မြောက်လန်ဒန်ဒါဘီပွဲစဉ်တွင် အိုဒီဂတ် ပြန်လည်ပါဝင်လာဖို့ရှိနေပြီး စပါးစ်စတားမူအာနီကလည်း မျက်နှာဖုံးဖြင့် ကစားလာနိုင်
==========================
မာတင်အိုဒီဂတ်မှာ မြောက်လန်ဒန်ဒါဘီပွဲတွင် ဒဏ်ရာမှ ချိန်သားကိုက် ပြန်လည်ကောင်းမွန်လာကာ ပြန်ကစားလာနိုင်ဖို့ ရှိနေပြီး စပါးစ်တိုက်စစ်သမားရန်ဒယ်ကိုလိုမူအာနီမှာလည်း မျက်နှာဖုံးစွပ်ကာ ကစားလာဖို့ ရှိနေပါတယ်။
အာဆင်နယ်နှင့် ဝေးလ်အသင်းခေါင်းဆောင်မာတင်အိုဒီဂတ်ဟာ ဒူးဒဏ်ရာကြောင့် အာဆင်နယ်ရဲ့ နောက်ဆုံး ၇ ပွဲကို လွဲချော်လာခဲ့သူ ဖြစ်ပါတယ်။
ဒါပေမယ့် အသက် ၂၆ နှစ်ရှိ အိုဒီဂတ်ဟာ ဒဏ်ရာမှ ပြန်လည်ကောင်းမွန်လာမှုနှင့်အတူ တနင်္ဂနွေနေ့ည စပါးစ်နှင့် မြောက်လန်ဒန်ဒါဘီပွဲတွင် ပြန်ကစားလာနိုင်ဖို့ ရှိနေပါတယ်။
အာဆင်နယ်နည်းပြအာတီတာဟာ ဗစ်တာယိုကီရေးစ်၊ ကိုင်ဟာဗတ်ဇ်၊ နိုနီမာဒူကီ၊ ဂါဘရီရယ်မာတင်နယ်လီတို့ ဒဏ်ရာကြောင့် အနားယူနေရချိန်တွင် အိုဒီဂတ် ပြန်လည်ကောင်းမွန်လာမှုကြောင့် တိုက်စစ်အတွက် စိတ်သက်သာရာ ရစရာ ဖြစ်လာပါတယ်။
တဖက်တွင် စပါးစ်တိုက်စစ်သမားမူအာနီမှာလည်း မျက်နှာဖုံးစွပ်ကာ လေ့ကျင့်ခန်းဆင်းနေမှုနှင့်အတူ အာဆင်နယ်နှင့်ပွဲတွင် ပြန်လည် ပါဝင်လာဖို့ ရှိနေပါတယ်။
အသက် ၂၆ နှစ်ရှိ ပြင်သစ်တိုက်စစ်သမားဟာ နိုင်ငံတကာပွဲစဉ်များမတိုင်မီ ယူနိုက်တက်နှင့် ၂ ဂိုးစီသရေကျတဲ့ပွဲမှာ မေးရိုးဒဏ်ရာရရှိခဲ့တာဖြစ်ပါတယ်။
သူဟာ မေးရိုးဒဏ်ရာကြောင့် နှစ်လအထိ အနားယူရမှာ စိုးရိမ်ခဲ့ရပေမယ့်လည်း ခွဲစိတ်ကုသမှု ပြုလုပ်ရန် မလိုအပ်မှုနှင့်အတူ အာဆင်နယ်နှင့်ပွဲတွင် ပါဝင်လာရေး မျှော်လင့်ချက် ရှိနေပါတယ်။
စပါးစ်ဂန္ထဝင်တိုက်စစ်မှူးဟယ်ရီကိန်းမှာလည်း ၂၀၁၆ ခုနှစ်တုန်းက နှာခေါင်းရိုးကျိုးဒဏ်ရာရရှိနေစဉ် မျက်နှာဖုံးစွပ်ကာ ကစားပြီး ဂိုးသွင်းခဲ့ဖူးပါတယ်။
စပါးစ်နည်းပြသောမတ်စ်ဖရန့်ဟာ တိုက်စစ်သမားများဖြစ်ကြတဲ့ ဂျိမ်းစ်မက်ဒီဆင်၊ ဒီဂျန်ကူလူဆပ်ဗ်စကီး၊ ဒိုမီနစ်ဆိုလန်ကီတို့ ဒဏ်ရာရရှိနေမှုနှင့်အတူ တိုက်စစ်အတွက် အကြပ်ရိုက်နေပါတယ်။
စပါးစ်ရဲ့ နောက်ဆုံးပွဲ ၂ ပွဲအပြင် ဂါနာနှင့်အတူ နိုင်ငံ့တကာပွဲလည်း မကစားနိုင်တဲ့ တောင်ပံကစားသမားကူဒပ်စ်မှာလည်း အာဆင်နယ်နှင့်ပွဲတွင် ပြန်ကစားနိုင်ရန် မရေမရာ ဖြစ်နေပါတယ်။
အိဒီဂတ်ဟာ ဒဏ်ရာကြောင့် အနားယူနေရပေမယ့်လည်း ပြန်လည် သက်သာလာမှုနှင့်အတူ အော်စလိုသို့ ပြန်ကာ အသင်းနှင့်အတူ ကမ္ဘာ့ဖလားခြေစစ်ပွဲအောင်ရာမှာ အောင်ပွဲခံခဲ့ပါတယ်။
