင်းမွန်ရန်လိုသဖြင့် ပြည်သူ့ဆက်ဆံရေးကောင်းမွန်ရန် တပ်ပြင်ပစည်းရုံးရေးပညာရပ်များကိုသင်ကြားပေးရမည်ဟု ပြောသည်။
" အသိပညာအားနည်းတဲ့သူတွေက ဥပဒေလိုက်နာမှုအားနည်းတယ်။ ဒါ့ကြောင့် မိမိတို့တာဝန်ထမ်းဆောင်ရာဒေသအလိုက် ပြည်သူတွေရဲ့ စည်းကမ်းလိုက်နာမှုကိုကြည့်ပြီး စည်းကမ်းထိန်းသိမ်းမှုတွေ ဆောင်ရွက်ရပါမယ်။ မိမိတို့နိုင်ငံဟာ ဒီမိုကရေစီစနစ်ကိုလျှောက်လှမ်းနေတာကြောင့် ပြည်တွင်းလုံခြုံရေးနဲ့ တရားဥပဒေစိုးမိုးရေးကို ရဲတပ်ဖွဲ့ဝင်တွေက ဆောင်ရွက်ရပါတယ်။ ဒါ့ကြောင့် ရဲတပ်ဖွဲ့ဝင်တွေရဲ့ စွမ်းရည်များမြင့်မားလာစေဖို့ကို ဆောင်ရွက်ပေးရပါမယ်"ဟု နိုင်ငံတော် ယာယီသမ္မတက ပြောသည်။
"ကူညီပါရစေ"ဆိုသည့် မြန်မာနိုင်ငံရဲတပ်ဖွဲ့၏ ဆောင်ပုဒ်အတိုင်း ပြည်သူများက အားကိုးရသည့် ရဲတပ်ဖွဲ့ဝင်ကောင်းများဖြစ်စေရေး ကြိုးပမ်းဆောင်ရွက်ကြရန်၊ အမျိုးသမီးတပ်ဖွဲ့ဝင်များ၏ နိုင်ငံ့တာဝန်ထမ်းဆောင်မှုများကို လေးစားအသိအမှတ်ပြုပြီး အချင်းချင်းညီရင်း အကို၊ မောင်ရင်းနှမစိတ်ဓာတ်ဖြင့် အတူတကွတာဝန်ထမ်းဆောင်ရန် မှာကြားသည်။
ထို့နောက် နိုင်ငံတော်ယာယီသမ္မတသည် သင်တန်းကျောင်းပြတိုက်အတွင်း ခင်းကျင်းပြသထားသည့် ကိုလိုနီခေတ်ကအသုံးပြုခဲ့သည့် ရဲတပ်ဖွဲ့အသုံးအဆောင်ပစ္စည်းများ၊ ရဲတပ်ဖွဲ့တံဆိပ်၊ ပုခုံးတံဆိပ်များ၊ လက်ရှိအသုံးပြုလျက်ရှိသည့် ရဲတပ်ဖွဲ့အသုံးအဆောင်ပစ္စည်းများ၊ အဆင့်တံဆိပ်များနှင့် ဝတ်စုံများ၊ ရဲတပ်ဖွဲ့သုံးလက်နက်များ၊ မှတ်တမ်းဓာတ်ပုံများ၊ ပြည်ပနိုင်ငံများမှပေးပို့သည့် အမှတ်တရပစ္စည်းများ၊ သင်တန်းကျောင်းစာကြည့်တိုက်၊ ဗဟိုမီးသတ်သင်တန်းကျောင်း (ပြင်ဦးလွင်)တို့အားကြည့်ရှုစစ်ဆေးပြီး အိမ်ထောင်သည်လိုင်းခန်းအတွင်းရှိ ရဲမေများအားရင်းရင်းနှီးနှီးနှုတ်ဆက်၍ လိုအပ်သည်များကို မေးမြန်းဖြည့်ဆည်းဆောင်ရွက်ပေးခဲ့သည်

