ယူကရိန်းတွင် စစ်သားစုဆောင်းရေး အခက်အခဲရှိနေ--ကီးယက်ဗ်မြို့တော်ဝန်

ယူကရိန်းနိုင်ငံသည် ဥရောပသို့ ထွက်ပြေးသူအရေအတွက် စံချိန်တင် များပြားလာခြင်းကြောင့် စစ်သားရှားပါးမှုနှင့် ရင်ဆိုင်နေရကြောင်း ကီးယက်ဗ် မြို့တော်ဝန် ဗီတာလီ ကလစ်ချ်ကိုက အင်တာဗျူးတစ်ခုတွင် သတိပေးပြောကြားခဲ့သည်။
"လူ့စွမ်းအားအရင်းအမြစ် ပြဿနာကကြီး‌နေတယ်။ စစ်သားစုဆောင်းဖို့ ကျွန်တော်တို့မှာ ကြီးမားတဲ့ပြဿနာရှိပါတယ်" ဟု ပေါ်လာတီကို၏ အစိတ်အပိုင်းတစ်ခုဖြစ်သည့် အိတ်ဆဲ စပရင်ဂျာကမ္ဘာလုံးဆိုင်ရာ သတင်းထောက်များကွန်ရက်သို့ သူကပြောကြားခဲ့သည်။
ရုရှားတပ်ဖွဲ့များသည် ၎င်းတို့၏ တို-က်ခို-က်မှုများကို "ကွန်ပြူတာဂိမ်းတစ်ခုကဲ့သို့ပင် ကျဆုံးသွားသော စစ်သားများကို ဂရုမစိုက်ဘဲ ၎င်းတို့သည် ဆက်လက်ချီတက်လာနေသည် " ဟုပုံ ခိုင်းဖော်ပြကာ ရုရှားတပ်ဖွဲ့များသည် မဆုတ်မနစ် ချီတက်လာနေကြောင်း ၎င်းက ပြောကြားခဲ့သည်။
လက်ရှိစည်းမျဉ်းများအရ၊ ယူကရိန်းနိုင်ငံသားများကို အသက် ၂၅ နှစ်မှစတင်၍ စစ်မှုထမ်းရန် ဆင့်ခေါ်နိုင်သည်။ ကလစ်ချ်ကိုက အဆိုပါ ဥပဒေကိုပြောင်းလဲသင့်သည်ဟု အကြံပြုခဲ့သည်။
“အရင်တုန်းက အသက် ၁၈ နှစ်အရွယ် ဆိုစစ်မှုထမ်းရတာပဲ။ ဒါပေမယ့်သူတို့က ကလေးတွေပဲ” ဟု ၎င်းက ဆိုသည်။ "အခုအချိန်မှာ အသက် ၂၅ နှစ်ပြည့်မှသာ စစ်မှုထမ်းခိုင်းလို့ရတယ်။ တစ်နှစ် ဒါမှမဟုတ် နှစ်နှစ်လောက်အတွင်းမှာ အသက် ၂၃ ဒါမှမဟုတ် ၂၂ အထိ လျှော့ချနိုင်ပါတယ်" ဟု သူကဆိုသည်။
အဆိုပါ စကားများကြောင့် လူငယ်များ အစုအပြုံလိုက် ထွက်ပြေးကြမည်ကို စိုးရိမ်ရသည်။ ဩဂုတ်လတွင် ထုတ်ပြန်ခဲ့သည့် အစိုးရ၏ ဒီကရီအမိန့်အရ အသက် ၁၈ နှစ်မှ ၂၂ နှစ်ကြား အမျိုးသားများကို နိုင်ငံတွင်းမှ ထွက်ခွာခွင့်ပြုလိုက်ခြင်းကြောင့် အခြားသော အီးယူနိုင်ငံများတွင် ခိုလှုံသူများသိသိသာသာ တိုးလာသည်။

ကမ္ဘောဒီးယားနှင့် ထိုင်းကို ငြိမ်းချမ်းရေးသဘောတူညီချက် အကောင်အထည်ဖော်ရန် အမေရိက တိုက်တွန်း

