စားအုန်းဆီ အခြေခံလက်ကားရည်ညွှန်းဈေး အနည်းငယ်ထပ်မံကျဆင်း

ယခုတစ်ပတ်အတွက် စားအုန်းဆီ အခြေခံလက်ကားရည်ညွှန်းဈေး အနည်းငယ်ထပ်မံကျဆင်းခဲ့ပြီး ဒီဇင်ဘာ (၁၉) ရက်မှ (၂၅) ရက်အထိ ရောင်းချမည့်ဈေးမှာ တစ်ပိသာ (၆၀၅၀) ကျပ်ဖြစ်ကြောင်း သိရသည်။
ပြီးခဲ့သည့် ဒီဇင်ဘာ (၁၂) ရက်မှ (၁၈) ရက်ထိ ရန်ကုန်အထိုင်ဈေး စားအုန်းဆီ အခြေခံလက်ကား ရည်ညွှန်းဈေးနှုန်းမှာ တစ်ပိသာကို ကျပ် (၆၁၁၅) ကျပ်ဖြစ်ပြီး ဒီဇင်ဘာ (၅) ရက် မှ (၁၁) ရက်ထိ ဈေးမှာ တစ်ပိသာ ကျပ် (၆၁၄၀) ဖြစ်ကြောင်း သိရသည်။
စားအုန်းဆီ အခြေခံလက်ကားရည်ညွှန်းဈေးသည် အောက်တိုဘာလတွင် တစ်ပိသာ ကျပ် (၆၅၈၅) ကျပ်မှ ယခု ဒီဇင်ဘာ ဒုတိယအပတ်တွင် ကျပ် (၆၁၄၀) အထိ ဈေးနှုန်းဆက်တိုက်ကျဆင်းလာပြီး နှစ်လအတွင်း တစ်ပိသာကို ကျပ် (၄၅၀) ဝန်းကျင်အထိ ကျဆင်းလာခြင်းဖြစ်သည်။
စားအုန်းဆီများကို ထုတ်ပြန်ကြေညာထားသည့် စျေးနှုန်းထက် ဈေးနှုန်းမြှင့်တင်ရောင်းချခြင်း၊ ဈေးကစားရန်ရည် ရွယ်ချက်ဖြင့် သိုလှောင်ခြင်းအပါအဝင် မသမာသည့်လုပ်ဆောင်မှုများပြုလုပ်ပါက အရေးကြီးကုန်စည်နှင့်ဝန်ဆော င်မှုဥပဒေအရ အရေးယူဆောင်ရွက်သွားမည်ဖြစ်ကြောင်း စားသုံးသူရေးရာဦးစီးဌာနမှ အသိပေးထားသည်။
ပြည်ပမှစာအုန်းဆီကို ဝယ်ယူတင်သွင်းရာတွင် စားအုန်းဆီတင်ပိုသည့် နိုင်ငံများ၏ ဈေးနှုန်းအတက်အကျပေါ် မူတ ည်၍ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများဖြစ်ပေါ်စေရေးကို ထိန်းကျောင်းဆောင်ရွက်နေကြောင်းလည်း သိရသည်။

စက်သုံးဆီအခက်အခဲကိုဖြေရှင်းနိုင်ရန် ပထမဆုံးခြေလှမ်းဖြစ်သည့် သန်လျင်ရေနံချက်စက်ရုံစီမံကိန်း

စက်သုံးဆီကို ကိုယ်တိုင်ချက်လုပ်သုံးစွဲနိုင်မှုမရှိခြင်း၍ မြန်မာနိုင်ငံ၌ကြုံတွေ့နေရသည့်အခက်အခဲများကိုဖြေရှင်းနိုင်ရန် ပထမဆုံးခြေလှမ်းဖြစ်သည့် သန်လျင်ရေနံချက်စက်ရုံစီမံကိန်းအားအတွက် စက်ရုံသစ်အား ရန်ကုန်တိုင်း၊ သန်လျင်မြို့ရှိ အမှတ်(၁)ရေနံချက်စက်ရုံ (သန်လျင်)တွင်တည်ဆောက်လျက်ရှိသည်။
ထိုသို့ တည်ဆောက်နေမှုကို စွမ်းအင်ဝန်ကြီးဌာန ပြည်ထောင်စုဝန်ကြီးဦးကိုကိုလွင်မှ ဒီဇင်ဘာ ၁၉ ရက်ကကြည့်ရှုစစ်ဆေး၍ ရေနံချက်စက်ရုံသစ်အား သတ်မှတ်စံချိန်စံညွှန်းများနှင့်အညီ အမြန်ဆုံးပြီးစီးရေး၊ လုပ်ငန်းတစ်ခုချင်းစီအလိုက် အပိုင်းလိုက်ဆောင်ရွက်ရမည်များအပြင် တစ်ပြိုင်တည်းတည်ဆောက်ရမည့်လုပ်ငန်းကို သေချာစွာပြင်ဆင်တည်ဆောက်ရန် မှာကြားသည်။
ထို့ပြင် ပြည်သူများ စက်သုံးဆီဝယ်ယူသုံးစွဲရာတွင်တွေ့ကြုံနေရသည့်အခက်အခဲများကို အမြန်ဆုံးလျော့ နည်းသက်သာစေရန် Quick Win ဖြစ်စေမည့် Moduler Type စက်ရုံအား ပထမအဆင့်အနေဖြင့်တည်ဆောက်နေခြင်းဖြစ်၍ လုပ်ငန်းများအချိန်မီပြီးစီးရေးအတွက် တာဝန်ရှိသူအဆင့်ဆင့်ကကြပ်မတ်ဆောင်ရွက်ရန်လည်း မှာကြားခဲ့သည်။
ထို့နောက် ပြည်ထောင်စုဝန်ကြီးမှ သန်လျင်ရေနံချက်စက်ရုံသစ်စီမံကိန်းလုပ်ငန်းများနှင့် သီလဝါဆိပ်ကမ်းမှ စက်ပစ္စည်းများ၊ ဆက်စပ်ပစ္စည်းများသယ်ယူရောက်ရှိ တပ်ဆင်ပြီးစီးမှုတို့ကို ကြည့်ရှုစစ်ဆေးခဲ့သည်။