ဝန်ထမ်းကောင်းမှ နိုင်ငံကောင်းနိုင်မည်ဖြစ်ဟု နိုင်ငံတော် ယာယီသမ္မတပြော

နိုင်ငံကောင်းဖြစ်စေရေးအတွက် ဝန်ထမ်းကောင်းများရှိရန် လိုအပ်မှုနှင့် ပတ်သက်၍ နိုင်ငံတော် ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီး မင်းအောင်လှိုင်မှ ယနေ့ ဒီဇင်ဘာ ၁ ရက်မွန်းလွဲပိုင်းက မန္တလေးတိုင်း၊ ပြင်ဦးလွင်မြို့နယ်၊ ဇီးပင်ကြီးရှိ နိုင်ငံ့ဝန်ထမ်းတက္ကသိုလ်(အထက်မြန်မာပြည်)၊ ရဲအရာရှိလေ့ကျင့်ရေးကျောင်း(ဇီးပင်ကြီး)နှင့် ဗဟိုမီးသတ်သင်တန်းကျောင်း(ပြင်ဦးလွင်)တို့မှ နည်းပြအရာရှိများနှင့် သင်တန်းသား၊ သင်တန်းသူများကိုတွေ့ဆုံစဥ် ပြောကြားခဲ့ခြင်းဖြစ်သည်။
" ဝန်ထမ်းကောင်းမှ နိုင်ငံကောင်းနိုင်မှာဖြစ်ပါတယ်။ ဘယ်နိုင်ငံမှာဖြစ်စေ အစိုးရအဖွဲ့နဲ့ နိုင်ငံ့ဝန်ထမ်းဆိုပြီးရှိတယ်။ အစိုးရက နိုင်ငံရေးဦးဆောင်မှုပေးပြီး မူဝါဒချ မှတ်ပေးတယ်။ နိုင်ငံ့ဝန်ထမ်းတွေက အကောင်အထည်ဖော်ဆောင်ရတယ်။ အစိုးရအဖွဲ့က နိုင်ငံရေးအရ ဦးဆောင်သူတွေ အပြောင်းအလဲရှိနိုင်ပေမယ့် နိုင်ငံ့ဝန် ထမ်းတွေကတော့ ဆက်လက်တာဝန်ထမ်းဆောင်ရပါတယ်။ နိုင်ငံရေးမှာ အာဏာရပါတီအလိုက်၊ အစိုးရအဖွဲ့အလိုက်မူဝါဒကွဲပြားပေမယ့် ရုံး/ဌာနတွေကတော့ ပြောင်းလဲမှုရှိမှာမဟုတ်ပါဘူး"ဟု နိုင်ငံတော် ယာယီသမ္မတက ပြောသည်။
ထို့ပြင် နိုင်ငံတော် ယာယီသမ္မတမှ ၂၀၁၀ ခုနှစ်မှစ၍ ပြည်သူလူထုတစ်ရပ်လုံးလိုလားတောင့်တသည့် ပါတီစုံဒီမိုကရေစီလမ်းကြောင်းပေါ်တွင် လျှောက်လှမ်းခဲ့မှု၊ နိုင်ငံတော်တွင်ဖြစ်ပေါ်ကြုံတွေ့ခဲ့ရသည့် နိုင်ငံရေးဖြစ်ပေါ် ပြောင်းလဲမှု အခက်အခဲ၊ အကြပ်အတည်းများကို တပ်မတော်မှဦးဆောင်ဖြေရှင်းခဲ့မှု၊ နိုင်ငံတော်၏လွတ်လပ်ရေးနှင့်အချုပ်အခြာအာဏာသည် ခေတ်အဆက် ဆက်ထိန်းသိမ်းကာကွယ်ရမည့်အချက်များဖြစ်မှုတို့ကို ရှင်းလင်းပြောကြားပြီး အနာဂတ်တွင် ခေတ်မီဖွံဖြိုးတိုးတက်ပြီး တည်ငြိမ်အေးချမ်းသည့် နိုင်ငံတော်ကိုပုံဖော် တည်ဆောက်ကြရမည်ဟု ပြောသည်။
ထို့အတူ လာမည့် ဒီဇင်ဘာ ၂၈ ရက်မှစတင်၍ အပိုင်းလိုက်ကျင်းပမည့် ပါတီစုံဒီမိုကရေစီအထွေထွေရွေးကောက်ပွဲကျင်းပရန်ဆောင်ရွက်လျက်ရှိမှု၊ ရွေးကောက်ပွဲတွင် မဲမသမာမှုပြုလုပ်၍မရနိုင်သည့် မြန်မာအီလက်ထရောနစ်မဲပေးစနစ်(MEVM)များဖြင့် ဆန္ဒမဲများပေးနိုင်ရေးစီမံဆောင်ရွက်ထားမှု၊ စီးပွားရေးစနစ်များတွင် ကုန်သွယ်မှုလိုငွေများရှိခဲ့မှု၊ ယင်း လိုငွေများကို Non-Trade များမှရရှိသည့် ငွေများဖြင့်ပြန်လည်ဖြည့်တင်းခဲ့ကြမှု၊ ဒီမိုကရေစီအစိုးရသက်တမ်းနှစ်ခုတွင် ကုန်သွယ်မှုလိုငွေများရှိခဲ့မှု၊ Non-Trade မှရသည့်ငွေများတွင် ပြည်ပမှချေးငွေများ၊ ထောက်ပံ့ငွေများပါဝင်မှုတို့ကိုလည်း ရှင်းလင်းပြောကြားခဲ့သည်။
ထို့ကြောင့် ပြည်တွင်းကုန်ထုတ်လုပ်မှုများကိုအားပေးဆောင်ရွက်ပြီး ပြည်ပသို့တင်ပို့နိုင်မည့်ပို့ကုန်များရရှိမှသာ နိုင်ငံတော်အတွက်လိုအပ်သည့်နိုင်ငံခြားငွေများရရှိကာ ကုန်သွယ်မှုလိုငွေများလျော့နည်းလာမည်ဖြစ်ကာ ပြည်တွင်း၌ လိုအပ်လျက်ရှိသည့် ထုတ်ကုန်ပစ္စည်းများကို လုံလောက်စွာထုတ်လုပ်ပြီး ပိုလျှံသည့် ထုတ် ကုန်များကို ပြည်ပသို့တင်ပို့နိုင်ပါက နိုင်ငံအတွက်များစွာအကျိုးဖြစ်ထွန်းစေမည်ဟု ပြောကြားခဲ့သည်။
ထို့နောက် နိုင်ငံတော်ယာယီသမ္မတသည် သင်တန်းသား၊ သင်တန်းသူများအား ရင်းရင်းနှီးနှီးနှုတ်ဆက်ခဲ့သည်။