ကမ္ဘောဒီးယားနယ်စပ်အနီးတွင် ထိုင်းစစ်သားများ မြေမြှုပ်မိုင်းနင်းမိသည့် ဖြစ်ရပ်နှင့်ပတ်သက်၍ အမေရိကန်ပြည်ထောင်စုက သတင်းအချက်အလက်များကို စုဆောင်းနေကြောင်း အမေရိကန်နိုင်ငံခြားရေးဌာန ပြောရေးဆိုခွင့်ရှိသူတစ်ဦးက အင်္ဂါနေ့တွင် ပြောကြားခဲ့ပြီး အိမ်နီးချင်းနှစ်နိုင်ငံကို တည်ငြိမ်မှုကိုထိန်းသိမ်းရန်နှင့် အမေရိကန်သမ္မတ ဒေါ်နယ်ထရမ့်၏ ‌‌ရှေ့‌မှောက်၌ လက်မှတ်ရေးထိုးထားသည့် ငြိမ်းချမ်းရေးသဘောတူညီချက်ကို အကောင်အထည်ဖော်ရန် တိုက်တွန်းခဲ့သည်။
ကင်းလှည့်နေစဉ်အတွင်း ထိုင်းစစ်သား သုံးဦး ထိခို-က်ဒ-ဏ်ရာရရှိသွားပြီးနောက် ကမ္ဘောဒီးယားနှင့် ငြိမ်းချမ်းရေးသဘောတူညီချက်ကို အကောင်အထည်ဖော်မှု ဆိုင်းငံ့ရန် ထိုင်းအစိုးရက ဆုံးဖြတ်ခဲ့ပြီးနောက် အမေရိကန်အရာရှိ၏ ပြောကြားချက်သည် ယခုကဲ့သို့ ထွက်ပေါ်လာခြင်းဖြစ်သည်။
ထိုင်းအစိုးရက ကမ္ဘောဒီးယားသည် နှစ်နိုင်ငံအကြား အငြင်းပွားနယ်စပ်တစ်လျှောက်၌ မြေမြှုပ်မိုင်းများကို ထပ်မံ မြှုပ်နှံနေသည်ဟု စွပ်စွဲထားသည်။
သို့သော်လည်း ကမ္ဘောဒီးယားကာကွယ်ရေးဝန်ကြီးဌာနက ထိုင်း၏စွပ်စွဲချက်များကို ပယ်ချခဲ့ပြီး စစ်ပွဲအတွင်းက ကျန်ခဲ့သည့် မိုင်းဟောင်းများရှိသည့် နေရာများတွင် ကင်းလှည့်နေခြင်းကို ရှောင်ရှားရန် ထိုင်းဘက်ကို တိုက်တွန်းထားပြီး ကမ္ဘောဒီးယားနိုင်ငံသည် အောက်တိုဘာလတွင် ချုပ်ဆိုထားသည့် ငြိမ်းချမ်းရေး သဘောတူညီချက်နှင့်အညီ ထိုင်းနိုင်ငံနှင့် လက်တွဲလုပ်ဆောင်သွားရန် ကတိပြုထားသည်။
ထိုင်းဝန်ကြီးချုပ် အနုတင် ချာန်ဝီရာကွန် က ကမ္ဘောဒီးယားနှင့် ငြိမ်းချမ်းရေးသဘောတူညီချက်ကို အကောင်အထည်ဖော်မှုအားလုံးကို အကန့်အသတ်မရှိ ဆိုင်းငံ့ထားရန် ကာကွယ်ရေးဝန်ကြီးဌာနကို အင်္ဂါနေ့က ပြောကြားခဲ့ပြီး ငြိမ်းချမ်းရေးသည် ပြီးဆုံးသွားပြီဖြစ်ကြောင်း ကြေညာခဲ့သည်။