ပြည်နယ်အတွင်း ရင်းနှီးမြှုပ်နှံမှုအခွင့်အလမ်းအများအပြားကို ဖော်ထုတ်မြှင့်တင်နိုင်ရန် ကရင်ပြည်နယ်ရင်းနှီးမြှုပ်နှံမှုဖိုရမ် (၂၀၂၅) ကို ကျင်းပ

ကရင်ပြည်နယ်အတွင်း ရင်းနှီးမြှုပ်နှံမှုအခွင့်အလမ်းအများအပြားကို ဖော်ထုတ်မြှင့်တင်နိုင်ရန် ရင်းနှီးမြှုပ်နှံမှုဖိုရမ် (၂၀၂၅) ကို ဘားအံမြို့ ဇွဲကပင်ခန်းမ၌ ဒီဇင်ဘာ ၁၈ ရက်တွင် ကျင်းပခဲ့သည်။
ကရင်ပြည်နယ်သည် မဟာမဲခေါင်ဒေသခွဲ အရှေ့အနောက်စီးပွားရေးစင်္ကြံလမ်းကြောင်းပေါ်တွင်တည်ရှိပြီး သာယာလှပသော တောတောင်ရေမြေသဘာဝရှုခင်းများ၊ စက်မှုကုန်ကြမ်းနှင့် အဖိုးတန်ဓာတ်သတ္တုများ ပေါများစွာထွက်ရှိခြင်းတို့ကြောင့် ပြည်နယ်အတွင်းရင်းနှီးမြှုပ်နှံမှု အခွင့်အလမ်းအများအပြားကို ဖော်ထုတ်မြှင့်တင်နိုင်ရန် ကရင်ပြည်နယ်အစိုးရအဖွဲ့နှင့် ကရင်ပြည်နယ်ရင်းနှီးမြှုပ်နှံမှု ကော်မတီတို့မှဦးဆောင်၍ ကျင်းပခြင်းဖြစ်ကြောင်း သိရသည်။
ကရင်ပြည်နယ်ရင်းနှီးမြှုပ်နှံမှုဖိုရမ် ၂၀၂၅ ၏ အဓိကဦးတည်ချက်ဖြစ်သော Smart Investor, Green Investment, The New Age of Kayin နှင့်အညီ ရင်းနှီးမြှုပ်နှံသူများမှ ဥပဒေကိုလေးစားလိုက်နာ၍ တာဝန်ယူမှုတာဝန်ခံမှုရှိသော သဘာဝပတ်ဝန်းကျင်အား ရေရှည်စဉ်ဆက်မပြတ်ထိန်းသိမ်းသော၊ လူမှုပတ်ဝန်းကျင်၏ တိုးတက်ဖွံ့ဖြိုးရေးအတွက် အထောက်အကူဖြစ်သော ရင်းနှီးမြှုပ်နှံမှုလုပ်ငန်းများအား ကရင်ပြည်နယ်အတွင်းလာရောက် ဆောင်ရွက်ခြင်းဖြင့် အနာဂတ်များအား အတူလက်တွဲလျှောက်လှမ်းသွားကြရန် ပြည်နယ်ဝန်ကြီးချုပ်ဦးစောမြင့်ဦးက ဖိတ်ခေါ် ပြောကြားခဲ့သည်။
ကရင်ပြည်နယ်ရင်းနှီးမြှုပ်နှံမှုဖိုရမ် ၂၀၂၅ သို့ တက်ရောက်လာသော ဌာနဆိုင်ရာများ၊ စီးပွားရေးလုပ်ငန်းရှင်များက စိုက်ပျိုးရေး၊ မွေးမြူရေးနှင့် စိုက်ပျိုးမွေးမြူရေးအခြေပြုစက်မှုကဏ္ဍကိုလည်းကောင်း၊ စက်မှု၊ ဝန်ဆောင်မှုနှင့်အသေးစား၊ အငယ်စား၊ အလတ်စားစီးပွားရေးလုပ်ငန်းများအား ချိတ်ဆက်ခြင်းကိုလည်းကောင်း ဆွေးနွေးခဲ့ကြကြောင်း သိရသည်။