ယူကရိန်း ငြိမ်းချမ်းရေး အစီအစဉ်ကို သဘောမတူရသေးဟု မက်ခရွန် ပြောကြား

ယူကရိန်းအတွက် ငြိမ်းချမ်းရေး အစီအစဉ်ကို မိမိသဘောမတူရသေးကြောင်း ပြင်သစ်သမ္မတ အီမန်နျူရယ် မက်ခရွန်က ပြောကြားခဲ့ပြီး နယ်မြေဆိုင်ရာ ကိစ္စရပ်များကို ဇယ်လန်စကီးနှင့် သဘောတူညီချက် ရယူသင့်ကြောင်း ဖြည့်စွက်ပြောကြားခဲ့သည်။
“အမှန်တကယ်တော့၊ အခုချိန်ထိ အစီအစဉ်တစ်ခု မရှိသေးပါဘူး” ဟု ၎င်းက ပဲရစ်မြို့၌ ဇယ်လန်စကီးနှင့် ဆွေးနွေးပြီးနောက် သတင်းစာ ရှင်းလင်းပွဲတွင် အမေရိကန်ပြည်ထောင်စုနှင့် ဆွေးနွေးမှုများအပြင် အမေရိကန်၏ အစီအစဉ်ကို ရုရှားနှင့် သဘောတူနိုင်မည့် အလားအလာများအပေါ် မှတ်ချက်ပေးရန် တောင်းဆိုရာတွင် ပြောကြားခဲ့သည်။
မက်ခရွန်က အမေရိကန်ပြည်ထောင်စု၏ ကြားဝင်စေ့စပ်ပေးမှု ကြိုးပမ်းအားထုတ်မှုများအတွက် ကျေးဇူးတင်ရှိကြောင်း ပြောကြားခဲ့သော်လည်း ရုရှား ခေါင်းဆောင်မှုနှင့် ရပ်တည်ချက်များ ညှိနှိုင်းရန် မကြာမီ မော်စကိုသို့ သွားရောက်မည့် “အမေရိကန် ကိုယ်စားလှယ်များ ကိုယ်စား ပြောဆိုလိုခြင်း မရှိကြောင်း” အလေးပေး ပြောကြားခဲ့သည်။
သို့သော်လည်း ပြင်သစ်သမ္မတက နယ်မြေဆိုင်ရာ ကိစ္စရပ်များကို “ဇယ်လန်စကီးကသာ” ဖြေရှင်းနိုင်မည်ဖြစ်ပြီး၊ ထိန်းသိမ်းထားသော ရုရှား၏ ပိုင်ဆိုင်မှုများနှင့် လုံခြုံရေး အာမခံချက်များဆိုင်ရာ ကိစ္စရပ်များကိုမူ ဥရောပနိုင်ငံများနှင့် ဆွေးနွေးသင့်ကြောင်း အလေးအနက် ပြောကြားခဲ့သည်။ “ဒါကြောင့်၊ ဒါက အကြိုအဆင့်တစ်ခုသာ ဖြစ်ပါတယ်” ဟု သူက ဖြည့်စွက်ပြောကြားခဲ့သည်။
ရုရှား သမ္မတရုံး ပြောရေးဆိုခွင့်ရှိသူ ဒမီထရီ ပက်စကော့ဗ်ကမူ သမ္မတ ဗလာဒီမာ ပူတင်နှင့် အမေရိကန် အထူးသံတမန် စတိဗ် ဝစ်ကော့ဖ်တို့အကြား အစည်းအဝေးကို ဒီဇင်ဘာလ ၂ ရက်နေ့ နေ့လယ်ပိုင်းတွင် ပြုလုပ်ရန် စီစဉ်ထားကြောင်း ယခင်က ပြောကြားခဲ့သည်။ ဝစ်ကော့ဖ်သည် နိုဝင်ဘာလ ၃၀ ရက်နေ့က ဖလော်ရီဒါတွင် ယူကရိန်း ကိုယ်စားလှယ်အဖွဲ့နှင့် ဆွေးနွေးပွဲများတွင် ပါဝင်ခဲ့သည်။

တောင်ငူ ဓါတ်အားခွဲရုံစီမံကိန်း ရာခိုင်နှုန်း (၈၀)ကျော် ပြီးစီးနေပြီဖြစ်

ပဲခူးတိုင်းဒေသကြီး တောင်ငူမြို့နယ် စပါးကြွယ်ကျေးရွာအနီး တည်ဆောက်နေသည့် ၅၀၀ ကေဗွီ စပါးကြွယ် တောင်ငူဓါတ်အားခွဲရုံ စီမံကိန်းသည် (၈၁ ဒဿမ ၀၇)ရာခိုင်နှုန်း ဆောင်ရွက်ပြီးစီနေပြီးဖြစ်ကြောင်း သိရသည်။
စီမံကိန်းတစ်ခုလုံးရာနှုန်းပြည့် ပြီးစီးနိုင်ရေး ကြိုပမ်းဆောင်ရွက်နေကြောင်းနှင့်အဆိုပါ စီမံကိန်းတည်ဆောက်နေသည့် အခြေအနေများကို လျှပ်စစ်စွမ်းအားဝန်ကြီးဌာနက ဦးညဏ်ထွန်းက ယမန်နေ့ က သွားရောက်ကြည့်ရူခဲ့ကြောင်း သိရသည်။
လျှပ်စစ်ဓါတ်အားပို့လွှတ်ရေးနှင့် ကွပ်ကဲရေးဦးစီးဌာနက အကောင်အထည်ဖော်ဆောင်ရွက်နေခြင်းဖြစ်ပြီး မန္တလေးငလျင်ကြီးကြောင့် ထိခိုက်သွားသည့် Shunt Reactor Bushing ပျက်ဆီးသွားမှုကို အမြန်ဆုံးစစ်ဆေးပြင်ဆင်ဆောင်ရွက်သွားရန်လိုကြောင်း နှင့် သတ်မှတ်ကာလအတွင်း ပြီးပြတ်စေရေး ကြပ်မတ်ဆောင်ရွက်သွားလည်း ပြည်ထောင်စုဝန်ကြီးက ပြောကြားခဲ့ကြောင်း သိရသည်။
အဆိုပါ စပါးကြွယ်(တောင်ငူ) - ဘုရားကြီး ဓါတ်အားလိုင်းသည် (၁၀၈ဒဿမ၃၄)မိုင်ရှည်လျားပြီး တာဝါတိုင်ပေါင်း(၃၆၉)တိုင်ဖြင့် လုပ်ငန်းဆောင်ရွက်သွားမည်ဖြစ်ကြောင်းလည်း သိရသည်။

