စစ်အုပ်ချုပ်ရေး ကြေညာခဲ့တဲ့ သမ္မတဟောင်းကို သေဒဏ်ပေးဖို့ တောင်ကိုရီးယား အစိုးရရှေ့နေတွေတောင်းဆို

တောင်ကိုရီးယားမှာ စစ်အုပ်ချုပ်ရေးကြေညာခဲ့တာနဲ့ပတ်သက်ပြီး အပြစ်ရှိကြောင်း တွေ့ရှိပါက သမ္မတဟောင်း ယွန်းဆွတ်ယိုးလ်ကို သေဒဏ်ချမှတ်ဖို့ အစိုးရရှေ့နေတွေက တောင်းဆိုခဲ့ကြပါတယ်။
ဆိုးလ်မြို့ရှိ တရားရုံးတခုဟာ သမ္မတဟောင်း ယွန်းဆွတ်ယိုးလ်ကို ပြီးခဲ့တဲ့နေ့ ရုံးတင်စစ်ဆေးမှုမှာ နောက်ဆုံးလျှောက်လဲချက်တွေကို ကြားနာခဲ့ပြီး အစိုးရရှေ့နေတွေကတော့ သူ့ကို ပုန်ကန်မှု ခေါင်းဆောင် အဖြစ် စွပ်စွဲခဲ့ကြပါတယ်။
၂၀၂၄ ခုနှစ် ဒီဇင်ဘာလအတွင်းက တောင်ကိုရီးယားမှာ စစ်အုပ်ချုပ်ရေးပြဋ္ဌာန်းဖို့ ယွန်းဆွတ်ယိုးလ်က ကြိုးပမ်းခဲ့ပြီး ဒီလိုကြေညာမှုဟာ နာရီပိုင်းသာကြာခဲ့ပေမယ့် နိုင်ငံကို နိုင်ငံရေးမငြိမ်မသက်မှုတွေထဲ တွန်းပို့ခဲ့ပါတယ်။ နောက်ပိုင်းမှာတော့ သူ့ကို လွှတ်တော် ရာထူးမှ ဖြုတ်ချခဲ့ပြီး ရုံးတင်စစ်ဆေးဖို့ ဖမ်းဆီးထိန်းသိမ်းခံခဲ့ရပါတယ်။
ယွန်းဆွတ်ယိုးလ်ကတော့ သူအပေါ် စွဲချက်တွေကို ငြင်းဆိုခဲ့ပါတယ်။ပုန်ကန်မှုကို ဦးဆောင်တယ်ဆိုတဲ့ စွဲချက်ဟာ သေဒဏ် သို့မဟုတ် ထောင်ဒဏ်တသက် ချမှတ်နိုင်ပါတယ်။
တောင်ကိုရီးယားမှာ နှစ်ပေါင်း ၃၀ နီးပါးအတွင်း ဘယ်သူ့ကိုမှ ကွပ်မျက်ခဲ့တာမျိုးမရှိပါဘူး။ ၁၉၉၆ ခုနှစ်မှာ ယခင်စစ်အာဏာရှင် ချွန်ဒူးဟွမ်ဟာ ၁၉၇၉ ခုနှစ် စစ်အာဏာသိမ်းမှုအတွက် သေဒဏ်ချမှတ်ခံခဲ့ရပေမယ့် နောက်ပိုင်းမှာ ပြစ်ဒဏ်ကို ထောင်ဒဏ်တသက်တကျွန်း ပြောင်းလဲခဲ့ပါတယ်။
ပုန်ကန်မှုဆိုင်ရာ ရုံးတင်စစ်ဆေးမှုကို ယွန်းဆွတ်ယိုးလ်အစိုးရအဖွဲ့ရှိ ကာကွယ်ရေးဝန်ကြီးဟောင်း ကင်ယောင်ဟွန်းနဲ့ ရဲချုပ်ဟောင်း ချိုဂျီဟိုတို့ကိုလည်း စစ်ဆေးခဲ့ပါတယ်။
အစိုးရရှေ့နေတွေကတော့ ယွန်းဆွတ်ယိုးလ်ရ့ တရားမဝင်အမိန့်တွေကို လိုက်နာမှုအတွက် သူတို့နှစ်ယောက်ကို ထောင်ဒဏ်တသက်နဲ့ ထောင်ဒဏ် ၂၀ နှစ် ချမှတ်ဖို့ တောင်းဆိုခဲ့ပြီး အခြားတရားခံငါးဦးယောက်လည်း အမှုတွဲမှာ ပါဝင်နေပါသေးတယ်။
တရားရေးဆိုင်ရာ ကြားနာမှုတွေဟာ ပြီးခဲ့တဲ့ သောကြာနေ့မှာ ပြီးဆုံးဖို့ မျှော်လင့်ထားပေမယ့် တရားခံရှေ့နေတွေက ရုံးတင်စစ်ဆေးမှုတွေကို နှောင့်နှေးစေခဲ့တယ်လို့ သတင်းတွေထွက်ပေါ်ခဲ့ပြီး အင်္ဂါနေအထိ ကြားနာစစ်ဆေးမှုတွေ ဆက်လက်လုပ်ဆောင်ခဲ့ရတာပါ။ တရားရုံးကတော့ ဒီအမှုကို ဖေဖော်ဝါရီလမှာ အမိန့်ချသွားဖို့ရှိနေပါတယ်။

ဒေါ်သက်သက်ခိုင်နဲ့ ပါတီဗဟိုအလုပ်အမှုဆောင်တယောက် ခေါ်ယူစစ်ဆေးခံနေရတယ်လို့ သတင်းထွက်