MI5 က ဆိုးသွမ်းဉာဏ်ရည်တု၏ ထိန်းမနိုင် သိမ်းမရ အန္တရာယ်ကိုစောင့်ကြည့်

ဗြိတိန်သူလျှိုများသည် ဆိုးသွမ်းဉာဏ်ရည်တု စနစ်ကြောင့် ဖြစ်ပေါ်လာနိုင်သည့် အန္တရာယ်ကို ကိုင်တွယ်ဖြေရှင်းရန် စတင်လုပ်ဆောင်နေပြီဟု MI 5 အကြီးအကဲက ပြောကြားခဲ့သည်။
ဆာခန်း မက်ကယ်လမ် က ဉာဏ်ရည်တု ၏ အန္တရာယ်ဖြစ်စေမည့် အလားအလာကို လျစ်လျူရှုခြင်းသည် ပရမ်းပတာဖြစ်ရမ်းများကိုဖြစ်ပေါ်စေပြီး ထင်ရာစိုင်းကြလိမ့်မည်ဟု ပြောကြားခဲ့သည်။
လုံခြုံရေးဌာန၏ ထမ်းဟောက်စ် ရုံးချုပ်၌ မိန့်ခွန်းပြောကြားရာတွင် ၎င်းက "ဟောလိဝုဒ် ရုပ်ရှင်ဇာတ်လမ်းများကို ခန့်မှန်းခြင်း" မဟုတ်သော်လည်း ထောက်လှမ်းရေးအေဂျင်စီများသည် အန္တရာယ်များကို ထည့်သွင်းစဉ်းစားရန် လိုအပ်ကြောင်း ပြောကြားခဲ့သည်။
၎င်းက “MI 5 သည် ကျွန်ုပ်တို့၏လူသား— တစ်ခါတစ်ရံ လူမဆန်သော-ရန်ဘက်များထက် သာလွန်အောင် တီထွင်ဆန်းသစ်ရန် ရာစုနှစ်တစ်ခုကျော်ကြာအောင် အဆင့်မြင့်သောအရာများကို လုပ်ဆောင်ခဲ့ရ‌ကြောင်း ပြောကြားခဲ့သည်။
“သို့သော် ယနေ့ခေတ်ခြိမ်းခြောက်မှုများနှင့် ရင်ဆိုင်နေရသည့် ၂၀၂၅ တွင် ကျွန်ုပ်တို့သည် လူသားများ၏ ကြီးကြပ်ကွပ်ကဲမှုနှင့် ထိန်းချုပ်မှုကို ရှောင်လွှဲနိုင်သည့် လူသားမဟုတ်သော ဉာဏ်ရည်တုစနစ်များ၏ အနာဂတ်အန္တရာယ်များကို ဖော်ထုတ်ရန် လိုအပ်ပါသည်။
“ဉာဏ်ရည်တုက ကျွန်တော်တို့ကို အန္တရာယ်ဖြစ်စေဖို့ ဆိုတာကဘယ်တော့မှ ဖြစ်မလာနိုင်ပါဘူး။ ဒါပေမယ့် အန္တရာယ်ဖြစ်စေနိုင်တဲ့ အလားအလာကို လျစ်လျူရှုတာကတော့ ဆင်ခြင်တုံတရား ကင်းမဲ့တာ ဖြစ်ပါလိမ့်မယ်" ဟု သူက‌ပြောကြားခဲ့သည်။

