Ryan Gosling ရဲ့ Star Wars ရုပ်ရှင်မှာ Mia Goth လည်း ပါဝင်သွားမယ်
ဇွန် ၈၊ ၂၀၂၅။
Deadpool & Wolverine နဲ့ Free Guy ဒါရိုက်တာ Shawn Levy ဟာ Disney နဲ့ Lucasfilm တို့က ဖြန့်ချိထုတ်လုပ်ပြသမယ့် Star Wars ရုပ်ရှင်သစ်တစ်ကားဖြစ်တဲ့ Star Wars: Starfighter ကို ဒါရိုက်တာနဲ့ ဇာတ်လမ်းဇာတ်ညွှန်းနေရာကနေ ပူးတွဲတာဝန်ယူဖန်တီးရိုက်ကူးတော့မှာဖြစ်ပါတယ်။
Star Wars: Starfighter ဟာ နောက်ဆုံးထွက် Star Wars ရုပ်ရှင်ဖြစ်တဲ့ Star Wars: The Rise of Skywalker မတိုင်ခင်ကာလကို ဇာတ်အိမ်ယူပြသမှာဖြစ်ပြီး The Notebook, Blade Runner 2049 နဲ့ La La Land သရုပ်ဆောင် Ryan Gosline က အဓိကဇာတ်ကောင်နေရာကနေပါဝင်သွားမှာဖြစ်ပါတယ်။ သို့ပေမယ့် Star Wars: Starfighter ဟာ သီးခြား standalone ရုပ်ရှင်ဖြစ်ပြီး ဘယ် Star Wars ရုပ်ရှင်နဲ့မှ ချိတ်ဆက်မှုမရှိဘူးလို့ သိရပါသေးတယ်။
Star Wars: Starfighter မှာ Ryan Gosling နဲ့ အတူ X, Pearl သရုပ်ဆောင် Mia Goth လည်း ပါဝင်သရုပ်ဆောင်သွားမှာဖြစ်ပြီး Mia Goth ကိုတော့ Star Wars: Starfighter ရဲ့ ဗီလိန်ဇာတ်ကောင်နေရာကနေ မြင်တွေ့ရဖွယ်ရှိနေပါတယ်။ မူလက အဆိုပါရုပ်ရှင်မှာ Anora သရုပ်ဆောင် Mikey Madison က ပါဝင်သွားဖို့ရှိပေမယ့်လည်း ယခုအခါမှာ Mia Goth နဲ့ အစားထိုးလိုက်ပြီလို့သိရပါတယ်။
Mia Goth ဟာ Netflix ရဲ့ Frankenstein နဲ့ Disney ရဲ့ Blade တို့မှာလည်း ပါဝင်ထားပါသေးတယ်။
Lucasfilm နဲ့ Disney ဟာ Star Wars: Starfighter ကို မေ ၂၈၊ ၂၀၂၇ မှာ ရုံတင်ပြသမှာဖြစ်ပြီး ဒါဟာ Disney ရဲ့ အသစ်ရုံတင်မယ့် Marvel ရုပ်ရှင်ကားကြီးတစ်ကားဖြစ်တဲ့ Avengers: Doomsday အပြီး နှစ်ပတ်အကြာကာလလဲဖြစ်ပါသေးတယ်။
Ref: THR

ဟောလိဝုဒ်ဘက်ကို ခြေဆန့်လာပြီဖြစ်တဲ့ Bollywood မင်းသား Salman Khan
ဇွန် ၈၊ ၂၀၂၅။
Bad Boys ဒါရိုက်တာတွေရဲ့ အာရဗီစကားပြော Action Thriller ရုပ်ရှင် '7 Dogs' ရဲ့ Teaser ထွက်ရှိလာပြီး နာမည်ကြီးသရုပ်ဆောင်တွေဖြစ်တဲ့ Monica Bellucci, Sanjay Dutt နဲ့ Salman Khan တို့ ပါဝင်လာကြောင်း အတည်ပြုလိုက်ပြီ ဖြစ်ပါတယ်
Bad Boys ရုပ်ရှင်တွေနဲ့ နာမည်ကြီးတဲ့ ဒါရိုက်တာအတွဲ Adil El Arbi နဲ့ Bilall Fallah တို့ရဲ့ Saudi Arabia မှာ ရိုက်ကူးထားတဲ့ action thriller အသစ် 7 Dogs အတွက် ပထမဆုံး teaser ကို ထုတ်ဖော်ပြသလိုက်ပါ​ပြီ။ ဒီရုပ်ရှင်မှာ နာမည်ကျော် မင်းသမီး Monica Bellucci၊ Bollywood စတား Salman Khan နဲ့ ကိုယ်ခံပညာရှင် Max Huang တို့လည်း ပါဝင်လာမယ်လို့ အတည်ပြုလိုက်တာ ဖြစ်ပါတယ်။