ပြည်သူ့ရှေ့ဆောင်ပါတီ ဥက္ကဋ္ဌ ဒေါ်သက်သက်ခိုင်နဲ့ ပါတီဗဟိုအလုပ်အမှုဆောင် တယောက်ကို သက်ဆိုင်ရာ တာဝန်ရှိသူတွေက မနေ့ ဇန်နဝါရီ ၁၃ ရက်၊ ညနေပိုင်းက ခေါ်ယူစစ်ဆေး မေးမြန်းနေတယ်လို့ နိုင်ငံရေး အသိုင်းအဝိုင်းကြား သတင်းတွေ ထွက်ပေါ်နေပါတယ်။
“ကျွန်တော်တို့ သိထားတာတော့ ဖမ်းတယ်၊ ထိန်းသိမ်းခံရတယ်ဆိုတာတော့ မဟုတ်ဘူး၊ ခေါ်မေးတဲ့အဆင့်လို့ သိရတယ်။ တွေ့ဆုံဆွေးနွေးဖို့ ဖိတ်ကြားခံရတာလို့လည်း ကြားတယ်။ ဘယ်ဟာအမှန်လဲတော့ ကျွန်တော်တို့လည်း မသိသေးဘူး” လို့ နိုင်ငံရေး အသိုင်းအဝိုင်းနဲ့ နီးစပ်သူ တယောက်က ပြောပါတယ်။
အတည်မပြုနိုင်သေးတဲ့ သတင်းတွေအရ ဒေါ်သက်သက်ခိုင်ကို သက်ဆိုင်ရာ တာဝန်ရှိသူတွေက မနေ့ ဇန်နဝါရီ ၁၃ ရက်၊ ညနေ ၆ နာရီခွဲဝန်းကျင်မှာ ၎င်းနေထိုင်ရာ ဗဟန်းမြို့နယ်ရှိ နေအိမ်ကနေ ခေါ်ဆောင်သွားခဲ့တာ ဖြစ်တယ်လို့ သိရပါတယ်။
ဒီအကြောင်းအရာနဲ့ ပတ်သက်ပြီး အတည်ပြုနိုင်ဖို့ VOM က ပြည်သူ့ရှေ့ဆောင် ပါတီဝင်တွေကို ဖုန်းအကြိမ်ကြိမ် ခေါ်ဆိုခဲ့ပေမယ့် ဖုန်းလက်ခံ ဖြေကြားခြင်း မရှိသေးပါဘူး။
ဒေါ်သက်သက်ခိုင်ဟာ ၂၀၂၅ ခုနှစ် ရွေးကောက်ပွဲမှာ ရန်ကုန်တိုင်း အမျိုးသားလွှတ်တော် ကိုယ်စားလှယ်လောင်း နေရာအတွက် ဝင်ရောက် ယှဉ်ပြိုင်ဖို့ ပြင်ဆင်ခဲ့သူ ဖြစ်ပါတယ်။
ဒါပေမယ့်လည်း ရွေးကောက်ပွဲဥပဒေ ပုဒ်မ ၈ (ဃ) ပါ ပြဋ္ဌာန်းချက်နဲ့ ငြိစွန်းနေတာကြောင့် ပြည်ထောင်စု ရွေးကောက်ပွဲကော်မရှင် (UEC) က ပြီးခဲ့တဲ့ ၂၀၂၅ ခုနှစ်၊ အောက်တိုဘာလ ၂၁ ရက်မှာ ဒေါ်သက်သက်ခိုင်ကို ကိုယ်စားလှယ်လောင်း စာရင်းကနေ ပယ်ဖျက်ခဲ့တာ ဖြစ်ပါတယ်။
ဒါအပြင် ဒေါ်သက်သက်ခိုင်ဟာ သတင်းမီဒီယာတခုနဲ့ အင်တာဗျူးဖြေဆိုခဲ့ရာမှာ လက်ရှိ ရွေးကောက်ပွဲဟာ လွတ်လပ်ပြီး တရားမျှတမှုရှိမယ်လို့ ယတိပြတ် မပြောနိုင်ကြောင်း ဝေဖန်ပြောဆိုခဲ့ဖူးပါတယ်။
အစိုးရပိုင်းမှာ နိုင်ငံ့တာဝန် ကြီးကြီးမားမား ယူထားသူတွေကစပြီး ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီမှာ ဝင်ရောက် ယှဥ်ပြိုင်ကြသလို တချို့လည်း တိုင်းရင်းသား စည်းလုံးညီညွတ်ရေးပါတီ (တစည) ကို ပို့တယ်လို့ သတင်းကြားကြောင်း ဒေါ်သက်သက်ခိုင်က အဲဒီ မီဒီယာ အင်တာဗျူးမှာ ပြောဆိုခဲ့တာပါ။
ဒါကြောင့် ပါတီတွေအနေနဲ့ အစိုးရနဲ့ ပြိုင်ရသလိုဖြစ်သွားပြီး အားလုံးတပြေးညီ ယှဉ်ပြိုင်ရတဲ့ အခြေအနေ မဖြစ်တော့တဲ့ သဘောမျိုး ကျရောက်သွားတယ်လို့ ဒေါ်သက်သက်ခိုင်က ပြောဆိုခဲ့ပါတယ်။
“ကိုယ်ကပြောမယ်ဆိုရင် ဒိုင်လူကြီး လုပ်နေတယ်ပေါ့နော်။ ဒိုင်လူကြီး လုပ်နေတဲ့နေရာမှာ ဒိုင်လိုပဲ မနေဘဲနဲ့ ဒိုင်လိုလည်း နေတယ်၊ ပြီးတော့ ကိုယ့်လူတွေကိုလည်း အင်အားကြီးပါတီတခုကို ပို့လွှတ်ပြီးတော့မှ ဝင်လည်းပြိုင်တယ်ဆိုတဲ့ အဓိပ္ပာယ်က အခုလို မေးခွန်းထုတ်စရာတွေ ဖြစ်သွားတယ်။ ပါတီတွေ ယှဉ်ပြိုင်တဲ့အခါမှာ အခွင့်အလမ်း တန်းတူညီမျှမှု ရှိမနေဘူး” လို့ ဒေါ်သက်သက်ခိုင်က ဝေဖန်ပြောဆိုခဲ့ပါတယ်။
လက်ရှိ ရွေးကောက်ပွဲနဲ့ ပတ်သက်လို့ ရွေးကောက်ပွဲ ပြီးတဲ့အထိ စောင့်ကြည့်ရမှာဖြစ်ကာ လတ်တလော အခြေအနေအရ ယတိပြတ် ဘာကိုမျှ မပြောနိုင်သေးဘူးလို့ ဒေါ်သက်သက်‌ခိုင်က ပြောဆိုခဲ့ပါတယ်။

