#ယနေ့ထုတ်သတင်းစာ_နိုင်ငံတကာသတင်း
◾️နိုင်ဂျီးရီးယား သိပ္ပံနှင့် နည်းပညာဝန်ကြီး ဘွဲ့လက်မှတ်အတုစွဲချက်ကြောင့် ရာထူးမှ နုတ်ထွက်
နိုင်ဂျီးရီးယားနိုင်ငံ၏ ဆန်းသစ်တီထွင်မှု၊ သိပ္ပံနှင့်နည်းပညာဝန်ကြီးအူခြေနာဂျီသည် ၎င်း၏ပညာရေးဆိုင်ရာ အထောက်အထားများကို အတုပြုလုပ်ခဲ့ကြောင်း စွပ်စွဲမှုများ ထွက်ပေါ်လာပြီးနောက် ရက်ပိုင်းအကြာ အောက်တိုဘာ ၈ ရက်တွင် ရာထူးမှ နုတ်ထွက်ခဲ့သည်။
နာဂျီသည် ၂၀၂၃ ခုနှစ်အတွင်း ၎င်း၏ဝန်ကြီးရာထူးခန့်အပ်မှုတွင် သမ္မတဘိုလာတီနူဘာအား ပညာရေးဆိုင်ရာ လက်မှတ်အတုများ တင်သွင်းခဲ့ကြောင်း စွပ်စွဲခံနေရသည်။ ၎င်း၏ ရာထူးနုတ်ထွက်မှုကို သမ္မတပြောရေးဆိုခွင့်ရှိသူက အတည်ပြုခဲ့သည်။
၎င်းသည် နိုင်ငံရေးပြိုင်ဘက်များ ခြိမ်းခြောက်မှု၏ ပစ်မှတ်ဖြစ်သည်ဟုနာဂျီက ပြောသည်။ အတုအပစွပ်စွဲချက်များကို ငြင်းဆိုထားပြီး နိုင်ဂျီးရီးယားတက္ကသိုလ်၊ အန်ဆူကာတက္ကသိုလ်တို့မှ အဏုဇီ၀ဗေဒနှင့် ဇီ၀ဓာတုဗေဒဘွဲ့ဖြင့် ဘွဲ့ရခဲ့ကြောင်း အခိုင်အမာပြောဆိုခဲ့သည်။
ပရီမီယံတိုင်းမ်သတင်းစာ၏ နှစ်နှစ်ကြာစုံစမ်းစစ်ဆေးမှုအပြီး ပေါ်ထွက်လာသည့် အထက်ပါ ပညာရေးဆိုင်ရာ အတုအပပြုလုပ်မှုသည် နိုင်ဂျီးရီးယားနိုင်ငံသားများကို အမျက်ဒေါသထွက်စေခဲ့သည်။ ဝန်ကြီးသည် ၁၉၈၅ ခုနှစ်တွင် သိပ္ပံဖြင့် ဘွဲ့ရခဲ့ကြောင်း အတည်ပြုသည့် မှတ်တမ်းများမရှိခဲ့ကြောင်း အန်ဆူကာတက္ကသိုလ်က ပြီးခဲ့သည့် ရက်သတ္တပတ်တွင် သတင်းထုတ်ပြန်ခဲ့သည်။
နာဂျီသည် ၁၉၈၁ ခုနှစ်တွင် ဝင်ခွင့်ရရှိခဲ့သော်လည်း ၎င်း၏ သင်ကြားမှုကို ပြီးမြောက်ခြင်းမရှိကြောင်း သို့မဟုတ် လက်မှတ်မရရှိခဲ့ကြောင်း အကြီးတန်းတက္ကသိုလ် အရာရှိတစ်ဦးက ပြောသည်။ အတိုက်အခံခေါင်းဆောင် အာတီကူအဘူဘာခါ ကမူ အဆိုပါကိစ္စနှင့်ပတ်သက်၍ လွတ်လပ်ပြီး ပွင့်လင်းမြင်သာမှုရှိသော စုံစမ်းစစ်ဆေးမှုပြုလုပ်ရန်နှင့် လိမ်လည်မှုအတွက် တရားစွဲသင့်သည်ဟုအာဏာပိုင်များကို တိုက်တွန်းထားသည်။
ကိုးကား - ဘီဘီစီ