ဒေါ်လာ သန်း ၄၀ အကုန်အကျခံ ရိုက်ကူးထားတဲ့ ဒီရုပ်ရှင်ဟာ ၂၀၁၇ ခုနှစ်မှာ ဆော်ဒီအာရေဗျနိုင်ငံရဲ့ ရုပ်ရှင်ရုံပိတ်ပင်မှုကို ရုပ်သိမ်းပြီးနောက်ပိုင်း အကြီးမားဆုံး ပြည်တွင်းထုတ်လုပ်ရေး ရုပ်ရှင်တစ်ကား ဖြစ်လာမယ်လို့ ဆိုကြပါတယ်။ အီဂျစ်မင်းသားတွေဖြစ်တဲ့ Karim Abdel Aziz နဲ့ Ahmed Ezz တို့က အဓိကပါဝင်သရုပ်ဆောင်ထားတာဖြစ်ပြီး၊ Ahmed Ezz က Interpol အရာရှိအဖြစ်၊ Karim Abdel Aziz ကတော့ 7 Dogs လို့ခေါ်တဲ့ ကမ္ဘာလုံးဆိုင်ရာ ရာဇဝတ်အဖွဲ့အစည်းရဲ့ အဆင့်မြင့်အဖွဲ့ဝင်တစ်ဦးအဖြစ် ပါဝင်ထားတာ တွေ့ရပါတယ်။ သူတို့နှစ်ဦးဟာ အရှေ့အလယ်ပိုင်းဒေသမှာ အန္တရာယ်ရှိတဲ့ မူးယစ်ဆေးဝါးအသစ် ပျံ့နှံ့မှုကို တားဆီးဖို့ မလိုလားပဲ မဟာမိတ်ဖွဲ့ရတဲ့ အခြေအနေကို ရောက်ရှိသွားမှာ ဖြစ်တယ်လို့ သိရပါတယ်။
ဒီဇာတ်လမ်းကိုတော့ ဆော်ဒီအာရေဗျနိုင်ငံရဲ့ အထွေထွေဖျော်ဖြေရေးအာဏာပိုင်အဖွဲ့ ဥက္ကဋ္ဌဖြစ်သူ Turki Alalshikh (Turki Al-Sheikh လို့လည်း လူသိများသူ) က ဖန်တီးထားတာဖြစ်ပြီး၊ ဇာတ်ညွှန်းကိုတော့ Mohamed El-Dabah က ရေးသားထားတာ ဖြစ်ပါတယ်။ Riyadh မြို့နဲ့ အနီးတဝိုက်မှာ ဒီနှစ်နွေဦးရာသီက ရိုက်ကူးခဲ့ပြီး၊ လက်ရှိမှာတော့ post-production အဆင့်ကို ရောက်ရှိနေကာ ဒီနှစ်ကုန်ပိုင်းမှာ ဖြန့်ချိဖို့ စီစဉ်ထားတယ်လို့ ဆိုပါတယ်။
Alalshikh က ဒီ teaser ကို လူမှုကွန်ရက်တွေမှာ ဒီနေ့ပဲ တင်ခဲ့တာဖြစ်ပြီး၊ အီတလီမင်းသမီးကြီး Monica Bellucci (The Matrix Reloaded)၊ Bollywood စတားတွေဖြစ်တဲ့ Salman Khan (Tiger franchise) နဲ့ Sanjay Dutt (Vaastav: The Reality)၊ ဂျာမန်-တရုတ် ကိုယ်ခံပညာရှင် Max Huang (Mortal Kombat) တို့အပြင် အီဂျစ်မင်းသမီး Tara Emad (The Blue Elephant 2)၊ လက်ဘနွန်မင်းသမီး Sandy Bella (Franklin)၊ ဆော်ဒီရုပ်သံမင်းသား Nasser Algassabi နဲ့ အီဂျစ်ဝါရင့်မင်းသား Sayed Ragab တို့လည်း ပါဝင်ကြောင်း ထပ်မံအတည်ပြုခဲ့ပါတယ်။
ရုပ်ရှင်ရဲ့ ရိုက်ကူးရေးပိုင်းကိုတော့ Robrecht Heyvaert (Bad Boys: Ride or Die, Ms. Marvel) က တာဝန်ယူထားပြီး၊ ထုတ်လုပ်ရေးဒီဇိုင်းကို Paul Kirby (Kingsman: The Secret Service, Captain Phillips) က ဖန်တီးကာ၊ အက်ရှင်စတန့်တွေကိုတော့ 87Eleven အဖွဲ့က Stephen Dunlevy (Mad Max: Fury Road, John Wick) ဦးဆောင်ပြီး ပြုလုပ်ထားတာ ဖြစ်ပါတယ်။ Ivan Atkinson (The Covenant, The Gentlemen) ကလည်း ထုတ်လုပ်သူအဖြစ် ပါဝင်ထားတာ တွေ့ရပါတယ်။
ဘယ်လ်ဂျီယံ ဒါရိုက်တာအတွဲ Adil & Bilall တို့ဟာ Bad Boys franchise ရဲ့ တတိယနဲ့ စတုတ္ထမြောက်ရုပ်ရှင်တွေနဲ့ ကမ္ဘာကျော်ခဲ့သူတွေဖြစ်ပြီး၊ သူတို့ရဲ့ အခြားလက်ရာတွေထဲမှာ Gangsta နဲ့ Rebel တို့လို ရုပ်ရှင်တွေလည်း ပါဝင်တာ တွေ့ရပါတယ်။
Ref: Deadline

အောက်တိုဘာလမှာ စတင်ရိုက်ကူးမယ့် Alien: Romulus ရဲ့ နောက်ဆက်တွဲရုပ်ရှင်
ဇွန် ၈၊ ၂၀၂၅။
Evil Dead remake ဒါရိုက်တာ Fede Álvarez ရိုက်ကူးပြီး Priscilia သရုပ်ဆောင် Cailee Spaeny အဓိကပါဝင်သရုပ်ဆောင်ခဲ့တဲ့ Disney လက်အောက်ခံ 20th Century ရဲ့ sci-fi horror ရုပ်ရှင် Alien: Romulus ဟာ ဝင်ငွေအရသာမက အနုပညာအရမှာပါ အောင်မြင်မှုရရှိခဲ့တာကြောင့် 20th Century ဘက်က Alien: Romulus ရဲ့ နောက်ဆက်တွဲရုပ်ရှင်တစ်ကားကို ဆက်လက်ထုတ်လုပ်တော့မှာဖြစ်ပါတယ်။