ထိုင်းမှာ မြန်မာလုပ်သား အယောက် ၁၀၀ လောက် အချင်းချင်း အုပ်စုဖွဲ့ ခိုက်ရန်ဖြစ်ပွား

ထိုင်းနိုင်ငံ ၊ ချွန်ပူရီမြို့ မှာ မြန်မာလုပ်သား အယောက် ၁၀၀ လောက်ဟာ မြန်မာအချင်းချင်း အုပ်စုဖွဲ့ ရန်ဖြစ် ရိုက်နှက်မှု ဖြစ်ပွားခဲ့တယ်လို့ ထိုင်းသတင်းတွေ အရနဲ့ ထိုင်းရောက်မြန်မာ လုပ်သားတွေဆီက သိရပါတယ်။
ဇန်နဝါရီ ၁၃ ရက်နေ့ ၊ ည ၁၀ နာရီလောက်က ချွန်ပူရီမြို့နယ် ၊ လမ်းမပေါ်မှာ ရာနဲ့ချီတဲ့ မြန်မာလုပ်သားတွေဟာ အချင်းချင်း စကားများရန်ဖြစ်ကြပြီး တုတ် ၊ ဓားတွေနဲ့ ထိုးနှက် ရိုက်နှက်ခဲ့ကြတာဖြစ်ကြောင်း ၊ အဲဒီဖြစ်စဥ်မှာ မြန်မာလုပ်သား နှစ်ယောက် ဒဏ်ရာပြင်းထန် ရရှိခဲ့ပြီး လက်ရှိမှာ ဆေးကုသမှု ခံယူနေရတယ်လို့ သိရပါတယ်။
"ည ၁၀ နာရီခွဲလောက်ကြီး ရိုက်ကြ နှက်ကြ တာပါ ။ မျက်မြင် သက်သေတွေ ပြောတာတော့ မြန်မာ အဖွဲ့လိုက် ရိုက်တာလို့ သိရတယ်။ ဒဏ်ရာရ တဲ့နှစ်ယောက်ကို စစ်ရင်လည်း နောက်ဆက်တွဲ မြန်မာတွေက ပေါ်မှာပဲ ။ ဒဏ်ရာရတဲ့ နှစ်ယောက်မှာက ဓားဒဏ်ရာတွေ ၊ ရိုက်ခံထားရတာတွေ တွေ့ရတယ်သိရတယ်။ ဒီလောက်လူအများကြီး ရုပ်ပျက်ဆင်းပျက် အုပ်စုဖွဲ့ရိုက်တာ မလုပ်သင့်ပါဘူးဗျာ ။ ကျန်တဲ့ မြန်မာတွေပါ သိက္ခာကျတယ် ။ " လို့ ချွန်ပူရီမြို့မှာ ရောက်ရှိနေတဲ့ မြန်မာလုပ်သားက ပြောပါတယ်။
ခုလို မြန်မာအချင်းချင်း အုပ်စုဖွဲ့ပြီး ရိုက်နှက် ရန်ဖြစ်တဲ့ ဖြစ်စဥ်နဲ့ ပတ်သက်ပြီး မြန်မာလုပ်သားတွေ အပါအဝင် ထိုင်းနိုင်ငံသားတွေကပါ ဝေဖန်ပြောဆိုမှုတွေ ရှိနေတဲ့အပြင် အုပ်စုဖွဲ့ ရန်ဖြစ်သူတွေကို ဖော်ထုတ်ပြီး အရေးယူခြင်း ၊ အလုပ်ကနေ ထုတ်ပြီး နယ်နှင်ဒဏ်ပေးဖို့အထိ ပြောဆိုမှုတွေ ရှိနေတယ်လို့ သိရပါတယ်။
" အခုထိုင်းတွေကြားထဲမှာ ပြောစရာဖြစ်နေပြီ။ မြန်မာအချင်းချင်းတွေ စကားများရန်ဖြစ်ကြတယ်။ခုဖြစ်နေတဲ့ပုံရိပ်က ​ထိုင်းမှာနေနေတဲ့ မြန်မာတွေပုံရိပ် ကျဆင်းစေတယ်။ထိုင်းနိုင်ငံသားတွေနဲ့ တွဲပြီးအလုပ်လုပ်နေရတဲ့အချိန် ခုလိုတွေဖြစ်တာ ကြာလာရင်မကောင်းဘူး ။ကိုယ့်စည်းကိုယ့်ကမ်းနဲ့ နေကြပါ ။ အဲဒီလိုနေရင် ဘယ်သူမှ ကြောက်နေစရာမလိုဘူး ။ စည်းကမ်းရှိရှိနေကြဖို့ လိုပါတယ်ဗျာ ။ " လို့ ထိုင်းရောက် မြန်မာတယောက်က ပြောပါတယ်။
လက်ရှိမှာ အဆိုပါ အုပ်စုဖွဲ့ ရန်ဖြစ်တဲ့ ကိစ္စနဲ့ ပတ်သတ်ပြီး ပါဝင်တဲ့ မြန်မာလုပ်သားတွေကို အရေးယူနိုင်ဖို့အတွက် CCTV တွေအရ သက်သေစုနေသလို စုံစမ်းစစ်ဆေးမှုတွေကို သက်ဆိုင်ရာ နယ်မြေရဲစခန်းက လုပ်ဆောင်နေတယ်လို့ သိရပါတယ်။
အလားတူ ဇန်နဝါရီ ၁၃ ရက်နေ့ မနက် ၃ နာရီကျော် လောက်ကလည်း ထိုင်းတောင်ပိုင်း ဆဒွန်းခရိုင်ထဲမှာ ဆေးကြောင်နေတဲ့ မြန်မာလုပ်သားတယောက်ဟာ လမ်းဘေးမှာ ရပ်ထားတဲ့ မော်တော်ကားနဲ့ ဆိုင်ကယ်အစီးရေ ၂၀ နီးပါးကို ပေါက်ချွန်းနဲ့ လိုက်လံ ဖျက်ဆီးခဲ့တာကြောင့် ဖမ်းဆီးခံခဲ့ရတယ်လို့ သိရပါတယ်။
ဇန်နဝါရီ ၁၁ ရက်ကလည်း ထိုင်းနိုင်ငံ၊ စမွတ်ပရာကန်ခရိုင်၊ ဘန်ဘောအရပ်က စားသောက်ဆိုင်ရှေ့မှာ ထိုင်းနိုင်ငံသား သုံးယောက်ကို မြန်မာနိုင်ငံသားခြောက်ယောက်က အုပ်စုဖွဲ့ ရိုက်နှက်ခဲ့မှု ဖြစ်ပွါးခဲ့တယ်လို့ သိရပါတယ်။

