ရွှေဘုန်းပွင့်စေတီတော်မြတ်ကြီးတွင် ရွှေကြာသင်္ကန်း ကပ်လှူပူဇော်မည်
ရန်ကုန်မြို့၊ ပုဇွန်တောင်မြို့နယ်ရှိ သမိုင်းဝင်ရွှေဘုန်းပွင့်စေတီတော်မြတ်ကြီးတွင် တန်ဆောင်မုန်းလပြည့်နေ့၌ ရွှေကြာ သင်္ကန်း ကပ်လှူပူဇော်မည်ဖြစ်ကြောင်း ရွှေဘုန်းပွင့်စေတီတော် ဘဏ္ဍာတော်ထိန်းဂေါပကအဖွဲ့ထံမှ သိရသည်။
သမိုင်းဝင်ရွှေဘုန်းပွင့် စေတီတော်မြတ်ကြီးကိုရန်ကုန်တိုင်းဒေသကြီး၊ ဗိုလ်တထောင်ခရိုင်၊ ပုဇွန်တောင်မြို့နယ်၊ အမှတ် (၇)ရပ်ကွက်တွင် တည်ထားကိုးကွယ်ထားပြီး ပဉ္စမအကြိမ် ရွှေကြာသင်္ကန်း ဆက်ကပ်ပူဇော်ပွဲကို တန်ဆောင်မုန်းလပြည့်နေ့တွင် ကျင်းပသွားမည်ဖြစ်ကြောင်း သိရသည်။
အဆိုပါ ပဉ္စမအကြိမ်ရွှေကြာသင်္ကန်း ဆက်ကပ်ပူဇော်ပွဲကို ရွှေဘုန်းပွင့်စေတီတော် ဘဏ္ဍာတော်ထိန်း ဂေါပကအဖွဲ့မှကြီးမှူးကျင်းပခြင်းဖြစ်ပြီး နိုဝင်ဘာ (၄) ရက် တန်ဆောင်မုန်းလပြည့်နေ့ နံနက် (၅) နာရီ၌ စေတီတော် ပထမပစ္စယာ၊ ဒုတိယပစ္စယာ၊ တတိယပစ္စယာနှင့် ပန်းတင်ခုံများရှိ စေတီတော်များ၊ ပရိဝုဏ်အတွင်းရှိ အရံစေတီများ၊ မတ်ရပ်ရုပ် ပွားတော်များ၊ လျောင်းတော်မူရုပ်ပွားတော်များ၊ ထိုင်တော်မူ ရုပ်ပွားတော်များအပြင် သာသနာ့ဇောတိက ဓမ္မာရုံအတွင်းရှိ ရုပ်ပွားတော်များ၊ မဟာဗောဓိ ညောင်ပင်ရှိ ရုပ်ပွားတော်များကိုလည်း ရွှေကြာသင်္ကန်းများ ဆက်ကပ်ပူဇော်မည်ဖြစ်သ ည်။
ယခုအခါ တန်ဆောင်မုန်းလပြည့်နေ့၌ ဆက်ကပ်ပူဇော်မည့် ရွှေကြာပန်းများ ရက်ဖောက်လျက်ရှိနေပြီး တန်ဆောင်မုန်းလပြည့်နေ့၌ ဆက်ကပ်မည့် ရွှေကြာသင်္ကန်းများကို ပင်မအလှူရှင်များကိုယ်တိုင် လာရောက်ဆက်ကပ်လှူဒါန်း ပူဇော်နိုင်ကြောင်း သိရသည်။
သမိုင်းဝင် ရွှေဘုန်းပွင့်စေတီတော်မြတ်ကြီးအား ယခင်က နှစ်စဥ်မသိုးသင်္ကန်းများ ရက်လုပ်ဆက်ကပ်ပူဇော်ခဲ့ပြီး ရွှေကြာသင်္ကန်းဆက်ကပ်ပူဇော်ခြင်းသည် ယခုနှစ်တွင် ပဉ္စမအကြိမ်ဖြစ်ကြောင်း သိရသည်။