တရုတ်တွင် တံတားအသစ်တစ်စင်းသည် လများမကြာမီ ပြိုကျ

တရုတ်နိုင်ငံ အနောက်တောင်ပိုင်း စီချွမ်ပြည်နယ်တွင် မကြာသေးမီက ဖွင့်လှစ်ထားသည့် တံတားအသစ်၏ အစိတ်အပိုင်း တခုပြိုကျခဲ့ရာ တိဗက်နှင့် နိုင်ငံ၏ ဗဟိုချက်မဖြစ်သော နိုင်ငံတော် အဝေးပြေးလမ်းမကြီးတစ်လျှောက် နိုဝင်ဘာလ ၁၁ ရက်နေ့က ပြိုကျခဲ့ကြောင်း ဒေသဆိုင်ရာအာဏာပိုင်များက ပြောကြားခဲ့သော်လည်း အ‌ေ-သအပျေ-ာက် သတင်းများ မရရှိခဲ့ကြောင်းသိရသည်။
အနီးနားရှိ တောင်စောင်းများနှင့် လမ်းများပေါ်တွင် အက်ကွဲကြောင်းများ ပေါ်ထွက်ကာ တောင်တန်း၏ မြေပြင်အနေအထားတွင် ရွေ့ပြောင်းမှုများကို မြင်တွေ့ရပြီးနောက် ၇၅၈ မီတာရှည်သော ဟွန်ချီ တံတားကို နိုဝင်ဘာလ ၁၀ ရက်နေ့ မွန်းလွဲပိုင်းတွင် ယာဉ်သွားလာမှုအားလုံးကို ပိ-တ်ပစ်ခဲ့ကြောင်း မာကန်မြို့ရှိ ရဲတပ်ဖွဲ့က ပြောကြားခဲ့သည်။
နိုဝင်ဘာလ ၁၁ ရက်နေ့ မွန်းလွဲပိုင်းက တောင်စောင်းတွင် အခြေအနေများ ပိုမိုဆိုးရွားလာကာ မြေပြိုသဖြင့် ချဉ်းကပ်တံတား ပြိုကျခဲ့ကြောင်း ၎င်းက ဆက်လက်ပြောကြားခဲ့သည်။
အဆိုပါတံတားသည် စီချွမ်လမ်းနှင့် တံတားအုပ်စုမှ ကန်ထရို-က်တာက ယခုနှစ်အစောပိုင်းတွင်မှ တည်ဆောက်မှု ပြီးစီးခဲ့ကြောင်း သိရသည်။

ပထမနှစ် နေ့သင်တန်းဝင်ခွင့်ရစာရင်းများ ထုတ်ပြန်မည်

ပထမနှစ် နေ့သင်တန်းဝင်ခွင့်ရစာရင်းများကို နိုဝင်ဘာ ၁၃ ရက်တွင် ထုတ်ပြန်ပေးမည်ဖြစ်ကြောင်း
ပညာရေးဝန်ကြီးဌာန၊ အဆင့်မြင့်ပညာဦးစီးဌာနမှ သိရသည်။
၂၀၂၅ ခုနှစ် တက္ကသိုလ်ဝင်စာမေးပွဲ အောင်မြင်သူများအတွက် ၂၀၂၅-၂၀၂၆ ပညာသင်နှစ်၊ ပထမနှစ် နေ့သင်တန်း ဝင်ခွင့်ရသူများစာရင်းကို သက်ဆိုင်ရာတက္ကသိုလ်နှင့် ဒီဂရီကောလိပ်အသီးသီးတွင် ကြေညာထားမည်ဖြစ်သည်။
ထို့ပြင် ပညာရေးဝန်ကြီးဌာန website နှင့် အဆင့်မြင့်ပညာဦးစီးဌာန website တို့တွင်လည်း ကြေညာထားမည်ဖြစ်ကြောင်း သိရသည်။
၂၀၂၅ ခုနှစ် တက္ကသိုလ်ဝင်စာမေးပွဲကို ဝင်ရောက်ဖြေဆိုသူ စုစုပေါင်း (၂၀၇,၈၉၈) ဦး ရှိခဲ့ပြီး အောင်မြင်သူ (၉၉,၉၂၄) ဦးရှိခဲ့ကာ အောင်ချက် ၄၈ ဒသမ ဝ၆ ရာခိုင်နှုန်းရှိခဲ့ခြင်းဖြစ်ကြောင်း သိရသည်။