မားကပ်စ်ရက်ဖို့ဒ်အား လျှော့ဈေးဖြင့် ခေါ်ယူနိုင်ရေး ဘာစီလိုနာ ကြိုးပမ်းလာ
==================

ဘာစီလိုနာဟာ မားကပ်စ်ရက်ဖို့ဒ်အား လျှော့ဈေးဖြင့် ခေါ်ယူနိုင်ရေး ကြိုးပမ်းလာနေကြောင်း သိရပါတယ်။
အသက် ၂၈ နှစ်ရှိ အင်္ဂလန်တိုက်စစ်သမားဟာ နွေရာသီတုန်းက ယူနိုက်တက်မှ ဘာစီလိုနာသို့ အငှားဖြင့် ပြောင်းလာပြီးနောက် ပြိုင်ပွဲအရပ်ရပ် ၂၇ ပွဲကစားထားရာမှာ ၇ ဂိုးသွင်းပြီး ၈ ကြိမ် ဖန်တီးမှု ပြုလုပ်ထားပါတယ်။
ဘာစီလိုနာဟာ နွေရာသီတွင် ရက်ဖို့ဒ်ကို အပြီးသတ် ခေါ်ယူလိုနေပေမယ့်လည်း စာချုပ်ပါအချက်အတိုင်း ပေးလိုခြင်း မရှိဘဲ လျှော့ဈေးဖြင့် ခေါ်ယူလိုနေပါတယ်။
ဘာစီလိုနာဟာ နွေရာသီတုန်းက ရက်ဖို့ဒ်ကို အငှားဖြင့် ခေါ်ယူစဉ်တုန်းက ရာသီအကုန်တွင် ပေါင် ၂၆ သန်းဖြင့် အပြီးသတ်ခေါ်ယူနိုင်မယ့်အချက် ထည့်သွင်းချုပ်ဆိုထားပါတယ်။
ဒါပေမယ့် ဘာစီလိုနာဟာ ဘဏ္ဍာရေး ပြဿနာကြုံနေရရာ ပေါင် ၂၆ သန်းပေးလိုခြင်း မရှိဘဲ လျှော့ဈေးဖြင့် ခေါ်ယူလိုနေကြောင်း talkSPORT က ဖော်ပြလာပါတယ်။
လက်ရှိအချိန်တွင် ရက်ဖို့ဒ်ကိုယ်တိုင်ကလည်း ဘာစီလိုနာတွင် အသားကျနေရာ အပြီးသတ်ပြောင်းရေး စိတ်အားထက်သန်နေပါတယ်။
ယူနိုက်တက်ဟာ ရက်ဖို့ဒ်နှင့် အဆင်မပြေဖြစ်ခဲ့တဲ့ ရူဘင်အမိုရမ်ကို ထုတ်ပယ်လိုက်ပြီ ဖြစ်ပေမယ့်လည်း ကစားသမားအား ရောင်းချရန် တံခါးဖွင့်ထားဆဲ ဖြစ်ပါတယ်။
ရက်ဖို့ဒ်ဟာ လွန်ခဲ့တဲ့ ၁၂ လတုန်းက အမိုရမ်နှင့် အဆင်မပြေဖြစ်ပြီးနောက် ဗီလာသို့ အငှားဖြင့် ထွက်ကစားခဲ့ရပြီး ၁၇ ပွဲကစားရာတွင် ၄ ဂိုးသွင်းကာ ၆ ကြိမ် ဖန်တီးပေးနိုင်ခဲ့ပါတယ်။
ဘာစီလိုနာဟာ ယူနိုက်တက်နှင့် ပြောင်းရွှေ့ကြေး ညှိနှိုင်းမှု အဆင်ပြေလာပါက ရက်ဖို့ဒ်ကို ၂၀၂၉ ခုနှစ်အထိ စာချုပ်ဖြင့် အပြီးသတ် ခေါ်ယူလာပါတယ်။
ရက်ဖို့ဒ်ဟာ ဘာစီလိုနာသို့ ရောက်လာပြီးနောက် တနင်္ဂနွေနေ့တုန်းက ပထမဆုံးဆုဖလားအဖြစ် စပိန်စူပါဖလား ရယူနိုင်ခဲ့ပါတယ်။ ယင်းနေ့တွင်ပင် အသင်းဟောင်း ယူနိုက်တက်မှာ အက်ဖ်အေဖလားပြိုင်ပွဲ တတိယအဆင့်မှ ထွက်ခဲ့ရကာ ယခုရာသီ ဆုဖလားမျှော်လင့်ချက် အဆုံးသတ်သွားခဲ့ပါတယ်။

