#နိုင်ငံတကာသတင်း
◼ ယူကရိန်းစစ်ပွဲအဆုံးသတ်ရေးဆွေးနွေးရန် ပူတင်နှင့် ထရန့် မနက်ဖြန်စကားပြောမည်
အမေရိကန် နှင့် ရုရှားအရာရှိကြီးများ မော်စကိုမြို့တွေ့ဆုံမှု အပြုသဘောဆောင်ခဲ့ပြီးနောက် ၎င်းအနေဖြင့် ရုရှားသမ္မတ ဗလာဒီမာပူတင်နှင့် မနက်ဖြန်တွင် စကားပြောပြီး ယူကရိန်းစစ်ပွဲ အဆုံးသတ်ရေးကို ဆွေးနွေးရန် စီစဉ်ထားကြောင်း အမေရိကန်သမ္မတ ဒေါ်နယ်ထရန့်က ပြောကြားသည်။
“စစ်ပွဲကို အဆုံးသတ်နိုင်မလားဆိုတာကို ကျွန်တော်တို့ကြည့်ချင်ပါတယ်။ ဒါက ဖြစ်လည်းဖြစ်နိုင်တယ်။ မဖြစ်နိုင်တာလည်းဖြစ်နိုင်တယ်။ ဒါပေမယ့် ကျွန်တော်တို့မှာ အခွင့်အရေးကောင်းရှိနေတယ်လို့ ထင်ပါတယ်။” ဟု ဒေါ်နယ်ထရန့်က ဖလော်ရီဒါပြည်နယ်နေအိမ်မှ ဝါရှင်တန်သို့ အပြန် Air Force One လေယာဉ်ပေါ်တွင်သတင်းထောက်များအား ပြောကြားသည်။
“ကျွန်တော့်အနေနဲ့သမ္မတပူတင်ကို အင်္ဂါနေ့မှာ စကားပြောသွားပါမယ်။ သီတင်းပတ် ကုန်ရက်တွေမှာအလုပ်တွေအများကြီး ပြီးမြောက်ခဲ့ပါတယ်။” ဟု ထရန့်က ဆက်ပြောသည်။
ရုရှား၊ယူကရိန်းနှစ်ဖက်စလုံးကလေကြောင်းမှတိုက်ခိုက်မှုများအကြီးအကျယ်ဆက်လက်လုပ်ဆောင်နေစဉ် ပြီးခဲ့သည့်သီတင်းပတ်အတွင်း ယူကရိန်းကလက်သင့်ခံခဲ့သော ရက်ပေါင်း ၃၀ အပစ်ရပ်ရေးအဆိုပြုချက်အပေါ် မစ္စတာပူတင်၏ ထောက်ခံမှုရရှိရန် ဒေါ်နယ်ထရန့်က ကြိုးစားနေသည်။
မော်စကိုမြို့တွင် ဆွေးနွေးမှုလုပ်ခဲ့သော အမေရိကန်ကိုယ်စားလှယ် စတိဗ်ဝစ်ကော့ဖ် မှ တစ်ဆင့် သမ္မတပူတင် က၎င်း၏ အပစ်ရပ်ရေးအစီအစဉ် နှင့်ပတ်သက်သော သတင်းစကားကိုဒေါ်နယ်ထရန့်ထံသို့ ပေးပို့ခဲ့ကြောင်း နှင့် သုံးနှစ်ကြာစစ်ပွဲအဆုံးသတ်ရေးအပေါ် သတိထားသောအကောင်းမြင်မှုကိုလည်း ပြောကြားခဲ့ကြောင်း ကရင်မလင် က သောကြာနေ့တွင်ထုတ်ပြန်ပြောကြားခဲ့သည်။
တစ်ဖက်တွင်လည်း အမေရိကန်နိုင်ငံခြားရေးဝန်ကြီး မာကိုရူဘီယို နှင့် အမျိုးသားလုံခြုံရေး အကြံပေး စတိဗ်ဝစ်ကော့ဖ် တို့က တနင်္ဂနွေနေ့တွင် အမေရိကန်မှ မတူညီသော ရုပ်သံအစီအစဉ်များတွင် ပါဝင်ခဲ့ကြကာ နောက်ဆုံးငြိမ်းချမ်းရေး သဘောတူညီချက်ကို မဆိုထားနှင့် အပစ်ရပ်ရေးအတွက် ရုရှားထံမှ သဘောတူညီမှုရရှိရေးအတွက်ပင် ဖြေရှင်းရမည့် စိန်ခေါ်မှု အများအပြားရှိကြောင်း ပြောကြားကြသည်။
နယ်မြေပိုင်ဆိုင်မှုနှင့်ပတ်သက်၍ ယူကရိန်းက အရှိတရားကို လက်သင့်ခံရမည့်သဘော အမျိုးသားလုံခြုံရေး အကြံပေး စတိဗ်ဝစ်ကော့ဖ်က အေဘီစီရုပ်သံ နှင့် တွေ့ဆုံမှုတွင် ပြောကြားသည်။
ထို့ပြင်နောက်ဆုံးငြိမ်းချမ်းရေးသဘောတူညီချက် ရရှိရန် နှစ်ဖက်စလုံးက အလျှော့ပေးလိုက်လျောမှု များစွာလုပ်ဆောင်ရန် လိုအပ်ကြောင်း နှင့် နှစ်ဖက်ဆက်လက်တိုက်ခိုက်နေပါက ဆွေးနွေးပွဲများ စတင်ရန်ပင် ခက်ခဲလိမ့်မည်ဖြစ်ကြောင်း နိုင်ငံခြားရေးမာကိုရူဘီယိုကလည်း CBSရုပ်သံနှင့်တွေ့ဆုံမှုတွင် ပြောကြားသည်။
သတင်း-ရဲမင်း
ကိုးကား-Reuters
