ရန်ကုန်မှာ မီးလောင်မှု သုံးကြိမ်ဖြစ်ပွားပြီး တယောက် သေဆုံး
အောက်တိုဘာ ၂၁
ရန်ကုန်မြို့မှာ မနေ့ အောက်တိုဘာ ၂၀ ရက်၊ ညနေပိုင်းကနေစပြီး ဒီကနေ့ အောက်တိုဘာ ၂၁ ရက်၊ မနက်ပိုင်းအထိ မီးလောင်မှု သုံးကြိမ်ဖြစ်ပွားခဲ့ကာ တယောက် မီးလောင်ကျွမ်း သေဆုံးခဲ့တယ်လို့ မြန်မာနိုင်ငံ မီးသတ်တပ်ဖွဲ့မှ တာဝန်ရှိသူ တယောက်က ပြောပါတယ်။
မနေ့ ညနေ ၆ နာရီ ၁၆ မိနစ်ဝန်းကျင်က တောင်ဥက္ကလာပမြို့နယ်၊ (၅) ရပ်ကွက်၊ ပါရမီလမ်းမှာ မီးလောင်မှု စတင် ဖြစ်ပွားခဲ့တာဖြစ်ပြီး ဆိုင်ခန်း ကိုးခန်း မီးလောင် ဆုံးရှုံးခဲ့တယ်လို့ သူက ပြောပါတယ်။
“ဆိုင်ခန်းအမှတ်တော့ ကျွန်တော် မမှတ်မိဘူး။ ဟောင်းနွမ်းဆွေးမြေ့နေတဲ့ ဝါယာကြိုးကနေ အပူလွန်ကဲပြီး မီးလောင်ကျွမ်းမှု စတင် ဖြစ်တာပါ။ ဒီဖြစ်စဉ်နဲ့ ပတ်သက်လို့ သက်ဆိုင်ရာ မြို့မရဲစခန်းကဘအရေးယူ ဆောင်ရွက်နေပါတယ်။ ပျက်စီးဆုံးရှုံးမှု တန်ဖိုးကတော့ ၆၅ သိန်းပါ” လို့ သူက ပြောပါတယ်။
မီးလောင်မှု ဖြစ်ပွားရာ နေရာကို တောင်ဥက္ကလာပမြို့နယ် မီးသတ်စခန်းမှ မီးငြှိမ်းသတ်ယာဉ် နှစ်စီး၊ ရေသယ်ယာဉ် တစီး၊ ရန်ကင်းမြို့နယ် မီးသတ်စခန်းမှ မီးသတ်ယာဉ် တစီး၊ ရန်ကုန် နာရေးကူညီမှုအသင်းမှ မီးသတ်ယာဉ် တစီးနဲ့ စည်ပင်မှ မီးသတ်ယာဉ် တစီးတို့ ထွက်ခွာ ငြှိမ်းသတ်ခဲ့ရတယ်လို့ သိရပါတယ်။
အဲဒီ မီးလောင်မှုကို ညနေ ၄ နာရီ ၂၅ မိနစ်မှာ Level 1 အဆင့် ထွက်ခွာ မီးငြှိမ်းသတ်ခဲ့ရတယ်လို့ သိရပြီး ညနေ ၄ နာရီ ၂၇ မိနစ်မှာ မီးထိန်းနိုင်ခဲ့ကာ ညနေ ၄ နာရီ ၃၆ မိနစ်မှာတော့ မီးငြှိမ်းသတ်နိုင်ခဲ့တယ်လို့ သိရပါတယ်။
အဲဒီလိုပဲ ဒီကနေ့ မနက်အစောပိုင်း ၁၂ နာရီ ၃ မိနစ် ဝန်းကျင်ကလည်း ရွှေပြည်သာမြို့နယ်၊ စက်မှုဇုန် (၁)၊ ကနောင်မင်းသားကြီး (၂) လမ်းမှာ မီးလောင်မှု ဖြစ်ပွားခဲ့ပြီး တယောက် မီးလောင် သေဆုံးခဲ့တယ်လို့ သိရပါတယ်။
“ရွှေပြည်သာက ခေါက်ဆွဲစက်ရုံမှာ မီးလောင်မှု ဖြစ်တာပါ။ ဒယ်နီအိုးထဲ ဟင်းထည့်နွှေးနေရင်း အိပ်ပျော်သွားရာကနေ အိုးအပူ လွန်ကဲပြီး မီးလောင်မှု ဖြစ်တာပါ။ သေဆုံးသူက မီးလောင်တာ မသိလိုက်ဘဲ အိပ်ပျော်နေလို့ မီးလောင် သေဆုံးတာပါ” လို့ သူက ပြောပါတယ်။