ဆရာဟောင်းမော်ရင်ဟိုရဲ့ နည်းလမ်းကို အတုယူကာ ရီးရဲလ်မက်ဒရစ်အား ကိုင်တွယ်ပါက ကျရှုံးမှုနှင့် ကြုံရမည်ဟု အာဘီလိုအာ ဝန်ခံပြောကြားလာ
===================

ရီးရဲလ်မက်ဒရစ်နည်းပြသစ်အယ်ဗာရိုအာဘီလိုအာက ဆရာဟောင်းဟိုဆေးမော်ရင်ဟိုရဲ့ နည်းပြစတိုင်အား အတုယူကာ ရီးရဲလ်မက်ဒရစ်အား ကိုင်တွယ်လာမည်ဆိုပါက ကျရှုံးမှုနှင့် ကြုံရမည်ဟု ဝန်ခံ ပြောဆိုလာပါတယ်။
ရီးရဲလ်မက်ဒရစ်ဟာ တနင်္လာနေ့တုန်းက အသင်းကို ၃၄ ပွဲတည်းသာ ကိုင်တွယ်ရသေးတဲ့ ဇာဘီးအလွန်ဆိုအား ရာထူးမှ ထုတ်ပယ်ပြီးနောက် ရီးရဲလ်မက်ဒရစ်(ခ)အသင်းနည်းပြအာဘီလိုအာအား ခန့်အပ်ခဲ့ပါတယ်။
အာဘီလိုအာဟာ ကစားသမားဘဝမှ အနားယူပြီး‌နောက် ရီးရဲလ်မက်ဒရစ်လူငယ်အသင်းများနှင့် (ခ)အသင်းတို့အား ၆ နှစ်တိုင်တိုင် ကိုင်တွယ်လာခဲ့သူ ဖြစ်ပါတယ်။
အာဘီလိုအာဟာ ကစားသမားဘဝတုန်းက ရီးရဲလ်မက်ဒရစ်တွင် ၂၃၇ ပွဲကစားခဲ့သူ ဖြစ်ပြီး မော်ရင်ဟိုရဲ့ လက်အောက်တွင် သုံးရာသီ ကစားခဲ့ပါတယ်။
အာဘီလိုအာဟာ ဟိုဆေးမော်ရင်ဟိုရဲ့ နည်းပြစတိုင်အား လေးစားအားကျခဲ့သူ ဖြစ်ပေမယ့်လည်း ကိုယ့်နည်းကိုယ့်ဟန်ဖြင့် ရီးရဲလ်မက်ဒရစ်ကို ဦးဆောင်လာပါမယ်။
အာဘီလိုအာက "သူနဲ့(မော်ရင်ဟို)စကားမပြောဖြစ်ပါဘူး။ ကျွန်တော့်အတွက် သူ့နည်းပြအောက်မှာ ကစားခွင့်ရခဲ့တာ ဂုဏ်ယူစရာပါ။ သူက ကျွန်တော့်အပေါ် ကြီးမားတဲ့ လွမ်းမိုးမှုရှိတဲ့သူတွေထဲက တစ်ဦးပါ။ အာဘီလိုအာအတိုင်းပဲ လုပ်ပါမယ်။ ကျရှုံးမှာ မကြောက်ပါဘူး။ ဒါပေမယ့် မော်ရင်ဟိုလို လိုက်လုပ်ရင် ကျရှုံးမှာ သေချာတယ်။ နည်းပြအများကြီး ကြုံခဲ့ဖူးတယ်။ သူတို့က ကျွန်တော်ကစားသမားဘဝမှာ အရေးပါခဲ့သလို ကြီးမားတဲ့ လွှမ်းမိုးမှုလည်း ရှိပါတယ်။ ကိုယ့်နည်းကိုယ်ဟန်နဲ့ လုပ်တာ အကောင်းဆုံးပါ။ တစ်ဦးချင်းစီရဲ့အကောင်းဆုံးကို ယူရမယ်။ ဂန္ထဝင်တွေ အများကြီးရှိတယ်။ သူတို့က ဘောလုံးမှာ အောင်မြင်မှုအားလုံးရယူခဲ့ကြတယ်။ သူတို့အားလုံးရဲ့ တစ်ဝက်လောက် လုပ်နိုင်ဖို့ မျှော်လင့်တယ်"လို့ ပြောကြားသွားပါတယ်။
အာဘီလိုအာဟာ ယခင် ရီးရဲလ်မက်ဒရစ်နည်းပြအလွန်ဆိုနှင့် ရီးရဲလ်မက်ဒရစ်၊ လီဗာပူးနှင့် စပိန်လက်ရွေးစင်အသင်းတို့တွင် အတူတကွ ကစားခဲ့သူ ဖြစ်ပါတယ်။
ဒါ့အပြင် အာဘီလိုအာက ဇာဘီးအလွန်ဆိုနှင့်ကလပ်အကြား လမ်းခွဲလိုက်ကြောင်း သိရပြီးနောက် စကားပြောဆွေးနွေးခဲ့ကြောင်း ပြောကြားသွားပါတယ်။
အာဘီလိုအာဟာ ရီးရဲလ်မက်ဒရစ်ပထမဆုံးပွဲအဖြစ် ယနေ့ည အယ်ဘာစီတီနှင့် စပိန်ကိုပါဒယ်ရေးဖလားပွဲအား ကြီးကြပ်ရပါမယ်။

ပြိုင်ဘက်ကစားသမား ၂ ဦးရဲ့ မတော်ရာကို ရည်ရွယ်ချက်ရှိရှိကန်ခဲ့မှုအတွက် ၇ ပွဲပယ်ခံလာရတဲ့ ဆွင်ဒန်တောင်းအသင်းခေါင်းဆောင်
====================