နေပြည်တော်ရှိ ငလျင်ဒ-ဏ်သင့်ဝန်ထမ်းအိမ်ရာအသစ် (၂၃၀) လုံးအား ပြန်လည်တည်ဆောက်မည်

မန္တလေးငလျင်ကြီးလှုပ်ခတ်မှုကြောင့် နေပြည်တော်ရှိပျ-က်စီးသွားသော ဝန်ထမ်းအိမ်ရာများအတွက် ဇမ္ဗူသီရိမြို့နယ်ရှိ သုခသိဒ္ဓိရပ်ကွက် အကွက်အမှတ် (၃) ၊ (၈-ခ) ၊ (၄) တို့တွင် ဝန်ထမ်းအိမ်ရာအသစ် (၂၃၀) လုံးအားပြန်လည်တည်ဆောက်သွားမည်ဖြစ်ကြောင်း သိရသည်။
ထိုသို့ တည်ဆောက်နိုင်ရေးအတွက် ညှိနှိုင်းအစည်းအဝေးကို နိုဝင်ဘာ ၁၁ ရက်နံနက်ပိုင်းကကျင်းပရာ နေပြည်တော် ဒု-မြို့​တော်ဝန်ဦး​မောင်​မောင်တက်ရောက်၍ အ​ဆောက်အဦးများအားလုံးကို တစ်ပြိုင်တည်းစတင်ဆောင်ရွက်ရမည်ဖြစ်ပြီး ဝန်ထမ်းအိမ်ရာများအမြန်ဆုံးဆောက်လုပ်ပြီးမှသာ ဝန်ထမ်းများအဆင်ပြေချောမွေ့စွာ ပြန်လည်နေထိုင်နိုင်ရေးအတွက် နေရာချထားပေးနိုင်မည်ဟု ပြောကြားခဲ့ကြောင်း သိရသည်။
ထို့ပြင် ယခုအဆောက်အဦးများသည် ငလျင်ဒ-ဏ်ပြန်လည်ထူထောင်ရေးအတွက် တည်ဆောက်နေခြင်းဖြစ်၍ MNBC Code 2025 ပါ စံနှုန်းများနှင့်အညီ အရည်အသွေးပြည့်မီသော စံနမူနာပြအဆောက်အဦးများဖြစ်စေရန် ဆောက်လုပ်ရေးအသင်းနှင့် ကုမ္ပဏီများကဝိုင်းဝန်းပူးပေါင်းဆောင်ရွက်ကြရန်လည်း တိုက်တွန်းပြောကြားခဲ့ကြောင်း သိရသည်။

ယနေ့နံနက်ပိုင်းက သာစည်မြို့ကိုဗဟိုပြု၍ အင်အားအနည်းငယ်ရှိ ငလျင်လှုပ်ခတ်

မန္တလေးတိုင်း၊ သာစည်မြို့ကိုဗဟိုပြု၍ ယနေ့ နိုဝင်ဘာ ၁၂ ရက်နံနက်ပိုင်းက အင်အားအနည်းငယ်ရှိ ငလျင်တစ်ခုလှုပ်ခတ်ခဲ့ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနထံမှထံမှ သိရသည်။
သာစည်မြို့၏ တောင်ဘက် (၆) မိုင်ခန့်အကွာ အနက် (၁၀) ကီလိုမီတာကိုဗဟိုပြု၍ အင်အားရစ်(ခ်)တာစကေး (၃ ဒသမ ၀) အဆင့် အင်အားအနည်းငယ်ရှိသော ငလျင်တစ်ခုသည် နံနက် ၇ နာရီ ၄၈ မိနစ် ၁၂ စက္ကန့်ကလှုပ်ခတ်ခဲ့ကြောင်း သိရသည်။
အဆိုပါ ငလျင်လှုပ်ခတ်မှုသည် အင်အားအလွန်ပြင်းထန်သော မန္တလေးငလျင်ကြီးလှုပ်ခတ်ပြီးချိန်၌ (၂၄၂) ကြိမ်မြောက်အဖြစ်လှုပ်ခတ်ခဲ့ခြင်းဖြစ်ကြောင်း သိရသည်။

နိုင်ငံခြားရေး ပြည်ထောင်စုဝန်ကြီးက အိန္ဒိယသံအမတ်ကြီးကို လက်ခံတွေ့ဆုံ
နယ်နိမိတ်ဆိုင်ရာကိစ္စနှင့် ကုန်သွယ်မှုတိုးမြှင့်ရေးကိစ္စများဆွေးနွေး

နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဦးသန်းဆွေသည် မြန်မာနိုင်ငံဆိုင်ရာ အိန္ဒိယသံအမတ်ကြီး H.E. Mr. Abhay Thakur ကို နိုဝင်ဘာ ၁၁ ရက်က ရန်ကုန်မြို့၌ လက်ခံတွေ့ဆုံခဲ့ကြောင်း သိရသည်။
တွေဆုံစဉ် နှစ်နိုင်ငံပူးပေါင်းဆောင်ရွက်မှုမြှင့်တင်ရေး၊ အထူးသဖြင့် နယ်နိမိတ်ဆိုင်ရာကိစ္စရပ်များနှင့် ကုန်သွယ်မှုတိုးမြှင့်ရေးဆိုင်ရာကိစ္စရပ်များကို ဆွေးနွေးခဲ့ကြောင်း သိရသည်။
ထို့ပြင် အိန္ဒိယမှ မြန်မာနိုင်ငံသို့ ငလျင်ဘေးအလွန် ကူညီပေးရေးဆိုင်ရာ ကိစ္စရပ်များကိုလည်း ဆွေးနွေးခဲ့ကြောင်း သိရသည်။
တွေ့ဆုံမှု၌ နိုင်ငံခြားရေးဝန်ကြီးဌာနမှ တာဝန်ရှိသူများနှင့် အိန္ဒိယသံရုံးမှ ကိုယ်စားလှယ်များလည်း တက်ရောက်ခဲ့ကြောင်း သိရသည်။

ဘရာဇီးလ်နိုင်ငံ၏ (၂၀၃)နှစ်မြောက် လွတ်လပ်ရေးနေ့အထိမ်းအမှတ်ဧည့်ခံပွဲကို မြန်မာနိုင်ငံတော်သီချင်းနှင့် ဘရာဇီးလ်နိုင်ငံတော်သီချင်းတို့ဖြင့်ဖွင့်လှစ်

ဘရာဇီးလ်နိုင်ငံ၏ (၂၀၃)ကြိမ်မြောက် လွတ်လပ်ရေးနေ့အထိမ်းအမှတ်ဧည့်ခံပွဲကို နိုဝင်ဘာ ၁၁ ရက်ညပိုင်းက ရန်ကုန်မြို့ရှိ မြန်မာနိုင်ငံဆိုင်ရာ ဘရာဇီးလ်နိုင်ငံ သံ အမတ်ကြီးနေအိမ်၌ကျင်းပခဲ့ကြောင်း သိရသည်။
နိုင်ငံခြားရေးဝန်ကြီးဌာန ပြည်ထောင်စုဝန်ကြီးဦးသန်းဆွေ၊ ရန်ကုန်တိုင်းဝန်ကြီးချုပ်ဦးစိုးသိန်းတို့တက်ရောက်ခဲ့ပြီး အခမ်းအနားကို မြန်မာနိုင်ငံတော်သီချင်းနှင့် ဘရာဇီးလ်နိုင်ငံတော်သီချင်းတို့ဖြင့်ဖွင့်လှစ်ခဲ့ပြီးနောက် ဘရာဇီးလ်နိုင်ငံသံအမတ်ကြီး H.E. Mr. Gustavo Rocha de Menezes မှနှုတ်ခွန်းဆက်စကားနှင့် ဆုတောင်းစကားပြောကြားခဲ့သည်။
ထို့နောက် ပြည်ထောင်စုဝန်ကြီးနှင့် တက်ရောက်လာကြသူများအား ဘရာဇီးလ်နိုင်ငံ၏ (၂၀၃)ကြိမ်မြောက် လွတ်လပ်ရေးနေ့အထိမ်းအမှတ်အဖြစ် ဘရာဇီးလ်နိုင်ငံသံရုံးမှ ညစာဖြင့်တည်ခင်းဧည့်ခံခဲ့သည်။

အွန်လိုင်းငွေလိမ်ဂိုဏ်းများတို-က်ဖျ-က်ရန် ကမ္ဘောဒီးယားနှင့် တောင်ကိုရီးယားတို့ သဘောတူ