အမြဲတမ်းနေထိုင်ခွင့် အစီအစဉ် အမေရိကန် ဆိုင်းငံ့

လူနှစ်ဦး‌သေဆုံးခဲ့သည့် ပြီးခဲ့သည့် သီတင်းပတ်က Brown University မှ လူအစုလိုက် အပြုံလိုက် ပစ်ခတ်မှု ဖြစ် ပွားခဲ့ပြီးနောက် အမေရိကန်သမ္မတ ဒေါ်နယ်ထရန့်က အမြဲ တမ်း နေထိုင်ခွင့်ဗီဇာမဲ( green card )အစီအစဉ်ကို ဆိုင်း ငံ့လိုက်သည်။
ယမန်နေ့က သေဆုံးလျက် တွေ့ရှိခဲ့သည့် ပေါ်တူဂီအမျိုး သားသည် လူမျိုးစုံ ရွှေ့ပြောင်းနေထိုင်မှု ဗီဇာဖြင့် အမေရိ ကန်သို့ ဝင်ရောက်ခဲ့ကာ ၂၀၁၇ ခုနှစ် တွင်အမြဲတမ်းနေထိုင်ခွင့် ရရှိခဲ့သည်။
အန္တရာယ်များသော အစီအစဉ်ကြောင့် အမေရိကန်နိုင်ငံ သားများ ထပ်မံ ထိခိုက်မှုမရှိစေရန် ထရန့်၏ ညွှန်ကြား ချက်အရ ယင်းဗီဇာအစီအစဉ်ကို ဆိုင်းငံ့လိုက်သည်ဟု အမေရိကန် ပြည်ထဲရေးဝန်ကြီး ခရစ္စတီနိုအမ် က ပြော ကြားသည်။
အသက် ၄၈ နှစ်အရွယ် ပစ်ခတ်မှု သံသယရှိသူ ကလော်ဒီယိုနီဗက်စ်ဗလင်တီသည် ယခု သီတင်းပတ်အစောပိုင်း တွင် မက်ဆာချူးဆက် နည်းပညာတက္ကသိုလ်မှ ပေါ်တူဂီလူမျိုး ပါမောက္ခ နူနိုလူရီရို ကိုလည်း သတ်ဖြတ်ခဲ့ သည် ဟု အမေရိကန်အရာရှိများက ယုံကြည်ကြသည်။
ယင်းဗီဇာအစီအစဉ်အရ အမေရိကန်နိုင်ငံသို့ ရွှေ့ပြောင်းနေထိုင်မှု နည်းပါးသော နိုင်ငံများမှ လျှောက်ထားသူများ အား ကျပမ်းရွေးချယ်ရေးအစီအစဉ်ဖြင့် တစ်နှစ်လျှင် လူ ၅၀၀၀၀ အထိ ဗီဇာချပေးကြောင်း သိရသည်။
၂၀၁၇ ခုနှစ်က နယူးယောက်မြို့တွင် ထရပ်ကားဖြင့် ဝင်တိုက်မှု ဖြစ်ပွားပြီး လူရှစ်ဦး သေဆုံးခဲ့ချိန်ကလည်း ယင်း ဗီဇာအစီအစဉ်ကို အဆုံးသတ်ရန် ဒေါ်နယ်ထရန့်က ကြိုး စားခဲ့သည်ဟု ဝန်ကြီးနိုအမ်က လူမှုမီဒီယာပေါ် ရေး သားသည်။
ယင်းတိုက်ခိုက်မှုကို ကျူးလွန်ခဲ့ပြီးနောက် တစ်သက် တစ် ကျွန်း ထောင်ဒဏ်များစွာ ကျခံနေရသော အိုင်အက်စ် ထောက်ခံသူ ဥဇဘက်ကစ္စတန်နိုင်ငံသား ဆေဖူလိုဆိုင်ပေါ့ဗ်သည်လည်း အမေရိကန်သို့ DV1 အစီအစဉ်ဖြင့် ဝင်‌ ရောက်ခဲ့ကြောင်း နိုအမ်က ပြောသည်။
Brown University ပစ်ခတ်မှုကို ကျူးလွန်သူဟု မသင်္ကာသူ နီဗက်စ်ဗလင်တီ အား နယူးဟမ့်ရှိူင်းယားပြည်နယ် ဆလမ်းဒေသမှ သိုလှောင်ရုံတစ်ခုတွင် မိမိကိုယ်ကိုယ် ပစ် ခတ်ခဲ့သည်ဟု ရဲတပ်ဖွဲ့က ယူဆသော သေနတ်ဒဏ်ရာဖြင့် သေဆုံးနေသည်ကို တွေ့ရှိခဲ့ရပြီးနောက် နိုအမ်၏ မှတ် ချက်များ ထွက်လာခြင်းဖြစ်သည်။

ထိုင်းရောက် မြန်မာလုပ်သားများအတွက် စီအိုင်သက်တမ်းတိုးစခန်းများအား ဒီဇင်ဘာ ၃၁ ရက်အထိ ထပ်တိုးဖွင့်လှစ်