ဆွင်ဒန်တောင်းအသင်းခေါင်းဆောင်အိုလီကလပ်ခ်ဟာ ပွဲတစ်ပွဲအတွင်းတွင် ပြိုင်ဘက်ကစားသမား ၂ ဦးရဲ့ မတော်ရာကို ရည်ရွယ်ချက်ရှိရှိ ကန်ခဲ့မှုအတွက် ၇ ပွဲပယ်ပြစ်ဒဏ်ချမှတ်ခြင်းခံလာရပါတယ်။
အသက် ၃၃ နှစ်ရှိ အလယ်တန်းကစားသမားဟာ ပြီးခဲ့တဲ့လတုန်းက အက်ဖ်အေရဲ့ စွဲချက် ၂ ခုတင်မှုအား လက်ခံပြီးနောက် ပေါင် ၂၇၅၀ ဒဏ်ရိုက်ခြင်းခံခဲ့ရသူလည်း ဖြစ်ပါတယ်။
သူဟာ ဩဂုတ်လ ၁၂ ရက်နေ့တုန်းက ကာဒစ်ဖ်စီးတီးအား ရှုံးနိမ့်တဲ့ ခါရာဘောင်ဖလားပွဲစဉ်ရဲ့ ပွဲချိန် ၅၇ မိနစ်နှင့် ၉၄ မိနစ်တို့မှာ အထက်ပါ လုပ်ရပ်များကို လုပ်ဆောင်ခဲ့တာပါ။
ယင်းပွဲအပြီးတွင် မတော်ရာကို အကန်ခံခဲ့ရတဲ့ ကစားသမားတစ်ဦးက ဒိုင်လူကြီးအား အသိပေးခဲ့ကြောင်း သိရပါတယ်။
အက်ဖ်အေဟာ ကလပ်ခ်ရဲ့ လုပ်ရပ်အချက်အလက်အတိအကျကိုတော့ ကြေညာသွားခဲ့ခြင်း မရှိပါဘူး။
ကလပ်ခ်ဟာ ၇ ပွဲပယ်ပြစ်ဒဏ်မှ ၄ ပွဲပယ်ပြစ်ဒဏ်အား ကျခံထားပြီး ဖြစ်ကာ နောက်ထပ် ၃ ပွဲပယ်ပြစ်ဒဏ်အား ကျခံရပါဦးမယ်။

မြို့ခံပြိင်ဘက် တန်းတက်ပဲရစ်အက်ဖ်စီအား ရှုံးနိမ့်ကာ Coupe de France ပြိုင်ပွဲမှ ထွက်ခွာလိုက်ရတဲ့ လက်ရှိချန်ပီယံ ပီအက်စ်ဂျီ
===================

လက်ရှိချန်ပီယံ ပီအက်စ်ဂျီဟာ အိမ်ကွင်းတွင် ပဲရစ်အက်ဖ်စီအား ၁-၀ ဂိုးဖြင့် အံ့ဩသင့်ဖွယ် ရှုံးနိမ့်ကာ Coupe de France ပြိုင်ပွဲမှ ထွက်ခွာလိုက်ရပြီ ဖြစ်ပါတယ်။
ပီအက်စ်ဂျီဟာ ပြီးခဲ့တဲ့ရာသီတုန်းက Coupe de France ဖလားအား ၁၆ ကြိမ်မြောက် ဆွတ်ခူးခဲ့တဲ့အသင်း ဖြစ်ပါတယ်။ ၎င်းတို့ဟာ ပွဲချိန်ပြည့် လွှမ်းမိုးကစားထားနိုင်ခဲ့ပေမယ့်လည်း တန်းတက် မြို့ခံပြိုင်ဘက်အား ရှုံးနိမ့်လာခဲ့တာပါ။
ပဲရစ်အက်ဖ်စီအတွက် တစ်လုံးတည်းသော အနိုင်ဂိုးကို ပီအက်စ်ဂျီတွင် ကစားသမားဘဝ စတင်ခဲ့တဲ့ ဂျိုနသန်အိုင်ကွန်က သွင်းယူခဲ့ပါတယ်။
လူးဝစ်အန်းနရစ်ရဲ့ ပီအက်စ်ဂျီဟာ အချိန်ပိုမှာ ဗီတင်ဟာရဲ့ အဝေးကန်ချက်အပါအဝင် ခြိမ်းခြောက်မှုများစွာ ပြုလုပ်နိုင်ခဲ့ပေမယ့် ပဲရစ်အက်ဖ်စီဂိုးသမားအိုဘက်အန်ကမ်ဘာဒီယိုက လက်စွမ်းပြကာကွယ်သွားခဲ့ပါတယ်။
ပီအက်စ်ဂျီဟာ ၂၀၁၄ ခုနှစ်နောက်ပိုင်း ပထမဆုံးအကြိမ်အဖြစ် Coupe de France ပြိုင်ပွဲ ၃၂ သင်းရှုံးထွက်အဆင့်မှာ ရှုံးနိမ့်ခဲ့တာလည်း ဖြစ်ပါတယ်။
ဒီနှစ်သင်းဟာ ယခုလအစောပိုင်းတုန်းက ၁၉၉၀ နောက်ပိုင်း ပထမဆုံးအကြိမ်အဖြစ် လီဂူး ၁ တွင် ထိပ်တိုက်တွေ့ခဲ့ကြပြီး ပီအက်စ်ဂျီက ဒူယူ၊ ဒမ်ဘီလီတို့ရဲ့ သွင်းဂိုးတွေနဲ့ ၂-၁ ဖြင့် အနိုင်ရခဲ့ပါတယ်။