အဆိုပါ Alien: Romulus ရဲ့ နောက်ဆက်တွဲရုပ်ရှင်ကိုလည်း ဒါရိုက်တာ Fede Álvarez ကပဲ ဆက်လက်တာဝန်ယူကာရေးသားရိုက်ကူးသွားမှာဖြစ်ပြီး ရိုက်ကူးရေးကို ယခုနှစ်ထဲမှာ စတင်ပြုလုပ်သွားမှာဖြစ်ကြောင်းသိရပါတယ်။ Marea Nocturna ဆိုတဲ့ podcast အစီအစဥ်မှာ ဒါရိုက်တာ Fede Álvarez က Alien: Romulus ရဲ့ နောက်ဆက်တွဲရုပ်ရှင်ဟာ ကြိုတင်ပြင်ဆင်မှုအဆင့်မှာမဟုတ်တော့ပဲ ရိုက်ကူးရေးအဆင့်စတင်တော့မှာဖြစ်ပြီး ယခုလာမယ့် ၂၀၂၅ အောက်တိုဘာလမှာ စတင်ရိုက်ကူးမှာဖြစ်ကြောင်း မှတ်ချက်ပြုလာခဲ့တာပါ။
Alien: Romulus ရဲ့ နောက်ဆက်တွဲရုပ်ရှင်မှာ ယခင် Alien: Romulus က သရုပ်ဆောင်တွေဖြစ်တဲ့ Cailee Spaeny နဲ့ David Jonsson တို့ ပြန်လည်ပါဝင်လာမှာဖြစ်ပေမယ့်လည်း ဇာတ်လမ်းအကြောင်းအရာကိုတော့ မသိရသေးပါဘူး။ သို့ပေမယ့် ကောလာဟလတွေအရ Alien: Romulus မှာ 20th Century ပိုင် ဇာတ်ကောင်တွေဖြစ်တဲ့ Predator (Yautja) ဇာတ်ကောင်တချို့ကိုလည်း ပြသမှာဖြစ်ပြီး Alien vs Predator crossover ရုပ်ရှင်ဖြစ်လာနိုင်တယ်လို့လည်း သိရပါသေးတယ်။
ဒါရိုက်တာ Fede Àlvarez ရဲ့ Alien: Romulus ဟာ Alien ရုပ်ရှင် franchise ရဲ့ သတ္တမ​မြောက်ရုပ်ရှင်ဖြစ်ပြီး Priscilia နဲ့ Civil War သရုပ်ဆောင် Cailee Spaney က အဓိကပါဝင်သရုပ်ဆောင်ထားကာ ၎င်းနဲ့အတူ David Jonsson, Archie Renaux, Isabela Merced, Spike Fearn နဲ့ Aileen Wu တို့လည်း ပါဝင်ထားပါတယ်။
Ref: Internet

မင်း ကြိုးချည်ထားလို့ပေါ့ကွာ...

ရာမမင်းသားဇာတ်ကောင်က Ranbir Kapoor နဲ့ လိုက်ဖက်မှုရှိရဲ့လား
ဇွန် ၈၊ ၂၀၂၅။
ဘယ်မင်းသားမှ သီရိရာမ မင်းသားနေရာအတွက် မသင့်တော်ဘူးလို့ တစ်ချိန်က ရာမာယဏမင်းသားဇာတ်ကောင်နေရာကနေ ပါဝင်ခဲ့ဖူးတဲ့ ဝါရင့်မင်းသား ကြီး Arun Govil က ဆိုပါတယ်။
တစ်ချိန်က Ramanand Sagar ရဲ့ နာမည်ကျော် Ramayan ဇာတ်လမ်းတွဲမှာ ရာမမင်းသားအဖြစ် သရုပ်ဆောင်ခဲ့တဲ့ ဝါရင့်မင်းသားကြီး Arun Govil က Nitesh Tiwari ရိုက်ကူးမယ့် Ramayana ရုပ်ရှင်သစ်မှာ Ranbir Kapoor က ရာမအဖြစ် သရုပ်ဆောင်နေချိန်မှာပဲ၊ လက်ရှိ ဘယ်နာမည်ကြီးမင်းသားမှ သီရိရာမ မင်းသားနေရာအတွက် မသင့်တော်ဘူးလို့ ပြောကြားလိုက်တာ တွေ့ရပါတယ်။
NDTV နဲ့ ပြုလုပ်ခဲ့တဲ့ အင်တာဗျူးတစ်ခုမှာ Arun Govil က "အရင်က သုံးလေးယောက်လောက် ပြန်လည်ပုံဖော်ဖို့ ကြိုးစားခဲ့ဖူးပေမယ့် မအောင်မြင်ခဲ့ကြပါဘူး။ ကျနော်တို့သက်တမ်းမှာ ရာမာယဏကို ဘယ်သူမှ ပြန်လည်ပုံဖော်ဖို့ မကြိုးစားသင့်ဘူးလို့ ထင်ပါတယ်။ သီရိရာမ မင်းသားနေရာမှာ သရုပ်ဆောင်မယ့် မင်းသားနဲ့ ပတ်သက်လို့ ပြောရရင်၊ လက်ရှိ နာမည်ကြီး မင်းသားအားလုံးထဲမှာ ဘယ်သူမှ မသင့်တော်ဘူးလို့ ကျနော်ထင်ပါတယ်။ အနုပညာလောကပြင်ပက တစ်ယောက်ယောက်ကိုတော့ ရှာတွေ့နိုင်ကောင်း တွေ့နိုင်ပါလိမ့်မယ်" လို့ ပြောကြားခဲ့တာကို တွေ့ရပါတယ်။