ထိုင်းရောက် မြန်မာအလုပ်သမားများအတွက် ထုတ်ပေးထားသော မည်သူမည်ဝါဖြစ်ကြောင်း သက်သေခံလက်မှတ် (CI စာအုပ်)သက်တမ်းတိုးစခန်းများကိုဒီဇင်ဘာ ၃၁ ရက်အထိ ထပ်တိုး ဖွင့်လှစ်မည်ဖြစ်ကြောင်း ဒီဇင်ဘာ ၁၉ ရက်က ဗန်ကောက်အခြေစိုက်မြန်မာအလုပ်သမား သံအရာရှိရုံးက ထုတ် ပြန်ထားသည်။
CI စာအုပ် သက်တမ်းတိုးစခန်းများကို ဒီဇင်ဘာ ၂၁ ရက်တွင် ပိတ်သိမ်းရန် ကနဦး ကြေညာ ထား သော်လည်း 7-Eleven စတိုးဆိုင်များတွင်ငွေပေးသွင်းသူများ ကျန်ရှိနေသည့်အတွက် ဒီဇင်ဘာ ၃၁ ရက်အထိ ထပ်တိုးဖွင့်လှစ်မည်ဖြစ်ကြောင်းသိရသည်။
CI စာအုပ် ထုတ်ပေးရေးစခန်းများကို ချင်းမိုင်၊ စမွတ်စခွန်၊ စမွတ် ပရကန်နှင့် စူရတ်ဌာနီခရိုင်များ တွင် ဖွင့်လှစ်ထားပြီး ကရာဘီခရိုင်တွင် လည်းမိုဘိုင်းစခန်းတစ်ခု တိုးချဲ့ဖွင့်လှစ်ထားကြောင်း သိရသည်။
CI မှာ မည်သူမည်ဝါဖြစ်ကြောင်း သက်သေခံ လက်မှတ်ဖြစ်ပြီး နိုင်ငံကူးလက်မှတ်မရှိသော ထိုင်းရောက် မြန်မာအလုပ်သမားများအတွက် ခရီးသွားလက်မှတ်အဖြစ် ထုတ်ပေးထားသော စာအုပ် ဖြစ်ကာ သက်တမ်း လေးနှစ်ရှိကြောင်း သိရသည်။

အိပ်ရာဘေးတွင် ခြင်ဆေးခွေ ထွန်းထားခဲ့ရာမှ နေအိမ်မီးလောင်မှု ဖြစ်ပွား

ရန်ကုန်တိုင်း ဒေသကြီးသင်္ဃန်းကျွန်းမြို့နယ် ရန်ကုန်သစ်ရပ်ကွက် စန္ဒကူးလမ်း အကွက်(၃၀)တွင် မီးလောင်မှု ဖြစ်ပွားခဲ့ကြောင်းသိရသည်။
ဒီဇင်ဘာ ၁၈ ရက် ည ၇ နာရီ၅ မိနစ်ခန့်က သင်္ဃန်းကျွန်းမြို့နယ်ရန်ကုန်သစ်ရပ်ကွက် အကွက်အမှတ် (၃၀) စန္ဒကူးလမ်းနေ အိမ်ငှား ဦး....၏ RC နှစ်ထပ်လူနေအိမ်တွင် မီးလောင်မှုဖြစ်ပွားခဲ့သည်။
မီးလောင်မှု အကြောင်းရင်းမှာနေအိမ်ထပ်ခိုးတွင် အိပ်ရာဘေး၌ခြင်ဆေးခွေထွန်းထားရာခဲ့ရာမှ ခြင် ဆေးခွေမီး အိပ်ရာပေါ်လဲကျ၍မီးစတင်လောင်ကျွမ်းခဲ့သည်။
မီးလောင်မှုအား မီးငြှိမ်းသတ်ယာဉ် ခုနစ်စီး၊ ရေသယ်ယာဉ် ငါးစီး၊အထောက်ကူပြု ၁၉၁ တစ်စီးတို့ ဖြင့်အရှေ့ပိုင်းခရိုင် မီးသတ်ဦးစီးမှူးလက်ထောက် ညွှန်ကြားရေးမှူးဦးကိုကိုကြီး ကွပ်ကဲမှုဖြင့် ငြှိမ်းသတ်ခဲ့ရာ ည ၇ နာရီ မိနစ်၂၀ တွင် မီးထိန်း၍ ည ၇ နာရီ ၂၄ မိနစ်တွင် မီးငြိမ်းသွားကြောင်း သိရသည်။

ကမ္ဘောဒီးယားနယ်စပ်ရှိ ပွိုင်ပက်ကာစီနိုမြို့ကိုထိုင်းလေတပ်စစ်လေယာဉ်များက ဗုံးကြဲတိုက်ခိုက်