ခရစ္စတီယာနိုရော်နယ်ဒိုနှင့် လီယွန်နယ်မက်ဆီတို့ကို ကျော်ကာ နိုင်ငံတကာပွဲတွေမှာ အမြန်ဆုံးရာပြည့်လာတဲ့ မိုဟာမက်ဆာလက်
====================

မိုဟာမက်ဆာလက်ဟာ ခရစ္စတီယာနိုရော်နယ်ဒိုနှင့် လီယွန်နယ်မက်ဆီတို့အား ကျော်ဖြတ်ကာ နိုင်ငံတကာပွဲတွေမှာ ဂိုးနှင့် ဖန်တီးမှု အမြန်ဆုံးရာပြည့်တဲ့ မှတ်တမ်း ရယူလာနိုင်ခဲ့ပါတယ်။
လီဗာပူးစူပါစတားဟာ အီဂျစ်ကို ကျင်းပဆဲ အာဖရိကဖလားပြိုင်ပွဲတွင် ဆီမီးဖိုင်နယ်သို့ တက်ရောက်နိုင်အောင် ကူညီပေးထားသူလည်း ဖြစ်ပါတယ်။
သူဟာ အိုင်ဗရီကို့စ်အား အနိုင်ရတဲ့ အာဖရိကဖလားကွာတားဖိုင်နယ်ပွဲစဉ်မှာ ဂိုးနှင့် ဖန်တီးမှု အကြိမ် ၁၀၀ ပြည့်လာခဲ့တာလည်း ဖြစ်ပါတယ်။
သူဟာ အီဂျစ်အတွက် ၁၁၁ ပွဲကစားထားရာမှာ ၆၅ ဂိုးသွင်းပြီး ၃၅ ကြိမ် ဖန်တီးကာ အမြန်ဆုံးရာပြည့်လာတာပါ။
ဆာလက်ဟာ ၂၀၁၁ ခုနှစ်တွင် အီဂျစ်အတွက် ပထမဆုံးပွဲကစားခင့်ရပြီးနောက် ပြီးခဲ့တဲ့ ၁၅ နှစ်တိုင်တိုင် အရေးပါတဲ့ ကစားသမားအဖြစ် ကစားလာသူ ဖြစ်ပါတယ်။
သူဟာ အီဂျစ်နှင့်အတူ အောင်မြင်မှု မရယူနိုင်သေးပေမယ့်လည်း ကလပ်အဆင့်မှာတော့ အောင်မြင်မှုအားလုံး ရယူထားနိုင်ပါတယ်။
ဆာလက်ဟာ အိုင်ဗရီကို့စ်အား ၃-၂ ဖြင့် အနိုင်ရတဲ့ပွဲစဉ်ရဲ့ ပွဲချိန် ၅၂ မိနစ်မှာ အီဂျစ်ရဲ့ တတိယဂိုးအား သွင်းယူပြီးနောက် အီဂျစ်အတွက် ဂိုးနှင့် ဖန်တီးမှု စုစုပေါင်း ရာပြည့်ခဲ့တာလည်း ဖြစ်ပါတယ်။
သူဟာ မက်ဆီနှင့် ရော်နယ်ဒိုတို့ထက် အမြန်ဆုံး ဂိုးနှင့် ဖန်တီးမှု ရာပြည့်ခဲ့တာလည်း ဖြစ်ပါတယ်။
ဒါပေမယ့် ဆာလက်ထက် လက်ရွေးစင်အသင်းအဆင့်မှာ ဂိုးနှင့် ဖန်တီးမှု ရာပြည့်တဲ့ ဘရာဇီးကစားသမား ၂ ဦး ရှိပါတယ်။
ပီလီက ၇၇ ပွဲဖြင့် ဂိုးနှင့် ဖန်တီးမှု ရာပြည့်ခဲ့ပြီး နေမာက ၉၄ ပွဲဖြင့် ဂိုးနှင့် ဖန်တီးမှု ရာပြည့်ခဲ့တာပါ။
ဒါ့အပြင် ဆာလက်ရဲ့ နောက်မှာ ဘယ်လ်ဂျီယံတိုက်စစ်မှူးရိုမီလူလူကာကူ (၁၁၃ ပွဲ)၊ ဥရုဂွေးဂန္ထဝင် လူးဝစ်ဆွာရက်ဇ် (၁၁၆ ပွဲ)တို့ ရပ်တည်နေပါတယ်။
အာဂျင်တီးနားအတွက် ၁၉၆ ပွဲကစားထားရာမှာ ၁၁၅ ဂိုးသွင်းခဲ့တဲ့ လီယွန်နယ်မက်ဆီက ဂိုးနှင့် ဖန်တီးမှု ရာပြည့်ရန် ၁၁၂ ပွဲကစားခဲ့ရပြီး ခရစ္စတီယာနိုရော်နယ်ဒိုက ၁၂၃ ပွဲကစားခဲ့ရပါတယ်။
တဖက်မှာ ခရစ္စတီယာနိုရော်နယ်ဒိုက ပေါ်တူဂီအတွက် ၂၂၆ ပွဲကစားထားရာမှာ ၁၄၃ ဂိုးသွင်းယူပြီး နိုင်ငံတကာပွဲနှင့် ဂိုးအများဆုံးသွင်းယူထားသူအဖြစ် ပြိုင်ဘက်ကင်းစံချိန်ရယူထားပါတယ်။
မိုဟာမက်ဆာလက်ဦးဆောင်တဲ့ အီဂျစ်ဟာ လာမယ့် ဗုဒ္ဓဟူးနေ့မှာ ကင်မရွန်းနှင့် အာဖရိကဖလားဆီမီးဖိုင်နယ်ကစားရပါမယ်။ အီဂျစ်ဟာ ကင်မရွန်းကို ကျော်ဖြတ်လာနိုင်ပါက ဗိုလ်လုပွဲတွင် နိုင်ဂျီးရီးယား (သို့မဟုတ်) အိမ်ရှင်မော်ရိုကိုနှင့် ရင်ဆိုင်ကစားရပါမယ်။