သေဆုံးသူဟာ အသက် ၇၈ နှစ်အရွယ်ရှိ ဦးမောင်မောင် ဖြစ်တယ်လို့ သိရပြီး ဒီမီးလောင်မှုမှာ ပျက်စီးဆုံးရှုံးမှု တန်ဖိုး သိန်း ၆၀ ရှိခဲ့ကာ လက်ရှိမှာ ဒီဖြစ်စဉ်နဲ့ ပတ်သက်လို့ သက်ဆိုင်ရာနယ်မြေ ရဲစခန်းက အရေးယူ ဆောင်ရွက်နေတယ်လို့ သူက ပြောပါတယ်။
အဲဒီ မီးလောင်မှု ဖြစ်ပွားရာ နေရာကို ရွှေပြည်သာမြို့နယ် မီးသတ်စခန်းမှ မီးသတ်ယာဉ်တွေ သွားရောက် မီးငြှိမ်းသတ်ခဲ့ရပြီး မနက် ၁၂ နာရီ၊ ၁၀ မိနစ်ဝန်းကျင်မှာတော့ Level 1 အဆင့် ထွက်ခွာ မီးငြှိမ်းသတ်ခဲ့ရတယ်လို့ သိရပါတယ်။
မနက် ၁၂ နာရီ ၂၇ မိနစ်ဝန်းကျင်မှာတော့ မီးထိန်းနိုင်ခဲ့ပြီး မနက် ၁၂ နာရီ ၄၃ မိနစ် ဝန်းကျင်မှာ အပြီးသတ် မီးငြှိမ်းသတ်နိုင်ခဲ့တယ်လို့ သိရပါတယ်။
ဒါအပြင် ဒီကနေ့ မနက် ၂ နာရီ၊ မိနစ် ၅၀ ဝန်းကျင်ကလည်း လှိုင်သာယာမြို့နယ်၊ ရွှေလင်ဗန်းစက်မှုဇုန်၊ ပိတောက်လမ်းမှာ မီးလောင်မှု ဖြစ်ပွားခဲ့တယ်လို့ သိရပါတယ်။
“ဖွဲဂိုဒေါင် မီးလောင်တာပါ။ ဆုံးရှုံးမှု တန်ဖိုးက ၃၅ သိန်းပါ။ အလုပ်သိမ်းချိန် ဖွဲခါစက်ကို အဖွင့်/အပိတ် လုပ်တဲ့ မိန်းခလုပ်ပိတ်ဖို့ မေ့လျော့ခဲ့ရာကနေ အပူလွန်ကဲပြီး မီးစတင်လောင်တာပါ” လို့ မီးသတ်ဦးစီးဌာနရဲ့ တာဝန်ရှိသူက ပြောပါတယ်။
ဒီဖြစ်စဉ်အတွင်း လူသေဆုံး၊ ဒဏ်ရာရမှု မရှိခဲ့ဘူးလို့ သိရပြီး လက်ရှိမှာ သက်ဆိုင်ရာ နယ်မြေရဲစခန်းက မီးလောင်မှုဖြစ်စဉ်နဲ့ ပတ်သက်လို့ ဂိုဒေါင်တာဝန်ရှိသူကို အရေးယူ ဆောင်ရွက်နေတယ်လို့ သိရပါတယ်။
အဲဒီ မီးလောင်မှု ဖြစ်ပွားရာနေရာကို လှိုင်သာယာမြို့နယ် မီးသတ်စခန်းမှ မီးသတ်ယာဉ်တွေ ထွက်ခွာ မီးငြှိမ်းသတ်ခဲ့ရပြီး မနက် ၃ နာရီ ၁၃ မိနစ်ဝန်းကျင်မှာ မီးထိန်းနိုင်ခဲ့ကာ မနက် ၄ နာရီ ၈ မိနစ်ဝန်းကျင်မှာတော့ မီးငြှိမ်းသတ်နိုင်ခဲ့တယ်လို့ သိရပါတယ်။
ပြည်ထဲရေးဝန်ကြီးဌာနရဲ့ ထုတ်ပြန်ချက်အရ အခု ၂၀၂၅ ခုနှစ်၊ ဇန်နဝါရီလကနေ ဇူလိုင်လအထိ ခုနစ်လအတွင်း မြန်မာနိုင်ငံ တဝန်းမှာ မီးလောင်မှု ၆၇၇ ကြိမ် ဖြစ်ပွားပြီး လူပေါင်း ၅၄ ယောက် သေဆုံးခဲ့ကာ ကျပ်သန်းပေါင်း ၅၉၀ဝ ကျော် ဆုံးရှုံးခဲ့တယ်လို့ သိရပါတယ်။