ထိုင်းရေတပ်မှ ဂျက်တိုက်လေယာဉ်များသည်ကမ္ဘောဒီးယားနိုင်ငံမှ ကာစီနိုလုပ်ငန်း မြို့တစ်မြို့ ဖြစ်သည့် ပွိုင်ပက်မြို့ကို ဒီဇင်ဘာ ၁၈ ရက်တွင် ဗုံးကြဲတိုက်ခိုက်ခဲ့ကြောင်း သိရသည်။
ကမ္ဘောဒီးယား ပြည်ထဲရေးဝန်ကြီးဌာန၏သတင်းထုတ်ပြန်ချက်အရ ထိုင်းလေတပ်စစ်လေယာဉ်များ သည် ပွိုင်ပက်မြို့တော် တစ်နေရာကို ဗုံးသုံးလုံးကြဲချခဲ့ရာ အဆောက်အအုံနှစ်လုံးပျက်စီးခဲ့ရပြီး အရပ်သားနှစ်ဦး ဒဏ်ရာရရှိခဲ့ကြောင်းသိရသည်။
ထိုင်းနှင့် ကမ္ဘောဒီးယားနယ်စပ်အနီး တည်ရှိသော ပွိုင်ပက်မြို့သည် ကာစီနိုလောင်းကစားလုပ်ငန်း များဖြင့် စည်ကားသောမြို့ဖြစ်ပြီး ထိုင်းနိုင်ငံသား လောင်းကစားဝါသနာရှင်များ အရောက်အပေါက် များသည့် မြို့လည်းဖြစ်သည်။
ထိုင်းနှင့် ကမ္ဘောဒီးယားတို့အကြား ဒီဇင်ဘာ၈ ရက်တွင် စတင်ခဲ့သော နယ်စပ်တိုက်ပွဲများသည် ဒီဇင်ဘာ ၁၈ ရက်အထိ ဆက်လက်ဖြစ်ပွားနေဆဲဖြစ်သည်။
တစ်ချိန်တည်းမှာပင် ကမ္ဘာ့အင်အားကြီးနိုင်ငံများကလည်း နယ်စပ်တိုက်ပွဲများ ရပ်ဆိုင်းရေးအတွက် ထိုင်းနှင့် ကမ္ဘောဒီးယားတို့ကို ဖိအားပေးလျက်ရှိသည်။
လက်ရှိအချိန်တွင် နှစ်နိုင်ငံနယ်စပ်တိုက်ပွဲများကြောင့် ထိုင်းနိုင်ငံဘက်ခြမ်း၌ အနည်းဆုံး ၂၁ဦး သေဆုံးခဲ့ရပြီး ကမ္ဘောဒီးယားဘက်ခြမ်းတွင်၁၈ ဦး သေဆုံးခဲ့ရသည်။
ထိုင်းနှင့် ကမ္ဘောဒီးယားတို့သည် ယခုနှစ်ဇူလိုင်လကလည်း နှစ်နိုင်ငံ ပိုင်ဆိုင်ခွင့်အငြင်းပွား နယ်စပ် တစ်လျှောက်၌ ငါးရက်ကြာ တိုက်ပွဲများဖြစ်ပွားခဲ့ရာ သမ္မတဒေါ်နယ်ထရန့်၏ ကြားဝင်မှုဖြင့် အပစ်အခတ်ရပ်စဲရေး သဘောတူညီချက် ရယူခဲ့ရဖူးသည်။

ဆီးရီးယားရှိ အိုင်အက်စ်ပစ်မှတ်တွေကို အမေရိကန်စစ်တပ် လေကြောင်းအကြီးအကျယ် တိုက်ခိုက်