တီးတိန်မြို့ကိုဗဟိုပြု၍ အင်အားအနည်းငယ်ရှိ ငလျင်လှုပ်ခတ်

တီးတိန်မြို့ကိုဗဟိုပြု၍ ယနေ့ ဒီဇင်ဘာ ၂ ရက်နံနက်ပိုင်းက အင်အားအနည်းငယ်ရှိ ငလျင်တစ်ခုလှုပ်ခတ်ခဲ့ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနထံမှ သိရသည်။
တီးတိန်မြို့၏ အရှေ့မြောက်ဘက်(၁၃)မိုင်ခန့်အကွာ၊ အနက်(၆၄)ကီလိုမီတာကိုဗဟိုပြု၍ အင်အားရစ်(ခ်) တာစကေး(၄ ဒသမ ၉)အဆင့်ရှိ အင်အားအနည်းငယ်ရှိသော ငလျင်တစ်ခု ယနေ့ ဒီဇင်ဘာ ၂ ရက်နံနက် ၁ နာရီ ၂၅ မိနစ် ၆ စက္ကန့်ကလှုပ်ခတ်ခဲ့ကြောင်း သိရသည်။
အဆိုပါ ငလျင်လှုပ်ခတ်ခဲ့မှုအား တမူးမြေငလျင်စခန်းမှ တိုင်းထွာရရှိခဲ့ခြင်းဖြစ်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနထံမှ သိရသည်။

လူကယ်ပြန် ပြည်ထောင်စုဝန်ကြီ းဒေါက်တာစိုးဝင်းမှ UNFPA ၏ မြန်မာနိုင်ငံဆိုင်ရာဌာနေကိုယ်စားလှယ်ကို တွေ့ဆုံ

လူကယ်ပြန် ဝန်ကြီးဌာနနှင့် UNFPA ကြားပူးပေါင်းဆောင်ရွက်နေမှုများကိုဆွေးနွေး
လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီးဒေါက်တာစိုးဝင်းသည် ကုလသမဂ္ဂလူဦးရေရန်ပုံငွေအဖွဲ့(UNFPA)၏ မြန်မာနိုင်ငံဆိုင်ရာဌာနေကိုယ်စားလှယ် Mr. Jaime Nadal Roig အား ဒီဇင်ဘာ ၁ ရက်မွန်းလွဲပိုင်းက တွေ့ဆုံခဲ့သည်။
တွေ့ဆုံစဉ် UNFPA မှ ငလျင်ဘေးသင့်ဒေသများအတွက် Dignity Kits များထောက်ပံ့ပေးခဲ့မှု၊ လူမှုဝန်ထမ်းဦးစီးဌာနလက်အောက်ရှိ အကြမ်းဖက်ခံရသည့် အမျိုးသမီးများအား ဝန်ဆောင်မှုပေးသည့်စင်တာ (OSWSC)များတွင် အကြမ်းဖက်ခံရသည့် အမျိုးသမီးများအတွက် UNFPA မှ ထောက်ပံ့ပေးနေမှုတို့ကို ဆွေးနွေးခဲ့ကြသည်။
ထို့ပြင် UNFPA ၏ နိုင်ငံခြားသားဝန်ထမ်းများအတွက် ပြည်ဝင်ခွင့်ဗီဇာများ ညှိနှိုင်းဆောင်ရွက်ပေးခဲ့မှုနှင့် လူမှုဝန်ထမ်းဦးစီးဌာနနှင့် UNFPA တို့ကြား ကျား၊ မ တန်း တူညီမျှရေးနှင့် အမျိုးသမီးများစွမ်းဆောင်ရည်မြင့်မားရေးလုပ်ငန်းအစီအစဉ် Workplan အား သက်တမ်းတိုးလက်မှတ်ရေးထိုး၍ လုပ်ငန်းများဆက်လက်ပူးပေါင်းဆောင်ရွက်ရေးတို့ကိုလည်း ဆွေးနွေးခဲ့ကြသည်။

