နောက်ခံလူဟောင်းအက်ဝတ်ကို နည်းပြသစ်အဖြစ် ဝုဗ် ခန့်အပ်လာ
====================
ဝုဗ်ဟာ နည်းပြသစ်အဖြစ် ရော့ဘ်အက်ဝတ်အား သုံးနှစ်ခွဲစာချုပ်ဖြင့် ခန့်အပ်လာပြီ ဖြစ်ပါတယ်။ ဝုဗ်ဟာ မကြာသေးမီတုန်းက ထုတ်ပယ်လိုက်တဲ့ ပီရီရာရဲ့ နေရာတွင် အက်ဝတ်ကို အစားထိုး ခန့်အပ်လာတာလည်း ဖြစ်ပါတယ်။
အက်ဝတ်ဟာ ဇွန်လကမှ မစ်ဒယ်ဘရော့အသင်းကို ကိုင်တွယ်လာခဲ့ပြီး ချန်ပီယံရှစ်အမှတ်ပေးဇယားအဆင့် ၂ နေရာတွင် ရပ်တည်နိုင်အောင် စွမ်းဆောင်ထားနိုင်ပေမယ့် နုတ်ထွက်ကာ ပရီးမီးယားလိဂ်ကလပ်အား ကိုင်တွယ်လာတာပါ။
သူဟာ ချန်ပီယံရှစ် အဆင့် ၂ နေရာအသင်းမှ နုတ်ထွက်ပြီး ပရီးမီးယားလိဂ်ပွဲစဉ် ၁၁ အပြီး နိုင်ပွဲမရှိသေးဘဲ တန်းဆင်းဇုန်ပြင်ပမှ အသင်းနှင့် ၈ မှတ်အထိ ကွာဟကာ ဇယားအောက်ဆုံးမှ အသင်းကို ကိုင်တွယ်ရန် ရွေးချယ်လာတာလည်း ဖြစ်ပါတယ်။
အသက် ၄၂ နှစ်ရှိ အက်ဝတ်ဟာ နွေရာသီတုန်းက မစ်ဒယ်ဘရော့ကို ကိုင်တွယ်ပြီးနောက် လမ်းကြောင်းမှန်ပေါ်တွင် ရှိနေပေမယ့်လည်း အသင်းဟောင်းက ကမ်းလှမ်းလာချိန်တွင် မငြင်းပယ်နိုင်ဘဲ လက်ခံလာတာပါ။
အက်ဝတ်ဟာ ၂၀၀၄ ခုနှစ်မှ ၂၀၀၈ ခုနှစ်အတွင်းတွင် ဝုဗ်အတွက် ပွဲပေါင်းတစ်ရာကျော် ကစားလာခဲ့သူ ဖြစ်ပြီး တဲလ်ဖို့ဒ်တွင် ကြီးပြင်းလာခဲ့တဲ့အပြင် ယင်းဒေသတွင် မိသားစုဝင်များ နေထိုင်ကြပါတယ်။
ယခုကဲ့သို့ အခြေအနေ ကွင်းတွင်း ရလဒ်ဆိုးရွားနေတဲ့အပြင် ကွင်းပြင်ပတွင်လည်း ပရိသတ်များက အသင်းပိုင်ရှင်အား ဆန့်ကျင်မှု ကြုံနေရတဲ့ ဝုဗ်အား ကိုင်တွယ်ရန် ရွေးချယ်မှုမှာ အက်ဝတ်အတွက် အရဲစွန့် ရွေးချယ်မှုလည်း ဖြစ်နေပါတယ်။
အထူးသဖြင့် ပရီးမီးယားလိဂ်တန်းတက်ရေး တိုက်ပွဲဝင်နေရတဲ့ အခြေအနေမျိုးမှ ပရီးမီးယားလိဂ်မှ တန်းမဆင်းရရေး တိုက်ပွဲဝင်လာမှုက အက်ဝတ်အတွက် အကြီးကျယ်ဆုံး စိန်ခေါ်မှုလည်း ဖြစ်နေပါတယ်။
ရော့ဘ်အက်ဝတ်နှင့်အတူ လက်ထောက်နည်းပြဟယ်ရီဝတ်လင်းကိုလည်း ခေါ်ဆောင်လာပါမယ်။ ဒါ့အပြင် ပေါလ်ထရိုးလ်လုပ်၊ ဂျိုလီယွန်လက်စ်ကော့၊ ကော်နာကွာဒီတို့ကိုလည်း နည်းပြအဖွဲ့ဝင်ထဲမှာ ထည့်သွင်းခန့်အပ်လာမယ်လို့ သိရပါတယ်။
အက်ဝတ်ဟာ ပရီးမီးယားလိဂ်နည်းပြအဖြစ် တစ်ရာသီတည်းသာ အတွေ့အကြုံ ရှိသူ ဖြစ်ပြီး ၂၀၂၃-၂၄ ရာသီတုန်းက လူတန်ကို ကိုင်တွယ်ခဲ့တာ ဖြစ်ပြီး တန်းဆင်းခဲ့ရပါတယ်။
အက်ဝတ်ဟာ ၂၀၁၉ ခုနှစ်တုန်းက ဝုဗ်ယူ-၂၃ အသင်းနှင့်အတူ ပရီးမီးယားလိဂ် ၂ ဖလား ဆွတ်ခူးနိုင်ခဲ့သူ ဖြစ်ပြီး နည်းပြဘဝအကောင်းဆုံးကာလလည်း ဖြစ်ပါတယ်။
သူဟာ ဝုဗ်လူငယ်အသင်းကို ကိုင်တွယ်နေစဉ်အတွင်း ၂၀၁၆ ခုနှစ် နိုဝင်ဘာလ ၂၂ ရက်နေ့တုန်းက ပဲလေ့စ်နှင့်ပွဲကို ယာယီနည်းပြအဖြစ် ကိုင်တွယ်ဖူးပါတယ်။
ဝုဗ်ဟာ ပြီးခဲ့တဲ့အပတ် စနေနေ့တုန်းက ချဲလ်ဆီးကို ရှုံးနိမ့်ပြီးနောက် ပရီးမီးယားလိဂ် ပွဲစဉ် ၁၁ အပြီးအထိ နိုင်ပွဲပျောက်ဆုံးနေပြီး ကလပ်သမိုင်းတွင် ဒုတိယအကြိမ်မြောက် ရာသီအစ ၁၁ ပွဲဆက် နိုင်ပွဲပျောက်မှု ကြုံနေရပါတယ်။ ၎င်းတို့ဟာ ၁၉၈၃-၈၄ ရာသီတုန်းကလည်း အဖွင့်ပွဲ ၁၁ ပွဲဆက် နိုင်ပွဲ ပျောက်ဖူးပြီး ရာသီအကုန်တွင် တန်းဆင်းခဲ့ရဖူးပါတယ်။
ဒါ့အပြင် ပရီးမီးယားလိဂ်သမိုင်းတွင် အဖွင့်ပွဲ ၁၁ ပွဲဆက် နိုင်ပွဲပျောက်ပြီးမှ ပရီးမီးယားလိဂ်တွင် တင်ကျန်ရစ်ခဲ့တဲ့အသင်းလည်း မရှိဖူးပါဘူး။