ဆီးရီးယားနိုင်ငံရှိ အမေရိကန်တပ်ဖွဲ့တွေ သေဆုံးစေခဲ့တဲ့ တိုက်ခိုက်မှုကို လက်တုံ့ပြန်တဲ့အနေနဲ့ အမေရိကန်စစ်တပ်ဟာ ဆီးရီးယားရှိ အိုင်အက်စ်အဖွဲ့ပစ်မှတ်တွေကို လေကြောင်း တိုက်ခိုက်မှု အကြီးအကျယ် ပြုလုပ်ခဲ့တယ်လို့ ထုတ်ပြန်လိုက်ပါတယ်။
တိုက်လေယာဉ်တွေ၊ တိုက်ခိုက်ရေးရဟတ်ယာဉ်တွေ ၊ လက်နက်ကြီးတွေနဲ့အတူ ဆီးရီးယားအလယ်ပိုင်း နေရာအများအပြားရှိ ပစ်မှတ် ၇၀ ကျော်ကို တိုက်ခိုက်ခဲ့တယ်လို့ ထုတ်ပြန်ချက်မှာ‌ ဖော်ပြထားပြီး ဂျော်ဒန်နိုင်ငံမှ လေယာဉ်တွေလည်း ပါဝင်ခဲ့တယ်လို့ ဆိုပါတယ်။
အိုင်အက်စ်အဖွဲ့ရဲ့ အခြေခံအဆောက်အအုံတွေနဲ့ လက်နက်နေရာထားရှိရာနေရာတွေကို ပစ်မှတ်ထားပြီး တိကျစွာပစ်ခတ်နိုင်တဲ့ လက်နက်ခဲယမ်း ၁၀၀ ကျော်ကို အသုံးပြုခဲ့တယ်လို့ ပြောပါတယ်။
ပါလ်မိုင်ရာမြို့မှာ ဒီဇင်ဘာ ၁၃ ရက်နေ့က အမေရိကန်စစ်သားနှစ်ယောက်နဲ့ အမေရိကန်အရပ်သား စကားပြန်တယောက် သေဆုံးခဲ့တဲ့ အိုင်အက်စ်တို့ရဲ့ ချုံခိုတိုက်ခိုက်မှုအပြီးမှာ အိုင်အက်စ်တို့ရဲ့ အမာခံနေရာတွေကို အပြင်းအထန် လက်တုံ့ပြန်တိုက်ခိုက်မယ်လို့ သတိပေးခဲ့ပါတယ်။
Operation Hawkeye Strike လို့အမည်ပေးထားတဲ့ ဒီစစ်ဆင်ရေးကို သောကြာနေ့ အရှေ့ပိုင်းစံတော်ချိန် ညနေ ၄ နာရီမှာ စတင်ခဲ့တယ်လို့ အမေရိကန်စစ်တပ်က ပြောပါတယ်။ "ဒေသတဝန်းရှိ အမေရိကန်တွေနဲ့ မိတ်ဖက်တွေကို အန္တရာယ်ပြုဖို့ ကြိုးပမ်းနေတဲ့ အကြမ်းဖက်သမားတွေကို အဆက်မပြတ် လိုက်လံရှာဖွေသွားမယ်" လို့ စစ်တပ်တာဝန်ရှိသူက ပြောပါတယ်။
အမေရိကန်ကာကွယ်ရေးဝန်ကြီး ပီးဟက်ဆက်သ်ကတော့ ဒီစစ်ဆင်ရေးဟာ စစ်ပွဲတခုရဲ့အစမဟုတ်ဘဲ လက်တုံ့ပြန်တိုက်ခိုက်မှုဖြစ်တယ်လို့ ဆိုပါတယ်။ ဒီစစ်ဆင်ရေးကို ဆီးရီးယားအစိုးရက အပြည့်အ၀ ထောက်ခံခဲ့တယ်လို့ သမ္မတ ဒေါ်နယ်ထရန့်က ပြောပါတယ်။
အမေရိကန်စစ်တပ်ဟာ ရက်ကာနဲ့ ဒီယာအဇ်ဇောမြို့တွေအနီးက IS ရဲ့ တည်နေရာတွေကို ပစ်မှတ်ထားခဲ့တယ်လို့ ဗြိတိန်အခြေစိုက် ဆီးရီးယားလူ့အခွင့်အရေးစောင့်ကြည့်ရေးအဖွဲ့ (OBHR) က ပြောပါတယ်။
တိုက်ခိုက်မှုအတွင် ထင်ရှားတဲ့ အိုင်အက်စ် ခေါင်းဆောင်တယောက်နဲ့ တိုက်ခိုက်ရေးသမားအများအပြား သေဆုံးခဲ့တယ်လို့ ဆိုပါတယ်။ အိုင်အက်စ်အဖွဲ့ကတော့ ဒီကိစ္စအပေါ် မှတ်ချက်ပေးတာမျိုးမရှိသေးပါဘူး။

ထိုင်ဝမ်မှာ မီးခိုးဗုံးဖောက်ခွဲပြီး ဓါးကိုင်တိုက်ခိုက်လို့ သုံးယောက်သေ ကိုးယောက်ဒဏ်ရာရ