လက်ကျန်နည်းပြီး ဝယ်လိုအားကောင်းနေသည့်အတွက် စျေးကွက်အတွင်း ပဲကြီးဈေးမြင့်တက်လာ

ဒီဇင်ဘာလပထမပတ်တွင် မန္တလေးကုန်စည်ဒိုင်၌ ပဲကြီးလက်ကျန်နည်းနေပြီး ပြည်တွင်းပဲကြော်၊ ပဲလှော်လုပ်ငန်းရှင်များမှ ဝယ်ယူမှုရှိနေသည့်အတွက် ဈေးမြင့်တက်လာကြောင်း ဈေးကွက်အတွင်းမှ စုံစမ်းသိရှိရသည်။
ပဲကြီး(ကြီး) ၅၅.၂၅ ပိဿာဝင် သုံးတင်းတစ်အိတ်လျှင် ယခုတစ်ပတ် ကျပ် ၆၁၀,၀၀၀ မှ ၆၃၀,၀၀၀၊ ယခင်တစ်ပတ် ကျပ် ၆၀၀,၀၀၀ မှ ၆၁၀,၀၀၀ ၊ ယခင်လ ကျပ် ၄၇၀,၀၀၀ မှ ၄၈၀,၀၀၀ ဖြစ်သည်။
ယခင်တစ်ပတ်ထက် ကျပ် ၁၀,၀၀၀မှ ၂၀,၀၀၀၊ ယခင်လထက် ကျပ် ၁၄၀,၀၀၀ မှ ၁၅၀,၀၀၀ခန့် ဈေးမြင့်တက်လာသည်။
ပဲကြီး(လတ်) ၅၅.၂၅ ပိဿာဝင်သုံးတင်းတစ်အိတ်လျှင် ယခုတစ်ပတ် ကျပ် ၅၅၀,၀၀၀ မှ ၅၇၀,၀၀၀၊ ယခင်တစ်ပတ် ကျပ် ၅၅၀,၀၀၀ မှ ၅၆၀,၀၀၀ ၊ ယခင်လ ကျပ် ၄၃၀,၀၀၀ မှ ၄၅၀,၀၀၀ ဖြစ်သည်။
ယခင်တစ်ပတ်ထက် အနိမ့်စ ဈေးငြိမ်နေပြီး အမြင့်စ ၁၀,၀၀၀ ကျပ်၊ ယခင်လထက် ကျပ် ၁၀၀,၀၀၀ မှ ၁၂၀,၀၀၀ ခန့် ဈေးမြင့်တက်လာသည်။
ပဲကြီး(သေး) ၅၅.၂၅ ပိဿာဝင်သုံးတင်းတစ်အိတ်လျှင် ယခုတစ်ပတ် ၅၂၀၀၀၀ ကျပ်၊ ယခင်တစ်ပတ် ကျပ် ၅၂၀,၀၀၀ မှ ၅၃၀,၀၀၀ ၊ ယခင်လ ကျပ် ၃၃၀,၀၀၀ မှ ၃၅၀,၀၀၀ ဖြစ်သည်။
ယခင်တစ်ပတ်ထက် ၁၀,၀၀၀ ကျပ် ဈေးနိမ့်လာပြီး၊ ယခင်လထက် ကျပ် ၁၇၀,၀၀၀ မှ ၁၉၀,၀၀၀ ခန့် ဈေးမြင့်တက်လာကြောင်း သိရသည်။