တစ်နှစ်နီးပါး ပွဲဝေးနေတဲ့ စိုးလင်းဦး ထိုင်းလူငယ်ဖိုက်တာ ဝိုရာပွန်နဲ့ ယှဥ်ပြိုင်ထိုးသတ်ရမယ်

ပရိသတ်အချစ်တော် မြန်မာ့ရိုးရာလက်ဝှေ့သမား စိုးလင်းဦးဟာ ONE Championship မှာ ပွဲဝေးနေခဲ့တာ တစ်နှစ်နီးပါးရှိခဲ့ပေမယ့် အခုအခါမှာတော့ ထိုင်းလူငယ်ဖိုက်တာ ဝိုရာပွန်နဲ့ ယှဥ်ပြိုင်ထိုးသတ်ရတော့မှာဖြစ်ပါတယ်။
ONE Championship ဟာ စိုးလင်းဦးနဲ့ ဝိုရာပွန်တို့ရဲ့ တွဲဆိုင်းကို လာမယ့်ဇန်နဝါရီ (၂၃) ရက်မှာ ကျင်းပမယ့် ONE Friday Fights 139 ပြိုင်ပွဲမှာ ထည့်သွင်းထားပါတယ်။
အသက် (၃၄) နှစ်ရှိပြီဖြစ်တဲ့ စိုးလင်းဦးဟာ ONE Championship မှာ (၆) ပွဲထိုး၊ (၃) ပွဲနိုင်၊ (၃) ပွဲရှုံးထားပါတယ်။
စိုးလင်းဦးဟာ.နောက်ဆုံးထိုးသတ်ထားတဲ့ (၃) ပွဲဆက်တိုက်ကို အမှတ်နဲ့ ရှုံးနိမ့်ထားပါတယ်။
စိုးလင်းဦးဟာ နောက်ဆုံးပွဲအဖြစ် ပြီးခဲ့တဲ့ ၂၀၂၅ ခုနှစ် မတ်လအတွင်းက ရုရှားဖိုက်တာ ဒီမီထရီကို အမှတ်နဲ့ ရှုံးနိမ့်ထားပါတယ်။
စိုးလင်းဦးနဲ့ ထိုးသတ်မယ့် ဝိုရာပွန်ဟာ အသက် (၂၃) နှစ်ပဲ ရှိသေးပြီး ONE Championship မှာ (၁၁) ပွဲထိုး၊ (၆) ပွဲနိုင်၊ (၅) ပွဲရှုံးနိမ့်ထားပါတယ်။
ဝိုရာပွန်ဟာ နောက်ဆုံးပွဲအဖြစ် ပြီးခဲ့တဲ့ ၂၀၂၅ခုနှစ် နိုဝင်ဘာအတွင်းက ဘရာဇီးလ်ဖိုက်တာကို အမှတ်နဲ့ ရှုံးနိမ့်ထားပါတယ်။
ဝိုရာပွန်ဟာ ဘရာဇီးလ်ဖိုက်တာကို မရှုံးခင် (၄) ပွဲဆက် အနိုင်ရထားပါတယ်။
ဝိုရာပွန်အနိုင်ရထားတဲ့ (၆) ပွဲမှာ အလဲထိုးနိုင်ပွဲ (၂) ပွဲ ပါဝင်နေပါတယ်

ပေါ်တူဂီနောက်ခံလူ ကန်ဆယ်လိုကို အငှားစာချုပ်နဲ့ ဘာစီလိုနာအသင်း ဒုတိယအကြိမ်ခေါ်ယူ

ဘာစီလိုနာအသင်းဟာ ဆော်ဒီကလပ် အယ်လ်ဟီလာအသင်းက ပေါ်တူဂီနောက်ခံလူ ကန်ဆယ်လိုကို အငှားစာချုပ်နဲ့ ဒုတိယအကြိမ် ခေါ်ယူလိုက်ကြောင်း သိရပါတယ်။
ကန်ဆယ်လို(၃၁ နှစ်)ဟာ မန်စီးတီးအသင်းမှာရှိစဉ် ၂၀၂၃-၂၄ ရာသီတုန်းက ဘာစီလိုနာအသင်းကို အငှားနဲ့ လာရောက်ကစားခဲ့ဖူးပြီး ခြေစွမ်းပြနိုင်ခဲ့ပါတယ်။
ကန်ဆယ်လိုက ဥရောပမှာ ပြန်လည်ပြောင်းရွှေ့ကစားဖို့ စီစဉ်ချိန်မှာ အင်တာမီလန်အသင်းကလည်း အငှားခေါ်ယူဖို့ ကြိုးပမ်းခဲ့ပေမဲ့ ဘာစီလိုနာအသင်းနဲ့ ပြန်လည်လက်တွဲဖို့သာ ဆုံးဖြတ်ခဲ့ခြင်းဖြစ်ကြောင်း သိရပါတယ်။
ဘာစီလိုနာအသင်းက ကန်ဆယ်လိုကို အငှား ခေါ်ယူခြင်းအတွက် ငှားရမ်းခ ပေးရခြင်းမရှိဘဲ အငှားခေါ်ယူတဲ့ကာလအတွင်း ပေးချေရမယ့် လစာပမာဏကတော့ ယူရို(၄)သန်းဝန်းကျင်ရှိမယ်လို့ သိရပါတယ်။
ကန်ဆယ်လိုဟာ ဘာစီလိုနာအသင်းမှာ ပထမတစ်ကြိမ် အငှားလာရောက်ကစားစဉ်က ဝတ်ဆင်ခဲ့တဲ့ ကျောနံပါတ်(၂)ကိုပဲ ပြန်လည်ဝတ်ဆင်သွားမှာဖြစ်ကြောင်း သိရပါတယ်။