သူ့ရဲ့ ဒီပြောစကားတွေဟာ အွန်လိုင်းပေါ်မှာ အငြင်းပွားမှုတွေ ဖြစ်ပေါ်စေခဲ့ပြီး၊ အထူးသဖြင့် သူကိုယ်တိုင်က Nitesh Tiwari ရဲ့ Ramayana ရုပ်ရှင်သစ်မှာ ဒဿရထ (Dashrath) ဘုရင်ကြီးအဖြစ် ပါဝင်သရုပ်ဆောင်ထားပြီး၊ ဒီဇာတ်ကားမှာ Ranbir Kapoor က သီရိရာမ မင်းသားအဖြစ် သရုပ်ဆောင်မှာဖြစ်လို့ ပရိသတ်တွေကြားမှာ စိုးရိမ်မှုတွေနဲ့အတူ ပြောစရာတစ်ခု ဖြစ်လာခဲ့တယ်လို့ ဆိုပါတယ်။
အရင်က Om Raut ရိုက်ကူးခဲ့ပြီး Prabhas က သီရိရာမအဖြစ် သရုပ်ဆောင်ခဲ့တဲ့ Adipurush ရုပ်ရှင်ဟာ VFX အရည်အသွေးညံ့ဖျင်းမှုနဲ့ သာမန်စကားပြောပုံစံတွေ အသုံးပြုမှုကြောင့် ဝေဖန်မှုတွေနဲ့ ရင်ဆိုင်ခဲ့ရဖူးတာလည်း ရှိပါတယ်။ Nitesh Tiwari ရဲ့ ရုပ်ရှင်သစ်မှာတော့ Ranbir Kapoor နဲ့ Arun Govil တို့အပြင် Sai Pallavi က သီတာဒေဝီအဖြစ်၊ Sunny Deol က ဟာနုမာန်အဖြစ်၊ Lara Dutta က ကေကေအဖြစ်၊ KGF မင်းသား Yash က ဒဿဂီရိအဖြစ် ပါဝင်သရုပ်ဆောင်မှာဖြစ်ပြီး Yash က Namit Malhotra နဲ့အတူ ပူးတွဲထုတ်လုပ်သူအဖြစ်လည်း တာဝန်ယူထားတယ်လို့ သိရပါတယ်။ ဒါ့အပြင် Rakul Preet Singh, Anil Kapoor, Kunal Kapoor နဲ့ Amitabh Bachchan တို့လို မင်းသားမင်းသမီးတွေလည်း ပါဝင်လာနိုင်ခြေရှိတယ်လို့ သတင်းတွေ ထွက်ပေါ်နေပါတယ်။
Nitesh Tiwari ရဲ့ Ramayana ဇာတ်ကားကိုတော့ နှစ်ပိုင်းခွဲပြီး ပထမပိုင်းကို ၂၀၂၆ ခုနှစ် Diwali အခါသမယမှာ ရုံတင်ပြသသွားမှာဖြစ်ပြီး ဒုတိယပိုင်းကိုတော့ ၂၀၂၇ ခုနှစ် Diwali မှာ ထပ်မံပြသသွားမှာ ဖြစ်တယ်လို့ ဆိုပါတယ်။

Christopher Nolan ရဲ့ "The Odyssey" ရုပ်ရှင် ရိုက်ကူးရေးမပြီးသေးပါ
ဇွန်လ ၆ ရက်၊ ၂၀၂၅။
နာမည်ကျော် ဗြိတိန်-အမေရိကန် ဒါရိုက်တာကြီး Christopher Nolan ရဲ့ နောက်ဆုံးထွက်ရှိလာမယ့် ရုပ်ရှင်စီမံကိန်းကြီးဖြစ်တဲ့ "The Odyssey" ဟာ လက်ရှိအချိန်ထိ ရိုက်ကူးရေးတွေ ဆက်လက်လုပ်ဆောင်နေဆဲဖြစ်ကြောင်း သိရှိရပါတယ်။ ဒီရုပ်ရှင်ဟာ ပရိသတ်တွေ အထူးစိတ်ဝင်စားနေကြတဲ့ စီမံကိန်းကြီးတစ်ခုလည်း ဖြစ်ပါတယ်။
ရိုက်ကူးရေးအဖွဲ့ဟာ အီတလီ၊ မော်လ်တာ၊ ပြင်သစ်နိုင်ငံတွေအပြင် ယူကေနိုင်ငံ လန်ဒန်မြို့တို့မှာ ရိုက်ကူးမှုတွေ ပြုလုပ်ခဲ့ပြီးဖြစ်တယ်လို့ ဆိုပါတယ်။ အခုအခါမှာတော့ ရုပ်ရှင်အဖွဲ့သားတွေဟာ နောက်ထပ်ရိုက်ကူးရေးနေရာအဖြစ် စကော့တလန်နိုင်ငံကို ဦးတည်နေပြီလို့ သိရပါတယ်။ ဒီရုပ်ရှင်ရဲ့ ရိုက်ကူးရေးဟာ ပြီးခဲ့တဲ့ ဇန်နဝါရီလကတည်းက စတင်ခဲ့တာဖြစ်ပြီး လာမယ့် စက်တင်ဘာလအထိ ကြာမြင့်နိုင်တယ်လို့ ခန့်မှန်းထားကြပါတယ်။
"The Odyssey" ရုပ်ရှင်ဟာ Homer ရဲ့ နာမည်ကျော်မော်ကွန်းကဗျာကို ခေတ်သစ်အမြင်နဲ့ ပြန်လည်ပုံဖော်မှာဖြစ်ပြီး၊ Warner Bros. ကနေ ထုတ်လုပ်ဖြန့်ချိသွားမှာ ဖြစ်တယ်လို့ သိရပါတယ်။ ဒီရုပ်ရှင်မှာ Matt Damon, Tom Holland, Anne Hathaway, Zendaya, Robert Pattinson နဲ့ Mark Rylance တို့လို နာမည်ကြီးသရုပ်ဆောင်တွေ အများအပြား ပါဝင်သရုပ်ဆောင်ထားကြတာ တွေ့ရမှာပါ။ ရုပ်ရှင်ရဲ့ ထုတ်လုပ်ရေးကုန်ကျစရိတ်ကလည်း အမေရိကန်ဒေါ်လာ သန်း ၂၀၀ ဝန်းကျင်အထိ ရှိနိုင်တယ်လို့ ခန့်မှန်းထားကြပါတယ်။