ထိုင်ဝမ်မြို့တော် တိုင်ပေမှာ ဓားကိုင်ဆောင်ထားသူတယောက်ရဲ့ တိုက်ခိုက်မှုကြောင့် လူသုံးယောက်ထက်မနည်း သေဆုံးပြီး ကိုးယောက်ဒဏ်ရာရရှိခဲ့ပါတယ်။
အသက် ၂၇ နှစ်အရွယ် သံသယရှိသူဟာ တိုင်ပေရဲ့ အဓိက မြေအောက်ရထားဘူတာရုံမှာ မီးခိုးဗုံးတွေ ဖောက်ခွဲပြီးနောက် အခြားဘူတာရုံတခုသို့ ထွက်ပြေးကာ လမ်းတလျှောက်ရှိ လူတွေကို ဓားနဲ့ထိုးခဲ့တယ်လို့ ထိုင်ဝမ်ဝန်ကြီးချုပ် ချိုဂျန်တိုင်က ပြောပါတယ်။
ချန်ဝမ်လို့အမည်ရတဲ့ အဲဒီသံသယရှိသူဟာ အထပ်မြင့်အဆောက်အအုံတခုမှ ပြုတ်ကျပြီးနောက် သေဆုံးသွားတယ်လို့ ဝန်ကြီးချုပ်က ပြောပါတယ်။ တိုက်ခိုက်မှုရဲ့ ရည်ရွယ်ချက်ကိုတော့ ရှင်းရှင်းလင်းလင်း မသိရသေးပါဘူး။
အကြမ်းဖက်မှု ဖြစ်ပွားမှုနှုန်း နည်းပါးတဲ့ ထိုင်ဝမ်မှာ ဒီလိုတိုက်ခိုက်မှုမျိုးက ရှားရှားပါးပါးဖြစ်ပါတယ်။ အလားတူဖြစ်ရပ်တခု တိုင်ပေမှာ နောက်ဆုံးဖြစ်ပွားခဲ့တာကတော့ လွန်ခဲ့တဲ့ ဆယ်စုနှစ်တခုကျော် ၂၀၁၄ ခုနှစ်ဖြစ်ပါတယ်။
တိုက်ခိုက်မှုဟာ ညနေခင်း အလုပ်ဆင်းချိန် ဒေသစံတော်ချိန် ညနေ ၅ နာရီ ၂၀ မိနစ်မှာ ဖြစ်ပွားခဲ့တာပါ။ လူမှုကွန်ရက်မှာ မျှဝေထားတဲ့ ဗီဒီယိုမှာတော့ ဘေ့စ်ဘောဦးထုပ်နဲ့ အနက်ရောင်အဝတ်အစားတွေ ဝတ်ဆင်ထားတဲ့ လူတယောက်ဟာ လူစည်ကားတဲ့ လမ်းမပေါ်မှာ မီးခိုးဗုံးတွေ ပစ်ပေါက်နေချိန် လူတွေ ထိတ်လန့်တကြား ထွက်ပြေးနေပါတယ်။
သံသယရှိသူဟာ မြေအောက်ဈေးဝယ်စင်တာမှတဆင့် မီတာ ၈၀၀ ခန့်အကွာရှိ အနီးရှိ ဇောင်ရှန် ဘူတာရုံကို ထွက်ပြေးသွားခဲ့ပါတယ်။ အဲဒီနောက် ဘူတာရုံအပြင်ဘက်ရှိ လမ်းပေါ်ကို ပြန်ပြေးကာ မီးခိုးဗုံးတွေကို ထပ်မံဖောက်ခွဲကာ လူတွေကို ဓားဖြင့်ထိုးခဲ့တယ်လို့ ဆိုပါတယ်။
သူဟာ အနီးရှိ စာအုပ်ဆိုင်နဲ့ ကုန်တိုက်တခုထဲကို ဝင်သွားခဲ့ပြီး ရဲတွေက သူ့ကိုဝိုင်းထားပြီးနောက် အဆောက်အအုံမှ ပြုတ်ကျခဲ့ကာ ဆေးရုံရောက်ပြီ မကြာမီ သေဆုံးသွားခဲ့တယ်လို့ တာဝန်ရှိသူတွေက ပြောပါတယ်။

