【 ပြည်တွင်း 】ကြိုးကြာခေါင်းနီငှက်သိုက် ၆၀ ကျော် မှတ်တမ်းတင်ထားဟုဆို
🟥ရန်ကုန် ၊ အောက်တိုဘာ ၂၈
မြန်မာနိုင်ငံတွင် ရှားပါးစွာတွေ့ရလေ့ရှိသလို မျိုးသုဉ်းလုနီးပါးအခြေအနေမျိုးကြုံနေရသည့် ကြိုးကြာ ခေါင်းနီငှက်၏ အသိုက်ပေါင်း ၆၀ ကျော်ကို ယခုနှစ်အတွင်းမှတ်တမ်းတင်နိုင်ခဲ့ကြောင်း Myanmar Crane Conservation Group မှ သိရပါတယ်။
အဆိုပါ ကြိုးကြာခေါင်းနီငှက်သိုက်များကို International Crane Foundation နှင့် Myanmar Crane Conservation Group တို့မှ ယခု ၂၀၂၅ ခုနှစ် သားပေါက်ရာသီကာလအတွင်း လေ့လာတွေ့ရှိခဲ့သလို ယင်းကဲ့သို့ မှတ်တမ်းတင်ထားခြင်းလည်း ဖြစ်ပါတယ်။
ထိုအဖွဲ့မှာ ကြိုးကြာငှက်လေ့လာထိန်းသိမ်းမှုကို လွန်ခဲ့သော ၂၀၁၅ ခုနှစ်ကတည်းက ဒေသခံများနှင့် အတူ လုပ်ဆောင်ခဲ့ပြီး ဧရာ၀တီတိုင်းဒေသကြီးအတွင်းမှ မြို့နယ် ၁၀ ခုတွင် ကြိုးကြာငှက်များအများဆုံး နေ ထိုင်ကျက်စားသည်ကိုလည်း တွေ့ရှိထားကြောင်း၊ ယခုနှစ်ရာသီချိန်အတွင်း ဧရာ၀တီတိုင်းဒေသကြီးအတွင်းမှ မြို့နယ် ခြောက်ခု၌ ကွင်းဆင်းလေ့လာမှုများ ပြုလုပ်ပြီးနောက် ကြိုးကာခေါင်းနီငှက်သိုက်များကို မှတ်တမ်း တင်ခဲ့ကြခြင်းလည်းဖြစ်ကြောင်း သိရပါတယ်။
ထိုငှက်များသည် သဘာ၀အလျှောက်ဖြစ်သော ရေဝပ်သည့်ဧရိယာများတွင် နေထိုင်ကျက်စားလေ့ရှိပြီး သားပေါက်ရာသီမှာ လေးလဝန်းကျင်ကြာမြင့်လေ့ရှိပါတယ်။
သဘာဝထိန်းသိမ်းစောင့်ရှောက်ရေးဆိုင်ရာ(IUCN – International Union for Conservation of Nature) စာရင်းများအရ တစ်ကမ္ဘာလုံးတွင် မျိုးသုဉ်းရန်အန္တရာယ်ကျရောက်နေသော မျိုးစိတ်ပေါင်း (၄၆)မျိုး မြန်မာနိုင်ငံ၌လည်းရှိနေပြီး ယင်းတို့အနက်တွင် ရှစ်မျိုးလောက်မှာ မျိုးသုဉ်းလုနီးပါးအန္တရာယ်ရှိသော မျိုးစိတ် ဖြစ်နေကြောင်း၊ (၁၂)မျိုးမှာ မျိုးသုဉ်းရန်အန္တရာယ်ရှိသော မျိုးစိတ်ဖြစ်ပြီး (၂၆)မျိုးမှာ မျိုးသုဉ်းရန်အန္တရာယ်ကျ ရောက် နိုင်သောမျိုးစိတ်ဖြစ်ကြောင်း ယင်းအဖွဲ့မှ ဆက်လက်သိရပါတယ်။