Christopher Nolan ရဲ့ လက်ရာဖြစ်တာကြောင့် ပရိသတ်တွေရဲ့ မျှော်လင့်ချက်ကလည်း အလွန်မြင့်မားနေတာ တွေ့ရပါတယ်။ "The Odyssey" ရုပ်ရှင်ကိုတော့ လာမယ့် ၂၀၂၆ ခုနှစ်၊ ဇူလိုင်လ ၁၇ ရက်နေ့မှာ ရုံတင်ပြသသွားဖို့ စီစဉ်ထားကြောင်း သိရပါတယ်။
Ref: World of Reel

Superman ရုပ်ရှင်ရဲ့ဘတ်ဂျက်ဟာ ကန်ဒေါ်လာ သန်း ၂၀၀ ကျော်အထိရှိနေ
ဇွန် ၇၊ ၂၀၂၅။
Warner Bros. လက်အောက်ခံ DC Studios ရဲ့ ပထမဆုံး ပွဲထွက်ရုပ်ရှင် Superman ဟာ လာမယ့်ဇူလိုင်လ ၁၁ ရက်နေ့မမှာ ရုံတင်ပြသမှာဖြစ်ပါတယ်။
Superman ရုပ်ရှင်ဟာ DC ဇာတ်ကောင်တစ်ယောက်ဖြစ်တဲ့ Superman ရဲ့ စူပါဟီးရိုးဘဝနဲ့ သာမန်လူတစ်ယောက်ကြားဘဝကို တင်ဆက်ပြသမှာဖြစ်ပြီး Guardians of the Galaxy သုံးကားတွဲရဲ့ဒါရိုက်တာ James Gunn က ဇာတ်လမ်း၊ ဇာတ်ညွှန်းနဲ့ ဒါရိုက်တာ နေရာတွေကနေ ပူးတွဲတာဝန်ယူရိုက်ကူးထားတာဖြစ်ပါတယ်။
Superman ရုပ်ရှင်ဟာ ဒါရိုက်တာ James Gunn အတွက် ၂၀၂၃ ရုပ်ရှင် Godzilla Minus One ရဲ့ ရိုက်ကူးတင်ဆက်မှုအနုပညာကနေ စိတ်ကူးဉာဏ်ကွန့်မြူးမှုတွေရရှိခဲ့ကြောင်း James Gunn က ဝန်ခံခဲ့ပေမယ့် Superman အတွက် ရိုက်ကူးရေးဘတ်ဂျက် ဘယ်လောက်ကုန်ကျလဲဆိုတာကိုတော့ ထုတ်ဖော်ပြောခဲ့ခြင်းမရှိပါဘူး။
The Wrap မဂ္ဂဇင်းရဲ့သတင်းအရ Superman ဟာ ကန်ဒေါ်လာ ၂၂၅ သန်းအထိ ဘတ်ဂျက်ကုန်ကျမှုရှိခဲ့ပြီး Warner Bros. ဟာ Superman ရုပ်ရှင်ကနေ ကန်ဒေါ်လာ သန်း ၇၀၀ ကျော်ရရှိမှသာ ဒီရိုက်ကူးရေးဘတ်ဂျက်နဲ့ ကုန်ကျစရိတ်ကို ပြန်လည်ကာမိမှာဖြစ်ကြောင်းသိရပါတယ်။ Warner Bros. ဟာ ယခင် DCEU ရုပ်ရှင်တွေမှာလည်း အများအပြားအရှုံးပေါ်ခဲ့ရတာကြောင့် ယခု Superman နဲ့ ပတ်သက်ပြီး စောင့်ကြည့်ဖို့လိုတယ်လို့ ယူဆရမှာပါ။
Superman မှာ သရုပ်ဆောင် David Corenswet က Superman အဖြစ်၊ Rachel Brosnahan က Lois Lane အဖြစ်နဲ့ Nicholas Hoult က Superman ရဲ့ရန်သူ Lex Luthor အဖြစ် ပါဝင်ထားကြပြီး အခြား DC ဇာတ်ကောင်တွေဖြစ်တဲ့ Hawkgirl, Green Lantern, Krypto, Metamorpho နဲ့ The Engineer တို့ကိုလည်း တွေ့မြင်ရမှာဖြစ်ပါတယ်။

📖 ဒါဖတ်ပြီးမှ The Kashmir Files ကို ကြည့်ပါ
🚨 Bollywood Industry မှာ ဂယက်ထသွားခဲ့တဲ့ The Kashmir Files ရုပ်ရှင်
◼ ဒါရိုက်တာ Vivek Agnihotri ရဲ့ The Kashmir Files ရုပ်ရှင်ဟာ ၂၀၂၂ မှာ ထွက်ခဲ့သမျှ Bollywood ရုပ်ရှင်တွေထဲမှာ ဒါ Bollywood မှ ဟုတ်ရဲ့လားလို့တောင် ကြောက်စရာအကောင်းဆုံးလို့ပြောလို့ရပါတယ်။ ဘတ်ဂျက်ရူပီး ပျမ်းမျှ ၁၅ကုဋေကနေ ၂၅ကုဋေအထိ အသုံးပြုထားပြီး ရုံတင်ဝင်ငွေကတော့ ရူပီးကုဋေ ၃၄၀ ကျော် ရရှိထားပါတယ်။