ကမ္ဘောဒီးယားနှင့် တောင်ကိုရီးယားတို့သည် အွန်လိုင်းလိမ်လည်မှုများကို တို-က်ဖျ-က်ရန်နှင့် ပူးပေါင်းဆောင်ရွက်မှုကို မြှင့်တင်သွားရန် တနင်္လာနေ့တွင် ကတိပြုခဲ့ကြကြောင်း ကမ္ဘောဒီးယားဘက်မှ သတင်းထုတ်ပြန်ချက်တွင် ဖော်ပြခဲ့သည်။
နိုင်ငံသို့ အလည်အပတ်ရောက်ရှိနေသော တောင်ကိုရီးယားနိုင်ငံခြားရေးဝန်ကြီး ချိုဟွန်းနှင့် ကမ္ဘောဒီးယားဝန်ကြီးချုပ် ဟွန်မာနက်တို့ ဖနောင်ပင်တွင် တွေ့ဆုံဆွေးနွေးခဲ့စဉ် ယင်းသို့ ကတိပြုခဲ့ကြခြင်း ဖြစ်သည်ဟု ကမ္ဘောဒီးယားဝန်ကြီးချုပ်၏ ပြောရေးဆိုခွင့်ရှိသူများအဖွဲ့က သတင်းထုတ်ပြန်ချက်တွင် ပြောဆိုထားသည်။
ကမ္ဘောဒီးယားနိုင်ငံတွင် နေထိုင်လုပ်ကိုင်နေကြသော တောင်ကိုရီးယားနိုင်ငံသားများ၏ ဘေးကင်းလုံခြုံရေးနှင့် ကောင်းကျိုးချမ်းသာသည် ကမ္ဘောဒီးယားအစိုးရ၏ အဓိကဦးစားပေးဖြစ်ကြောင်းလည်း သတင်းထုတ်ပြန်ချက်တွင် ဆိုခဲ့သည်။
နှစ်ဖက်စလုံးသည် စီးပွားရေး၊ ရင်းနှီးမြှုပ်နှံမှု၊ ကုန်သွယ်ရေး၊ နိုင်ငံတော်ကာကွယ်ရေးနှင့် လုံခြုံရေး၊ စက်မှုလုပ်ငန်းနှင့် တောင်ကိုရီးယားလုပ်ငန်းများအတွက် အထူးစီးပွားရေးဇုန်များဖော်ဆောင်ရေး၊ ပြည်သူအချင်းချင်း အပြန်အလှန်ဖလှယ်ရေးနှင့် ခရီးသွားလုပ်ငန်းစသည့် အဓိကကျသော နယ်ပယ်များတွင် ပူးပေါင်းဆောင်ရွက်မှုကို ထပ်မံတိုးချဲ့သွားရန် နည်းလမ်းမျာနှင့် ပတ်သက်၍ ဆွေးနွေးခဲ့ကြသည်ဟု ဆိုသည်။
တစ်ချိန်တည်းမှာပင် အွန်လိုင်းလိမ်လည်လုပ်ငန်းများတို-က်ဖျ-က်ရေးကော်မရှင် အတွင်းရေးမှူးချုပ်ရုံးအကြီးအကဲ ကမ္ဘောဒီးယား ဝါရင့်ဝန်ကြီး ချေးဆီနာရစ်သည် တောင်ကိုရီးယားနိုင်ငံတော်ရဲဌာန၏ ခေတ္တရဲမင်းကြီး ရဲဗိုလ်ချုပ်ကြီး ယိုးဂျေးဆွန်းနှင့် တွေ့ဆုံကာ အွန်လိုင်းလိမ်လည်လုပ်ငန်းတိုက်ဖျက်ရေးနှင့် ပတ်သက်၍ ဆွေးနွေးခဲ့ကြောင်း သိရသည်။
ကမ္ဘောဒီးယားသည် ပြီးခဲ့သည့်လတွင် အမျိုးသမီးငါးဦး အပါအဝင် အွန်လိုင်းလိမ်လည်မှု သံသယရှိ တောင်ကိုရီးယားနိုင်ငံသား ၆၄ ဦးကို မူရင်းနိုင်ငံသို့ ပြည်နှင်ဒ-ဏ်ပေးခဲ့သည်။