ဖရူဆို၊ ဘောလခဲနဲ့ မိုးဗြဲမြို့နယ်တွေမှာ တိုက်ပွဲတွေ ဆက်လက်ပြင်းထန်

ကယားပြည်နယ်က ဖရူဆို၊ ဘောလခဲနဲ့ ရှမ်းပြည်နယ် (တောင်ပိုင်း) က မိုးဗြဲမြို့နယ်တွေမှာ အစိုးရတပ်ရဲ့ ထိုးစစ်ကြောင့် တိုက်ပွဲတွေ ပြင်းထန်နေတယ်လို့ စစ်ရေး သတင်းရင်းမြစ်တွေက ပြောပါတယ်။
လက်ရှိမှာ အစိုးရတပ်ဟာ အဲဒီမြို့တွေမှာ နေ့စဉ်နီးပါး နယ်မြေရှင်းလင်းရေး လုပ်ဆောင်နေသလို လေကြောင်း၊ လက်နက်ကြီး၊ ဒရုန်းတွေ အသုံးပြုကာ တိုက်ခိုက်မှုတွေလည်း ပြုလုပ်နေတယ်လို့ သိရပါတယ်။
“ရွေးကောက်ပွဲ ပထမပိုင်းက နီးလာပြီ။ အဲဒီလို နီးလာတာနဲ့အမျှ အစိုးရတပ်က မဲရုံရှိရာနေရာနဲ့ အနည်းဆုံး ၅ မိုင်ပတ်လည် နေရာတွေကို နယ်မြေရှင်းလင်းတာတွေ ပြုလုပ်လာနေတာကို တွေ့ရပါတယ်။ ဒီ ကယားပြည်မှာလည်း မြေပြင်ကင်း၊ စစ်ကြောင်းထိုးတာ အပါဝင် ဒရုန်းနဲ့ ကင်းထောက်တာ၊ လက်နက်ကြီးတွေ နေရာအနှံ့ကို ခပ်စိတ်စိတ် ပစ်ခတ်တာတွေ လုပ်နေတာတွေ့ရတယ်” လို့ စစ်ရေး သတင်းရင်းမြစ် တယောက်က သုံးသပ် ပြောဆိုပါတယ်။
ဒါကြောင့် မဲရုံနဲ့နီးစပ်ရာ နယ်မြေတွေက ဒေသခံ ပြည်သူတွေအနေနဲ့ ဝေဟင်နဲ့ မြေပြင်ကို အရင်ကထက် ပိုမိုပြင်ဆင် သတိထားကြ‌စေလိုတယ်လို့ သူက ပြောပါတယ်။
လက်ရှိမှာ အစိုးရတပ်ဟာ ရွေးကောက်ပွဲ နီးကပ်လာတာနဲ့အမျှ နယ်မြေရရှိဖို့အတွက် ရှမ်း - ကယားနယ်စပ် အပါအဝင် ကယားပြည်နယ် အတွင်းကို အင်အား အလုံးအရင်းနဲ့ နယ်မြေရှင်းလင်းရေး လုပ်ဆောင်နေပြီး ဒေသတွင်း လက်နက်ကိုင် တပ်တွေနဲ့ တိုက်ပွဲတွေ ဖြစ်ပွားလျက်ရှိတယ်လို့ သိရပါတယ်။
မနေ့ ဒီဇင်ဘာ ၁၈ ရက်၊ မနက်ပိုင်းကလည်း ရှမ်း - ကယားပြည်နယ်အစပ်က မိုးဗြဲမြို့ အနောက်ခြမ်း ကျေးရွာတွေမှာ လက်နက်ကြီး ကျရောက်မှုတွေ ဖြစ်ပွားခဲ့ပြီး လူထိခိုက်မှုတော့ မရှိခဲ့ဘူးလို့ ဒေသခံတွေက ပြောပါတယ်။
ဒါအပြင် ဘောလခဲမြို့က အစိုးရတပ်ရဲ့ ကာကင်းနေရာတွေမှာလည်း တိုက်ပွဲတွေ ဖြစ်ပွားနေတယ်လို့ သိရပြီး စစ်ရေးအခြေအနေ တင်းမာနေဆဲဖြစ်ကာ အစိုးရတပ်က အဲဒီဒေသမှာ စစ်ကြောင်း လေးကြောင်းအထိ အသုံးပြုထားတယ်လို့ သိရပါတယ်။
အဲဒီ စစ်ကြောင်းတွေဟာ တပ်ဖွဲ့စည်းပုံအပြည့်နဲ့ အင်အား အများအပြား ပါဝင်နေတယ်လို့ သိရပြီး ဘော်လခဲမြို့တဝိုက်နဲ့ ဖရူဆို - ဘောလခဲ လမ်းပိုင်းကို နယ်မြေအသာစီး ရယူဖို့ ကြိုးစားနေတာ ဖြစ်တယ်လို့ သိရပါတယ်။
လက်ရှိ ကယားပြည်နယ်ရဲ့ စစ်ရေး အခြေအနေတွေနဲ့ ပတ်သက်လို့ ကရင်နီပြည် တပ်မတော်က ဒီကနေ့ ဒီဇင်ဘာ ၁၉ ရက်နေ့ ရက်စွဲနဲ့ ကြေညာချက်တစောင် ထုတ်ပြန်လာတာကို တွေ့ရပြီး အဲဒီ ကြေညာချက်မှာ အခု ၂၀၂၅ ခုနှစ်၊ ဒီဇင်ဘာလ ၁၉ ရက်နေ့မှ လာမယ့် ၂၀၂၆ ခုနှစ်၊ ဇန်နဝါရီလ ၅ ရက်နေ့အထိကို အရေးကြီးကာလအဖြစ် သတ်မှတ်လိုက်တယ်လို့ ‌အသိပေး ဖော်ပြထားပါတယ်။
ကရင်နီပြည်သူလူထု၊ တပ်ပေါင်းစုံတပ်ဖွဲ့ဝင်တွေ၊ ကရင်နီ လူမှုအဖွဲ့အစည်းတွေ သိစေရန်ဆိုပြီး ထုတ်ပြန်ထားတဲ့ အဲဒီအသိပေးချက်မှာ ခရစ္စမတ်ချိန်ခါ နှစ်သစ်ကူးကာလ ဖြစ်နေချိန်မှာ လူစုလူဝေးနဲ့ ဝတ်ပြု ဆုတောင်းခြင်း၊ နေထိုင်သွားလာခြင်းနဲ့ ပျော်ပွဲရွှင်ပွဲတွေ မပြုလုပ်ကြဖို့၊ သတိကြီးစွာ နေထိုင်သွားလာကြဖို့ သတိပေးထားပါတယ်။
ဒီအသိပေးချက်နဲ့ ပတ်သက်လို့ စစ်ရေး လေ့လာစောင့်ကြည့်သူတွေကလည်း ဒီးမော့ဆို (အရှေ့ခြမ်းနဲ့ အနောက်ခြမ်း)၊ လွိုင်ကော် (အရှေ့ခြမ်း)၊ ဖရူဆို၊ ဘောလခဲ၊ ဖားဆောင်း၊ မော်ချီး စတဲ့ ဒေသတွေအနေနဲ့ အခု ဒီဇင်ဘာ လကုန်အထိ လေကြောင်းအန္တရာယ် သတိပြုကြဖို့ အသိပေး ပြောကြားထားပါတယ်။
အစိုးရ တာဝန်ရှိသူတွေအနေနဲ့ ကယားပြည်နယ် အတွင်းက လွိုင်ကော်၊ ဘောလခဲ၊ ဒီးမော့ဆိုနဲ့ ဖရူဆိုမြို့တို့မှာ ရွေးကောက်ပွဲ ကျင်းပမှာဖြစ်တယ်လို့ ကြေညာထားပြီး ရွေးကောက်ပွဲ အပိုင်း (၁) မှာတော့ လွိုင်ကော်နဲ့ ဘောလခဲမြို့ကို ထည့်သွင်းထားတာ ဖြစ်ပါတယ်။