◼ ၁၉၉၀ မှာ ကတ်ရှ်မီးယားဒေသက ဟိန္ဒူမျိုးနွယ်စုတစ်စုဖြစ်တဲ့ ကတ်ရှ်မီးယားပန်ဒစ်တွေကို လက်နက်ကိုင်စစ်သွေးကြွတွေက ဝင်ရောက်သတ်ဖြတ်ခဲ့တဲ့အတွက် ထွက်ပြေးကြရတဲ့အကြောင်းကိုအဓိကဇာတ်လမ်းတည်ဆောက်ထားတာပါ။ ဒါရိုက်တာ Vivek Agnihotri က ဒီရုပ်ရှင်အတွက် ကတ်ရှ်မီးယားပန်ဒစ်မိသားစုတွေကို အင်တာဗျူးပြုလုပ်ပြီး အချိန်လေးနှစ်ကျော်ကြာဇာတ်လမ်းတည်ဆောက်ခဲ့တာပါ။ အပြင်မှာတကယ်ဖြစ်ခဲ့တဲ့အဖြစ်အပျက်တွေနဲ့ကိုက်ညီလွန်းလို့ The Kashmir Files ကို ရုံတင်ပြသတဲ့အခါမှာ လာရောက်ကြည့်ရှုကြတဲ့ ကတ်ရှ်မီးယားပန်ဒစ်တွေက ဒါရိုက်တာ Vivek Agnihotri ကို အရိုအသေပေးပြီး ငိုကြွေးကြပါတယ်။ အိန္ဒိယဝန်ကြီးချုပ် နာယန်းဒရာမိုဒီကိုယ်တိုင်ကလည်း BJP ပါတီရဲ့တွေ့ဆုံပွဲတစ်ခုမှာ The Kashmir Files ဟာ အမှန်တရားကိုချပြထားတယ် လို့ ပြောခဲ့ပါတယ်။ ၁၉၉၀ ကာလမှာ ဟိန္ဒူပန်ဒစ်တွေသာမက အလယ်အလတ်တန်းလွှာ မွတ်ဆ်လင်မ်တွေ၊ ဆစ်ခ် နဲ့ ဗုဒ္ဓဘာသာဝင်တွေလည်း အသတ်ခံခဲ့ရပါတယ်။ သို့ပေမယ့် The Kashmir Files ရုပ်ရှင်ဟာ အငြင်းပွားဖွယ်ရာတွေပါဝင်နေပြီး သတ်ဖြတ်ခံရတာဟာ ဟိန္ဒူတွေတင်မကဘူး ဆိုပြီး နိုင်ငံရေးပညာရှင်တချို့ကသုံးသပ်ထားကြပါတယ်။
◼ ကျွန်တော့်ရဲ့ Bollywood ရုပ်ရှင်ကြည့်သက်တမ်းက နည်းပေမယ့် Hotel Mumbai နဲ့ The Attack of 26/11 တို့ထက်တောင် ဒီကားက တော်တော် dark ဖြစ်တယ်လို့ သုံးသပ်နိုင်ပါတယ်။
📌 ကတ်ရှ်မီးယားဆိုတာဘာလဲ
◼ ကတ်ရှ်မီးယားဆိုတာဟာ ဟိမဝန္တာဒေသက စတုရန်းမိုင် ၈၆၀၀၀ လောက် ကျယ်ပြန်တဲ့ လူမျိုးစုအများအပြားနေထိုင်ကြတဲ့ဒေသတစ်ခုဖြစ်ပါတယ်။ နှင်းကျတဲ့ရာသီဥတုရှိသလို မြက်ခင်းစိမ်းတွေ၊ ရေကန်တွေကြောင့် လှပတဲ့နေရာတစ်ခုလည်းဖြစ်ပါတယ်။ အိန္ဒိယ၊ ပါကစ္စတန်နဲ့ တရုတ်နိုင်ငံတွေနဲ့ထိစပ်နေသလို မဟာဗျူဟာကျနေရာတစ်ခုဖြစ်တဲ့အတွက် သုံးနိုင်ငံစလုံးက ကတ်ရှ်မီးယားကိုအပြည့်အဝအုပ်ချုပ်ခွင့်ရယူချင်နေကြတာပါ။ အိန္ဒိယဟာ ကတ်ရှ်မီးယားရဲ့ Jammu and Kashmir နဲ့ Ladakh ကို ထိန်းချုပ်ထားပါတယ်။ ပါကစ္စတန်ကတော့ ကတ်ရှ်မီးယားရဲ့ Azad Kashmir နဲ့ Gilgit-Baltistan ကို ထိန်းချုပ်ထားသလို တရုတ်နိုင်ငံကလည်း ကတ်ရှ်မီးယားရဲ့ Aksai Chin နဲ့ Trans-Karakoram Tract တို့ကို ထိန်းချုပ်ထားပါတယ်။
◼ ၁၉၄၇ မှာ အိန္ဒိယနဲ့ပါကစ္စတန် လွတ်လပ်ရေးမရခင်ကတည်းက ကတ်ရှ်မီးယားဟာအငြင်းပွားဖွယ်ရာဒေသတစ်ခုအဖြစ်ရှိနေတာပါ။ Indian Independence Act အရ အိန္ဒိယနဲ့ပါကစ္စတန်ခွဲလိုက်ပြီးနောက်မှာ ကတ်ရှ်မီးယားကိုဘယ်နိုင်ငံရဲ့လက်ထဲမှာမှမထည့်ပဲ လွတ်လပ်စွာရွေးချယ်ခွင့်ပေးခဲ့တာဖြစ်ပါတယ်။
◼ ကတ်ရှ်မီးယားပြည်နယ်ရဲ့စော်ဘွား Hari Singh ဟာ မူလက ကတ်ရှ်မီးယားကိုလွတ်လပ်တဲ့ပြည်နယ်တစ်ခုအဖြစ်ရပ်တည်ချင်ခဲ့ပေမယ့် ပါကစ္စတန်မျိုးနွယ်စုတချို့ရဲ့တိုက်ခိုက်မှုတစ်ခုကြောင့်အကူအညီရယူဖို့ ၁၉၄၇ အောက်တိုဘာမှာ အိန္ဒိယလက်အောက်ကိုဝင်ဖို့ဆုံးဖြတ်ခဲ့ပါတယ်။
◼ ကတ်ရှ်မီးယားအရေးကြောင့် အိန္ဒိယနဲ့ပါကစ္စတန်ဟာစစ်ပွဲတွေအဖြစ်များခဲ့ပြီး ၁၉၄၇၊ ၁၉၆၅ နဲ့ ၁၉၇၁ တို့မှာ အကြီးအကျယ်စစ်ဖြစ်ခဲ့ကြပါတယ်။ ၁၉၄၇ မှာ အိန္ဒိယဘက်က ကုလသမဂ္ဂကိုကြားဝင်ဖြေရှင်းပေးဖို့တောင်းဆိုခဲ့ပါတယ်။ ကုလသမဂ္ဂဘက်ကတော့ ကတ်ရှ်မီးယားမှာလူထုဆန္ဒခံယူပွဲကျင်းပပြီး ကတ်ရှ်မီးယားဟာဘယ်နိုင်ငံလက်အောက်မှာရှိသလဲဆိုတာဆုံးဖြတ်ဖို့အကြံပြုခဲ့ပါတယ်။ ဒါပေမယ့် လူထုဆန္ဒခံယူပွဲမကျင်းပခင်အထိ ကတ်ရှ်မီးယားမှာ အိန္ဒိယနဲ့ပါကစ္စတန်တပ်တွေဟာနေရာယူထားကြပါတယ်။
◼ ၁၉၄၉ ဇူလိုင်လမှာ ကုလသမဂ္ဂရဲ့အကြံပြုချက်အတိုင်း အိန္ဒိယနဲ့ပါကစ္စတန်ဟာ အပစ်အခတ်ရပ်စဲရေးနယ်စပ်မျဥ်းသတ်မှတ်ဖို့သဘောတူညီခဲ့ကြပြီး ကတ်ရှ်မီးယားကိုနယ်ပယ်ခွဲလိုက်ပါတယ်။ ၁၉၆၅ နဲ့ ၁၉၇၁ တို့မှာ အိန္ဒိယနဲ့ပါကစ္စတန်တို့စစ်ဖြစ်ကြသလို ၁၉၉၉ မှာလည်း ပါကစ္စတန်ကျောထောက်နောက်ခံ လက်နက်ကိုင်တပ်တွေနဲ့လည်း အိန္ဒိယဟာတိုက်ပွဲတွေဖြစ်ခဲ့ကြပါတယ်။
◼ ဒီကနေ့ခေတ်မှာတော့ ဒေလီရော အစ္စလာမ်မာဘတ်ဟာ ကတ်ရှ်မီးယားကိုထိန်းချုပ်ထားပြီး အိန္ဒိယပိုင်ကတ်ရှ်မီးယားနဲ့ ပါကစ္စတန်ပိုင်ကတ်ရှ်မီးယားဆိုပြီး ရှိပါတယ်။
◼ ကတ်ရှ်မီးယားဒေသက အိန္ဒိယပိုင်ကတ်ရှ်မီးယားနယ်မြေမှာ နှစ်သုံးဆယ်ကျော်ကြာ လက်နက်ကိုင်တိုက်ပွဲတွေရှိခဲ့သလို ဆက်တိုက်မတည်မငြိမ်ဖြစ်နေပေမယ့် ခရီးသွားလာမှုတွေကတော့ရှိနေပါတယ်။ အိန္ဒိယဘက်ကတော့ ဒီတိုက်ခိုက်မှုတွေဟာ ပါကစ္စတန်ကြောင့်ဖြစ်ရတာဆိုပြီး စွပ်စွဲခဲ့ပါတယ်။ အိန္ဒိယဖွဲ့စည်းပုံအခြေခံဥပဒေပုဒ်မ ၃၇၀ အရ အိန္ဒိယပိုင်ကတ်ရှ်မီးယားနယ်မြေဟာ နိုင်ငံခြားရေး၊ ကာကွယ်ရေးနဲ့ ဆက်သွယ်ရေးကိစ္စမှအပ ကိုယ်ပိုင်ပြဋ္ဌာန်းခွင့်၊ ကိုယ်ပိုင်အလံအသုံးပြုခွင့်ရှိသလို Jammu and Kashmir အနေနဲ့ ပြည်သူများအတည်တကျနေထိုင်ခွင့်၊ အိမ်ခြံမြေပိုင်ဆိုင်ခွင့်နဲ့ ဆက်စပ်အခွင့်အရေးတွေကို ကိုယ်ပိုင်ဆုံးဖြတ်ခွင့်ရှိပါတယ်။ ဒါ့အပြင် ပုဒ်မ၃၇၀အရ ကတ်ရှ်မီးယားပြည်နယ်ပြင်ပက အိန္ဒိယနိုင်ငံသားများအနေနဲ့ ကတ်ရှ်မီးယားမှာအခြေချနေထိုင်ခွင့်မရှိသလို အိမ်ခြံမြေ ဝယ်ယူခွင့်မရှိပါဘူး။
📌 ၁၉၉၀ ကတ်ရှ်မီးယန်းဟိန္ဒူများလူမျိုးတုံးသတ်ဖြတ်ခံရမှု | 1990 The Exodus of Kashmiri Hindus
(ဟိန္ဒူပန်ဒစ်များသည် Exodus အသုံးအနှုန်းအား လက်မခံကြသော်လည်း သတင်းဌာနများနှင့်အစိုးရတရားဝင်ထုတ်ပြန်ချက်များတွင် Exodus ဟု သုံးနှုန်းကြသည်။)
◼ ဒါရိုက်တာ Vivek Agnihotri ရဲ့ The Kashmir Files ရုပ်ရှင်မှာတော့ ဟိန္ဒူပန်ဒစ်လေးထောင်ကျော် အသတ်ခံခဲ့ရတယ်လို့ဖော်ပြထားပေမယ့် အိန္ဒိယအစိုးရဘက်ကတော့ ၁၉၈၈ ကနေ ၁၉၉၁ အတွင်းမှာ ဟိန္ဒူပန်ဒစ်၂၁၇ယောက်သာအသတ်ခံခဲ့ရတယ်လို့သတင်းထုတ်ခဲ့ပါတယ်။မ

Karate Kid: Legends ရုပ်ရှင်ဟာ ပြီးခဲ့တဲ့ ပိတ်ရက်မှာ အမေရိကမှာ ဝင်ငွေ ဒေါ်လာ ၁၉ သန်းနဲ့ စတင်ပြသခဲ့ပြီး ဝင်ငွေပိုင်း ရလဒ် အခုထိမကောင်းသေးပါဘူး။
Sony ရဲ့ ကနဦးခန့်မှန်းထားတဲ့ အဖွင့်ငွေ ဒေါ်လာ သန်း ၃၀ အထိ မျှော်လင့်ထားပေမယ့် မှန်းချက်နဲ့ နှမ်းထွက် မကိုက်တာတွေဖြစ်လာခဲ့ပါပြီ။
ဒီရုပ်ရှင်ဟာ PG-13 အဆင့်သတ်မှတ်ထားတဲ့ ကိုယ်ခံပညာရုပ်ရှင်ဖြစ်ပြီး၊ အမေရိကရဲ့ Box Office တတိယနေရာမှာပဲ ရပ်တည်နိုင်ခဲ့ပါတယ်။
ဒါပေမယ့် ပရိသတ်တွေရဲ့ တုံ့ပြန်မှုမှာတော့ CinemaScore မှာ A- အဆင့်ရထားပြီး၊ ဝေဖန်ရေးဆရာတွေဆီကတော့ ရောထွေးတဲ့ သုံးသပ်ချက်တွေ ရရှိထားပါတယ်။
ဒါပေမယ့် ဒီရုပ်ရှင်ဟာ Karate Kid ရဲ့ အမာခံ ပရိတ်သက်တွေအတွက်ပဲ Target ထားတာဖြစ်တဲ့အတွက် တခြား ပရိတ်သက်တွေစီကို မထိုးဖောက်နိုင်သေးပါဘူး။
ဒေါ်လာ ၄၅ သန်းနဲ့ စျေးသက်သက်သာသာထုတ်လုပ်ထားတဲ့ ဒီရုပ်ရှင်ဟာ အရင်းကျေဖို့တော့ တော်တော်ကြီး လိုဦးမယ်လို့ မြင်မိပါတယ်။
၂၀၁၀ ခုနှစ်က ဂျက်ကီချန်းနဲ့ ထွက်ခဲ့တဲ့ Karate Kid reboot ရုပ်ရှင်ကတော့ အဖွင့်မှာ ဒေါ်လာ ၅၅ သန်း ရရှိခဲ့ပြီး ကမ္ဘာတဝှမ်း ဒေါ်လာ ၃၅၉ သန်း ရရှိခဲ့ပါတယ်။ ဒီတစ်ခေါက်မှာတော့ ဂျက်ကီချန်းနဲ့အတူ မူရင်းသရုပ်ဆောင် Ralph Macchio လည်း ပြန်ပါဝင်ထားပေမယ့်၊ ၁၅ နှစ်ကြာမှ ပြန်လာတဲ့ ပရိသတ်တွေကိုမဆွဲဆောင်နိုင်တော့ဘူးလို့ဆိုရပါမယ်။
လက်ရှိမှာတော့ အမေရိကမှာ Lilo and Stitch Live Action က ဒုတိယမြောက်ပိတ်ရက်မှာ ထိပ်ဆုံးနေရာကို အလွယ်တကူ ဆက်လက်သိမ်းပိုက်ထားပြီး ဒေါ်လာ ၆၃ သန်းထပ်ရခဲ့ပါတယ်။ Mission: Impossible - The Final Reckoning ကတော့ ဒုတိယနေရာမှာ ဆက်လက်ရပ်တည်ထားပြီး ဒေါ်လာ ၂၇.၃ သန်းရထားပါတယ်။
လက်ရှိမှာတော့ ဇာတ်ကားကောင်းတွေကြားထဲမှာ Karate Kid: Legends ကတော့ ကြောင်ပျောက်နေပြီဖြစ်ပြီး အရင်းကျေဖို့ တော်တော်လေးရုံးကန်ရဦးမှာပါ။
Ref - World of reel

Ranbir Kapoor ရဲ့ Dhoom 4 ကို ၂၀၂၆ မှာ စတင်ရိုက်ကူးဖွယ်ရှိနေ
ဇွန် ၃၊ ၂၀၂၅။
Hindi ရုပ်ရှင်လောကရဲ့ နာမည်ကြီးအက်ရှင်ရုပ်ရှင် Franchise တစ်ခုဖြစ်တဲ့ Dhoom ဟာ Dhoom 3 အပြီးမှာ နောက်ထပ် စတုတ္ထမြောက်ရုပ်ရှင် Dhoom 4 ကို ဆက်လက်ထုတ်လုပ်ဖို့ စီစဥ်နေကြောင်းသိရပါတယ။
Dhoom ရုပ်ရှင်တွေရဲ့ထုတ်လုပ်ရေးကုမ္ပဏီဖြစ်တဲ့ YRF ဟာ Dhoom 4 ကို Barfi, Animal နဲ့ Sanju သရုပ်ဆောင် Ranbir Kapoor နဲ့ ဆက်လက်ရိုက်ကူးသွားမှာဖြစ်ပြီး Brahmastra Part One နဲ့ War 2 ဒါရိုက်တာ Ayan Mukerji က တာဝန်ယူရိုက်ကူးပေးဖွယ်ရှိနေပါတယ်။ နောက်ဆုံးသိရှိရတဲ့သတင်းတွေအရ Dhoom 4 ကို ၂၀၂၆ မှာ စတင်ရိုက်ကူးမှာဖြစ်ပြီး ၂၀၂၇ မှာ ရုံတင်ပြသဖို့စီစဥ်နေကြောင်းသိရပါတယ်။ သို့ပေမယ့် YRF ဘက်က တစ်စုံတစ်ရာအတည်ပြုထားခြင်းမရှိပါဘူး။
Dhoom 4 မှာ Ranbir Kapoor က ယခင် Dhoom ရုပ်ရှင်တွေကလိုမျိုး သူခိုးဇာတ်ကောင်နေရာကနေ ပါဝင်မှာလား၊ ပင်တိုင်သရုပ်ဆောင်တွေဖြစ်တဲ့ Abhishek Bachchan နဲ့ Uday Chopra တို့ ပြန်လည်ပါဝင်လာမှာလား စတဲ့ အချက်တွေကိုတော့ မသိရသေးပါဘူး။
ယခင် Dhoom သုံးကားမှာ John Abraham, Hrithik Roshan နဲ့ Aamir Khan တို့က အဓိကပါဝင်သရုပ်ဆောင်ခဲ့ကြပါတယ်။